رواية الوجه الآخر للرحمة الفصل الخامس 5 بقلم عبير ادريس

رواية الوجه الآخر للرحمة الفصل الخامس 5 بقلم عبير ادريس

طيبة

امي حاطة ايدها فوك راسها و تصيح بصوت عالي ..

زهرة : اندهرنا ياعلي اندهرنا ، ياناس يا عالم الحكوا بيتنا احترك ولكم يعيني نريد فزعة وينهم الغيارة ؟وينهم ؟

تصيح عبالها الناس تسمعها ، نست بيوتنا تبعد مسافات عن بيوت الجيران وصوتها شكثر ما يعلى يبقى هباء بهذا المكان...

بلش المسا ينزل على الريف ، المساء اللي يسبق البلاء ، لون النار البرتقالي اخذ ينتشر على السنابل اليابسة ، هبت ريح غاضبة مدت ايدها شالت النار وبدت توزعها على المواشي ، واعشاش الدجاج ، صوت البقر بعيد مفزوع ينكسر بصدى المكان ...

بيوت اخواني كميل ونوح تحولت لرماد ، ياربي دخيلك معقولة نخسر عائلتين بيوم واحد شنو من مصاب هذا ؟؟؟

شنو من ابتلاء ؟ والله ما مسوين ذنب نتجازى عليه بهيج فضاعة ...

شلون هيج صار ؟ ليش ولا واحد لمح النار وطفاها شبسرعة اخذت كلشي ..

كعدنا بالكاع صافنين على الدمار اللي خلفته النار مابقى غير رمادها ،اعصابنا انهارت ، شنو نكول لنوح ؟

لوسمع كميل شتكول روحه واهله صاروا رماد

اسمع صوت يصيح هاي شرارة طبت للبيت ، متأكد، لامست طرف يابس ولهبت...

بس انه وانتم تعرفون هاي مو شرارة قدر ، هاي شرارة بشر متلبس بثوب شيطان وشعل النار بيها وبگلوبنا ..

اهالي القرية ألتموا ، رياجيل تركض وجهال خايفة من النار ..

كاموا يطفوها بسطلات ماي بس شيفيد اكلت بيت اخواني والحلال وجزء من البستان ، الزرع والحلال يرجع فد العوائل شلون شيرجعها؟

بين اللهيب والدخان مرت لحظة سكوت غريبة منها ميزت صوت نوح وهو يهمس

نوح : يمة جهالي ؟ وينهم طلعتوهم

امي هزت راسها بلا وكامت تشيل التراب وتحطه على راسها ..

صرخ بأعلى صوته وركض يدور جهاله وزوجته ، مجنون يتخبط ما يعرف شنو يسوي ومن وين يبدي ،انتهى كلشي ..

اجه صوت كميل مكسور وهو يصبر بنوح ..

كميل : قدر الله وماشاء فعل ، الرضا والصبر يخوي الرضا والصبر ..

ورا ما حجى هيج ، وكع على ركباته توسد الكاع ، ضايع منطفي مهزوم فد ما نزلت منه دمعه وحدة

نخاف نتقرب نواسيه كميل ما يقبل يتواسى بمصيبته ...

بعد ما الخراب ترس المكان والناس طشت كلمن لبيتها ، ألتمينا مهزومين مفزوعين تايهين حايرين ، حيرة الدنيا توسدت صدورنا ..

صافنين ونحجي ما نعرف منو الحرك بيوتنا تاهت علينا ، اعدائنا كثروا

الشك ترس عقلنا..

بيت عمي ابراهيم ؟

الناس اللي هدوا علينا ؟

لو منو؟

لهناك وسمعنا صوت زيون ورضوة من بعيد ألتفتنا عليهم ركضنا اخذناهم لحضنا ، نفتش بجسمهم وين الحرك ؟ ما مصدكين عايشين ، لهناك واجتي نبأ وراها سمر ... فز كميل من مكانه حضنهم بقوة ويبجي جسمه كله يختض ..

كميل : يارب رحمتك ، بوية مابيكم شي ؟ هاي انتم كدامي ؟ مو روحكم تفتر ؟

ألتفت على ابوي وگاله...

كميل : حجي شوفهم اتأكد عايشين لو انه اتخيل صورهم ؟

ابوي كام و مسح الدمع من لحيته ويهدأ بيه

عبد الملك : مابيهم شي ؟ الحمد لله عيالك طيبين وهذيج زوجتك واكفة شوفها ..

كام اخذ اولاده بحضنه وتقربت زوجته حضنها وياهم وبجى يعاتبها..

كميل : وين جنتي ؟ وينج ؟ ولج قريت فاتحتج و دعيتلج بالرحمة تدرين لو لا ؟

نبأ: سودة علية ماجنت ادري بالصار هسه يلا سمعت واجيت ..

كميل : وين جنتوا ؟

نبأ: تغدينا بالبستان مال عمي قادر قريب ما نحلص يلا لمحنا الدخان واجينا نركض..

كميل: اخ اخ يالحبيبة ما مصدك والله ما مصدك انتم كدام عيني وألزمكم بيدي ..

تحمحم نوح وحجى بصوت مهزوم كال ..

نوح : خابروا على اهل سارة وبلغوها بعزاء بنتهم وولدها

تركنا ومشى ، لحكه كميل وغابوا عن عيوننا ، ما راد يبجي كدامنا ويبين ضعفه ..

ياربي هي لحظات دمرتنا ما ضلت عندنا اعصاب ولا قوة ..

ابوي طلع جهازه واتصل على اهلها حتى يبلغهم ..

عبد الملك : السلام عليكم

_ هله بأبو كميل وعليكم السلام شلونك

عبد الملك : انه زين

_ الحمد لله اخباركم خوماكو شي ؟

عبد الملك : البقاء لله ابو رياض...

حجاها واختنك

_ بمنو ياستار ؟

ما كدر يكمل ، فارس اخذ النقال وحجى

فارس : بنتك وجهالها..

_ بنتي ؟ ياهو منهم ؟

الرجال صوته ارتعب ...

فارس : سارة واولاد نوح

_ سارة ؟ بنتي ؟

فارس : اي سارة كم سارة عندك هي وحدة وربها اخذها..

