رواية قلب الرفاعي الفصل الثاني والخمسون 52 والاخير بقلم لميس عبدالوهاب

رواية قلب الرفاعي الفصل الثاني والخمسون 52 والاخير بقلم لميس عبدالوهاب

قلب الرفاعي
الحلقة الثانية والخمسون والاخيرة
بعد مضي عدد كثير من الاعوام جلس ادهم الى طاولة الطعام حتى وجد من انحنت لتقبل راسه هامسة :
_صباح الخير يا بابا يا حبيبي
ادهم باسما :
_صباح الخير يا شقية انت كنت فين امبارح طول النهار انت والواد خالد ابن حازم
هدى :
_كنا بنشتري شوية حاجات عشان الشقة انت عارف معدش حاجة على الفرح
ادهم :
_ ربنا يهنيكي يا حبيبتي لو عوزتي فلوس قوليلي يا هدى
هدى :
_تسلملي يا حبيبي معايا والله
سلمى الاتية اليهم :
_يا سلام كل الدلع ده لهدى طب وانا يا سي بابا
ادهم :
_انت حبيبة بابا يا لوما
سلوى الاخت التوأم لسلمى :
_وانا يا بابا
ادهم :
_انت روح بابا يا سولي
هدى بمكر :
_جرى ايه يا بابا الدلع ده كله لينا والحاجة اللي وراك دي ايه ؟
فالتفت ادهم هاتفا :
_دي بقى عمري كله اللي جاي واللي راح
سلمى :
_ادهم ..البنات عيب
ادهم بجدية زائفة :
_بنات يالا كله على برا
هدى :
_يالا يا بنات من هنا خلو بابا يهدى كدة ويروق
سلمى :
_بنت ..عيب
هدى :
_ايه يا حبيبة قلبي عادي يعني الحاج عاوز يقعد شوية مع المزة بتاعته عادي ولا عاوزاه يبص برا
تعالت ضحكات ادهم هاتفا :
_قوليلها يا هدى
سلمى بغضب :
_والله بقى ساعدتك عاوز تبص برا ؟
سلوى :
_بس يابت ياهدى ما يقدرش يا ماما دا انت الحتة اللي في الشمال
سلمى :
_والله عال البنات بقوا معلمين يا دكتور
ادهم ضاحكا :
_دكتور ايه بقى ..لما بناتي يبقوا معلمين ابقى انا اكيد رئيس عصابة طبعا
سلمى (الصغيرة ):
_عيب يا جماعة كدة وبعدين سيبوا الحاج شوية حرام انتم مزنقين عليه ليل نهار يابنات
سلمى بغضب :
_كدة انت كمان يا سلمى طب والله لاعيد تربيتكم تاني يا جزم
وهمت ان تقوم فصرخ الثلاثة وهن يتجهن للاختباء خلف ادهم وهتفت سلمى (الصغيرة ):
_الحقنا يابابا
سلوى :
_دا احنا بناتك بردو
هدى :
_اتصرف يا حاج هناخد علقة هنتبعتر فيها يا حاج عيب
فاسرع ادهم لسلمى التي قامت فعلا لبناتها وامسكها من خصرها حاكما ذراعيه حولها هاتفا :
_اخرجوا يا بنات بسرعة قبل ما اسيبها
سلمى :
_سيبني يا ادهم البنات دول محتاجين اعادة تربية
هدى :
_يا ماما بنهزر والله
سلمى :
_بتهزروا ..طب وانا بهزر معاكم كمان بس بطريقتي ...بقولك سيبني يا ادهم
سلوى :
_طب خلاص حقك علينا بقى
سلمى (الصغيرة ):
_قلبك ابيض بقى يا ماما
ادهم :
_خلاص بقى يا سلمى حقك عليا
سلمى بعند :
_لا يمكن بقولك سيبني عليهم
ادهم :
_بقول ايه انتم تخرجوا احسن يالا لحسن خلاص هسيبها
فخرج الثلاث فتيات ضاحكات الكبرى متجه لعملها والاخريات لجامعتهما والتفت ادهم لسلمى هاتفا بعبث :
