رواية القلب بالقلب الفصل الرابع 4 بقلم روز الفياض

رواية القلب بالقلب الفصل الرابع 4 بقلم روز الفياض

ج٤

احيانا تهديك الحياة ماتتمنى ولكن ...

بأي صورة ياترى ؟...

.

.

.

.

طلعنه من الامام وانه بدي اكمز بالشارع من الفرحة حسيت روحي جاهلة زغيرة اول مره تطلع بالشارع ..

ماخليت محل يعتب علي ...

شكو نوع حلويات شفته اشتريت منه لكل الحبايب ..

وملاعيب للجهال ... ولسلامة وفهيمة كل وحده شحاطة وشال ودرزن جواريب ...

مشينه شوية كالت امي جان كبل هنا صايغ اشتريت منه بتوت الج من جنتي زغيره ...

لو بعده موجودة جا اخذتلج محبس لو كلادة بيها شذرة زركة من العين ...

باوعتلها صفح كتلها:

يمة انتي من الاول لوتية لو تردين تستلوتين من تالي براسي ؟..

ابوي سمعني وضحك كلي:

لا والله تريد تستلوت عليج

ياس: مبينه ...

امي بضحك :

خاله شمالكم انهديتوا بيه فوكاها ...

ياس: هسه هاي محلات الذهب كلها ماعاجبتج الا الصايغ الكبل اشتريتلي منه شني السالفة حجية كولي مااريد اشتري وفضيها ..

امي : ههههه حاطه الله وياج على هذا اللسان ...

ابوي: انه اشتريلها .. تعاي شوفي شيعجبج ..

امي: يالله بالله عود بته ومايكسر بخاطرها ... جا وانه هم كلي شوفي شيعجبج ..

ابوي : جا الا اكلج ... جا انتي راس المال ... شتردين اخذي ...

اباوع لامي عود استحت وابوي يباوعلها وبينهم حجي بالنظرات حصرتني الضحكة ...

ظليت امشي واباوع عالجام خانات لحدما شفت سنسلة بيها فص ازرك جبير وعليه اطار ذهب ....

مابيها كل تفصال بسيطة وعادية بس عجبتني وحبيتها ...

درت على ابوي وامي وهمه بعدهم يتسامرون كتلهم :

طيور الحب اجلوا غزلكم من نروح للفندق لو من نرجع للبيت هسه انه اريد هاي الكلادة ..

اتقدم ابوي يمي يشوفها وسالني وينها اشرتله عليها ودهل للمحل يشوفها .. وامي ظلت يمي تدردم لان فشلتهم وكتلهم طيور الحب وهالحجي ..

اشترالي ابوي المدالية وكتله:

بوية بس تره كتلني الجوع جا انت جايبني تونسني لو تموتني من الجوع ..

امي : عفية بطن ..

ياس: عليج الله ؟ عود صدك؟ شماكله من اهد الريوك مااكلت شي ...

ابوي: يالله مشينه ... نتغده ونرجع للفندق ...

رجعنه للفندق بعدما اتعشينه ...

اتمددت اباوع عالتلفزيون واجه ابوي كال :

باجر كعدن من وكت حتى الصبح نروح لبيت جبر ..

امي : ان شاءالله ... همزين صبغت راسي ..

ياس: مو اكلج تردين تفرعين مارضيتي ...

امي : موش بت كاعدتلي كعدة عالجلمة عبالك شريجتي ...

ابوي : بالتسعة نطلع ... انه اتصلت عليهم كتلهم احنه هنا وعزمونه باجر عدهم نتغده ونبات ومناك نرد لاهلنه ...

امي : اي خوش ... الله كريم ..

ياس : تندله بيتهم بوية ؟

ابوي : اي اندله ... من زماان ماجاي بس اندله ... واذا تيهت ادك عليهم يجون علينه ... بس مااظن يحتاج ... اتذكر الدرب وان شاءالله نفسه مااتغير بي شي ...

.

.

.

.

ثاني يوم الصبح طلعنه رحنه لبيت عمي جنت سامعة عنهم كاعدين بمنطقة راقية ببغداد وعدهم خير من الله ومره كال اخوي مصعب من اجه لبغداد ومر بيهم بيتهم جبير وحلو من بره ومن جوه بعد احلى ..

