رواية البر التاني الفصل التاسع والعشرين 29 بقلم لولو محمد
الحلقه التاسعة و العشرون
مختار / سبت ايه دا انت لاهف منى الاسبوع كله و ان كنت نسيت اللى جرا سيديهاتك معايا
عباده / دى اخرتها يا ابن عمى ماشي ماشي يلا بالاذن انا عشان ورايا شغل
مختار / نورت
مريم / هجيب حاجه التنضيف و اجى
مختار / ما تتاخريش عشان عاوز انام
مريم / انت مش لسه صاحى يا عمى
مختار / تعرفى تخليكي فى حالك ؟
مريم / استاذه و رئيسه قسم
مختار / احبك يلا بسرعه هاتى الحاجه
مريم تجرى مختار يبص لهند يلاقيها مبتسمه اوى
مختار / سمو الملكه ليها اى طلبات تانى
هند / انا بقول كدا حلو اوى
مختار / طب مش عاوزه مكنسه للسجاد
هند / لا هتزنق الاوضه على الفاضي انا بفكر اجيب حافظتين للسجاده ابدل فيهم يتحطوا فى الغساله و الحياه تبقي سهله
مختار / و ماله نقول لعباده يجيب
هند / هو عباده مسؤل المشتريات فى السرايا
مختار / لا عادى قولى لام فاتن و لا لمريم و لا لفاتن او اى حد
هند / مش عاوزين نتقل عليه
مختار / لا عباده جدع راجل بصحيح اطلبى منه بقلب جامد
هند / بحب علاقتكوا اوى
مختار / ههههههههههههههههههههه
هند / ايه !!
مختار / انتى عارفه توم و جيرى
هند / فى حد ما يعرفهمش
مختار / اهو انا و عباده اللعن منهم ناقر و نقير طول الوقت بس وقت الجد انا و ابن عمى على الغريب اخويا و ضهرى
هند / طب ما دا كويس
مختار / كويس طبعا بس لو ما لقيناش حد نتفق عليه بقي
هند / ااااااه فهمت
مختار / فاكره اول مره ركبتى معايا العربيه قولتلك انى نزلت مصر هربان من مشاكل العيله فاكره
هند / اه فاكره حاجه زى كدا
مختار / اهو انا اتعلمت فى مصر عشان ارتاح من عباده و ما كانش حاجه بتنغص عليا الاجازات الا عباده
هند / ما يبانش عليكوا خالص دا اللى يشوفه يقول بيحبك اوى و بيخاف عليك جدا
مختار / حقيقي
هند / علاقتكوا غريبه بس برده حلوه حتى لو بتتناقروا و تتنافسوا كفايا انك مطمن انه وقت الجد فى ضهرك و انه لا هيغدر بيك و لا ياذيك
مختار / ايوه بالظبط كدا
هند تبتسم
مختار / عارفه مين برده اللى علاقتهم كدا هتستغربي اوى
هند / مين
مختار / ام عباده و ام فاتن
هند / بتهزر
مختار / طول الوقت ام فاتن بتشد فى شعرها منها بس اول ما تعيا و ترقد تلاقى ام عباده سابت اللى وراها و اللى قدامها و قعدت تحت رجليها تخدمها
هند / و دا لله و للوطن اصل بصراحه كل ما اعاشرها اتقفل منها
مختار / و الله انا ما بدخلش فى النفوس النيات دى بتاعه ربنا بس العقل بيقول ايه حرس و لا تخونش
هند / صح
باب الاوضه يخبط هند تفتح مريم شايله فرشه و جاروف و جردل و شرشوبه و مقشه و محتاسه فيهم
مريم / جبتلك العده من تحت على ما نجيب جديد
هند / طب حاسبى حاسبي عند
مريم / هيكركبولك الحمام على الفاضي خليهم تحت و انا اطلعهملك لما تحتاجيهم
هند / لا خليهم عندى و انا هبقي اشوفلهم حته احطهم فيها
مريم / براحتك كدا كدا اوضتك و حمامك رتبيهم زى ما انتى عاوزه اوعى اما انضف عشان عمى عاوز ينام
مختار / اه والله ياريت تنجزوا
مريم / شايفه المعامله
هند / دا بيجر شكلك بس ما تاخديش فى بالك
هند تاخد الجاروف و الفرشه و توطى تلم التراب مطرح الخروم و مريم تروح تملا ميه من الحمام و تيجي تمسح الارض و مختار قاعد على كرسي التسريحه و حاطت ايده على خده
......................
فى الشونه
عبد الله ماسك الدفتر و فى عربيه بتحمل شكاير من الشونه راجل يدخل
الراجل / سلام عليكوا
عبد الله / و عليكم السلام اتفضل
الراجل / يزيد فضلك امال فين عباس
عبد الله / انا هنا مكانه اؤمر
الراجل / كنت عاوز حصه السماد بتاعتى
عبد الله / ثوانى الرجاله تحمل العربيه دى و اشوفلك حصتك
الراجل / و انا لسه هستنى العربيه تحمل كدا اليوم يضيع منى يا ابن عمى خلصنى دول كام شكاره عمى
عبد الله / طب خش لجابر جوه يجهزهملك
الراجل / كتر خيرك
عبد الله / الهمه يا رجاله مش هنقعد اليوم كله
شاب بيحمل العربيه / هانت خلاص يا سى عبد الله
راجل ٢ يطلع من جوه يوشوش عبد الله
عبد الله / و انا المفروض اعمل ايه زى ما انتوا متعودين اشتغلوا بص انا هكلم عباده اساله
الراجل يطلع من جوه و عبد الله بيطلع التليفون من جيبه
الراجل / ما تخلصنى يا ابن عمى لسه ورايا مليون حاجه اعملها النهرده
راجل ٢ / مش لما نعرف ليك حصه و لا لا
الراجل / يعني ايه الكلام ده
راجل ٢ / يعني انت حسابك تقل اوى يا ابن عمى
الراجل / ما انا متفق مع سى عباده هدفع المتاخر كله لما ابيع المحصول ايه اللى جد
راجل ٢ / اللى جد انه ما بلغنيش انه اتفق معاك هنساله و نتاكد
الراجل / قصدك انى كداب و لا ايه
عبد الله / يا سيدى انت فوق راسنا هو ما يقصدش اقعد بس و استهدى بالله و اشرب كبايه شاى دى مكالمه تليفون و انت يا جابر معلش جهزله الحاجه عشان اول ما اقفل مع عباده يستلمها علاطول
الراجل / يا جدع انت جديد هنا ما تعرفنيش انا كلمتى واحده و اللى اقوله تصدقه علاطول
عبد الله / معلش مهو عشان انا جديد لازم فى الاول شويه لخبطه جت فيك معلش
الراجل / يا جدع انت اليوم هيطير منى عشان كام شكاره دا عباس كان بيبعت الحصه من نفسه انا عارف انا اصطبحت بوش مين النهرده
جابر / ما تلم الدور بقي يا حمدان احنا ساكتين من الصبح و بعدين لما تتكلم مع سى عبد الله اتكلم عدل
حمدان / مين سي عبد الله يعني
عبد الله / جهزله الحاجه يا جابر انتوا كدا اللى بتضيعوا الوقت فى الرغى خلصونا ناس كتير واقفين
الشاب / العربيه حملت يا سي عبد الله و الفلوس اهى كامله
عبد الله / ثوانى اعدهم و اعملك وصل
عبد الله يروح يقعد على المكتب و يطلع دفتر وصولات و يعد الفلوس حمدان يروحله
حمدان / مشيني الاول و بعدين عد براحتك انت هتلطعنى جنبك و لا ايه
عبد الله / مهو الراجل التانى جاى قبلك اللطعه عشانك ليه
حمدان / انت بتكلم مين كدا ياض انت
الرجاله تتلم
عبد الله / مش هرد عليك عشان انت قد والدى
جابر / بقولك ايه يا حمدان لم الدور سى عباده لو عرف باللى انت عملته مش هيحصل طيب
حمدان / يعني عاجبك اللى بيحصل ده ما عدش غير العيال اللى يوقفونا
عبد الله / انا ساكتلك ادب انما هتقل ادبك هقولك اقف فى الدور بعد ما كل العربيات دى تحمل
حمدان / انت شكلك ما تعرفش انت بتكلم مين
الشاب / انت اللى ما تعرفش انت بتكلم مين دا يبقي نسيب سى مختار اخو مراته
حمدان وشه يجيب الوان و يبص على الرجاله الملمومه
عبد الله / جهزله الحاجه يا جابر لحد ما اكلم عباده و اساله فى حوار الفلوس
حمدان يوطى على ايد عبد الله يحاول يبوسها عبد الله يسحب ايده بسرعه
حمدان / ابوس ايدك ما تجبله سيره باللى حصل اللى ما يعرفك يجهلك و انا غلبان و صاحب مرض
جابر / و ما دام عارف انك غلبان جاى نافش ريشك علينا على الصبح ليه
حمدان / خليك محضر خير يا جابر انت جاى تولعها
عبد الله / ما تخلص يا جابر و تجهز حاجته
جابر / مش اما تشوف سى عباده هيقول ايه الاول ما يمكن يقول ما لوش حصه
عبد الله يتكلم فى التليفون و حمدان عمال يبص على الرجاله و متوتر
عبد الله / ايوه يا عباده ازيك ... لا كلو تمام بس كنت عاوز اسال عن حاجه
.......................
فى مطبخ السرايا
فاطمه / و الاكل هيطلع فوق و لا هينزلوا ياكلوا معانا
مريم / والله ما سالتهم لما الاكل يجهز نكلمهم و نسالهم
فاتن / انا خلصت الحمد لله خدى يا مريم علقي على حله المحشي دى
فاتن / ضهرى اتقطم
فاطمه / ضهرك اتقطم من حله محشي الله يعينك على اللى انتى فيه
فاتن / والله تعبانه خالص النهرده من ساعه ما صحيت و انا رايحه جايه على الحمام
فاطمه / ليه مالك كلتى حاجه وحشه و لا ايه
فاتن / والله ابدا
فاطمه / ليكون برد فى معدتك اطلعى اتكلفتى فى السرير و انا هعملك حاجه سخنه تدفيهالك على ما الاكل يستوى لو كنتى قولتى من بدرى كنت خليتك ترتاحى
فاتن تغسل ايديها و تمشي
فاطمه / مش فاهمه ايه حكايه وجع البطن اللى مسكانا فى السرايا دى البت سماح كمان قافله على نفسها طول الوقت و كل ما اكلمها تقول بطنى عاليه بطنى عاليه
مريم / انا عملتلها ينسون و الله و سقيتهولها
فاطمه / عارفه شوفت الكبايه لما كنت بشقر عليها دى اكيد عين راشقه حد من معازيم الفرح النهرده ابخر البيت كله عينك على الاكل لحسن يشيط منك و انا هطلع اجيب البخور من فوق
مريم / ما فى بخور هنا
فاطمه / لا دا انا جايبه من النت بخور لاوسي اصلي من الغالى لسه عباده مستلمهولى النهرده الصبح اهو فرصه نجربه دا بيقولوا فيه شعر يا بت
مريم / تمام نجربه
فاطمه تبتسم و تطلع اوضتها و مريم تقف جنب الحلل الكتير اللى على البوتجاز
........................
فى الشونه
الرجاله قاعده بتشري شاى
عباده / اوعى تكون زعلان من اللى حصل انا هشدلك ودنه
عبد الله / لا مش زعلان و لا حاجه الراجل اعتزر حصل خير
جابر / لا يا سي عباده بس برده ما كانش ياخد الحصه انا تعبت من الراجل ده لسانه طويل و كل مره يعمل مشكله
عباده / معلش يا جابر امسحها فيا انا
جابر / استغفر الله يا سي عباده دا انت على راسي
عباده / الراجل ده اصله غلبان ربنا ابتلاه و خد عياله الاتنين نوبه واحده
عبد الله / لا اله الا الله
عباده / مراته ما استحملتش رقدت و عياها بيكلفه فلوس ياما و هو بطوله بين خدمتها و خدمه الارض فتلاقيه علاطول عصبى و مستعجل كدا فبنصبر عليه
عبد الله / لا نصبر عليه طبعا الله يعينه ربنا ما يكتب اللى هو فيه على حد بس هو عياله ماتوا ازاى
عباده / تعددت الاسباب و الموت واحد يا عبد الله كلنا هنموت لما يجي معادنا ... ما تصبلى كبايه شاى تانيه يا جابر ينوبك ثواب
جابر / تؤمر يا سي عباده
جابر يصب لعباده كبايه شاى و يديهاله عباده يشرب
عباده / تسلم ايدك
عبد الله / بالنسبه للفلوس اللى فى الخزنه هعمل فيها ايه
عباده / سبهم فى الخزنه للصبح و جابر و الرجاله هيودوهم الصبح للبنك
عبد الله / بس دى فلوس كتير هتسيبوهم كدا فى الشونه عادى
الرجاله تضحك
عباده / طب ما البضاعه بتتساب فى الشونه عادى و بعدين بلاش الكلام ده الرجاله دى تزعل
جابر / يا سي عبد الله دى شونه الزيني يعني مفيش حد يستجرى بس يفكر يسرق منها و لو حبه غله واحده
غفير / و لو فكر احنا برده ما بنلعبش يا سي عباده
عبد الله / لا مؤاخذه معلش جديد بقي
عباده / شكل ما فيش شغل تانى النهرده قفل يا عبد الله خلينا نروح ناكل لقمه و نريح شويه
عبد الله / الدنيا لسه نهار هستني شويه يمكن حد يجي روح انت لو عاوز
عباده / ما جابر و الرجاله موجودين ما تقلقش انت قوم يلا معايا
عبد الله / ما جاتش من ساعتين زمن
عباده / لا بقولك ايه انا ما بحبش اكرر كلامى ابو نسب مش ابو نسب اللى اقوله يتسمع قوم يلا اما نروح بيقولوا النهرده محشي و ما تقلقوش يا رجاله نصيبكوا محفوظ
غفير / يدوم العز يا سي عباده
عبد الله / لا ما دام محشي يبقي نقوم بقي
الرجاله تضحك عبد الله و عباده يركبوا العربيه و يمشوا
عبد الله / هو انتوا كل يوم بتبعتوا اكل للغفر امبارح بعتولهم برده
عباده / لقمه هنيه تكفى ميه يا عبد الله و الناس دى بتشقا عشانا و بعدين احنا مش الوحيدين اللى بنبعتلهم
عبد الله / و ما دام فى غيركوا بيبعت بتبعتوا ليه
عباده / الناس دى بتشقى و كلهم على قد حالهم بيجيلهم اكل من بيوتهم و بيفرشوا و ياكلوا سوا
عبد الله / بس دا تعب على الناس اللى فى البيت يعنى كل يوم يعملوا كميه الاكل دى للى فى البيت و الغفر اللى فى السرايا و كمان الغفر اللى فى الشونه
عباده / الغفر اللى فى البلد كلها يا عبد الله مش الشونه بس
عبد الله / بس دول كتير اوى
عباده / لسه بقولك لقمه هنيه تكفى ميه و الناس دى غلابه و بتشقي و اهو كله بثوابه
عبد الله / ايوه بس
عباده / الستات اللى فى البيت بيتعبوا فى الاكل انا عارف بس كلو بثوابه دا مفيش ثواب احلى من لقمه تحطها فى بق حد غلبان و خصوصا لو من اللى بتاكل منه حتى تطيب خاطره و تحسسه انه منك و ان قلبك عليه فيبقي قلبه عليك هو كمان
عبد الله / انا والله مش معترض انا بتكلم فى حاجه تانيه خالص
عباده / انا فاهمك هم بيرتبوا امورهم لو الاكل متعب و هيحتاج مجهود بيبعتوا يجيبوا ستات تساعدهم و هم بسم الله ما شاء الله كتير يعني و بعدين هم بيعملوا ايه تانى طول اليوم يعني
عبد الله / طب سالتهم قبل ما تقول بيعملوا ايه تانى طول اليوم ماما كانت بتتنرفز لوى لو حد قال الكلمه دى قدامها و تقول هو شغل البيت بيخلص
عباده / عشان الحجه عندكوا بطولها انما هنا ايد على ايد تساعد و بعدين هنا هم واخدين على كدا و السرايا الكبيره دى لو كل واحده نضفت متر فى متر خلصت و برده وقت التنضيفه الكبيره بيجيبوا ستات تشيل و تحط معاهم ما تقلقش ... عبد الله هو انت حد كلمك فى حاجه
عبد الله / حاجه ايه
عباده / حد بيتعب حد اشتكى سمعت حد بيشتكى سواء ليك او للحجه .. هى الحجه اشتكت انها بتتعب
عبد الله / لا لا لا ابدا انا بتكلم عموما يعني .. من وجهه نظرى اقصد .. بناء على كميه الاكل اللى بتتعمل كل يوم و كدا .. اصل انا برده مش واخد على النظام لسه ... بس هو جميل .. جميل فعلا ربنا يتقبل يارب
عباده / امين يارب امين
عبد الله يهرب بعنيه من عباده و يبص من الشباك و عباده سايق
..................