_ما تيجي على الاوضة عاوزك في موضوع
سلمى :
_عيب يا ادهم مش كفاية دلعك في البنات
ادهم بحنق :
_هو ايه اللي عيب ؟
سلمى :
_احنا كبرنا على الكلام ده يا دكتور
ادهم بغيظ :
_اه كبرنا لا عندك حق تصدقي
ثم انحنى لاسفل حاملها على كتفه في حركة خاطفة وهو يهتف :
_انا هوريكي يابنت عبد العزيز مين ده اللي كبر ...ياقوي
ثم اتجه بها لغرفتهما متجاهلا تماما هتافها من خلفه ان ينزلها فورا وفي غرفتهما استطاع ان يخبرها بحق بمدى كبرهما فعلا
**************************
في مكان اخر وعلى طاولة الافطار ايضا هتف ادهم :
_بابا لو سمحت انا عاوز اخطب سلمى بنت عمو ادهم
احمد بسعادة :
_يا سلام ده يوم المنى يا ادهم خلاص النهاردة هكلمهولك
ادهم :
_بجد يا بابا
مها :
_بجد يا حبيبي سلمى متربية ومؤدبة وكفاية انها بنت ادهم وسلمى
احمد ضاحكا :
_حلوة دي
مها :
_مالك في ايه ؟
احمد :
_الواد ابنك هيعيد قصة حب ادهم وسلمى
سها :
_انا عاوزة اعرفها يا بابا
مها :
_عيب يا سها لما تكبري
سها :
_يا ماما انا في اولى جامعة يعني مش صغيرة
احمد :
_هي فعلا مش صغيرة يا مها ..سها بقت عروسة وبيجيلها العرسان
مها :
_عرسان ايه ؟
احمد :
_يوسف كلمني امبارح عاوزها لعبد الرحمن ابنه
مها :
_وانت رايك ايه ؟
احمد :
_انا عن نفسي موافق جدا ...الولد محترم وراجل زي ابوه بالظبط بس المهم راي سها
سها بخجل :
_اللي تشوفه يا بابا
احمد :
_خلاص على بركة الله ...انا هكلم ادهم ولو وافق هنعمل الخطوبتين سوا
مها ضاحكة :
_قصدك الثلاثة سوا
احمد :
_ليه مين الثالث ؟
مها :
_انت ناسي ان اسر ابن مدحت ونجلاء طلب ايد سلوى بنت ادهم توأم سلمى
احمد :
_بابا وماما هيفرحوا جدا لما يرجعوا من الحج ويعرفوا الاخبار الحلوة دي
مها :
_ربنا يرجعهم بالسلامة ياارب
***********************************
بعد عدة اسابيع عاد ابراهيم ورقية وفاطمة وعبد العزيز من الاراضي المقدسة وتمت حفلة الخطوبةالثلاثية (ادهم احمد +سلمى ادهم ) ( عبد الرحمن يوسف +سها احمد ) (اسر مدحت +سلوى ادهم ) وفيها اجتمع الاخوة والاصدقاء لتذكر ذكرياتهم الجميلة فهتف احمد :
_مش بيفكرك اليوم ده بحاجة يا ادهم ؟
ادهم :
_وهو ده يوم يتنسى
يوسف :
_اه والله اجمل يوم في حياتنا كلنا
مدحت :
_ربنا يحلي ايام ولادنا يارب ويهنيهم
حازم :
_بقول ايه الواد خالد عاوز يتجوز بقى يا سي ادهم ما تحن عليه يا جدع
ادهم ضاحكا :
_ماشي ياعم وماله دا انا بحلم باليوم اللي هفرح بيه بهدى بنتي الكبيرة
حازم :
_الايام جرت بسرعة قوي يا جماعة الولاد كبرونا ولاد الايه انا فاكر هدى دي وهو بتخبطني في رجلي عشان تدافع عنك يا ادهم فاكر
ادهم ضاحكا :
_اه قصدك يوم ما سلمى ...