مبين مرت عمي عدها ذوق ...

طول الطريق اباوع من الجامه عالناس وكل شوية اشوف جوكة ( مجموعة ) بنات تمشي سوه رايحات اظن للجامعة شحلاتهن بس شو مفرعات مالابسات ربطة !!!

مشينه بعد شويه شفت وحده محجبة بس لابسه تنورة كصيرة للركبة ورجليها طالعة !!!

طفرت من مكاني كلت لامي :

يمه شوفي هاي المفلشه شلابسه ... مطلعه رجليها للزلم سليمه صكتها ..

امي : يححح خايبه ذبت عمل ... جا شمالهم اهلها من طلعت ماشافوها ... ماعدها اخوان .. ابو .. رجل ...

ياس: ميعاات على كولت حميد ابن مضر

امي : من عبنها تمشي بحدها محد يريدها لو نازعة الربطة اشرفلها المن خانكة روحها من فوك ومن جوه مصلخة شني هاللعب هذا ... بنات مستهتراات ...

ياس: يمه على كيفج هسه قابل وحده من بناتج ..

امي : يااا شحدجن غير اسويج وصل واذبج للجلاب كون تلبسين هيج اخر عمري بناتي يستعرضن رجليهن للزلم حتى يكولون حلوات ...

سكتت امي ماعدها تفاهم وكل سالفه تدورها علينه انه واختي جورية واكثر شي انه لان مامتزوجه ..

شفت العجب الماشايفته بذاك اليوم شني البنات شني اللبس الصاك الضيك على جسمهن ويمشن عادي ولايستحن ..

افكر واحجي بكلبي ؟...

من كدما جنت مندمجة وافكر واحلل متعجبة ماحسيت بطول الدرب ..

حسيت بسرعة وصلنه مالحكت اشبع من الشوارع ومن الناس ومن كل السوالف الجديدة الماشايفتها كبل ...

وصلنه لبيت عمي ونزلنه دكينه الجرس طلع عمي استقبلنه .. دخلنه للصاله مالتهم على كولته ...

وره دقايق اجت مرت عمي دخلت علينه عدهم عادي تدخل النسوان للديوانية حتى لو بيها زلم ..

دخلت لابسه دراعة وحاطه شال على كولة اهل بغداد على راسها بس مثل ذيج المره مامربط عدل باقي مفتوح وكذلتها الصفره طالعه صفح ومبينه مكحله ومحمره ..

خرب حظي ..

سلمت علينه وبوستنه ورحبت بينه كعدت يمنه شويه تسولف وبعدين كامت راحت جوه يمكن تطبخ ...

هم لكيناهم مفرغين غرفة النه انه وامي وابوي ينام بالديوانية مدري الصاله على كولتهم ..

بيتهم صدك حلو بكل ركن مخليه تحفة ونظيف ومرتب ماجنها مره جبيرة او يجوز جنتها نادرة هي المرتبة البيت ..

اي هاي العمات الزينه مو فهيمة جايتني خاف ام طالب جايه تخطبج لو ام ستار ..

من امداني ...

البيت جان هادئ حيل ماكو صوت لان اللي اعرفه ولدها وجناينها كلهم يشتغلون ولو عدهم جنه وحده بالبيت الثانية طالعه منهم ...

بقينه كاعدين ومرت عمي تروح وترجع يمنه تسولف وتضحك وتسأل عالاهل والكرايب ..

محبوبه هالمره مو غنجه ( دمها ثقيل ) ..

منا لحدما صار أذان الظهر كمنه اتوضينه وصلينه وامي ندستني :

كومي روحي لمرت عمج خاف محتاجه تسويها شي بالمطبخ كومي كافيج حجي وسوالف لاتصيرين عجوزية ( كسولة) ..

ياس: كايمة يالله ..

رحت للمطبخ طبيت لكيتها واكفه عالطباخ ويمها وحده سودة ظليت مستغربه منو هاي معقولة جنتها !!!

