رواية خطايا واجتثاث الفصل الثاني 2 بقلم نور البصري
الناس مو نفس الطبع
بيهم جرح بيهم دوى
ما سامع شكال المثل
مو كل اصابيعك سوى.
ــــــــــــــــــــــ
: اهدأي بنتي امج مبيها شي..
انرسمت صورة مثاليه لبنت بوكفتها البريئة ووراها اسوء كوابيسي انطه لبنتي كلينس تمسح دموعها و باوع للمستثمر مبتسم مثل الي ينتظر اللقاء..
جريت الكلينس منه و شمرته بالكاع
واني اتهجم واتراشق عليه بغلط و شتايم وسط صدمه المستثمر السبعيني من تصرفي و العم برواش ..
: المن رجعت
ارجف واني الزم حجار اريد ارجمه بيهن
: روووح برى مالك شي هنا روح..
همس بثقة
: الي انتي!
و باوع لبنتي بكل حنان وعيونه بعيد صافن يمكن بالماضي وكال
: الي انتي و رجعت انتي و البنت ملكي..
هنا السبعيني بصدمه
: ما فهمت تريد تكول المهندسة نفسها الحجيت عنها..
وسعت عيوني هذا تخبل اكيد
المستثمر يحاول يهدأ الوضع و العم برواش مدنك شنو بس لا كل هاي السنين عايشة اني برعايته ومدري..
رحت للعم برواش
: جنت تدري مو؟ واني اكول وين اكو واحد يبقي عاملة ببيت شكبره طلع هووه طلع هووووه اااخ ولكم هسه من احطه واذب عليه بانزين واحركه تلوموني..
جريت بنتي من ايدها اسحلها وراي
وراها تراشقنا بالكلام ورى مواجهة
بغضب دنكت على طابوكه و بسرعه التفيت حول نفسي بأستدارة سريعة
واني اشمرها تجاهة محد توقع رد فعلي الا هو بساع دنك..
عزا جان متوقع راح اسويها بغضب غميته و ركضت بعيد رجعت بداخلي روح طفلة..
ام طيف..
خرجت من مقبرة الاجتثاث حتى اتنفس بنتي بعد ما اختنقت بيه ومتت سنين ردتلي الروح ببنتي..
كولشي مريد الحب وخسرته والعشرة هانت من زمان واني المذنب الهونتها
بس بنتي يا ناس اخاف ازمه من الأزمات اموت وممكحله عيني ببنتي..
كل ازمه اكول اموت رغم النوبات الي اعانيها مو مميتة بس تاخذ كل حيلي قربت كلاص المي من شفايفي وخليت حباية من دواي شوي تخفف من تشنجات العضلات الي تجيني العلاج ماسوى شي ولا قلل الآمي..
نظرات صاحبتي إلي تحجي بين تأيد اواجه ماضي وبين خوف من نهاية المواجهة لا تصير مميته..
فظلت مرة تشجعني ارجع و اطالب ببنتي واواجهة و بين تكولي لترحين و بنتج حاولي تلكين تواصل بينكم عن طريق النت..
تخاف على حياتي تخاف لا الموت بالمرة الجاية يكون موت جسد مو بس روح
يارب ساعدني هذا القرار كان لازم مو من هسه من قبل بس ما جنت متهيئة نفسيا ولا جسدياً..
ورى تفكير قررت اواجه ماجد.. واذا مكتوب الي كفن مكدر ااخر موتي بعد..
رجعت اصفن بالصورة الطبعتها واني ابتسم اعرف مراح يلاكوني بالورود ولا بالاحضان
اعرف طريق استرداد عائلتي مملي شوك و صعوبات ويجوز رفض و يجوز خسارات ويجوز اصلا بنتي بنفسها ترفضني بس لازم اجاهد حتى لو ثمن مجرد شوفتها ادفع حياتي.
اخذت اجازة دون راتب من عملي خاف روحتي ما تثمر عاد ارجع عندي شغل يستقبلني هاي اذا رجعت و ما قتلني واخذ الثار
بعد شهر من الحنين والشوگ الميحس بيه بس الخسران والفاقدله شخص. قررت المواجهة قررت الرجوع.
واني ما اعرف مصيري راح استعيد عائلتي او اطلع من الموضوع على الاقل ببنتي او مصيري موت...
ما اعرف يمكن اول شجاعه بحياتي انو بعد كل هاي السنين انفض عني غبار المهجر وامزق كفن الغربة وارجع للوطن....
مطار وطني ذاك هو يلوح بالافق من شباك الطائرة ابتسمت بمرارة محد يستقبلني بالمطار غير تربة وطني الحضن النحرمت منه سنين طويلة بالمهجر...
بوطني الشتا دافي بالنسبة للبلد التعودته نزلت من الطيارة لبست نظاراتي..
