رواية هو لا يشبههم الفصل الثاني 2 بقلم تبارك الوائلي
« جُمانه »
اني واخواني حيل حبينه خالي، وبالنسبه الي اتعلقت
بيه وحبيته بگلبي بدون شوف.. لان هوه اتوفه واني ماجايه لدنيا بعدني بس امي زرعت بينه الحب والحنان الخالي (الله يرحمه) وجنت اسمع هواي ناس تحمده وتحمد اخلاقه وطيبه گلبه وافتخر بداخلي عندي هيج خال وصلت عندي ابجي لان ماعندي خال بس واحد وشهيد وماعندي لا جدة ولا جد .. بس عندي خاله وحده وبعيده عنه حيل بس اشكد نحبها وشكد حنينه علينا وشكد ساعدت امي بتربيه اولاد عمي المفقود وهيه تجيب ملابس لأولادة.. ومايوم تجينه ايدها فارغة ابد.. الحمدلله جانت حالتهم ميسوره بس گلبها على امي وحنينه عليها وعلينه خالتي عدها( 5 ولد و3بنات) الله يحفظهم الها جانت اصغر بناتها من اعز صديقاتي وصديقة الطفولة ابقه اتوسل ابويه علمود اروح اني وامي عليهم.. والعب وياه وجانت من تجي خالتي خطار علينه يرحن على عمتي ويزورن اولاد اخوهن الشهيد اشكد يحبن.. اخوهن بس اني جنت استغرب.. جانن مايزورن زوجتة الثانية ابد وخالتي ماجانت عدها علاقة بيها ابد.. بس امي هيج يمكن بسنه مره تشوفها بس بعدين فهمت جانن يخافن لا تزعل عمتي لان عمتي تصير بنت خالتهن.. وهذيج تبقه غريبه مارادنها بس بعدين افترت الدنيا واني دفعت ثمن الي سوته امي وخالتي الها والي مارادنه....
نرجع العمي الي راح البيته القديم. و جانت جايبته زوجه عمي الصغير.. هنا الكل مصدوم بي وبجيته والعالم كلها مگلوبه ببيتنا.. عماتي وعمامي واولادهم وكل اقربانه من بعيد ومن قريب .. جان بفترتها عيد الاضحى وسأل على امه (بيبيتي) كالوله راحت للحج وسكت وصدك.. وسأل على زوجته كالولة يم اهلها هسه نروح انجيبها.. دخلو سبحوا وبدلوله ملابسة واكلو.. وجان حيل نحيف بشكل وطويل.. وهاي جان اول مره اشوف عمي الي سمعت بي قبل.. وعمي شاف اخويه حمودي يجي ويحجي ويا ابويه وهوه سمعه وكاله ها ابو صالح جايك ولد الحمدلله من صار اخ لوليدك صالح والله فرحت الك.. ابويه باوعله وسكت وكله اي.. واني وحمودي مكيفين يمنه خطار ونفتر بلبيت وفرحانين بلهوسه وصار اليل وعمي گال وين ام حسان معقوله تسمع بيه راجع ولسه ماتجي.. كعدوا عمامي يمه وابويه گله ابو حسان خوية أنتَ تؤمن بقضاء الله وقدرة.. غبت عنه 12سنه واحنه كلنه مات بعد..وانگطعت اخباره.. وهسه رجعت ربك عظيم
خوية ام حسان انطتك عمرها بيوم الي ولدت ابنك وحمودي مو ابني هذه ابنك أنتَ.. واني ربيت اطفالك كل هل سنين وقمت بيهم وامك هم اتوفت
وهوه صافن ودموعه تنزل وگال كل هذه صاير ويايه واني بالغربة عايش ابويه گله اي امك كل النهار تبجي عليك ونجلطت وماتت من ورا سته اشهر من غيابك
هنا عمي انهار ضل يبجي وجان كله امل يرجع ويلگه امه كدامه الي انحرم من حضنها كل هاي السنين ويلكه زوجتة تنتظره (بس قدر الله و ما شاء فعل)
الله يرحمهن برحمته صفن على محمد وهوه گباله وكال يشبه اسامه هواي وعيونه جوزيه مثل اسامه وابيض بس الفرق اسامه شعره اشگر وحمودي شعره على امه أسود حيل.. الكل مقهور عليه وحزنان على حزنه وبنفس الوقت فرحانين برجعته يعني القدر صنع الفرح والحزن بوقت واحد وهنا العالم الي جانت تجي اكثرهم هم عدهم ابناهم مفقودين ويسألون والي بيهم جايب صوره ويشوفون ابنهم مساكين يتأملون بعدهم عايشين والله اكثرهم ماعرفهم عمي بس واحد..