ياس: عمه شنو محتاجة اسويلج ؟

ام كرم : هلو حبيبتي ياسه سلامتج ياعمري مامحتاجه شي كل شي جاهز بس اذا ممكن تسألين بابا وماما خاف جوعانين حتى جوانا تصب الغدا ...

ظليت متحنطه منو جوانا .. يمكن هاي البنية ؟

رحت سألت امي وابوي كال ابوي:

اي صبوا بعد صلاة وصلينه ...

اهلي متعودين يتغدون من وكت لان يكعدون الصبح من وكت فيجوعون ...

رجعت كتلها يكولون صبوا ...

ردت اساعد بس ماقبلت .. بقيت واكفه اباوع شفتها بس تطي اوامر لهاي البنية وتصب الاكل والبنية تنقل الاكل وتغسل الصحونه والخواشيك تحضر وتركض منا ومنا ..

صبوا الاكل عالميز وكعدنه اتغدينه ...

بعدنه نتغده وانفتح الباب دخل ماادري منو ماشفته ..

عدلت ربطتي وغطيت شعري عدل ..

رفعت راسي شفت كرم ..

اي هو كرم نفس شكل ذاك الاجه ويه عمي ... مامتأكدة مامدققه بشكلة ..

لحدما كالوا كرم تأكدت هو سلم على ابوي وعلى امي ودنك باس راسها وراس امه ..

وسلم علي سلام عادي من بعيد وهو رايح باتجاه الدرج :

شلونج ياسه ؟

ياس: الحمدلله الله يسلمك ...

بدا يصعد الدرج وامه صاحت عليه :

وين صاعد تعال غسل ايديك هنا واتغده ويانه عالواهس ..

رد بدون مايلتفت وكمل طريقه عالدرج :

مااشتهي .. اريد انام ..

صعد وبقيت اباوع وراه حسيته بلا ذوق .. او يمكن اكو شي بينهم مانعرفه ...

بس هو مو متزوج ومرته تشتغل وياه بالمختبر؟

جا وينها مرته مارجعت وياه؟

وره الغده انه رحت للغرفة تمددت انه وامي وابوي وعمي راحوا للديوانية كعدوا يسولفون ..

نمت شوية وكعدتني امي كالت :

ياسه ... كومي انه وابوج راح نروح للطبيب وعمج ويانه انتي كومي كعدي يم مرت عمج وبت عمج هم اجت من المدرسة كافيج نوم عيب شيكولون عليج متوثه (٢٤) .

كعدت بسرعة من سمعت بت عمي الزغيره جايه من المدرسة رحت غسلت وشفتهم كلهم كاعدين بالديوانية عدلت فستاني وربطتي ورحت يمهم ..

جنت لابسة فستان جوه العباة ومادام هسه احنه بالبيت زحمه اظل بالعباة ..

رحت سلمت على بت عمي الزغيره وكعدت يمها حلوة ...

ظلت صافنه علي اخر شي دارت على امها كلتلها بصوت مسموع :

مامااا ... هاي صدك عيونها كل عين من لون ... هاي شنو اول مره اشوف هيجي .. صدقه لله ...

غلست متعودة على استغراب الناس ماادري المفروض اضحك لو ازعل بس غلست احسن ..

راحوا اهلي ووياهم عمي للطبيب وبقيت يم مرت عمي وبت عمي لنى ...

جانت فرحانه بيه ومتعجبه من سالفة عيوني ولزكت الا اروح وياها لغرفتها ..

رحت وياها طلعت تليفونها !!!

تليييفففوووونهااا ...

امداني وامده حظي هاي الزعطوطه عدها تليفون وانه اتوسل ومايقبلون ..

كعدت تصورني حتى اشوف عيوني لصاحباتها ...

لنى : دنزعي الحجاب هسه منو يمج وانتي مستحية ..

فشلتني ...

نزعت الربطه وهي كاعده وتحجي وتحجي على صاحباتها ومدرستها لحدما داخ راسي ..

شويه وشفت بطرف عيني مرت عمي واكفة يم باب الغرفة وماادري منو يمها رأسا جريت ربطتي وخليتها على راسي ...

سمعت صوت ضحك رجال ..

