رواية عشق اهل الانبار الفصل الثالث والعشرين 23 بقلم رواء هادي
رائد دمي صار يغلي غلي شلون تستفز بي وتكول ابوي يسمع كلامي واذا اكوله اريد صخله ام عداي راح يقبل بيها واني الزلقت روحي عليها ماتقبل بي
انتظرها ترد ماكو رد منها طولت عاد شمرت التلفون متحلف الها اندك الباب دخلوا اخواتي كعدوا بصفي ضايجين كلش سألت شبيكم كالوا خطيبتك ماتتحاجه
جبنالها هداية بسيطة
ماتقبلهن تكول ذني مو من مقامي تقبلها تهينه
هو أني منا محترك بالنار ام الصخول تجملها انوب خطيبتي ترجع فروحة تكول من كعدت بحضنك وحضنتك وبستك
من خدك واخذت صوره هي كرصني قوي
وراها كمت جرنتي على صفحة وتكولي بس تقتربين الرائد وتكعدين بحضنه اشرب من دمج تقبلها عمو هيج تكلي أنت مو عمي وبمقام ابوي وأنت المربيني
الخط بنص وجهها حقيرة أنانية طلعت اوووف حظي منين ماجي ويا يطلعلي اعوج وره ساعتين متصلة بيهن ومعتذرة وامي كالتلي عتذرت يمة سامحها ولا تكبر الموضوع
أصلا زحمة منها ترجع الهداية وتفشلهم وفروحة بنيتي أني ربيتها هي وفاضل واعزهم اعز من روحي شلون هيج تسوي وياها عاد تصلت بي وعتذرت وصارت تبجي
جذابة هاي دموع التماسيح اكيد رزلتها امها واجت عتذرت رجعت لام الصخول نفس الشي ماكو رد وخارجة من الانستغرام بنفس للحظة لشايفة بيها الرسالة .
زينب "من سمعت رده بهذيج اللحظة وكع التلفون من ايدي للكاع طبه التلفون جانت قوية والخوف تملكني تمك نزلت لتلفون بسرعة شلت بأيدي الشاشة غادية
ملح كلها عبارة عن تكسر
المس بي مايلمس احاول المس ماكو لمس بي ...
نكسر التلفون نكسر هذا هم حظي بعدني مامتهنية بيك وتتكسر ساعة السودة لراسلتك بيها ساعة السودة
هسه شلون منو يصلحة لي ..
شبعت قهر على التلفون بعده جديد وبكومة افلوس اخويه جابه الي افلوس راتب كامل اخوي مدرس رياضيات صرت ابجي على حظي النحس مناك رائد ومنا التلفون
لو مكسورة ايدي ولا التلفون هسه شكول لامي شكول لاخوي انكسر التلفون لامااكول بس تدري بي تشنقني انطيه بيد قائد زوج أختي يصلحة لي بدون علمهم والله اترزل .