وعمي كللهم اي موجود وعفته ورايه الله يكون بعون الناس.. صفه بيتنه من الناس والخطار الي رايح وجاي وكعدنه وكعد عمي يحجي.. الابويه شنو صار وياه بـ الغربة بقه يوميه يكعد هو وابويه ويتعلل على سوالف غيابه واني واخويه حمودي فرحانين ونستمع الهم وشفت الفرحه بعيون بنات عمي خطيه شكد جانن محتاجات حنان الاب..جانن كاعدات بصف ابوهن الي تفرجله ايده ورجليه.. والي تكعد بصفه فرحهم ماينوصف و قرر ابويه يحجي الحمودي بالحقيقه الي انضمت عنه كل هل سنين وحمودي صافن ويبجي وابويه
ابو صالح: حمودي وليدي هذه ابوك الصح وامك ولدتك وتوفت.. واني عمك ربيتك وهاي زوجه عمك وهم هيه بنت خالتنة واصيلة من ربتك مثل ابنها
هنا حمودي كام يحضن ابويه..ويترجة بيه ويگله
مـحمد: لا يابه فدوه اروحلك.. لا تحجي هيج يعني الي سمعته قبل صح مو جذب واني مو ابنكم
ابو صالح: لا ابني أنتَ ماكو فرق بيني وبين اخويه
مـحمد: لا فدوه لا أنتَ ابويه اني ماقبل بغيرك ابد وهاي امي.
هو يحجي ويبجي واحنه كلنه نبجي ويا.. واخر شي جره عمي وحضنه كله انت ابني الي مادريت بيك لا من نخلقت ولا من جيت للدنيا.. تريد هم تحرمني من هل شي وهمه يبجون واخر شي ابويه حضن حمود وكله انت رجال واني اعتمد عليك.. واحنه ساكنين بيت واحد.. بمكان الاب صار عندك اثنين وكاموا يضحكون عليه وهوه المسكين ضحك بس بعيونه غصه وكله لا عيني هذا ابويه مو حلو انت احلى منه.. والكل ضحك على حمودي.. ومرت ايامنه وعمي عايش يمنه ومن رجع اسامه ماحجه ابويه عليه كدام عمي ولا انو جان عايش خارج البيت صارلهم سنتين هو وحسان وهمه هم سكتوا ومحد حجه وكمنه نتعلل على حجي عمي وابويه الي مابطل يسأل بيه شلون جان عايش
وشنو سوه كل هل سنين وعمي هم مستمتع يحجي النه لحد مايتعبون وينامون.. وصار على رجعت عمي 6 اشهر مرتاحين ناكل سوه ونشرب سوه
و عمي سوه راتب واستلم رواتبه كل هل سنين منجمعات وتفاجأ انو ابويه ما مستلمهن
ابو حسان: ابو صالح ليش ماماخذ الرواتب ملاتي لعد شلون صرفت على عيشه اطفالي كل هل السنين؟.
بتسم ابويه بكل فخر وكله...
ابو صالح: والله من تعبي صرفت عليهم همه وجهالي لان جنت مصدك بيك ميت وكلت اخليهن رواتبك ينجمعن الولدك من يكبرون يشترون بيهن بيت الهم يفيدهم بشبابهم.
ابوي يحجي وعمي صافن على كلام ابويه وهنا كال لابوي..
ابو حسان: ليش بيتي وين كله؟.
ابو صالح: والله بعته بيتك لان العيشه صعبه عليه اربي 9جهال اضطريتو بعته علمود اكدر اصرف عليهم ولو بيتك مايجيب حليب لحمودي.. بس هم اله لازمه.
هنا عمي ضاج من كلام ابوي و كله
ابو حسان: لا لو مابايعه ليش هيج سويت واني هسه صفيت من غير بيت واني كل املي اشوفلي بنت حلال واتزوج واكعد بيتي اني وجهالي.. وانت طلعت بايعه لا مامرجيه منك ابد
وابوي وامي ضالين صافنين على كلامة ابوي حجه وياه
ابو صالح: أنتَ تحجي صدك. هاي فوك تعبي عليهم هيج ترده اليه؟.
ابو حسان: اي مو من حقك اتبيع بيتي.
وهنا زعل عمي وعصب و حسان وسوسن كالو اله...
سوسن: يابه شلون تحجي هيج ويا عمي وهو الي تعب علينه كل هل السنين.. ومافرق بينه وبين اولاده
عمامي ماعرفونه بقطعه ملابس هسه تحاسب عمي على البيت ليش هيج تسوي بينه ليش.. وتبجي وتكله رجعت راح تفرقنه انت برجعتك.
ابو حسان:اسكتي ولا كلمه تحجين ماله اي حق يبيع بيتي.. اني البارحه حجتلي عمتج بسالفه البيت من رحت عليها اشوفلي بنت حلال وهسه هيه كلتلي تعال انزل يمي بطابق الفوك واكعد واتزوج.. ويله هسه كومي اجمعي ملابسكم علمود نروح منا.
