رواية كفي والمنجمة الفصل الثالث عشر 13 بقلم الكاتبة Leo alfatlawi

رواية كفي والمنجمة الفصل الثالث عشر 13 بقلم الكاتبة Leo alfatlawi

كفي والمنجمه

للكاتبه leo Alfatlawi

البارت الثالث عشر

ثارت الطلقه بي لوثارت ابنص كلبي نزلت مثل المخبل اركض وصلت يمه لكيته ياخذ الانفاس الاخيره شلت راسه خليته ابحضني

--مؤتمن مؤتمنننن خويه لخاطر محمد لاتعوفي خليك وياي

همس كوه تطلع الكلمه منه اريد اركز شنو يحجي مافهمت بس العرفته غزل وسكت

ولك مؤتمنننننن والله اردلكياها لاتموت ولكمممم اخوييييي راااااح لحكونيييي

اصيح ابعلو صوتي اريديهم يشيلو احسه اخذ روحي موغمض عينه لوعيني المغمضه ولاهوه حسيت كلبي شلعه وطلعه من بين اضلوعي

وره ماضربو بلمح البصر اخذ الفلوس سياراتهم وانطلقو اريد احرك روحي مااكدر حسيت بضعف

ضليت افر ابراسي سيارتنه عطلوها احتاريت شنو اسوي اتخبلت

كعدت بالكاع يمه وصافن وين اوديك لك مؤتمن وين شنو اسوي ولك كوم كلي

لك خويه اني بلياك كلشي ماكو

تعرفني اثول لاتعوفني اضيع بدونك كوم لخاطر الكعبه گوم ولكمم ششوفولنه سيارررا

خبره الاسعاف هسه يجون

اذا اتاني الاسعاف يموت ولكم سياره لخاطر محمد

وييين ىايح ولك احنه بمنطقه مقطوعه لاتتهور انوب انفقدك انته الثاني

دولي دفعته ورحت اركض

والتفت لخوي خايف افقده المسافه اشبعدها صارت اركض بس صحراء رجليه بعد متعيني اكثر من نص ساعه واني على نفس وضعي ماكو اختفت السيارات أيست كعدت بالكاع

انتها هسه بعد ماالحك عليه هاي هيه انتهت

اخذت نفس ورجعت كمت اركض شفت سياره من بعيد ضليت اركض واصيح بلكي توكف هوست صرخت بصوت عالي اشوفه يبعد واني اصرخ

ابننننن الكلب ولك عليشششسش متوكف وولك راح يموتتتتت ارجع انعل اهلككككك لك ابن الزفررررر ارجعععع ولك ماتتتتت ارجع لخاطر الله ارجععع ولك ارجع راح اخوي كلتها وكعدت ابجي

واني مابيدي شي اعمله عاجز اشوفه يموت كدامي

خليت راسي بين رجليه وانوح مثل نوح النسوان

اتخبلت فقدت كل احساس مااعرف شسوي

سمعت صوت السياره اجت قريبا شلت راسي لكيت ابو السياره العافني كمت كوه مااكدر احجي ويا نزل الرجال خايف كال كولي يخوي اشبيك

---الحكني اخوي راح يموت

--لاحول الله تعال يبوي اصعد ودليني وين طريچكم

ساعدني اصعد السياره احس روحي مهدوده دليته مشينه سريع وصلنه لكينا شادين بطنه بغترهم نزلنه شلنه جان كاطع حتى النفس خليت راسه بحظني وكلتله انزل سعد اليسوق اول ميوصل انطيك افلوس السياره تگفه يخوي خلي انلحك هذه سياقته سريعه

--لايهمكم فدوه الكم السياره وصاحبها اهم شي سلامة الزلمه منهو بيكم سعد

سعد. اني يخوي جيب المفتاح واصعد ابسرعه اتصفه دمه

--اتوكل على الله اكو مستشفى قريبا منا اقل الساعه بس اسرع اشوي شنهو قطاعين طرق هاجموكم

سعد. والله مانعرف قطاعين طرق متقصدي لان چتلو بس هوه لوعصابه جاصفونه

--اذا اله خبزه بالدنيا لويحركو هم يضل عايش خلو املكم بالله بس اسرع الزلمه ينزف چثير

مو نص ساعه مرت من عمري جدي على طول الطريق يتصل مااكدر ارد لان جنت ضاغط على جرحه اريده يبطل نزف وصلنه للمستشفى نزلنا للطوارء كبل اخذو لغرفة العمليات كعدت يم باب العمليات حتى الدمعه طارت من عيني اجو جدي وابوي والولد جانو يسالون مااكدر ارد بس صافن حسيت روحي داخل كابوس امتاني اكعد منه

مكرم. كم مره كتله بطل هذه شغلك بطل يخوووي اتروح بيها المكان خطر ماجان يسمعلي

--راح اخوي يمكرم راح وهوه محترك كلبه على امريته الي اني ضيعتها منه وروح عمي يمؤتمن بس ارجع والله اجيبها الك بيدي بس رد يخوي لاتكسر ضهري بيك