_ شدتحجي يابه غير هاي كدامي هي واولادها بخير وعافية ، ليش متفاول عليهم

فارس : عندك شنو ؟ داكلك احتركوا بالبيت وما ضل منه شي غير الرماد ..

ضحك وكال ..

_رماديش عمي هاي البنية هي و اولادها ، سارة ما تحجين يكولون عليج محتركة ميتة ؟

سمعنا ضحكتها وصاحت

سارة : فارس مابينا شي خير شصاير يمكم ؟

فارس : انطيني احاجيها

_ هاج يريدج

سارة : نعم ؟

فارس : شني تگولين شصاير يمكم ؟ ليش انتِ وين جنتي من صار الحرك وأخذ بيوتنا ؟

سارة : طالعة من الصبح اجيت لأهلي ونوح عنده خبر ، شنو تحاسبني ؟

فارس : احاسبج واكسر راسج هم ، شلون تطلعين واحنا ما ندري بيج ؟ وبعلج ماعنده علم مبين..

سارة : لا عنده روح سأله هسه يجاوبك ، وبعد لا تتصلون إلا اذا يتنفذ شرطي

سدته بوجهه ، ألتفت علينا وكال

فارس : عندها شروط ام الوسخ ..

زهرة : الحمد لله ربي الحمد لله مابيها شي هي وفريخاتها

حجتها ونزلت سجدت على الارض تحمد ربنا وتشكره على هاي النعمة ، نعمة ما فقدنا عزيز ، المال يتعوض والبيوت تنبني مادام اصحابها موجودين وبستر الله عايشين ...

راحوا لنوح بلغوه بالخبر ، اجى يمشي ظهره محني ، مكسور تعبان ما مصدك اللي سمعه ...

هوسة بهوسة ما مفتهمين شي ، تعبنا ورحنا لبيت عمي قادر بين ما نصلح ببتنا ، صح ما لاحته النار هواي فد جوانبه تصخمت والدخان ترس البيت

كعدنا البنات وحد والزلم راحوا يلمون الخساير ..

زهرة : وج نبأ وين جنتي ؟ وزلمتج اندهر دهيرة عليج وعلى فريخاته

نبأ : البارحة اجيت لبيت عمي قادر وبتت عندهم

زهرة : وما سمعتي بالحريق ؟ وهو هذا بيته قادر !

نبأ : من الصبح طلعنا وية عمي للبستان وهناك تغدينا ما ندري ولا سمعنا شي الا صعدت الدخانة كلش يلا جينا وما خلانه عمي نتقرب كال ابقوا بمكانكم لا توصلون خايف على الجهال ، ومن سمعكم تكولون احنا احترگنا اجه صاحني كالي زلمتج يريدج واجيت..

زهرة : وعليش عايفة بيتج وما ناطية خبر ؟

نبأ : عمة من صار موضوع البنية ما حبيت كميل يبررلي ولا اشوف الكسرة بعيونه جبت جهالي وجيت يم سمر هنا..

زهرة : الحمد لله يمكن صارت سالفة هاي البنت حتى تطلعون من بيوتكم ، الحمد لله يمه كلشي قدر ومكتوب والحمد لله على قدره .

سكتت بعدها كالت ..

زهرة : وما تعرفن تنطن خبر لزلمچن انتِ وذيج سويرة ؟ من يمتا وجاي تتصرفن من هوى روسجن

نبأ : ما تحملت الصار عمة كلشي ولا كميل يصيبه شي ، ما يستاهل الصارله ..

امي فتحت شيلتها عكدتها وصاحت بروح شايغة ..

زهرة : وينج يم البنين تشوفين حالي

اقسم عليج ابجاه والينا

حيدر علي الكرار حامينا

انتِ الوسيلة وباب بارينا

نخوة نخيتج لا ترديني

اقسم عليج ابجاه عباسج

فخرج ورافع للسما راسج

سور الوديعة وهو نبراسج

نخوة نخيتج لا ترديني ..

اريد حك ويلادي يرجع من الظلمهم ..

ناوشتها كلاص مي شربت وطلعت تشوف الولد، بقينا كاعدين واحدة تباوع بوجه الثانية الكل باهت ..

طبت زوجة عمي راضي وياها رفل ، كامت تنعى عبالها ماتلنا احد بالحريق ، كمت سلمت عليها حتى تكعد ..

حنة : منو من اخوانج راح بيها يطيبة ؟ مت عيني عليهم

طيبة : محد مات الكل عايشين وبسلامة لا تخافين عمة..

حنة : صدك ؟ عليج الله حجيج صحيح ؟

سمر : اي عمة مابيهم شي فد البيوت احترگت

حنة : فدوة فدوة لذيالهم المهم سالمين..

باست ايدها حطتها على جبينها وكالت..

حنة : محمود مشكور ربي ، محمود مشكور

تربعت وكعدت مسحت وجهها بشيلتها

نبأ : شنو عمة هسه يلا وصلج الخبر ؟

حنة : اي بالقرعان ماجنت ادري هسه يلا دريت

اويلي عليج عمة ما تكول القرآن ابد ..

نبأ : شعجب بيتكم قريب الدنيا كامت ماكعدت..

حنة : ماجنت هنا خذيت رفيلة ورحنا للنجف زرنا ودعينالكم ، كالت اريدن اروحن للأمير وخذيتها ، ومن ردينا بوجهنا عليكم ليچاي

طيبة : تقبل الله زيارتكم عمة

حنة : للكل ان شاءالله ، دعيتلچن هواي وبالخصوص انتِ يطيوب يعدل بختج ويحنن گلب ليوث عليج ..

سمر : عمة مو وكتها ابد

حنة : شسوي مو بيدي يحترك افادي من اذكر كسرته ألها ..

اختنكت كمت طبيت للغرفة مددت ، فاتت سمر مددت بصفي حضنتني وراها فاتوا رفل ونبأ وبنات عمي طه اجوي بعدين ، ووفاء مرت ضياء سابقاً ، زوجة نوح حالياً..

كلنا ألتمينا بغرفة وحدة والنسوان الكبار ضلوا بالهول ..

سمر : طيوب عليش دايره ظهرج ؟ كومي احاجيج ام ضحكة الحلوة كومي

هزيت كتفي بمعنى ما ، ما اريدهم يشوفون دمعتي .. بلعت ريكي وغصيت..

