رواية شظايا شيطانية الفصل الثاني 2 بقلم الكاتبة صرخة المشتاقة
.•◦•✖ ||البارت الثآني || ✖•◦•.
إهانات مستمره ..
بساطة التفكير ..
قتل البراءه ..
إحتيال من طرف ..
وأنانيةٌ من طرف آخر ..
أسوء الكوابيس .. تتجسد على أرض الواقع ..
وتستمر المآسي ..
على نفس الوتيره ..
✖ ( زجاج رخيص ) ✖
غربت الشمس واختفى ضوئها من فوق هذه الـ حآره الفقيره ..
بيوت صغيره .. منازل شعبيه قديمه .. وممرات ضيقه ..
فقر شديد وجوع أشد ..
ومع هذا ...
الاغلبيه يعيش حياة بسيطه ممتعه ..
الجميع متعاون والآمان يعم المكآن ..
في أحد المنازل ..
طابق واحد .. من ثلاث غرف ومطبخ + حمام ..
فتحت باب الشارع وهي تغطي وجهها بذي الطرحه الـ قديمه ..
لفت عيونها بالمكآن بعدها قالت بتأفف: وينه ثائر ما جاء لحد اللحين .. أذن المغرب وخلصت الصلاه وأكيد لسى يلعب كوره أفف ..
لاحظت ولد الجيران مار فنادت عليه: يا محسن .. محسن ..
لف محسن عليها وقال: آآه الهنوف .. ها نعم ..
الهنوف: شف لي وين ذا الشقي ثائر ..؟!
رفع محسن حاجبه وقال: كم تعطيني ..؟!
ميلت فمها وهي تقول: تبي جزمه ..؟!
حط محسن ايده ورى راسه بلا مبالاه وهو يقول: اذا دوري واحد غيري يناديه لك ..
وابتعد عن المكان وهي تغلي من العصبيه ..
قفلت الباب بقوه وهي تقول: وجـــع ..
جاها صوت امها من داخل يقول: يوجعك يا الخبله ..
تورطت الهنوف فكملت امها تقول: يعني بتدفعين ثمن الباب لا انكسر ..؟!
رفعت الهنوف صوتها تقول: آسفــــه ..
شالت الطرحه من على راسها ودخلت لداخل ..
رمتها عالارض عند بنت خالتها وجلست جنبها وهي تقول بضجر: ذاك الولد بيجنني .. حياته كلها لعب ومشاكل ..
ابتسمت بنت خالتها وقالت: لو تحن المشاكل عقب حب الخشوم .. كان حبيّت خشم المشكلة وإستحت ..
تنهدت الهنوف وهزت راسها بيأس وهي تقول: حامد زيد كمان ..؟!!
بنت خالتها بحماس: يا شيخه كتاباته إبداع .. اعجبني البيت اللي قبل شوي كثييير .. يا زينه ويا زين كتاباته ..
الهنوف بملل: شعر ..!! مدري وش اللي يعجبك بالشعر .. ممل وكئيب ويطفش .. طيف بلييز لا تحومين كبدي ..
طيف بحماس: اسمعي اسمعي هذا البيت .... اللي يخاف من الظما يترك لنا طرد السراب .. واللي ماهو بقد الظلام ووحشته لايسهره .. وقسسسم انه قوي في اشعاره ..
الهنوف: لا والله مو صاحيه بنت الخال ..
خرجت الام من المطبخ وقالت للهنوف: وين اخوك ..؟!
الهنوف: يمه ناديته بس قال ماني بجاي .. قليل ادب ولسانه طويل ..
الام: انتي اللي لسانك طويل مو هو ..
ميلت فمها وهي تقول: كالعاده .. لو ايش ما سوى هو المفضل عند امي ..
طيف: هههههه لا تنسي انه هو الولد الوحيد ..
الام: ما رجعت اختك ..؟!
الهنوف: لا .. قالت ان اليوم بتتأخر عشان فيه عايله حاجزيهم عندهم زواج ..
دخلت الام غرفتها وهي تقول: الله يعينها ..
لفت طيف على الهنوف وهي تقول: ناديته وقال ماني بجاي ..!!! متأكده انه هذا اللي صار ولا كالعاده كذبه من كذباتك ..
قامت الهنوف وهي تقول بلا مبالاه: عساك ما صدقتي ..
