رواية قصة معلم ستيني الفصل السادس 6 والاخير بقلم جمانه السعيدي
ستار...اني بلبيت واجاني خبر اختك ماتت
زهور قتلت نفسها وحاليا بلمستشفى
لبست ملابسي وطلعت اني ومرتضى ركض أجرنا تكسي للمسشفى بين مصدك لو ما مصدك الخبر
شلون وليش اختي قتلت نفسها
شنو الي صار فعلا هيه قتلت نفسها لو واحد.قتلها
وصلت للمسشفى لكيت الشرطه تارسين المستشفى
وابوي وامي وعمي الاخرس
موجودين امي شبه منهاره من البجي
وكم واحد من الجوارين والاقارب
وكفت بصف ابوي وكتله شصار
شبيها زهور
ابوي...اجت ام مهدي وشكت ثوبها بيتنا
اصرخ وتكول لكيت زوجي ويا زهور نايمين سوه
حلفت كل الإيمان
تكول شفتهم نايمين سوه
رحت اني لكيتها راده جايبه الحلال وراده
وابو مهدي ماكووو
لاهو ولا حلاله صحت بيها بصوت اليوم اذبحج
شسويتي
كامت تحلف ولله ماسويت شي ولله ماسويت شي
ابو مهدي سلم عليه
وسئلني ياهو احسن هنا لو هناك بلولايه
كتله لا هناك احسن من هنا جنت مرتاحه رب الراحه هناك
بس عمتي ماتريدني يمها
كثرت الحجي عليه وخلت اهلي يرجعوني هنا
سئلني كون اخطبج ترضين بيه
ثاري مرته ورا جابت الغده واجت
وهيه تخبلت علينا كامت تغلط وتفشر عليه
ولله ماسوينا شي بس ججي
ابوي...امشي كدامي اليوم اكسر ضهرج كسر
انتي ماصيرلج جاره اله اسودين وجهنا يله ترتاحين
ضربتها على راسها وعلى ضهرها بلعكال
كامت تبجي وتمشي كدامي
تركض وتصيح ولله ماقرب عليه بس نسولف
ولله ماصاربينا شي مرته تجذب عليكم
ابوي...اني اركض وراها واضربها اريد اادبها
ركضت قبلي دخلت للبيت
من وصلت سمعتها بغرفة امك تكول
خطيتي بركبت عمتي هيه الي خلتني علج بحلوك الناس
من وراها ورا سوالفها ماعرست
وضليت مكفخه للرأيح وللجاي اله اكتل روحي واخلصكم مني
ابوي.. اني اتهدد عليها اريد ادخل اموتها وامك وبيبي لازماتني عنها
سمعت صوت طلق نار
دخلنا اني وامك لكينها منزله البندقيه من فوك النضد
وخلته جوه حنجها ورمت نفسها
طشار مخها لازك بلسكف
ولله يابوي موقصدي توصل السالفه الهل مواصيل
ماادري تكتل نفسها
جمانه السعيدي
ستار...عفت ابوي ورحت ادور على اختي
لكيتهم جاي يفحصون الجسم خاف موهيه قاتله
نفسها يعني احد قاتله
بس الطلقه كانت قريبه وايدها عليها آثار وريحة
البارود
ستار...دكتور من رخصتك اني اخوها اطلب فحص بكاره
الدكتور...شنو
ستار...اطلب فحص بكاره اختي متهمه بشرفها
اريد اتأكد هذا الكلام صحيح لو مو صحيح
الدكتور....خلص قدم طلب للاداره وجيبه النا
ستار..رحت قدمت طلب ورجعت عليهم
الدكتور بعد الفحص أأكد اختي عذراء ومحد قرب عليها
وهذا الكلام الي حجته ام مهدي افتراء على اختي
رغم هيه أقسمت قسم ان هيه شافتهم سوه
بوضع مخل
اخذت النتيجه من الدكتور وطلعت برا
وصحت بصوت عالي
تعالو هنا اجمعو كلكم اني راح اشتكي على كل واحد اتهم اختي بشرفها وراح اكاومه عشائريه
