رواية تبديل عريس الفصل الرابع عشر 14 بقلم جمانه السعيدي
سلسبيل....ليش ما كتلي ليش ضميت عليه ليش كلهم بلبيت يعرفون واني مااعرف
بابا...صدكي اني ماادري اذا كانو يعرفون لو لا
لان هذا الاتفاق بيني وبين اخوي واني صدقا ماانطيت موافقتي لان جنتي حزينه
سلسبيل...شلون عرفو
بابا....اني بلنسبه اليه مااعرف واني من رائي توافقين
لان عزام خوش ولد وما يتعيب ابد
مراح يجي واحد احسن منه مستحيل
سلسبيل...ماادري احس خليتني كدام الأمر الواقع
بابا...فكري زين ذوله اهلج ومراح تلكين احسن منهم
وعزام خوش ولد
سلسبيل...اريد وقت افكر انت فاجئتني
بابا...اخذي راحتج ماعندي مانع بس عمج منتظر ألموافقه
لان بيت عزام كمل بس منتظر العروسه
اني اروح وانتظر ردج
طلع بابا قفلت باب الغرفه
كعدت على الجربايه
اولا اني تفاجئت احس الماي يجري من جوه رجليه ومااعرف
بلنسبه العزام مابي شي يتعب شاب ماناقصه شي
وبيت عمي زينين وراح اكون قريبه من بابا
اذا رفضت شلون اباوع بوجه عمي بعد كل هذا الاهتمام
صار اكثر من سنه عايشه بيته واتعامل معاملة الملوك
هو وعائلته شايلني شيل
من جهه ثانيه بيت عمي اذا رفضتهم مستحيل يقبلون ازوج واحد غريب
ايأاا كان مستحيل يقبلون راح يكولون رفضتي عزام
وقبلتي بهذا ليش لازم عندج شي
حتلو اني ماعندي شي
اذا رفضت لازم اطلع من بيتهم وارجع اعيش ويا سميه
خوما رافضه ابنهم وكاعده عدهم
مستحيل اكدر اعيش ويا سميه بيت واحد راح اتسود عيشتي
البغداد بعد مااكدر ارجع مستحيل حتى جامعتي انقلت منها
اقبل بعزام عزام خوش ولد ومرح وصاحب نكته
اكيد بعد الزواج راح اتعود علي واحبه
ليش مااحبه ماناقصه شي اذا ازوجت راح ابقى بين اهلي وناسي وابقى قريبه على بابا
مااعرف الخبر فاجئمي ليش بابا ماحجه قبل وقت
ليش بقا ساكت اكثر من سنه
ايجوز لو اعرف من زمان جان قربنا المسافات بيتا
اني وعزام اني مااكرها بس ماعندي مشاعر اتجاها
يمكن تتغير مشاعري ورا الزواج
اكيد بلعشره تتغير المشاعر
سلسبيل...يومين واني مامرجعه خبر البابا رغم هو كل النهار موجود يمي والصبح يوصلني للجامعه
ويرجعني الضهر بس اني مااعرف اقرر
كلما ننجمع على الاكل عزام ماموجود طول ذني الايام
اني ماشايفه عزام ابد
يمكن مشغول بترتيب البيت علمود العرس
بس اني محتاجه احجي ويااا افهم مشاعره
عنده مشاعر اتجاهي لو هذا الزواج اختيار الاهل وهو
وافق علي اني صار سنه ونص عدهم ابد ماحسيت عنده مشاعر اتجاهي
يعاملني بااحترام بس ماحسيته يحبني او يستلطفني
ايجوز هما عدهم عيب
لان اني بت عمه وعايشه بيتهم يستحي يلمحلي بشي
جمانه السعيدي
ثالث يوم اجاني بابا بليل دخل وطبك باب الغرفه
بابا... هااا حبيبتي فكرتي زين
سلسبيل...محتاره
بابا....ليش محتاره اذا اكو عيب بعزام كولي
اذا بيت عمج ماعاجبينج كولي
بس قدميلي عذر مقبول حتى اذا رفضت عمج يقتنع
سلسبيل.. هنا المشكله ماكو اي عيب بيت عمي من احسن الناس
بابا...واني اكفلهم بركبتي بعد شتريدبن وافقي بابا
وريحي كلبي عليج اني من يوم شفت موقف سميه واخوانج ضجت حسيت اني مااكدر احميج
اذا صار عليه شي لا قدر الله شنو مصيرج وين ترحين
بس اذا ازوجتي عزام اطمن عليج
وراح تكونين قريبه عليه وولد اخوي زينين ومحترمين
وولد اصل وما دام كل العائله تحبج وتريدج
مااخاف عليج وافقي الخاطري هااا شكلتي
سلسبيل.. الي تشوفه
