رواية عيون المها الفصل السادس 6 بقلم ظل الياسمين
لم يخذلني احد انا خذلت نفسي عندما راهنت انهم اوفياء
_الكل كان ينصحني ابتعد عنه لانه كان يتباهه باستغلالي والكل يعرف اصدقائه واهله وجيرانه ومره ناصحيه كالوله
_خطيه تره يتيمه وانته يوميه تاخذ منهه فلوس واكل حرام عليك مجاوبهم وبكل برود محد جابرهه لو اطلب روحهه تنطيناهه وبدون مقابل
وهذا كان وضعي وياه للاسف راهنت نفسي عليه
طلعنه من البيت انه وبيبي ورحنه لبيت اخوهه سالم
_يمه مهاوي دكي الباب تره جسمي كله يرجف الله لا يوفقج خيريه على هاي العمله
_منو بلباب
_احنه احبيبه
_هله بيج حجيه تفضلي دخلتنه وبيبي كامت تبجي بحركه وتحجي الي صار للعصر واجه سالم كان بشغل
_الله يساعدك خويه
_هله بيج حجيه اليوم يمنه خيركم
_والله يا خويه شكلك هاي بت الحجي اجت وطردتنه من البيت ولمت امة محمد علينه من الصياح والغلط
_ليش هيه تايهه هذا بيتكم والكم بيه اكثر منهه
_الله وايدك وين اروح واحنه حريم لا ناصر ولا معين بعدك
_يصير خير حجيه لا تشيلين هم
_خلي اكوم اتوضه واصلي وانعل الشيطان جسمي كله يرجف من وره عملتهه
_الله على كل ظالم بيبي بلكي نلكي حل ونرجع لبيتنه 
_يا رب انته قادر على كل شي ولا اله سواك افعل بنا ما انته اهله ولا تفعل بنا ما نحن اهله
اني كلما بيبي اصلي اكعد يمهه اصلي وادعي بقينه اربع ايام عدبيت عمو سالم ومرته مثل الضاجت كوه تحجي رغم اني اشتغل وياهه وادرس جهالهه وبيبي تخبز وتطبخ يعني صرنه خدم
مره بليل كاعدين على التلفزيون وكمت اشرب مي واسمعهه تكله
بلله الحجيه اختك وعلى عيني وراسي بس هاي حفيده الحجي نتحمله واحنه كوه ندبر اللكمه
انهضمت ولعنت الساعه الي اجيت بيهه لدنيا وعاتبت امي وابوي ليش خلفتنوني اذ ما عدكم استعداد يتحملون مسوليتي وين ما تصيرون حتلو جوه التراب اعاتبكم والومكم
بجيت بحركه بيبي شافتني وكامت من يمهم وكعدت اكبالي ليش تبجين ؟
_بيبيي يمته نروح لبيتنه
_منو محاجيج
_فدوه بيبي خلي نروح لبيتنه تره اني مضايقه هنا
حست عليه وخلتني على رجلهه وكامت تبجي وياي وتنعه
الصبح كعدتني ورحنه لبيت ام صلاح جيرانه
_ام صلاح/كل الهله بيج حجيه تفضلي _زاد فضلج حبيبه اجيت عليج ولا ترديني
_كولي عد عيناج
_خيه بت الحجي اجت للبيت مالنه وطلعتنه غصب واني حرمه ومالي احد اريد تحجين لابو صلاح بلكي يروح عليهم ونكعد نتفاهم وياهم
_صدك جذب هاي من عقلهه تطردتجن
اكلج خيه هو البيت بسم الحجي مو
_اي من اشتراهه ضم السند ويه الجناسي عدي بلمحفظه
_ها خوش من يجي ابو صلاح احجي وياه ويروح عليهم
اني كاعده واسمع الهن وبالي يم امجد ليش تاخر عليه ليش ما سال لحد ما كالت ام صلاح لبيبي تدرين ام عبد تريد ازوج ابنهه
_بيبي /منو منهم
_اضن امجد شايفتله بت اخوهه وهو هاويه وجابو البارحه الغرفه
بيبي باوعتلي بصدمه وكالت بيه الخير
اني مثل الجمدت بمكاني صفرت اذناتي واحس سجاجين بخاصرتي
هبط ضغطي مدري صعد كمت ارجف مثل السعفه ما حسيت بشي بعد الا واني بلمتشفى وبيبيتي مخبوصه وتبجي
اجه الدكتور /حجيه كولي يا الله
هاج شوفيهه جنهه ورده
_فدوه دكتور كول شبيهه
_اضن متعرضه لصدمه خلي ترتاح ما بيه غير العافيه اذ كمل المغذي اخذيهه خل ترتاح
_بيبي مهاوي انتي زينه تكدرين تمشين