نبأ : هسه هي وكتها تحجي هذا الحجي والله ياعمة عليج سوالف الموضوع صارله سنتين مدري أكثر شجابه على بالها

رفل : امي مو قصدها تأذي طيبة ، هي من اهل الله والموضوع ياكل ويشرب وياها ما نسته ابد بين فترة وفترة تذكره...

ولا اني نسيته ، افتح عيوني واغمضها اتذكر كسرته وسالفته السواها وياي ...

سمر : طيبو كومي عاد كافي

طيبة : نعسانة

سمر : وين تنامين هي مال نوم بعد وكت كومي الله عليج

طيبة : والله مالي خلك

نبأ : خلها براحتها شوية ترتاح وتكعد ، باقين احنا على لمتنا ..

حجت وفاء

وفاء : يبنات صحيح السمعته ؟

نبأ : شسامعه ؟

وفاء : يكولون سارة حركت بيتهم وبيتكم اخذ من النار ، عبن نوح عقد علية ؟

نبأ : منو كال؟ منين سمعتي ؟

وفاء : ما اعرف من جيت لهنا صادفتهم وكفت اسلم واتحمدلهم بالسلامة سمعت فارس يحجيله لنوح على المخابرة البينه وبين سارة ونوح كاله اي صح هددت تترك البيت واعوفك ما اعوفك واخذ الجهال فد ما كالت تطلع بهذا اليوم ، ماعندي خبر بطلعتها ...

سمر : حجي عادي وكل وحدة ابدالها هيج تسوي

حجتها باوعت بعيون الكل ودنكت راسها تعرف بنفسها شنو سوت ، فد احنا ما نلومها ولا نحاجيها كلمن يضم سره بگلبه ويسكت ...

نبأ : كلام سارة من حركة افادتها وين الغريب بحچيها حتى يشكون بيها ؟

وفاء : فارس كال ، تضحك ومبينة تدري ما تفاجأت ولا سألت على نوح تدري محد احترك

نبأ : وشلون تدري هاي مو بيتي كله احترك وتدمر هم يشكون بية ؟

وفاء : ما اعرف الكل مأيد كلامه وباجر من الصبح رايحين لبيت اهل سارة ..

نبأ : يرحون شيسوون ؟

وفاء : ما اعرف..

نبأ : يوسف وشهم ما اجوا ؟

وفاء : ما شفتهم فد عمامي واولادهم وفارس ونوح وكميل ..

نبأ : المفروض يكون عندهم خبر هسه يطنكرون ويسووها هوسة علينا ..

طيبة : امي ما رضت يوصلهم خبر تكول ينشدهون وما ينتبهون للسياقة لا يصيرلهم شي

سكتنا على شهكات سمر ، التفتنا عليها صحت

طيبة : يا يا شجاج ؟ عليش تبجين ؟ توج تسولفين حلو...

هزت راسها وكالت مابية

نبأ : لا بيج سمعتي شي ؟ ضوجناج بحجاية بدون قصد سولفي ..

سمر : لا ماكو

وفاء : احجي يسمر شصاير خافن انه زعلتج

تنهدت جرت نفس قوي وكالت

سمر : لا والله محد بيچن مضوجتني فد كاعدة اعاينلكم من تحجون ومتجمعين كل وحدة قصتها شكل كل وحدة لچمتها شكل لو باقين بدون حب وخرابيط مو احسن ألنا ؟ عليش حبيناهم ؟ وحبنا من طرف واحد ومحد حاسس بينا..

رفل : مو گلوب عندهم جلمود

سمر : اي والله ، فد اسألكم بالله احنا شنو ذنبنا ؟ ها شنو سوينه ؟ كل اللي سويناه حبينا وحبنا جان بريء لا طبينا ولا طلعنا ولا سوينا الحرام عليش هيج نتجازى ؟

رفل : لأن غبرات ثولات غبيات كلشي يرهملنا

وفاء : لا تكولن هيج كلمن وقسمته ، تتذكرون من جنت اكوللكم ضياء ماريده ضياء ماحبه ، شكد حجيت من خطبني تالي طلع احن من اهلي علية ، ويمكن جحدت بنعمتي وما داملي

نبأ : استغفري ربج توج تكولين كلمن وقسمته ، هذا حد يومه الله يرحمه

وفاء :آمين

رفل : لو تدرن البارحة بجيت بجي بالأمام ، لو ميت رجلي ما بجيت هالكد..

سمر : ابتلينا بخشوم يابسة عوذة منهم عوذة

طيبية : يايا تحجن على اخواني وانه بنصجن ؟ شنو من عيون شايلات ؟

رفل : منا وبينا انتِ يطيوب خلينا نفضفض اعتبريهم مو اخوانج ، واليوم انطيهم اجازة خلنا ناخذهم فرة

طيبة : احجن بلا غلط ولا تدعن ، نتخارب وعلي

نبأ : لا ما يغلطن متربايات ، يلا منو عاجبها تفضفض أول ؟

رفل : عفية نبأ ولا عبالك بيتها محترك تريد تثرد سوالف ..

نبأ : عليمن انقهر على بيت واحنا طلعنا من قدر المفروض اكوم واكعد اصلي صلاة الشكر احمد ربي سلمنا ..

رفل : اي والله صدك بس على الأقل تأثري عيب منا

نبأ : على شنو يمعودة ، كلشي يتعوض دام كميل بخير يتعوض ، يلا سمر فضفضي..

سمر : هي مو فضفضة تكدرين تكولين سوالف حازة بنفسي واذا ما حجيتها اموت بقهري..

نبأ : احجي اللي يريحج

سمر : اريدن احجي وفد تسمعوني بعدين احجوا انتوا متفقيز ؟

هزينا راسنا ساكتين انطلقت عبالك جانت كاتمة على صدرها

سمر : بهاي القرية شبينا بيها و من فتحنا عيوننا مالگينا غير اولاد عمامنا كدامنا ، كل وحدة بينا حبت واحد بسرها ، محد يدري بيها

رفل : حبيناهم لأن جانوا ولازالوا أول فكة عين وأول دكة گلب ، ما جنا ندري بيهم ما يريدونا ..