واني اسحل بجنطتين متراكبات وحدة فوك ثانية رخام المطار الزلق ساعدني يخفف ثقل الجنط من اسحل بتايراتها
كملت كل الاجراءات..
من قررت ارجع ظليت محتارة امي و اخوي واختي بعدهم شايلين عليه داخلي اشتياق الهم بس خايفة النبذ من جديد
اعرف السنين متنسيهم جنت نقمة عليهم يمكن اني مفقودة بالنسبة الهم يمكن ميته عدهم وخلصانين مني
يمكن اصلاً ولا فكروا بيوم ارجع واطلب منهم يفتهموني اطلب العفو منهم اعرف اخوي مستحيل يغفرلي..
الصارله فوق طاقه تقبل العقل اعرف ميصدكني مجرد اداة وبدون ارادة تحملت خطاياهم..
الطريق طويل لإحدى محافظات الجنوبية الي انتمي الها وصلت الى بلدتي واستقبلني اسم مدينتي وياها ترحب بكم ببوابتها...
حنين و ذكريات بهاي المحافظه شهكه اجتني غصب عني جريت نفس عالي بس لويش احس الرئة نزللها هوا حار و يوجع رغم شتا مو صيف هاي حرارة الغربه تترجم بحنين على خوف..
«أحياها امل طفيف من بعد هجير سنين ووجع مميت ام انها لا تزال قيد الموت»
اباوع من جام السيارة واشوف التغيرات ما عرفت الاماكن عدلت شعري و لميته داخل كاسكيت بوسبول لونه نسائي.
و اني احاجي السايق انطيته العنوان و شارع ورقم شارع وحتى البيت بلكت باقين بنفس العنوان التفت الي
: بس لا تقصدين منطقة....
نطق اسم منطقه ما عرفها....
: يا ولد.. لا لا منطقتي اسمها هي
رجع صفن وتوقف بسيارته محتار
هنا اني بالعاصمة اشتريت شريحه محلية و مكنكه نت اتصلت بصاحبتي
وحجيتلها
ردت : كبرررر وانتي من عقلج يبقى اسم المنطقة نفسها لا عيوني تغير صار. اسمها شو انطيني السايق اني انطيه العنوان...
انطيت النقال للسائق واني صافنه هي صاحبتي اقاربها يلم الايجار يحوله الها واذكر قبل كم سنه راحت زيارة هي وامها وعمها يعني مو مثلي عهدي بالمنطقة الى بدايات الالفين...
انطته الاسم واسم الشارع شنو رجعلي النقال حجيت وياها شوي وسديته..
السائق : هاااا خاله كولي هيج من الاول..
كوتله : شعجب متعرف الاسم القديم.. للمنطقة..
باوعلي بمرايه السيارة وضحك وهو حسيت بيه صفاقة وطيش.
: شمدريني بي
: شكد عمرك
: 17
وسعت عيني 17 يسوق تكسي توترت
: بس انت قاصر يعني منيلك اجازة سياقة..
ردد يتمضحك
: عادي ننطي غرامه اذا ننكمش..
بكلبي كلت المرور شنو شغله و قاصر يسوق خفت لا النوب نندعم واموت واني لسة مشفت بنتي
: اكولك نزلني
: خالة وصلنا..
دخلنا شارع واشوف مدرسة البنات متغير اسمها متغير بس خمنتها مدرستي دخلت السيارة بشارع ثاني البيوت مختلفه..
غمضت عيوني نبضاتي تزيد دخلنا شارعنا و رغم الاماكن تغيرت بس احس هنا كل مكان كانت الي بي خطوة وضحكة و دمعه...
السائق : هذا الشارع الدلتني عليه صاحبتج...
حجاها بغرور مسوي انجاز
: ما اندعمتي وصلتج بأمان القاصر يسوق جاكي سياقة خالتي العزيزة..
ردت اكله تنجب وتاكل.... و تبن لتكول خاله لا تكبرني بس نبضاتي دزيد واني اباوع للبيوت باوعت كلها متغيرة خرائطها فضاع عليه بيتنا
: خوية اذكر بيتنا جان جهة الشمس منا على ايدك اليمنى بس ما اعرف يا بيت..
ظل محتار ومستغرب لان اكوله اخوية لعد شكوله غير مثل اخوي الصغير رجعت اشرحله..
: شوف خوية اني جنت بالخارج هاجرت اوائل الالفينات احس نفسي مو بمنطقتي كلشي متغير ومختلف
صدوك حسيت تايهة وضايعة..
: خالة تغير كلشي و الناس هم تغيرت معادنهم اطباعهم طيبتهم و نفسيتهم يا امي كلشي تبدل
بلعتها خالة باوعتلة بمرايته النوب صاحني امي بلعتها هم بس والله قهر شبساع كبرت...