خرجت الام من غرفتها وهي لابسه عباتها وقالت: ياللا إنا رايحه .. بغيت انتظر لين ترجع اختك بس شكلها بتتأخر .. اسمعوا .. لا تفتحوا الباب لاي احد الا اذا كانت اختك او اخوك .. فاهمين ..
الهنوف: حاااااضر ..
الام بصرامه: ما ابغى اللي صار الاسبوع اللي فات يتكرر .. فاهمه يا بنت ..؟!
الهنوف بإبتسامه غبيه: قالت انها من طرفك .. فتوقعت انك ارسلتيها ولا كذا ..
الام: ويعني إنا بأرسل لكم شغاله مثلا ..؟! خلوا عندكم شوية عقل .. وخصوصا انتي يا المخفه .. ليتك تطلعي على بنت خالك او اختك ..
الهنوف: اها .. كالعاده .. إنا اللي اتخاصم بالبيت .. الله لنا ..
شالت الام كيس الحنا واغراضها وهي تقول: شب بس .. ياللا مع السلامه ..
الهنوف: بااااااي ماماتي ..
طيف: مع السلامه يا أمي .. **هي خالتها لكنها تعودت تناديها *أمي** ..
طلعت الام من البيت والهنوف واقفه عند الباب عشان تقفل الباب وراها ..
كان في هذا الوقت شاب مار ولما شاف الام راح يسلم عليها ..
انجنت الهنوف اول ما شافته وقفلت الباب وقالت بصوت شبه منخفض: طيييف .. طيييف يا بنت الحقي الحقي ..
تركت طيف الكتاب اللي معاها وجت بسرعه عند الهنوف وهي تقول: وشو ..؟!
الهنوف بحماس: خقة الحاره يسلم على امي .. يا شيخه اول سعودي اشوفه خقه .. أزين واحد بحارتنا ..
فتحت الباب شوي وكملت: يا بنت حتى انه كشخه وتحسينه رزه مع ان ملابسه عاديه وهم كمان فقرا مثلنا ..
طيف: اللحين انتي ناديتيني عشان اشوفه ..!!!
الهنوف: طيب بالله عليك مو خقه ..؟!
طيف: شوفي تبغين الصراحه هو حلو وهو الوحيد اللي مخلي عندي امل في شبابنا ..
الهنوف: ههههههههههههههههه وبقووووه ..
طيف: خلاص قفلي الباب .. والله لو شافتنا امك راح نصير مفرش للصاله ..
الهنوف: فعلا فعلا ..
وقفلت الباب ..
اما عن ذاك الشاب اللي قالوا عنه خقه ..
كان واقف مع امهم وقال: لا لا يا خاله بالعكس مرره سهله مع انها غثيثه ..
ام ثائر: بس اللي اعرفهم من الحريم اللي اروح انقشهم ان الجامعه صعبه وكثير يحملوا مدري وشو المهم المواد ما يجيبون فيها درجات زينه ..
ضحك الولد وقال: هههههه هذولا الفاشلين .. زي اللحين بنت اخوك مو جامعيه .. اللي اعرفه ان درجاتها دايم قمه ..
رفعت الام حاجبها وهي تقول: ومنين سامع هذه الاخبار ..؟!
تورط الشاب وقال: ههههه يا خاله الله يهديك كل حريم الحاره يتكلموا عنها ويقولوا هي اللي رافعه راس الحاره ..
ام ثائر براحه: اها صح .. يالله ما اطول عليك .. الحريم مستنيني .. سلم لي على امك ..
الشاب: يوصل إن شاء الله ..
بعدها راحت الام والشاب يراقبها بنظره ..
لف يطالع في البيت بإبتسامه بعدها عقد حواجبه وهو يشوف ثائر متجه للبيت ..
جاء عنده ومسك فلينته من ورى وهو يقول: هيه يا ولد ..
ثائر بضجر: آآآه يا العله وش تبي ..؟!
الشاب: انت كم عمرك ..؟!
ثائر بتأفف: 12 سنه ..
الولد: يعني تعترف انك كبير .. اذا ليش تدخل البيت وتتجول فيه براحتك ..
ثائر: بيت امي عندك مانع ..؟! اصلا وش دخل اهل اهل اهلك ..؟!
