رواية تبديل عريس الفصل الخامس والعشرين 25 والاخير بقلم جمانه السعيدي
سلسبيل....الصبح اكعد بلعشره اتريك واروح ابقى يم بابا
وارجع الساعه بلوحده
ابقى بيت عمي ورا العشى هم اروح اشوف بابا
٣ ايام و بابا صار احسن يعني وضعه صار
احسن بين على الفرق لان العلاج والابر الي جاي ياخذها
من احسن العلاجات
اليوم الرابع عمي فاتح بابا بخطبة بنيين
لان الجماعه جاي يلحون علي يردون ياخذوها
الولد مجهز نفسه من كلشي
اجا عمو فاتح بابا
عمي...الجماعه جاي يلحون على موضوع بنين انت شنو رائيك
بابا...اي مشيها بيها الخير انشاء الله تستاهل بنين كل خير
عمي...بس انت ماتكدر شلون اذا اجت المشيه
بابا....لا شنو مااكدر قابل اني شراح اسوي ابدل واكعد
على الكرسي واذا حسيت نفسي تعبان اكوم ادخل للبيت مشيها لا تعطلها
عمي....زين بعد باجر المشيه
بابا...اي خوش وكت بعد يومين انشاء الله اصير زين
سلسبيل......بليل من رحت يم بابا انطاني فلوس كال اشتري
فستان حلو بلكت الله يهدي قائد وتعقدون سوه
سلسبيل...بابا لا مااريدك تشجعهه خلي هو يقتنع بكيفه
بابا...اني متأكد يحبج ويريدج بس كرامته ماتسمحله
يتقدملج بعد الشي الصار بينكم
سلسبيل...بكيفه اني مجاي اشوفه يريدني جاي يتهرب مني يمكن فعلا شاف نفسه مايكدر يعيش وياي
بابا...بكيفج بابا
سلسبيل...اني مااريد ارخص نفسي مثل ا ول مره
قبلت قائد يتبدل بعزام قبلت اصير اني الضحيه
بهاي القصه
الي يحبني لازم يتعب يله يحصلني حتلو اني اموت علي
بابا...ولله كبرتي وكمتي تحجين كلام منطقي
سلسبيل...الي يرخص نفسه يبقى رخيص طول العمر
بابا...اي ولله كلام ذهب
جمانه السعيدي
ثاني يوم رحت اشتريت فستان كلش حلووو
ثوب مخصر طويل نيلي ردن تول شفاف ورحت ويا بنين للصالون سرحت شعري شعري نازل جوه الخلفيه
وسويت ميكب حلو
لبست ذهب عرسي طلعت اجنن
اجا قائد بلسياره يأخذنا من الصالون
طلعت بنيين لابسه بدله وخاله كب على راسها
طلعت اني وراها لابسه هذا الفستان وخاله شال على راسي شعري طالع من الشال من ورا نازل على ضهري
بس شافني قائد.. صاح هاي شني
سلسبيل...شني
قائد.. هيج طالعه ولله نزع سترته وخلاها على ضهري
صعدنا بلسياره اني كعدت بصفه وبنيين كعدت ورا
قائد.. انتي تحجين صدك هيج طالعه بلشارع
سلسبيل...لاتكبر الموضوع هنا خطوتين من باب الصالون
للسياره
قائد احنا منطقه عشائريه افرضي شافج احد
سلسبيل...وينه هذا الأحد اني اريده يشوفني
قائد.. انتي طالع عيج
سلسبيل...بعد عيني الثانيه اريد اطلعها
انت تحجي على هذا الثوب ولله صدك شبي مستور
التفت عليه وكرصني حيل من ايدي
وهاي ايدج الطالعه وشعرج خاله الشال شلون مجان
سلسبيل.. اخ ولله وجعتني صدك هيج تكرصني اله اكول العمي عليك اذا مااخذ منك حشم
بعدين.المفروض اني مالبس شال لان ام الصالون
صار ساعه تسرح شعري من البس شال يخرب
قائد...اي وتعرفين الحشم بعد
بنيبن ...شبيكم تتعاركون
سلسبيل...وليش مااعرف الحشم تتغرم فلوس لان
اكيد ايدي صار بيها عاها من ورا كرصتك
ولله ايدي كامت توجعني حيل
قائد...خل انزل واني اعلمج طالعه بلشارع هيج
سلسبيل...ولله اكول العمو عليك
قائد..اني الي راح اخلي ابوي يكسر راسج على هذا
شكلج
سلسبيل...نوصل ونشوف عمو شراح يكول