فتحت كامرة نقالي اباوع لسحنتي رغم الصبغ ساتر علي بس اكو بجذور الشعر بعض شيبات عمر الاربعين..
صح كبرت بس ما حبيت يكلي خالة شبيها الخوية احس عقلي لسة مال بنت ٢٠ سنه رغم كبرنا والسنين مشت بينا بس توقف عقلي لهناك عمري احسة نفسه..
سكتت مكمت اكولة خوية سألني من يا بلد اجيت اختصرتها بكلمة اسم البلد ..
: خالة مختارة بلد قوانينه صعبه و العيشة بي عبارة عن ثلج اغلب شهور سنة و الحياة بيه ضرائب
مرديت هم كالي «خالة» واني شنو شفت بحياتي لسة احسني بنت العشرينات يمكن عقلي توقف بالعمر لذيج سنيني..
درت اباوع للبيوت قررت انزل واشوف وينه بيتنا فتحت الباب و هم كال خالة
: خالة شعجب وحدج يعني لا زوجج لا اولاد بنات
جنت فاتحة الباب رجلي عالاسفلت و جسمي كاعدة بالسيارة اريد اطلع من السيارة رجعت التفتت اله و مرديت
بس جريت حسرة وطلعت
وكفت بالشارع اريد احاسبه اني حولتلي مبلغ فلوس عراقية كالت صاحبتي لا يقفصوج
: شكد كروتك..
: خالة خليها عليه..
ضحك عود يشاقي
: خالة اذا معندج عائلة تبنيني وسحبيني وياج لبلدج والله اتزوجج.
معقولة اكو شباب بهاي الخفة وتذب ميانة بساع لهاي الدرجة الاخلاق تغيرت عن قبل ايامنا والله يا الله قاصر يسوق و قاصر ملطلط يطلب تبني او زواج..
: انت دكولي خالة يعني اني مثابة امك ابني كروتك شكد
: واصلة ست..
ابتسمت و طلعت مبلغ
: روح ابني.
بس هو كال
: مبينة متيهه ست اخذي
: ما اعرف بس يمكن ذاك هو البيت
جان ردي يمكن ساذج لأن فعلاً رجعت ودورت بيتنا احساسي اخذني لبيتنا
اجة بفكري اخوي وامي راح يتقبلوني من جديد؟جازفت و رجعت بس منو ينتظرني؟ لا احد...
من صاحبتي عرفت راجعين بانين البيت ومتقاسميه بينها وبين اخوي
محصلت تفاصيل اكثر لأن بهذا زمن ناس تخاف تنطي تفاصيل
ومن ولد خال صاحبتي اليجي يستلم ايجار بيتهم يحولة الها محصل تفاصيل بس هلكلام وبس..
واكفه متحيرة من امري بنظرهم اني شايلة ذنوبي على جتفي ذنب يمكن اني سبب مو مباشر بي ذبيت حسرة و طلبت من الولد يروح
: اطمن عليج ست... خالة
ظليت اراقب السايد بي بيوت اذكر بيتنا مناك ورجعلي نبضي يزيد يم بيت مبين مقسوم لبيتين من طريقة البناء..
اجه الفرج من رب الفرج طلعت مرة من فاتت ستوته خضار وكفت تشتري تركت جنطتي بالشارع و مشيت سألتها
: السلام عليكم.
باوعتلي مستغربه
: و عليكم السلام
: اختي اكو بيت هنا و شرحتلها بالأسماء
ابتسمت و اشرت..
: ذاك البيت قسموه بين ابن وبنت الحجية..
ترخصت المرة الي بفضول رادت تعرف اني منو؟ وشنو اقربلهم؟ تركت تساؤلها دون جواب
و توجهت للبيت الي اشرت الجزأ الي صار لبنت الحجية (اختي)
قبل لا اوصل للباب الضيق. باب بيت اختي شفت مرة طلعت ذكرتني بأمي بشبابها هنا عرفتها انتصار الله ما راد ينشلع گلبي وادكدك بالبيبان وادور اهلي..
: ها ست لكيتي اهلج..؟
طفرت نزيت هذا تابعني ويجر بجنطي الي نص شارع عفتهن..
: شكرا الك يلة روح ماما هاي اختي طلعت ذاك بيتنا..
ركب سيارته متردد و بعيونه حجي و فضول بس رجع بك بسيارته و دار بيها وراح لحال سبيله
انتبهت انتصار.. الي واني مشيت مدنكه ورفعت عيون بيها الم وحزن و اشتياق وحكاية وذنب وخجل وخوف الرفض والنبذ...