حازم مقاطعا :
_خلاص ياعم انت هتسيح ولا ايه
سلمى :
_اه طبعا عشان تعرف بس ان بنات ادهم الرفاعي مش أي بنات
حازم :
_ليه يعني هما طالعين ليكي ولا لادهم ؟
سلمى :
_لينا احنا الاتنين بس خلي بالك لما بيقلبوا
ادهم :
_ياساتر يارب عارف النمور يا حازم تبقى قطط وديعة جنبهم
حازم :
_سلام قولا من رب رحيم يا خالد ...تعالى يا خالد انا هشوفلك عروسة تانية انا مش مستغني عنك يابني
هدى بثقة :
_ميقدرش ياعمي اللي يقع في حب بنات الرفاعي ميقدرش يبعد تاني ولا ايه ياخالد
خالد :
_حصل يا حبيبتي وعلى يدي
فتعالت ضحكات الجميع ...
*************************
بعد عدة اشهر خاطفة دخلت سلمى لمنزلها مرهقة هي وادهم فجلست لاقرب مقعد هاتفة :
_اخيرا يا ادهم البنات اتجوزوا
ادهم :
_الحمد لله يا حبيبتي ادينا رسالتنا واطمنا على بناتنا
سلمى :
_نفسي اطمن على هدى خايفة عليها قوي
ادهم :
_ليه بس ما هي الحمد لله كويسة مع خالد
سلمى :
_حملها تعبها قوي
ادهم :
_يا ستي ان شاء الله خير وبعدين ما خالد معاها ومتنسيش انه دكتور بردو
سلمى :
_لا بس بحسه كدة ضعيف مش مسيطر كدة زيك
ادهم ضاحكا :
_ههههه حلوة مسيطر دي
سلمى :
_انا بتكلم بجد انا فاكرة اد ايه كنت بتتالم على المي واحنا في السعودية ومع ذلك كنت بتظهر قدامي انك مسيطر بقوة على كل شيء حتى ضعفي وانهياري
ادهم :
_انا كنت بموت في اللحظة الواحدة ميت مرة وانا شايف انهيارك وضعفك ده
سلمى :
_الحمد لله ان ربنا رزقني بيك يا حبيبي
ادهم مقبلا يدها :
_ربنا يحفظك ليا يا حبيبتي انا وهدى والتوأم سلمى وسلوى ..كلنا من غيرك ولا حاجة ياعمري
سلمى بخجل :
_بحبك و...
قاطعها رنين هاتف ادهم فنظر له ثم هتف ضاحكا :
_شوفتي جبنا في سيرة القط جه ينط
ادهم :
_السلام عليكم ايه يا خالود لحقت اوحشك
خالد :
_عمي هدى تعبانة قوي وانا مش عارف اتصرف
ادهم :
_ايه ؟مالها هدى طب خدها على المستشفى وانا هحصلكم على هناك
خالد :
_احنا في المستشفى بس الولادة متعسرة وهي منهارة وعاوزاك
ادهم :
_اهدى يا خالد احنا في الطريق مسافة السكة
سلمى :
_في ايه هدى مالها ؟
ادهم :
_يالا ياسلمى باين هتبقي تيتة الليلة
سلمى :
هدى بتولد !!