--گول يالله يطلع يطلع منها سبع متچتله طلقه

--ولك راح وهوه يوصيني بيها بس خله يگوم اني اجيبها بيدي

--اسكت مصطفى مووكت هالحجي لايسمعك احد

اجه جدي خله ايده على متني كال لاتخاف يبوي اخيك بطل ميموت بهالسهوله

--جدي مات ابسببي جان يريد يحميني شمر روحه للموت لخاطري راح بحسرته كلتها وحس العبره جرحت حنجرتي خنگتني

طلع الدكتور مااكدر اكوم اباوعله شنو راح يحجي اباوع لحركه حلكه ركضله جدي واحمد

---حالته تعبانه اندعوله نقلنا للانعاش

صحيت واني على السرير وبيدي كانونه طفرت كمشني مكرم كال وين كمل السيروم

--مؤتمن اشلونه

--على الله باقي

وخرت السيروم وكمت طلعت للغرفه الانعاش واني اشوفه الاجهزه امعلكه على كلبه

هايخوي ناوي اتعوفني والك بعدها علاقتنه مااصارت زينه چاانته غير تكرهني عليش ضحيت ابروحك لخاطري

دگوم اعرف بالبدايه اشلون غدرتك اخذ حقك مني وروح ولك بعدك حتى طفل مالحكت تفرح بي

بعدني ماكملت عركاتي وياك ولك كوم خلينه انكمل امهاوشنه

ويامن اتعارك بعد ماشبعت منك استوني رجعتلك كوم لخاطر النبي ماضل حيل بيه ولك يخوي ماعندي غيرك كعدت بالباب حيلي انهد مالايكتلك النومه يالصگر جاالمن عفت علة كلبك

مكرم. عليش هالكد جنت حاقد عليه هسه شستفاديت من بعدتها عنه هذه راح بحسرته يلا ارتاحيت هسه ولك شنو من كلب شايل اتشوفه ينوح عليها ومحتار وين يروح مارف كلبك

--لانك جبان ماعرفت اطكني طلقه وتجتلني عليش سكتت اني مابيه حظ وخسيس انته اشبيك ولك مكرم تعرفني كلب ابن كلب ولك اشلون سكتتتت

مارد خليت راسي بين رجليه احس قلبي فارغ هوه بس هالاخو عندي وضيعته من اديه

كاظم. تره جدي تعبان اتخربط كافي مصطفى لاتزودها علينه كوم يخويه

--فارجني كاظم هذه اخوي الجوه

--اخونه كلنه تره بس لخاطر جدي ساكتين منريد اتزود حالته

--لاتخاف ميموت اخوي الراح بيها العار ميصيره شي موهاي كدامك اني راد يچتلوني طاحت بي عبني عار ابن عار

--كول يالله يمعود

جهازي جان يرن بس مابيه ارد الوقت يمشي وكلشي ماكو اتعدت الساعات واحنه وضعنه نفسه

روحي رخت رجعت راسي على الباب اباوعلهم كلهم نفس حالتي كلمن كامشه ركن كاعد وصافن امتانين رحمه الله

--مكرم خبر عمتي هاي فقيره خلي تندعيله الله يكومه بالسلامه كلبها طيب بلكي رب العالمين يسمع منها مومثل سواد كلوبنه

--تارك النقال بالبيت

طلعت النقال شفت مسج واصلني فتحته من غزل دازتلي صوره لفراشه وبيها اسم مؤتمن

--رديت بعديش مؤتمن راح

طلع الدكتور بهالاثناء اشوف وجها عابس جان الجهاز يرن واني اريد الدكتور ينطق اباوع لحلكه نفتح النقال والدكتور يحجي

غزل.

الرسمه اتجنن طلعت اخذتلها صوره بس للرسمه مابينت بطني وسويت ارسال لمصطفى خلي يشوف هذه الجبروت وين خليت اسمه خلي نضحك اشويه رجع دزلي مسج فتحته مكتوب

--بعدش مؤتمن راح

حسيت كلبي طاح اكيد يتشاقه هذه مصطفى شقى دوم ثكيل

ياربي دخيلك اريد اتصل بعد مااعرف ضاع اسمه بين الاسامي اريد اندله ماكو رجفه وخوف كلبي يدك سريع مو خبر هذه حسيته صاعقه نزلت

كوه ميزت اسمه بين الاسامي ادموعي على الفون نزلن الشاشه اتشوهت اريد ادوس اتصال بس مااريد اسمع شنو يكول مومؤتمن اليموت لا مواله الموت

ضغطت ع اتصلت وايدي ترجف مااريده يرد خلي يكول جذب دااتشاقه مصطفى كول جذب

اجاني صوته منبوح كوه ينسمع جان يبجي خفت اكله شنو ردته يجذب الخبر لامؤتمن لا

قبل لايحجي شهكت بالبجي كلبي طلع من صدري اريد افتح حلكه واكله كول جذب كوه حجيت كوه صوتي ينسمع

--مصطفى كول جذب الله عليك بداعت الخوه لاتكول مؤتمن بي شي

--راح مؤتمن كالها وسد الفون ايدي رخت طاح الفون احس كلبي وكف هوه كال مااموت بس ماانساج لويش سوه العكس

ماما. اشبيج غزوله

--مؤتمن راح ماما مؤتمن مات

--اسم الله اشموته

كوه سحبت النفس كلتلها مؤتمن ميعوفني هوه كال مااعوفج بسلا كال بس من اموت معقوله جان يدري يموت لامؤتمن ميموت ماما فدوه كولي مامات فدوه ليش مات

