رواية القلب بالقلب الفصل العاشر 10 بقلم روز الفياض

رواية القلب بالقلب الفصل العاشر 10 بقلم روز الفياض

ج١٠

التهيت بدراستي ..

جنت متلهفه وعشطانه للدراسة ..

اريد اصير مثل مااتمنى عندي شهادة مااريد ابقى اقل منهم ...

اقل منه هو بالذات ...

ادرس صحيح بس ماقصرت بشي تجاهه ..

وبنفس الوقت انه هم حاولت ابتعد عنه ..

اطيه مجال .. يمكن يحتاج وقت حتى يتقبلني ..

يمكن السنتين الفاتت جنت خانكته مااطيته مجال يتعود علي ويحبني ...

بس ليش مرات جنت احسه يحبني ...

لا ..

لا ..

لاتجذبين على نفسج جان ينقهر عليج مو اكثر ..

يعرف انتي مكسورة الجناح ومالج احد ..

ويعرف انتي تحبينه مثل الثولة ...

تناسيت كرم ..

وبديت حياة جديدة ..

كل ايام الاسبوع ادرس ماعدا الجمعة لان يجون عدنه رضا ومرته وجهاله ..

وريم وجهالها ومرات هم يجي رجلها ..

جنت التهي ويه الجهال ..

اشيل هذا واحط هذا بس ماجانوا يحبوني مثلما يحبون كرم ..

جان يلعب وياهم ومايضوج ولايتعاجر منهم ...

شيطلبون يلبيلهم ..

جان من يرجع الخميس بالليل يكون جايب وياه جيس حلويات شكبره ...

وثاني يوم يوزعه عليهم حصص ..

اول مايدخلون للبيت يسألون وينه خالوا كرم ؟ وينه عمو كرم؟

يوم الجمعة جان مايكعد من وكت ..

بس جنت من انزل الصبح جوه يشيل مندرة ويروح ينام بالغرفة ..

حتى لحد يشوفه ...

اتمنيت احد يصعد ويشوفه نايم بره ..

تمنيت احد يسأله ليش؟

بس احسهم كلهم يدرون ومغلسين ...

يعرفون كل شي بيني وبينه بس كلمن يكول خليهم مالي علاقة ...

قربت الامتحانات ..

كل المواد جانت عدي سهلة افتهمتها بساع بس الكيميا والرياضيات ..

عمي اتطوع يدرسني رياضيات ويشرحلي .

عمي: يعني انتي تعرفين القوانين الفيزيائية كولها .. وحافظتها وفاهمتها ودتجاوبين على كل الاسئلة لعد ليش عندج صعوبة بالرياضيات ؟

ياس: شمدريني ... غير انه ياسه بكل شي لازم عكس خلك الله ..

عمي: الفيزيا والكيميا كلها قائمة عالرياضيات انتي ذكية بس مدا تركزين ...

ياس: وهاي المعادلات؟ هم مااعرف احلها ..

عمتي: لا حرام عليج ياسه زوجج عنده مختبر ومخلص علوم كيميا ومتعرفين تحلين المعادلات الكيميائية؟ هاي واكفه .. لج يرسبوج بس يعرفون زوجج خريج علوم كيميا هههههه ...

ياس: شسوي دماغي مجيم

عمتي : مجيم شنو؟

ياس: يعني مزنجر

عمتي: ههههه لا كل شي مابي لامزنجر ولاشي واذا طلع بي زنجار خليله زيت ويرجع تمام ههههه ..

عمي: سوالف الكيميا هاي بعد ابو الكرم لازم هو يشرحلجياها هم لازم يتعب ويانه شويه ..

ياس: لا خطية يرجع تعبان

عمي: شوف شلون احنه نتعب عادي بس زوجها متقبله التعب هههه ..

ياس: ياا جا شلون غير رجلي اريد راحته ..

عمتي: شبيك حجي وياها شنو تغار غير زوجها وتحبه ..

ياس: ايييي هنا الحجي جا كلولي تره نغار ...

عمي: ههههههه لج ام لسان

ياس: اتذكرت قبل معلمتنه ام القراءة جانت القاف تلفظها غين والغين تلفظها قاف يعني ماتكول غزالة لا كله قزاله ..

ضحكوا عمي وعمتي فكتلهم :

هسه عمي طلع قيار يقار من عدنه ....

عمي بيومها فطس من الضحك ..

وكلما يلاكيني بالبيت يضحك ..

وعمتي عجبتها الكلمة ظلت كلما تشوف عمي تكلها :

ها القيار ...