فى اوضه هند
مختار نايم على السرير هند تطلع من الحمام لابسه البرنص و لافه شعرها بفوطه تقعد على التسريحه مختار ينام على جنبه و يتفرج عليها و هى بتسرح شعرها و كل شويه يبصوا لبعض فى المرايه مبتسمين
هند / ايه !!
مختار / بيقولوا التامل فى جمال خلقه ربنا من اعظم العبادات سبحانه اللى خلق و صور
هند تبتسم بخجل و تبص فى الارض و تبص فى المرايه تانى تلاقيه متابعها و مبتسم تبص فى الارض تانى الباب يخبط هند و مختار يبصوا لبعض
مختار / مين
فاطمه / انا ام عباده
مختار / ثانيه يا ام عباده هفتحلك اهو
هند تقوم تجرى تاخد الاسدال و تدخل الحمام و مختار بيرتب ملايه السرير و اول ما هند تقفل باب الحمام مختار يروح يفتح الباب يلاقي فاطمه شايله بخور
فاطمه / صحيتكوا و لا ايه اصل انا ببخر البيت كلو فاتن و سماح تعبانين قولت دى اكيد عين قولت ابخركوا انتوا كمان
مختار / مالهم كفاهم الله الشر كانوا كويسين امبارح
فاطمه / معدتهم عاليه ... امال فين هند
هند تفتح باب الحمام لابسه الاسدال فاطمه تدخل مختار يبص فى الارض
فاطمه / رقيتك و استرقيتك من عين كل من شافك و لا صلاش على النبي شكلك لسه مستحميه خدودك بتبوك حمار
هند تبص لمختار
فاطمه / انا مش هطول هبخر الاوضه و ابخركوا و امشي ... دا بخور مستورد ما تلاقيهوش هنا جيباه من النت قولت لازم ابخركوا بيه ... الاكل تحت جاهز اخليهم يطلعولكوا منابكوا هنا و لا تنزلوا تونسونا
مختار / لا هنتعبكوا تطلعوه
فاطمه عينها فى المكان خصوصا على هند تلم نفسها
فاطمه / اه طبعا امال مش عرسان يلا مش هعطلكوا اكتر من كدا هبخر بس الحمام و امشي
هند / لا ملوش لزوم الحمام انا هبقي ابخره
فاطمه / دا بخور مستورد ريحته ثابته مش زى التانى
هند / معلش مره تانيه
فاطمه / براحتك على العموم هبقي ابعتلك شويه بخور تخليهم عندك الواحده برده لازم تحافظ على ريحه اوضتها حلوه و نضيفه امال ايه بكره تتعلمى الحاجات دى .. فوتكوا بعافيه
مختار / الله يعافيكي
فاطمه تمشي و مختار يقفل الباب بالمفتاح
هند / هى تقصد ايه ببكره تتعلمى الحاجات دى يعني انا مش مخليه الاوضه نضيفه و ريحتها حلوه
مختار يقرب من هند و بالراحه يحرك ايديه لفوق و تحت على دراعتها
مختار / تفتكرى ربنا خلقلنا ودنين ليه
هند / ايه السؤال ده عشان نسمع بيهم طبعا
مختار / ممكن بس انا من وجهه نظرى اننا عشان ندخل من هنا و نطلع من هنا
مختار يزغزغ هند من رقبتها مره اليمين و بعدين الشمال و هى بتعوج رقبتها و تغير مع ايديه و مبتسمين
مختار / بس البخور ريحته حلوه ما ننكررش
هند / والله انا بفكر ابخر الاوضه من عنيها هى بجد صعبه اوى
مختار / ههههههههههههههههههه قولنا ايه دخلى من هنا و طلعى من هنا
مختار يكررها و هند تغير
هند / بس بقي بغير الله
....................
فى شقه يوسف
يوسف يدخل يلاقي محمود قاعد
يوسف / السلام عليكم
محمود / و عليكم كنت فين ؟
يوسف / خير فى حاجه ؟
محمود / ما جتش المحل زى ما اتفقنا استنيتك و ما جتش و اتصلت بيك كتير و ما كنتش بترد
يوسف / كنت عامله صامت كنت محتاج اقعد مع نفسي شويه
محمود / حقك عشان تعرف تفكر و تاخد قرارات فى حياتك
يوسف / اخبار المحل ايه
محمود / النهرده شديت مع المهندس مقدملى ميزانيه كبيره جدا و بيقول محتاج تصليحات اكبر من اللى كان متوقعها
يوسف / شوف غيره تلاقيه نصاب و عاوز يعمل مصلحه على قفانا
محمود / تعرف حد كويس
يوسف / لا بس اشوفلك
محمود / ياريت
يوسف / اخبار خيلانى ايه
محمود / خيلانك ظروفهم غيرنا
يوسف / ليه ان شاء الله ما كلنا محلاتنا اتحرقت و كلنا اتنصب علينا
محمود / بس هم حظهم ارحم منا هم التامين هيعوضهم منهم لله ولاد الكلب اللى اتبلوا عليا
يوسف / انا بقول تشوفلك محامى شاطر عن اللى معاك اللى ضيعك ده و مش فالح غير يسحب فلوس و خلاص
محمود / تعرف حد كويس
يوسف / اشوفلك
محمود / امك كلمتنى امبارح فى حوار انك عاوز نسبه من المحلات
يوسف / دا حقى
محمود / و انا فين حقي يا يوسف
يوسف / حقك فى ايه
محمود / فى كل الخساير اللى خسرتها بسببك و بسبب حبى ليك و دفاعى عنك
يوسف / اسلوب رخيص اوى اسمع يا بابا انا
محمود / اسمع انت يا يوسف انا فكرت كتير فى كلامك ده فكرت فيك من يوم ما اتولدت لحد النهرده و لقيت انى دلعتك زياده عن اللزوم
يوسف / برده
محمود / انا خلاص اديت رسالتى ناحيتك كامله و اتخرجت الحمد لله جه دورك بقي تكمل
يوسف / ازاى يعني
محمود / كل العصافير بيجي يوم و تسيب العش
يوسف/ كان ممكن قبل ما تبيع شقتى
محمود / و همنع المصروف كمان عاوز فلوس اشتغل
يوسف / مش لما الشهاده تطلع اقدم
محمود / ماشي يا يوسف لحد ما الشهاده تطلع
يوسف / و انا هلاقي شغل فى يوميها انت بتعجزنى ليه انت ليه عاوز تحبطنى ليه مصمم تحسسني انى فاشل
محمود / ما حصلش
يوسف / امال تسمى اللى بتعمله ايه تقصقص جناحاتى و تقولى طير انا لو عدوك مش هتعمل فيا كدا انا ابنك الوحيد
محمود / مهو عشان كدا خايف عليك عاوزك تنشف و تسترجل و تنزل تشتغل معايا
يوسف / على اخر الزمن اشتغل بياع
محمود / و ماله البياع اقعد على الكاشير يا سيدى
يوسف / يا بابا انا مهندس زراعى مش محاسب
محمود / و المفروض انك لحد ما الشهاده تطلع و تدور و تتعين انا افضل اصرف عليك
يوسف / ما كل الابهات بتعمل كدا امال اشحت
محمود / اشتغل انت عارف ان ممدوح اشتغل على عربيته كريم
يوسف / هتنزل بيا لحد فين من بياع لسواق مش عاوزنى امسك خيشه و جردل و امسحلك السلالم و اغسل العربيات بالمره
محمود / الشغل مش عيب
يوسف / الناس كلها تروح بيتها ترتاح انا بروح اتخنق
محمود / الباب قدامك لو البيت مش مريحك امشي
يوسف / انت بتطردنى
محمود / مش انت اللى مش عاجبك عيشتنا مش انت اللى مش راضي تكبر يا ابنى انا كبرت
يوسف / هى ماما فين
محمود / انا اللى بكلمك هنا
يوسف / و انا مش فايق اسمع عن اذنك
يوسف يروح يفتح فى الاوض لحد ما يلاقي امه قاعده و عينها على الباب
يوسف / انتى هنا و سامعه الكلام ده و ساكته سيباه يبيع و يشترى فيا كدا
محمود / قولتلك كلامك معايا انا
يوسف / انا راجع تعبان و جعان و انت برده مش راضي تسيبنى فى حالى
محمود / انا عاوزك
يوسف / انت عاوز انت عاوز مش مهم انا عاوز ايه يعني
محمود / و احنا ضيعنا غير جريانا ورا اللى انت عاوزه حتى لو مش من حقك
يوسف / هتشيلنى الليله يعني ماشي ما دام ده اللى انت عاوزه ماشي انا سيبهالك دا الشارع ارحم
يوسف يمشي اسراء تيجي تحصله محمود يبرقلها
محمود / اسراء
اسراء / انت ايه اللى جرالك
محمود / عوزانى اعمل ايه عوزانى اصبر عليه لحد امتى
اسراء / مش من الدار للنار كدا كدا هتخسره
محمود / لو عندك حل تانى وريني نفسك انما انتى مش فالحه غير فى المداديه و الدلع
اسراء / انا تعبت منك
محمود / و انا تعبت من الدنيا باللى فيها
محمود يمشي و يرزع الباب وراه اسراء تبص فى الارض
....................
فى المكتب
شاكر / انا شايف انه شاب محترم و ابن حلال
عباده / و لا محترم و لا نيله انا من الاول قولت نشوف مدرسه للبنات
ناصر / الجدع ما صدرش منه حاجه و داخل البيت من بابه
عباده / مش مرتاحله
ناصر / هو انت اللى هتتجوزه اسالوا البنت
شاكر / الراجل قالى انه عنده شقه جاهزه و بيقبض كويس و احنا قبل ما ندخله بيتنا كنا سالين عليه و عارفين اصله و فصله
عباده / برده مش مرتاحله
ناصر / انت فى حد معين فى دماغك لسماح
عباده / لا مش القصد بس
ناصر / بس ايه
عباده / مش عارف زى ما قولت مش مرتاح
الباب يخبط و مختار يدخل
مختار / متجمعين فى الحرم ان شاء الله
ناصر / اااااه جيت على الجرح
مختار / ليه ما احنا فيها خد ام فاتن و اطلعوا
ناصر / و انا مش هرد كلامك
عباده / عبد الله هينزل مصر الجمعه
مختار / لقيت حد ياجر الشقه
عباده / هههههههههههههههههه عيب عليك
مختار / خلى فاروق يتصل بيهم و يبلغهم
عباده / و لو موافقوش
مختار / ساعتها نبقي نفكر المهم كنتوا بتتكلموا فى ايه قافلين عليكوا بقالكوا فوق الساعه و زياده خير فى حاجه و لا ايه دا لو ليا اعرف يعني
شاكر / الاستاذ عصام المدرس طالب ايد سماح
مختار / راجل ابن حلال و سمعته حلوه
عباده / رفضت مغاورى و موافق على عصام مع ان البنتين قد بعض يعني
مختار / ايه الحكايه بتاعتكوا دى مريم اللى رفضت مريم اللى كانت هتتجوز و هى اللى رفضت انا لا قبلت و لا رفضت و لا ليا فيه اصلا
شاكر / نفس كلامى نسالها الاول
عباده / مش مرتاح يا جماعه
مختار / تلاقيك غيران عليها ان حد هياخدها من وسطينا
عباده / يا راجل قول كلام غير ده دا انا هكسر وراها زير مش قله
ناصر / اهو كلام
عباده / اللى تشوفوه اعملوه بس اقسم بالله ما مرتاح
الكل يبصوا لبعض و يبصوا لعباده
......................