الكل ضل يبجي ومصدوم
ابو صالح: روح يا اخويه ماكلك لا تطلع روح الله وياك انت وجهالك وتعبي يم الله مايضيع ماكلك غير شي
هاي جزاتي هيج اجازيني واني فرحت بجيتك وكلت انعيش سوه بيت واحد وانت تريد تطلع ليش احد طاردك اكعد هاي عندي غرفتين اخذهن واكعد.. وتريد زواج اني ازوجك عندك راتب منجمع من اسنين اسحبه واني انطيك افلوس واشتري بيت واكعد انت وجهالك
ابو حسان: لا ماريد شي منك راح اكعد يم اختي
ابو صالح: زين هاي بصفنه كاع اشتريها الك وانت ابنيها؟.
ابو حسان: لا ماريد هنا اني اريد بيت طابو مثل بيتي تريد تشتريلي عرصه ماريد.
ابو صالح: غير على كد افلوسي ماعندي اشتريلك طابو بيت غالي هوه بيتك جان 75متر ومايسوه وانت بسلامه عندك ولد.. وهاي كاع مالت جاري بصفي راح اشتريها الك واكعد يمي ليش نتفارك وتبعد عني بعد كل هاي السنين.
ابو حسان: لا ماريد ابو صالح خلف الله عليك بلي سويته يله بابا سوسن كملتي ملابسكم يله.
وسوسن تبجي وتكله عفيه والله مااكدر اعوف بيت عمي فدوه ويبجون وهوه يحجي بعصبيه...
ابو حسان: لا يله لا تخليني امد ايدي عليج أنتِ شابه وجبيره عمرج 19سنه طلعي كدامي يله.
واشكد عارضو ابوهم بس بقى مصر على كلامه واخذهم وطلع وحمودي يبجي ويكله اني مااريدك ليش مجلب بي ويضربة وهنا ابويه كله لتمد ايدك عليه اكسره الكروالله..
ابو صالح: كافي اتحملت كلامك هواي حمودي ابني اني ربيته اذا تمد ايدك عليه اكسرها الك فاهم راح تاخذهم اخذهم اني مالي حق امنعك منهم بس لاتأذيهم واذا سمعت بيك امأذي احد بيهم والله ما اسامحك واتبره منك.
أم صالح: يا خويه استهدي باالله وانتو اخوان معقوله هيج اجازينه.
واخذهم وطلع وهوه يجرجر بيهم وحمودي فاحط بجي ويصيح يابه لتعوفني ماريده.. ماريد اروح ويا عفيه واحنه نبجي وهمه يبجون وعمي جره من ايده حيل وطلع وياهم وركع الباب واحنه بقينه واحد يباوع بوجه الثاني.
اشكد اخذو مكان بلبيت والهم وحشه واحنه لليل نبجي عليهم وحتى عيونه ورمت بجي طب ابويه وشافنه هيج صاح بعلو صوته..
ابو صالح: مااريد واحد يبجي زين؟.. الي اشوفه يبجي اكتله افتهمتوا.. كافي محد يستاهل البجي عليه وعمكم مات بالنسبه اليه ماعندي اخ بعد ابد.
واحنه سكتنه لان ابويه خطيه تعب حيل نفسيته تعبت من حبه وتعلقه بيهم كل هل سنين عمي بس رجع اخذ حتى ضحكت بيتنه..
تعودنه على فراكهم واستمرت الحياه بينه صح اكو غصه بكلوبنه بس استمرت وتعودنه على بعدهم وعشنه حياتنه بين شغل ابويه وامي بلبيت واني اقره
وادرس.. ابويه باع سيارته وفتح سكله يبيع بيها واخويه صالح ويا يشتغل وخواتي فرح وشهد بالبيت يساعدن امي بشغل البيت لان تاركات المدرسة
بس اني جنت بالمدرسة بالأول متوسط.
بس بقت سوسن. كل ماتروح لسوك. تجي علينه تمر انشوفها.. وحمودي كل يومين والثالث يجينه ومره جاب ملابسه وبقى يمنه اسبوع لان عمي حاجي عليه وجاي زعلان يمنه.. وره اسبوع اجه حسان وكله تعال ابويه يريدك وراح بلكوه خطيه مجبور بس حسان واسامه يجونه بين فتره وفتره بس ابوهم زعلان وهنا
سمعنه بعمي رايح للمحكمة مشتكي على ابويه
لان باع بيته وسمعنه طاردينه من المحكمة وكايليله ما الك حق بلبيت بعد اداعي اخوك.. لان هوه ماساحب راتبك كل هل السنين اعتبر راتبك جان منصرف على تربيت اولادك .وجان استحيت تحجي على اخوك وأنتَ عندك. 5 اولاد وسعر افلوس بيتك يادوب يسدن حليب ومصرف اصغر واحد بولدك.. وهنا رجع فشلان عمي بعد مااخذه الحقد وراح يشتكي على ابويه الي تعب على ولده هيج جازاه بهيج تصرف.