آخر ايام قبل الامتحانات اضطريت الجأ لكرم حتى يشرحلي

كم حاجة ...

جان كاعد يشرب جاي يم عمي وعمتي كلت خل استغل الفرصة واروح اكله ..

رحت كعدت يمه وكتله:

كرم؟

التفتت علي كلي:

نعم؟

ياس: اكو شغلات ماجاي افتهمها ... يعني شكد درست وحاولت استوعب بس دماغي مجيم ..

باوعلي كلي:

دماغج شنو؟

ياس: مجيم ... مزنجر يعني ..

كرم : مصطلح جديد منين تجيبين هالكلمات ..

ياس: امي .. عمتي رسمية .. جدتي الله يرحمها ... عاد جدتي الله يرحمها جانت قاموس ماكو كلمة غريبة ماتعرفها هههه ..

كرم : يعني تردين اشرحلج؟

هزيت راسي اي واتمسكنت شوية حتى اكسر خاطره ..

كرم : يالله اوك .. جيبي كتبج وتعاي ..

ياس: هسه طيارة ..

رحت اركض جبت كتبي وزعابيلي وكعدت بالكاع بسطت ..

ياس: يالله ..

كرم : وين ؟ شيكعدني هنا امشي هناك عالطاولة او امشي بالمطبخ على ميز الطعام ..

ياس: لا لا عليمن مايستوجب ... تعال انت بس تعال هنا يمي والله احسن ..

كعد يمي وهو يتأفف ...

كرم : امري لله ... شعندج مافاهمته خلي اشوف ؟

طلعتله وبدا يشرحلي وانه صافنه عليه ..

ليش هنا انت حنون وصوتك دافي ؟

ليش تضحك وتسولف وياي واحسك تحبني ومن تصعد وياي تكش مني ؟

زين ليش متحملني اذا ماتريدني؟

انت رجال وتكدر تطلكني ماكو شي يمنعك ...

مو مثلي ... محد راح يوكف بجانبي .. ولا اكو احد راح يساعدني ولا اكدر يمكن اعيش بدونك ..

انت مو مثلي مامربوط من كلبك الي مثلما انه مربوطه الك ...

ليش؟

متعبني بعشرتك وبمحبتك ليش؟

مااشوفك شخصيتك ضعيفة ... شلون انفرضت عليك ؟

ماادري شسويلك حتى ترضى ..

حسيت بي يحاجيني بس تركيزي معدوم ..

لزم ايدي انتبهت كال:

شبيج؟ وين صافنه ؟ احجي واشرح وانتي بغير عالم ...

ياس: هاا ... ماكو شي ..

كرم: شتفكرين وراج امتحان ..

ياس: بيك ...

كتله بهمس ..

باوعلي متفاجأ بقى ساكت التفتت على عمي وعمتي جانوا يباوعون عالاخبار ويسولفون سوه ويضحكون ...

رجع باوعلي كلي:

شبيه؟

ياس: ماادري ....

كرم : بس اني ادري انتي شبيج ..

ياس: شبيه؟

كرم : بعدين اكولج ...

ياس: لا كول ..

كرم : لا هسه خل ندرس بعدين اكولج ..

ياس: خوش ...

رجع يشرحلي ويفهمني بس المشكلة انه منيلي صبر واتحمل يكلي بعدين ..

ياس: اوكف .. اوكف شوية ..

كرم : شنو؟

ياس : عفية كلي هسه شيصبرني لبعدين ..

ضحك على كيف وكلي:

اذا ماتدرسين وامتحنج وتجاوبين مااكولج اي شي ..

ياس: لا عفية لا شبيك لاتصير نحيس ..

كرم : طلعت نحيس .. اممم خوش .. تمام اشوف منو يكولج بعد ...

ياس: لا لا لا والعباس بعد مااحجي اها شوف ..

كرم : اوك .. خل نكمل ...

هو يشرح وانه احوس افكر بكلبي شراد يكلي ياربي شوكت يخلص هالشرح الاسود اففففف ..

كرم : شبيج تتأففين ... دتفتهمين علي شنو جاي اكول لو لا تره بعدين امتحنج ؟

هزيت راسي اي مااريد احجي اخاف اجفص ..

كرم : تمام نكمل ..

ياس: جا غير يخلص الدرس انكطع كلبي ..

كرم : تره دوختيني ... اكمل الدرس لو لا؟

ياس: لاااء ... يولي مااكدر اصبر واعرف شبيه مو كتلي تكلي بعدين؟

كرم : كتلج من يخلص الدرس ..

