رواية المنتقبة الحسناء الفصل العاشر 10 بقلم الكاتبة شيماء عفيفي
الفصل العاشر
اقترب من والدتها وقال لها:
- أنا هاستئذنك هاروح أوصل والدى ووالدتى للبيت وهارجع تانى بسرعه عشان أوصلكم للبيت ...
هزت رأسها بالنفى وقالت:
- متتعبش نفسك يابنى
رد بإبتسامة:
- تعبك راحه ، مش هاتأخر عليكم بأذن الله
حسناء - محدثه نفسها:
- ده هايمشى !! أحسن برضو هانرتاح ..
والد أسعد ( عبد الله ):
- على مهلك يابنى أنت سايق بسرعه كده ليه ؟
أسعد باستعجال:
- أسف ياولدى ؛ على العموم أحنا وصلنا الحمد لله أنا هانزلكم قدام البيت وهارجع تانى المسجد عشان أوصلهم البيت بدل مايركبوا موصلات ويتبهدلوا فى الطريق !
والدة أسعد ( أمينه ):
- ربنا يبارك فيك ياحبيبى طول عمرك أصيل وجدع خد بالك من الطريق وسوق على مهلك يابنى
أسعد بإبتسامه:
- ربنا يخليكى ياأمى ويحفظك لينا ؛ متقلقيش يادوبك هاوصلهم وأرجع على طول بأذن الله
أمينه:
- فى حفظ الله
*******
" بعد وصول أسعد قاعة المسجد قال لهم زياد:
- أنا هاروح أوصل مها وعمو سعيد ياأمى وأسعد هايوصلكم للبيت
والدتة:
- ماشى فى رعاية الله ياحبيبى ؛ مع السلامه ياعروستنا
أحتضنتها مها بشدة:
- الله يسلمك ياخالتو
زينب بتكشيرة:
- لا خالتو ايه بأه انتى بقيتى زوجة ابنى يبقى تقوليلى ياماما
ابتسمت وقالت:
حاضر ياماما ..
زينب بسعادة:
- أجمل كلمه سمعتها النهاردة ربنا يقدرنى وأقدر اعوضك حنان والدتك يابنتى
نظرت مها لـ زياد وأبتسمت قائله:
- حنانك وصلنى خلاص ياماما
زينب:
- ربنا يسعدكم يابنتى
أقتربت حسناء من مها وأحتضنتها بشده:
- مبروك ياعروسه
ردت بحنان:
- ربنا يبارك فيكى ياسمسمتى
مد على يده حتى يسلم على والد مها:
- نشوفكم على خير ياعمى ؛ السلام عليكم
سعيد بإبتسامة:
- وعليكم السلام
" ذهب على وزينب وحسناء إلى سياره أسعد , "على" أستقر فى الكرسى الأمامى وزينب وحسناء فى الخلف ؛ ظل أسعد طيلة الطريق ينظر لحسناء فى المرآه ؛ أما حسناء فكانت تنظر الى الشباك وترفع رأسها للسماء كأنها تشكى ما بها فى صمت "
وصل الجميع ، فقال على لـ أسعد:
- تعالى أطلع شويه ياأسعد .
هز رأسه نافياً:
- معلش خليها مره تانيه
تنهد وقال:
- ماشى على راحتك ؛ بس متغبش علينا واسأل !
أسعد بأبتسامه:
- بأذن الله ؛ أستودعكم الله
على:
- فى امان الله ؛ السلام عليكم
أسعد:
- وعليكم السلام
**************************
خلعت زينب حجابها من على راسها ثم نهضت متجه الى غرفتها كى تستبدل عبائتها بجلباب النوم ، وقبل ان تدخل غرفتها نظرت لابنائها بفرح وقالت:
- النهاردة كان يوم جميل فعلا ً بس مرهق أوى هادخل أنام تصبحوا على خير
على وحسناء فى نفس واحد:
- وانتى من أهل الجنه ياأمى ..
على بأهتمام:
- حسناء مالك شكلك زعلان من حاجه ؟
حاولت أن تخفى ما بها بإبتسامة:
- لاء مفيش ياعلى أنا بس عندى صداع هاروح أخد حبايه للصداع وأنام
قال بقلق :
- الف سلامه عليكى ياحبيبتى , يلا تصبحى على خير
حسناء بإبتسامه تخبىء ما بداخلها:
- تلاقى الخير
*******************************
" ضغطت على رأسها بيدها آلم شديد يتخلل رأسها نهضت من الفراش ليلا وأسندت رأسها على حافة السرير ناظرة للسقف "
ضغطت على اسنانها بغيظ وقالت محدثة نفسها:
- أنا مش عارفه ايه اللى سكتنى ومش رديت عليه ازاى يزعق فيه كده ؟ ومين اداله الحق بكده !! أنا كان لازم ارد !!