سمر : انچبي كلت محد يقاطعني

رفل : انچبيت كملي

سمر : ما درينا بيهم معتبرينا اخواتهم ، او مجرد صلة قرابة ودم لا أكثر ...بيومها من ردت انتحر وشهم عرف السبب تتذكرون ؟ شبيكم ساكتين ما تحجون ؟

رفل : مو كلتي انچبوا منچبين وساكتين اي نتذكر كملي...

سمر : المهم جان يعرف احبه وعنده شك انتحاري بسبب هذا الموضوع ..

نبأ : زين كملي

سمر : اخذني لنهاية البستان وكعدنا على الدچة الطين ..

ضحكت رفل ...

سمر : وسم شبيج تتمضحكين كل شوية ، حاستج تستهزأين بكلامي

رفل : لا والله فد من ذكرتني دچة الطين بنهاية البستان ضحكت

نبأ : لازم عندج قصة هناك على نفس الدچة

رفل : لا قصة ولا هم يحزنون هي مخصوصه بولد عبد الملك ياهي المايحبوها ويحسون بيها عندها مشاعر ناحيتهم ياخذوها لهاي الدچة يكعدوها وها انتِ مثل اختي طيبة وانتِ مثل اختي مدري منو

ضحكت سمر وكالت ...

سمر : يا عزة انتِ هم اخذج يوسف لنفس الدچة وكالج انتِ مثل اختي

رفل : اي والله

سمر شالت ايدها وتضاربن كف بكف وضحكن على خيبتهن ..

رفل : جلبة ما حاجيتلي على سالفة الدچة

سمر : توني بديت احجي ولصمتيني

رفل : لا كبل مو هسه

سمر : مو بعد تزوجني عليش اكلب بالماضي واتوجع منه...

نبأ : كملي سمر وشصار من اخذج لنهاية البستان

سمر : كبر لا عبالج دمعت عيونه وحضني لا حبيبتي هاي فد بالأفلام نشوفها

نبأ : چا شني ما تحجين موتينا

سمر : عود يريد يهون علية سالفة الانتحار وكذا عاينلي وعيونه بيهن لمعة حسيتها حب خصوصاً من كالي انتِ حبيبتي هنا طرت لسابع سما وراها كالي واختي مثل طيبة وغاليتي مثل تبارك الصغيرة ، اخذت كف ايده وضربت بيه وجهي صفن علية سحب ايده و كال

شهم : ها حجيت شي غلط ؟

سمر : اي غلط انه من وين اجيت اختك ، ابوي اسمه أبراهيم وابوك عبد الملك ، من شوكت صرنا اخوان ؟

شهم : من ربينا ابيت عمي قادر ..

سمر : حظي هذا حظي ..

همس بهدوء وكال

شهم : من ربينا ابيت واحد ونمنا على فراش واحد ومخدة وحدة

قاطعته وكملت

سمر : واكلنا بنفس الصحن ولمتنا بطانية وحدة وجمعتنا صينية ، اي مو مليت من الحجي وحفظته

ضيق عيونه تنهد بنفاذ صبر وكال

شهم : شرايده سمر ؟ مو حجينا وسولفنا عليش نعيد ونزيد بالكلام ؟

سمر : لا عيني عليش نعيد ونزيد سلامتك

شهم : كايل شي غلط

سمر : لا انه الغلط ، لعلمك المشاعر مو بالإيد ولا بالكيف ، عبالك ما اتمنى اكرهك واحقد عليك صدكني اتمنى بلكن انساك ، فد ما اكدر انتِ متعشعش بگلبي ، لا اشوف غيرك ولا اتحمل يلمسني واحد ثاني ، وانه ما اريد العريس الجايني ماريده فهم اهلي كوللهم ما تريده ترى والله اذا حاولوا يجبروني اموت نفسي ...

شهم : وشلون اكابلج واكعد حتى ما تسووين بنفسج شي ؟مو حچي هذا

سمر : اللي يسمعك يكول خايف علية وتحبني

شهم : طبعاً خايف عليج واحبج غير اختي

سمر : يبووو هم كال قندرتي شو وخر من وجهي

بعدته عن طريقي ومشيت لحكني وكف كدامي وكال ..

شهم : انتِ شرايدة بالضبط صارحيني

سمر : مارايدة شي

وخرت اريد امشي كطع الطريق عني

شهم : ما تروحين اذا ما تحاجيني ؟

سمر : حجيت وعاتبت وبجيت وتدمرت ونهيت حياتي ورحت شتريد مني بعد ؟ هذا واقع وانفرض علينا بعد

شهم : عيشيه اذا واقع عليش منتحرة ؟

سمر : ما اريد اعيش

شهم : هالكد تحبيني ؟ وتريدين تنهين حياتج بسببي ؟

سمر : لا يابوي ماحبك تغشم روحك ما تدري خطية

شهم : احجي هالكد تحبيني ؟

سمر : عليش تسوي نفسك متفاجئ مو اجيتني بيوم عرسك كبل لا تطلع الزفة وحجيتلك ...

فلاش باك (قبل خمس سنوات )

ياربي اليوم عرسه شلون بية شلون ؟

احجي وامرد بإيدي طبت اختي كالت

مناسك : يا لساج ما بدلتي ؟

سمر : ما اجي ما اجي

مناسك : وشلون تبقين هنا وحدج ؟ وكلنا مسافرين لبغداد ؟ لا ابوج ولا اخوانج يسمحون بهالشي

سمر : كوليلهم مريضة

تقربت كعدت يمي على الفراش مدت ايدها حضنتني ، لمت شعري تنهدت وكالت ..

مناسك : انه وانتِ نعرف مو مريضة

رفعت راسي من على صدرها عيوني تطلع منها نار..

سمر : كوليلي شنو اسوي ؟ والله ما اتحمل اشوفه بقاط عرسه ما اكدر اموت

مسحت وجهي وكالت

مناسك : سمميه مثل ما سممج

سمر : شلون ؟

مناسك : احجيله عن مشاعرج وخليه يشوف حالتج وشنو صاير بيج بسببه.