ادهم :
_ايوة يالا بينا
وانطلق ادهم وسلمى الى المستشفى وهناك وجدوا خالد يقف يبكي خارج غرفة العمليات فهتفت سلمى :
_بنتي فين ؟هدى فين يا خالد
خالد :
_في العمليات يا طنط
سلمى بغضب :
_وانت مش معاها ليه انت مش دكتور
خالد بانهيار :
_مش قادر اشوفها بتتعذب كدة مش قادر
ادهم وهو يجذبه بقوة :
_استرجل يا خالد واجمد هي دلوقتي محتاجاك قوي تقدر تعتمد عليك عشان متنهرش هي كمان ...اتفضل قدامي
خالد :
_على فين ياعمي ؟
ادهم :
_على العمليات يا دكتور
خالد :
_لا لا مش هقدر هفقد اعصابي
سلمى بياس :
_سيبه يا ادهم وادخلها انت ابوس ايدك هي بتحبك وهتستمد منك قوتها
نظر ادهم لخالد باشمئزاز ثم تركه واندفع لغرفة العمليات وفي الداخل هتف :
_ايه الوضع يا نجلاء ؟
نجلاء :
_الولادة متعسرة لازم تولد قيصري
ادهم :
_بس هدى بتتعب من البنج
نجلاء :
_هديها بنج نصفي
ادهم :
_بس ده مؤلم مش هتتحمل
نجلاء :
_ده بقى دورك مش هتسمع الا ليك انت
اتجه ادهم نحو هدى التي كانت مسطحة على سرير العمليات تئن من الالم بعد ان فقدت صوتها من كثرة صراخها فهتف ادهم :
_هدى حبيبتي اجمدي هانت كلها شوية وهتبقي ماما
هدى بالم :
_مش قادرة يا بابا انا بموت ااااه
ادهم :
_استحملي شوية عشان خاطري بصي ياهدى شكل الولادة كدة محتاجة جراحة ولازم بنج
هدى :
_هتألم مش كدة
ادهم :
_حبيبتي انا معاكي مش هسيبك بس ساعديني
ولحقت بهم نجلاء واكرم واثنتين من الممرضات ليساعدوها لتجلس فهذا الوضع يحتاج لبنج نصفي (أي حقنة المخدر تؤخذ في الظهر )
هدى :
_بابا هما هيعملوا فيا ايه
ادهم :
_هدى خليكي معايا بوصيلي يا هدى كلها شوية صغيرة وان شاء الله البيبي هيجي للدنيا استحملي
كشفت احدى الممرضات ظهرها وتم تعقيمه ففوجئ بها الجميع تصرخ :
_استنوا بابا خدني في حضنك يا بابا عشان لو مت اموت زي ما عشت طول عمري في حضنك
ضمها ادهم والدموع تلمع في مقلتيه هاتفا :
_لا يا هدى ..ان شاء الله كل شيء هيعدي على خير استحملي ياعمري هانت
وتم حقنها بالمخدر لتطلق صرخات متتالية من الالم وهي تتعلق به اكثر وتدفن وجهها في صدره لتعمق تلك الصرخات داخل قلبه وما ان انتهى اكرم حتى اعادوها لوضعها وظل ادهم بجانبها يتحدث اليها حتى انتهت نجلاء من الجراحة واخرجت طفل جميل للدنيا وسرعان ما غابت هدى عن الوعي فجن جنون ادهم داخل غرفة العمليات لقد نزفت كثيرا وحاولوا اسعافها بشتى الطرق ولكنهم لم يستطيعوا ففقدوا الامل ولكنه لم يفقده ..انها ابنته ...اول فرحته حاول معها كثير بل لقد عمد الى نقل دماء لها من دمائه هو ..ظل يحاول ويحاول ومعه نجلاء حتى عادت للحياة مجرد ان سار دمه في عروقها فتنهد بارتياح وهو يقبلها على راسها هاتفا :
_مش هتروحي مني ..انت بنتي انا وحته مني انا ومش هسيبك تضيعي مني
ونقلت هدى لغرفة عادية مع وليدها وخرج ادهم من غرفة العمليات وهو متعب يكاد يسقط ارضا من شدة ارهاقه فجلس لاقرب مقعد واندفعت اليه سلمى تبكي بحرقة وهي تحتضن وجهه بين يديها لتقبل راسه ثم ضمته لحضنها هاتفة :
_كنت عارفة ان بنتي بخير طول ما انت معاها ياابو هدى
ادهم بدهشة :
_ابو هدى !!اول مرة يا سلمى تقوليلي كدة
سلمى :
_في الاول كنت ابوها اللي مربيها لكن دلوقتي هدى حتة منك يا ادهم ودمك بيجري في عروقها
ادهم :
_طب سيبك من كل ده ويالا عشان نطمن عليها يا تيتة
سلمى ضاحكة من بين دموعها :
_حاضر يا جدو
ودخلوا غرفة هدى التي كانت مازالت نائمة وبجانبها خالد وحازم واماني زوجته وبجانب السرير كان يقبع الصغير في سريره الخاص به
سلمى :
_هي لسة ما فاقتش
خالد :
_لا لسة انا متشكر قوي لحضرتك يا عمو على اللي عملته مع هدى
فنظر له ادهم بغضب ولم يرد فتدارك حازم الموقف هاتفا :
_ايه يا خالد عيب كدة انت بتشكر ادهم انه انقذ بنته ..انت عبيط يابني
اماني بعجرفة :
_ليه يا حازم عادي يعني ماهو مش باباها الحقيقي يعني
سلمى بحدة :
_لا باباها يا اماني وهدى ملهاش اب غير ادهم
حازم :
_يا جماعة صلوا على النبي احنا جايين نطمن على البنت ونشوف العسل ده اللي خلانا جدود ولا ايه يا ادهم
ادهم :
_عندك حق يا حازم فعلا بقينا جدود وكبرنا
اماني :
_لا معلش يا دكتور ادهم المولود يبقى حفيد حازم من صلبه لكن اسفة يعني ...