كل عمامي واقربائنه سمعوا عمي مشتكي على ابويه وصارت ضجه بس عمامي وكفوا ويه ابويه عمي الجبير والصغير..و كلهم لامو عمي على الي سواه وكالوله هيج اجازي اخوك شلون تروح تشتكي عليه وربك رجعك فشلان..
سكت عمي بعد ومافتح سالفه البيت بعد ابد.. لان أيس وهوه هم مااتصرف صح لو قابل بالأرض الي بصفنه احسن اله.. بس الحقد عمه عيونه وهو هم طلع مناك. شلون الي بي حاله نفسيه.. انسد موضوعه بعد.. بس بقو اولاده يجون علينه بين فتره والثانيه وبعد فتره سمعنه بيه خاطب وحده بعمر بنته سوسن.. عمرها 21سنه.. مطلقه وعمامي كايليله مانجي بعرسك. ولا نخطبلك اله تجي تعتذر من اخوك ابو صالح وصدك جابوه عمامي بالليل كلهم همه واولادهم واعتذر من ابويه وراحوا خطبوله واتزوج وسوه عرس ورحنه بعرسه وفرحنه بعرسه.. هو بقى كاعد بـ بيت عمتي بالطابق الفوك.. وعمتي وبناتها جوه كاعدين وهو اشتغل بكراج سيارات واستلم كل رواتبه وسوه بيهن عرس اله والكل عزمه بيته وباركله..بس طلعت العروس حيه وقليله اصل كامت تشحنه على بناته
وتشد وياهن وكام يضربهن علمودها.. هيه كاعده وهنه يشتغلن وبعد فتره اجوا خطابه لشيرين وزوجها بعمر ال 15سنه بس علمود يخلص من المشاكل الي اسويها زوجته.. وره سنه زوج سوسن وكلحنه فرحنه الها وحضرنه عرسها وبقى عايش هو وولده وياها
وكامت سوسن اتجيب زوجها وتجي علينه خطار ومن تجي على ابوها ماتبقى يمه بس ساعة..بس احنه تبقى يمنه من الصبح للمغرب وتروح ويه زوجها.. لان بسبب زوجه ابوها متحبهم ابد..
نجي لعمي الصغير ابو هدى (ابو البنات) وهنا اجته الفرحه الي يحلم بيها.. الحمدلله اجا ولد على 6 بنات والكل فرحان اله وسووله الذبايح والعشه والعالم والحفله.. الكل اجه ونجمع بـ بيت عمي ابو هدى شفت اسامه ابن عمي هنا نضرته اليه مااعرف مختلفه ماادري حسيته جان يراقب كل تحركاتي.. بس جنت عقل طفله ومااعرف شي
واجت خالتي هم تبارك العمي واجو ولدها الجبير والصغير وياه.. هنا هم انتبهت على ابن خالتي يباوع بوجهي كل ما اطلع واطب اشوف عيونه ورايه ويبتسم كل ماشفته.. حجيت بگلبي اليوم شبيه وجهي هم ابن عمي يباوع بي وهم ابن خالتي شنو سامعين عليه شي؟
هنا اني جان عمري 15سنه وتركت المدرسه طبعاً جان عندي الانكليزي صعب حيل وماعندي احد يقرينيا.. وبنفس الوقت اجه علينه عمي ابو هدى وحجه حجايه وگال لأبويه امشي بالشوارع واشوف بنات المدارس متواعدات ويا شباب واكفات يحجن بالشارع
هنا اني انجرحت وكلت ليش هيج حجه عمي قابل كلها سوه..و كلت بعد ما اروح للمدرسه.. بعد مااروح ولا اريدها اكعد بـ بيتي واسكت احسن
وبنفس الوقت محد كلي ليش تبطلين والكل ايدني وتركت .. هنا ابويه قرر يخطب الخويه صالح وكل متشوفله امي ابنيه يرفض.. يكول موحلوه وبقى يدور لحد مامره اجتي عمتي الجبيره وكالت لأمي ام صالح عندي بنيه الج ماتتفوت گرايب زوجي من بعيد..
تعالي نروح ونشوفها بلكي تصير من نصيب صالح.. وصدك راحت امي واجتنه فرحانه وتگول حلوه حيل حلوه.. واخيراً وافق صالح وصار يوم العرس بالقاعة والكل معزوم واحنه فرحانين ورحت اني واختي شهد الجارتنه جانت فاتحه صالون بـ بيتها وسوت النه تسريحات حيل حلوه.. واختي فرح راحت ويا العروس واحنه لبسنه وتجهزنه.. اني لبست تنوره سوده وقميص مشمشي وبي ورده سوده ناعمه وخليت مكياج خفيف كلش.. واحنه بالسياره ونصفك وفرحانين جنه كلنه بسياره بنات عمي وبنات عمتي و بنات خالي وبنت خالتي سرور صديقه الطفوله جانت اكبر مني بسنه وجان اكللها
جُمانه: يوم الألج ونفرح بيج
هيه ضحكت وكالت...