--يمه بتي راح اتموت ولج ماما حبيبتي كافي

هيه اتكول كافي واني الطم على وجهي اني حركت كلبه اي حركت كلبه مات مقهور مني عزاا ماماااااا راح راح لطمت ودكيت بثنين اديه على وجهي هيه اتجر بيه واني ازود ليش مؤتمن ليش اتموت ارجع فدوه سوي التريد اتزوج طلك اكتل كلشي سوي بسلا اتموت حسيت كلبي تعب شي ينسحب من روحي لمن فقدت بعد ماحسيت بشي

صحيت ماما وعمو قتيبه على راسي واني بفرشتي

ماما. والله مامات ولج بعد بالمستشفى هسه خابرت

--جذابه راح مؤتمن كوه كلتها احس بلعومي يحركني وكلبي يوجعني

--ولج ماما والله عايش هسه مصطفى كال

--هوه كلي راح

--والله بس متصوب مامات ياامي هسه اتصل مصطفى مره لخ وكلي ولج انتي كلبج تعبان يماما لايوكف كافي

--متجذبين الله عليج

--والله مااجذب وكومي جابلج عمج العلاج اخذي لايصيرلج شي تره رجعت دگات كلبج ضعيفه

احسها ردتلي الروح من كالت بعد ردتلي روحي موروحه كمت ابسرعه اتصلت بمصطفى اول رفضه رجعت اتصلت رد مصطفى ابداعت اغله شي عندك وين مؤتمن

--بالانعاش

--اني جايه هسه

--لاااا غزل لاتخبليني خليج مامعوزين مصايب خليج خلي يطلع بالسلامه والله كريم

--اشلونه هسه

--لازين هسه طمنونه عليه اتعده الخطر

--الله عليك

--والله يلا روحي لاينتبهون

سديته اشكد اتندمت عالسويته لوباقيه ويا مجان صارله اكيد ابسببي الصار اعصابه انهارت واتعارك وكتلو

--ماما اريد اصلي فدوه علميني

ماما واكفه على راسي صافنه على تصرافتي محتاره بيه ونفس الوقت خايفه خافت رجعلي المرض تالي كالت كومي اتوضي يلا

كمت علمتني اشلون اتوضي وصليت ركعتين وكعدت على السجاده اندعي وادموعي تنزل ياربي اول مره اصلي بحق هذي الصلاةرجعه لشبابه خلي يفرح خطيه بس خلي يشوف طفل ضل ابحسرته ياربي دخيلك ابجاه الائمه عندك

والله كلبه طيب هوه بس يتصرف بتهور ياربي لخاطر سماح هسه اتموت ورا اذا صارله شي

ضليت لنص اليل كاعده على السجاده اناجي ربي وابجي لمن رن جهازي اخاف ارد

اشوف المتصل مصطفى بس

دخلت ماما على صوت الفون اخذته مني وردت امتانيه شنو حتحجي اباوع لنطق اشفافها كطعت حتى النفس لمن كالت

-- الحمدالله يلا اتعدت خلي يدير باله هلمره موكل مره تسلم وسدته

رجع النفس الي كالت كام مابي شي بس كتلتي روحج ورا هذه صحه جنه احصان

--صدك ماما

--اي والله يكول فاق وصحته زينه اتعده الخطر نقلنا لغرفه خاصه

كمت شبكت ماما من فرحتي وبجيت

--ياااا ولج على شنو تبجين بعد

--ماما ذوله اهلي صح مااحب اعيش وياهم بس احبهم كلمن اله جزء ابروحي مااتمنه واحد يتااذه منهم

--ولج كلها تتاذه واتموت وهذه يضل عايش

--ان شاء الله خطيه

--غزل اخاف وره الخطيه شي

--لاوالله ماما بس حق العشره حاله حال مصطفى واحمد هم لواحد منهم لاسامح الله صابه مكروه نفس الشي اسوي

--يلا ان شاء الله محد يتااذه

كعدت سجدت سجده الشكر وضليت احمد ربي واشكره رجعه سالم لمن دخلت ماما بيدها صينيه اكل كالت كومي يلا اكلي راح اتموتين وياريت علمود واحد يسوه

--فدوه اكل بسلا تجيبين طاريه بعد بالموزين خطيه

--دكومي ام كلب الفطير المثلج كون تفرح بموته

--لااسم الله عليه

لميت السجاده كمت كعدت بس مااشتهي كوه اكلت لكمه وماما تتوسل اكل بعد

نفسي مسدوده اريد التهي اتذكرت شغله جنت اخجل قبل اسالها عنها كلتلها ماما ااشلون اتعرفت على بابا وانتم كلمن بمحافضه شكل

--حييل وين رجعتيني غزل عوفج من هالسالفه كملي اكلج

--لالاعفيه فدوه دائما يجي على بالي هذه السؤال بس استحي اسالج

--اي وهسه راح المستحى والخجل وگمتي تتدخلين بالخصوصيه لان عاشرتيهم صرتي مثلهم

--ؤك ابراحتج

--بالجامعه جان استاذنه هوه متزوج وعنده طفلين حبيبه واحمد بس حبيته مااكدرت امنع روحي عنه