تطشرت دموعي بين رموشي اشوفها تباوع صافنه ما اعرف الدم لو شنو لأن ظلت تركز بملامحي بس اني سبقتها
: خية رجعت خيتي تقبلين رجوعي اني رجعت....
وبجيت لزمتني من جتفي الدم جان اقوى من كلشي عرفتني و حضنتني تشم بيه وهي تبجي عرفتني خيتي عرفتني ما تيهتني مثل ما السنين تيهتني وضعت بين صفحاتها.
(جنت كلمات مطشرة على سطور صفحاتها محتركة)...
: انتي عايشة خية ناس تكول متي والمليشيات صفتج و ناس تحجي شكل شردتي بس بطريق لسوريا هناك انقتلتي و ناس تكول كدرت تطلع للخارج و ضاع خبرج....
تحجي و تشهك ردت تحضني تشم بيه
: افيش يربي افيش يا حبيبي يا الله هاي خيتي اي والله ريحتها هي هي اختي مستحيل اتيه...
دنكت
: رجعت خية رجعت واني شايلة كفني على كتافي رجعت وما اعرف مصيري رجعت اريد بنتي...
باوعتلي صافنه وردت مسحت دموعي وجرتني جوة بالبيت
: لا تكولين هيج شنو كفنج اسم الله عليج و على شبابج تعاي خيه تعاي گلبي رغم الاشاعات جان يكول عايشه
ولج ما خليت دعاء ولا ختمه قران الا سويتها لرجوع المفقودة خيتي اسم الله على شبابج خية اسم الله عليج..
: شباب؟ هو وينة شبابي الضاع بين اهه وبين وجعه وبين ضياع..
صاحت ابنها
: يمه يسار.. يمة تعال خالتك رجعت...
اجه شاب
: يشبه ابوه
ردت اختي: الله يرحمه..
وبجت خليت ايدي على شفتي مات. رجلها مات...
: اي خية اشوف بي المرحوم الله يلعن كلمن يتم ابني وبنتي الف لعنه عليهم
: هم انقتل..؟ شجانه اعزازنا شباب و تلبس كفن..
دنكت
: استشهد و بعت بيتي و اخذت حصتي من حارث وبنيتلي هلمشتمل يمهم يلمني تعاي فوتي
باوعت للحديقة الي صغرت كلش بسبب انقسام البيت...
: البيت صغير و تصميمه مختلف كليا..
ضحكت بحسرة
: لا عيني اخوج الشفيه مرته مشاكل وياي لذا قررنا نهد البيت وكلمن يبنيلة بيت بحصته و اني حصتي هاي حصة الاسد لحارث لأنه ولد هم امي تنازلت عن حصتها اله فبنى بيت مطنطن اكبر من بيتي وعزلوا عني.
: هاااااا بس البيت مو تفلش؟ اذكر هيج
: اي ردينا و بنيناه جان زوجي عايش بس من مات كعدت يم حارث مرته السم شدت وياي عاد هاي من كم سنه البيت هم تعب فهديناه وردينا بنيناه هلبنيان...
اكول قبلت تستقبلني طلع لا اخوي و لا امي ساكنين وياها هم انعم الله عليها لو ما حنينة جا هم اجتثتني شو اني تعلمت على الاجتثاث ومن الجذور ابتسمت بهدوء..
«لولا خطايا ماضٍ ما كنا بحاضرنا إجتثاث»..
دخلت اباوع لبيتها حلو مرتب يعني اعتقد مساحته تقريبا ١٠٠ متر شوي اكبر لان باقي المساحة راحت لاخوي و امي..
حديقتها عبارة عن طارمه و بيها فد ثلاث امتار عرض و خمسة طول واكو ممر ترابي تحيطه سنادين ورد و مزروعات
و بالنص مسوية نافورة كولش كيوت وزغيرة كد حجم طشت غسل الملابس
بشكل دولفين دومها جانت مرتبة ونظيفة انيقة باوعت بامتنان الها
: شكرا لأن ما طردتيني شكرا لأن استقبلتيني لفترة
: لفترة شنو كافي تغرب وعيشي وياي شعندي لا رجال واكول تستحين وجودة بطرك هلولد و البنيه
: الله يخليهم الج خية تدرين مشتاقة لأمي
دنكت
: مرة جبيرة كبرت و هم لا ترحين مراح تعرفج زهايمر خية و اخوج ما راح يستقبلج اصلا يمشي ويصيح ماتت...
دمعت عيني وبجيت من يوم امي طردتني وتخلت عني انحرمت منها
و اجيت بلهفة بلكت السنين حننتها عليه بس المرض نساها ضناها مكتوبلي ابقى منسية..
: ليش امي مو عندج ..؟
: اي نعم مكدرت اعيش ببيتي وامي اروح اني الها كل كم يوم اسبحها و اشوف امورها
: لو جايبتها يمج..