فى اوضه هند
هند بتعلق عبايه مختار و هو بيقلع الجزمه تاخدها و تحطها عند باب الاوضه
مختار / تسلمى
هند / بس انا مش فاهمه انت ازاى توافق البنت صغيره
مختار / فى بنات الجواز ليهم ستره مهما كان السن
هند / عيب يا مختار
مختار / سكت
هند / انا ما شوفتش منها حاجه وحشه ليه تقول عليها كدا
مختار / انا ما بقولش قلبي اللى بيقول و انا عمرى ما نظرتى فى حد طلعت غلط ... انا ما بقولش انها بتغلط انا بس بضايق منها عنيها مكشوفه و جريئه زياده
هند / حرام عليك دى غلبانه
مختار / والله ما غلبان الا انتى
هند تبصله يفرد ضهره على السرير تروح تقعد جنبه
هند / هو انا كنت جريئه معاك زياده لما طلبت منك توصلنى و لا لما كنت بكلمك فى البلكونه
مختار يتعدلها
هند / عيب يا مختار دى برده بنت عمك
مختار / و عشان كدا خايف عليها و العريس اللى جالها راجل محترم و سمعته سبقاه انا مش هجوزها لاى حد و بعدين انا رايي لا هيقدم و لا ياخر الراى رايها هى
هند /مش عارفه ليه اضايقت
مختار / تصدقى لو قولتلك و انا كمان ما كانش المفروض اتكلم عنها كدا
هند تبصله بحب
مختار / ربنا يهديها و يعملها اللى فيه الخير
هند / ربنا يهدينا جميعا المهم انا بقي ما سكتش
مختار / على ايه
هند / قعدت انا و البنات نقلب فى الفايس لحد ما لقيت مكان حلو اوى هيعجبك جدا جدا جدا
هند تجيب الموبايل و تفتحه مختار يشدها فى حضنه تبصله و تبتسم و تفتح صفحه فايس و مختار متابع معاها و هى بتقلب فى الصور
هند / ايه رايك
مختار / حلو
هند / انا كمان كلمتهم و سالت على السعر و فى اوفرز هانيمون حلوه جدا و ياخت و حركات ... انت ركبت يخت قبل كدا
مختار / ركبت مركب كتير
هند / على العموم انا عمرى ما ركبتها نفسي اركب
مختار / نركب
هند / يعني احجز
مختار / احجزى
هند / بجد !!
مختار / مش المكان عاجبك خلاص
هند / طب مش تعرف السعر طب احجز قد ايه
مختار / مش عارف بصي خليها اسبوع و نجدده ما حدش عارف يمكن ما يعجبناش
هند / ماشي
هند تكتب على الماسنجر
هند / كان نفسي اروح الجونه و الحتت دى بس بيقولوا حر اوى
مختار / فى الشتا نروح
هند / وعد
مختار / ان شاء الله لو ما جدش جديد هوديكي
هند / ربنا يخليك ليا
مختار / حاف كدا
هند تبصله
مختار / الواد قلبه بيوجعه و عاوز حد يدلعه
هند / سلامه قلبك ثوانى و اجيلك
مختار / ما تطوليش لحسن أنا مشتاقٌ وعنديَ لوعة ٌولكنَّ مثلي لا يذاعُ لهُ سرُّ!
هند / ههههههههههههههههههه حاضر
هند تقوم تدخل الحمام مختار يمسك موبايلها و يقلب فى الصور
..........................
يوم الجمعه فى مصر
شيري بتسحب شنطه بره اوضتها عبد الله يروح يساعدها عبد الله / عنك انتى يا ماما
شيري / عبد الله
عبد الله يبصلها
شيري / صعبان عليا اسيب بيتي اوى
عبد الله / هناك هيبقي بيتنا برده و بعدين لينا مين هنا غير الحيطان
شيري / الحيطان دى ياما شافت يا ابنى
عبد الله / معاكى حق ياما شافت عشان كدا بقت تخنقنى
عبد الله يشيل الشنطه و يمشي و شيري تبصله بحزن عبد الله يفتح باب الشقه يلاقي فاروق طالع السلم معاه ست
فاروق / السلام عليكم ازيك يا سى عبد الله
عبد الله / و عليكم السلام ازيك يا فاروق
فاروق / الحمد لله الست امانى اللى كلمت الحجه عنها اللى عاوزه تاجر الشقه
عبد الله / اه اهلا و سهلا اتفضلى
امانى تدخل و عبد الله و فاروق وراها
عبد الله / ماما ... فاروق هنا
شيري تطلع من جوه
فاروق / الست امانى اللى عاوزه تاجر الشقه
شيري / اهلا و سهلا اتفضلى
شيري و امانى يقعدوا
عبد الله / هستاذنكوا ثوانى انزل اجيب حاجه من تحت
عبد الله يمشي
شيري / ما تاخذيناش على الكركبه اصلها مقفوله بقالها حبه و احنه جينا ناخد حاجتنا اصل احنا نقلنا مكان تانى
امانى / لا كركبه ايه ما هى حلوه اوى بصراحه احلى مما توقعت
شيري تبص لفاروق و تبص للست و تبتسم
امانى / انا اصلي من اسكندريه و نازله اقعد هنا فتره عشان الماجستير بتاعى بدل ما انا رايحه جايه كل شويه
شيري / اه طبعا وقت و مصاريف انتى فى كليه ايه
امانى / هندسه و قبل ما تسالي ليه ما سجلتش فى اسكندريه كان عشان التقدير القسم بتاعى كان طالب تقدير اعلى و كنت هضطر اضيع سنتين فى الدبلومه عشان اقدر اسجل ماجستير فى التخصص اللى عوزاه
شيري / لا طبعا سنتين كتير اوى
امانى / هههههههه اصل انا اتسالت السؤال ده كتير اوى و برده قبل ما تسالى ليه ما اجرتش شقه جنب الكليه عشان للاسف الايجارات هناك عاليه اوى و فاروق قالى انك هتكرميني ان شاء الله
شيري / عيني بس انا بصراحه
فاروق / احنا اتفقنا على الفين كل شهر و الفين تامين
شيري تبص لفاروق
شيري / يناسبك يا بنتى
امانى / والله لو حبيتى تكرميني زياده من عندك اكيد مش هقول لا ههههههههههههه
شيري / انا اصلى عمرى ما اجرت الشقه دى لحد يعنى العفش ده ما حدش غريب نام عليه و لا استخدمه
امانى / انا مش محتاجه غير المطبخ و الحمام و اوضه بسرير تقدرى تلمى باقي الحاجات اللى خايفه عليها فى الاوضتين التانين و تقفلى عليهم
شيري / لا يا بنتى الشقه شقتك انا ده مش قصدى خالص
عبد الله يدخل شايل كيس فيه اربع كنزات يدى لامانى و لفاروق و مامته و ياخد
فاروق / عشت يا سي عبد الله
شيري / انتى هتحتاجى الشقه قد ايه يا بنتى
امانى / نسال الله التساهيل لحد ما اناقش ان شاء الله
شيري / ما تعرفيش قد ايه بالظبط يعني
امانى / للاسف لا بس مش اقل من سنه
فاروق / احنا نعمل العقد سنه و يجدد بزياده ١٠ % ايه رايك يا ست الكل
شيري / انا ما افهمش فى الحاجات دى و الله يا جماعه انا حتى نفسي اجاملك بس خايفه اظلمك او اظلم نفسي
امانى / يا ستى انتى بس اديني الشقه بسرعه و انتى كدا هتبقي عملتى معايا احلى واجب
شيري / محتاجاها امتى
امانى / انا مش معايا حاجتى لو بعد بكره تمام و انا جاييه معايا الفلوس
فاروق / و انا العقد جاهز و الست امانى قراته و كل تمام
عبد الله ياخد العقد يقراه و امانى تطلع فلوس و تديها لشيري
امانى / دول التمن تلاف اللى اتفقت عليهم مع الاستاذ فاروق شهرين مقدم و شهرين تامين
شيري تبص لعبد الله
عبد الله / العقد شكله كويس و فاروق ثقه و انا بصراحه مش بفهم فى الحاجات دى
شيري / خلاص على العموم احنا هنلم حاجتنا النهرده و هنسيب المفتاح مع فاروق تستلميها وقت ما تحبي و الشهر هيتحسب من يوم ما استلمتى
امانى تقوم تقف
امانى / الف شكر الف مليون شكر انا مش عارفه اقول لحضرتك ايه انا هحافظ على كل اشايه فيها هتستلميها زى ما سبتيها بالظبط
شيري / ربنا ينجحك و يوفقك يا بنتى
امانى / هستاذنك عشان القطر
شيري / توصلها يا فاروق لو سمحت
فاروق / طبعا يا ست الكل
فاروق و شيري يمشوا عبد الله ياخد الفلوس و يعدها
عبد الله / انا هدى الفلوس دى نقطه لهند
شيري / اللى انت عاوزه اعمله بس طلع حاجه منهم لفاروق هو اللى جابها و ده حقه
عبد الله / خمسميه كويس ؟
شيري / حلوين بس هو يرضي ياخدهم
عبد الله / مالك
شيري / مفيش لميت حاجتك
عبد الله / كلها و نزلتها العربيه كمان
شيري / يعني مش ناقص غير حاجه هند هدخل اللمها
عبد الله / لميتي فلوسك و دهبك ؟
شيري / لميتهم فى الشنطه الصغيره اللى جوه على السرير
عبد الله يطلع فلوس من جيبه و يحطها على فلوس امانى و يديهم لشيري
عبد الله / دى الفلوس اللى كنت محوشها خليها معاكى
شيري / خلى فلوسك معاك انت هتحتاج مصاريف
عبد الله / خليهم معاكى بدا ما يتصرفوا مش عاوزين نصرف الفلوس و نبقي لا قعدنا فى بيتنا و لا معانا ناجر بره
فاروق يدخل
فاروق / ركبتها التاكس كانت مبسوطه خالص الف مبروك عليكوا مش عاوزين منى اى حاجه تاني
شيري / انا هدخل اكمل لم الحاجه
عبد الله يعد فلوس و يديها لفاروق فاروق ما يرضاش ياخدها
فاروق / عيب يا سي عبد الله الكبير
عبد الله / دا حقك دا اقل من حقك كمان مش انت اللى جبتها
فاروق / انا حقى واصلنى و زياده
عبد الله / طب خدهم عشان احبك
فاروق / لا ما تزنقنيش انت بتحبنى من غير ما اخدهم
عبد الله / ما تتعبنيش بقي يا عبد الله والله مفرهد و تعبان على اخرى خدهم و الكبير و لا اى حد هيعرف حاجه
فاروق / والله انا حقى
عبد الله / بقولك تعبان يا فاروق ما تتعبنيش زياده بقي يا اخى
فاروق / خلاص يا سي عبد الله اللى تشوفه
فاروق ياخد الفلوس عبد الله يبتسم
فاروق / انا همشي عشان عيسي لوحده فى الدكان لما تخلصوا كلمونا نجيب الدفتر و الفلوس تاخدوها و انتوا مروحين
عبد الله / تمام ماشي
فاروق يمشي عبد الله يدخل اوضه هند يلاقي شيري قاعده على السرير بتعيط و الاوضه مبهدله جدا شيري اول ما تشوفه تمسح دموعها و تبص بعيد عبد الله يروح يجيب الشنطه من فوق الدولاب و يحطها على السرير و يفتحها
عبد الله / طلع عيني على ما اخد الفلوس
عبد الله يفتح الدولاب و يطلع الهدوم و يطبق و يحط فى الشنطه
عبد الله / مستحيل الشنطه دى هتاخد هدوم هند و ياسمينا انا بقول ناخد حاجه ياسو و اهو هند جالها كتير
شيري تبصله
عبد الله / خلاص خلاص نعبى و لو ما كفتش نبقي نشترى شنطه و لا اتنين مش مشكله
شيري تقوم و تطبق معاه
عبد الله / انتى بتعيطي عشان اللى حصل هنا اخر مره و لا عشان اجرتى الشقه
شيري / ما بعيطش يلا عشان نلحق نروح لسه عندك شغل الصبح
عبد الله / ماما
شيري تبصله عبد الله يحضنها
عبد الله / انا بحبك
شيري / و انا والله يا عبد الله بحبك و بحب اخواتك هو انا ليا غيركوا يا ابنى
عبد الله / و احنا ما لناش غيرك هند ما لهاش غيرنا خلينا جنبها
شيري / ما احنا هنروح جنبها اهو امال احنا بنعمل ايه هنا بس يلا يلا ما تضيعش وقت خلينا نخلص
عبد الله/ حاضر
عبد الله و شيري يطبقوا و يحطوا فى الشنطه
......................
فى المكتب فى السرايا
عباده / انت بتهرج يا مختار و جاى تقول دلوقت
مختار / على ما تاكيد الحجز وصل
عباده / لا يا راجل
ناصر / مختار فوق لروحك ان كنت انت سبت السلاح فدا مش معناه ان السلاح هيسيبك
مختار / مش انت اللى خيرتنى
ناصر يزعق
ناصر / انت بتعند مع مين معايا و لا مع حياتك و حياتها هتنبسط لو جرالها حاجه يعني
عباده / اهدى يا كبير احنا لسه فيها محلوله ان شاء الله
عباده يسيب المكان و يمشي ناصر يقوم يقعد قدام مختار و مختار باصص فى الارض
ناصر / انا عارف ان موضوع السلاح ماثر فيك بس هى ما تعرفش حاجه
مختار / و المفروض تعرف ؟
ناصر / لا هند جبانه و قلبها خفيف مش هتفهم هتعيشك فى صداع بس دا مش معناه انك تسيب الدنيا عايمه اعقلها و توكل و لا ايه
مختار / تمام
ناصر / ما تزعلش انى اتعصبت عليك انت عارف انا بخاف عليك قد ايه
مختار / عارف و مش زعلان
ناصر / روح يلا شوف عروستك
صوت ضحك بره
ناصر / شكل الجماعه وصلوا بالسلامه تعال نطلع نسلم عليهم
ناصر و مختار يقوموا يطلعوا بره يلاقوا الكل بيحضن و يسلم على شيري
انتصار / طب والله اليوم ده فرق معانا
شيري / يلاهوى على لسانك الحلو ده اعمل فيه ايه
مختار / حمد الله على السلامه يا امى نورتى بيتك امال عبد الله فين ؟
شيري / خد شنطه وراح المضيفه عنده شغل الصبح و يادوب يريح شويه
مختار / طب عن اذنكوا انا مستنيه من بدرى اللحقه قبل ما ينام
مختار يسيب المكان و يمشي شيري تبص لهند
شيري / خير فى حاجه و لا ايه
ناصر / جرا ايه يا ست الكل و هو الاخ ما يتحوجش لاخوه غير فى شر و لا ايه
شيري / لا طبعا ازاى بس
انتصار / تلاقيكوا يا عينى جعانين قومى يا فاتن سخنى الاكل و ابعتى لعبد الله لقمه
فاتن تقوم و باين عليها التعب
مريم / خليكي هروح انا
انتصار / مالك يا بت فيكي ايه
فاتن / مش عارفه بقالى كام يوم مش مظبوطه
فاطمه / كانت معدتها قايمه عليها من كام يوم
انتصار / الله و ساكته على نفسك ليه يا بت ما قولتيش ليه كنا شيعنا للدكتوره و لا اى حاجه
فاتن / مفيش حاجه يا امى انا بس النوم كابس عليا و جسمى حالل شويه
انتصار / نوم ايه دا انتى طول النهار نايمه فيكي ايه يا بت
شاكر / انتوا لسه هتسالوها حد يبعت للدكتوره تيجي تبص عليها
فاتن / هقولها ايه يا عمى خملانه و عاوزه انام
شيري / انا اسفه انى بدخل بس ممكن تكونى حامل انا كنت كدا فى حملى بيجيلى من اول يوم بالنوم
فاتن / بس انا حملى مش كدا
انتصار / يا اختى و هو كل الحمل زى بعضه ياريته يطلع حمل طب والله ادبح و اكل الناس
فاطمه / طب يا اختى استنى اما تولد و ادبحى برحتك
شاكر / ندبح تانى العيال خير مش احسن ما تبقي عيانه الف مبروك يا فاتن امال جوزك فين نباركله
فاتن / لسه ما جاش بس هو فى ايه خلاص بقيت حامل خلاص ؟
ناصر / احنا فيها حد يبعت للدكتوره تيجي تتاكد و تدينا البشرى و ان ما كانش تعرف سبب التعب دا ايه و تطمنا احنا هنستنى ليه نقطع عرق و نسيح دمه
انتصار / صح يا اخويا كلامك صح حالا نبعتلها تطمنا
............................