سمر : ما اريدنه يعطف علية لو يحاجيني كلمتين يطيب خاطري بيها ماريد خليه يروح وربي يسعده

مناسك : وتموتين انتِ ؟

سمر : خليني اموت ما افرق عد احد شي

مناسك : لا تفرقين عندنا لان عزيزة وغاليتنا لا تسولفين هيج

سمر : اريد اموت تعبت

مناسك : وعليمن يغبرة عليمن الحياة حلوة والدنيا ما بيها غير الزلم ..

سمر : لو انتِ ابدالي شنو تسوين ؟

مناسك : اخليه يحبني واعوفه يعيش الحب من طرف واحد واتزوج كدام عيونه حتى لو يتقدملي جلب اقبل بيه ولا اخذه

سمر : هنيال گلبج اي والله هنياله

مناسك : كومي اتغدي حتى ابقى وياج و ما اروحن للعرس ونخلي ليث يبقى يمنا غصب عنه

سمر : يا اكل منو عنده نفس ؟

مناسك : يبطرانة ليش اكو اطيب من الأكل يا حب يا بطيخ يا ركي

سمر : ولج مناسك اجت المزايق شلون بية يربي شلون ؟

كمت محتركة نار وشبت بگلبي

سمر : مناسك شلون مناسك

مناسك : شمدريني شلون انه اقوى شي عندي اسويلج لفة من تجوعين ماعندي حلول ثانية

ضحكت بنص البجي كفختها على راسها ، فات ابوي ، درت وجهي مسحت عيوني كال

ابراهيم : هاي شنو ؟ بعدجن ما لابسات ؟

مناسك : لا بوية ما نجي روحوا انتم

ابراهيم : ماتجون شني ؟ محد ضال هنا

مناسك : كول لـــ ليث يضل يمنا..

ابراهيم : وين يقبل مبدل ومجهز نفسه

مناسك : كوله هيج وهو يقبل

طلع ابوي وراها اندكت الباب عبالنا رجع او دزلنا ليث ، گلبي دك من سمعت صوته يصيحنا انه ومناسك

شهم : سمر سمر ، مناسك وينكم ؟

طلعت مناسك وكالتله سمر مريضة ماتكدر تجي وانه باقية يمها .

شهم: شبيها مريضة البارحة شفتها مابيها شي

مناسك : اي وتمرضت اليوم محد يضل على حاله كلها تتغير

شهم : شنو قصدج ؟

مناسك : افتهم التفتهمه

شهم : حاسج تلمحين لشي ، اعرفج سولفي

مناسك : وعليش ألمح خايفة منك ؟ احاجيك كبل

شهم : وينها سمر اريد احاجيها

مناسك : كلت نايمة

شهم : وخري جذابة هسه عمي كال ماتقبل تجي للعرس

دفعها ووكف بباب الغرفة صاح

شهم : سمر اريد افوت لبسي حجابج

مسحت وجهي عاينت لروحي بالمرايا شنو يشوف منج ؟ لا حافة حاجب لا مرتبة شعرج عيونج مطككة من البجي ، رجع صاح افوت

لفيت شالي وهمست

سمر : فوت

نطيته ظهري ما عندي قوة اشوفه بهدوم العرس

شهم : شو ما مبدلة ؟

سمر : ما اجي

شهم : ليش ؟

نترت بيه

سمر : كالتلك مناسك تعبانة يعني ليش حتى ما اجي ، مو حمل سفر لبغداد

شهم : من شنو تعبانة غير افتهم ؟

سمر : هيج من الدنيا الغبرة

شهم : اكو شي مضوجج ؟ ليش ما كمتي تحجيلي شنو يصير وياج وتكتمين بداخلج ؟

سمر : كبرنا ياشهم وعرفنا العيب من الحرام ، وفصلونا كلمن ابيت انت رجعت لبيتكم وانه رجعت لبيتنا ...

انه وشهم اول ما انولدنا اخذونا عمي قادر وزوجته وربونا ، لأن ما يخلفون ، لهذا تعلقي بيه جان يختلف عن الباقين ، حتى من رجعت ﻷهلي ماحسيت بيهم ، اضل يوم يومين وارجع لبيت عمي قادر اللي هو ابوي لان الأب اللي يربي مو اللي يخلف ...

شهم : بس انه انه نفسي ماتغيرت بعدني ذاك الشهم..

ضحكت بقهر

سمر : لا تغيرت وابتعدت من يوم اللي جنت تتختل وتحجي بالنقال واذا جيتك تبتعد عني عبالك جاية اتسمع عليك..

شهم : وليش ما تكولين خايف عليج من الحجاية ؟

سمر : قابل بايستك وخايف من الحجي

شهم : شبيج سمر شنو سالفتج اليوم ؟

سمر : روح يخوية لعرسك تأخرت

شهم : واذا كلتلج مارايح اذا ما اجيتي وياي ؟

سمر : كلت تعبانة انت ما تفهم ؟

مشى وكف كدامي رفع راسي بيده غمضت عيوني

شهم : باجية سمر ؟

سمر : تعبانة

حجيتها نزلت دموعي برهاوتها

مسحها من على خدي ، والله ما حسيتها لمسة حسيت بنار حركت گلبي حرك

شهم : من شنو تعبانة ياروحي ؟

فتحت عيوني عاينتله وما اعرف شلون طلعت مني وكلتله

سمر : منك

عكد حاجبه وكال

شهم : مني ؟ قصر الله بعمري اذا ضوجتج بشي ؟

سمر : ضوجتني ؟ كول موتتني ، نهيتني ، عذبتني

شهم : ولج شمسوي غير افتهم ؟

سمر : ما مسوي يبن عمي روح الله يسعدك

شهم : وانتِ خليتي بيها سعادة بعد الحجيتيه ؟

سمر : يعني شنو مغشم نفسك ؟ ها ؟ ومسوي روحك كلشي ما تدري ماشي بدرب الغشيم ؟

شهم : لا حاسس واعرف بس مشاعرج غلط بغلط

سمر : اتركني اعيش الغلط ما مأذيتك بيه

شهم : لا مأذيتني شلون ما مأذيتني ؟

سمر : وعليش مأذيتك ؟ منعت زواجك مثلاً

شهم : ما اتحمل اشوف كسرتج ومن منو مني ؟

سمر : عوفك من هذا الحجي ، عندي طلب واحد و اذا تحبني وماتهون عليك العشرة البينا مثل ما كلت نفذه وما اريد غيره ...

