رواية ليتني واجهتك الفصل الحادي عشر 11 بقلم مريم الطائي

ليتني_واجهتك

مريم الطائي

اماني

اني اماني صديقه سدره الي روح بل روح فتحت عيوني لدنيا صديقتي سدره وماعرف غيرها وبعدين صارت هدير بس اعز صديقه هيا سدره احسها جزء مني اما هدور هذيجه القلب وجناات الغيوره هذيجه غاليتي

قصتي مع صهيب صح قصتي مابيها حزن بس حزن جنات وسدره يكفي

جنات وسدره خواتي ومابس صديقاات

حزنها الي ياكل بكلبي دائما وافكر واصفن شلون هيجي صار مع كل وحده بيهم سدره صديقتي واختي صح بس مرات اكولها تستاهلين الي صار من ايدج كلها ماواجهتي احد وماكلتي الاحد السر ضل محفوظ بكلبج 16سنه 16سنه سر كاتمه هذا السر بكلبها وماحجت لاحد بي خافت لاتخسر بس سدره خسرت الكل معاها

ويلادها

وعلي

لؤي

جنات

اها صح ويلاد سدره خلي افتحلكم شباك عليهم وانشوف ويلادها تعالو معايا

مشهد مستقبلي

دكيت الباب صهيب وصلني عليهم فتحتلي الباب الشغاله

هلو وين سدره

ماما سدره راح

اوكي ويلادها هينا

اي اتفضل

هههه تحجي مكسر ماتعرف تحجي عربي فلبينه لان

صهيب:: ها حبيبي اتروحين لو تضلين

اماني؛: لاحياتي راح اضل بس اخذ ابني لؤي معاك وعوف سدره عندي

صهيب؛: ماشي يالا بابا لؤلا امشي انروح افتلك بل سياره

دخلت جوى وطلعتلي ماريه بنت سدره تركض

خاله امونه جيتي عدنا

اي حياتي جيت تعالي ابوسج

بوستني واني بستها

اشو امج ماكو ليش

والله ماعرف جاها موبايل وركبت السياره وراحت وماكالت

اخاف طلعت مع ابوج

ابويا هو غير ملتهي ب مرته العوبه شفنهم بل مول وماما انقهرت واتعصبت وبس رجعنا دخلت لغرفه كسرت كل اغراض وجانت تبجي واتصيح

اووف ياربي ليش هيجي صار بيهم

خاله حلو نحنا عايشين بيت وابويا عايش مع مرته الي ماتصل اضفر ماما

الله كتب هيجي حبيبتي لاتضوجين وين حسوني صيحي خلي اشوفو

اي تدللين كاعد يلعب بل تاب

راحت صيحت حسوني وجا يركض عليه ويبوس بيا فدوه ينكرطون واشويه وسدره اجت اتسالمنا واتبوسنا اني وهيا احسها حييل تعبانه صيحت ماريه وكالتها اخذي سدره الاصغيره معاج لعبيها ورحنا اني وهيا لغرفه

سدره الي مته اتضلين بهذا حزنج كولي

اماني حزني مايروح يكبر يوم بعد يوم يوميا اتخليو نايم بحضنها واتبوسه ويبوسها ويسوي معاها الي جان يسوي معايا

بس سدره خلص انسي علي عاش حياتو وانتي هم لازم تعيشين

شلون انسى شلون امونه فهميني حبنا اني و علي ماينسى ابد ماينسى

بس هو نسى نسى ياسدره افتهمي هذا الشي اخوج غلط غلطه ماتنغفر وانتي دفعتي الثمن عرفتي انتي

كامت اتصيح وتبجي وصارت تكول.......

ضليت مصدومه من كلامها سدره شنو تحجي اش دا اتكول ليش ماحجت ليش ماكالت ليش ماوجهت

16سنه وهيا كاتمه هذا السر بكلبها.......

نرجع لماضي ....

بعد الحادث مال علي الي صار جنات جانت من تشوف لؤي يداوم ادوم معا ولؤي جان يتعب وينقهر بسبب علي ويضل مايداوم او يجي لكلية ويرجع وجناات ترجع معا

جنت معجبه ب صهيب زميلنا الي بل كروب طبعا اهلي يعرفون صهيب صح بس اشويه مامنفتحين مثل اهل سدره بس بابا شافو مرة وكال خوش وصى صهيب علينا

شافو مرة ب بيت اهل سدره وعمو ابو سدره كال لبابا هذا زميلهم بل كلية وخوش ولد حباب وبابا حييل حبو

صهيب جان شخصيه حلوه عندو دمو ينحب جنت معجبه وجنت احس من طريقه كلامو مرات هو هم معجب ومرات اكول لا الي حد مايوم من الايام كاعده بمكان الي دائمآ نجتمع بي نحنا الكروب وكاعده وحدي لؤي وجنات ماموجودين وضايجه ع سدره وعلي وصهيب هم اتاخر ماجا جنت مدنكة راسي وكاعدة ادحك ع ملازم

سمعت واحد كالي

ليش الحلو كاعد وحدو

صهيب

رفعت راسي وابتسمت

اي صهيب تسمحيلي اكعد

اي ليش لا اكعد

اروح اجيب شي نشربو لو نمشي لكافتريا

وهيجي ع ناشف اتشربني شي

ههههه وتدللين امشي اطيب كباب يلوك لهذا الحلك الحلو

دنكت ابتسمت وخجلانه

مشينا لمطعم وطلب صهيب كباب وكعدنا نتريك سويت لفة ودا اكل منها اخذها من ايدي واكلها هو