كمت ضميت التلفون بقيت حايرة أني الغبية الثولة شلون استفزيته وكلتله ابوي يقبل بالكوري أصلا من سابع المستحيلات أبوي يقبل ينطيني
خارج محافظة الحلة
انوب كوريا واحد كافر كانت نيتي من الكلام القاسي ويا يكرهني مجانت نيتي استفزه والله اريده يكطع نفسه مني هو بعد خطب وراح يتزوج ان شاءالله يتزوج
وفجأة يظهر رائد ويشلع ورده الحمرة لصايرة بنص الورد شلعها وفركها بإيده وتحولت يبست كل الحديقة الورد
كله ذبل وكع حتى الورد اللي بايدين الولد
ذبلت وكعت بالكاع
وفستاني انقلب أسود والولد اختفى من المكان تقدم رائد كمت خايفة مرعوبة اريد اركض واشرد من يمه ماكدر
جسمي انشل بالكامل بس دموع تنزل
واشفايف ترجف
من الخوف ايده تنزف دم جر ايدي اليمين وخله بنصها دم
من دمه مثل يحني ايدي بالدم والثانية هم
حناها بالدم وابتسم وجهي وكال
_عدنا القاء قريب
فزيت من الحلم مرعوبة خايفة .... اباوع برجاء الغرفة ضلمة كلش كلشي ماشوف غير الظلام ريجي يبس من الخوف كمت بسرعة طلعت بره الغرفة دخلت الصالة
بيها ضوه رحت للمطبخ شربت ماي من البراد حيلي كله يرجف واردد كلام بقلبي .. جنيت على روحي صوجي أني الغبية راسلته وباركتله واستفزيته هاي
أني كلما يقرر ينساني
اطلعلها بسالفة جديده على كولته كلما يسد بابي اجي ادفره من جديد وافتحة يارب رحمتك ولطفك علية أنت ادره
بحالي فقيرة وماعندي نية سواء
من حجيت ويا
رجعت لفراشي خفت انام بفراشي رحت على جرباية فوفة عمياوي حضنتها كل قوتي اخاف يرجع الحلم مرة اللخ
كعدت الصبح على صوت فوفة تنهد بي
_عمه عمه زينب شعندج نايمي عندي
فتحت تك عين اباوعلها نايمة
بصفي وتباوعلي ..
اممم
_عمه شعندج عندي؟
_حلمت حلم يخوف وخفت واجيت يمج ههه
_ههه تخافين ؟
_ههه اي عمه اخاااف ههههه
_أنتِ مو تكولين أني سباعية طلعتي مو
سباعية وتخافين ههههه
_اضحك عليكم عمه اني اجبن خلق الله
_ايي هههه
_يلا كافي ضحك وخل نكوم نتريك ونسوي ريوك
_ماما سوت الريوك وكالت اروح اكعدج
_ليش انتِ من شوكت كاعدة
_قبل شوي اجت ماما كعدتني وكعدت أختي وكالت عوفوا زينب تنام خل نسوي الريوك ونكعدها
_هاا هاي ماما الجديدة خوش ماما ومدلله الكل هههه
_اي احسن من ماما الحقيقية ماتضرب أبد من يغلط صوفي تكوله عيب لتسوي هذا الشي الله يذبك بالنار ماتهدده بالسجين لو بالجداحة لو تضربه مثل ماما
_امكم همجية ويكتلك القهر معلمة أمكم وكلشي ماتعرف عن أصول التربية والتعليم هوش الله بأرض الله هاي امكم الحقيقية اما امكم الجديدة خامس ابتدائي
مامخلصة وشوفي التعامل والأخلاق والتربية والكلام الحلو عمي من تحجي وياها تشمرك صفح بكلامها وفهمها
ودراكها للحياة
_اي والله من أكبر اصير مثلها
_اي وأني هم اصير مثلها احب بيت عيالي ودللهم
حتى يحبوني وي يدللوني هههه
_اي خل ناخذها قدوة النا
_بالضبط يلا كومي خل نتريك هههه
طلعنا الغرفة رحت للحمام غسلت ورجعت شفت مجهزة الريوك وخوي طالع وابوي بالاستقبال كاعد امي وهي
وصوفي وتبو كاعدات ينتظرونه على الريوك
امي : تاخرتي يل مسعدة
مرت اخوي : شتردين منها عمه تعاي اكعدي زوبة
زينب : جنت نايمة
فوفه : جانت حلمانة ومن الخوف نامت عندي ههههه
زينب : فوفه
امي : شحلمتي ؟
مرت اخوي : لتحققين وياها عمه خل تتريك بالاول وراها تحجي الحلم وإذا مو زين لتحجين بي
امي : اخاف رجعت سوتلها الطركاعة مر...