فى المضيفه
عبد الله / هتفرق ايه ندور دلوقت و لما ترجع نبقي ننقى
مختار / يعني انت لو استنيت الكام يوم دول هيتعبوك اوى يعني
عبد الله / سبها لله استنى صحيح انا كنت عاوزك
عبد الله يروح يفتح شنطه و يطلع ظرف يفتحه يبص فيه فيه فلوس
عبد الله / متاخره بس معلش الف مبروك يا عريس
مختار / انت بتهرج و لا ايه انت هتنقطنى بايه انا مش قولتلك انا عاوز كارنيه الكليه
عبد الله / ان شاء الله اجيبه بس خد دول ... عشان تبقي تردهملى فى فرحى
مختار / انت بس انوى و شوف انا هعمل فى فرحك ايه قولى صحيح ما روحتش الجيم تشقر على دينا
عبد الله / هههههههههههههههههههه
مختار / ضيعت انت تمرينتك النهرده
عبد الله / متعوضه ان شاء الله الاسبوع الجاى
مختار / ما تجيش على نفسك اوى فى الشغل
عبد الله / اجى على نفسي فى ايه بس دا الموضوع سهل جدا هو بس اكمنه وقت طويل و الواحد مش واخد على كدا بس تعرف اقسم بالله اللى شغالين معايا شويه رجاله دمهم زى العسل ما يتشبعش منهم بيهونوا على الواحد الدنيا
مختار / الحمد لله
عبد الله / ما تتوهش بقي و خد الفلوس
مختار / لا انت عاوز تضحك عليا
عبد الله / بجد يا مختار خدهم بقي مش هيبقي فاروق فى مصر و انت هنا ... ياختاااااى
مختار / هههههههههههههههههههه ما تخافش قالى قالى
عبد الله / قالك
مختار / طبعا
عبد الله / هههههههههههههههههههه لا و انا فى كتم الاسرار ايه ما حصلتش
مختار / تبهر الصراحه
عبد الله / خدهم بقي
مختار / انت مش ناوى تمشي خليهم يمكن تحتاجوا حاجه
عبد الله / معايا غيرهم والله اصلنا كنا محوشين مبلغ و فى كمان حتتين دهب مع ماما
مختار / و انت ناوى تبيع امك دهبها و لا ايه
عبد الله / لا ما اقصدش بس لو اتحوجنا يعني
مختار / يادى الليله اللى مش فايته و تتحوج ليه يا ابنى ما خير ربنا كتير انت ليه عامل تكليف بينا ياض انا قصرت معاك فى ايه عشان ما تحسش انك اخويا الصغير
عبد الله / اخويا اه بس مش ابويا انا مش ملزم منك
مختار / بكره ربنا يكرمنى بعيل غلس زيك و اسميه عبد الله و اصبحه بعلقه و امسيه بعلقه و يسالنى بتعمل فيا كدا ليه اقوله بفش غلى من خالك
عبد الله / هههههههههههههههههه و يهون عليك خاله
مختار / لا ما يهونش دا حبيبي
مختار يحضن عبد الله
مختار / انا طالع انام لحسن انا صاحي من بدرى الناس النهرده من اذان العصر و هم مالين السرايا
عبد الله / ربنا يكتر حبايبك
مختار / امين يلا اسيبك ترتاح بقي
مختار يقوم عبد الله يقوم وراه يلحقه قبل ما يوصل للباب
عبد الله / استنى النقطه
مختار / دا انت غتت
عبد الله / خدها بقي
مختار / هات اياكش تتبط
مختار ياخد الفلوس و يحطها فى جيبه و يمشي عبد الله مبتسم و سعيد
....................
فى اوضه مختار
هند واقفه بتعمل قهوه على البوتجاز مختار ممدد فى السرير
هند / و الدكتوره بعتت جابت تست حمل و عملته نور شرطه و التانيه خفيفه خالص و قالت انه ويكلى بوزيتيف و ادتها دوا و قالت هتكشف بالسونار بعد شهر عشان الحمل لسه فى اوله
مختار / بشره خير والله الواحد فرح
هند تصب القهوه و تروح تحط الفنجان جنب مختار يتعدل و ياخده منها
مختار / تسلم ايدك ... تعالى جنبي بقي
هند / ثوانى
هند تروح تاخد الكنكه و المعلقه و تدخل الحمام تغسلهم مختار يقوم يحط ايده فى جيب الجلبيه و يطلع الفلوس و يروح لهند بتشطف الكنكه
مختار / اخوكى باعتلك النقطه بتاعتك
هند / هو لحق يقبض
مختار / دا ايجار الشقه شهرين مقدم و شهرين تامين تمن تلاف جنيه
هند / اتارى ماما زعلانه اوى انا قولت تعبانه من السفر رايح جاى فى نفس اليوم و لم الحاجه
مختار / انا قولتله يستنى اما نرجع و بعدين نشوف موضوع الشقه ده
هند / طب ليه ادونا الفلوس كلها
مختار / بيشرفك
هند / تافه اوى
هند ترمى الظرف على ترابيزه و تروح تحط الكنكه و المعلقه فى التقفيله و تمدد على السرير و هى مضايقه مختار متابعها يروح يمدد جنبها و يشرب من القهوه
مختار / انتى عارفه انى بحب عبد الله قوى
هند / عارفه
مختار / طب تعرفى ليه
هند بدلع
هند / عشان اخويا ؟
مختار / دايما تزنقيني كدا ... طبعا يعني ... بس هو فى سبب تانى
هند / هههههههههههههههه قول
مختار / عشان راجل واد عصب كدا وقت الجد تتسند عليه مع انه من بعيد يبان عيل طرى بس الحق هو مش كدا هو بس ما لقاش فرصه يثبت روحه
هند / و تفتكر الفرصه دى هتيجي امتى
مختار / ما احنا فيها اهو و فى كل يوم بيثبت نفسه اكتر من اليوم اللى قبله و لعلمك دا مش كلامى لوحدى كل اللى فى السرايا شايفين كدا
هند تبتسم
مختار / عبد الله بيحاول يشرفك و يرفع راسك و كل حاجه بيعملها بيعملها عشانك انتى يا هند مش عشان تافه
هند / انا ما قصدتش انا اقصد ان الفلوس مش هتفرق ميه من الف من تمانيه ما كل واحد بيجامل باللى يقدر عليه
مختار / انتى عارفه احنا لامين نقطه كام دلوقت
هند / انا معدتش بس واضح انهم كتير اوى دا كفايا الدهب اللى جالى
مختار / و اخوكى مش شايف ده يعنى ؟ بقولك ايه خلاصه الكلام عاوزين نشوف طريقه مزوقه نرجعلهم بيها الفلوس دى عشان انا غلب حمارى
هند / مش عارفه انا ممكن اديها لماما و اتكلم معاها
مختار / و هى دى مزوقه !!!
هند / ما اعرفش بقي زودله مرتبه فى الشونه
مختار / الا دى الحسابات مكشوفه و سهل يعرف انه بياخد اكتر من غيره و هتقلب نكد
هند / اديله شغل اضافى
مختار / زى ايه يعني ؟
هند / ما اعرفش بس اكيد هتلاقي حاجه
مختار يشرب من القهوه
مختار / بدعتى فى القهوه دى اقسم بالله
هند / الف هنا ... مختار
مختار يبصلها
هند / هو انا ممكن اسالك فى حاجه ؟
مختار/ اكيد اسالي
هند / هو ناصر كان بيزعقلك فى المكتب ؟
مختار / اخويا الكبير و هو اللى مربيني هو الله يرحمه ما كانش بيزعقلك
هند / ساعات بس
مختار / هو بيحبنى و بيخاف عليا و ان قلع اللى فى رجله و ادانى بيه انا مش هفتح بقي بس هو مش هيعمل كدا
هند تبتسم
مختار / تحبى تعرفى كان بيزعقلى ليه ؟
هند / هتقولى لو سالت ؟
مختار / هقولك من غير ما تسالى مع ان المفروض ما تعرفيش
هند / خلاص ما تقوليش ما تقولش اى حاجه تضايقنا من بعض
مختار / لا لا مش كدا
هند تبصله مختار ياخد بق قهوه
مختار / انتى فاكره لما قولتلك انى محجزتش الشقه صدفه و انها الوحيده اللى لقيتها بالتشكيل اللى قولتلك عليه
هند تهز راسها
مختار / المفروض انى كنت اعمل كدا و انا بحجز الجناح
هند / يعني ايه
مختار / يعني كان لازم احجز اربع اوض مش اوضه واحده ولازم يبقوا بتشكيل امنى معين
هند ملامحها تتجهم
هند / انا مش فاهمه
مختار / يعنى انا ما بمشيش بره البلد من غير حراسه
هند / بس انت سبت السلاح
مختار / انا سبته بس الناس ما عرفوش انى سبته على الاقل مش كلهم
هند عنيها تتملى بالدموع
هند / يعني ايه ؟
مختار / حتى لو عرفوا احنا حتى عبد الرحمن ما كناش بنسيبه من غير حراسه الامان واجب و ولاد الحرام ما خلوش لولاد الحلال حاجه
هند/ مختار لو سمحت اتكلم بلغه افهمها
مختار يبصلها و يسكت هند تترمى فى حضنه
هند / هو انت ممكن يجرالك حاجه ؟ هو انا ممكن اخسرك ؟
مختار / هو انا بقولك كدا عشان اخوفك انتى كمان يا بت انا اكتر حاجه بتضايقنى انك تبقي خرعه كدا ما تجمدى قلبك ده بقي
هند / انت بتهرج هو انت لو عرفت ان ممكن يجرالى حاجه هتبقي عادى يعني
مختار / مش هيجرالك حاجه ما تخافيش و مش هيجرالى بس الاعمار بيد الله و الحذر لا يمنع القدر بقولك ايه يا بت انتى انا ما اتعودتش امشي جنب الحيط بفوت فى الحيط و اللى فى نصيبي هاخده
هند / يا سلام !!
مختار / و قسما بالله نصيبي كله خير حتى اهو
مختار يرفع شعر هند لورا بعيد عن وشها تبصله تلاقيه مبتسم
مختار / الا فين البت ام قلب ميت اللى ضربت العيال السيس فى الجيم
هند / معرفش هى بتطلع لوحدها
مختار / يعني هى موجوده يعني و وقت الجد هتطلع صح ؟
هند / انت بتخوفنى ليه ؟
مختار / مش بخوفك والله ما بخوفك انا عاوزك تجمدى و تنشفي انا عاوز حيطه اتسند عليها تعرفى تبقي حيطه و لا ايه ؟
هند تبصله
مختار / طب نوايه من اللى بيسندوا بيها الزير طيب ؟
هند تضحك و ما تقدرش تكتمها مختار يبتسم
مختار / الله اكبر ايوه كدا
هند / بجد خوفت
مختار / انا مراتى ما تخافش غير من اللى خلقها عشان اى حاجه تانيه فى الدنيا دى بايده هو بس
هند / و نعم بالله
مختار / و انا عارفك انا اكتر واحد فى الدنيا دى عارفك انا يمكن عارفك اكتر من امك اللى ولدتك انتى ما انتش ضعيفه و لا جبانه انتى وقت الجد بمليون راجل
هند تبص فى الارض مختار يمسكها من دقنها يخلى عنيها فى عنيه
مختار / انا واثق فيكي
هند تبصله
مختار / و انا المفروض اتكلم جد ازاى و انا ببص فى العيون الحلوه دى ما انا اكيد عقلى هيشرد منى فى حته تانيه خالص
هند ترتبك و تفوق و تبتسم
مختار / المهم انتى ناويه تقضيها رغى و لا هتيجي معايا فى الحته التانيه خالص دى
هند تبتسم اوى
هند / انت بتقول ايه ؟
مختار / ما تستاهبليش يا بت انتى فاهمه كل حاجه صحيح يتمنعن و هن الراغبات
هند / طب تصدق انك مجرم
هند تديله ضهرها يقرب اكتر و يلزق فيها و هم الاتنين مبتسمين و هند مبتسمه بخجل
مختار / هند .. هند .. هند
هند / نعم
مختار / ما تيجي نشغل التليفزيون و نعلى الصوت
هند تبتسم و تبص فى الارض
مختار / طب تعالى نلعب النمله
هند تبصله
هند / ايه النمله دى
مختار يحرك صوابعه على كتف هند كانها رجلين بتمشي لحد ما يوصل لرقبتها تغير
مختار / النمله النمله النمله النمله
هند / هههههههههههههههههههههههههههههههههه
مختار / لا دا احنا نعلى التليفزيون بقي
هند / ههههههههههههههههههههههه
مختار / سبت ايه دا انت لاهف منى الاسبوع كله و ان كنت نسيت اللى جرا سيديهاتك معايا
عباده / دى اخرتها يا ابن عمى ماشي ماشي يلا بالاذن انا عشان ورايا شغل
مختار / نورت
مريم / هجيب حاجه التنضيف و اجى
مختار / ما تتاخريش عشان عاوز انام
مريم / انت مش لسه صاحى يا عمى
مختار / تعرفى تخليكي فى حالك ؟
مريم / استاذه و رئيسه قسم
مختار / احبك يلا بسرعه هاتى الحاجه
مريم تجرى مختار يبص لهند يلاقيها مبتسمه اوى
مختار / سمو الملكه ليها اى طلبات تانى
هند / انا بقول كدا حلو اوى
مختار / طب مش عاوزه مكنسه للسجاد
هند / لا هتزنق الاوضه على الفاضي انا بفكر اجيب حافظتين للسجاده ابدل فيهم يتحطوا فى الغساله و الحياه تبقي سهله
مختار / و ماله نقول لعباده يجيب
هند / هو عباده مسؤل المشتريات فى السرايا
مختار / لا عادى قولى لام فاتن و لا لمريم و لا لفاتن او اى حد
هند / مش عاوزين نتقل عليه
مختار / لا عباده جدع راجل بصحيح اطلبى منه بقلب جامد
هند / بحب علاقتكوا اوى
مختار / ههههههههههههههههههههه
هند / ايه !!