امونه هاي اطيب لكمة اكلها

ضليت صافنه وكلبي يدك سريع معقوله يحبني معقوله ماعرف شنو اسوي ضحكت

بل عافيه

اريد اغير الموضوع وجهي صار احمر من الخجل

صهيب ليش اتاخرت

وليش اتغيرين الموضوع

ههه لا ماغيرت بس دا اكولك يعني اتاخرت

حان ازدحام الطريق ع ماجيت ...اماني

هممم

احم

جا النادل شال الاكل وطلبنا جاي

شنو رايج نضرب هاي المحاضره

ماشي اني هم مالي وهس ادخل

اوكي لعد اماني

همم

عندي موضوع واريد احجي معاج واتمنى تسمعي لاخير

اي اسمعك صهيب

دحكي يابنت الحلال اني ماعرف احجي مقدمات احب ادخل بل موضوع كبل يعني مو مثل المسلسلات التركيه يكعد ساعه يحجي وبل اخير اتصير شغله ومايكدر يكولها هههه

هههه اي كول

الحمدلله انتي مو جماعة جنات هههه

عرفت شنو يقصد ابتسمت وكتله

هههه لا مو من جماعتها

هههه صحيح ع سالفة جنات هذاك اليوم اني عندهم كاعدين وهيا جت وكاعدة هيا وهدير يتابعون مسلسل تركي طلع البطل قدم حلقه لحبيبتو كدام العالم وكعد ع رجلو ادحك ع جنات امخليه ايدها ع حلكها ومتفاجئه واتكول قدم الها الحلقه مو لبطله ههههه

هههههه

وترجع اتكول ل لؤي والله اذا ماقدمت الحلقه كدام الكليه كلها فلا ارضى بيك هه

ههههههه خرب بنصج جنات مخبله والله هاي

والله كعدت تتعارك مع لؤي واتكوله الي هيجي اتسوي وهذاك بس يكولها اي اي تدللين اخر شي كالتو والله دا تضحك عليه ماتسويها كالها مادام تعرفين ماسويها ليش اتكولين وهاي الكل ميت من الضحك عليها

هههههه خبله

خرب بنصج جنات نسيتيني شنو دا اكول اي اماني اني احبج

فتحت عيوني وضليت مصدومه (كالها واخير كالها ههههه)

اماني لاتصفنين هيجي اذا عندج شعور تجاهي مستعد اتقدملج هليوم كبل باجر واذا لا انضل اصدقاء وكأنه شي لم يكن

دنكت خجلانه

انعجبت بيج واخلاقج اول من شفتج بس ضليت سنه كامله ادرس نفسي واتاكد من حبي الج ويوم بعد يوم كبر حبي اماني انت بل نسبه الي كلشي احسج جزء من عندي

بس صهيب

عيون صهيب

اني جايه ادرس ماجايه ادور حب وعشك

ومنو كايل اني ادور حب وعشك كتلج اذا كلتي اي اتقدملج كبل

بس لو حتى وافقت اهلي مايزوجوني هسا ع ماتخرج وهيجي خايفه لاارتبط بيك وراح اخون ثقه اهلي

احاول معاهم وابوج رجال طيب وهيجي لو حتى انضل مثل جنات ولؤي شنو يكول ابوج اني حاضر ها امونه شنو كلتي

ماعرف

بداخلي ابجي من الفرح كل هذا الحجي واني مدنكه براسي

ارفعي راسج اريد ادحك ع هذا الكمر. الحلو

رفعت راسي وارجف وايدي انكسرت من العصر

ليش ترجفين هاج اشربي ماي واهدي

خجلانه

اموت ع الخجل اني

شربت ماي وجريت نفس

ها امونه

عوفني افكر بعدين

براحتج فكري من هينا اربع سنوات وشوكت ماكلتي اي اني حاضر

هزيت براسي وبدخلي ميته فرح بس لازم اصير ثكلية ههههه

خلص الدوام ورجعت لبيت وافكر واضحك اخير صارحني صهيب اني كلش احب ابويا حنون علينا ب شكل ودائما من يصير شي معانا مانغبي ع ابونا كاعده بغرفتي جت اختي عليه وهم تعرف اني معجبه ب صهيب ودائما احجيلها

ها امونه شبيج تصفنين وتضحكين

وي ميار هليوم صهيب صارحني

جذب كولي والله

والله العظيم وخايفه حييل ماعرف شنو اسوي

وانتي شنو كلتيلو

كتلو خليني افكر

اي عفيه صيري ثكيلة عوفي هسا مرة مرتين من يسالج كوليلو بعدني افكر خلي يركض وراج

ههههه وي خطيه

مو خطيه الي يحبج يركض وراج طول العمر بس بابا لازم يعرف حتى مانخون الثقه

صحيح بس استحي

لا لاتستحين كومي انروح هسا انكولو

وين بابا

كاعدين هو وماما شفت ماما اخذت جاي وراحت لغرفتهم انروح عليهم هسا

ماشي كومي

رحنا اني واختي ميار دكينا الباب ودخلنا

ابو اماني؛: هلا بناتي الحلوات هلا

هلابيك بابتنا الحلو

اكو بل وجهكم حجي احجولي

ميار ؛ بابا امونه اتريد اتكولك ع شغلة نحنا من دخلنا لكلية قسمنا بالله مانخون الثقة الي انطيتنا هيا ونحنا كد الوعد والقسم