مرت اخوي : عمه مو وقت الكلام الاطفال
كاعدين تعاي اكعدي زوبة
سحبت الكرسي كعدت بصف مرت اخوي أبتسمت بوجي حتى أني تحسيني بتها مو حماتها الصغيرونة عجبتني كلش من ماقبلت امي تحجي على مرت اخوي
السابقة كدام الأطفال
كملنا الريوك رادت تغسل الماعين ماخليتها كتلها علية أني اغسلهم كعدت بصفي تحجي وياي سولفت الحلم الها وكتلها على قصة الولد رائد جرت نفس بحسرة وكالت
_خطية الولد شنو ذنبة ابوج معارض زواجكم
_ترى أني هم ماريده
_بس مبين من طريقة كلامج ولهفتج بالكلام ترديه
_ههه لا والله
_متأكدة ؟
_اي متأكدة ...شنو تفسير الحلم ؟
_والله أني ماعرف بالحلام بس قلب كلشي ابيض وحلو بحياتج إلى الأسود والورد ذبل ومات وحنه ايديج بدمه وكالج عدنا القاء قريب معنها راح يطلع من جديد
ومحتمل هالمرة يدمر كلشي حلو بحياتج احذري منه زينب وشيصير وياج وصلي لامج وابوج واخوج
الجبير لو إلي أني
_ان شاءالله ماكو شي ومجرد كابوس من وحي الشيطان
_ان شاءالله حياتي وأنتِ هم لتتواصلين ويا أبد حتلوه
هو يراسل حذفي الحساب وافلتي عود
يكول الحساب تبند
_هيج تشوفين
_اي حبيبتي هيج اشوف ابعدي عن المشاكل ماناقصج مشاكل أنتِ حجتلي امج عن المشاكل لمريتوا بيها وشلون اخوانج ذلوج صعبة ترى الاخت تنذل
من اخوانها وتنهان
_اي والله صعبة كلش بعد شيصير وياي اجي لعندج واكولج
_وان شاءالله اكون عند حسن ظنج
_ان شاءالله
أني مكتلها على مراسلتي له وباركتله بس على الحلم وتواصلي قبل دخلت غرفة أمي توني مديت ايدي على التلفون دخلت امي وصاحت بي
_ايدج من تلفوني
_هااا
_وجعااا تردين تخربين تلفوني مثل هذيج
المرة ايدج لو اكسرها
_هو أني شمسويه هذيج المره هو تحول وصار مال عميان
_مال عميان مو أنتِ العمية وخربتي واخري
اجت اخذت تلفونها تخزر بي نزلته بجيب الدشداشة ..
حذرتج قبل بس تواصلين يم تلفوني
اكسر ايدج
_والله ماعندي شي بي ولا راح اخربه بس عندي شغلة
_شغلتج اكضيها بتلفونج مو بتلفوني شنو تلفوني فداء
_مو تلفوني إيفون مايقبل برامج مرات
_مشكلتج هاي
طلعت أمي شبعت قهر على حظي ردت احذف حسابي من تلفونها هاي أني يامكان لاطب بي اخربة خربت تلفونها مرة وفعلت بي ميزة لمساعدة المكفوفين
أو ضعاف البصر.
مايلمس بسهولة بالكوه يلا يلمس ويطلع صوت وأني ماعرف ارده عاد اخوي وداه لابو التلفونات وسواه لها من هذاك
اليوم ماتقبل الزم التلفون تكول
مخربة إرهابية أنتِ.
بيقت الوب ردت اروح لتلفون أبوي ترددت وخفت خفت اكول لمرت اخوي وتأخذ عني نظره سيئة تكول لاحكة الولد لو تحبه من صدك وماجاي تكول أني بداخلي غير
ونظره العالم لي غير راح تكون .
المهم يومين وماكو شي الحمدالله شوي ارتاحيت وكلت خل ادور تفسير للحلم مالتي شنو دورت بالكتاب مالكيت بس لكيت تفسير قريب للحلم تلف الورد
أمرٍ سيءٍ سوف يحدث له في قادم الأيام
خاصةً إن كانت الوردة حمراء اللون .