مختار / انتى عارفه توم و جيرى
هند / فى حد ما يعرفهمش
مختار / اهو انا و عباده اللعن منهم ناقر و نقير طول الوقت بس وقت الجد انا و ابن عمى على الغريب اخويا و ضهرى
هند / طب ما دا كويس
مختار / كويس طبعا بس لو ما لقيناش حد نتفق عليه بقي
هند / ااااااه فهمت
مختار / فاكره اول مره ركبتى معايا العربيه قولتلك انى نزلت مصر هربان من مشاكل العيله فاكره
هند / اه فاكره حاجه زى كدا
مختار / اهو انا اتعلمت فى مصر عشان ارتاح من عباده و ما كانش حاجه بتنغص عليا الاجازات الا عباده
هند / ما يبانش عليكوا خالص دا اللى يشوفه يقول بيحبك اوى و بيخاف عليك جدا
مختار / حقيقي
هند / علاقتكوا غريبه بس برده حلوه حتى لو بتتناقروا و تتنافسوا كفايا انك مطمن انه وقت الجد فى ضهرك و انه لا هيغدر بيك و لا ياذيك
مختار / ايوه بالظبط كدا
هند تبتسم
مختار / عارفه مين برده اللى علاقتهم كدا هتستغربي اوى
هند / مين
مختار / ام عباده و ام فاتن
هند / بتهزر
مختار / طول الوقت ام فاتن بتشد فى شعرها منها بس اول ما تعيا و ترقد تلاقى ام عباده سابت اللى وراها و اللى قدامها و قعدت تحت رجليها تخدمها
هند / و دا لله و للوطن اصل بصراحه كل ما اعاشرها اتقفل منها
مختار / و الله انا ما بدخلش فى النفوس النيات دى بتاعه ربنا بس العقل بيقول ايه حرس و لا تخونش
هند / صح
باب الاوضه يخبط هند تفتح مريم شايله فرشه و جاروف و جردل و شرشوبه و مقشه و محتاسه فيهم
مريم / جبتلك العده من تحت على ما نجيب جديد
هند / طب حاسبى حاسبي عند
مريم / هيكركبولك الحمام على الفاضي خليهم تحت و انا اطلعهملك لما تحتاجيهم
هند / لا خليهم عندى و انا هبقي اشوفلهم حته احطهم فيها
مريم / براحتك كدا كدا اوضتك و حمامك رتبيهم زى ما انتى عاوزه اوعى اما انضف عشان عمى عاوز ينام
مختار / اه والله ياريت تنجزوا
مريم / شايفه المعامله
هند / دا بيجر شكلك بس ما تاخديش فى بالك
هند تاخد الجاروف و الفرشه و توطى تلم التراب مطرح الخروم و مريم تروح تملا ميه من الحمام و تيجي تمسح الارض و مختار قاعد على كرسي التسريحه و حاطت ايده على خده
......................
فى الشونه
عبد الله ماسك الدفتر و فى عربيه بتحمل شكاير من الشونه راجل يدخل
الراجل / سلام عليكوا
عبد الله / و عليكم السلام اتفضل
الراجل / يزيد فضلك امال فين عباس
عبد الله / انا هنا مكانه اؤمر
الراجل / كنت عاوز حصه السماد بتاعتى
عبد الله / ثوانى الرجاله تحمل العربيه دى و اشوفلك حصتك
الراجل / و انا لسه هستنى العربيه تحمل كدا اليوم يضيع منى يا ابن عمى خلصنى دول كام شكاره عمى
عبد الله / طب خش لجابر جوه يجهزهملك
الراجل / كتر خيرك
عبد الله / الهمه يا رجاله مش هنقعد اليوم كله
شاب بيحمل العربيه / هانت خلاص يا سى عبد الله
راجل ٢ يطلع من جوه يوشوش عبد الله
عبد الله / و انا المفروض اعمل ايه زى ما انتوا متعودين اشتغلوا بص انا هكلم عباده اساله
الراجل يطلع من جوه و عبد الله بيطلع التليفون من جيبه
الراجل / ما تخلصنى يا ابن عمى لسه ورايا مليون حاجه اعملها النهرده
راجل ٢ / مش لما نعرف ليك حصه و لا لا
الراجل / يعني ايه الكلام ده
راجل ٢ / يعني انت حسابك تقل اوى يا ابن عمى
الراجل / ما انا متفق مع سى عباده هدفع المتاخر كله لما ابيع المحصول ايه اللى جد
راجل ٢ / اللى جد انه ما بلغنيش انه اتفق معاك هنساله و نتاكد
الراجل / قصدك انى كداب و لا ايه
عبد الله / يا سيدى انت فوق راسنا هو ما يقصدش اقعد بس و استهدى بالله و اشرب كبايه شاى دى مكالمه تليفون و انت يا جابر معلش جهزله الحاجه عشان اول ما اقفل مع عباده يستلمها علاطول
الراجل / يا جدع انت جديد هنا ما تعرفنيش انا كلمتى واحده و اللى اقوله تصدقه علاطول
عبد الله / معلش مهو عشان انا جديد لازم فى الاول شويه لخبطه جت فيك معلش
الراجل / يا جدع انت اليوم هيطير منى عشان كام شكاره دا عباس كان بيبعت الحصه من نفسه انا عارف انا اصطبحت بوش مين النهرده
جابر / ما تلم الدور بقي يا حمدان احنا ساكتين من الصبح و بعدين لما تتكلم مع سى عبد الله اتكلم عدل
حمدان / مين سي عبد الله يعني
عبد الله / جهزله الحاجه يا جابر انتوا كدا اللى بتضيعوا الوقت فى الرغى خلصونا ناس كتير واقفين
الشاب / العربيه حملت يا سي عبد الله و الفلوس اهى كامله
عبد الله / ثوانى اعدهم و اعملك وصل
عبد الله يروح يقعد على المكتب و يطلع دفتر وصولات و يعد الفلوس حمدان يروحله
حمدان / مشيني الاول و بعدين عد براحتك انت هتلطعنى جنبك و لا ايه
عبد الله / مهو الراجل التانى جاى قبلك اللطعه عشانك ليه
حمدان / انت بتكلم مين كدا ياض انت
الرجاله تتلم
عبد الله / مش هرد عليك عشان انت قد والدى
جابر / بقولك ايه يا حمدان لم الدور سى عباده لو عرف باللى انت عملته مش هيحصل طيب
حمدان / يعني عاجبك اللى بيحصل ده ما عدش غير العيال اللى يوقفونا
عبد الله / انا ساكتلك ادب انما هتقل ادبك هقولك اقف فى الدور بعد ما كل العربيات دى تحمل
حمدان / انت شكلك ما تعرفش انت بتكلم مين
الشاب / انت اللى ما تعرفش انت بتكلم مين دا يبقي نسيب سى مختار اخو مراته
حمدان وشه يجيب الوان و يبص على الرجاله الملمومه
عبد الله / جهزله الحاجه يا جابر لحد ما اكلم عباده و اساله فى حوار الفلوس
حمدان يوطى على ايد عبد الله يحاول يبوسها عبد الله يسحب ايده بسرعه
حمدان / ابوس ايدك ما تجبله سيره باللى حصل اللى ما يعرفك يجهلك و انا غلبان و صاحب مرض
جابر / و ما دام عارف انك غلبان جاى نافش ريشك علينا على الصبح ليه
حمدان / خليك محضر خير يا جابر انت جاى تولعها
عبد الله / ما تخلص يا جابر و تجهز حاجته
جابر / مش اما تشوف سى عباده هيقول ايه الاول ما يمكن يقول ما لوش حصه
عبد الله يتكلم فى التليفون و حمدان عمال يبص على الرجاله و متوتر
عبد الله / ايوه يا عباده ازيك ... لا كلو تمام بس كنت عاوز اسال عن حاجه
.......................
فى مطبخ السرايا
فاطمه / و الاكل هيطلع فوق و لا هينزلوا ياكلوا معانا
مريم / والله ما سالتهم لما الاكل يجهز نكلمهم و نسالهم
فاتن / انا خلصت الحمد لله خدى يا مريم علقي على حله المحشي دى
فاتن / ضهرى اتقطم
فاطمه / ضهرك اتقطم من حله محشي الله يعينك على اللى انتى فيه
فاتن / والله تعبانه خالص النهرده من ساعه ما صحيت و انا رايحه جايه على الحمام
فاطمه / ليه مالك كلتى حاجه وحشه و لا ايه
فاتن / والله ابدا
فاطمه / ليكون برد فى معدتك اطلعى اتكلفتى فى السرير و انا هعملك حاجه سخنه تدفيهالك على ما الاكل يستوى لو كنتى قولتى من بدرى كنت خليتك ترتاحى
فاتن تغسل ايديها و تمشي
فاطمه / مش فاهمه ايه حكايه وجع البطن اللى مسكانا فى السرايا دى البت سماح كمان قافله على نفسها طول الوقت و كل ما اكلمها تقول بطنى عاليه بطنى عاليه
مريم / انا عملتلها ينسون و الله و سقيتهولها
فاطمه / عارفه شوفت الكبايه لما كنت بشقر عليها دى اكيد عين راشقه حد من معازيم الفرح النهرده ابخر البيت كله عينك على الاكل لحسن يشيط منك و انا هطلع اجيب البخور من فوق
مريم / ما فى بخور هنا
فاطمه / لا دا انا جايبه من النت بخور لاوسي اصلي من الغالى لسه عباده مستلمهولى النهرده الصبح اهو فرصه نجربه دا بيقولوا فيه شعر يا بت
مريم / تمام نجربه
فاطمه تبتسم و تطلع اوضتها و مريم تقف جنب الحلل الكتير اللى على البوتجاز
........................
فى الشونه
الرجاله قاعده بتشري شاى
عباده / اوعى تكون زعلان من اللى حصل انا هشدلك ودنه
عبد الله / لا مش زعلان و لا حاجه الراجل اعتزر حصل خير
جابر / لا يا سي عباده بس برده ما كانش ياخد الحصه انا تعبت من الراجل ده لسانه طويل و كل مره يعمل مشكله
عباده / معلش يا جابر امسحها فيا انا
جابر / استغفر الله يا سي عباده دا انت على راسي
عباده / الراجل ده اصله غلبان ربنا ابتلاه و خد عياله الاتنين نوبه واحده
عبد الله / لا اله الا الله
عباده / مراته ما استحملتش رقدت و عياها بيكلفه فلوس ياما و هو بطوله بين خدمتها و خدمه الارض فتلاقيه علاطول عصبى و مستعجل كدا فبنصبر عليه
عبد الله / لا نصبر عليه طبعا الله يعينه ربنا ما يكتب اللى هو فيه على حد بس هو عياله ماتوا ازاى
عباده / تعددت الاسباب و الموت واحد يا عبد الله كلنا هنموت لما يجي معادنا ... ما تصبلى كبايه شاى تانيه يا جابر ينوبك ثواب
جابر / تؤمر يا سي عباده
جابر يصب لعباده كبايه شاى و يديهاله عباده يشرب
عباده / تسلم ايدك
عبد الله / بالنسبه للفلوس اللى فى الخزنه هعمل فيها ايه
عباده / سبهم فى الخزنه للصبح و جابر و الرجاله هيودوهم الصبح للبنك
عبد الله / بس دى فلوس كتير هتسيبوهم كدا فى الشونه عادى
الرجاله تضحك
عباده / طب ما البضاعه بتتساب فى الشونه عادى و بعدين بلاش الكلام ده الرجاله دى تزعل
جابر / يا سي عبد الله دى شونه الزيني يعني مفيش حد يستجرى بس يفكر يسرق منها و لو حبه غله واحده
غفير / و لو فكر احنا برده ما بنلعبش يا سي عباده
عبد الله / لا مؤاخذه معلش جديد بقي
عباده / شكل ما فيش شغل تانى النهرده قفل يا عبد الله خلينا نروح ناكل لقمه و نريح شويه
عبد الله / الدنيا لسه نهار هستني شويه يمكن حد يجي روح انت لو عاوز
عباده / ما جابر و الرجاله موجودين ما تقلقش انت قوم يلا معايا
عبد الله / ما جاتش من ساعتين زمن
عباده / لا بقولك ايه انا ما بحبش اكرر كلامى ابو نسب مش ابو نسب اللى اقوله يتسمع قوم يلا اما نروح بيقولوا النهرده محشي و ما تقلقوش يا رجاله نصيبكوا محفوظ
غفير / يدوم العز يا سي عباده
عبد الله / لا ما دام محشي يبقي نقوم بقي
الرجاله تضحك عبد الله و عباده يركبوا العربيه و يمشوا
عبد الله / هو انتوا كل يوم بتبعتوا اكل للغفر امبارح بعتولهم برده
عباده / لقمه هنيه تكفى ميه يا عبد الله و الناس دى بتشقا عشانا و بعدين احنا مش الوحيدين اللى بنبعتلهم
عبد الله / و ما دام فى غيركوا بيبعت بتبعتوا ليه
عباده / الناس دى بتشقى و كلهم على قد حالهم بيجيلهم اكل من بيوتهم و بيفرشوا و ياكلوا سوا
عبد الله / بس دا تعب على الناس اللى فى البيت يعنى كل يوم يعملوا كميه الاكل دى للى فى البيت و الغفر اللى فى السرايا و كمان الغفر اللى فى الشونه
عباده / الغفر اللى فى البلد كلها يا عبد الله مش الشونه بس
عبد الله / بس دول كتير اوى
عباده / لسه بقولك لقمه هنيه تكفى ميه و الناس دى غلابه و بتشقي و اهو كله بثوابه
عبد الله / ايوه بس
عباده / الستات اللى فى البيت بيتعبوا فى الاكل انا عارف بس كلو بثوابه دا مفيش ثواب احلى من لقمه تحطها فى بق حد غلبان و خصوصا لو من اللى بتاكل منه حتى تطيب خاطره و تحسسه انه منك و ان قلبك عليه فيبقي قلبه عليك هو كمان
عبد الله / انا والله مش معترض انا بتكلم فى حاجه تانيه خالص
عباده / انا فاهمك هم بيرتبوا امورهم لو الاكل متعب و هيحتاج مجهود بيبعتوا يجيبوا ستات تساعدهم و هم بسم الله ما شاء الله كتير يعني و بعدين هم بيعملوا ايه تانى طول اليوم يعني
عبد الله / طب سالتهم قبل ما تقول بيعملوا ايه تانى طول اليوم ماما كانت بتتنرفز لوى لو حد قال الكلمه دى قدامها و تقول هو شغل البيت بيخلص
عباده / عشان الحجه عندكوا بطولها انما هنا ايد على ايد تساعد و بعدين هنا هم واخدين على كدا و السرايا الكبيره دى لو كل واحده نضفت متر فى متر خلصت و برده وقت التنضيفه الكبيره بيجيبوا ستات تشيل و تحط معاهم ما تقلقش ... عبد الله هو انت حد كلمك فى حاجه
عبد الله / حاجه ايه
عباده / حد بيتعب حد اشتكى سمعت حد بيشتكى سواء ليك او للحجه .. هى الحجه اشتكت انها بتتعب
عبد الله / لا لا لا ابدا انا بتكلم عموما يعني .. من وجهه نظرى اقصد .. بناء على كميه الاكل اللى بتتعمل كل يوم و كدا .. اصل انا برده مش واخد على النظام لسه ... بس هو جميل .. جميل فعلا ربنا يتقبل يارب
عباده / امين يارب امين
عبد الله يهرب بعنيه من عباده و يبص من الشباك و عباده سايق
..................