--لعد اشلون اتزوجج اشلون وافق جدو

--معتصم جان الولد المدلل عد جدج اشلون هسه مؤتمن ايده اليمنه بس هوه يشتغل بغداد لان يدرس بالجامعه اتعرفت عليه وصار اعجاب واتحول حب

قبل لانبدي بالحجي ويتعلق اكثر كال يابت الناس اني متزوج واهلي بالجنوب كليل اتقبلين قبل لايتورط كلبي بيج

--وانتي وافقتي ابسرعه مو

--لاطبعا اهلي هم رفضو بس بعد سنه علاقتنه قوت كلش وبعد منكدر نستغني عن بعض كلتله اموفقه حتى لوكنت متزوج واكبر مني اهواي

اتقدملي جاب ابو وشيوخ وساده رفض ابوي مابطل رجع هم جاب مشيه مره لخ بس كل مره جانو اهلي يرفضون لان اي ميزه اتخليهم يقبلون ماكو هم عرب وهم متزوج وبالبصره يعني بعيده عنهم

وبالامره الاخيره قبل لايجي كالي راح اجيكم اتقدملج وهاي اخر مره اجيب ابوي والشيوخ تره اهواي ابوج ذلنه والله كمت اخجل اكلهم تعالو واعرف ابوج يردهم

--بسلا شردتي واتزوجتو بسكوت

--بسلا اتطفرين بطلي هالطبع دااحجي

--ؤك واشلون اتزوجتو

-- كطعت الاكل واتمرضت لان عرفت راح يرفض وماراح اصير من نصيبه اخذوني للمستشفى شاف حالتي سائت ابوي كال بعد ابكيفج بس خلي انصحك تره متكدرين اتعيشين اهناك وهاي ضلت يمج بعد

هالمره وافق ابوي ماردهم بس قبل لانعقد شرطت على ابوج انو ميكوله مره غيري لان مااتحمل اشوفه ويه وحده ثانيه جانت مرته حامل ابسمر وهوه من حبه الي وافق

--بس حرام ماما خليتي يعوف زوجته تره حبابه شفتها

--مااعرف الغيره عمتني ردته بس الي ابوكتها هوه راد بس موافقتي بكلشي جان راضي

اتزوجنه اتفقنه انعيش ابغداد جدج عارض ضليت يم اهلي احبلت بيج وكملت جامعه يالله رحت للبصر ويا اهواي عانيت اهناك خاصه جدتج شدت وياي كرهتني بعيشتي

--بس يكولون بابا جان ميت عليج

--الله يرحمه معتصم دوم يوكف ابوجهه جان يريدلي الرضه ارضه خاصه من صرتي وطلعتي اتشبهيني اتخبل بالزايد بعد محد يتجرء يوصل يمي

عشت احلى ايام ويا ابعمري صح العيشه صعبه بس جان معوصني حبه لحد مالله اخذ امانته وطحت بيد جدتج وحفيدها

--لعد مؤتمن جان ازغير

--يبوووو رب الحقاره شايخ من ذاك الوكت وببيتج حارت شسوي بعد وفات ابوج مرمروني شفت الضيم وياهم على ماطلع اربعين ابوج

فوك موته وافراكه ضيم اهله طاح ابراسي سودو حياتي وياهم خلص الاربعين لميت غراضي ردت ارجع لهلي جان جدج بالباب واكف ماخلاني احجي احجايه كال ماكو غير كلمتين اطلعين منا غزل تبقى اهنا لو تتزوجين ابو مؤتمن واضلين حالج حال الباقيات وهذه بيتج بس بت معتصم متطلع منا

--اشكد حقير جدو ويكول مااتهنه ابني بحبه لعد اشلون راد يااخذج لابنه الثاني وبعدين وافقتي لولا

-- مؤتمن سحبج مني جنت منهاره وكتها بعد ماعندي طاقه اتحمل ابقى عفتج ورحت لبالي اكدر من دونج انتي جنتي متعوده عليهم مابجيتي من عفتج

همه عشاير عرفت روحي مااكدرلهم حتى ابوي الله يرحمه رجال فقير موكدهم بس يوم واحد ماكدرت انام بدونج ضليت للصبح كاعده ابجي عليج ماعونت الصبح يطلع وارجع

وافقت اخذ ابنهم الثاني غصبا عني مااكدرت اتخله عنج وهوه جان طاير مواتكول مرة اخو جنت وحبيبته نسه كل هذه ماخلو خاطر لمعتصم ذلونه ورا

--من هيج انهزمتي صدك اشلون انهزمتي

--رحت لبيت خالي قبل لاارجع لبيت جدج جان قتيبه استوه راجع من السفر حجيتله الصار وياي طرح عليه فكره ياخذني ويا جان ابوكتها سهل السفر مو مثل هسه مجرد عقد وياخذج ويا وره ماكملت اتفاق قررت ارجع انتقم منهم واخذج وانهزم

--اممم كملي لويش سكتي شنو اخذتي منهم وخليتيهم لسه حاقدين عليج

--اخذت حقي وحقج وحق معتصم وحق المذله العيشونه بيها

--بس مؤتمن يكولون اهواي امااذيته وضالمته

--هذه بالذات جان يستاهل ولو ينعاد بيه الوقت نفس الشي اسوي بي واكثر

--ماما شنو الوقه الي عد مؤتمن خفتي واتخليتي عني بس شفتيها

--ماكو شي غززل عوفج من الماضي لاتذكرينه بيهم كلمن اخذ نصيبه وخلصت نامي لان عدنه كعده من الصبح انروح انجيب الجواز بلكي كمل

طلعت ماما راسلت مصطفى اساله عن احوال مؤتمن وعذرت ماما على سوته بيهم لان عشت وياهن وشفت الاذيه منهم اشلونها وماما جانت امدلله وذوله اتولوها اتكفخ يستاهلون السوته بيهم والله صدك على كولت مكرم من يكول امج ذيبه هاي لواني اتزوج واضل طول عمري للتكفخ الحمد الله الله عوضني بماما سند الي

مصطفى.