بابا.. يعني موافقه
سلسبيل....اي موافقه
بابا...اي هاي بنتي الي ارفع راسي بيها
نزل بابا جوه وصوت الهلال ترس البيت
خالتي تهلهل صعدت بنيين
بنيين...مبروك مبروك واخيرا راح تصيرين مرت اخوي
سلسبيل...الله يبارك بيج يوم اللج
بنيين...انشاء الله بلكت رجلج خير عليه وتزوج وراج
اتصل عليه بابا
سلسبيل...هلو بابا
بابا.. انزلي عمج يريد يحجي وياج
نزلنا اني وبنيين لكيت عمي وبابا وقائد كاعدين
عمي...تعاي اكعدي هنا بصفي اريد احجي وياج
سلسبيل...كعدت بصف عمي وبابا وقائد مكابليني
بابا فرحان مبين علي الفرح
بس قائد حسيته ضايج ما مرتاح يعرف شي وساكت
عمي...انشاء الله باجر تاخذين مهرج وتنزلين للسوك ويا خالتج اشتري ذهب وملابس
واي شي يعجبج بيتج كمل ولله الحمد
كلشي ما ناقصه
من تكملين وتشترين جهازج انحدد يوم العرس
انشاء الله قريبا
نسوي حفله وحده اني مااريد هوسه كل يوم
يوم العرس الصبح ترحين البيتج وتجيج ام الصالون
تكمل شغلها بيتج وبعدين نكطع مهر
ونزف العريس كبل اني ماريد زفه
لان راح نبني مضايف بلباب ايجوز اربعه اوخمسه مضايف
اذا صارت زفه منيين تدخلين
انتي بنيتنا تكعدين بيتج والعريس نزفه من بيتنا البيتج
هااا شكلتي
كون عندج طلبات كولي اني عمج اطيج عيوني ذني
ثنيبنهن
سلسبيل....لا ماتقصر عمووو هاي هيه الي تكول علي
عمي...ولله امج الله يرحمها عرفت تربي
الف رحمه على روحها هاي بتي الي ماتخشن خاطري
سلسبيل...باسني عمي وبابا باركلي بس قائد
باركلي من وره خشمه عبالك ماراضي
مااعرف ليش ضايج المفروض هذا عرس اخو يكون فرحان بي
سلسبيل...عادي اعزم خالي وزجته زجهاله للعرس
عمي...ابشري بس هاي مو تدللين اني اوديلهم سياره
اجيبهم وتجي
رحنا ثاني يوم اشترينا ذهب وملابس بس ماكملنا
كلشي اغلب الشغلات طلبتها من بغداد توصيل من بيحات على النت
انخبصت بين دوام وبين تجهيز العرس
ماشفت عزام بهاي الفتره غير مرتين او اتلاثه
نكعد على الاكل ناكل وبعدين يطلع
جمانه السعيدي
سلسبيل...خاله ليش عزام ماموجود بلبيت ردت اخذ رائيه بكم شغله
خالتي...جاي يرتب بلبيت عمج خابصه خبص
يريده يكمل كلشي بسرعه
سلسبيل...اذا شفتي كوليله سلسبيل تريد تشوفك
خالتي...اي ميخالف
بليل.....اجت بنيين كالت عزام جوه اذا تردين تحجين وياا
سلسبيل...اي اريد اخذ رائيه بلذهب
واريد اروح اشوف بيتنا واشوف شنو مشاريعه للزواج
نزلت جوه لكيته كاعد هو وعمي وخالتي بلهول
سلسبيل...شلونك عزام
عزام...هلو سلسبيل انتي شلونج اعذريني مشغول
سلسبيل..ردت اخذ رائيك بلذهب
عزام...اي جيبي اشوفه
سلسبيل...هسه صعدت جبت الذهب ونزلت
شوف حلووو
عزام...بلعافيه كلش حلو
سلسبيل.. الله يعافيك اريد اروح اشوف البيت
عزام...اي يله امشي
سلسبيل.. بس اغير ملابسي واجي
صعدت غيرت ملابسي ونزلت لكيت خالتي وبنيين جاهزات يرحن ويانا للبيت
فرحت لان مهتمات ويردن يرحن وياي
طلعنا البيت بصف بيت عمي
فتح الباب الخارجي وصعدنا بلدرج فتح باب البيت
دخلنا اول شي هول جبير على مطبخ مفتوح
حايط المطبخ الخارجي جام والكاونتر زغير والطباخ صايرات على صفحه واكو زرع صناعي خظار بصف المدخل
ديوان حلو بلهول وبصفه زرع ونافوره زغيره
كلش عجبني الترتيب الصبغ ابيض يلمع
ترتيب الاضويه كلش حلو غرفتين جوه ووحده بيها غرفة النوم والثانيه بيها نص طخم وبلازمه