: منو يخليني اخوج الشفيه هة.. الي بشور مرته قبل لتتمرض كدر يقنعها تتنازل حصتها بالبيت وربج مينطيها منيشن على ذهباتها يخاف تموت و اخذ علب ذهبها تفكيره محامي مادي و عليج الحساب
: مجان هيج بس يلة هو منو بقى على حالة كلنا تغيرنا..
: لدافعين من صغره اناني..
شوي و اجت بنتها جانت نايمة ابتسمت تشبهني كولش حتى بحركاتها الدلوعه من تكعد من نوم غصب
انحبست الدمعه بعيني على شبابي النعكس صورته كدامي ببنت اختي. بس بتحديث جيل هذا الوقت بدلع اجت دنكت تريد تسلم وكفت وحضنتها
: ما شاء الله شسمج يا حلوة
: فرح..
: عسى ايامج كلها فرح و ما تورثين دموع خالتج يبعد خالتج..
انطتني خيتي ضيافه
: الجو بارد دفي كلبج تحبين انت الكاكو وي الحليب
ضحكت : وينه جوكم بارد ولج متت حر لو تشوفين الثلج العدنا شتكولين.
خية اريد اتمدد ما اتحمل تعب وهواي تعبت بالسفر..
: اي خية تعالي حتى غرفة رتبتلج ظليت على امل يجي يوم ترجعيلي ادريج عزيزة ابوي و مدللج جان هاي غرفتج سنين تنتظر طلتج...
دمعت عيني دخلت غرفة بيها سرير منفرد..
: اثاث ابيض اويلي هاي مو غرفتي؟ اويلي شكد هنا فرحت و بهاي الجرباية مرت علي ايام احلم و احلم لمن وكعت شكد هنا بجيت..
اويلي على سنيني الضاعت جنت احب كولشي ابيض بس حياتي ما توفقت و بنقاء اللون المفضل عندي..
همستلي تجنب النظر الي
: بياض گلبج ام طيف.. تحبين هذا اللون ما فقدت امل رجعتج من بنيت حسبت حساب غرفتج كلت يجي يوم ترجع لابد الها مكان وغرفة... طلبت من نجار ينجر نفس غرفتج القديمة
: عبالي نفسها.. يمكن ذاكرتي دتخون تفاصيل اخشاب غرفتي
التفتت الها و دمعت عيوني و حضنتها حيل ابجي
: ما حملتيني ذنب شلون اجازيج خية..
مسحت دموعي
: وشنو هو ذنبج؟ الصار صار يا خيتي هذا مقدر ومكتوب. استغلوج مالج ذنب...
كامت تمسح عيونها وترجف يمكن تذكرت ذيج الفترة ذبت حسرة و كالت
اختي
: ايست منج عايشة الصار صار المهم عايشة
اني : رجعت استعيد بنتي او يقتلني عرفت بنتي عايشة سنين اخاف ادور ماضي سنين واني راضيه بقدري
بس مكدرت استمر لازم انزع كفني و ارجع لنقطه الصفر ارجع لبنتي..
و بجيت
: سنين متت بالحياة..
و ظليت ابجي وهي تباوعلي سألتها..
: شلونها بنتي فدوة هم تسولفيلها عني هم تمر عليج. و تواصلج لو تتأملني عايشة وبيوم ارجع..
: الله يعين كلبج خية بس لا تتأملي خير الصار مو هين ابوها رافض اصلا اواصلها و بنتج فقدت التواصل بيها من يوم طردني شلت عليه بگلبي
مسني بأبوي و شنو كان بذاك الزمن غير الرطين عليج والغلط ايسني لفترة من حياتج من كال عاشت عار وماتت عاركلت هذا قتلها وياه من هجم عليكم بس گلبي هذا ميصدك بقى أمل ولو قليل ترديلي..خاصة دورت عليج وكالو طلعت من الوطن عن طريق سوريا..
فكتله مفقودة لتكول ماتت يارب عايشه خيتي هاي والله كتله ابو طيف مدام مشفت جثة خيتي عايشة بعيني فلا اكول ماتت
و الحمد لله هياتج عايشة و احساسي مكذبني بس كل الي اكوله الله ليوفق الجان سبب ولا يرحمه
رديت بساع
: امين واني هم غلطانة خية الخوف خلاني اخطئ و النتيجه اني الوحيدة خسرت شفت بروفايلة تزوج و خلف و عاش حياته حياته.
سكتت مكملت بس صحت ااااااخ اوووف ربي كلها عاشت بس اني متت اني الي انبذت اني الي اجتثوني و صرت عار الهم
: خية الله موجود حاشا يترك عبده
ضربت صدري حيل وحجيت.