فى اوضه هند
مختار نايم على السرير هند تطلع من الحمام لابسه البرنص و لافه شعرها بفوطه تقعد على التسريحه مختار ينام على جنبه و يتفرج عليها و هى بتسرح شعرها و كل شويه يبصوا لبعض فى المرايه مبتسمين
هند / ايه !!
مختار / بيقولوا التامل فى جمال خلقه ربنا من اعظم العبادات سبحانه اللى خلق و صور
هند تبتسم بخجل و تبص فى الارض و تبص فى المرايه تانى تلاقيه متابعها و مبتسم تبص فى الارض تانى الباب يخبط هند و مختار يبصوا لبعض
مختار / مين
فاطمه / انا ام عباده
مختار / ثانيه يا ام عباده هفتحلك اهو
هند تقوم تجرى تاخد الاسدال و تدخل الحمام و مختار بيرتب ملايه السرير و اول ما هند تقفل باب الحمام مختار يروح يفتح الباب يلاقي فاطمه شايله بخور
فاطمه / صحيتكوا و لا ايه اصل انا ببخر البيت كلو فاتن و سماح تعبانين قولت دى اكيد عين قولت ابخركوا انتوا كمان
مختار / مالهم كفاهم الله الشر كانوا كويسين امبارح
فاطمه / معدتهم عاليه ... امال فين هند
هند تفتح باب الحمام لابسه الاسدال فاطمه تدخل مختار يبص فى الارض
فاطمه / رقيتك و استرقيتك من عين كل من شافك و لا صلاش على النبي شكلك لسه مستحميه خدودك بتبوك حمار
هند تبص لمختار
فاطمه / انا مش هطول هبخر الاوضه و ابخركوا و امشي ... دا بخور مستورد ما تلاقيهوش هنا جيباه من النت قولت لازم ابخركوا بيه ... الاكل تحت جاهز اخليهم يطلعولكوا منابكوا هنا و لا تنزلوا تونسونا
مختار / لا هنتعبكوا تطلعوه
فاطمه عينها فى المكان خصوصا على هند تلم نفسها
فاطمه / اه طبعا امال مش عرسان يلا مش هعطلكوا اكتر من كدا هبخر بس الحمام و امشي
هند / لا ملوش لزوم الحمام انا هبقي ابخره
فاطمه / دا بخور مستورد ريحته ثابته مش زى التانى
هند / معلش مره تانيه
فاطمه / براحتك على العموم هبقي ابعتلك شويه بخور تخليهم عندك الواحده برده لازم تحافظ على ريحه اوضتها حلوه و نضيفه امال ايه بكره تتعلمى الحاجات دى .. فوتكوا بعافيه
مختار / الله يعافيكي
فاطمه تمشي و مختار يقفل الباب بالمفتاح
هند / هى تقصد ايه ببكره تتعلمى الحاجات دى يعني انا مش مخليه الاوضه نضيفه و ريحتها حلوه
مختار يقرب من هند و بالراحه يحرك ايديه لفوق و تحت على دراعتها
مختار / تفتكرى ربنا خلقلنا ودنين ليه
هند / ايه السؤال ده عشان نسمع بيهم طبعا
مختار / ممكن بس انا من وجهه نظرى اننا عشان ندخل من هنا و نطلع من هنا
مختار يزغزغ هند من رقبتها مره اليمين و بعدين الشمال و هى بتعوج رقبتها و تغير مع ايديه و مبتسمين
مختار / بس البخور ريحته حلوه ما ننكررش
هند / والله انا بفكر ابخر الاوضه من عنيها هى بجد صعبه اوى
مختار / ههههههههههههههههههه قولنا ايه دخلى من هنا و طلعى من هنا
مختار يكررها و هند تغير
هند / بس بقي بغير الله
....................
فى شقه يوسف
يوسف يدخل يلاقي محمود قاعد
يوسف / السلام عليكم
محمود / و عليكم كنت فين ؟
يوسف / خير فى حاجه ؟
محمود / ما جتش المحل زى ما اتفقنا استنيتك و ما جتش و اتصلت بيك كتير و ما كنتش بترد
يوسف / كنت عامله صامت كنت محتاج اقعد مع نفسي شويه
محمود / حقك عشان تعرف تفكر و تاخد قرارات فى حياتك
يوسف / اخبار المحل ايه
محمود / النهرده شديت مع المهندس مقدملى ميزانيه كبيره جدا و بيقول محتاج تصليحات اكبر من اللى كان متوقعها
يوسف / شوف غيره تلاقيه نصاب و عاوز يعمل مصلحه على قفانا
محمود / تعرف حد كويس
يوسف / لا بس اشوفلك
محمود / ياريت
يوسف / اخبار خيلانى ايه
محمود / خيلانك ظروفهم غيرنا
يوسف / ليه ان شاء الله ما كلنا محلاتنا اتحرقت و كلنا اتنصب علينا
محمود / بس هم حظهم ارحم منا هم التامين هيعوضهم منهم لله ولاد الكلب اللى اتبلوا عليا
يوسف / انا بقول تشوفلك محامى شاطر عن اللى معاك اللى ضيعك ده و مش فالح غير يسحب فلوس و خلاص
محمود / تعرف حد كويس
يوسف / اشوفلك
محمود / امك كلمتنى امبارح فى حوار انك عاوز نسبه من المحلات
يوسف / دا حقى
محمود / و انا فين حقي يا يوسف
يوسف / حقك فى ايه
محمود / فى كل الخساير اللى خسرتها بسببك و بسبب حبى ليك و دفاعى عنك
يوسف / اسلوب رخيص اوى اسمع يا بابا انا
محمود / اسمع انت يا يوسف انا فكرت كتير فى كلامك ده فكرت فيك من يوم ما اتولدت لحد النهرده و لقيت انى دلعتك زياده عن اللزوم
يوسف / برده
محمود / انا خلاص اديت رسالتى ناحيتك كامله و اتخرجت الحمد لله جه دورك بقي تكمل
يوسف / ازاى يعني
محمود / كل العصافير بيجي يوم و تسيب العش
يوسف/ كان ممكن قبل ما تبيع شقتى
محمود / و همنع المصروف كمان عاوز فلوس اشتغل
يوسف / مش لما الشهاده تطلع اقدم
محمود / ماشي يا يوسف لحد ما الشهاده تطلع
يوسف / و انا هلاقي شغل فى يوميها انت بتعجزنى ليه انت ليه عاوز تحبطنى ليه مصمم تحسسني انى فاشل
محمود / ما حصلش
يوسف / امال تسمى اللى بتعمله ايه تقصقص جناحاتى و تقولى طير انا لو عدوك مش هتعمل فيا كدا انا ابنك الوحيد
محمود / مهو عشان كدا خايف عليك عاوزك تنشف و تسترجل و تنزل تشتغل معايا
يوسف / على اخر الزمن اشتغل بياع
محمود / و ماله البياع اقعد على الكاشير يا سيدى
يوسف / يا بابا انا مهندس زراعى مش محاسب
محمود / و المفروض انك لحد ما الشهاده تطلع و تدور و تتعين انا افضل اصرف عليك
يوسف / ما كل الابهات بتعمل كدا امال اشحت
محمود / اشتغل انت عارف ان ممدوح اشتغل على عربيته كريم
يوسف / هتنزل بيا لحد فين من بياع لسواق مش عاوزنى امسك خيشه و جردل و امسحلك السلالم و اغسل العربيات بالمره
محمود / الشغل مش عيب
يوسف / الناس كلها تروح بيتها ترتاح انا بروح اتخنق
محمود / الباب قدامك لو البيت مش مريحك امشي
يوسف / انت بتطردنى
محمود / مش انت اللى مش عاجبك عيشتنا مش انت اللى مش راضي تكبر يا ابنى انا كبرت
يوسف / هى ماما فين
محمود / انا اللى بكلمك هنا
يوسف / و انا مش فايق اسمع عن اذنك
يوسف يروح يفتح فى الاوض لحد ما يلاقي امه قاعده و عينها على الباب
يوسف / انتى هنا و سامعه الكلام ده و ساكته سيباه يبيع و يشترى فيا كدا
محمود / قولتلك كلامك معايا انا
يوسف / انا راجع تعبان و جعان و انت برده مش راضي تسيبنى فى حالى
محمود / انا عاوزك
يوسف / انت عاوز انت عاوز مش مهم انا عاوز ايه يعني
محمود / و احنا ضيعنا غير جريانا ورا اللى انت عاوزه حتى لو مش من حقك
يوسف / هتشيلنى الليله يعني ماشي ما دام ده اللى انت عاوزه ماشي انا سيبهالك دا الشارع ارحم
يوسف يمشي اسراء تيجي تحصله محمود يبرقلها
محمود / اسراء
اسراء / انت ايه اللى جرالك
محمود / عوزانى اعمل ايه عوزانى اصبر عليه لحد امتى
اسراء / مش من الدار للنار كدا كدا هتخسره
محمود / لو عندك حل تانى وريني نفسك انما انتى مش فالحه غير فى المداديه و الدلع
اسراء / انا تعبت منك
محمود / و انا تعبت من الدنيا باللى فيها
محمود يمشي و يرزع الباب وراه اسراء تبص فى الارض
....................
فى المكتب
شاكر / انا شايف انه شاب محترم و ابن حلال
عباده / و لا محترم و لا نيله انا من الاول قولت نشوف مدرسه للبنات
ناصر / الجدع ما صدرش منه حاجه و داخل البيت من بابه
عباده / مش مرتاحله
ناصر / هو انت اللى هتتجوزه اسالوا البنت
شاكر / الراجل قالى انه عنده شقه جاهزه و بيقبض كويس و احنا قبل ما ندخله بيتنا كنا سالين عليه و عارفين اصله و فصله
عباده / برده مش مرتاحله
ناصر / انت فى حد معين فى دماغك لسماح
عباده / لا مش القصد بس
ناصر / بس ايه
عباده / مش عارف زى ما قولت مش مرتاح
الباب يخبط و مختار يدخل
مختار / متجمعين فى الحرم ان شاء الله
ناصر / اااااه جيت على الجرح
مختار / ليه ما احنا فيها خد ام فاتن و اطلعوا
ناصر / و انا مش هرد كلامك
عباده / عبد الله هينزل مصر الجمعه
مختار / لقيت حد ياجر الشقه
عباده / هههههههههههههههههه عيب عليك
مختار / خلى فاروق يتصل بيهم و يبلغهم
عباده / و لو موافقوش
مختار / ساعتها نبقي نفكر المهم كنتوا بتتكلموا فى ايه قافلين عليكوا بقالكوا فوق الساعه و زياده خير فى حاجه و لا ايه دا لو ليا اعرف يعني
شاكر / الاستاذ عصام المدرس طالب ايد سماح
مختار / راجل ابن حلال و سمعته حلوه
عباده / رفضت مغاورى و موافق على عصام مع ان البنتين قد بعض يعني
مختار / ايه الحكايه بتاعتكوا دى مريم اللى رفضت مريم اللى كانت هتتجوز و هى اللى رفضت انا لا قبلت و لا رفضت و لا ليا فيه اصلا
شاكر / نفس كلامى نسالها الاول
عباده / مش مرتاح يا جماعه
مختار / تلاقيك غيران عليها ان حد هياخدها من وسطينا
عباده / يا راجل قول كلام غير ده دا انا هكسر وراها زير مش قله
ناصر / اهو كلام
عباده / اللى تشوفوه اعملوه بس اقسم بالله ما مرتاح
الكل يبصوا لبعض و يبصوا لعباده
......................