" فى نفس الوقت ذاته شعر أسعد بآلم شديد فى رأسه ونهض هو الاخر أسند رأسه على حافة السرير وهو يعاتب نفسه قائلا "
- زمانها بتقول ايه عليه دلوقتى ازاى أشخط فيها جامد كده المفروض أعتذر لها طيب هاعتذر لها ازاى وفين ؟! , فكره أنا أروح لها الكليه وأعتذر لها وأمشى على طول ؟!!
" ثم استكمل نومه وصوره حسناء وهى تبكى لاتزال أمام عينيه"
أما حسناء نهضت وذهبت توضئ جهاز الكمبيوتر فقالت محدثه نفسها:
- ياااا انا بقالى كتير مش فتحت الأكونت ايه ده كل دى رسايل , وما أن لبثت بفتح الرسائل ، لفت انتباهها رساله من الذى يدعى " توبه رجل " !!!
" توبه رجل ":
- آلف مبروك لكتب كتاب أخوكى وعقبالك عن قريب بأذن الله .
عقدت حاجبيها بدهشة:
- ايه ده ؟ ومين ده ؟ وعرف ازاى أن زياد كتب كتابه !! أكيد ده حد يعرفنى كويس جدا ؟! أنا هارد عليه وأسأله هو مين ؟!
" السلام عليكم ورحمه الله وبركاته ؛ ممكن أعرف حضرتك مين ؟!
" دق قلبه وارتعشت يده ، فكم كان مشتاقا ً لها ويتمنى الرد عليه "
توبه رجل:
- وعليكم السلام ورحمه الله وبركاته ؛ مش مهم أنا مين المهم تكونى بخير وسعيده
رفعت حاجبها الأيمن بتعجب وقالت:
- ازاى مش مهم لو مش قلت حضرتك مين ؟ أنا هاعمل بلوك لحضرتك !!
توبه رجل بخوف:
- أرجوكى بلاش سبينى أعرف أخبارك وأطمن عليكى من كلماتك الجميله دى ؛ انتى ليكى مستقبل جميل أوى فى الكتابه
تنهدت بعصبيه وهى تكتب :
- مصمم برضو ؛ على العموم أنا غلطانه انى رديت على حضرتك ومش عملت لك بلوك من الأول ..
توبه رجل:
- سامحينى مش هاقدر
" ضغطت على زر حظر هذا المستخدم وأنتهى الأمر؛ لكنها مازالت تفكر ؛ ياترى مين ؟!!
بدأت تتثأب ، وبدأ النوم يداعب جفونها فأطفأت جهاز الكمبيوتر وأرتمت على سريرها الى ان غفت عيناها ثم غطت فى النوم . . . .
ويطوى اليوم بكل ما فيه من أحداث ..
*********************
" بعد مرور أسبوع "
أتى يوم جديد ينبعث منه نافذه تطل على العالم بـ وجه متفائل وأحداث تغير مجرى حياة حسناء بالكامل فيما بعد "
" ذهبت حسناء الى الكليه لكى تجمع كل ما فاتها من محاضرات ولم تدرى أنه اليوم الذى يتغير مسار حياتها فيه بعد ذلك للأجمل ؛ ويبعث لها الله سبحانه وتعالىَ رسالة جميلة تتفهمها بكل تفاصيلها "
- كده يامها تسبينى أروح لوحدى الكليه ولا كل اللى بيتخطبوا بيكسلوا كده؟!!
قالت مها وهى ممسكه بالهاتف:
- سامحينى ياسمسمتى بأه ؛ وبعدين النهارده يوم طويل أوى والمحاضرات بتبدأ الساعه 2 الظهر !
قالت بغيظ:
- عندك حق ايه المشكله لما يعملوا المحاضرات بدرى ؛ حاجه رخمه أوى
زفرت بشدة :
- معلشى هانت ؛ ابقى طمنينى عليكى اما ترجعى بالسلامه !
تنهدت قائلة:
- بأذن الله مع السلامه