ياس: جا ماخلص ؟..

كرم : لا بعد من تفتهمين وتستوعبين يخلص ..

ياس: خرب على كيفك كرم مو هيج همزين انت مو معلم جا كطعت كلبي .. عفيه .. عفيه ..

ضحك كال :

شكو ؟ شنو شتردين؟

ياس: كول شنو ردت تكول علي مساع ؟

لزم ايدي وانتهد كلي :

اوك تعاي وراي بدون صوت ..

راح وانه لميت كتبي ورحت وراه اركض ...

شفته صعد فوك صعدت ..

بس مادخل للغرفة بقى واكف بالباب ..

وصلت يمه كتله :

شكو؟

سحبني من ايدي للغرفة الثانية دخلنه وسد الباب ..

ظليت واكفه مستغربة ومتانية ..

ظل واكف يباوعلي ..

ياس: جا غير يحجي زرف كلبي ...

ضحك حيل وباس ايدي ...

اتعجبت ...

لحظات حسيت نفسي يمكن بحلم مو حقيقة ..

كلي:

شبيج؟

بلعت ريكي اخاف احجي خاف يخلص الحلم هزيت راسي ماكو شي ..

كرم : اشو سكتي مو جنتي ماكله راسي ومدوختني جوه ترديني تعرفين شبيج؟

هزيت راسي اي كال:

مابيج شي ...

مد ايده على شعري فتحه ...

كلبي ظل يدك .. من كدما يدك خفت لايطلع من صدري خليت ايدي على كلبي كال:.

شبيج ..

كتله بسرعة :

ماادري شو كلبي ظل يدك ..

ابتسم ابتسامة الها معنى واحد ...

يحبني ...

معقوله؟

لزمت ايده وخرتها من شعري كتله:

عفية مالي حيل تشلع كلبي كرم ... تعبت ...

حضني كلي بهدوء:

اني هم تعبان ... ومشلوع كلبي ..

وخرت شوية كتله :

اي ليش؟

رجع حضني وخله راسي على صدره كلي:

مااريد احجيلج واضوجج ..

ياس: انه قابله ضوجني ... بس اريد اعرف شبيك وارتاح ...

كرم : اشششش ...كافي حجي ...

سكتني ... بقى حاضني وانه صافنه والف فكرة براسي وكلبي محترك عليه الى ان كلي:

بطلتي؟ متردين تعرفين شبيج؟

ياس: شبيه؟

كرم : تحبيني ...

ياس: هااا؟

كرم : انتي تحبيني ...

وخرت كتله بعصبية :

شو وخر .. وخر الله يطيك .. صارلي (٣) ساعات اتوسل بيك عبالي عدك شي بي حظ ..

جرني من ايدي حيل كلي وهو يضحك :

ماعجبج الحجي؟ هسه طلع شي مابي حظ؟

ياس: لا لان خبر قديم هذا اقدم من راس البصل ...

رجع ضحك كال:

بس اني توه يالله عرفت بي ..

قهرتني حجايته كتله بكسرة خاطر :

لان انت ماعدك احساس ...

بقيت واكفة متانية الكفخة بس ماحجه شي ولا كفخني بالعكس رجع حضني حيل وكلي:

ظالمة ... انتي ظالمة ...

ماهان عليه ينطقها ويكلي احبج ..

ماراد يريحني ويسمعنياها ولو مره ..

ويكلي ظالمة ...

منو الظالم انه لو انت ؟

كل هذا وظالمة ؟

ياويل كلبي ...

حضنته وخليت راسي بصدره حتى لاتطيح دمعة كدامه ..

بس جان كرم مو نفسه كرم ...

هذا كرم مختلف ....

ومااعرفه شنو بس حسيت بي من كلامه وتصرفاته ...

كرم : ياسه؟

ياس: هاا؟

كرم : كم كتلج لتكولين هاا كولي نعم ..

ياس: اهووو انسى .. يالله نعم ..

كرم : شكد تحبيني ؟

بقيت ساكته كال:

احجي؟

ياس: ماادري ... يمكن هواي ويمكن شوية ..

كرم : زين كوليها ..

ياس: شكول؟

كرم : كولي احبك ..

ياس:مااكدر ...احس هاي الكلمة بردت على لساني مالي واهس اكولها بعد ..

باوع لوجهي بعصبيه وكلي:

ليش؟

ياس: ماادري .. يمكن لان ماحسيتك بيوم انت تحبني ...

كرم : والله؟

ياس: والله ..

لزم وجهي حيل بيده و ..

.

.