اماني؛: بابا راح احجيلك شغلة بس خايفه اذا عرفت اتركني الكلية

ابو اماني؛: اذا مو غلطانه انتي بي اكيد ماراح اعاقبج

اماني؛ لاوالله بابا ابد بس مستحيه من عندك

ابو اماني؛: احجي بنتي الحلوه

اماني؛: بابا هليوم صهيب تعرفو

اي اعرفو شبي

جا عليه وحجى معايا هو يريد يتقدملي

اني احجي واحس نار يطلع من جسمي من الخجل ومدنكه

وانتي شنو كلتيلو

كلتلو اهلي ماينطون الى ماتخرج واني ماكدر اخون ثقه اهلي كالي انتي اذا اتكولين اي هليوم اجي اخطبج هليوم قبل باجر

يعني افتهم من كلامج انتي موافقه

سكتت ماحجيت

ها بابا

بكيفك بابا

اموني بنتي دفعت نص عمري حتي اوصلج بهاي المرحله. اتصيرين دكتوره ماكدر افرط بيج واخليج تنخطبين واخاف ماتكملين دراسة

ام اماني؛ ابو اماني اذا هيا موافقه انطيها وخلي مثل لؤي وجنات

ابو اماني؛: ياام اماني العشرة الي بين اهل علي واهل جنات عشرة عمر مو يوم وليلة ويعرفون لؤي منو وشنو

اني صح شفت صهيب ونعم التربية بس هذا مايكفي اخلي بنتي تطلع وتدخل معا وبعدين اهلي شنو راح يكولون والله اماني محجوزه لصهيب

ام اماني؛: اذا موافقه انسوي بس خطبه وكدام العالم وعقد محكمه وملا وانخليهم اربع سنوات شكو بيها

ابو اماني؛؛ والي يسال

ام اماني؛: انكول دا يدرسون ومايريدون يتزوجون هسا

ابو اماني ؛: روحو بابا لغرفتكم وخلوني افكر وامونه بنتي اهتمي بدرسج وصهيب اذا فتح هذا الموضوع لاتنطي امل ولاتكطعين الامل

بابا والله اذا انت ماتقبل عادي مامشكله المهم انت

اني هم انتو وساعدكم وان شاء الله يصير خير روحو باباتي

رحنا لغرفة اني واختي وافكر يارب ابويا يوافق ينطيني لصهيب

مرت ايام وصهيب مرتين سالني واكولو دا افكر الى حد مايوم من الايام امي سالتني اذا صهيب فتح معايا الموضوع وكتلها فتح بس اني كتلو دا افكر راحت ع بابا واشويه وابويا صاحني

امونه بابا تعالي اكعدي

رحت كعدت

بتني اماني اني صح جنت ماقبل الى حد ماتتخرجين يالا تنخطبين بس اذا انتي موافقه اني ماكف بطريقج وانتي تعرفين نفسج اذا تكدرين تزوجين وانتي تدرسين بكيفج واذا تنخطبين وتدرسين بكفيج بس ماكدر اخليج مثل جنات ولؤي الى اذا خطبة كامله اتصير انتي شنو كلتي بابا موافقة

دنكت براسي مستحيه

احجي بنتي شنو رايج

الي اتريدو بابا انت اعرف بمصلحتي

يعني اخليج تنخطبين ومن تخرجون تزوجين

بكيفك بابا الي اتشوفو صح سوي

وهذا الصح

واني من ايدك هاي ع ايدك هاي

الله يرضى عنج بنتي الحلوه كبرت وصارت عروس

دنكت مستحيه وفرحانه

خابري لؤي اريد احجي معا

اوكي بابا

اخذت موبايلي ودكيت ع لؤي وفتحت سبيكر

ها خبله خير

ها عمو لؤي شلونك

اها هلا عمو الحمدالله عبالي اماني

هههه عادي اختك بعد

امبله والله عمو اختي ونعم الاخت بس بيني وبينك بعدين تطلع عينها واتكوم ادور عزايم هههههه

ههههه ول لؤي ماتبطل سوالفك

هههه اش اسوي ياعمي خلي نضحك باجر انموت

اسم الله وليدي طول العمر شلون صار اخوك

الحمدالله عمو نتظر رحمه الله

ان شاء الله خير اكولك لؤي اش تعرف انت ع صهيب

شلون يعني

يعني كلشي

اها مثل ماعرف نفسي اعرفو

خوش ولد

لؤي... كلمة خوش قليلة بي

اكولك لؤي اني سالتك انت ابني ماريدك لان صهيب صديقك تكعد تمدح بي

لؤي.... لا ياعمو اماني اختي الله شاهد حالها حال هدير وبعدين لو صهيب بي شي ينعاب جان كتلك بس والله صهيب خوش ولد وانطيك عنوانهم روح اسال عليهم ب نفسك

صادك صادك وليدي بس هذا زواج وانت تعرف بعد

لؤي.... صحيح عمي كلامك بس والله انطي اماني ولادير بال

ماتخسر

ان شاء الله وليدي الله يقدم بي الخير بس اني هم اروح اسال ع اهلو وسمعتهم بل منطقة همه وين ساكنين

لؤي... ساكنين ب تلعفر ب .......