فاق مؤتمن جنت واكف يمه اول ماشافني ابتسم

--خره بلشتك لبالي اتموت واخلص منك كلتها واني اضحك الفرحه ماسايعتني

--همس وسفه اموت واني بعدني مامادبك

دنكت بسته من راسه -- الحمد الله على سلامتك يخوي

--هز راسه يباوعلي مبتسم اكو لمعه بعيونه حيرتني

جيك وضعه الدكتور كال يومين ويطلع وضعه استقر بس ضحكه وحده ماكو بوجهه

ضليت ويا مرافق بالمستشفى

صح مكرم ويانه بس شفته اكثر اعتماده وطلباته جانت يطلبها مني حتى للحمام جان يطلبه مني ادخله

بعد هاي الكراهيه والحقد عرفت هذه كله سطحي يضل الاخو سند

كعدت بليل على صوت ونته رحت يمه لكيته الصخونه صاعده عنده سويتله كمادات خفت حرارته بس ضل يون

رجعت لمكاني فتحت النقال راسلت غزل لعله يحن كلبها وترجعله رسلت اول رساله ماردت اتصلت وفصلته دقايق واجاني مسج هاامصطفى شنو الصاير

--ماكو شي سلامتج غزل مؤتمن تعبان بدونج

--مصطفى مااكدر ارجع

--جربي اتكملين وياه وحك علي يحبج

--راح اتكله وين مكاني مو مصطفى اني ثقيت بيك ودمرت روحي بعد ماصار زين وياي سمعت كلامك لاتغدر بيه راح يذبحني

--ماايااذيج وداعت امي اخوي واعرفه اني اشيل مسؤليه الصار مااخلي يوصل صوبج احد

--لااا مصطفى دخيلك لاتخليني اندم لان سمعت كلامك ماراح يرحموني اعرفهم حتى لوهوه سامحني ولوه شاكه يسامحني ومستحيل يرجع مثل قبل وياي بس هم همه راح يعذبوني ماما صارلها 14 سنه ولسه يحجون مواني ايام اكيد راح يحركوني

--لاتخافين مؤتمن يوكف بوجهم واني بضهرج

--مصطفى مااكدر اعيش بدون ماما والله اموت انتم كلمن امه يمه مدااتحسون بالاحسه ادري بي اخوك ومتقبل عليه بس مااكدر اكمل وياه متدري شنو جنت احس من يضربني كلكم اتفكرون بس ابمشاعره

--اني لوافكر بس بي ماجان خبرتج جارحت سحلتج ورجعتج اله بس حسبتج حالج حال هيفاء

--لعد اتركني وكمل جميلك وياي لاتخليني ارجع هوه فتره ويتقبل الامر راح ينسه مصطفى بداعت الخوه لاتخليني قلقه والله ماراح يرحمني ولااكدر ارجع اكمل مااكدر والله اهواي حاولت وفشلت اتركني لخاطر الايام الحلوه الگضيناها سوه لاتخليني اكرهك

--لاهاي هيه ابراحتج يلا روحي مودعه بالله

غلقت النقال كل التحجي الها حق بي بس هذه شيقنع كلبه وينساها

خلصن اليومين بطلاع الروح لان مؤتمن الله يسلمه ضخم وثكيل ونوم ماكو للصبح يتالم من الجرح ولازم اضل ويا وبالنهار ناس رايحه جايه علما طلعنه نكضان من التعب

الطريق كله امتجي على متني اخاف جرحه ينفتح احس متني انخلع متكلي اشثكلك

--اكتم موحسبالك مريض حرام بالحرمه هسه اسحلك لاتضل تلغث

--يابه انكتمنه بس حرك روحك تره مااحس بمتني بعد

--هم عندك احساس انته

--هااا اه صدك شتذكر عن الحادث

--هه اشبيك وجهك اصفر عالمعموم لاتخاف مااذكر غير منضرك مثل الحرمه جوه اديهم

--هذه موت مولعب جهال هسه لوماخذ حقي منكم اقلها اموت مرتاح مواستوني بلشت وروح حتى الله ميرضاها

--تاخذه تاخذه لاتشيل هم كالها واعدل روحه انتجه عليه اكثر

وصلنه لكينه الذبايح بالباب وشتغل الرمي حركو الجو خوعماتي ابعرس صبوحه ماهلهلن هالكد حسسوني جايين من الاسر