سرور: لا عيني يوم الالج أنتِ لان اخويه شفته عينه عليج ويحمد بيج هواي وضاهر حاط عينه عليج ..
جُمانه: اسكتي منيلج هل حجي؟.
سرور: والله مامبالغه عليج.
جُمانه: ولج من رحنه عند عمي ابو هدى جان يباوع عليه كلما اطلع واطب يباوع عليه.
سرور: مو گتلج حاط عينه عليج..يله ان شاءالله تصيرين من نصيبه.
وبقينى نضحك ورحنه للقاعه والكل اجه وكلش فرحنه بالعرس.. وهنا اجوي كل ولد خالتي وعمامي وعماتي ورجعنه للبيت امي فرحانه كلش هذا عرس وحيدها ووليدها الجبير.. والكاع ماشايلتها من فرحتها.. خلص العرس وزفيناهم بالفندق ورجعنه للبيت.. ومن كد التعب والنعاس نمت گبل على وجهي.
أم صالح: فرح يمه اكعدي هسه يجي اخوج هو وعروسته من الفندق كومي اكعدي وكعدي خواتج.. كومن يله.
فرح: اي اي يمه كايمه.. يله شهد جمانه اكعدن يله
شهد: اي كايمه يله
فرح: اني راح اسوي ريوك
شهد: كومن يله خلي الم الفراش
جُمانه: واني راح اشوف ابويه.
شهد: اي اكيد قابل اسوين شي أنتِ
جُمانه:شبيج شهوده قابل شسوي اني..فرح اتسوي ريوك وأنتِ تلمين الفراش واني اختج الصغير اشبيجن من تردن شي مو تدزني اخذ من ابويه .. لو هذا متسمنه شغل؟
ضحكت شهد...
شهد: يله روحي خلصيني صطرتيني يا مدللة ابوج
عفتهن ورحت بحضن ابويه واني بهذا كبري..بس احسني بعدني طفلة..رحت يمه وبوسته وكعدت بحضنه.. شكد احب ابويه لأن مدللني ومايرفضلي اي طلب.
ابو صالح: كومي بابا اختج جابت الريوك يله كومي ناكل.
وكعدنه تريكنه ولملمنه البيت واجتي عمتي الجبيره
ام يسر..
تتبارك لامي
أم يسر: خيه مااجوي العرسان؟.
أم صالح: بالطريق خيه جايين.. تعالي تريكي.
أم يسر: لا والله متريكه خيه..انطوني بس جاي..
ها ولج جمانه اشكبرج بعد اصيرين وكاعده بصف ابوج ماكبرتي بعدج.
جُمانه: يا عمه شبيج غير فراشي بصفه.. وانام بصفه
ام يسر: يا ولج عمه عيب صرتي جبيره نامي جوه يم خواتج بالغرفة.. هذه اخويه المكرود شيفتهم من وراج..
ابو صالح: لا ام يسر لا خويه هاي عزيزتي اذا مالزم ايدها بالليل ماتنام واذا الصبح ماتجي تنام بحضني تكعدني مارتاح.
جُمانه: ها عمه هوه حجه تره اني ماحجيت اجاج الرد.
وضحكنه كلنه..
أم يسر ولج انزول عليج متكبرين أنتِ
بـ هل الاثناء وجان تندك الباب و اكيد العرسان
منو غيرهم يجي يعني..دخلو للبيت واستقبلتهم امي وعمتي بالهلاهل والجكليت وكلها تبارك له الف مبروك وليدي الله يسعدك بلمبارك ياعمه الله يهنيك واني وفرح وشهد نبارك الهم..
ومرت ايامنه حلوه وزاد ويانه نفر بالبيت والناس تجي تبارك للعرس ومن وره اسبوع.. صارت السبعه واجوي الناس واهل العروس اجو هم.. لان جانو بغير محافظة بعيدين علينه وفرحت جنتنه من شافت اهلها وره العرس اجوي أهلها واخوانها علينه وسلمنه عليهم وتعرفنه عليهم..
وبعد فتره اتصلت خالتي على امي وكالت الها راح اسوي عزيمه لجدة جهالي مسويه ثواب
وجيبي البنات وتعالي..
وصدك رحنه كل احنه اني وامي واخواتي بس وبنات خالي طيبه وساره وزينه وهناك التقينه وفرحنه..
وهم طبعاً شفت ابن خالتي هناك هم نضراته عليه وين ماروح يباوع عليه كلت بگلبي هذه شبيه بله مو بطران ليش يباوع عليه؟.. خلي اكعد يم امي احسنلي
شويه واجتي خالتي كالت روحي يم البنات هناك عندي حجي ويا امج حجيت بيني وبين نفسي وين اروح خاله ابنج ضوجني..كمت رحت يم البنات كعدت انوب طب داوود ابن خالتي الاكبر بس هم باوع عليه نضره كأنما اول مره يشوفني بحياته وهم كلت هذه الثاني شبيه... انعده من اخو لو شنو..