شهم : كولي واعتبريه تم

سمر : ما تجيبها كدام عيني وتحرك گلبي بيها

شهم : وشلون سمر وين نعيش وانه توني تعينت لا عندي اشتري ولا بمقدوري أأجر ..

سمر : هي مو كالت ما تحب تبتعد عن اهلها وتعيش هنا ؟

شهم : اي بس المرأة تتبع زوجها عليش حبتني اذا ما تريد كعدتي ، تضل يم اهلها

سمر : ما ادري حلها الله يخليك لا تجيبها كدام عيوني والله اموت وسبب موتي انت ياشهم وانه هواي اكرهك لدرجة ما تتخيلها

شهم : ولج انه ربيتج جابوج صغيرة والله صغيرة وحطوج بحظني ، جنت اخاف انام لا تختنكين بالحليب ابقى سهران يم راسج ومن يصير وكت المدرسة ابدل واروح ويبقى بالي يمج اخلص بساع بساع واجيج ، اشيلج وألعبج وعايف الجهال حاير بيج تالي تموتين بسببي ؟ وكارهتني ؟

ماجاوبته درت وجهي عنه تنهد وكال

شهم : هذا هو يسمر يجرالج ما نعيش هنا ولا تشوفيها ...

سمر : هذا هو خلف الله عليك

دخل ليث صاحه وسكتنا

ليث : وينك يمعود جدي ثبرنا ثبر والمزيقة لسة تدك اطلع جلبت هنا ما يردن يجن لا يجن ابوي راح يضل يمهن

شهم : يلا اجيت روح كدامي

طلع ليث وهو ألتفتلي تقرب باسني من راسي وكال

شهم : بعمري ماشفتج غير اخت اخت وبس والله مو بيدي..

سمر : فهمت لا تزيدها علية اكثر

شهم : وابقى احبج وملجئ الج بكل وقت تلكيني حضن يلم و واهس يسمع وايد تطبطب ..

سمر : وين اشوفك بعد ؟ راح تروح يمكن اشوفك بالاعياد وبس..

شهم : مو تريدني ابعد راح ابعد

سمر : لا اريد قربك وياها ولا بعدك عني..

شهم : وهاي شلون نحلها ؟

سمر : ما اعرف بس حجيتلك بيوم المهر وكلتلك لا تستعجل انتظر ما سمعتني

شهم : شلون ابطل واكعد ؟ واكسر البنية حتى ترضين عني ؟

سمر : لا اكسرني انه عليش تكسرها لو تكسر بخاطرها ، كسرونا احنا نستاهل الكسر والله نستاهل ..

بجيت ما اتحملت طلع وعافني ..

بعدها عشت ايام من اسوء ايام حياتي جنت امر لعمي قادر ياخذني ويمشي بية بين البساتين احجيله ويسمعني اشكيله ويفهمني ، يصبر ويداوي وينصح . الى ان اجى يوم راح هو وماما للعمرة ، رجعت لأهلي ضليت يمهم ، اسمع اخباره واحرك بنفسي ...

وفى بوعده ما جابها غير اسابيع قليلة بعدها أجر بيت ابغداد اخذها وترك غرفته هنا

نبأ : وتالي تزوجتي بيها

حجتها وضحكت

كملت بعدني عايشة الموقف

سمر : فكرت اخلص من حياتي ، على شنو عايشة ؟ ماعندي هدف غير نشتغل ونتعب ونام بآخر الليل ، مليت من نفسي ومن حياتي ومن گلبي اليوجعني وبيوم بعد مدة من زواجه تقريباً ستة اشهر قررت اشمر نفسي من فوك السطح واخلص ، وكمت صعدت بوقت جيتة ، جان جاي زيارة لبيتنا واعرف شوكن يوصل ، صعدت ردته يشوفني ويحس بية ، ردت آخر نظرة تكون بيني وبينه وراها اشمر نفسي ..

بعدها من صعدت للسطح هو اجه باوعلي بنظرة عابرة ودخل للبيت تصورته اتجاهلني ، بس اللي صار صعدلي حاجاني ، ونزلت ماردت اعوف الحياة شلون اسمع صوته اذا متت ، وين اشوفه بعد ..

حجايتين منه نزلني ، طلعني من اهلي ما خله واحد يتقربلي لو يحاجيني فد امي باستني وطلعني للبستان ..

سمر : عرفت شوكت حجيتلك عن مشاعري وانت ما همك وكملت عرسك

شهم : انتِ كلتيها عرسك يعني انه رايد اتزوج واجيتي اعترفتي عليش اكسر بنت الناس ؟

سمر : ولك وانه شنو ذنبي غير حبيتك وتعلقت بيك ؟ ها فهمني ، بعمري ما شفت غيرك

ما سمحتولنا نختلط بغيركم ونحبهم ، لا نطلع ولا نطب وكلشي عيب وحرام واللي طلعت بينا راحت مدرسة ، حتى غريب ما صادفت بطريقها ، ليش ؟ لأن نخاف ماعندنا جرأة نحط عيونه بعيون الزلم بسببكم بسبب عاداتكم وتقاليدكم وعددكم وين ما نمشي نعثرلنا بواحد ، ها خافن يشوفنه شهم خافن يوسف سعيد ليث كميل عمامي عشنا حياتنا خايفين منكم ...

ما حبينا غيركم ، عشگنا تفاصيلكم وياحسافة ما حسيتوا بينا

رفل : المهم ورا هاي المعانات كلها تزوجج قابل مثل حالي وحال طيوب ؟

سمر : عمت عين هيج زواجه بيوم عرسنا يكولي

شهم : اخذتج صحيح بس تبقين اختي وعيني عليج

سمر : بمعنى ؟

شهم : بمعنى ما اكدر اكذب بمشاعري ، انتِ وانه نعرف زواجنا شلون تم ؟

سمر : شلون ؟ انه ما اعرف نمت بالليل كعدت كالوا اليوم عقدكم انتِ وشهم وبجيته الثانية عرسكم

شهم : ها يعني ما تدرين عمي قادر كل يوم يخابرني وجاييني لدوامي و لبيتي حتى اتزوجج ؟

سمر : لا ما ادري وما مجبور تسايره

شهم : شلون ما اسايره وانتِ راجعه منتحرة مرة ثانية ومتلاحكيلج ؟

طيبة : ياعزة شو ما ندري هاي شوكت منتحرة يعوبة

سمر : شمدريني شنو جنت احس اخذت دوا عمي قادر وبلعته يكولون دخلنا عليج لكيناج لا ايد ولا رجل صايحين ليوسف شايف علب الدوة بالكاع كبل گلبني على بطني ومد اصبعة بحلكي غصبني اتقيء وراها اخذوني للمستشفى غسلوا معدتي ، و عمي قادر مخابره حاجيله وجاي للمستشفى عاد متفقين بينهم ، رجعت للبيت نمت وكعدت كالوا اليوم العقد ...