فى اوضه هند
هند بتعلق عبايه مختار و هو بيقلع الجزمه تاخدها و تحطها عند باب الاوضه
مختار / تسلمى
هند / بس انا مش فاهمه انت ازاى توافق البنت صغيره
مختار / فى بنات الجواز ليهم ستره مهما كان السن
هند / عيب يا مختار
مختار / سكت
هند / انا ما شوفتش منها حاجه وحشه ليه تقول عليها كدا
مختار / انا ما بقولش قلبي اللى بيقول و انا عمرى ما نظرتى فى حد طلعت غلط ... انا ما بقولش انها بتغلط انا بس بضايق منها عنيها مكشوفه و جريئه زياده
هند / حرام عليك دى غلبانه
مختار / والله ما غلبان الا انتى
هند تبصله يفرد ضهره على السرير تروح تقعد جنبه
هند / هو انا كنت جريئه معاك زياده لما طلبت منك توصلنى و لا لما كنت بكلمك فى البلكونه
مختار يتعدلها
هند / عيب يا مختار دى برده بنت عمك
مختار / و عشان كدا خايف عليها و العريس اللى جالها راجل محترم و سمعته سبقاه انا مش هجوزها لاى حد و بعدين انا رايي لا هيقدم و لا ياخر الراى رايها هى
هند /مش عارفه ليه اضايقت
مختار / تصدقى لو قولتلك و انا كمان ما كانش المفروض اتكلم عنها كدا
هند تبصله بحب
مختار / ربنا يهديها و يعملها اللى فيه الخير
هند / ربنا يهدينا جميعا المهم انا بقي ما سكتش
مختار / على ايه
هند / قعدت انا و البنات نقلب فى الفايس لحد ما لقيت مكان حلو اوى هيعجبك جدا جدا جدا
هند تجيب الموبايل و تفتحه مختار يشدها فى حضنه تبصله و تبتسم و تفتح صفحه فايس و مختار متابع معاها و هى بتقلب فى الصور
هند / ايه رايك
مختار / حلو
هند / انا كمان كلمتهم و سالت على السعر و فى اوفرز هانيمون حلوه جدا و ياخت و حركات ... انت ركبت يخت قبل كدا
مختار / ركبت مركب كتير
هند / على العموم انا عمرى ما ركبتها نفسي اركب
مختار / نركب
هند / يعني احجز
مختار / احجزى
هند / بجد !!
مختار / مش المكان عاجبك خلاص
هند / طب مش تعرف السعر طب احجز قد ايه
مختار / مش عارف بصي خليها اسبوع و نجدده ما حدش عارف يمكن ما يعجبناش
هند / ماشي
هند تكتب على الماسنجر
هند / كان نفسي اروح الجونه و الحتت دى بس بيقولوا حر اوى
مختار / فى الشتا نروح
هند / وعد
مختار / ان شاء الله لو ما جدش جديد هوديكي
هند / ربنا يخليك ليا
مختار / حاف كدا
هند تبصله
مختار / الواد قلبه بيوجعه و عاوز حد يدلعه
هند / سلامه قلبك ثوانى و اجيلك
مختار / ما تطوليش لحسن أنا مشتاقٌ وعنديَ لوعة ٌولكنَّ مثلي لا يذاعُ لهُ سرُّ!
هند / ههههههههههههههههههه حاضر
هند تقوم تدخل الحمام مختار يمسك موبايلها و يقلب فى الصور
..........................
يوم الجمعه فى مصر
شيري بتسحب شنطه بره اوضتها عبد الله يروح يساعدها عبد الله / عنك انتى يا ماما
شيري / عبد الله
عبد الله يبصلها
شيري / صعبان عليا اسيب بيتي اوى
عبد الله / هناك هيبقي بيتنا برده و بعدين لينا مين هنا غير الحيطان
شيري / الحيطان دى ياما شافت يا ابنى
عبد الله / معاكى حق ياما شافت عشان كدا بقت تخنقنى
عبد الله يشيل الشنطه و يمشي و شيري تبصله بحزن عبد الله يفتح باب الشقه يلاقي فاروق طالع السلم معاه ست
فاروق / السلام عليكم ازيك يا سى عبد الله
عبد الله / و عليكم السلام ازيك يا فاروق
فاروق / الحمد لله الست امانى اللى كلمت الحجه عنها اللى عاوزه تاجر الشقه
عبد الله / اه اهلا و سهلا اتفضلى
امانى تدخل و عبد الله و فاروق وراها
عبد الله / ماما ... فاروق هنا
شيري تطلع من جوه
فاروق / الست امانى اللى عاوزه تاجر الشقه
شيري / اهلا و سهلا اتفضلى
شيري و امانى يقعدوا
عبد الله / هستاذنكوا ثوانى انزل اجيب حاجه من تحت
عبد الله يمشي
شيري / ما تاخذيناش على الكركبه اصلها مقفوله بقالها حبه و احنه جينا ناخد حاجتنا اصل احنا نقلنا مكان تانى
امانى / لا كركبه ايه ما هى حلوه اوى بصراحه احلى مما توقعت
شيري تبص لفاروق و تبص للست و تبتسم
امانى / انا اصلي من اسكندريه و نازله اقعد هنا فتره عشان الماجستير بتاعى بدل ما انا رايحه جايه كل شويه
شيري / اه طبعا وقت و مصاريف انتى فى كليه ايه
امانى / هندسه و قبل ما تسالي ليه ما سجلتش فى اسكندريه كان عشان التقدير القسم بتاعى كان طالب تقدير اعلى و كنت هضطر اضيع سنتين فى الدبلومه عشان اقدر اسجل ماجستير فى التخصص اللى عوزاه
شيري / لا طبعا سنتين كتير اوى
امانى / هههههههه اصل انا اتسالت السؤال ده كتير اوى و برده قبل ما تسالى ليه ما اجرتش شقه جنب الكليه عشان للاسف الايجارات هناك عاليه اوى و فاروق قالى انك هتكرميني ان شاء الله
شيري / عيني بس انا بصراحه
فاروق / احنا اتفقنا على الفين كل شهر و الفين تامين
شيري تبص لفاروق
شيري / يناسبك يا بنتى
امانى / والله لو حبيتى تكرميني زياده من عندك اكيد مش هقول لا ههههههههههههه
شيري / انا اصلى عمرى ما اجرت الشقه دى لحد يعنى العفش ده ما حدش غريب نام عليه و لا استخدمه
امانى / انا مش محتاجه غير المطبخ و الحمام و اوضه بسرير تقدرى تلمى باقي الحاجات اللى خايفه عليها فى الاوضتين التانين و تقفلى عليهم
شيري / لا يا بنتى الشقه شقتك انا ده مش قصدى خالص
عبد الله يدخل شايل كيس فيه اربع كنزات يدى لامانى و لفاروق و مامته و ياخد
فاروق / عشت يا سي عبد الله
شيري / انتى هتحتاجى الشقه قد ايه يا بنتى
امانى / نسال الله التساهيل لحد ما اناقش ان شاء الله
شيري / ما تعرفيش قد ايه بالظبط يعني
امانى / للاسف لا بس مش اقل من سنه
فاروق / احنا نعمل العقد سنه و يجدد بزياده ١٠ % ايه رايك يا ست الكل
شيري / انا ما افهمش فى الحاجات دى و الله يا جماعه انا حتى نفسي اجاملك بس خايفه اظلمك او اظلم نفسي
امانى / يا ستى انتى بس اديني الشقه بسرعه و انتى كدا هتبقي عملتى معايا احلى واجب
شيري / محتاجاها امتى
امانى / انا مش معايا حاجتى لو بعد بكره تمام و انا جاييه معايا الفلوس
فاروق / و انا العقد جاهز و الست امانى قراته و كل تمام
عبد الله ياخد العقد يقراه و امانى تطلع فلوس و تديها لشيري
امانى / دول التمن تلاف اللى اتفقت عليهم مع الاستاذ فاروق شهرين مقدم و شهرين تامين
شيري تبص لعبد الله
عبد الله / العقد شكله كويس و فاروق ثقه و انا بصراحه مش بفهم فى الحاجات دى
شيري / خلاص على العموم احنا هنلم حاجتنا النهرده و هنسيب المفتاح مع فاروق تستلميها وقت ما تحبي و الشهر هيتحسب من يوم ما استلمتى
امانى تقوم تقف
امانى / الف شكر الف مليون شكر انا مش عارفه اقول لحضرتك ايه انا هحافظ على كل اشايه فيها هتستلميها زى ما سبتيها بالظبط
شيري / ربنا ينجحك و يوفقك يا بنتى
امانى / هستاذنك عشان القطر
شيري / توصلها يا فاروق لو سمحت
فاروق / طبعا يا ست الكل
فاروق و شيري يمشوا عبد الله ياخد الفلوس و يعدها
عبد الله / انا هدى الفلوس دى نقطه لهند
شيري / اللى انت عاوزه اعمله بس طلع حاجه منهم لفاروق هو اللى جابها و ده حقه
عبد الله / خمسميه كويس ؟
شيري / حلوين بس هو يرضي ياخدهم
عبد الله / مالك
شيري / مفيش لميت حاجتك
عبد الله / كلها و نزلتها العربيه كمان
شيري / يعني مش ناقص غير حاجه هند هدخل اللمها
عبد الله / لميتي فلوسك و دهبك ؟
شيري / لميتهم فى الشنطه الصغيره اللى جوه على السرير
عبد الله يطلع فلوس من جيبه و يحطها على فلوس امانى و يديهم لشيري
عبد الله / دى الفلوس اللى كنت محوشها خليها معاكى
شيري / خلى فلوسك معاك انت هتحتاج مصاريف
عبد الله / خليهم معاكى بدا ما يتصرفوا مش عاوزين نصرف الفلوس و نبقي لا قعدنا فى بيتنا و لا معانا ناجر بره
فاروق يدخل
فاروق / ركبتها التاكس كانت مبسوطه خالص الف مبروك عليكوا مش عاوزين منى اى حاجه تاني
شيري / انا هدخل اكمل لم الحاجه
عبد الله يعد فلوس و يديها لفاروق فاروق ما يرضاش ياخدها
فاروق / عيب يا سي عبد الله الكبير
عبد الله / دا حقك دا اقل من حقك كمان مش انت اللى جبتها
فاروق / انا حقى واصلنى و زياده
عبد الله / طب خدهم عشان احبك
فاروق / لا ما تزنقنيش انت بتحبنى من غير ما اخدهم
عبد الله / ما تتعبنيش بقي يا عبد الله والله مفرهد و تعبان على اخرى خدهم و الكبير و لا اى حد هيعرف حاجه
فاروق / والله انا حقى
عبد الله / بقولك تعبان يا فاروق ما تتعبنيش زياده بقي يا اخى
فاروق / خلاص يا سي عبد الله اللى تشوفه
فاروق ياخد الفلوس عبد الله يبتسم
فاروق / انا همشي عشان عيسي لوحده فى الدكان لما تخلصوا كلمونا نجيب الدفتر و الفلوس تاخدوها و انتوا مروحين
عبد الله / تمام ماشي
فاروق يمشي عبد الله يدخل اوضه هند يلاقي شيري قاعده على السرير بتعيط و الاوضه مبهدله جدا شيري اول ما تشوفه تمسح دموعها و تبص بعيد عبد الله يروح يجيب الشنطه من فوق الدولاب و يحطها على السرير و يفتحها
عبد الله / طلع عيني على ما اخد الفلوس
عبد الله يفتح الدولاب و يطلع الهدوم و يطبق و يحط فى الشنطه
عبد الله / مستحيل الشنطه دى هتاخد هدوم هند و ياسمينا انا بقول ناخد حاجه ياسو و اهو هند جالها كتير
شيري تبصله
عبد الله / خلاص خلاص نعبى و لو ما كفتش نبقي نشترى شنطه و لا اتنين مش مشكله
شيري تقوم و تطبق معاه
عبد الله / انتى بتعيطي عشان اللى حصل هنا اخر مره و لا عشان اجرتى الشقه
شيري / ما بعيطش يلا عشان نلحق نروح لسه عندك شغل الصبح
عبد الله / ماما
شيري تبصله عبد الله يحضنها
عبد الله / انا بحبك
شيري / و انا والله يا عبد الله بحبك و بحب اخواتك هو انا ليا غيركوا يا ابنى
عبد الله / و احنا ما لناش غيرك هند ما لهاش غيرنا خلينا جنبها
شيري / ما احنا هنروح جنبها اهو امال احنا بنعمل ايه هنا بس يلا يلا ما تضيعش وقت خلينا نخلص
عبد الله/ حاضر
عبد الله و شيري يطبقوا و يحطوا فى الشنطه
......................
فى المكتب فى السرايا
عباده / انت بتهرج يا مختار و جاى تقول دلوقت
مختار / على ما تاكيد الحجز وصل
عباده / لا يا راجل
ناصر / مختار فوق لروحك ان كنت انت سبت السلاح فدا مش معناه ان السلاح هيسيبك
مختار / مش انت اللى خيرتنى
ناصر يزعق
ناصر / انت بتعند مع مين معايا و لا مع حياتك و حياتها هتنبسط لو جرالها حاجه يعني
عباده / اهدى يا كبير احنا لسه فيها محلوله ان شاء الله
عباده يسيب المكان و يمشي ناصر يقوم يقعد قدام مختار و مختار باصص فى الارض
ناصر / انا عارف ان موضوع السلاح ماثر فيك بس هى ما تعرفش حاجه
مختار / و المفروض تعرف ؟
ناصر / لا هند جبانه و قلبها خفيف مش هتفهم هتعيشك فى صداع بس دا مش معناه انك تسيب الدنيا عايمه اعقلها و توكل و لا ايه
مختار / تمام
ناصر / ما تزعلش انى اتعصبت عليك انت عارف انا بخاف عليك قد ايه
مختار / عارف و مش زعلان
ناصر / روح يلا شوف عروستك
صوت ضحك بره
ناصر / شكل الجماعه وصلوا بالسلامه تعال نطلع نسلم عليهم
ناصر و مختار يقوموا يطلعوا بره يلاقوا الكل بيحضن و يسلم على شيري
انتصار / طب والله اليوم ده فرق معانا
شيري / يلاهوى على لسانك الحلو ده اعمل فيه ايه
مختار / حمد الله على السلامه يا امى نورتى بيتك امال عبد الله فين ؟
شيري / خد شنطه وراح المضيفه عنده شغل الصبح و يادوب يريح شويه
مختار / طب عن اذنكوا انا مستنيه من بدرى اللحقه قبل ما ينام
مختار يسيب المكان و يمشي شيري تبص لهند
شيري / خير فى حاجه و لا ايه
ناصر / جرا ايه يا ست الكل و هو الاخ ما يتحوجش لاخوه غير فى شر و لا ايه
شيري / لا طبعا ازاى بس
انتصار / تلاقيكوا يا عينى جعانين قومى يا فاتن سخنى الاكل و ابعتى لعبد الله لقمه
فاتن تقوم و باين عليها التعب
مريم / خليكي هروح انا
انتصار / مالك يا بت فيكي ايه
فاتن / مش عارفه بقالى كام يوم مش مظبوطه
فاطمه / كانت معدتها قايمه عليها من كام يوم
انتصار / الله و ساكته على نفسك ليه يا بت ما قولتيش ليه كنا شيعنا للدكتوره و لا اى حاجه
فاتن / مفيش حاجه يا امى انا بس النوم كابس عليا و جسمى حالل شويه
انتصار / نوم ايه دا انتى طول النهار نايمه فيكي ايه يا بت
شاكر / انتوا لسه هتسالوها حد يبعت للدكتوره تيجي تبص عليها
فاتن / هقولها ايه يا عمى خملانه و عاوزه انام
شيري / انا اسفه انى بدخل بس ممكن تكونى حامل انا كنت كدا فى حملى بيجيلى من اول يوم بالنوم
فاتن / بس انا حملى مش كدا
انتصار / يا اختى و هو كل الحمل زى بعضه ياريته يطلع حمل طب والله ادبح و اكل الناس
فاطمه / طب يا اختى استنى اما تولد و ادبحى برحتك
شاكر / ندبح تانى العيال خير مش احسن ما تبقي عيانه الف مبروك يا فاتن امال جوزك فين نباركله
فاتن / لسه ما جاش بس هو فى ايه خلاص بقيت حامل خلاص ؟
ناصر / احنا فيها حد يبعت للدكتوره تيجي تتاكد و تدينا البشرى و ان ما كانش تعرف سبب التعب دا ايه و تطمنا احنا هنستنى ليه نقطع عرق و نسيح دمه
انتصار / صح يا اخويا كلامك صح حالا نبعتلها تطمنا
............................