التفتت شفت كرم ظل مبتسم ويحجي بصوت ناصي ويه امه بعدين كال :

هاا ياسه .. دوختج لنى؟ شيخلصج منها بعد هههه .

دنكت استحيت كتله :

لا سوالفها حلوه ...

ضحك حيل وطلع وصل للمطبخ وصاح على امه :

يوم رايح للمختبر .. محتاجه شي ؟

ام كرم : لاحبيبي سلامتك .. دير بالك على نفسك وارجع من وكت مو تتأخر عمك هنا عيب لازم تكعد يمه خاف يريد يحجي وياك بعدين ..

ماسمعته جاوبها .. بس سمعتها رجعت كلتله :

لاتضوج ياماما ... كل شي قسمة ونصيب ماكو شي من ينتهي تنتهي الحياة وياه ...

كرم : الله كريم

راح ..

بالليل رجعوا امي وابوي وعمي ورجع كرم من وكت مثلما وصته امه وكعدنه كل احنه نتعشه ونسولف بس وره العشه امي ندستني ..

ياس: هاا ؟

امي: روحي كعدي بالغرفة واخذي بت عمج وياج ..

ياس: ليش ؟ شكو؟ مو كلكم كاعدين؟

امي : روحي ولج لاتداهرين ابوج وعمج عدهم حجي عيب تظلين كاعدة ..

ياس: جا مادام عيب المن كاعده انتي وياهم ..

امي : كومي يامصيوبه كومي مو لسان فلك ..

كمت وانه ادردم وصحت على لنى تجي وياي ..

رحنه طلعنه بحوشهم بي حديقة حلوة كعدنه ساكتين لحدما فاجأتني وكالت :

انتي ماتشبهين البنات هنا ...

جان بيدي عوده زغيرة مثل الغصن مكسور وجنت كاعده بالكاع واكو شويه طين جنت اشخبط عليه بالعودة ..

من كالت هيج رفعت راسي باوعتلها وابتسمت كتلها :

كل مكان اله ناسه ..

لنى : بس انتي مبينه فقيره ..

ضحكت كتلها :

منو كال ؟

لنى : سمعت ماما وبابا يكولون لكرم البارحة بت عمك فقيرة وتتحملك ..

صفنت بوجها .. شنو معناه حجيها ؟

معقولة يردون يخطبوني لكرم ؟

بس كرم متزوج؟

اجيت اسألها ليش كلوله هيج؟ شنو المناسبة؟

ووين مرته؟

بس سكتت كلت لاتروح تكللهم سألت هيج وهيج عيب بحقي وخاف تنفهم غلط ..

ظليت ادك صفنات .. صدك انه اريد اتزوج حتى اطلع واشوف الدنيا بس مو كرم ...

ماادري حسيت اكو وراه شي شخصيته مامفهومه ..

ومااريد واحد متزوج ...

ليش اقبل بواحد متزوج شناقصني؟

ان شاءالله ابوي يردهم ..

بعدين كلت لا كلها افكار مو صحيحة اصلا اذا متزوج شلون مرته ترضى يتزوج عليها ...

اكيد هاي فاهمة الموضوع غلط ...

ثاني يوم من الصبح رجعنه لاهلنه وره صلاة الفجر ...

جبت الطريق نايمة ..

طريق الرجعة مو مثل طريق الروحه ...

مابي واهس ..

راح ارجع للحبسة والحصره ..

وصلنه للبيت وتلكوني الفروخ عبالك جنت شهرين غايبة ماجنهن يومين ...

خلصت اليوم كله اسولف لفهيمة وسلامة على بغداد وبنات بغداد ..

وفهيمة وسلامة فاكات حلكهن مامصدكات ...

وسولفتلهن على بيت عمي كالت فهيمة :

خايبه هاي خدامة العدهم ..

ياس : يححح وانه اكول مرت عمي تأمر وتنهه وهي تركض خلصت الشغل كله ...

سلامة : اكلج وجنتهم مفرعه لو لابسه ربطه؟

ياس: ماشفتها جنتهم ... ماهي .. يمكن عد اهلها ..

فهيمة : لا خايبة اكيد مفرعة اذا هاي عمتها هيج ...