رفع الشاب حاجبه وقال: فعلا ملسون .. المهم حتى لو كان بيت امك .. المفروض خلاص تتغطى عن بنت خالك .. مو ماخذ راحتك وكأنها اختك ..
ثائر بنفاذ صبر: وانت شعليك ..؟!
ضربه على راسه وهو يقول: احترم اللي اكبر منك ..
ثائر: ايييي والله لاقول للامام ان جهاد ضربني وخلاني ابكي ..
فتح جهاد عيونه بصدمه وهو يقول: وش هالفقاش يا ولد ..!!! عيب عليك .. بطل كذب .. ودي اعرف من فين متعلمه ..
بعدها ابتسم وكمل: عالعموم روح اشتكي .. مستحيل يهاوشني هههههه لا تنسى انه ابوي ..
ظهرت ملامح الحزن تدريجيا على ثائر وقال بهدوء: يا حظك .. ابوك عايش .. ويحبك .. ويدافع عنك .. وما يصدق أي احد الا انت .. يا حظك ..
اختفت الابتسامه من وجه جهاد بعدها فك بلوزة ثائر وقال في نفسه: "يا حظي ..!! انت لسى بزر" ..
تنهد وقال: ابوك مو ميت .. يمكن يكون عايش ويدور عنكم ..
لف عليه ثائر وقال بعصبيه: مستحييييل .. من يوم واحنا صغار وهو ناسينا .. امي دايما اسمعها تدعي عليه .. ومره سمعتها تقول لاختي الكبيره ان سبب الفقر اللي احنا فيه هو تخلي ابوي عنا .. تقول انه لو طلقها عالاقل كان يمكن تزوجت وعاشت احلى من ذي العيشه .. اكرهه كره مو طبيعي ..
حط ايده على صدره وكمل: كلهم يعايروني ويقولون ولد النقاشه .. لو ابوي ما تركنا كان امي ما اضطرت تشتغل كذا وكان كمان اختي الكبيره ما تركت دراستها عشان تشتغل .. ليه يصلح فينا كِذا ..؟!! عشان أمي كانت يتيمه ومالها أب يوقفه عند حدّه ..!! أكره هالأناني الجشع ..
بعدها دخل البيت وصفق الباب وراه ..
ظل جهاد يطالع في باب البيت فتره بعدها قال بهدوء: الله يعينهم ويسهل امورهم ..
جلس ورى الباب بعد ما قفله وضم رجله بألم ..
ضاقت عيونه وبدأت الدموع تنزل تدريجيا وكلمات زملائه في المدرسه يتردد في راسه ..
*ولد النقاشه ما عنده ابو*
*هههههه شفتم دايم يروح مع اخته بالصباح للمدرسه*
*امس امه نقشت رجل امي*
*هههههه بيتهم مافي رجال .. مافي الا هذا الورع*
*ابوه ما تركهم إلا لأن امه فيها بلا*
شهق وغطى وجه بإيده وبدأ يبكي بصمت ..
مرت طيف من قدامه واستغربت لما شافت حالته ..
جلست قدامه وقالت: ثائر .. وش فيك ..!
شهق ولا رد عليها فعقدت حواجبها وقالت: تبكي ..؟!! ليه مين مزعلك حبيبي ..؟!
ثائر بصوت منخفض: انقلعي ..
تنهدت وقالت: طيب ليش تبكي ..؟! لو قلت لي ليش راح ابعد عنك ..؟!
مسح دموعه قبل لا يرفع راسه بعدها طالع فيها وقال: إنا ما ابكي يالخبله .. ملقوفه ..
قام وراح للغرفه وقفل الباب وراه ..
هزت راسها وهي تقول: ما يبكي الا اذا احد ضايقه بالكلام .. الله يصبرك ..
اندق الباب فقربت وقالت: مين ..؟!
جاها صوت بنت خالتها تقول: افتحي أنا حور ..
فتحت لها طيف الباب فدخلت حور وقفلته وراها ..
طيف: تأخرتي اليوم ..
حور: يب .. المفروض يخلص دوامي الساعه ست بس عاد تحصل مثل هذه الضروف اللي تخليني اتأخر ..
دخلت الصاله وكملت: الله لا يوريك اليوم فيه وحده وقحه جت للمشغل ..