فى المضيفه
عبد الله / هتفرق ايه ندور دلوقت و لما ترجع نبقي ننقى
مختار / يعني انت لو استنيت الكام يوم دول هيتعبوك اوى يعني
عبد الله / سبها لله استنى صحيح انا كنت عاوزك
عبد الله يروح يفتح شنطه و يطلع ظرف يفتحه يبص فيه فيه فلوس
عبد الله / متاخره بس معلش الف مبروك يا عريس
مختار / انت بتهرج و لا ايه انت هتنقطنى بايه انا مش قولتلك انا عاوز كارنيه الكليه
عبد الله / ان شاء الله اجيبه بس خد دول ... عشان تبقي تردهملى فى فرحى
مختار / انت بس انوى و شوف انا هعمل فى فرحك ايه قولى صحيح ما روحتش الجيم تشقر على دينا
عبد الله / هههههههههههههههههههه
مختار / ضيعت انت تمرينتك النهرده
عبد الله / متعوضه ان شاء الله الاسبوع الجاى
مختار / ما تجيش على نفسك اوى فى الشغل
عبد الله / اجى على نفسي فى ايه بس دا الموضوع سهل جدا هو بس اكمنه وقت طويل و الواحد مش واخد على كدا بس تعرف اقسم بالله اللى شغالين معايا شويه رجاله دمهم زى العسل ما يتشبعش منهم بيهونوا على الواحد الدنيا
مختار / الحمد لله
عبد الله / ما تتوهش بقي و خد الفلوس
مختار / لا انت عاوز تضحك عليا
عبد الله / بجد يا مختار خدهم بقي مش هيبقي فاروق فى مصر و انت هنا ... ياختاااااى
مختار / هههههههههههههههههههه ما تخافش قالى قالى
عبد الله / قالك
مختار / طبعا
عبد الله / هههههههههههههههههههه لا و انا فى كتم الاسرار ايه ما حصلتش
مختار / تبهر الصراحه
عبد الله / خدهم بقي
مختار / انت مش ناوى تمشي خليهم يمكن تحتاجوا حاجه
عبد الله / معايا غيرهم والله اصلنا كنا محوشين مبلغ و فى كمان حتتين دهب مع ماما
مختار / و انت ناوى تبيع امك دهبها و لا ايه
عبد الله / لا ما اقصدش بس لو اتحوجنا يعني
مختار / يادى الليله اللى مش فايته و تتحوج ليه يا ابنى ما خير ربنا كتير انت ليه عامل تكليف بينا ياض انا قصرت معاك فى ايه عشان ما تحسش انك اخويا الصغير
عبد الله / اخويا اه بس مش ابويا انا مش ملزم منك
مختار / بكره ربنا يكرمنى بعيل غلس زيك و اسميه عبد الله و اصبحه بعلقه و امسيه بعلقه و يسالنى بتعمل فيا كدا ليه اقوله بفش غلى من خالك
عبد الله / هههههههههههههههههه و يهون عليك خاله
مختار / لا ما يهونش دا حبيبي
مختار يحضن عبد الله
مختار / انا طالع انام لحسن انا صاحي من بدرى الناس النهرده من اذان العصر و هم مالين السرايا
عبد الله / ربنا يكتر حبايبك
مختار / امين يلا اسيبك ترتاح بقي
مختار يقوم عبد الله يقوم وراه يلحقه قبل ما يوصل للباب
عبد الله / استنى النقطه
مختار / دا انت غتت
عبد الله / خدها بقي
مختار / هات اياكش تتبط
مختار ياخد الفلوس و يحطها فى جيبه و يمشي عبد الله مبتسم و سعيد
....................
فى اوضه مختار
هند واقفه بتعمل قهوه على البوتجاز مختار ممدد فى السرير
هند / و الدكتوره بعتت جابت تست حمل و عملته نور شرطه و التانيه خفيفه خالص و قالت انه ويكلى بوزيتيف و ادتها دوا و قالت هتكشف بالسونار بعد شهر عشان الحمل لسه فى اوله
مختار / بشره خير والله الواحد فرح
هند تصب القهوه و تروح تحط الفنجان جنب مختار يتعدل و ياخده منها
مختار / تسلم ايدك ... تعالى جنبي بقي
هند / ثوانى
هند تروح تاخد الكنكه و المعلقه و تدخل الحمام تغسلهم مختار يقوم يحط ايده فى جيب الجلبيه و يطلع الفلوس و يروح لهند بتشطف الكنكه
مختار / اخوكى باعتلك النقطه بتاعتك
هند / هو لحق يقبض
مختار / دا ايجار الشقه شهرين مقدم و شهرين تامين تمن تلاف جنيه
هند / اتارى ماما زعلانه اوى انا قولت تعبانه من السفر رايح جاى فى نفس اليوم و لم الحاجه
مختار / انا قولتله يستنى اما نرجع و بعدين نشوف موضوع الشقه ده
هند / طب ليه ادونا الفلوس كلها
مختار / بيشرفك
هند / تافه اوى
هند ترمى الظرف على ترابيزه و تروح تحط الكنكه و المعلقه فى التقفيله و تمدد على السرير و هى مضايقه مختار متابعها يروح يمدد جنبها و يشرب من القهوه
مختار / انتى عارفه انى بحب عبد الله قوى
هند / عارفه
مختار / طب تعرفى ليه
هند بدلع
هند / عشان اخويا ؟
مختار / دايما تزنقيني كدا ... طبعا يعني ... بس هو فى سبب تانى
هند / هههههههههههههههه قول
مختار / عشان راجل واد عصب كدا وقت الجد تتسند عليه مع انه من بعيد يبان عيل طرى بس الحق هو مش كدا هو بس ما لقاش فرصه يثبت روحه
هند / و تفتكر الفرصه دى هتيجي امتى
مختار / ما احنا فيها اهو و فى كل يوم بيثبت نفسه اكتر من اليوم اللى قبله و لعلمك دا مش كلامى لوحدى كل اللى فى السرايا شايفين كدا
هند تبتسم
مختار / عبد الله بيحاول يشرفك و يرفع راسك و كل حاجه بيعملها بيعملها عشانك انتى يا هند مش عشان تافه
هند / انا ما قصدتش انا اقصد ان الفلوس مش هتفرق ميه من الف من تمانيه ما كل واحد بيجامل باللى يقدر عليه
مختار / انتى عارفه احنا لامين نقطه كام دلوقت
هند / انا معدتش بس واضح انهم كتير اوى دا كفايا الدهب اللى جالى
مختار / و اخوكى مش شايف ده يعنى ؟ بقولك ايه خلاصه الكلام عاوزين نشوف طريقه مزوقه نرجعلهم بيها الفلوس دى عشان انا غلب حمارى
هند / مش عارفه انا ممكن اديها لماما و اتكلم معاها
مختار / و هى دى مزوقه !!!
هند / ما اعرفش بقي زودله مرتبه فى الشونه
مختار / الا دى الحسابات مكشوفه و سهل يعرف انه بياخد اكتر من غيره و هتقلب نكد
هند / اديله شغل اضافى
مختار / زى ايه يعني ؟
هند / ما اعرفش بس اكيد هتلاقي حاجه
مختار يشرب من القهوه
مختار / بدعتى فى القهوه دى اقسم بالله
هند / الف هنا ... مختار
مختار يبصلها
هند / هو انا ممكن اسالك فى حاجه ؟
مختار/ اكيد اسالي
هند / هو ناصر كان بيزعقلك فى المكتب ؟
مختار / اخويا الكبير و هو اللى مربيني هو الله يرحمه ما كانش بيزعقلك
هند / ساعات بس
مختار / هو بيحبنى و بيخاف عليا و ان قلع اللى فى رجله و ادانى بيه انا مش هفتح بقي بس هو مش هيعمل كدا
هند تبتسم
مختار / تحبى تعرفى كان بيزعقلى ليه ؟
هند / هتقولى لو سالت ؟
مختار / هقولك من غير ما تسالى مع ان المفروض ما تعرفيش
هند / خلاص ما تقوليش ما تقولش اى حاجه تضايقنا من بعض
مختار / لا لا مش كدا
هند تبصله مختار ياخد بق قهوه
مختار / انتى فاكره لما قولتلك انى محجزتش الشقه صدفه و انها الوحيده اللى لقيتها بالتشكيل اللى قولتلك عليه
هند تهز راسها
مختار / المفروض انى كنت اعمل كدا و انا بحجز الجناح
هند / يعني ايه
مختار / يعني كان لازم احجز اربع اوض مش اوضه واحده ولازم يبقوا بتشكيل امنى معين
هند ملامحها تتجهم
هند / انا مش فاهمه
مختار / يعنى انا ما بمشيش بره البلد من غير حراسه
هند / بس انت سبت السلاح
مختار / انا سبته بس الناس ما عرفوش انى سبته على الاقل مش كلهم
هند عنيها تتملى بالدموع
هند / يعني ايه ؟
مختار / حتى لو عرفوا احنا حتى عبد الرحمن ما كناش بنسيبه من غير حراسه الامان واجب و ولاد الحرام ما خلوش لولاد الحلال حاجه
هند/ مختار لو سمحت اتكلم بلغه افهمها
مختار يبصلها و يسكت هند تترمى فى حضنه
هند / هو انت ممكن يجرالك حاجه ؟ هو انا ممكن اخسرك ؟
مختار / هو انا بقولك كدا عشان اخوفك انتى كمان يا بت انا اكتر حاجه بتضايقنى انك تبقي خرعه كدا ما تجمدى قلبك ده بقي
هند / انت بتهرج هو انت لو عرفت ان ممكن يجرالى حاجه هتبقي عادى يعني
مختار / مش هيجرالك حاجه ما تخافيش و مش هيجرالى بس الاعمار بيد الله و الحذر لا يمنع القدر بقولك ايه يا بت انتى انا ما اتعودتش امشي جنب الحيط بفوت فى الحيط و اللى فى نصيبي هاخده
هند / يا سلام !!
مختار / و قسما بالله نصيبي كله خير حتى اهو
مختار يرفع شعر هند لورا بعيد عن وشها تبصله تلاقيه مبتسم
مختار / الا فين البت ام قلب ميت اللى ضربت العيال السيس فى الجيم
هند / معرفش هى بتطلع لوحدها
مختار / يعني هى موجوده يعني و وقت الجد هتطلع صح ؟
هند / انت بتخوفنى ليه ؟
مختار / مش بخوفك والله ما بخوفك انا عاوزك تجمدى و تنشفي انا عاوز حيطه اتسند عليها تعرفى تبقي حيطه و لا ايه ؟
هند تبصله
مختار / طب نوايه من اللى بيسندوا بيها الزير طيب ؟
هند تضحك و ما تقدرش تكتمها مختار يبتسم
مختار / الله اكبر ايوه كدا
هند / بجد خوفت
مختار / انا مراتى ما تخافش غير من اللى خلقها عشان اى حاجه تانيه فى الدنيا دى بايده هو بس
هند / و نعم بالله
مختار / و انا عارفك انا اكتر واحد فى الدنيا دى عارفك انا يمكن عارفك اكتر من امك اللى ولدتك انتى ما انتش ضعيفه و لا جبانه انتى وقت الجد بمليون راجل
هند تبص فى الارض مختار يمسكها من دقنها يخلى عنيها فى عنيه
مختار / انا واثق فيكي
هند تبصله
مختار / و انا المفروض اتكلم جد ازاى و انا ببص فى العيون الحلوه دى ما انا اكيد عقلى هيشرد منى فى حته تانيه خالص
هند ترتبك و تفوق و تبتسم
مختار / المهم انتى ناويه تقضيها رغى و لا هتيجي معايا فى الحته التانيه خالص دى
هند تبتسم اوى
هند / انت بتقول ايه ؟
مختار / ما تستاهبليش يا بت انتى فاهمه كل حاجه صحيح يتمنعن و هن الراغبات
هند / طب تصدق انك مجرم
هند تديله ضهرها يقرب اكتر و يلزق فيها و هم الاتنين مبتسمين و هند مبتسمه بخجل
مختار / هند .. هند .. هند
هند / نعم
مختار / ما تيجي نشغل التليفزيون و نعلى الصوت
هند تبتسم و تبص فى الارض
مختار / طب تعالى نلعب النمله
هند تبصله
هند / ايه النمله دى
مختار يحرك صوابعه على كتف هند كانها رجلين بتمشي لحد ما يوصل لرقبتها تغير
مختار / النمله النمله النمله النمله
هند / هههههههههههههههههههههههههههههههههه
مختار / لا دا احنا نعلى التليفزيون بقي
هند / ههههههههههههههههههههههه