هدى مقاطعة بتعب :
_وحفيد بابا ادهم يا طنط
فالتفت الجميع لها واتجه اهم لها ليقبل جبهتها هاتفا :
_حمد الله على سلامتك يا هدهد والله وعشت وشوفت اليوم اللي بقيتي فيه ام يا شقية
هدى بضحك :
_وانت جد يا سي بابا
سلمى وهي تقبلها :
_حمد الله على سلامتك ياعمري
هدى :
_الله يسلمك يا ماما
حازم :
_حمد الله على السلامة يا هدى
هدى :
_الله يسلمك ياعمي
اماني :
_ قولي يا خالد هتسمي المولود ايه انا بقول نسميه ...
هدى مقاطعة :
_ادهم
فنظرت لها اماني بغضب وسط دهشة الجميع حتى خالد الذي لم يعلم بذلك من قبل فهتفت اماني بغيظ :
_ياسلام واشمعنى ادهم يعني وليه ميكونش حازم
هدى :
_معلش يا طنط واعذرني يا خالد بس انا كنت حالفة بيني وبين نفسي اول مولود ليا ولد هيكون ادهم على اسم بابا
اماني :
_مش للدرجة دي يعني ياهدى ما هو خالد بردو ابوه ومن حقه يسميه
سلمى :
_وماله اسم ادهم يعني يا اماني وحش ولا مش عجبك
خالد :
_ايه يا جماعة اهدوا شوية خلاص حصل خير احنا نشوف اسم تاني
هدى بحزم :
_انا ابني ادهم ومش هيتغير يا خالد
حازم :
_خلاص يا حبيبتي خلاص يا خالد اسم ادهم حلو بردو
ادهم :
_مفيش داعي لكدة يا هدى سميه اسم تاني يابنتي
هدى بدموع :
_لا والله ابني ما هيكون غير ادهم يمكن ربنا يكرمه وياخد جزء من اخلاقك يابابا ..انا عشت عمري كله بتعلم منك ونفسي ابني يبقى زيك في اخلاقك النادرة دي
ادهم وهو يحتضنها بقوة :
_ربنا يباركلك فيه يابنتي ويسعده ويجعله ذرية صالحة ليكي ولابوه
وحمله ادهم بين يديه دامع العينين هامسا :
_تعالى يا سي ادهم انت بقى اللي كبرتني وخلتني جدو اوام كدة ...ماشي ياعم وانا بقى مش هسيبك ابدا ماشي ياهدي
هدى وهي تمسح دموعها :
_وانا وابني ملكك يابابا
فخرجت اماني من الغرفة غاضبة متوعدة في حين اطلق حازم عدد من المشاحنات المرحة مع ادهم ليفك جو التوتر السائد في الغرفة في حين كان خالد ذات الشخصية السلبية صامتا كالعادة
ولذلك فلقد تربي ادهم تحت يد ادهم الرفاعي وتعلم منه وجاء ادهم اخر في عالم جديد واشخاص جديدة وزمان جديد باحداث جديدة ولكنه نفس الشخصية المسؤلة ذات الاخلاق النادرة بكل المقاييس وليكن شخص نادر الوجود كجده ادهم ابراهيم الرفاعي والذي كان بحق قلب وعقل عائلة الرفاعي (قلب الرفاعي )
انتظروني في الجزء الثاني باذن الله 

تعديل المقال