دخلت طيف وراها وجلسوا على الكنب الارضي وكملت حور: من دخلت وهي تتأفف وتسب الرايح والجاي .. هي جايه متأخره والمفروض تنتظر دورها ومع هذا مستعجله وتبغى تكون قدام الكل ..
طيف: سلامات ..!!
حور: مو صاحيه .. وفي النهايه دخلنا إنا وياها بهواش .. المديره كانت راح تطردني بسبب اللي صار .. ما اقول غير حسبي الله عليها ..
طيف: طيب حاولي المره الجايه ما تتمشكلي كذا .. لا طردتك ما راح تلاقي شغل وخصوصا ان ما معك شهادات تشغلك ..
حور: وقسم حاولت ما اتمشكل معها بس هي رفعت ضغطي .. وخصوصا انها سبتني كمان ومتهمتني بالغباء وقلة الخبره .. عساها الساحق الماحق إن شاء الله ..
طيف: هههههههههه ذكرتيني ببيت شعر من اشعار حامد زيد يقول فيه ....
قاطعتها حور: لااااا واللي يسلمك مو ناقصه وجع راس زياده ..
طيف بحزن مصطنع: حرام عليك .. ليه محد هنا يقدر اهتماماتي ..
حور: اولا خلي اهتماماتك عدله بعدها يصير خير ..
تنهدت طيف بعدها قالت: المهم .. بروح اشوف للإحصاء الغثيث هذا واذاكره .. بكره فيه اختبار ..
حور: عليك إختبار وماسكه كتب حامد زيد تقرأي فيها ..!! يبغالك تصفيق بصراحه ..
طيف: هههههههه مستحيل ابدأ مذاكره قبل لا اقرأ شيء من اشعاره .. أشعاره إلهام بالنسبه لي ..
حور بتسليك: اوكي اوكي روحي ذاكري ..
قامت طيف وهي تقول: ههههه تسلكي .. واضح ..
بعدها دخلت الغرفه عند الهنوف وفتحت شنطتها .. ابتسمت لما شافت الهنوف مشغوله في كتابها الكيمياء ..
بنت خالتها ذي تعشق شيء اسمه كيمياء ومحاليل وتجارب ..
ودها تفتح مختبر .. تجري فيه تجارب ..
تحط محلول فوق محلول ..
تفشل مره وتنجح مره ..
ودها تجرب هالاشياء وتعيشها ..
لكن الضروف اللي عايشينها حبطت أحلامها كلها ..
//
ضحيه أخرى من ضحايا ذاك الشيطان ..
زجاج رخيص .. لا صاحب له ولا بائع .. إشتراه الشيطان بأبخس الأثمان ..
وعندما تحطم تحول لشظايا رخيصة الثمن ..
شظايا سيُستعمَلون بقذاره .. وبأنانيه .. وبإحتيال ..
فالزجاج الرخيص مهما كان أصيل فهو في النهايه رخيص ..
رخيص يستطيع الكل التحايل بهم ..
وبيعهم .. وبيع شظاياهم من دون مراعاة لهم ..
الام/ عمرها حول الـ52 سنه .. طيبه وفيها كل صفات الامومه + صارمه وكلمتها دايم تمشي .. تشتغل نقاشه عشان تلقى لها شيء يعيشهم ..
حور/ عمرها 24 سنه .. وقفت دراستها بعد ما خلصت ثاني ثانوي عشان تساعد أمها بمصاريف البيت وتشتغل .. ماهره في القص والمكياج وعشان كذا تشتغل في مشغل في اطراف حارتهم ..
الهنوف/ ثاني ثانوي علمي .. مخفه ودايم تكذب حتى في ابسط الامور اللي ما يبغالها كذب .. مرحه وتعشق شيء اسمه كيمياء ودخلت علمي عشانه مع انها زفت في الرياضيات والحساب ..
ثائر/ مثال للشقاوه وطوالت اللسان .. نفس اخته .. مخفه ودايم يكذب بس كذبه اقل منها بكثير .. يدرس صف سادس ابتدائي ..
طيف/ مات ابوها وامها مطلقه من زمان ولا تعرف عنها شيء .. واللحين عايشه ببيت عمتها من وعمرها عشر سنوات .. من مجانين حامد زيد بشكل خاص والادب الشعري بشكل عام .. محبوبه من بين كل اللي حولها للطافة روحها وطيبتها .. اول جامعه عمرها 19 سنه ..