هنا بلعت ريجي الخوف تملكني تملك العصر اخوي كال اجيب تلفونات للبنات ولابني يتلفون بي مرت مقبلت تخبلت عليه كالت لا تجلب الاطفال من هسه وتشيلهم تلفون
التلفون له تأثير سيء على الأطفال وهم بهاي المرحلة راح يتعلمون اشياء ملازم يتعلمونها بهذا العمر عود من يكبرون ويتخرجون من المدرسة من الابتدائية ويكبرون
شوي شيلهم تلفونات
اما هسه لا ممنوع بعدهم أطفال خل ينتبهون على الدراسة مو على التلفون أحسن حل الزم الهم معلم لو معلمة تدرسهم دروس خصوصية وصوفي دخله روضة للأطفال
إذا مانقبل السنة الجاي بالمدرسة .
عاد قتنع وكلامها عين الصواب التلفون دمار للأطفال بي برامج غير أخلاقية حتلوه ماتطلب هاي البرامج راح
تطلع الكل بكل موقع موجودة وحتى
بالاعلانات موجودة .
على شكل ألعاب للأطفال.
الأطفال يسألوني على التلفون اكوللهم ضميته مالي واهس بي أريد اقريكم وفعلا صرت اقري بيهم وهي العطلة بدت قبل أيام معدودة وستلموا الانتائج البنات
وصلعوا ناجحات
الأولى. اخوي جابلهم كتب يقرون للمرحلة الجديدة ومرته تكعد تقري صوفي كتب صف أول هو فرحان ومكيف تقري على شكل أغاني وتصفك ويا وتلعب بي
وقت القراءة اسلوبها
جدا جدا راقي وكل يوم جاي تبهرنه بشي حلو منها أخوي يموت عليها صاير ابوي امي اخواني اخواتي كلها تحبها وتحترمها كسبت الكل لعدها بسلوبها
الحلو والراقي
بدون اسحورة وشعوذة مثل مرت اخوي السابقة .
بالليل كاعدين أتصل ... جلال بأبوي وكاله معزومين باجر عندي على الغدة ماعزمت ابو صوفي عزيمة العرس وهسه اجت الفرصة تعالوا كلكم بالاخص ام
الكوريين جيبوها
أبوي ضحك وكاله ...
ان شاءالله باجر عندك وننام على قلبك هههه
جلال : كل الهلا بيكم هههه
زينب ردت اكول لابوي لا تقبل الدعوة مامروح بس قبل بعد مابيدي شي وكال ابوي جهزوا نفسكم باجر بالانبار غدانه
كمت وي بنات أخوي نعزل الأغراض نبات اهناك
وأبوي كال نبقى شكم يوم نغير أجواء بعد ماصفت الأجواء مايدري اني الثولة شحنت الأجواء مرة ثانية وخليتها
تتفجر من كثرة الشحن .
رحنا سيارتين لبيت خالتي قلبي يوجعني من الخوف امي تسأل وين التلفون كتلها بالجنطة لان جبته وياي انطي العلاء يصلحة لي مادام قائد مااجانة وما جاي اتحمل
أبقى بدون تلفون خليت .... ايدي على خدي لزكت راسي بالجامة ضايجة بالصدفة شفت فاضل ابن اخو رائد قلبي
وكع بحضني رأسن جريت نفسي
وخمدت بحضن امي
امي : شبيج ؟
زينب : راسي يوجعني
امي : هسه انطيج علاج ارفعي راسج
ابوي : خليها ترتاح انطيها ماي.
انطتني ماي وعلاج صداع ....اخذت بقيت نايمة على رجلها اخاف يشوفني ويسوي مشاكل لي وصلنا بيت خالتي أول مادخلت صحت العلاء بغرفة خالتي
كلتله على التلفون وأهلي مايدرون مكسور اخذه شافه كال...
بسيطة المس مالته خربان ساعة زمان يصلحة الج ليش مامخليتله شاشة ضد الكسر ؟
_مو وكع مني ونكسرت
_شبيج ايديج رخيه بس توكعين بالتلفون
_حظي هذا تكدر تودي هسه ؟
باوع للساعة جانت بال ١٠ ونص ...