اختي بنيه ومحد قرب عليها
اختي ماتت بسبب ضلمكم الها وهاي شهادة الدكتور
اتأكد هذا الحجي
للمغرب بقينا واكفين بابا المستشفى
اخير شي بعد ما الشرطه اخذت التقرير الي يخص
اختي سلمونا الجثه ورحنا دفنا زهور
شلت جثتها بايدي اول مره تنزل دموعي احس بلذنب
ماكدرت احافظ عليها ماكدرت احميها
الف مره توسلت ترجع للولايه ليش مااخذتها وياي
وحافظة عليها ليش عفتها للناس تلطش بسمعتها
وصلنا خليتها بلكاع
دنكت عليها اسمعي زهور حقج راح أخذه من اكثر وحده ضلمتج وشوهة سمعتج
اوعدج عمتي من بعد هذا اليوم مراح تعيش يوم واحد.سعيده اذا ماادمر حياتها مثل مادمرت حياتج
فلا اكون اخوج اعذريني الغلط مني
ماعرفت اعوف شغلي وانتبهلج اعذريني يابعد اخوج
اصعب شعور مر عليه نزلتها بايدي بلكبر نزلت اختي حبيبتي عفتها بلكبر الاضلم واجيت
ابو مهدي من سمع زهور كتلت نفسها وزوجته تاهمتها بشرفها
كتلها وطردها الاهلها
من رجعنا سوينا عزا وأهل ام مهدي اجو طلبو عطوه
ورجلها هم طلب عطوه
اما الشرطه اخذت ام مهدي تحقق وياها
كالت جذب اني ماشفتهم نايمين سوه بس من حركت كلبي كلت هيج خفت تقشمر رجلي وتاخذه مني
اني سمعته يكول اذا اخطبج ترضين انقهرت وتهمتها بشرفها حتى اخلص منها
انحكم على ام مهدي سنه سجن بس اتأجل الحكم
يعني حكم مع وقف التنفيذ
جمانه السعيدي
اهل ام مهدي كعدو ويانا للحك واخذنا منهم فصل
وابو مهدي وأهله كعدو ويانا للحك واخذنا منهم فصل
هاي الناس الي حجت على اختي دفعت الثمن
وكدام القريه كلها طلعنا بلوجه الابيض
اختي شريفه ماعدها شي بس الناس ضلمتها
بعد اساس البلا عمتي اذا مااخليها تبجي دم مااسمي ستار
كلشي صار بسببها بقت تحجي عليها منا لمن شوهة
سمعتها ليش ماكعدت وياها وفهمته ليش ما صبرت عليها
ليش ماحفضت سرها
رجعت للولايه اول شي قررت مااحجي ويا عمتي
اذا رادت تطلع اوكفلها وكفه ممنوع اطلعين من الباب
احنا ناس نخاف على سمعتنا
ماعدنا نسوان تطلع بكيفها
مو هذا كلامج اذا راحت للجوارين اسوي يوم اسود عليها خليت كامرات
ستار...هاي اني خليت كامرات اي واحد يطلع من البيت
اسود ايامه وسنينه ولي ماعاجبه يطلع من البيت
عمتي...شني اطلع من البيت هذا بيتي امي اشترته بفلوسها
ستار. انعل اهلج كلهم كلامي مسموع ليش اكتلج خلاص
هنا وادفنج بمجاري التواليت
انت والخرا سوا ومحد يعرف مكانج
رجعت على سليمه اسمعي سليمه سكينه بعد ماتاكل ويانا
تعزل اكلها ممنوع تطيها رغيف خبر إذا ما نفذتي كلامي
مالج مكان هنا سمعتي لو لا
هلكد ماجنت عصبي حتى سليمه خافت مني
عزلت عمتي اكلها وحدها وصت الجواريم جابولها
عين تطبخ عليها وهيه عدها ثلاجه زغيره اشترتها من زمان
عزلت وحدها بغرفتها تطبخ وتنام بنفس الغرفه
اذا ادخل واسمعها تحجي ازمخ بيها بصوت اسكتي
مااريد اسمع صوتج