▒▓ ×✖• ►︿︿︿︿︿︿︿︿︿︿︿︿◄•✖× ▓▒
ضيآع الانسانيه ..
ضمير ميت ..
قلوب قآسيه ..
وتبلد المشاعر ..
عجرفه .. غرور ..
ونرجسيه طاغيه ..
✖ ( زجاج غالي ) ✖
دقت تلك الساعه الجدارية ذات الطراز الاغريقي الفريد معلنة دخول منتصف الليل ..
طراز اغريقي .. بداخل قصر من قصور مدينة جده الحضاريه ..
ساحه اماميه واسعه يتوسطها شلال يحمل تمثال ملاك ..
خضره منتشره واشجار شاهقه وورود ملونه ..
قصر عالي .. فخامته مساويه لكل القصور المجاوره له ..
وبداخله ..
وعلى ذيك الكنبه المخمليه ..
جالس بكل غطرسه وكبرياء وبإيده الايباد حقه ..
فاتح صفحته بتويتر ويستعرض حسابات قام بتهكيرهم في اقل من ثلث ساعه ..
حساب ديني + حساب توعوي + حساب خيري ..
ضحك بكل عجرفه وهو يقول: مليت من نصائحهم .. حذرتهم ...
كمل بحزن مصطنع: بس ما سمعوا لتحذيري ..
ابتسم وهو يشوف ذيك الخقه تمنشنه بصوره من صورها الفاتنه + المنحطه ..
ضاقت عيونه وهو يراقب تفاصيل جسمها ..
ميل فمه واحلى بلوك أعطاها ..
ما اعجبته .. ما دخلت مزاجه ..
رفع راسه عن شاشة الايباد لما سمع صوت احد ينزل من الدرج ..
ضحك لما شاف اخوه الصغير وقال: يا هلا بكركر .. اقصد كيرو .. هههههه لا لا نسيت اسمك ريكا مو ..؟! ههههههه ..
ولا حتى بنظره .. نزل الشاب من الدرج ولا عبر اخوه الكبير ولا بنظره وحده بس ..
نزل وكأنه اصلا مافي احد كلمه ..
ضحك اخوه وقال: في العالم اكثر من عيد .. عيد الفطر والاضحى والحب والام وغيره .. بس عندنا عيد جديد وللاسف ماله وقت محدد .. تعرفون متى يجي ..؟!
اشر على اخوه الصغير وكمل: إذا هذا الآدمي نطق بكلمه وحده .. اوووووه اصلا بعض الاحيان تمر السنه وهو ما نطق ههههههههههههههههههههههههه ههههههههههههههه ..
خرجت اخته من الجناح الرياضي وهي تقول: أسامه انت ما تمل وانت تحاشره بكل شيء ..
لف اسامه على اخته اللي من مشيتها يبين غرورها وشموخها وقال: هههههه جتني الثانيه كمان اللي اسمها اتوقع جينا .. او نجي او يمكن بكره بنجي ههههههه ..
حط ايده على وجهه وهو يقول: يا ربااااه يا امي .. أي مزاج كنتي فيه لما سميتيهم بذي الاسماء المضحكه هههههه ..؟!
ميلت اخته فمها بكل جاذبيه بعدها طالعت في اخوها الثاني وهو يطلع من القصر ..
غريبه وين بيروح في مثل هذا الوقت ..؟!
ما اهتمت .. لانه اصلا ما يهمها لا هو ولا اخوها الكبير ..
كلهم يجيبون المرض ..
رمت جسدها النحيل اللي يضج بالفتنه عالكنبه وهي تنادي بصوتها الجهوري: يا مآآآري .. مــــآآري وصمخ ..
جت الخدامه جري وقالت: نأم ..
لفت بعيونها على اصابعها وقالت: اسمعي .. شوفي لي مناكير بلون تيفاني وجيبيها .. مليت هاللون ..
هزت راسها وهي تقول: حادر ..
بعدها راحت فحطت رجل على رجل بكل هدوء ..
لفت بعيونها على اسامه فشافته مشغول بالايباد ..
ميلت فمها وقالت: اسامه اسمع .. ابغاك تفك الهكرز عن حساب وحده بكلاسي .. لها يومين تترجاني اني اطلب منك كذا ..