اي راح اودي ابقى يمه يصلحة واجيبه الج
_اي فدوة انتظر خل انطيك الفلوس
_انجبي فلوس شنو اني اصلحة على حسابي
_لاعيني ماقبل
_قبلتي ولما قبلتي شكد سامع منج أني
خلاه بجيب البجامه وطلع ردت احكه....وراه انطي فلوس ٥٠الف مالحكت اخذ سيارة جلال وطلع كعدت يمهم أمي وخالتي فتحوا موضوع رائد يكولون
البنية تخبل فردوس تكول صورتها هسه اجيب الصور
زينب : رحتوا ؟
فردوس : اي رحنا
امي : شعجب رحتوا ؟
خالتي : ام صدام اتصلت بي هو هم متصل بجلال عيب نفشلهم هم بكلشي يجون لعدنا
جابت التلفون فردوس شوفتنه الصور أول ماشفته قلبي طفر من صدري ماعرف ليش قلبي انقبض قبض من شفتها كاعدة بصفه وتضحك هو كالب خلقته كل الصور مايضحك
شغلت مقطع كاموا يرقصون هم عافها وطلع مرت اخوي كالت... ليش عاف العروس ؟
فردوس : والله مادري هو مجان على بعضه بالخطبة
امي : حلوة العروس يتهنون
فردوس : اي حلوة وصخمة متناسبة ويا
مرت اخوي : اي متوالمين اثنينهم ضخمين عمه
مو هو الاجه على زينب ؟
امي : اي هو عمه
مرت اخوي : ماشاءالله ضخم وصاك مثل
بالفلام الأجنبية هههه
زينب ماتحمل الصور والمقاطع كمت .... طلعت بره انتظر
علاء غصة لبقلبي ذبحتني ذبح طلع جلال ...
جلال : هاا ام الكوريين شسوين بره ؟
زينب : انتظر علاء
جلال : صدك شعندج وي علاء
زينب : الحجي بيناتنه جلال كسرت تلفوني
وانطيته العلاء يصلحة لي
جلال : انكسر الايفون هههه
زينب : اي كسرته وأهلي مايدرون
جلال : ليش مكتي
زينب : تشنقني أمي تدري بيها أنت وخطية اخوي جابة
براتب كامل اكوله انكسر غير ينقهر
جلال : شنكسر منه ؟
زينب : مايلمس وعلاء كال بس المس خربان
جلال : سهلة هاي ليش مامخليتة شاشة ضد الكسر ؟
زينب : جان بي وهم وكع من ايدي وانكسرت شلعتها
جلال : ماشاءالله ايدج رخيه هههههه
زينب : اي فدمرة رخيه صايرة
جلال_هو هاي أنتِ كيوت ونستله مثل
الكوري لعندج صدك بعدج تحبي
زينب : لا والله مو مثل قبل بالسنة حسنة
اباوعلهم مليتهم يمكن
جلال : ههههه
زينب : منورة المشاكل كرهت حتى روحي
جلال : حفلات أنتو والله العظيم يلا وره
العشة اوديكم للمنتزه
زينب : اي من زمان مرايحة ولا طالعة
سمعت صوت سيارة جلال عفت جلال وطلعت ركض بره الباب وكف السيارة بره بالشارع علاء رحت لعنده ملهوفة للتلفون مالتي اريد اعرف شكاتب لي رائد.
نزل شايله بإيده ...
وهاي رجعته ابلادي ههههه
اخذته من ايديه ...
مشكور علاء مشكور ههههه
_تدللين شوفي
دخلت الرمز لمس وفتح طرت من الفرحة ...