.

.

كيف هو الامل ؟..

وها انا تحت رحمة من لايعرف الرحمة ..

اتحرق شوقا للمسة تحملني فوك السحاب ..

تعبر لي عن حب يأست من وجوده ..

وتحملني كلماته بعيدا عن عالمي ..

فانا الان اميرة لاميري ..

اميرة كالقصص تنام لاعوام بسبب تفاحة مسمومة لتصحو على قبلة من أميرها ..

تغير الزمن ..

قبلة ابتدأت بالنظرات لتنتهي كما تنتهي ليلة عروس ملكية ..

في قصر ذهبي عاجي كأنني في جنة الخلد ..

وتطوف علي فراشات ملونه ..

وتحتضنني الورود والازهار والزنابق ..

وارتوي بنهر من القبل ..

هذا هو الامل ..

....................................

مااتمنيت هالليلة تخلص ..

ليلة جانت احلى من ليلة عرسنه ...

شفت بيها كرم الشفته بس بليلة العرس ..

كرم الموجود جوه يم اهله ولو صعد يصعد بس جسد ...

غفيت ..

رغم بعدني اسمعه يهمس بأذني كلمات حلوة ..

مااريد اكعد ..

مااريد افتح عيوني ..

باس خدي كلي:

لتنامين .. عندي هوايه حجي ...

ماادري شخربطت شحجيت بس اتذكر كتله :

احبك .. واريد ابني يشبهك ...

حسيته ضغط على ايدي حيل وكلي بصوت قوي:

لتنامين ... كعدي

فتحت عيوني كتله :

لا عفية احضني خل انام بحضنك شوية ...

لزم وجهي حيل وداره عليه كلي:

تتذكرين من شفتج وشفتيني عد بيت امير ابن عمي ...

باوعتله ووخرت ايده لان اتعورت كتله:

لا .. شوكت؟

كرم : اول مره اجيتكم بيها ولبستي العدسه والتهبت عينج ..

ياس: اي اتذكرت ورحنه للطبيب ورجعت وانت جنت خاتل بالزوية هههه ..

اتغيرت ملامح وجهه وكلي بنبرة غريبة:

شنو سوالج الطبيب؟

ظليت اباوعله هذا من كل عقله؟

هسه وكته؟

ياس: شسوالي .. ماسوالي شي؟

كرم : لا سوالج .. اجيتي وجهج اصفر وفهيمة انتبهت ووكفت بالزوية ورادت تعرف شبيج شسوالج الطبيب بس ماحجيتيلها ..

ياس: مااتذكر ..

كرم : لا تتذكرين

ياس: شتذكر قبل كم سنه تحجي صدك انت؟ شجابه على بالك شذكرك بي ؟

كرم : فضول ... بس انتي تتذكرين ماناسيه ... المواقف المؤذية ماتنسي مو صح؟

بمنتهى الثول مو براءة لا غباء ..

كتله :

اتحررش بيه ..

رأسا كعد وسحبني من ايدي بكل قوته حسيت ايدي انشعلت كتله:

آآخ ايدي ..

كرم : شلون اتحرش بيج ... شسوالج يعني؟

جريت ايدي منه كتله بعصبية:

راد يكض ايدي وكفخته راشدي ..

ظل يباوعلي شوية بعدين كلي:

انتي تعرفيه قبل؟

ياس: قبل وين يعني؟ ماافتهمت ..

كرم : يعني رايحتله قبل ذيج المره شايفته تعرفيه منو هو وين بيتهم اصله فصله ؟....

ياس: لاء شسوي رايحتله اصلا هي هاي جانت اول مره البس العدسة وورمت عيني واخوي هو الوداني مارحتله بكيفي ولا اعرفه ولارايحتله كبل ... ليش شبيه؟

كرم : الرجال مايتحرش بمره الا اذا هي اطته مجال ...

يمه ... حسيت الكاع افترت بيه ...

هذا اليريد يوصله كرم ...

هذا اليريد يكوله ...

صدك حسيت دخت ... بس اتماسكت ومثل ماسويت ويه الطبيب سويت وياه :

...

ياس: انه ياسه .. ينحلف بأسمي وسمعتي وشرفي ... مو انه الباوع عالرخيص ..

كمت ردت اطلع جلب بيه وكلي بصياح :

اوكفي .. ماخلصت حجيي

ياس: مالي حجي وياك بعد ..

طلعت طلع وراي صاح :

اوكفي لج .....

ياااسه ؟

درت عليه كتله بعصبية وقهر:

مرة الثانية لو ردت تكول اسمي اتوضى بالاول ...