ومكتب خشب وكرسي دوار
كلش مرتب وانيق
خالتي...عجبج
سلسبيل...حلو ومرتب حيل عاش الذوق
خالتي...هذا كله ذوق قائد عزام ما قبل يفرشه على ذوقه
سلسبيل.. ماكو فرق عزام وله قائد
بنيين...مراح تخلصين مني يوميه اجي اكعد على كلبج
سلسبيل...اني الي مااكدر استغني عنج ابد اذا ما تجين اني اجي
خالتي...واني ماتردني
سلسبيل.. انتي الخير والبركه بدونج مايكمل شي
عزام بقه ساكت كعد على صفحه وسكت
سلسبيل....عزام ليش ساكت اكو شي
عزام...لا ماكو شي بس شويه تعبان هليام هواي اشتغل
وتعبت
طلعنا وقفلنا البيت ورجعنا البيتنا
سلسبيل...طبعا اني مااكدر اطلب من عزام نختلي ونحجي
سوه لان ماكو شي رسمي بينا بعدنا ماعاقدين
وبيت عمي مابي خصوصيه ناس طالعه ناس داخله
اني ارجع الساعه ٣ للبيت
عزام يوصل قبلي يتغده وينام
مرات مااشوفه على العشه اني بليل ابقى اقرا
لان بس اليل عندي مجال للقرايه
بلاخير عزام مو غريب واني صار سنه ونص بيتهم
تصرفاته...جدا طبيعبه اكيد مضغوط هليام من الشغل
طلبت اجازه عشر ايام قبل العرس
اتحدد يوم العرس قبلها بيومين رحت للصالون عدلت شعري اني شعري طويل من ماتت امي ابد ماكصيته
صاير طويل حيل لونه اسود كحل
بس عدلت اطرافه امي تتخبل قبل اذا اكول اكص شعري
تكول اذا كصيتي ازعل عليج
سويت عنايه الرجليه واديه تنضيف بشره
غيرت موديل حواجبي طلع شكلي شويه بين وجهي
ذبيت الاسود رجعت للبيت
لبست تراك سمائي واسود طلع شكلي غير
فتحت شعري حتى تشوفه خالتي
خالتي...ليش ما صبغتي ميشتي
سلسبيل....لا ماأحب الصبغ والميش يخربن الشعر
الشعر يتكطع ويصير مطاط بلصبغ خلي هيج احلى
خالتي...انتي بكل حالاتج حلوه
دخل علينا عزام اني راسا سحبت الشال
خالتي...ليش خلي يشوف حلاله
راسا دار وجها حتى لايشوفني يمه تعاي اريد احجي وياج سلسبيل اعذريني ماادري انتي هنا
سلسبيل...لا عادي ماصار شي
خالتي...دباوع يحضي شوف الجمال
عزام....يمه صدك عود شنو هذا الحجي
سلسبيل...طلع من الغرفه يحجي وهو برا
خالتي...سلسبيل تكول اصبغ شعري يالون يعجبه
تحجي وتغمزلي
عزام....بكيفها الي يعجبها على راحتها
طلعت خالتي واني وبنيين بقينا بلغرفه
بليل نقلنا ملابسي وكل غراضي البيتي وكعدنا اني وبنيين نرتب بيهن
وفرشنا فرشت العرس وبخرنا البيت
ثاني يوم راح عزام اشترا قاط وراح للحلاق
من رجع طالع حلو
سلسبيل...بلعافيه
عزام...الله يعافيج حلو لون القاط
سلسبيل ..اي حلو عاش الذوق
بنيين..... الله حلو واحد هو وخطيبته عايشين بنفس البيت
دخل علينا قائد لا بس دشداشه ابيض وعبايه صيفيه اسود
وحالق شعره لابس جفيه ابيض وعكال
والعطر خرافي
قائد...اني شلوني مو احلى من العريس
سلسبيل...صدك طالع غيرررر يخبل عبالك لوحه
مو بشر شكد لا يك علي الزي العربي
خالتي...ماشاء الله الله يحرسكم عين الله عليكم
قائد...سلسبيل شنو رائيج مو احلى من العريس
سلسبيل...خفت احجي يزعل عزام اشرتله اوكي وابتسمت
فعلا طالع احلى من عزام
قائد...اعرف نفسي حلوووو
خالتي...نخطبلك وتزوج ويا عزام
قائد...ياريت اكو احلى من العرس
سلسبيل...لو تسمعك مها يبووو شيخلصك
قائد...واني خايف من مها لو اريد ازوج
سلسبيل...اصبر بس اشوفها راح افتن عليك
قائد... عادي ما يهمني
جمانه السعيدي
سلسبيل...يوم العرس الصبح رحنا البيتي اني وبنيبن
خالتي وزهراء بقن بلببت خاف يحتاجون شي