اشتغل مخليلة كفر جديد وشاشة
ضد الكسر ؟
_اي كفرهومحلو جان هذا وردي
وحلو .مثلج ههههه
_اي يلا علمود انطيك فلوسك
_راح اهفج بدفره بنص الشارع فلوسيش
تحجين بيها حيوانه
_انت حيوان
_لا انتِ حيوان ماجاي تفهمين يلا ادخلي جوه
_اوك هههه
دخلت جوه طايرة من الفرحة اخذت التلفون ورحت لغرفة جلال فتحت انترنت دخلت على الانستغرام مكاتب شي
غير كلامه الأخير وجان منزل ستوري
دودة بي صارت تاكل بقلبي اكل شوفي الستوري شوفي عقلي متردد يكول لا تدخلين قلبي يكول ادخلي مشيت وره
عقلي ومادخلت ستوري حذفت المحادثة
اجه علاء صحتله اخذت صورة وياه نزلتها انستغرام كتبت ...
اليوم يم الحب والضلع علاوي وسويتله
تلك على الانستغرام .
وراها رحت اصب غدا وي فردوس ومرت اخوي وره الغدة لزمت التلفون بغرفة خالتي يم الكل كاعدين بس النسوان شفت الستوري واصل ال١٠٠ مشاهدة
زين بعده بي تفاعل
حسابي عندي عادة اشوف المشاهدين الستوري شفت رائد شايف الستوري قلبي وكع بالكاع من غبائي الزائد نزلت ستوري وكلت اليوم يم الضلع علاوي
ونشرت صورته وصورتي
وخليت فوك وجي سمايل أقسم بالله اني غبية وثولة اجيب المشاكل الأيدي بدون مادري بنفسي ردت
حذف الصورة صاحت بي امي
امي : شمري التلفون وتعاي
زينب : انتظري
امي : مو احجي وياااج
فزيت صاحت بي حتى مالحكت احذف الصورة اصلا بعديش احذف الصورة شاف وعرف أني بالانبار جاية عفت التلفون ورحت يمهم كعدت سوالف عادية يحجون
حسبة توديني وحسبة تردني الاطفال العصر سحلوني سحل سحل للمحلات اشتري الهم اخذنه افلوس من ابوي اشوف ابوي واخواني مامنين كلش وعايفيني مثل قبل
عبالهم رائد خطب خلص كطع نفسه .
رائد" مرت الأيام هو ماردت علية دمي فار فور عليها جاي تستهزء بس ماترد وتشمر كلام جارح هالأيام الليل ماانامة
بي بس افكر بيها ودخل حسابها ماكو ماناشط
الصبح لازم التلفون بإيدي وحجي وي رهف أتصال كاميرة بكل ملل ماعندي رغبة احجي وياها وهي حجيها كله على تركيا اربيل سليمانية دبي وملابس وكياج وذهب
_ماتملين من هالسوالف
_شلون امل هن روحي من الدنيا الدنيا ماتسوى شي بدون الطبه والطلعة والذهب والفلوس والمكياج
انفتح باب الغرفة بسرعة انغاريت رأسن فصلت الإتصال بوجهها طلعت امي عيونها بكصتها صايرة
اباوعلها مستغرب ؟!
_هااا؟
_تعال كلي خطيبتك شنووو ؟
_شنوو ؟!
_والك سويتلها اسوار ذهب مثقال ونص هدية تروح تبيعه ثاني يوم ماتقدر هديتي ماتحترمني
_منو كالج بايعة هديتج ؟
_عمت مسك ابتهال شايفتها يم ابو الذهب شايفة الاسوار اني لهديته لخطيبتك كايله الابو الذهب ماعجبني هيج هدية رخيصة اريد شي غالي وثمين يلوك بي .
_متاكدة من كلامج ؟
_ ابتهال كالتلي اتصل بيها وشوف إذا صدك كلامها اليوم
اكلبها عزززة فوك راسها وراس امها أني هديتي
رخيصة معناها أني رخيصة
_هسه اتصل بيها واشوف
_اتصل
جريت التلفون اتصلت بيها راسن ردت ...