: هسه شرايده منه مريد شي هو استقر الله وياه نساني و صرت اله غصة بلعومه وصرت كابوس اله
وهو بالنسبة الي حلمي الي انسلب مني اني مرايدة بس بنتي الي الزمن حرمني منها غصب هي البقت الي بدنيتي..
كبرت اريد السنين البقن اعيشهن بقرب بنتي حتى لو يسمحلي كل اسبوع يومين تجي عندي اكيد ميخليها تعيش يمي و يجوز هي تنكرني..
بجيت...
: الله كريم نشوف شلون نوصلة كالوا اله مكانه صارت و تعرفين الصار للوطن صعد ناس ونزل ناس.
: خايبة ميهمني لو صار رئيس وزراء و عنده حزب وحكم اني الهامني بنتي خسرته و رضيت بالمقسوم بس بنتي اني اريد املي عيني منها..
بقيت ايام محتارة شلون اتواصل وياه حاولت اواصل امي بلكت تذكرني بس اخوي منع افوت لبيته..
ومن عرف بوجودي هد عليه طالبني ثار يطلبني ثارين كالهن الي بكل غضب..
: شرجعج لو باقيه ميته شوفتج كولها ما اريدها ولج الي وياج مو ثأر واحد ثارين..
: خوية الدم ميصير مي واني خيتك..
: شوفي ولج لا تطبين عليه ولا اطب عليج وامج من جانت بكل حيلها وذاكرتها تمام اعتبرتج ميته تبرت منج وراح تبقين ميته عندي تمام.
واشر بصأبعه على كصته
: خليني منجب لا هنا رصاصه و تنهي وجودج فعلاً..
أشر على راسي ودار ظهره و طلع
و بقى مقاطعني وهم انطيه الحق حقه لو شما يسوي حقه
شايلة على متوني خطايا منها خطايا ما اذنبتها بس بعد شلتهن و صرت اني بالواجهة..
العصاري اطلع وي اختي وابنها وبتها فروني المحافظة و الاماكن اشوف تغيرت عن عهدي بيها
بقى عقلي مشغول شلون اواجه ابو طيف شلون اتفاهم وياه لازم وسيط.
اني و ابن اختي حتى رحت لشيخهم ردت اوسطه بس عرف اني شنو ومنو تعذر واخت الطرده انطردنا
: بعثية و بنت بعثي شحصلنا منكم وخلي الازلمة عايش تتوقعين يردج وانت....
دنكت الشيخ جان من عموميته اكيد بس نطلع يبلغه وهنا بغباء فتحت على روحي جبهة.
: يا عمي مريد ارجع سنين مرت والگلب مات من زمان و غطتني خطاياي بنظركم
فيا عمي كل الي اطلبة بنتي تواصلني مطالبة زايد ولا ناقص هذا مطلبي بس..
باوع بغضب
: طلعي برى وحمدي ربج ما نحرتج المشكلة شلون ا طلب الثأر من مرة هضيمة كلنا انقبرت اكيد و خلصنا منها ثاريج تشمين هوا طلعي منا اخذها وطلعوا.
أشر لابن اختي الي بساع لزمني
: يلة نطلع لا ينسى نفسه كدام مرة ويقرر ينهيج
و ركبنا سيارة ابن اختي
: تتوقع يخابره يعني لازم اعوف بيتكم مريد اكون سبب قتلكم وياي
باوعلي : هم ليش هيج وياج كلما اسال امي تكول سالفة طويلة عوفكم منها..
سكتت بس افكر وين اروح اكيد راح يهجم على بيت اختي واني افكر هنا قررت قرار مصيري
بدل ما احمل خطايا جديدة على جتفي و اكون سبب موت اخرين وياي اروحلة برجلي..
: نزلني
: ها..
: نزلني اريد اتمشى وحدي و ارجع لأمك لا الخبل ابو طيف صار عندة علم خاف يهد عليكم
: خالة مو هيته يهجم امشي للبيت نتفاهم
صحت بعصبية خوفته..
: نزلني..
ما قبل فرجعنا لبيت اختي من نزلت تلاكيت وي عائلة اخوي توهم طالعين شنو امي تبقى وحدها؟
مرت اخوي تباوعلي ودارت وجهها اوووي كبر لفج يركة بگلبي هيج غلطت شلون جهرة النوب معاجبتها
عافني اخوي ومحاجاني بس حجه وي يسار.. ابن اختي
: وين جانت هاي؟
: ضايجة واخذتها تفتر..
باوعلي من فوك لجوة واني حمدت الله يسار.. ذكي و ما حجاله..
: كوللها مرة ثانية تلبس شي على راسها احنا مو اجانب احنا عرب..