لف اسامه عليها وقال: وذي وش نكها ..؟!
هزت كتفها وهي تقول: مدري .. فيه كلمة انثى .. اتوقع انثى استثنائيه او عريقه او كذا يعني .. عدد الفولوز حقها فوق الـ17 ألف ..
ابتسم اسامه بخبث وقال: آها عرفتها .. بشعه وتستعرض صورها ..! تحلم افكه .. ولا تحاولي معاي ..
حركت ايدها بلا مبالاه وقالت: انت حر .. بس خبرتك عشان افتك من هذرتها كل يوم ..
رفع حاجبه وقال: لهالدرجه بايعه صاحبتك ولا تهمك ..؟!
طالعت فيه بإستنكار وقالت: صاحبتي ..؟! أنا اصاحب الاشكال الزباله ذي ..!!
اسامه: ههههههههههههههههههههههههه ههههههههههه طول عمرك وقحه .. عكس معنى اسمك تماما ..
ابتسمت وقالت: آنجي .. الملاك .. مو شرط اكون ملاك بطيبتي وذي الهذره الفاضيه .. إنا فاتنه .. واتحدى احد مثلي ..
اسامه: آآه آنجي .. كويس ذكرتيني فيه .. طيب ذكريني بأسم ذاك المعقد ..؟!
رفعت حاجبها بعدها قالت: ابحث في قاموس الاسره ..
قامت من مكانها واتجهت للمصعد ..
دخلته وضغطت زر الدور الثالث بعدها انشغلت تشوف شعرها بالمرآه المعلقه ..
ميلت فمها بضيق وقالت: ممل .. مليت من شكله .. أي عقل كنت فيه لما انجنيت عليه .. وخلاص كرهته من بعد ما قلدوني نص كلاسي .. صدق خرفان انثويه ..
رفعت عيونها لفوق وهي تقول بتأفف: يا ربي .. ودي اعمل شيء ولا أشوف له كوبي في اليوم اللي بعده .. هفف ..
انفتح المصعد فأتجهت لجناحها وصادفت في طريقها امها طالعه من جناح اختهم الصغيره ..
طالعت الام في بنتها دلوعتها آنجي وقالت: غريبه صاحيه لهذا الوقت ..؟!
هزت آنجي كتفها وهي تقول: ومن متى انام في منتصف الليل .. بس حسيت بكسل فنزلت للصاله الرياضيه اعمل تمرين لجسمي .. بس غريبه طالعه من غرفة حلا ..
لفت الام عيونها تطالع في الغرفه بعدها قالت: متضايقه ومدري وش فيها .. تبغى تغير المدرسه اللي تدرس فيها ..
انجي بإستغراب: وليش ..؟!
الام: تقول شفت اليوم وحده بشعه بالابتدائي وما يشرفها تجلس في نفس المدرسه معها ..
انجي: هههههههههههههههههههه طيب غيريها لها ..
الام: طبعا .. كله ولا انها تتضايق .. جدا شيء مخزي .. مين هذه الغبيه اللي مدخله بشعه لمدرسه داخليه ..؟!
أنجي بلامبالاه: مام لا تنسي ان هذه الانواع من الناس لسى ما انقرضوا ..
اتجهت لغرفتها وهي تقول: ونسيت اقولك ان ولدك كِرار طلع من القصر ..
عقدت الام حواجبها بإستغراب ..
كِرار يطلع في مثل هذا الوقت ..!!!
لو قالت اسامه كان ما استغربت ..
لكن كِرار غريبه ذي عليه ..
وخصوصا بالليل مستحيل يطلع بما ان عنده العمى الليلي ..
تنهدت بألم لولدها .. صار مثل الآله .. لا إحساس ولا حتى يتكلم ..
متبلد تماما ..
نزلت لتحت وكالعاده ولدها الكبير جالس عالايباد حقه ..
ميلت راسها وهي تقول: هكرز كمان صح ..؟!
رفع راسه ولما شافها قال: يا هلا بأمي .. يا هلا بالغاليه .. ههههههههه فاتك بس .. عبيط وقسم بالله عبيط .. منزل رقمه وحاط حسابي ويقول اللي يقدر يهكر هالحساب راح يعطيه عشر آلاف ريال ..