صبوا الاكل واكلنه وكلمن ماخذله صفحة ويحجي
ماتخلص السوالف..
صار الوقت متأخر امي صاحت علينه
أم صالح: يله يمه فضنه علمود نرجع للبيت
فرح: اي يمه اجينه يله جمانه شهد تاخر الوقت ولازم نرجع للبيت.
فرح: اشكد اتونسنه بروحه.
جُمانه: اي والله ونفسهم بالأكل حيل طيب.
شهد: وأنتِ همج على بطنج بس.
جُمانه: اي طبعاً وشعندي اني غير بطني واباوع مسلسلات وكارتون.
شهد: ولج شوكت تكبرين بس گليلي ادورين كارتون ولج عيب كبرتي طبيتي بل 16 سنه عيب ادور كارتون زعاطيط؟.
جُمانه: والله مو بيدي احب افلام الكارتون شسوي خلي اشوف ابويه وين اخذ منه افلوس ادز ابن الجيران اشتري.
شهد: بله هاي شحجي وياه انوب ادور اشرايه.
أم صالح: تدرن كالت عمتجن ام بسام زينه جايينها خطابه وكالت لأبوجن وعگب باجر تجي مشيت الزلم
اوف..
فرح: ها يمه خير شبيج صافنه؟.
أم صالح: على حض أنتِ وخواتج.. بنات عمج ابو حسان اتزوجن.. وهسه بنت عمتج انخطبت.. وماادري شوكت يجي نصيبج أنتِ خواتج وازوجن وافرح بيجن.
فرح: يمه ليش مستعجله؟.
أم صالح: اسكتي فرح احسنلج.. زينه اصغر منج وراح تتزوج وأنتِ لهسه بعدج.
فرح: يمه تره اني مو جبيره عمري 22 سنه.
أم صالح: شبيج؟ تره الاصغر منج متزوجات ومخلفات كومة جهال.
جُمانه: ها يابه اجيت.. يمه اجه ابويه.
أم صالح: هله بيه ها ابو صالح عيوني.. ان شاءالله تروح لخطبة بنت اختك؟.
ابو صالح: اي اكيد شلون مااروح.. هيه ماعدها اب واني خالها.. اكيد اروح.
جُمانه: ها فرح شبيج ضجتي؟.
فرح: لا ماضجت
جُمانه: لا مبين ضجتي من كلام امي تره اعرفج زين.
فرح: لا ماضايجة.. اسكتي وروحي باوعي كارتون طلع
الكاترتون الي تحبي..
جُمانه: صدك
فرح: اي والله صدك يله.
رحت باوعت بس بالي يم فرح لان انقهرت من كلام امي..رحت نمت وكعدنة ثاني يوم.
جنه كاعدين نتغده
ابو صالح: بابا فرح حضريلي ملابس علمود اروح بلخطبه.. اتجهز ابويه وراح..
أم صالح: يابنات انطني عباتي اريد اروح يم جارتنه ام عمار اكعد شويه يمها.
فرح: يمه خلي اروح وياج.
أم صالح: لا ولج عيب اكعدي واسكتي كبرتي أنتِ وبعدين تعالي اكعدي اريد احجي وياج بشغله.
فرح: خير يمه شكو؟.
أم صالح: ماكو شي..بس من جنه بثواب مالت خالجن خالتج خطبت جُمانه الأبنها داوود.. وكالت ازوج اخوانه الي قبله ومن يجي دوره اخطبها اله.. واني كتلها لا خيه هاي بعدها صغيره وينها وين الزواج. اذا تردين اخذي فرح جبيره كالت اني مالي شغل خيه هوه اجه وكلي عاجبته جمانه ويريدها أنتِ كلي لأبو صالح ونحجزها اله
اني هنا جنت صافنه من حجي امي...
جُمانه:صدك يمه؟.
أم صالح: اي والله صدك.
جُمانه: لا عيني اني مااتزوج.
شهد: الصمي أنتِ جمانه.
جُمانه:ليش الصم .
شهد: انوب أنتِ علينه بعدج زعطوطه والخطابه اجتج
جُمانه:يا واني شعليه اخذيهم الج ماريدهم. يمه حبيبتي اني احب بيت خالتي والله حيل بس ماريد ازوج. وماريد اعوفكم. عفيه
أم صالح: اسكتي بنيتي محد ينطيج أمني
اذا ماازوج فرح اختج الجبيره وبعدين شهد يلا انوب أنتِ.
سكتنه وشويه ورجع ابويه من الخطوبة..
أم صالح: ها عيني بشر صارت الخطوبة؟
ابو صالح: اي الحمدلله عقدو سيد وباجر محكمه الله يتمم على خير الها.. هاي يتيمه
وأن شاء الله الاسبوع الجاي العرس.