ظلينه لليل نسولف كل شوية اتذكر شي وارجع احجيلهن من اول وجديد ...

حسيت نفسي جنت بحلم مكان وعالم جديد اول مره اشوفه شيصير لو كل جم شهر ابوي ياخذنه هم نزور وهم نشوف الدنيه ...

ابوي واخواني وامي بالليل راحوا لبيت عمي ابو امير ..

طولوا ..

لفيت راسي ونمت ...

ثاني يوم من كعدت جانن سلامة وفهيمة ماادري شبيهن احسهن عدهن حجي بس ماحجن شي ..

ياس: اليوم تتلصلصن بعيونجن شعدجن ههههخ .

فهيمة : شعدنه سلامتج ..

سلامة : ماكو ... شني نبطل مانباوعلج ..

ياس : ههههه خبز ايدي واعرفجن اكو شي بس ماتردن تكولن ..

سلامة : بطرانه ... خل اكوم اعجن احسنلي ..

فهيمة : والله ياياسه على كولتهم بالمسلسلات ياخبر النهرده بفلوس بكره بلاش ..

ياس : روحي خيه روحي ابنج يصيحلج ولاتعيدينها وتضربين امثال بالمصري لان انتي بالعراقي وماتدبرينها ..

بيومها جورية اختي اجتنه ...

وباتت عدنه .. بالليل اجت هي وامي يمي بالغرفة ..

جورية : كعدي ولج ..

ياس: شكو ... جاي احط اسئلة خاف باجر امتحن الجهال ...

جورية : كعدي كعدي .. تحط اسئلة ..

كعدت عدل شفت امي واكفة فوك راسي وجورية كاعده يمي عالجرباية ...

ياس: اسكنهم مساكنهم ... شعدجن ملتمات علي دخيلك ربي ...

جورية : ماعدنه ..

كعدت امي بالكاع وربعت وحطت ايدها على خدها ودارت على جورية :

تشوفيها هسه هي هاي مال عرس بالله ...

كمزت كتلها بصوت عالي :

عرررس؟ يمه واخيرا طمطم طحطح .. ياهو العريس كولن ..

جورية :

ياس: خايبة هو انه عايزه وتغميني ... شعدجن كولن ...

امي تنهدت وبقت ساكته ..

جورية : خايبه مو ذاك اليوم اجت ام طالب وبتها ..

ياس : اي .. بس لاتريد تخطبني لابنها ؟

جورية : اي خابرت المرة بنفس الليلة لامي وعلى اساس الولد يردون يجون ..

ياس : ووافقتوا ... اخيرا يعني راح اطلع من هذا السجن ..

كالت امي بعصبية :

باجر ترجعين تبجين على هذا السجن الماعاجبج ..

ياس : يححح شماله العريس بس لا بي عاهة مستديمة ..

امي : خايبة عمج مارضى من سمع ..

ياس : ياعم ؟ عمي ابو امير ؟ ليش شبي العريس؟

جورية : لا ولج عمج جبر ماقبل .. والعريس مابي شي خوش ولد ويدرس بالجامعة ..

ياس: عاااا يبوووي ...

كمت اركص بالغرفة :

وزفوني مااريد العشه زفوني مااريد العشه ...

وهلا .. هلا ..هلا ..

امي : استغفر الله هاي هسه التخليني اكوم اكفشها .. غير تكعد وتستجن حتى نحجي ..

كعدت كتلهن :

اهاا اهااا كعدت كولن شماله عمي مارضى شيريد بعد؟

بهاللحظه اتذكرت حجي لنى ....

امي : عمج كال لابوج اطونه ياسه لكرم ...

كمت على حيلي واتخوصرت :

شني ؟ كرميش هذا الماغاسل وجهه؟ مو معرس؟ شني هاللعب هذا؟ شمالني ارضى بواحد معرس؟

جورية : مطلكها مرته ... ماتحبل وصايره بيناتهم مشاكل ومطلكينها ...

سكتت ..

بقيت صافنه وساكته ...

هاي تاليتي اتزوج واحد مطلك ...

امده حظي

الخامس من هنا

تعديل المقال