--هاااا يجدي كمش لاتطير اشدعوه هالكد فرحان

--انكتم وسند اخيك عدل

--طبعا حبيب كلبك هذه لواني دجاجه متذبحلي دهاك سنده انته خلي اولي لان صاير مطي

سندو مكرم وكاظم واني بوجهي للغرفه شمرت روحي وقفلت النقال لان مااخلص من اتصالات غزل لازم اول باول الحدث ينقل

ونمت لليل كعت على صوت عمتي اتكول يمه كوم اخوك يريد للحمام

--عمه صدك تحجين جاميولي

--دكوم يايمه سنده اخيك ميقبل غيرك يخجل ينسند على احد

--اهوووو كمت بس وخري

كمت رحت عين فاتحها وعين سادها وصلت لكيته كاعد انته متكلي شنو بويه نام ماعندك احساس ومتحس بالتعب ولك لواني منك 6اشهر مااكعد بعد هالضربه

--تعالي كومني وانجب

--استلم فوكاها يغلط ويكلك لاترد اخوك الجبير لازم تحترمه

كومته بطلاع الروح ويكلك البت عليش انهزمت من ضيمها وعلي

باوعلي بقهر ونزل راسه حزت بروحه الحجايه مااعرف اشلون فلتت مني بداعت الشقى

اتعدت الايام ويوميه يجينه المضمد يعالجه اني نقلت نومتي يمه اخاف يعتازني باليل

وسماح هم يمه والله يعمي العده مثلها مره بكنوز الدنيا متتبدل وكفتله وكفه امه مومثلها بس صبوحه على راسه تفتر جنها خفاش

سماح. تره مؤتمن للصبح مانايم

--اسمعه يخوي حسرته اتصحي الميت

--سوده ابوجهي والله اشوفه وابجي كاضيها صفنات وحسرات

--على شنهو تبجين تره ميصير ابعينه ازمال غسلت ايدي منه من عشكله زعطوطه

--وينها هسه الزعطوطه اشو علة كلبه واختفت

--ينساها لاتشيلين هم هسه تجي المعفنه على كولتها خره بيها شكو شغله عاطله خلتها ابحلكي تراهم مايرهمون احسن هيج يبتعدون لاهيه تكدر تتطبع على عيشتنه ولاهوه راح يتحمل تحررها ماراح يرتاحون

--ربي يبرد كلبه ويشيلها منه

نحجي ودخلت ام وجه النور تهاني من ضواها نورت الغرفه خره بصبوحه على هذه الاختيار

وفوكاها تتنعوص

الله يكون بعونك مؤتمن من حضن غزل لتهاني والله يمكن رب العالمين راح يطلعها بيه عالسويته بي والا اليهود ماضلمو للمسلمين ابكد ماضلمته بهالمصيبه

سلمت وباست الروس كلها اشكد لوكيه بقه بس انعال امي ماباسته وامها بعد اكثر وانوب جايبين وياهم وحده اتكول منغوله متلاحكي باابر عائله عتيك للبيع صدك جذب مؤتمن جااشكد امغركيك اسحور وهيج عاميك

جدي. حضرو روحكم اول ميشيل الضماط نجي ناخذ بتنه

اباوعها شكت حلكها من اذن للاذن

مؤتمن. مووكتها خلي ارجع غزل وبعدين اتزوج

تهاني. يااامؤتمن جامونته رجعتها لهلها وكيفنه شنو اتجيبها

مؤتمن. رجعتها لهلها اجيبها هاي راجعتلي لاتدخلين

--شنهو ماادخل غير اني مرتك والي حق

--تهاني هالمره عارضتي اعله صوتج مره ثانيه اكوم اسحك على راسج

--اسفه يبعد روحي بس والله طولت يمؤتمن وهاي چدام جدي خلي يسمع تره اهواي ذليت روحي الك واتنازلت عن اهواي اشياء بس امبين انته مومثل قبل اتغيرت اهواي بعد عرسك الجديد

--لااتغيرت ولاهم يحزنون هسه مووكتها بعده جرحي اخضر ومشاكل عندي لازم احلها تانيتي اهواي كملي ماضل شي هانت هالشهر ان شاء الله

جهازي رن فتحته شفت مسج من هالثوله واصل تسال عن احوال الثور الكدامي

--هااا ولج

--شنو دسوي

--بنتي انتي شدخلج بس هم مااخليها ابنفسج جاي اعزف للعشاق وهمه يغردون

--منو مؤتمن وتهاني

--عفيه جاي يحددون الزواج

--عفيه هذه الزواج اشكد فكر اول شي انطرد وبعدين جابني وهسه انكتل الله اليستر بسلا اتموت انته

--خره بشكلك اني شكو بت الزماله

--لانغلط عيب وبعدين هوه خطيه اهواي انصاب غير انته اخو شيل عنه اشويه

--ومااشيل غير الموت كون يمي واتفل بنص وجهج بعدين اني شلت منه انكس هم خلصته منج

--امم هم صدك شوف اتصلت بيك علمود اكلك طلع جوازي حسافر

--هاا انتهت مابدلتي رايج وترديله

--لامصطفى فدوه ماعونت ارجع حياتي القديمه سد السالفه

-- على راحتج خويه يلا بيها الخير ولي خلي نخلص اشوكت اتصخمين

--الاسبوع الجاي نطلع كملنه حجز لويش متجي اشوفك قبل لانروح اخاف بعد مااشوفك

--الله كريم اشوف اذا فرغت اجي بس باجر نفتح جرح مؤتمن وخلصت ماعندي شي

--اي تمام ابربك دزلي صوره للغورله الكدامك

--ولي لج اتورطيني تردين هسه الكف ولي يلا

--اموووح يلا باي

--هههه خبال ولي

جنت ابتسم واكتب شالت راسي لكيت مؤتمن صافن عليه سديت النقال هذه نغل خفت يكشفني لان نضرته جانت تقلق الواحد كلتله اي مؤتمن اشوكت ناوي تنزل للشغل