_اي بيبي 
_ليش تبجين يا بعد رويحتي تره مو نهايه الدنيا همزين الله كشفلج معدنه اهله ناس ما عدهم مخافه الله
اني جنت اعرف انتي تحبيه وكلبج متولع
يوميه ادعيلج ربي اذ بيه صالح لهاي اليتيمه اتمهه عليهه بستر وبعافيه
همزين الله رادلج تخلصين من شرهم ناس عدهم طمع دنيا وحوبتج تطلع بيه وداعتج كومي خل نتوكل ويحلهه الف حلال
رجعنه لبيت عمو سالم وتلكانه وحجتله بيبي السالفه ومر اسبوع وبيبي وكعت بالفراش واحنه نفس حالتنه
اني كلبي 
مكسور وبيبي مريضه
مكسور وبيبي مريضه اندكت الباب وطلع عمو سالم واجت ام صلاح ويه زوجهه تشوف بيبي رحبنه بيهم
_ابوصلاح /والله يا حجيه شكلج هذا المره ورجلهه ناس شره العياذ بلله كتلهم المره راح تقدم شكوه وتريد نصيبهه من بيت الحجي اشو هاي كامت تعيط وخبصت الدنيا كتلهه اواشج عيب اني بكد ابوج وهذني امانه حجي فلاح وانتي اجيتي بحيل صدر اخذتي بيتهن
رجلهه يحجي معلك وطردني من بيته يكول خل تشتكي ماله بيت يمنه
_بيبي/عزه العزاج صفيه اشلوووون
اني ويني وين الشكاوي مره مريضه وماكدر اتحرك يعني ضاع حكنه
_ذكري الله حجيه اني راح اروح لابو رائد مسؤول حزبي واحجي وياه علمودكم
انسوي العلينه والباقي على الله
_ناخيه ام البنين والزهره ام الحسين كون يعمون اعيونهم عنه ويرجع ابيتنه
_انشالله يلله احنه نترخص
_هله بيكم
ثاني يوم اجت ام صلاح تشوف بيبي وكامت تسوالف وياهه وبيبي ساعه تبجي وساعه تتمدد الا ان كالت جا غير بيت ام عبد عرسو لامجد ورحنه كلنه انبارك الهم وننطي واجب بيبي قاطعتهه خيه كافي دارت عليه بيبي مهاوي جيبيلي العلاج والماي
كمت من مكاني واني اريد اسمع شنو تكول عليهم
ام صلاح/البنيه الماخذينه لابنهم اكبر منه ومطلكه وعدهه بزر
_بيبي/احنه شعلينه بيهم كلمن عكله براسه يعرف خلاصه
_والله يا حجيه انتي اختي ورفيجتي بس تدرين من ابنهم خطب متت قهر عبالي يصير من نصيب مها
_كلمن ياخذ نصيبه من هاي الدنيه ومها بعده نصيبهه مو هسه
_يلله احبيبه اودعناج اضل يمج العافيه
_هله بيج عيوني
بيبي يوميه تذبل وصارت رجليهه تورم وعمو سالم محتار بيهه كل يوم ياخذهه لطبيب كاله لازم غسل كله
بقيت اداري بيهه ومرت سالم شاده احزامهه عليه كل يوم لازم اكعد من الصبح وانضف البيت كله واسوي ريوك وعلمتني الخبز والطبخ واذ قصرت بشي تكوم اصيح لاتفه الاسباب ضعفت وحسره اللكمه عليه وملابسي بقت بيتنه كمت اغسل ملابسي والبس ملابس بيبي
ومره كاعده يم بيبي وهيه تتلوه من الالم
كالت بيبي مهاوي انتي سباعيه اريدج تحافظين على نفسج وشرفج وما اريد اطخين راس لاكبر واحد اصيرين ذكيه الدنيا تخوف لا اثقين باحد جرت جنطه ازغيره بيهه مستمسكات وافلوس وذهب كالت خليهن يمج ولا تورجين احد دفنيهن اذ ما لكيتي الهن امان صيري سباعيه وكوني حذره يلله بيبي نامي يرويحي
جانت اخر كلمه منهه يرويحتي
كعدت الصبح على صياح مرت سالم على جهالهه تلبسهم للمدرسه كمت توضيت وصليت لان بهاي الفتره كلش التزمت بصلاه وكلبي مكسور كمت من مكاني اكعد بيبي ما تكعد
صحت مرت سالم كعدناهه ماكو
راحت تركض لجيرانهم
اجت المره كالت البقاء بحياتكم
للحكايه بقيه عظم الله اجوركم باستشهاد الامام القاسم بن الامام الكاظم عليهم السلام انشالله نكمل وياكم يوميه بارت