هااي شبيك ليش فصلت
الاتصال بوجي ؟
_عوفينه من الاتصال وكولي البارحة جنتي يم ابو الذهب ؟
_ ليش تسأل ؟
_كولي اي لو لا ؟
_اي جنت
_شسوين جنتي يم ابو الذهب ؟
_رحت اشتري شكم قطعة ذهب
_بعتي اسوار لامي جابته الج
_هاا
_بعتي الاسوار لامي جابته الج احجي رهف
_اي بعته
_ليش بعتي ؟
_ معجبني جان رخيص وأني ماحب الشي
رخيص احب الشي الغالي
_قصدج امي رخيصة وهديتها رخيصة مثلها مو
_حشاك منو كال هيج
_الشخص يتقيم من هديته عدكم امي عاجبها الاسوار نازك وحلو وأخذته الج بكل حب واحترام وانتِ لا حبيتي الهدية ولا احترمتيها رحتي غيرتيها وتكولين بكل
صلافة الهدية رخيصة جان كتي ماعجبتني الهدية غيريها
عمه جان غيرتها الج وسوتلج اغلى منها
_عصابك رائد
_تخافين من عصابي وماتخافين على مشاعر أمي
ماتوقعتج هيج أنانية وطماعة
فصلت الخط بوجهها صرت نار من العصاب
وأمي كذلك بركان صايرة
_مغيرتها مو ؟
_اي الله ياخذها طلعت طماعة
_اسمع مني رائد لتزوجها ماريدها
_شنوو ؟
_ماريدها ماريدها لو من يجي ماريدها بعد تبيع هديتي وتكول رخيصة وحجي ثاني ماريد اطلعة
_احجي شنوو ؟
_وخر عني هاي تاليتي انهان من خطيبتك الهايشة اني
سهاد انهان من الهوايش من امداااانييي
_شكو صاير يمة احجي شصاير ؟
_تريد تعرف شصاير اسمع خطيبتك كايله يم بنات أني عجوز البين وحدة بت فكر صار براسي خير منوره ابوك وحدة سحارة وخبيثة وحاكمة الكل بس اجي
اني للبيت الا احكمها ...
واخليها تمشي مثل الساعة وكل الهداية مالتها بدلتها حتى الجهاز العرس مراح اخذها وياي ماريد بت الفكر تعك على بت العز اني بت فكر رائد أني بت منو مو بت عم ابوك
مو بت جدك من يوم يومهم جدادي طاكين اني تجي هاي بت القندرة بت الفكر بت الحرامي اليوم تكول عني بت الفكر والله والسمة الله ماتزوجها بس تزوجها اكتل روحيييي
_منو كالج هذا الكلام ؟!!
_ابتهال كالتلي
_وابتهال شمدريها ؟
_ مرت ابن اختها علوان تصير صديقه رهف ورهف مسولفتلها كلشي وهاي كايله لعمتها وعمتها متصلة بابتهال وكالتلي كلشي وحتى تسجيل صوت مسجلينها
_وين التسجيل الصوت ؟
_هسه انطيك التلفون دزته الي على الواتساب واسمع شتكول عني ام حلك اليلزك ام عطوب المحتركة بت الفكر بت الحرامي هو جدها ابو ابوها شنو جان مو جان عمالة
يشتغل يم جدي الله يرحمه
ابوها صار ضابط ويبوك هذا وهذاك وصار ابو حال ومال
اليوم بت الفكر تعيرني اني سهاد تعيرني
ولك انهان.من وراك رائد
_يمة اعصابج اروحلج فدوة اعصابج
_لتحجي كلامة زايدة منين جبتلي هالهايشة
منين متكلي منين ؟
_اندري حظي الفكر طلعها لي التسجيل اريده
طلعت التلفون من جيب الدشداشة انطته لي شمرته عليه بقوة نار صايرة هسه لو تلزم رهف تذبحها فتحت الواتساب دخلت على حساب ابتهال مسميتها ابتهال
دازة التسجيل وحتى مصورة رهف يم ابو الذهب ولك هذني شنو استخبارات عمات مسك وتسجيل صوتي رهف تحجي على امي بس اتزوج رائد اخذه واعزل بي وماخلي
يخطي خطوة بيت اهله بس لي يصير واروح اعزل يم أهلي كلام يشيب الراس مادري ليش قلبي فرح دزيت التسجيل
لي حولته الحسابي وصورها كذلك
باوعت لأمي وكتلها ...