من اجا ابوي اشتكت عده مني
عمتي ...تقبل ستار حابسني وحتى مايقبل اكل وياهم
ابوي...حقه ضايج على أخته الي راحت
عمتي...اني ماكتلها اكتلي نفسج
ابوي.. بس هيه ماتت بسبب الكلام الصار عليها
عمتي...هسه شلون اني هذا الببت مااعوفه
ابوي...بكيفج
جمانه السعيدي
ستار...من رجعت ابوي كال عمتك تشكي منك
ستار...صحت بصوت عالي اذا ماعاحبها تولي منا اني مااريد اشوف وجها اختي الزغيره تموت وهيه باقيه كبالي جنها بومه
ابوي عافني ومشا لان اني قافل اريد ادمرها
واخليها تكره الحياة كلها
عمتي كامت تخبز وحدها وتاكل وحدها وتكعد وحدها
بغرفتها انحبست حبسه مالها مثيل
عبالها ووكت وانسى وترجع تطلع وتدخل بكيفها
بس اني وكفتلها وكفه مثل العظم بلبلعوم
ناوي ادمرها دمار تدفع ثمن كل كلمه حجتها على اختي
اكثر شي دمرها الحبسه بلبيت وين جانت النهار كله
يم الجوارين تأكل يم هاي وسوالف على هاي ووين هسه من بابا البيت ماتطلع
سنه واني معذبها عذاب ماصاير
حجت وياا ابوي وامي وحتى بيبي حجت عليه
ومرتضى ماقابل على هذا الوضع
بس اني مصمم لو تكعد بغرفتها ومااشوف وجها ولا تطلع ولا تدخل لو ترجع للعرب وتريحني من شكلها
حتى تكدر تاكل وتشرب ادز فلوس بيد الجوارين
يجيبولها مسواك وبيبي ادزلها فلوس بيد ابوي كلما يجينا
وهيج مدبره أمورها شلون مجان
سنتين وهيه صامده تنتضر الحال يتغير
بس اني كل يوم ازيد عناد اكثر واكثر كرست حياتي
كلها حتى اخذ ثار اختي من عمتي
بعمر الأربعين ابوي كال خلاص لازم تزوج صرت جبير
ونريد نشوف جهالك
بقا بلح عليه هو وامي رغم اني شلت فكرت الزواج
من بالي نهائيا بس امي كامت تبجي تكول راح اموت ماشايفه جهالك
جماعتي والناس المقربه رشحولي بنيه من الولايه
مدرسه حلوه بت ناس دزيت ناس تحجي وياها وافقت
هيه واهلها اخذت مشيه ابوي وعمي واصدقائي
وسليمه واختي امل وامي
عمتي كالت الامي اريد اروح وياكم اشوف العروس
بس اني ماقبلت
ااكدت عليها ممنوع تطلع من البيت ولا اشوفها تخطف
برا
تم عقد القران البنيه محترمه وبت عائله
بس اني الخلل مني مجرد مارجعت للبيت بعد العقد تندمت ندم كرهت الساعه الي وافقت بيها على هاي الزواجه
شهر واني ماعندي اي تواصل وياها رغم ولله ابد ماناقصها شي اهلها دزو عليه
هااا شو سكته يمتى اجهز يمتى الزواج
ستار...اعتذر منكم اني غيرت رائي مااكدر ازوج
استغربو من ردت فعلي شنو غيرت رائيك خاف سمعت شي
ستار...لا ولله ابد.ماسمعت شي بس مااكدر اكمل
طبعا زعلو وكامو يحجون عليه ورادو توصل الشغله
للعشيره بس الناس الطيبه ادخلت وفضت على خير
مااحس نفسي عندي استعداد للزواج
هذا الموضوع مو مهم بلتسبه اليه نسيته وماافكر بي
خمس سنوات واني حابس عمتي بلبيت لا تأكل ويانا
ولا تكعد ويانا ولا تتمرض واخذها طبيب
تتمرض تبقى بلفراش منا لمن تتحسن شويه
لو مرتضى يجيبلها علاج