--هاليومين بحيل الله بس افتح الاخياط

جدتي. يايمه اتعب روحك وانته مريض ماطاير الشغل

جدي. هذه صكر مينخاف علي عوفي ابراحته

والله لوتدري الصكر مالتك من صار فراشه خرب بغيرتج غزل مالكيتي غير اترف كائن اباوع للاغم الكدامي يقنع جدتي علمود يطلع ولله لوتدري اسمك وين خلته الفاهيه اطم روحك

اتعده اليومين ومؤتمن فتح جرحه واليوم اصر يطلع للشغل وياي

وصلنه للمصنع كاعدين بالمكتب يعلمني على الشغل اشلون اني اعرف ومشي بس اكو امور موتمام بيها يابه مورجعت للشغل بعد عليش اتعلمني

--هالمره اتعدت وطلعت سلامه يجوز اموت المره الثانيه خومو انضيع تعب عمرنه اتعلم عدل لخاطر تلزمه من بعدي

--لاتخاف انته متموت وحتى لوسويتها واتوكلت مكرم بالوجود

--هذه تعبي واملاكي مكرم صح مثل اخوي بس هاي افلوسكم انته وخواتي

--اهااا ونسوانك

--اي عفيه نسواني الي يسمعك يكول خيعونه هيه باقيه وحده وكل مااباوعلها اتكول تعبانه من الشغل اتلف راسها وتنام الله وكيلك بس صيت وسمعه

--هاي بلا محلوله نحرمها من الورث تهاني هم وجهه ميساعد هاي انسويلها خروج من القبيله اصلا وو يلا عوفنه من هالحجي

--عليش عبرتها كمل غزل الي مااعرف اراضيها وين

جان يحجي ويباوعلي بنضره مااعرفت افسرها انوب دنك اخذ حسره طويله طلع جكارته وراح يم الشباج فتحه وكف يدخن

دخل ابو الجاي عمي عمران سلم واتحمد على سلامته خلانه جاي وكله المؤتمن عندي طلب يبويه

ابشر اعتبره مكضي

--عندي اختي حالتهم تعبانه وعدهم بت اريدك اتشغلها يمك اتساعد اهلها يتامه همه

--خلي البت يم امها واني اخصصلهم راتب

--لايبوي عندك مچان فارغ شغلها ماعندك خيرك جثير امغركنه مشكور

--شنهو تعرف تشتغل اني حاضر

--والله يبوي مااعرف شنو تعرف بس هيه طالبه يعني نص انهار بالدوام ونص اهنا حتى لو نص يوميه حرمات اتيه مستقبلها

--يابه حتى لوساعتين تجي اهنا خليها على الحاسبه والطباعه ماعدنه شغل اهواي بيهن ومن باجر تكدر اداوم تامرني ابو سعدون انته وهلك

--والله عرفتك متكصر الله يطول ابعمرك بيوي وينولك الابالك ويفرجها عليك

--امين كالها واخذ حسره

طلع ابو سعدون كلتله مؤتمن وين اتشغلها متكلي اتكلك طالبه يعني متفيد وعدنه محاسبين اكفاء هاي شنو ابربك انتي قانع

--يالاغم ايكلك يتامه وذوله اعرفهم نفسيتهم عزيزه ميقبلون مساعده خليها تجي اهنا بالمكتب يمنه تطبع تستنيخ يعني اتفيدنه كم شغله

--والله هاي ضلت يمك انته التدفع

--كول يالله هذه الخير كله على اجرت هاي راح توكف

رجعنه للبيت وصلني وراح مانزل مااعرف وين بس والله كلبي حاسني راح لبغداد يشتم هوه المحبوب اووووف يمؤتمن والله ندمت على سويته بس بعد فوات الاوان

رجعت ميت تعب هسه هذه جرحه بعد اخضر ومن الصبح لسه بالمصنع شراح يوصله لهناك شيجيبه لله يصبره وينساها وهاي قفلت مترضه ترجع بس هم حقها حتلو هوه عفه عنها هنه يخبلنها بسحورتهن

نمت ماكعدت غير وجه الصبح اني مامتعود على هيج تعب وشغل كعدت ميت جوع اتمغطت وكمت للمطبخ اتكول عايش ويه اوافي عمي دخيل الحمزه ماخالين كلشي بس الكدور شنو هوايش خومو هوايش لاكو وحده اتسويلي اكل ولااني اعرف خرب بالحظ هسه شسوي بله لااكو مطعم واروح

رجعت للغرفه ماضل شي للصبح اتحمل شسوي لكيت الف مكالمه من الثوله واصله شتريد معقوله باجر اتسافر هاي لوشنو اتصلت اول رنه ردت هاولج ثوله شكو كاعده لسه