لتردينه يصير تاج راسي
_طلقها رائد ماريدها
_هاهيه اطلقها وانعل ابو الخلفوها ماعندي نسوان تهين
امي وتقلل من قيمتها أنتِ أمي وتاج راسها
وتاج راس أهلها
_انعل ابوها يابو الخلفوها تروح فدوة لدوسة رجل زينب هدية بسطة مني الها فرحت بيها وصارت تشكرني واحد الآن ماسماعة منها حجاية برغم لعبت بيهم جوله أنت
مانزلت من قيمتي واحترامي وكايلة احبها واموت عليها خوش مره للموت مراح أنساها شوف التربية والأخلاق لو انت جايبلي هوايش من حظيرة الهوايش ماتتحاجة
ياهو ليحجي وياها تشيله بكرونها .تتفوووو
عليها وعلى وجهها الملهمد
_اووووف نفسج بزينب
_اي نفسي بيها وشادة برهان بالعباس ابو
فاضل تصير جنه لي
_دخيلك يابو فاضل هاي شوكت
_ماعليك روح طلق الهايشة الزفرة ماريدها وان غشمروك ورجعتها تنشال جنازة امك من كدام عيونك
_فال الله ولافالج يمة شبيج تهددين
_أني كلت اقتل نفسي بيوم عرسك وخلي حضن
الهايشة الزفرة يفيدك يا رائد
_غير اذبحها هي واهلها وراج هو اني شعندي غيرج أنتِ امي وروحي من الدنيا تعال خل ارضيج يابعد روحي سهودة يمة يمة نار وشرار طلعتي الله يساعدك يابة ههههه
_ابن القندرة مال ضحك هي
_والله يايمة بوقتها جت هالسالفة ههههه
_ياسالفة ؟
_على كولتج الهايشة الزفرة حجت عليج اريدها من الله أني مليت منها بس تججي بالذهب والفلوس والمكياج
والطبه والطلعة ليكول ماشايفة .
_هاي بت الفكر من تشوف تصير تشوف نفسها على العالم من اول يوم شفتها بيها الله شاهد ماحبيتها
_ليش مكتي
_ماكلت كلت خل يتزوج ويستر على نفسه مابي حيل مشاكل ويه اهل زينب خطية شمدريني راح تطلع هايشة
مفترسة تريد الخير بس الها
بقيت احجي ويا أمي مابين الها اعصابي حابس كلشي بداخلي كلت العصر اروح لبيت اهلها اليوم انهي كلشي ماريد اتزوجها واتورط وياها اصلا تسرعت بسالفة الخطوبة .
وره الغدة فتحت الانستغرام على أمل ام الصخول فاتحة وفعلاً جانت ناشطة ومنزله ستوري شفت الستوري هي
وعلاء ابن خالتها نار وشبت بنص
صدري تأخذ صور
وي علاء وتنزلهن على الانستغرام شنو هاي ماتجوز ماتبطل شكم مرة كتلها صورج ماينزلن على الانستغرام تعاند بي بت الكلب تعاند وتلعب بعصابي وماترد تجاهلني
بسيطة بطن عيني بس خل اخلص من رهف اتفرقلج هالمرة مو شلون مجان العصر طلعت بالسيارة بالصدفة شفت ام الصخول لابسة نفنوف طويل للكاع
أسود وحجاب بيجي
تمشي وي علاء وثلاث أطفال وبت جلال فتت من يمهم
نزلت جامة السيارة اباوعلها بغضب هي تباوعلي
قطرة دم مابقت بوجهها من شافتني ..