ضعفت عمتي وصار عدها ضغط وسكر وعمرها كبر
تعبت من المقاومه
هيه معتبره هذا بيتها واحنا الي لازم نطلع منه
بس ماتكدر اطلعنا خمس سنوات واني مسوي عليها حصار
وماافكر بس شلون ادمرها اكثر واكثر
الحد بيوم اندكت الباب
فتحته ولد شاب كال اني اجيت علمود الفلوس
ستار...اي فلوس
....عمتك دزت اخذت غراض من عدنا وكالت على رأس الشهر اليوم عشره ومادزتهن
ستار...عمتي شلون اشترا منكم غراض بلدين
...دزت بيد الجوارين وكالت سجلوها عليه
ستار...شكد الفلوس
....٢٥ الف
ستار....اني راح انطيك بس بعد ابد لا اتبيع عليها فهمت لو لا
انطيت الولد الفلوس
ودخلت كسرت غرفتها تكسير
ستار...انتي تشترين بلدين والناس ادك الباب علينا
انت تشترين بلدين شلون تشترين
الولد يكول اطلب عمتك جان استحيتي الديانه تفتر وراج
اني مو كلت ممنوع كلشي ممنوع انتي شنو ما تفهمين
كسرت الغراض الي بغرفتها تكسير كلشي مابقى
لا ثلاجه ولا عين طباخ ولا سلة ملابس ولا مواعين
من شافتني كامت تبجي مريضه وجبيره ولاحول ولا قوه
طلعت ااجرت سياره ولد جيرانه
وصعدت نزلتها بطرك عبايتها صعدتها بلسياره
وكتلها اذا رجعتي هنا هلمره موتج على ايدي
تبجي وتمسح دموعها بعبايته
اخذها السايق للعرب وهاي كانت آخر مره العمتي
بعد مارجعت هنا للابد
طاحت مريضه وابوي حاير بيها علاج وااكل
بعد شهر ماتت بيبي هلكد مانقهرت عليها
لان هيه حيل مريضه وتعبانه ونفسيتها زفت بسبب الحبسه
والحسره والقهر
بقت عمتي بلفراش امي تخدمها لاتكدر تكوم ولا تكدر تكعد
ماكو على السانها غير حسبي الله ونعم الوكيل
وكل الوكت تدعي عليه
كل الي يجي يكول بس تدعي عليك
ستار...خليها تدعي شكد ماتكدر مايهمني المهم اخذت ثار اختي منها
قبل سنتين ماتت عمتي بعد ماصارعت المرض لمدت خمس سنوات وهيه طريحة الفراش
واني حتى عزاها ماحضرته مو حزين عليها
اخذت جزاء فعلها لو ماحاجيه على اختي مجان قتلت نفسها هيه السبب بكلشي صار
انتهت قصتنا بغض النظر ستار كان صح او غلط
لازم نعرف تأثير الكلام بين الناس
كلمه منه لو كايل اريد سليمه وما ضم مشاعره
جان صارت سليمه زوجته
كلمه منه جان اخذ حب حياته
شوفو تأثير الكلمه شلون
لو عمته ساكته وما حاجيه عن زهور ومبالغه بلكلام
جان كدرت تحل المشكلة بينها وبين اخوان زهور
على الاقل من رجعت زهور للعرب جان ازوجت
بس كلام عمتها هو الي ضيعها ماكدرت تسترها
صح زهور غلطانه بس مو هاي الطريق الصحيحه الي لازم نعاملها بيها ماسامعين كل ممنوع مرغوب
كلما كانت عمتها تمنعها كانت ازيد اكثر واكثر
زهور ماتت بسبب كلمه
هاي القصه تعلمنا الكلام كلش مهم
ممكن يعلي البشر وممكن يضيعه
اكو هواي ناس ادمرت حياتهم بسبب الكلام
اذا ماتكدر تحجي كلام حلو اذا سئلوك عن احد
كول ماادري حتى لا توكع بخطيته بسبب كلامك
بلاخير الكلمه الطيبه صدقه