أم صالح: يا بـ هل سرعه.. اويلي عليك خوية الله يرحمك ابو بسام مافرحت بجهالك ولا زوجت بناتك
ابو صالح: يا ام صالح (الله يرحمه) ادعيله بالرحمه شهيد هذه بالجنة.
أم صالح: اي والله صدك.. يله يمه فرح حضري العشه أنتِ وشهد.
فرح: اي يمه صار
جُمانه: ها يابه اليوم مانطيتني اشتري.
أم صالح: شلون بيج جمانه متكبرين على المشتره
ابو صالح: عوفيها ام صالح ليش ترديها تكبر هاي عزيزتي.. اي صار هسه انطيج.
جُمانه:فدوه احلى اب بدنيا.
ابو صالح: بابا كومي جيبيلي ماي.
جُمانه: اي بابا كايمه.
كعدنه كل احنه نتعشه سويه وابويه جان صافن
باوعت عليه امي وسألته..
أم صالح: شبيك عيني ابو صالح ليش صافن؟
ابو صالح: هذه ابو حسان سمعت متعارك ويا ولده وطاردهم من البيت علمود زوجته لان طلعت مو بنت اصل وما متربيه.
أم صالح: يااا خويه أسم الله شبيه سامع أنتَ؟
ابو صالح: سمعت الي سمعته بس خلي يكمل عرس زينه واني اعرف شلون اتصرف ويا.
أم صالح: اهدء يا عيني غير اتشوف بعينك.. وتحكم على الناس.
ابو صالح: اي حسان شايفها بعينه واجه حجالي من شهر واني ردت اتأكد وهسه تأكدت.
أم صالح: يااا يمه اسم الله ربي يستر على بناتنه شو ماحجيت.
ابو صالح: وعليمن احجي هيج كلام ماينحجي اكلك.
أم صالح: خويه اختي طلبت جمانه الـ داوود ابنها بس مو هسه تعرف بعد عدها اثنين قبله.
ابو صالح: جمانه ماانطيها اني بعدها.. صغيره عود ذاك الوكت الله كريم.
كملنه العشه وشلنه السفره..وخلصنه شغلنه ورحنه للغرفة...
جُمانه: اكلج شهد شراح نلبس بلعرس لازم نحضر نفسنه.
شهد: اليوم تجي سندس من اهلها.. صالح راح يجيبها وخلي اشوف بلكي عدها ملابس حلوه.
جُمانه: اي والله اني متلهفه اريد اروح للعرس.
وره ساعات اجت سندس مرت صالح استقبلتها امي
أم صالح: هلا عمه هله بيج شلونهم اهلج.
سُندس: بخير عمه انتو شلونكم شخباركم.
أم صالح: بخير يمه.. روحي ارتاحي يمه بغرفتج طريقكم جان طويل.
سُندس: اي والله عمه راح اروح انام تعبت بالطريق
فرح: اكلج عيني سندس اوكفي اريد ملابس منج باجر الحنه مالت زينه بنت خالي.
سُندس: اي حبيبتي عندي الصبح ان شاءالله طبي واختاري الي يعجبج.
فرح: تسلمين حبيبتي.
راحت سندس لغرفتها.. وفرح حجت ويه امي على مود شغل البيت.
فرح: اكلج يمه تره اني مو بس اخبز يوميه..
تحجين ويا جنتج الصبح يوم عليه ويوم عليها زين.
أم صالح: اي بس اسكتي لا يسمع اخوج.. هسه يگول كامن يقسمن الشغل على زوجتي.
جُمانه: اي واذا يمه قابل زوجته تضل متشتغل كافي صار اشكد من اتزوجوا وهيه لا تخبز ولا تطبخ حقها فرح هم تعبت بالبيت وحدها.
أم صالح: ولج جمانه أنتِ اسكتي ولا تدخلين بشغل البيت الي يسمعج يگول كل النهار تشتغلين ولا عبالك بس الجاي والمي والكناسة عليج.
جُمانه: اي واذا عيني هذا هم اسمة شغل والله اني هم اشتغل.
أم صالح: امشي شوفي ابوج اخاف يريد شي
جُمانه: اي اي
عفتهن ورحت وبقت فرح تسولف هيه وامي
᯽⊱┈──╌❊╌──┈⊰᯽
«فرح»
راحت جمانه وبقيت كاعدة يم امي ادري بيها عدها موضوع..لان صرفت جمانه حتى تحجي وياي.
أم صالح: اكلج فرح يمه
فرح: ها يمه كولي ادري بيج دزيتي جمانه علمود تحجين براحتج اسمعج.
أم صالح: شوفي يمه أنتِ كبرتي وباجر اريدج تهتمين حيل بنفسج وترتبين نفسج بلكي احد يشوفج ويخطبج.. من اهل العريس.