خوش ابني هو كولي يداوم قسم داخلي لو يجي ويروح

لؤي... لا عمو يجي ويروح ب سيارتو مايحب الاقسام

الله يسهلكم وتنجحون

لؤي... امين يارب

سلم وراح وبابا اتحضر وطلع لتلعفر ومارجع ل ليل ويبتسم وكعد يحجينا الناس تمدح ب سمعتهم وخوش ناس ذهب

ثاني يوم طلعت لكلية واكفه دا اقرأ بل ملازم جا صهيب يضحك

صباح الحلو

احم صباح النور صهيب

شلونج

زينه وانت

فرحان

وشنو السبب

تعرفين اشكد كبرتي بعيني البارحة

عرفت شنو يقصد بس سويت روحي مادري

ليش شنو سويت البارحة

البارحة ابوج جاي يسال عليه بل منطقه وعرفت انت كن كتيلو

دنكت براسي مبتسمه

اشكد جنت احجي لامي واختي عليج وجنه فرحانين بيج هسا فرحنا اكثر امونه يشهد الله اموت عليج

اني ماخون ثقه اهلي بيا وصح انت نيتك حلال بس ابويا لازم يعرف بكل خطوة اخطيها

ارفعلج القبعه والله انت بنت الاصل

صهيب اكدر اطلب منك طلب

اي تدللين كولي عيني

عفيه احتمال بابا يجي ع كلية هليومين او باجر هاي اليومين اذا شفتني وحدي لاتقرب يمي اخاف يجي ويشوفنا وحدنا

تدللين اذا شفتج وحدج ماتقرب يمج واذا كروبنا موجود اتقرب

شكرا صهيب

قلب صهيب انتي

عكس كل يوم نشاقه ونضحك هلمره حيل مستحيه وبل فعل بابا جا نفس اليوم وسال ع صهيب وكل تمدح بي وبينا

قررنا بس يرجع علي ويكوم بل سلامه يخطبني وكبل اتصير عقد ملا......

الجمعه اتنفقنا العقد بل بدايه ردنا اناجل بس علي ماقبل كال احضر العرس والخطوبه مامشكله هسا وهم بابا اشويه مايقبل يعني اضل باسم صهيب وبدون عقد

سدره ماقبلت تحضر وخابرتها واتوسلت وعلي يحجي معاها يالا قبلت تجي جانت اتكول ماكدر اعوف علي

صهيب قبلها خابر بابا وحجى معا ويوم العقد جاب ابو وعمامو وامو واختو خطيه ماعندو غير اخت وحده فقط

وامبين اتموت علي

لبست كلابيه وخليت اسماء اخت سدره اتمكيجني مكياجها حلو ولؤي جاب الكاميره ويصور وعقد الملا كملنا واشتغلت الهلاهل وصهيب باسني من راسي

وجناات وسدره يحضنوني فرحانين مثلي

ام صهيب واختو يهلهلون ويبوسون بينا وامو مامصدكه اتكول ابني صار عريس

هذيجه الليله كلها نحجي اني وصهيب بل موبايل مانمنا الى 4 الفجر

صار الاحد الدوام صهيب خابر بابا واخذ الاذن من عندو هو ياخذني لكلية وهاي الفتره كلها اخويا يوصلني لان سدره ماجانت موجوده اروح معاها واني اضوج من الخط من اني وصغيره لو بابا يوصلني لمدرسة لو عمو ابو سدره ياخذنا وهيجي اتعودت حتى فترة الي سدره جانت تدرس ب بيت اهل علي جان بابا يوصلني

جا صهيب عليه ع البيت اتصافح معايا وباسني

صباح الخير حب

صباح النور

عيونج حمر

غير ب سببك انت ماخليتني انام

خلي نزوج ونسيج النوم خلاص

صهههههيب

عيون صهيب

لاتحجي معايا هيجي والله استحي

الطريق كلو يسوق ويدحك عليه

هههه بله صهيب كافي سوق لاتضل ادحك عليه

ههههه

وصلنا الكلية صهيب مد ايدو وخليت ايدي ب ايدو ومشينا بل كلية والطلاب الي يعرفونا يدحكون علينا لان يعرفون نحنا مجرد اصدقاء لاكثر وصلنا لكينا سدره وجناات ولؤي واكفين

سدره ب يدها سله جكليت و ورد

ولؤي وجنات بس اتقربنا كامو يصفكون ويغنون يمه متت من الخجل

سدره؛:كلللووششش

ولؤي هو وجناات والطلاب كلها ادحك علينا

اماني؛: فضحتونا

سدره؛: احسن لان هسا من نزلتي من سيارة صهيب الله يعلم اش حجوا وكالو

اماني؛: والله انتو ماكو مثلكم

حضنت جنات وسدره وطلعنا نحتفل

لؤي؛: هليوم راح اعزمكم ع فلافل ع حسابي

الكل؛:هههههه

جنات؛: كريم يروحي كريم من طول عمرك همه صح صهيب واماني مايستاهلون بس انت طيب حبيبي

سدره؛:عذه اتكولين عازمنا ع لحم غزال اذا فلافل صار كريم لعد لو لحم غزال جان كل كلمة ويكول اني عزمتكم