اباوع لمرته ردت اضحك شامرة الشال مشمر و الكذلة طالعة بگلبي كلت اول خلي تحترم مرتك حجابها وهذا عود هم حجاب الواحد لو يلبسة يلتزم لو لا يلبس.
شوي طلعت اختي الظاهر جانت تباوع من زرف مخليته بالباب
: خية رجعتي تعاي
دخلت واني اعدل بشعري الكاريه من يوم العرفت ببنتي عايشة هملته مرحت صالون اقصة فرنسي مثل عادتي..
ابن اختي كال اجي وياج من قررت اروح لمنطقتهم واسأل دخلت وحجيت كل الصار لاختي..
: لا تخافين ترك ذكول الربع من زمان اني صح ما اتواصل ببنتج بس والله ابني گلبه مينطيه ما يسأل عنهم و يتابع من بعيد
ابتسمت ليسار بأمتنان
: يعني ما يجيب مسلحين و يهجم يقتلنا: ما اعتقد تلكيه هسة دايخ طلعتي عايشة ومصدوم شوفي اخذج لوادم اعرفهم و هم الهم معرفة بي و هناك نتوسط تلتقون وتصفون الأمور..
: يمكن هذا احسن شي..
لليل و لكيته مجاوب رسائلي المعلقة تعجبت معقولة شك و عرفني وفوكها قابل صداقتي بي او صدفه يجوز راد يعرف التتبع تعليقاته بلايكات منو وليش من رسالته مبين معرفني
اهلا وسهلا ممكن اعرف ليش تتبعيني بلايكات من اعلق وتعلقيلي بمنشوراتي و مراسلتني..
بيد ترجف كتبتله
: مشبهة بيك وبالاسم زميل من الكلية اني جنت وياك بالجغرافية اذا انت نفسك الي ببالي
: اي نعم خيتي جنت جغرافية..
وظل يحجي ويسأل منو من زميلاته و تاريخ تخرجي ملكيت الا اكولة بتول ما قبلت انطيه اسمي او اسم صديقاتي مقربات لا يشك
رد : ما اذكرها رغم اني طبعي جنت اجتماعي..
مرديت عليه و لا هو استمر
هدوء محد اجه احتمال عمه ما يبلغه بس اول وتالي لازم اواجهة بيوم طلعت وحدي أشرت تكسي.
و طلبت من السايق يوديني لمنطقه الجان سابقاً ساكن بيها من ابن اختي كدرت احصل عنوان بيته عايش بمنطقة راقية وتارك المنطقة الشعبية..
نزلت بشارعهم المنطقة شعبية كلش و ما تغيرت باقية عالقديم قليل بيوت انبنت من جديد..
حاولت استرجع ذاكرتي للبيت العشت بيه اجمل ايامي رغم اخواته و امه حاربني..
اذكر بيتهم ركن بهذا الشارع شفته و عرفته باقي على حاله بس يمكن ترميمات
تذكرت يوم الي توسلتهن بس طردني و يوم الرجعت لليل هجم علينا هو وياه مسلحين كدرت اهرب وقتها
اعرف تنتضرون احجي التفاصيل بس كلشي وقته و احجيلكم الصار بوقته..
نزيت من مكاني طافرة من ذكرياتي لذاك اليوم على صوت دراجه رادت تدعمني و مال جانب وشحطها وهو يسبني و يغلط..
عزا شتمني شنو من اخلاق هاي شبيها الشباب تسوفلت. فد مرة لا يا قليل أدب..
تلفتت واني احس ضوضاء المناطق الشعبية براسي جهال تلعب و سيارات مسواك..
ادور بخوف و فوبيا و ردت عيني عالباب بخوف رجعت لورى شاردة من المكان و من كل مواجهة ردتها سواء بعدهم هنا لو لا..
اتنفس بكوة واني انتجي على جام صالون نسائي وارجف وعيني عالباب.. هنا جان بداية ونهاية الاجتثاث هنا سبق و هربت وهنا سبق رجعت و انطردت
غمضت عيني واني متشنجه بخوف
و رجعت اتنفس قوي كعدت مكاني
طلعت شابة من الصالون محجبة وجها الوردي من اثر الخيط..
: بيج شي خالة بيج شي..
صرت اكره كلمه خالة التنكال للاحترام لغريبة يشوفوها كد امهم او ما اعرف بس اني ما احب اصير كبيرة لسة احس عقلي وتفكيري باقي متوقف عشريناتي النباكن مني رديت بنتر..
: مبية شي مبية شي عوفيني.
لملمت روحي و كمت والبنت مستغربة تصرفي استغفر الله هيج كبرت لو معدهن ذوق يكللي خالة وخلخالة الجتهن عشتو اصلا اني بعدني شباب اي شباب..