من وصلنا البيت عمي ماقبل نطلع من السياره
لمن دخلها للبيت
نزلت بنيين واني نزلت وسترة قائد على جتفي
دخلت جوه نزعتها وخليتها على الكرسي وشمرت الشال
عدلت شعري لان صارت بي شحنه من ورا الشال
طلع عمي من غرفته
سلسبيل...عمو تقبل قائد يحجي عليه
عمي...لا بالله مااقبل تعال قائد ليش ويا سلسبيل
قائد.. انت شفتها شلابسه والنوب طالعه من الصالون
للشارع بهذا ثوبها
عمي...على كيفك وياها الدنيا ضهر ماكو احدبلشارع
مشت خطوتين ميخالف
قائد... لازم تكسر راسها مو تكول ميخالف
سلسبيل...اني واكفه ورا عمي طلعت الساني اعيب علي
قائد...شوف شوف شلون اطلع السانها
التفت عليه عمي لكاني مدنكه ومسويه نفسي فقيره
عمي...لا سلسبيل محترمه ماتسوي هيج شغلات
يله اطلع عوفها لاتدخل نفسك بشغلهن
اطلع شوف الزلم اجت
سلسبيل...رجعت طلعت الساني وسويت عيوني حول
اشرلي بسيطه بسيطه
جمانه السعيدي
بدت الزلم تدخل احنا عفنا المطبخ اخواني اتلاثتهم
يخدمون الزلم نقلو العصير والكيك واكيد الجاي
لان عمي ابد مايعترف بلعصير اله جاي
شغلنا الديجي وكمنا نركص
اني وزوجت عدي سميه كاعده وتخزر بيه
اخوات العريس هنا وأمهن يركصن ويانا
ام العريس اكلتني بعيونها اكل
شغلن ساجده عبيد اللعب اللعب واني كمت افر بشعري
رفعت راسي بس اني اركص البنات لبسن شالاتهن و عينهن على الباب
التفت قائد واكف ويصيح درب الولد يريد يدخل
خزرني ماعندي شال شالي شمرته برا
صرت ورا النسوان والعريس دخل
مااحس اله قائد شمرلي شالي خليته على راسي
بس شعري طالع من ورا
اشرلي قائد تعاي توقعت يريدني بشغله تخص العريس
طلعت من الهول
قائد...اتركصين مووو راسا لزمني من الشال ولفه على
ركبتي اذا ركصتي اكسر ركبتج
سلسبيل...احجي واني مختنكه ليش مااركص
قائد...ما تسحتين ولج عيب
سلسبيل...ليش عيب الناس كلها تركص بس اني عيب
قائد.. اللعب اللعب مووو سلسبيل
خل الناس تطلع واني اعلمج صارن اكثر من وحده
سلسبيل.. عوفني .عاف الشال بس دار وجها كتله كلشي ماتكدر تسوي وطيكتها ركضه يم النسوان
صاح بصوت عالي سلسبيل
بعد ماطلعت بقيت جوه بس خلصت الحفله
والناس الغريبه راحت بقو بس أهل العريس
امه وخواته ام العريس سئلتني خاله انتي بتمن
سلسبيل..اني بت عم العروس
ام العريس ...ماشايفتج كبل
سلسبيل...اني عايشه بغداد
ام العريس وين امج اريد اخطبج منها
سلسبيل...امي ميته
ام العريس الله يرحمها كون واحد يخطبج ويامن يحجي
سلسبيل...ابنج شيشتغل
ام العريس ....طالب يدرس معهد تحليلات بعده مامتخرج بس انتي حيل عجبتيني حتلو بس خطوبه
السنه اخيره انشاء الله ويتخرج
سلسبيل...دقيقه خاله هسه ارجع عليج
رحت مديت راسي بلمضيف محد اكو بس بابا وعمو وقائد
والبقيه كلهم طالعين
جمانه السعيدي
رجعت على المره تعاي خاله
ام العريس وين خاله
سلسبيل.. اخذج البابا تحجين ويااا
طبعا اني متعمده اريد قائد يسمع بس هو يدلل عليه
اني اعلمه
دخلت للمضيف وكلت السلام عليكم
بابا وعمي ..عليكم السلام
سلسبيل..تعاي خاله ماكو احد غريب بابا وعموو
المره لمت عباتها ودخلت سلمت عليهم
كلهم وكفو وردو السلام
سلسبيل.. الحجيه ام العريس
عمي..وبابا وقائد كلهم صوت واحد اهلا وسهلا
عمي.. تفضلي حجيه اهلا سهلا