هههه كلها تضحك

لؤي؛: تدللين اعزمج فول

صهيب؛: لا انت هليوم ناوي تعلكها حرب بل ليل

الكل؛:ههههههه

جنات:؛ دحك حبيبي هذوله مو مال عزيمة مايرضون ب نعمة الله

سدره؛: ابويا اذا لؤي ياكل فلافل لازم يفرش 20 مرة

جنات؛: هههه ماحبها اموت من الفلافل

صهيب؛: لعد ام راس ماتحبينها وتجين اطعمينا فلافل

وكفنا نضحك ونشاقه ونراجع اشويه واحد يسال الثاني

لؤي سال سؤال جان يتشاقه يشوف سدره شنو اتكول

لؤي:؛شنو وظفة الكبد

سدره؛: تنطي لاعز شخص بحياتك

الكل؛:الله

لؤي؛: بله سدره ماخايفه

سدره ؛ امبله خايفه

صهيب؛: صحيح خايفه

سدره؛خايفه لاكبدي مايرهم لجسم علي

جنات؛:اوووي سدره اشكد تحبين علي انتي

سدره؛: روحي من الدنيا شنو اوصفو قليل

لؤي؛: ولي سدره هذا ابو راس تذكرين

سدره؛:ههههه اي اذكر واني قزومتو

صهيب؛: ليش اتكولين ابو راس

اماني؛: مو سدره وعلي من جانو صغار سدره جانت تحجي مصلاوي قحي وعلي ماجان يقبل يضوج وجان يكولها عدلي لسانج وماجانت تقبل وجان كل ماتحجي مصلاوي قحي يكولوها قزومه وهيا اتكولو ابو راس

صهيب؛:ههههه حلو امبين طفولتكم

لؤي؛ اي والله ايام حلوة نحنا عبود وهدير وجنات واماني وعلي مختار اخو سدره وسدره جانت ايام حلوه ماتتعوض ....

خلص الدوام وعزمنا لؤي ع الغده وطلعنا نتغده كلنا ومشت ايام حلوه الحمدالله مع صهيب .....

جنات

اني جنات ضحية كتمان سدره صح سدره شافت حزن بحياتها بس يمكن حزني اصعب المي اصعب سدره يمكن يجي يوم ويتصلح كلشي بس اني مستحيل يتصلح زين ليش شنو ذنبي اني شنو سويت وهيجي صار

سدره خافت بس دمرتنا كلنا معاها سدره انانيه خسرت الكل معاها في سبيل لاتخسر حب حياتها كلنا نخطى وكلنا انضم اشياء انشوفها من صعب نحجيها بس مرات لازم نحجي وانكول ونواجه الحياة مواجهة والبطل يواجها حتى مايجي بل اخير ويكول ياريت واجهت ليتني واجهتك لان هذاك الوكت ماراح تنفعل ليتني ولاراح تنفعل كلمة ياريت الندم مايفيد بعد كلشي انتهى بعد القلم انرفع والورق جفت راح ارجع جنات القويه الي ماتنكسر اني قويه مانكسر وراح انتقم من سدره وكتمانها راح اخذ ثاري وثار انكساري

الحب والعشق الي جان بيني وبين لؤي العلاقة الي عشناها

من نحنا اطفال جنه اصدقاء ومن كبرنا وصرنا اخر مرحله ثانويه حبينا بعض

اني انسانه غيوره ع لؤي وبدرجة كلش جبيره

سنين عشنها بايامها الحلوه الي تجنن

لؤي مدللني دلال يمكن ماكو بنت تدلل مثلي من اكول دلال مااقصد فلوس وطلعه ولبس وكشخه فقط

دلال يعني احترام يعني حب يعني عشق يعني مودة يعني رحمة

جنه مانكدر انام الليل اذا مانسمع صوت بعضنا

حتى من نكون زعلانين يتصل بيا لؤي ويكولي خلي نضل زعلانين بس خلي واحد يسمع صوت الثاني لان اني ماكدر انام اذا مو ع صوتج

من اشوف دلال لؤي احس نفسي فراشة طايره بغابة ورود

وبكثر مادللني صرت اغار عليه حتى من نفسي وبل سادس اعدادي طلع معدل صيدله واني ماخليته يروح وكتلو بيومها لو تعوف حلمك وتمشي معايا لكلية الطب لو اني اعوف حلمي وامشي معاك لكلية الصيدله واني ماحبها

لؤي... بس انتي تعرفين بيا اني عاجبني اصير صيدلاني

جنات... وانت تعرفني اني اريد اصير دكتوره

لؤي.... اذا اجي معاج يعني لازم اعيد السادس وارجع اتعب من جديد

جنات.... اني ماريدك تدخل جامعة قبلي

لؤي.... بابا والله ماشوف غيرج ليش تضلين تغارين

جنات....اني راح اعوف الطب وادخل صيدله معاك بس هاي السنه ماتدخل جامعة انت

زعلت وضجت وسديت الموبايل بعدها بشويه خابرني واول من فتحت الموبايل

لؤي... يروحلج فدوه الطب والصيدله والسادس وتعب عمري وحلمي بس اشوف ضحكتج

جنات...هههههه

لؤي.... ول يالوتي لاتزعل مني والله لخاطرج اعوف كلشي صار تدللين هاي السنه اعيد السادس واطلع طب عام وياج ان شاء الله تامريني بعد بشي دكتوره جنات

جنات.... الله لايحرمني منك يروح جنات انت

مرات الحب ماينوصف بكلمة لو كلمتين مرات اكو كلمات بل قلب اشكد من حاولنا نكتبها ونعبر عنها يخونا التعبير ويخونا القلم.....