هز راسه بلا وكمل: والمشكله يهدد فيني ويقول راح يسكر صفحتي قريب .. يا عمي روح ضحكني المجنون هههههههههههه ..
طالعته امه ببرود وقالت: اسمع .. انت مدير شركه لها صيتها في العالم كله .. حسابات مثل ذي راح تشوه سمعتك وبتنزل مرتبتنا من بين الشركات العالميه وكثيير ممكن يتركوا شراكتنا .. لا تخلي تعب خالك طول العشر سنوات يروح ببساطه ..
ابتسم بخبث ورمى الايباد عالكنبه وقال: خلي بس شركه تفكر بذا الشيء ....
كمل بخبث اكثر ممزوج بإستمتاع: راح اسحقها ..
رفعت حاجبها شوي بعدها قام ولدها من فوق الكنبه واتجه للباب فقالت: على وين ..؟!
حرك ايده وهو يقول: الكباين .. باي باي ..
هزت راسها بلا وهي تقول: سمعته خربانه خربانه ..
بعدها ابتسمت وكملت: تعجبني يا ولد امك ..
//
ضحيه أخرى من ضحايا الشيطان ..
زجاج .. غالي الثمن .. أصلي .. من أرقى المصانع في العالم ..
عانى الشيطان كثيراً ليصل إليه .. وفي الأخير وصل بطريقة منحطه ..
لتمر عليه السنوات ومن ثم يحطمه .. مهما كان غالي الثمن فهو لم يعد يهتم بما أن مصنع الزجاج صار بين يديه ..
يستطيع أن يصنع بدله الكثير والكثير ..
لم يستطع الشيطان تحطيمه مع محاولته المستمره لذلك ..
ولكن المحاولات لوحدها كافيه لجعل الزجاج يعرف قيمته لدى صاحبه ..
وهذا جعله .. يشعر بالإهانه ..
الام/ عمرها 46 سنه .. مثال للغرور ولها هيبه كبيره تجمد اللي قدامها بمكانه .. مع كبر سنها إلا ان الجمال يطغى عليها .. جمال طبيعي اُفتتن الكثيير به ..
اسامه/ عمره 26 سنه .. شخصيه نرجسيه مخلوعه الانسانيه من قلبه .. مثال للنذاله وحب الذات .. يملك شركه كبيره من شركات عائلته المشهوره .. ذكي ونسونجي وماكر ..
كِرار / عمره 20 سنه بالصف الثاني جامعه .. هادئ ويُعتبر كمعجم من الالغاز .. متبلد بمشاعره بسبب ماضي عاشه .. ومُصاب بالعمى الليلي .. بمعني ما يقدر يشوف الاشياء في الليل ..
أنجي / عمرها 19 سنه بالصف الاول جامعه .. مغروره ومتعجرفه .. ورثة الجمال والفتنه من امها وكمان ابوها .. محد يقدر عليها واللي براسها تسويه .. عنيده جدا ..
حلا/ بالصف السادس الابتدائي .. متكبره وكثيرة السخريه والاستهزاء .. لسانها سم حتى مع اهلها ..
▒▓ ×✖• ►︿︿︿︿︿︿︿︿︿︿︿︿◄•✖× ▓▒
كآنت هذه البدآيه ..
مقتطفات بسيطه من حياة حطام ذاك الشيطان ..
خلف من بعده شظايا بريئه ..
وشظايا شيطانيه ..
لكل شظيه من شظايانا حياتها .. ولكل منها ماضيها ..
منها المؤلم ومنها الاشد ألما ..
ولا تستمر الحياة على حالها ..
راح تنقلب الاحداث ..
مو مره ..
ولا مرتين ..
بل اكثر ..
لنتعمق في حياتهم .. ومشاكلهم ..
لنكتشف امورا كانت باهته في اذهاننا ..
//
هذا البارت والبارت اللي قبله كان مجرد تعريف للشخصيات وقسمتها على بارتين حتى لا تتلخبطوا بينها ..
أتمنى تكون الشخصيات وضحت لكم أكثر وما تخلطوا الحابل بالنابل ()
أي إستفسآر فأنا موجوده لكم :$
في البارت القادم .. راح تبدأ الاحداث ..
إنتظروني يوم الخميس القادم ..
محبتكم / صرخة المُشتآقه ..!*