رفل : وضليتي اخته لو تزوجتيه ؟

حجتها وضحكت جاوبتها اختها ...

ريمة : ومنين جابت فاطمة اذا باقية اخته

سمر : عاد شلون اخذني خلونا ساكتين فدوة

ريمة : احجيلنا حبابة

سمر : انجبي بعدج صغيرة

رفل : سولفي كلنا عندنا فضول نعرف ولا تتعمقين زايد

سمر : بابا شنو احجي اول ما دخلنا الغرفة لزم ايدي وكال

شهم : انه گلبي دك لوحدة وما يدك لغيرها لا اجذب عليج ولا تتأملين بية زايد ..

مرة تقربت منه حارشته رفضني وراها عزلت فراشي عن فراشه ...

نبأ : زين سويتي الوحدة بينا اهم شي كرامتها

طيبة : هي خلت كرامة سمر سحلت روحها سحل يومية نسمعها تبجي

سمر : ولجن يكوم ويكعد يكولي انتِ مثل اختي

حجتها وضحكت رجعت تنهدت وكالت

سمر : اخ اخ عشنا وياهم عمر و ماجنا محسبين يدك گلبهم للغريبة ؟

ما محسبين يدك گلبهم للغريبة

وانه بت عمهم الاولى الحبيبة

تاليني طلعت الاخت القريبة

الما تحب ولا تنعشك عيب وحرام

واذا فكرت بالبعيد هاي اكبر مصيبة

شكد بجيت وهانت دموعي الرخيصة

شكد بجيت وهانت دموعي الرخيصة

تخللت دمعاتي بأطراف الكصيبة

يروحي شكد حنينة ؟

وكعتي بناس تتغنى الونينة

بقلمي

عبير إدريس

نبأ : المهم تزوجتوا وصارت عندكم بنية

سمر : ريته ما تزوجني يانبأ ريته ما تزوجني

نبأ : ليش ياحبيبتي ليش ؟

سمر : طيلة فترة زواجنا ما انسجمنا ، ماكعدنا وحجينا ، ما سولفلي عن يومه وتفاصيله ما حسيت بشعور ، يرجع الرجال ويحجي همه لزوجته ولا بيوم عرفت سر من اسراره ، انه جنت صندوق اسراره واقرب وحدة منه يشاركني سره وافرح لفرحه اضوج لضوجته ، هسه صح قربني منه جسدياً فد بعدني عنه لدرجة اخاف احاجيه اخاف المسه اخاف ابادر ، كلشي بينا يتم من باب عشرة ويأدي واجبه وياي على شرع الله وبس ، لا كلمة حنينة لا غزل ..كلشي ماكو..

طيبة : صوجج سمر السويتيه وية شهم وزوجته مو قليل

سمر : شنو سويت ؟ احجي ليش ساكتة ؟

طيبة : اسرار اخوي ما احب احجيها للعلن

سمر : لا احجي

طيبة : انتِ احجي مو صارلج ساعة تحجين وتذمين بيه احجي السبب الحقيقي اللي خله شهم يبتعد عنج هيج..

سمر : لا ذكريني ناسية

طيبة : محد ينسى شي سواه خصوصاً اذا جان بيه جانب من الشر

نبأ : هاي شنو راح تتعاركون سدوا الموضوع يله

سمر : لا تسكتيها خليها تحجي شنو سامعه

طيبة : ما سامعة الكعدة وياكم حلوة اروح اشوف امي خافن محتاجتني

تركتهم وطلعت ...

نبأ: سمر مو انتِ

وسكتت ما كملت ..

سمر : احجيها يا نبأ احجيها مو انه شنو ؟

يوسف

جان كاعد بالمكتب اجاه تليفون جاوب... ابوه

يوسف : هله حجي شلونك ، قبل شوي اجيت على بالي ردت اتصل انت سبقتني..

عبد الملك : مو مشكلة ابني اتصلت اسمع حسك وهم رايد منك شغلة

يوسف : أأمرني يابه

عبد الملك : حبيبي ما اريد اي انفعال احجيلك حتى تجي ويانا ..

يوسف : وين اجي ؟ خليت بالي ، امي بيها شي ؟ اخواني ؟

عبد الملك : شوف يابه اريدك تنتظرنا عند بيت اهل سارة زوجة نوح

يوسف : خير ؟

وحجاله السالفة كلها ختمها من كال

عبد الملك :والكعدة وية هذول الناس تمت ودفعنا الفصل فد ابوها ما رضى يتنازل إلا نعقد على البنية

يوسف : ومنو يعقد عليها كميل ؟

عبد الملك : اي

يوسف : وشكثر دفعتوا للفصل ؟

عبد الملك : اخذوا الورانا وكدامنا

يوسف : تحجون صدك ؟

عبد الملك : ابني نريد نتجفى الشر كافي احتركن بيوت اخوانك وحلالنا راح

يوسف : مو مشكلة حجي مو مشكلة ، شهم يدري ؟

عبد اللمك : ماعنده خبر

يوسف : لا انه ادري لا شهم يدري وتتصرفون بكيفكم ...

عبد الملك : غير نخاف عليكم يايابه

شهم : اي من نرجع نلبس شيلات ونكعد يم امي والله شنو تخاف علينا ، تالي شنو كال آخر شي

يوسف : ما كال كلتله سايرهم نوصل ويصير خير

شهم : اجيك تجيني سيارتي عطلانة ..

يوسف : انه امرلك كمل شغلك بين ما آخذ اجازة من المدير منو يكول يوافق انزل بنص الاسبوع والله ما ادري..