لؤي؛: حبيبي انتي عرفتي شنو صار ب علي ولازم انسافر لهند

جنات؛: لؤي فدوه لاتروح والله خايفه

جنو حبيبي هذا اخويا مستحيل اعوفو

هسا سدره مو راح تبرع

احتمال سدره كبدها مايطابق واني ومحمد من المقترحين

اوف لؤي

خليت ايدي ع وجهي وكمت ابجي

جا حضني ومسح دموعي وباسني من راسي

مايهون عليه دموعج بس علي غالي ياجنات

واني ماغالية عليك

انتي اغلى من روحي ياجنات والله بس ماكدر ماكدر اشوف اخويا محتاج النا

عوفني لؤي لو تحبني جان فكرت بيا وماتعوفني

شفتو ضاج وعصب هو حييل مدللني ويحبني ب شكل حنون عليه

شوفي جنات اني باجر امسافر ردتي او لا وافقتي او لا اني رايح

درت ظهري على وكمت ابجي

ها اديرين ظهرج سهله الله كريم جنو

طلع من الغرفه وركع الباب قوي ودخلت هدير من شافت لؤي هيجي

شبيج جنو

مابيا شي هدير

متكاونين

اني رايحة لبيت

طلعت من البيت واني ابجي

دخلت بيتنا اخويا شافني

شبيج جنو تبجين حضني ويهدي

لؤي

امزعلج والله هليوم اطيح حضو

دا يريد يروح ومسكتو

لا لا مامزعلني بس هو من المقترحين لتبرع ب كبد لعلي وباجر راح يسافر

ماتتوقعت اختي هيجي اتسوي انتي بل حك اتكولين روح

تعالي فوتي تعالي

دخلنا جوى وامي وابويا كاعدين كبل كالو ليش تبجين

جنات؛: ماما لؤي راح يسافر لهند حتى يصير من المتبرعين ماجنت متوقعه يسويها من صدك

ابو جنات؛ وليش هاي بيها لعبة مو كعدو كلهم انتفقو وقنعو علي يسافر وهسا انتي شعليج

جنات؛: شلون اش عليه بابا خايفة

ابو جنات؛: تعالي وحدتي لاتخافين ادعيلو بعدين لاتنسين صديقتج هيا اول مقترحة

ام جنات؛:ادعيلو ماما خطيه مايصير هيجي

كمت ابجي وبابا وماما يهدون بيا سافرو ثاني يوم كلهم وسلمت ع الكل بس ع لؤي ماسلمت بس كلبي دا يتكطع بس خايفه علي

مر اسبوع واني ابجي مثل الطفله وادعي لؤي مايسوي العمليه صح سدره هم غاليه عليه وصديقه طفولتي بس لؤي ماتوقع يوم اكدر اعيش بدونو اذا صار بي شي

يوميا اخابر لؤي وابجي وهو يهدي بيا ويحجي معايا كلام حلو ماكدر اذا ماسمع صوتو نفس اليوم الي سافرو بي اتصلت وبجيت واحجي معا

بعد اسبوع خابرني

الو جنو شلونج

هلاحبي وانت شلونك

بعدج ضايجه

اي طبعا

افرحي سدره رهم الكبد ان شاء الله

صحيح تحجي

اي والله ان شاء الله

الله يكومهم بل سلامة بس انت خمه زعلان عليه

هو اني اكدر ازعل من جناتي

حجينا اشويه يحجي معا ب حنيه اخخ يالؤي ياقطعه من كلبي يروحي وكوني ....

ام سدره

ضلينا كاعدين يم الغرفة العمليات ونتظر بس شلون راح يخلص الوقت عبر الساعه والساعتين وعبر من الوقت جثير تعبنا من الانتظار ورحنا ارتحينا اشويه ورجعنا مره ثانيه نسال وبلغونا احتمال اطول 12ساعات العمليه بس سدره تطلع قبل علي

عبر فوك السبع ساعات وطلعو سدره من غرفه العمليات واخذوها ع العناية المركزة

يمه بنتي شفتها وابجي واشهك عليها رحنا اندحك عليها من الشباك

طلبنا من الدكتور انشوفها وسمحنا

دخلت لعنايه وجان دايفكها البنج وتحجي

علي ع ل و ين

امي سدره

عللللي

يروحي علي زين

جا لؤي دخل

ها عمه شلون صارت

دا يفكها البنج

صح جانت تقهر بس من كام يفكها البنج ضحكتنا اني ولؤي كامت تحجي قحي واتلخبط بل حجي مالها

ابو غاس(ابو راس) فلا اعدلو السيني (لساني)

لؤي؛؛ههههه هاي رجعت ع ايام الطفوله ادري شالو عقلها لو كبدها ههه

ام سدره؛؛هههه مو بوعيها

سدره؛: لولاااا

لؤي؛: ها يابا

سدره؛:انجب

لؤي؛:ههههه مقبوله منج ابويا

سدره ؛: اريد علي هذا... عبدالله... الحقير ...الله ..يشيلو ..

لؤي؛: انوب اندارت ع عبدالله

سدره؛:اخخخ ...علي...عبدالله ... ما ...يحبك ..

لؤي؛: خرب بنصج سدره اشكاعده اتلوصين بل حجي

جت الممرضه وطلبت منا نطلع وسدره بعدها دا يفكها البنج

طلعنا بره ونتظر علي وعبرت ساعات وصار موعد علي وطلعو من العمليات وهم خلو بل عنايه المركز رحنا شفنا وبعدها طلعت اشوف سدره لكيتها كاعده

سدره

فتحت عيوني وجع ب صدري اخخ يارب اشكد دا يوجعني المكان بس ميخالف فدوه لحبيبي

جت الممرضه وحجيت معاها بل انكليزي ع علي وكالت بعدو بل عمليات بالي يمو حييل

ضليت بمكاني اسبح واقراء ايات وادعي لعلي يطلع بخير وعافية منها

نمت وكعدت لكيت الدكتور فوك راسي والممرضين دا يفحصوني سالت الدكتور

Is the patient still in surgery?