بلعشره دزولي ريوك معلاك اتريكت اني وبنيبن
الساعه ١١ وصلت ام الصالون هيه والمساعدة
بلشن بشعري وبعدين مكياج بعدين اتغدن من كملن
لبسني البدله
البدله تخبل طلعت عبالك سندرلا
وصل خالي وزوجته وجهالهم
خالي راح ويا الزلم وام فهد اجت يمي
جهال قائد ثنيبنهم صعدو يمي وامهم اجت وراهم
بقت بس تسولف عن يوم عرسها
ام الصالون تخبلت تكول هاي شكد تحجي الخاطر الله
محد اجا من اهلي لازوجت ابوي ولا زوجات اخواني
طبعا اخواني واكفين بلعرس عرس ابن عمهم
مايكدرون يتأخرون
نصبو اربع مضايف بلشارع وذبحو الذبايح
والعالم بدت تتجمع احنا فوك ونسمع صوت الزلم
برا هوسه أصواتهم عاليه سوالف وضحك
باوعت بنيين من الشباك
بنيين....شوفي شكد ناس اجمعت الشارع انسد من الزلم
ام الصالون....عرس وبيت الشيخ شلون الناس ما تتجمع
عرس الشيوخ غير
اتصل بابا كال كملتي
سلسبيل...اي من زمان
بابا....شويه ونجيب الشيخ نجي نعقد
سلسبيل...تمام
فات ربع ساعه نص ساعه ساعه كلشي ماكوووو
صارت الدنيا مغرب وهما ماكووو
صعد عليه بابا من بيت قائد وجها اصفر
بابا...السلام عليكم
سلسبيل...اني من شفته خفت ياستار ياربي
شكو بابا خير شصاير
بابا...من رخصتكم اريد احجي ويا سلسبيل
طلعن البنات برا بلهول وبقينا بس اني يااا
اني وبدلتي ومكياجي منتظره العريس
بابا...اسمعي سلسبيل انتي هسه بيدج تنقذني اني وعمج
سلسبيل...شكوووو احجي خوفتني
بابا...عزام ماكوووو مااعرف وين صار واحنا ملزمين نكمل هذا العرس
الشوارع انسدت من الناس شنكول العريس انهزم
تضحك علينا الناس
سلسبيل...انهزم شلون انهزم وليش
بابا...مااعرف الضاهر اكو مشكله بينه وبين ابو
سلسبيل.... اذا اكو مشكله ليش يخلوني بلنص شنو موقفي
كدام الناس عروس شرد منها العريس يوم عرسها
انتم تردون تخلوني مضحكه للعالم
بابا...لا احنا نريد نعالج الموقف بأسرع وقت ممكن
سلسبيل...شلون تعالجو شلون تخلوني بهيج موقف
بابا...يعقد عليج قائد حتى نتلاقه ألموقف
سلسبيل...شنو قائد قائد مزوج
بابا...ماكو غيره فدوه بابا ابوس ايدج عمج صعد ضغطه
راح ينجلط
وافقي بابا موقفنا صعب كدام الناس الله يخليج وافقي
اذا تحبيني وافقي
انقذينا من هذا الموقف الله يلعن الساعه الي وافقت بيها على هذا الزواج
الله يخليج بابا وافقي حل مؤقت
لا تخلين الناس تتشمت بينا
مصير هاي الزلم وسمعتهم بيدج
اني واخوانج وعمج وقائد فدوه انقذي الموقف
بسرعه لو تشوفين الناس برا
ما تصدكين شلون عزام خلانا بهيج موقف
اذا نكمل العريس ماكو والعرس خرب عمج يموت
وسمعتنا بينا الناس تتدمر
ماكو حل لازم هذا العرس يكمل والأمور تمشي طبيعبه كدام الناس
سلسبيل...هذا اصعب قرار عليه
بابا... هااا بابا الحل بيدج
سلسبيل...هزيت راسي ماعندي حل ثاني
بابا......شكرا ابد مراح ننسالج هذا ألموقف ابد
اتصل بابا على عمي شويه وصعد الشيخ يعقدلي
النسوان هلهلن مايعرفن شنو المصيبه الي صارت
زوجت قائد بس سمعت الشيخ كال
هل تقبلين الزواج من قائد سعد على المهر المتفق علي بينكم
بس سمعت اسم زوجها راسا عاطت بصوت عالي
يااا قائد رجلي ازوج عليه
انتم صدك تحجون هذا عرس قائد مو عزام
كامت تعيط النسوان لزمنها ونزلنها جوه
هسه هاي شيفهما الشي الصار إنقاذ للموقف
مو عرس حقيقي متوقعه جنا نضحك عليها
كل الحاضرات ووحده تباوع للثانيه
شلون عرس عزام صار عرس قائد