ام العريس ..هله بيكم نتشكر منكم ماقصرتو
عمي...النا الشرف حجيه
سلسبيل...كولي حجيه اطلبي هذا بابا وهذا عمي
وهذا ابن عمي الحبير
الحجيه...ولله والنعم منكم انتم حموله وولد خير
واني طمعانه بكرمكم
عمي...كولي حجيه ادللي
ام العريس...اريد هاي البنيه الحلوه الابني الثاني
حيل عجبتني هو طالب بس السنه ويخلص
هسه بس خطوبه وبس يتخرج العرس
سلسبيل...باوعت على قائد خنزر عليه وده يكوم ياكلني بسنونه
سلسبيل...خاله اني اريد بيت وحدي
قائد...خاله محجوزه الابن عمها
سلسبيل...ولله جذاب اني مامحجوزه
عمي.. حجيه طلبج على عيني وراسي بس ابن عمها
هذا يريدها وشغلتهم شبه خلصانه
سلسبيل...عمو ترا اني وقائد ماكو بينا شي
قائد...محد ياخذها غيري لو اني اخذها لو الله ياخذها
بابا....روح جيب الشيخ اذا تريدها جيب الشيخ
هسه واعقد عليها
الحجيه....اعتذر منكم اني كيفت كلت هيه وبت عمها بيت واحد اترخص منكم
طلعت الحجيه من المضيف راجعه للبيت
سلسبيل...بابا شنو الابن عمها منو كال اني اقبل بي
كام قائد من مكانه واجا عليه يمشي بعصبيه
لزمني من ايدي وكال البابا من رخصتك
بابا ابتسم وكاله مرخوص
سحبني من ايدي وطلعني بلشارع واني ملابسه حجاب
وبلا حذاء
فتح بيتنا وسحبني على الدرج
سلسبيل...عوفني وين ماخذني انت تخبلت
قائد..اريد اعلمج الادب من جديد
سلسبيل...... هلكد.ما عصبي ويسحبني قوي على الدرج
اصبع رجلي انضرب وطلع منه دم وايدي توجعني من السحب
وكف باخير الدرج وفتح الباب
دخلني وقفل الباب التفت عليه بعصبيه
غمضت عيوني وخليت اديه على وجهي خفت لا يجيني راشدي طاير يضيع ملامحي
قائد..انتي شتريدين بلضبط لان احتاريت وياج شتريدين
خبلتيني
سلسبيل...فتحت اصابعي طلعت عيونية بس اديه بعدهم على وجهي كلشي مااريد انت شتريد مني
احجي بصوت ضعيف
شكد عصبي بس شافني سويت هيج
ضحك وحضني
سلسبيل...ترا ولله خفت منك شوف رجلي انصدمت
بقا حاضني حاضن بس راسي لان هو أطول مني
قائد...احبج ولله احبج ومااكدر استغني عنج
بعمري ماحبيت احد بحياتي بكد ماحبيتج احبج اكثر من جهالي لوما عنادج جان هسه حياتنا تخبل
وجان انتي هسه حامل
سلسبيل...اتحبني
باسني من راسي اي احبج
سلسبيل...ليش ساكت
قائد...لان اريدج تتاكدين من مشاعرج لان هلمره
اذا ازوجنا وكلتي طلاك اموتج خلاص وما اطلعين من هذا البيت
سلسبيل...اني هم احبك واموت عليك بعد لا تسمع اخبالاتي اذا كتلك طلك احبسني
لا تسمع كلامي ابد معليك بيه مخبله
قائد...احلى مخبله شافتها عيوني
سلسبيل...وهسه شنو
قائد..هسه اروح اجيب لشيخ ونعقد من جديد
سلسبيل...اريد عرس وتوزع بطايق مكتوب بيهم زواج قائد من سلسبيل
مو مثل ذيج المره
قائد..صار من عيوني الاثنيين
سلسبيل...يله تعال اطلبني من بابا
قائد...صار
سلسبيل...ماشايفه عروس حافيه واصبع رجلها يجيري دم
قائد.. هاي صدك طالع دم
سلسبيل...غير انتي سحبتني بقوه اني كلت راح يذبحني
قائد.. من سمعت الحجيه جايه تخطبج وانتي الي جايبتها وجايه للمضيف
تخبلت كلت لا هلمره صدك اقتلها موت
ومااخليها تزوج واحد غيري
سلسبيل...شفتك ساكت كلت مايريدني وهاي خوش فرصه
بعد الناس عرف من اقاربنا ليش اضيع مني هيج عريس
قائد...اني اعوفج تزوجين واحد غيري
شلون انطي بت عمي تخبلت