هل لايزال المريض في الجراحه ؟

No, the patient was discharged from the operation a few minutes ago

لاخرج المريض من العمليه قبل بضع دقايق

how is he now

كيف حاله الان

He is in good health and so are you

هو بصحه جيده وانتي كذلك

Thank you, doctor, and thank you for your hard work

شكرا لك دكتور وشكرا لعملك الجاد

You are most welcome and we wish you a speedy recovery

اهلا وسهلا بكم ونتمنى لكم الشفاء العاجل

راح الطبيب واشويه واجت ماما دخلت باستني

شلونج امي

الحمدالله ماما بس علي خمه دا يتوجع

زين ماما الحمدالله

اريد اروح اشوفو

ممنوع مايطلعوج من عنايه المركزه

عفيه ماما فدوه اريد اشوف علي روحي اسال الدكتور

هسا اخذ المترجم واروح علي

راحت ماما اخذت المترجم وراحت على ورجعت

ها ماما بشري

مايقبل ممنوع لازم اتضلين ١٠ايام بل عنايه المركز ولازم ترتاحين

اوف

يالا سدروه نامي ماما ولاتعذبيني ايام واتعدي ان شاءالله

غمضت عيوني واني مبتسمه وفرحانه حبيبي صار يحمل جزء مني

......

علي

اخخخ من سدره وحنانها شنو اكول بحقها قليل شلون اقدملها قليل عرضت روحها لخطر ب سبب حتى اعيش اني وفرحانه وتبتسم راح تبرعلي بكبدها شنو من كلب شالتو سدره يكون الله يقدرني اجازيها الي سوت معايا

فتحت عيوني ولكيتهم فوك راسي اول كلمه كلتها

سدره ...سدره وين

ابو علي؛: الحمدالله ع سلامتك وسلامتها يابا هيا هسا بل عنايه المشدده لازم اتضلون عشر ايام

يعني ..زينة

الحمدالله زينه وتحجي ومابيها شي وهسا عمتك كالتلي طلبت اتشوفك بس الدكتور ماقبل

جريت نفسي وحمدت ربي سلمو عليه وعافوني وطلعو

خليت ايدي مكان الكبد ودا اتوجعني مكان العمليه

اخخخ ياكبدي صار كبدج يمي صرت احمل جزء منج عندي اشكد وفيه انتي ياسدره عرضتي نفسج لخطر في سبيلي

حمدت الله وشكرتو وجنت ادعي يكومنا بل سلامه

سدره

عدت ايام واني روحي طاكه ع علي اهلي وبيت عمتي جان يوميا يضل اثنين يمنا

واصلا مرات اكولهم لاتضلون مامحتاجين الممرضين همه يقومون ب كلشي

عبر اسبوع وبدينا نتحسن طلبت من الدكتور اشوف علي وسمحلي

واني دا اريد اركب بل عربه شفت علي دخل ع عنايه اني شفتو كمت ابجي واضحك ولؤي دا يدفع بي

علي؛؛ شنو اقدملج حتي اوفي هذوله العيون الحلوات

سدره؛: حبك يكفي

علي؛: وعهد عليه حبج يضل طول العمر ومايموت الي حد ماهاي الروح اتموت

اتقرب عليه وماكدرنا نحضن بعض

قرب راسي ويشم ويبوس راسي لؤي طلع والممرضه هم طلعت

مسح دموعي وباسني من خدي

كافي حبيبتي ماريد اشوف دموعج بعد

دموع الفرح والله ياروحي

اخخ يالله اشكد احبج

واني اكثر مااسمحلك اتعوفني ابد ابد لو اي ضرف من الضروف لو مهم يكون الثمن

واني اكدر بدون هاي العيون

ابتسم وبستو من خدو وشميتو

يكولون كايمة تحجين قحي انت دا يفكج البنج

ههه صحيح؟

اي وكايله ل لؤي انجب وكن حجيتي ع عبدالله

من كال عبدالله ضليت صافنه يالله هذا الي ماحسبتلو حساب

اش حجيت

والله ماعرف لؤي يكول كامت تخربط المهم حبيبتي خمه اتحسين بوجع

لا حياتي فدوه لك

حجينا اشويه وبعدين راح لغرفتو وثاني يوم الدكتور شاف وضعنا مستقر كتبنا خروج بس لاكن لازم انضل بل هند

طلعنا الحمدالله من المستشفى بخير وسلامه ورحنا لبيت الي كن اجرنا ومحمد ولؤي وبابا حجزو ورجعو لعراق وبس ماما ضلت معانا هيا عمي وعمتي

وضعنا بداء يتحسن الحمدالله ودائما مراجعه مر فوك اسبوعين ع العملية ورحت راجعت وبشرني الدكتور الكبدي دا ينمو بشكل طبيعي فرحت بيومها حييل

تقريبا 6 اسابيع ويرجع ب صورةطبيعيه ان شاء الله

هليوم صارنا شهرين تقريبا بل هند الحمدالله اني وعلي اتحسنا بس علي ماقبل نرجع لعراق ب ساع كال انريد اتصير زينين وبعدها نتونس اشويه ونرجع