كاعد يحجون دخل الطبيب المقيم سلم على يوسف وضل واكف بمكانه

يوسف : تفضل دكتور عليش واكف بمكانك؟

_ الصراحة ما جيت اكعد اجيت واسطة

مدنك يجمع بالملفات رفع راسه عاكد حاجبه

يوسف : واسطة لشنو

_بنية تريد تحاجيك او بالأصح تعتذر منك

يوسف : اذا ريحانة ما اريد اشوفها اعتذر منك

_ بس دكتور محد يكدرلها بس الله وانت

ضحك ورجعت ملامحه جدية

يوسف : استغفر الله شنو هالحجي هذا ؟

_ دكتور مليت والله مليت هنه ليلتين تدري شنو سوت بية لو ماتدري ؟

يوسف رفع طرف الضماد من خده وكال

يوسف : هيج سوت بيك ؟ شوهتلك وجهك ؟

_ دكتور والله اهون عندي انت تدري شنو سوت بية البارحة ؟

يوسف : شنو سوت ؟

_ كالت لفرح اليوم عيد ميلادها ، اجتني فرح و اقترحت انفرحها ، رحنا جبنالها كيك ودخلنا اني وفرح ودكتور محمد وممرضات اثنين ، رادت نشغل الشمعة وانت تعرف ممنوع نشغل نار وتكون قريبة من مريض ، اصرت اني رفضت كلتلها ما يصير ، شالت الكيكة ولطشتها بوجهي ..

ضحك يوسف من گلبه وكال ...

يوسف : وعليش جايبها تعتذر مني المفروض تعتذرلك ..

_ لا وين تقبل تعتذر بس اليوم ما رضت تاكل شي إلا انت تروح تشوفها وكالت اريد اعتذر منه

يوسف : ما جاية تعتذر جاية تكمل علية ادري بحظي وقسمتي من يوم يومها عوجة ..

_دكتور احنا تاركيها على الله وعليك ..

يوسف : ادري شنو عايفيها على الله وعلية ؟

_ترويض ريحانة ماعندنا غير سالفة ..

يوسف : وشنو ابتليت بيها بلوة ، حضرتك تعرف شغلي هنا شنو لو ماتعرف؟

_ دكتور اعرف حضرتك استشاري وجنت تتعامل وياها معاملة الطبيب المقيم وهذا مو شغلج بس والله تعبتنا ماصار يومين مداوم بالشفت مالتي شوفتني نجوم الظهر ...

يوسف : دخلها خليها تعتذر بأدب وتطلع

ابتسم وطلع صاحها دخلت مدنكة راسها ، الطبيب طلع وتركهم وحدهم ..

يوسف : متأكدة جاية تعتذرين ؟

باوعتله هزت راسها بلا

يوسف : عليش جاية ؟ تكملين على باقي وجهي ؟

ريحانة : تكدر تكول تعويد

حجتها وكعدت على الكرسي الكدامه ..

يوسف : بس انه ما كلتلج اكعدي

اخذت ملف من على المكتب تتصفح بيه وكالت ...

ريحانة : وين داخلة لمكتب وزير حتى تسمح وما تسمح ..

سحب الملف من ايدها خاف تتلفه ..

يوسف : اعتذارج ما مقبول يلا تفضلي لغرفتج

ريحانة : بس اني ما اعتذرت ..

يوسف : لعلمج الأعتذار ثقافة راقية مو شي عيب ونخجل منه..

ريحانة : ماسويت شي حتى اعتذر

يوسف : شلون ما سويتي ؟ وهذا وجهي منو ضربني ، لو رافع وجهي (cm) جان عيوني راحت

ريحانة : وعليمن تحجيها بالانكليزي كول سانتيم

يوسف : لا عربيتج قوية

ريحانة : افضل من سانتيمتر ، تروح هيبة الجملة التريد تحجيها ..

يوسف : ريحانة ليش طلبتي تشوفيني ؟

ريحانة : اني بنفسي ما ادري ليش طلبت اشوفك و لو ادري احجيلك ليش ما احجي يعني ؟

يوسف : حلو ، ممكن هسه نتفضل لأن عندي شغل اريد اخلصه واطلع ..

ريحانة : وين طالع ؟

ضحك هز ايده و آخذ الملفات حطهم بالجنطة ، و اللابكوت ومشى حتى يطلع من الغرفة صاحته

ريحانة : يوسف لحظة

بدون ما يلتفت كال

يوسف : تدرس بأختصاصك ٦ سنوات وياها بورد هاي ٨ سنوات شغل فعلي بالتخصص من ٥ الى سبع سنوات تكتسب خبرة تتعب على نفسك تعالج حالات صعبة ، كتب وابحاث والسمعة الطيبة تطش بين الناس تفتح عيادتك الخاصة تستقبل عدد لا بأس بيه من المرضى ، معروف بهدوئك ، وكلامك القليل ، وصوتك ما معليه احتراماً للمرضى ، ما تحب الفوضى تعبان على نفسك ، حتى تجي هاي الشكولات الزفرة تصيحلك يوسف ..

ريحانة : انت مو تصيحني بأسمي شو ما تحسست منك ؟

يوسف : انت هنا مريضة وانه دكتورج من باب الأدب تكولين دكتور ومن اتمرض واحتاج عملية وقبلها بدقائق تجيني تسأليني اذا عندي ضغط او سكر ؟ مسوي عمليات قبل ؟ ادخن او لا هذاك الوقت اصيحلج دكتورة مو ريحانة ..

ريحانة : شعجب تدخن ؟ ترة مضر بالصحة

ألتفت عليها شايط ..

يوسف : لج انتِ خليتي بيها صحة خليتي عندي عقل الله يشيلني ويخلصني بيوم فكرت اصير بيه دكتور نفسي ..

ريحانة : ريلاكس دكتور يوسف عبد الملك ، شكبر اسمك ريلاكس..

تركها وطلع يريد يروح لغرفة المدير حتى ياخذ اجازة ، شاف الدكتور بالباب ، كاله..

يوسف : جايبها تعتذر كلتلي ؟

_ اي دكتور

يوسف: دطب اخذها طب

يتبع ...

السادس من هنا

تعديل المقال