بس لا لأن العمر يمشي و تشوفين روحج انتي شابه بس انباكت سنينج
بس هم مو خالتهن
مشيت دايخه واريد ااشر تكسي هاي هي اجيت اشوف مكان جان جنتي و ناري هاي ارجع...
بس فات رجال من يمي بسيارته خطفني عيني عليه نبضي يدك النبض المات رجع يدك هيج شلون نقزة بالقلب..
شفته وصل للبيت و مدري حس نظراتي صافنه بي التفت بأستغراب جراءة نظراتي او حيرة مني يارب ما عرفني يمكن ما عرفني لأن رجع يدك بالباب.
من لبسة الانيق وسيارته صاير غني
تقدمت صوبة ورجل طك برجل ولج شردي كتالج كبالج لا يموتج شردي عفية هيج احاجي روحي
سبقتني منيتي لهنا يعني لو اموت لو تنحل بينا اني مريد منه شي غير شوفه بنتي وتواصلني يارب گلبي طاگ عليها حموت من الشوق..
كافي هروب كافي ولازم اواجه منا عالم والزمن تبدل ما يجازف يقتلني املت نفسي مواجهتنا ما تنتهي سفح دمي...
يمكن حس بيه معقولة لسة گليبك ينبض يحس بوجودي لو حاسة السادسة نبئتك بأسوء كوابيسك رجع..
لأن رجع دار وهو مستغربني
: اختي محتاجة شي..؟
اباوع و عيوني تسولف دمع معقولة ما ميزني ولا عرفني شنو هيج اني متغيرة
: احم.. أ أ أ..
سكتت وهو نفسة ذاك طبعه رفعه حاجبة و ابتسامته جانبية وهو يكرر آئاتي بس بنبرة تساؤول وبمد طويل جرهن...
: آآآ.... ؟ منو حضرتج و اكدر اساعدج؟ مبينة غريبة...
: ها. لا.. اي.. احم
صحته بأسمه و كتله شلونك..
انفتح الباب و عرفتها أمه بس لا أمه مستحيل بس يمكن اخته كبرت و صايرة تشبه أمه ليش باقية بهذا بيت معرف
: خوية اذا جايني اشيل واجي وياك كطنه شيلها من اذانك هنا عيشيتي خاف رحمة تعاود و تلكى بيت الاهل مهجور...
سكتت مستغربتني وهي تابع شكو ومنو اني هم يمكن معرفتني ركز بية كولش و بدت ملامحة تتغير للغضب
:. .. العار... عايشة؟ وكعتي بيدي..
همست ارجف
: اي اني عايشة بس جرة نفس تدري الواقع شنو؟ معايشة ميتة بس اتنفس شوف
مكمت اعرف شحجي كلامي صح دوم اسمي نفسي ميتة وتجر الهوى بس كد النفس .
محسيت الا انجريت من شعري واندفعت بعنف تجاه الباب اندفعت وي اخته الي اندفعت وياي وهي تصيح وتلطم
: شجابج ولك خوية تولي زبالة هاي تولي ولج شجابج ما صدكنا استجن بطل يدورج و صدك كذبة موتج
حتى عمي من كالي برجعتج توسلت ما يوصله توسلت ميحجي ما بينا والله ولك خوية تولي لا تنكس ايدك بيها خوية اهلنا ولد عمنا وادمنا انمحت من وراها...
خنكني وظل محتار شيسوي وهو ركض للمطبخ واخته تدفعني اطلع..
: يلة بساع شردي تصخمنا تلطمنا شردج لينا روحي ولج ولي لا تنقتلين مبينا دم بعد تعبنا والله..
ظلت تثغب بعلو صوتها
: يبووووووو ولكم يبووووو لحكو علي.. يبوووو...
تصنمت انتظر منيتي ارجف رديت استوعبت و سرعت مشيتي شارده اركض..
بس انسحلت من شعري للبيت دنيا ظهر وشارع فارغ استغربت قبل هاي المنطقة ما تعرف هدوء ليل و نهار
واليسمع مصايح مرة تتفازع الوادم هسة محد عليه بأحد ومحد يدخل لو مناحر تصير....
بيده ساطور اللحم و اخته وكفت بينا وهي تدفع بيه
: طلعي برى طلعي برى..
همست
: مريد شي بس بنتي كذبتن كلتن ميتة بس عرفت عايشة اسمعني خلاص شو العمر شبقى بي والشرخ كبر اكيد حملتني كل الذنوب اني عندك نكرة اوكي اني عار كيفك بس ضناي بس بنتي اخاف يجي يوم اموت و بحسرتها
منين جتني القوة منين اواجه وبيني وبين الموت شعره دفع اخته عني وكف و جرني من شعري مطلني يم رجليه بالكاع داس جتفي برجله و اني احس يريد يضرب ركبتي بالساطور..
يتبع...
الثالث من هنا