وبل فعل عبرت ع عمليتنا شهرين واشويه وجاني علي

ها حبي وين اتريدين اخذج

بكيفك

مادام بكيفي لعد بدلي بس البسي بنطرون

ماشي حياتي

بدلت لبست بنطرون وبدي وطلعنا كلنا من البيت

علي كن انتفق مع السايق قبلها وكبل السايق طلعنا بينا مشى مسافه طويله وبعدين نزلنا واتفاجأت ب فيل كدامي انصدمت

علي فيل هذا

هههه اي فيل تذكرين من جنه صغار من جنتي اتكولين دائما احلم اركب ع الفيل وهسا اني راح احققلج حلمج

حضنت علي بدون وعي

شكرا شكرا حبيبي مادا اصدك والله اول مره بحياتي اشوف فيل

ههههه يالا تعالي نركب على

اخاف علي دحك اش كبرو

لاتخافين هسا يساعدونا ونركب على

ام سدره؛: دير بالكم ماما

علي؛: ولايهمج عمه

جا صاحبو وجان يحجي بل هندي والمترجم يترجم ويعلمنا

مد الفيل رجلو وصعدت اني اول وحده بس ختمت القران ههههه

دير بالج حبيبي لاتخافين اكعدي زين

علي راح اكع

ماتكعين سدره اكعدي زين

اي كعدت

اي عفيه هسا اجي وراج وامسكج

كعدت وعلي صعد ع رجل الفيل وصلني وكعد ومسكني من خصري ولزكني حيل علي

عاد انت لاتستغلها فرصه

هههه خوش كعدة وخوش فرصة

خلى راسو ع كتفي ويشم بركبتي

علي راح اكع اخاف

سدره لاتخافين شبيج

بس عفيه خلي يمشي ع كيفو

وكام يمشي الفيل ع كيفو وامي اتصورنا من بعيد واني ميته من الخوف وعلي يضحك عليه

مشينا اشويه وبعدين نزلنا واني ارجف

اشكد جبانه انتي

اي والله بس بخيالي راكبه ع الفيل

هههه وهسا

هسا حبيبي حققلي خيالي

ههه قربان هاي الضحكه الحلوه اني اصير

اسم الله حياتي

اخذنا علي ورحنا لمطعم ومن دخلنا كعدنا كلنا ع طاولة جا النادل ب يدو كيكه وعلي كام ع حييلو يغني

هبي بير ذي تو يو

الي كاعدين بل مطعم اتقربو يمنا وهم كامو يغنو نسيت عيد ميلادي بس علي ماناسي

اتقدم علي باسني من كصتي

تتوقعين انسى احلى يوم ولدت بي معشوقتي

انت احلى شي صار بحياتي علي انت الحلم الي صعب يتحقق واتحقق

حضني من كتفي وطلع كلاده صغيره ولبسني هيا

كل عام وانتي بالف خير حبيبتي

وانت بالف خير ياروحي يادنيتي

اتمني امنية وطفي الشمعه

اتمنيت ربي يحفظلي علي واعيش معا حياة سعيده لاكن هاي الامنيه ماكملت فزيت من صفنتي ع صوت حسوني

حسين... ماما

سدره.. ها امي

حسين.. ابويا بل باب جا

مسحت دموعي وكمت لبست حجابي وطلعت على

سدره... هلا ابو حسوني اتفضل

علي... شلونج سدره

سدره.. بخير الحمدالله وانت شلونك

علي... ع الله جاي اشوف ويلادي

سدره... اي اتفضل ماري تعالي بابا جا

جت ماري تركض ع ابوها واتبوس بي

ماري.... بابا حبيبي ليش مادا تجي عدنا

علي.. جنت ملتهي باباتي اسف حقكم عليه

ماريه ... معذور باباتنا الحلو

علي... انعل ابو هاي غمازتج

ماري.... تشبه غمازه ماما غير

دحك عليه بنظرة مليانه اشتياق بس الي نكسر مايتصلح بعد لميت الصور الي جنت مخليتهم ع الميز واشوفهم شاف الصور واتقرب عليهم سحب صورة منهم جانت صورة قبل ماندخل لعمليات لؤي جان ماخذها النا

علي.... سدره

سدره... اي ابو حسين

علي... تذكرين

صفنت عليه بله هذا اش يحجي ليش اني ناسيه حتي اتذكر

سدره... اي اذكر وهم اذكر غدرك الي واذكر شلون حملتوني ذنب مختار ولؤي انت واهلك

علي... بس والله

سدره.. لاتبرر واتعيد نفس الكلام كل مره لو جنت اتحبني صدك ماخليت وحده ثانيه بحضنك

اتقرب راد يمسك ايدي سحبت ايدي

سدره... افتهم اني طلقتك هسا مو مرتك ولاتحاول تتقرب عليه شوف ويلادك واني رايحه لغرفتي واذا حبيت تشرب شي كول لشغاله هيا اتسويلك

سحبت الصور واخذتهم ودخلت لغرفه ركعت الباب قوي وحضنت الصور وابجي بحركه واشهك احس كلبي يريد يطلع من مكانو رجعت اكلب بل صور من جديد وابجي واتذكر....

اتعشينا وكملنا ورجعنا لبيت وبعدها اتونسنا ونسه حيييل حلوه وايام وحجزنا ورجعنا لعراق .....يتبع