سلسبيل...اني هم كلت مااعوف ابن عمي تاخده وحده غريبه
قائد. خل اجيب كطن ومعقم واشوف رجلج
راح جاب عدة الاسعاف
كعدت على الكرسي رفع رجلي خلاها على الكرسي الثاني
وبدا يعقمها بعدين ربط اصبعي
قائد.. يله اروح اطلبج من عمي
سلسبيل..اطلع هيج بلشارع عادي تقبل بلاحجاب
ولا حذاء
قائد..تدرين ماانتبهت هلكد ما عصبي ماانتبهت
اني طلعتج هيج بلشارع
انتظري اروح اجيب شال وعبايه من امي واجي
جمانه السعيدي
سلسبيل.. نزل واني ودي اطير من الفرح
همزين نجحت الخطه اااي ماتجي اله هيج شسويلك
اعتذرت منك رحت وياك البغداد ماكو اي احساس
ماتجي اله بلحيله
خطيه ام العريس صارت بوجها بس ماكو كدامي غيرها
شسوي قابل
اجا قائد جايب عبايه وشال لبستهم ونزلت اخذني كبل
للمضيف بس دخلنا عاف ايدي وصار كدامي
قائد..عمو اني اريد اطلب ايد سلسبيل
بابا... سلسبيل اني موافقه
سلسبيل..اي موافقه
بابا...متاكده مو باجر تكولين انت جبرتني
سلسبيل...موافقه بس اريد عرس وزفه لان اني اول مره اعرس من صدك
راح قائد جاب الشيخ واجا عقدنا اني ويااا
خالتي وبنين علكن الجو بلهلال
طبعا اني مستلمه المهر بعرسي من عزام والذهب مال العرس عندي
حددنا العرس بعد يومين عمي هلمره عزم بس الاقارب
ماكو احد غريب
زفونا انا قائد لازم ايدي حيل ويمشي ويبسم
مامصدك نفسه بس خلص العشى زفوا عليه
قائد...واخيرا تحقق الحلم هلمره من صدك مو جذب
كومي بدلي
سلسبيل...يااا شنو ابدل هيج كبل غير نتفاهم
قائد...اني حاجز فندق بمركز المدينه على الشط
يله بدلي خل نشرد من الناس اريد مكان بس اني وانتي بي
مااريد اي احد.عرف يمنا
سلسبيل..بس اجازتي راح تخلص بعد يومين
قائد...ونزودهن يومين مني ومناك نطلع البغداد
اخذج اداومين
وخميس على جمعه نرجع هنا
سلسبيل...فدوه الحبيبي
قائد.. يله بسرعه خل ننهزم منا
سلسبيل...رحنا بالفندق اربع ايام احلى ايام مرن عليه بحياتي طلعنا مناك البغداد كعدنا بيت امي داومت يومين رحت شفت بيت خالي
رجعنا الخميس العصر والجمعه البيتنا
من بعدها ياخذني قائد اداوم وشرط عليه اكعد بيت خالي مو وحدي ويجي الخميس ياخذني من باب الجامعه
ارجع البيتي ابقى يومين وارجع البغداد
منا لمن خلصت
بفترة الامتحانات النهائيه
كعد يمي بغداد منا لمن خلصت امتحانات
بفترت الامتحانات اكتشفت اني حامل
قائد...اريد بنيه مخبله مثل امها بلضبط
سلسبيل...اوكف خل اضبط المصنع سمعتي ماما اطلعي عليه مو على ابوج
واخيرا اتخرجت
بس ماكو تعيين صار اتلث سنوات متخرجه وماكو تعيين
صار عندي بنيه وولد
اما بلنسبه المها اني غيرت الخطه
اني صادقتها اجيبلها هدايه وملابس اعزمها نطلع اني وياها
ناكل برا
اشتري ملابس الجهالها
اذا تتمرض اداريها يعني العلاقه شبه مستقره
اما بلنسبه العزام اول ماصار عنده طفل
جابه واجا اعتذر من عمي الخلاف صار قديم
والزعل بينهم برد
مهمه يكون عمي كلب والد
رجعت العلاقه عزام صار عنده اطفال ثنيين ولد
اني اجرت بيت امي واخلي الاجار والراتب بحساب بلمصرف اريد اشتري بيت
قابل ابقى طول عمري عايشه طابق ثاني
قائد..كال اني اشتريلج بيت
بس اني مااريد اصلا اني عندي بيت امي
بس اريد بيت هنا يم بابا وبيت عمي
وهنا انتهت قصتي شكرا للمتابعه ودمتم سالمين