فرح: ان شاءالله يمه ادللي.
᯽⊱┈──╌❊╌──┈⊰᯽
«جُمانه»
راحن خواتي نامن بغرفتهن.. واني نمت بصف ابويه وامي.. واله الزم ايد ابويه يلا انام كعدنه الصبح.
سمعت سندس تحجي ويه امي علىمودالشغل..
سُندس: صباح الخير عمه.
أم صالح: هله عمه صباح النور.
سُندس: اكلج عمه فرح تكلي اليوم تخبزين
ويوم عليج ويوم عليه.. شنو عمه رحت لأهلي خطار رجعت لكيت مقسمين الشغل؟.
أم صالح: اي عمه هم حقها فرح عليها الخبز والطبخ هم ساعديها أنتِ.
سُندس: اي بس جمانه...
جُمانه: بس شنو سندس أنتِ چنه بالبيت لعد شتسوين.. وليش فرح عليها الخبز والطبخ أنتِ هم ساعديها ومن حقها... حالج من حالها تخبزين وتطبخين.
أم صالح: جمانه كافي بنتي وروحي لبسي راح نتأخر.
جُمانه: اي يمه صار.
فرح: يله شهد فضيها البسي راح نتأخر.
شهد: اي كملت ها جمانه كملتي؟.
جُمانه: اي.
شهد: ولج خلي شي بوجهج.
جُمانه: مااريد عيني ما احب المكياج اني.
شهد: اي طبعاً لان أنتِ حلوه ميحتاج مكياج.
جُمانه:فدوه الگلبج عيونج الحلوه.
فرح: اسكتي شهد ترديها تحط مكياج خفيف علمود تكسر علينه هيه هيج واحلى منه امشن يله
شهد: اي يلا امشي..شبيج فرح بس تزعلين مثل الزعاطيط.
فرح: ههسه شكلت اني.
᯽⊱┈──╌❊╌──┈⊰᯽
«بيت ابو حسان»
حـَسان: يابه اني شفت زوجتك بعيني تمشي ويا شاب ومن شافتني راحت تركض.
ابو حسان:ولك انجب شنو تتبله على زوجتي أنتَم ليش هيج تكرهونها هاي الطفله مسكينه وفقيره
أنتَ شديت وياها أنتَ واخوتك.
حـَسان:والله العظيم يابه....
وقبل لايكمل كلامة.. ابوه صطره على خده
ابو حسان: لا تحلف جذب انتو ماتردوها..
وبعدين ليش رايح حاجي العمك ابو صالح...
عمك شافني بالكهوة ورزنلي وگلي عوفها وطلكها
ولك أنتَ مو ابني ولا اريدك.
أسُامة: ليش هيج تحجي يابه تره حتى اني شايفها تحجي ويا ابن الجيران.
ابو حسان: اسامه أنتَ اسكت شوف منو يحجي أنتَ كلك غلط وجاي تحجي على زوجتي.
أسُامة: لا اني مو غلط لأن كبرت وعقلت
هيه جانت فتره مراهقة مريت بيها وعرفت غلطي.. شنو تعيرني أنتَ ولا عبالك.. احنه ولدك ابد ماتحن علينه.
ابو حسان: ولك اسكت أنتَ ويا.. وبعد مااريد طبتكم عليه زين.. يله طلعوا بره يلاااااا.
حـَسان:هاي صدك تحجي تطرد ولدك علمود زوجتك.
ابو حسان: اي اطردكم وانعل اليوم الي عرفتكم بيه لو ميتين ويا امكم وخلصان منكم احسن.
حـَسان: ها والله زين هاي لان حجينه الصح هيج سويت.. الله يساعد عمي ابو صالح اشكد تعب علينه وركض وره اسامه علمود يعلمنه وانتَ صارلك كم سنه بزعت منه وطردتنه.. الله كريم انت الي تخسر مو احنه يله اسامه روح اجمع ملابسنه وخلي نطلع.
ابو حسان: يله طلعوا كدامي وهذه البيت تنسو وتنسون عدكم اب.
أسُامة: اكلك حسان همزين طردنه لان والله بعدني مامتعود على وجود اب حياتي همزن. هسه طلعنه من حياة ابوك.
_اسكت اسامه وحترم نفسك يا اا ابو حسان يا عيني لا تغث روحك يا عيني عوفه بعده زعطوط.
حـَسان: اي وانتِ هم بعدج زعطوطه على گولت ابويه يله اسامه اطلع كدامي.
يـتـبـ؏..
دُمـتم بـحفظ الـرحمٰـن..
ثقل ميزانك بذكر ﷲ:
- سُبحان ﷲ
- الحمدُللّٰه
- لا إله إلا ﷲ
- ﷲ أكبر
- سُبحان ﷲ وبحمدهِ
- أستغفر ﷲ
- اللهمَّ صلِ على محمد وآل محمد