عفته ونزلت ودموعي عشرة عشرة ...

ياويلي ..

ياويلي ..

هذا هم حظي المصخم .يكولون لاتغمين روحج ..

من امداني ...

امداني ..

امداني ..

الف مره ..

شافتني عمتي لزمتني كلتلي :

شبيج تبجين؟

هزيت راسي مابيه شي ..

جرتني من ايدي لغرفتها دخلتني وسدت الباب كعدت وهي ظلت واكفه على راسي:

شبيج؟

ياس: مابيه شي عمه .. ماكو شي بس ضايجة ..

عمتي: شمضوجج؟

ياس: ماكو عمه بس مخنوكة يمكن لان صارلي فترة ماطالعه ومشتاقه لاهلي ..

سكتت بعدين اجت كعدت يمي كلتلي:

خلصي امتحانات واني اخلي عمج ياخذنه ونروح سوه نشوفهم حقج تشتاقيلهم حقج واحنه مقصرين بس لان نشوفهم همه كل شهرين او تلاثه يجون وانتي متكولين اريد اروح ..

هزيت راسي اي ..

بذيج الليلة بقيت كاعدة جوه وحدي كلهم ناموا وانه حجتي اريد ادرس ...

وخوش دراسة درست ..

بجيت بدل الدموع دم ...

بقيت للفجر كاعدة وصافنه مره ابجي ومره اسكت واتذكر حجيه وارجع ابجي ...

.

.

.

الايام البعدها ظليت اتجنبه كللش ..

اظل كاعدة للفجر ادرس والصبح انام ...

مااريد اشوفه ..

حتى من جنت اشوفه جوه جنت اروح للمطبخ واسوي روحي مشغولة ويه جوانا وعمتي ..

واذا اجه ولكاني جوه ادرس جنت اخذ كتبي واروح يم لنى بغرفتها ..

لو اروح ادخل لعمي للغرفة بحجة يشرحلي ..

الى ان اجت الامتحانات ...

جان عمي ياخذني امتحن ويبقى يتانيني بره يم باب المدرسة ..

يومية جنت اطلع ابجي من الامتحان واكله مامجاوبه ..

وارجع للبيت اكمل البجي ..

الى ان خلصت الامتحانات وطلعت النتائج ونجحت ..

نجحت ...

ظليت اكمز من طلعوا اسمي ناجحة ظليت اطفر والجهال يطفرون وياي ...

جان عدنه ريم حماتي وجهالها ..

ريم : حبيبتي ياسه مبروك .. يوم نفرح بخبر حملج ان شاءالله ...

وكفت باوعتلها كتلها :

مااريد ..

حسيت عمتي اتفاجأت من حجايتي وضاجت كالت:

لا على بختج يووم شنو هالحجاية ... كولي يارب لتكولين مااريد شنو احنه مانريد حفيد بهالبيت هالكلمة بالذات اذا كلتيها مره ثانية ازعل عليج ...

ابد لتكوليها النعمة من تندفر مره بعد ماترجع الله يخلي الانسان يتحسر عليها ..

ماادري شغثها من الحجاية بس صدك اتفاجأت برد فعلها وعصبيتها ...

حسيت بالاحراج المره زينه وياي ومداريتني وحاسبتني مثل بناتها وتحبني دنكت على راسها وبسته كتلها:

مو قصدي ... بس اريد بعد اكمل دراسة يالله ..

عمتي: كملي عليج بالف عافية ... بس حفيدي هم اريده شوكت مايجي هلا بي ..

ابتسمتلها كتلها:

ولايهمج .. هلا بي ..هلا بي ههههه ...

ريم : يالله كوموا كافي حجي .. خلونه نطلع نحتفل بهاي المناسبة .. خل نروح نتعشه بره ونتونس ونغير جو ...

عمتي : اي ياسه هم جانت محبوسة بالبيت تدرس حتى التلفزيون الحجي منعها منه حتى تدرس ..

ياس: لحد يذكرني ... فاتتني المسلسل التركي مال هذا الممثل ابو خشم اليخبل ...

ريم : شوف الغزل يالله ..

ياس: شبي الغزل ماسامعة العين ساعة والخشم دلاعه ..

ريم وعمتي ولنى

مساؤو كليباتي ..

بعد كمية القهر والحزن العاشتهم ياسه بهالبارت اجت فرحة النجاح وغيرت ايامها ... فعلا طعم النجاح غير مو مثل اي فرحة ..

الحادي عشر من هنا

تعديل المقال