--دااباوع صبوحه وام مؤتمن

--شنهو

--قصدي فلم رعب دااباوع وانته وين جنت

--خامد من الصبح لليل انسحل ابوي بالشغل وانوب كعدت لكيت ماكو اكل

--يااعزا هاي سووها وياك جان يخلوني اني هم بلااكل بس عادي ولايهمك كوم سوي واكل وصخ المطبخ على اعنادهم

--ولج كلشي مااعرف

--افتح كام اني اعرف اسوي مخلمه كوم خلي اني هم اسوي وياك جوعانه

--اييي الله جابج

دخلت للمطبخ اتاكدت الكل نايم جان الهاتفون بذاني خليتها كدامي الفاهيه اتسوي واني وراها احترك البصل وهيه صافنه ولج غزيلان شسوي بعد

--انتضر خلي يتحمر عدل انوم ذب طموطه

--طموطه شنهو

--طمطايه

--خره بهلج غزل اشتغلي بلا حجي خليج بس نضري لاتجفصين لج غزيلانننن راح اشمرها

جاي ادير الطماطه ودخل مؤتمن من بره بعد اريد اطفي النقال مااعرف شلته ابسىرعه فلت طاح طكت الشاشه اخذته من الكاع شلت راسي لكيت مؤتمن امجتف يبتسم يباوعلي بنضره شلتني لاتعرفه ندم لاتعرفها عتب حرت شوصفها بس ماحجه الرجفه كمشتني خفت عرف لوشافها هذه وين جان اشلون دخل كوه طلعت مني هاخويه شسوي بره

--جنت يم الشط عليش كاعد انته

--هااا اه جاي اسوي مخلمه جعت

--اممم

اجه يمي بس امدنك دفعني عن الطاوه واخذ خاشوكه وبقه يحرك بالمخلمه بس هادء بشكل موطبيعي

--حاط ملح لولا

--هااا

--ملح ملح

جان يحجي ورافع احواجبه كلتله لا بعدني

--امم اشمره من يمك

يرش بالملح عالمخلمه بس شكله امبين تعبان حيل كوه واكف على طوله كل اشويه ينتجي عالطباخ بيده الثانيه كمل طبخ المخلمه وصبها بماعون وخلاه على الميز وصل يمي دكدك على متني وهوه يبتسم كال اكل بالعافيه وراح

كعدت بس كلبي طفر من اظلوعي اريد اسيطر مااكدر خوف على خجل بسلا مامعقوله شافها

لوحاس بشي مؤتمن جان هسه اني بخبر كانه اي اكيد ماشاف بيه بخت خال هاتفون

حتى الجوعه طارت انسدت نفسي عفته وطلعت بره هسه هاي اشلون انبها حتى رقمها موعندي والنقال انكسر استغفر الله مؤتمن شكله هادء لوشايف شي ميضل بهالهدوء للصبح واني عالشط وهذه متنفسنه الوحيد يمه شكو واحد عنده هم يروح يمه

كاعد عالشط سمعت خطوات وراي انداريت لكيته واكف وراي

--شصايرلك مصطفى

--هااا لاماكو شي هيج كعدت ضايج جوه ماكو احد

--عليش مارجعت نمت

--شبعت نوم كلت اكعد اشويه لحد ميجي وكت الدوام بعد متسوه نومه وانتي مانايم صار يومين متواصل

--انام ان شاءالله قريب ماضل شي

اندار للشط يباوعله كال اشكد ضام اسرار هذه الشط اخذ نفس طويل وكال يلا روح حظر روحك صار الصبح خلي انروح للمصنع

--ترك انته تعبان خليك واني رايح مكانك

--خايف عليه مصطفى لاااا هاي جديده هههه

لاتخاف يخويييي هانت كالها وراح جوه

كمت ورا غيرت ملابسي طلعنه حتى بلا ريوك اخذت السويج سقت لان وضعه تعبان اباوعله خله راسه على الكشن تجتف ونام

اني هم خففت السرعه بلكي يرتاح اشويه طولت الطريق وصلت قبل لااندهه كعد فتح الباب ونزل قبلي نزلت ورا صحت علي لان مسافه صارت بينه كلتله بس اودي النقال للتصليح واجي اشرلي بيده روح

صعدت سيارتي ورحت لمحل النقالات نزلت انطيته النقال كال للعصر كامل تعال اخذه رجعت للمصنع

رحت لغرفت مؤتمن علمايسويلي غرفه خاصه ضال ويا وهم اتعلم منه كم شغله بعد دخلت لكيت مكرم يمه جانو يحجون اول مادخلت سكتو بس مكرم وجهه مطعون وجان يتوسل بمؤتمن من دخلت مؤتمن مدنك يلعب بالقلم ويبتسم كلتلهم هااشباب اتريكتو لا

مؤتمن. امتانيك تجي

مكرم. اتريكو بالعافيه اني سبقتكم بيت جدي كالها وطلع بس اوضاعه امخربطه طلع مطعون منا

--شصابه هذه

--مابي شي غلط بطلبيه وجاي يعتذر

--اها يلا لاتضوج روحك

--الاكبر منها ماضوجتني اضوج من هيج شي تافه لاجاماعرفتني بعدك

--عوفني هسه منك لاعرفتك ولااريد اعرفك اطلبنه شي ناكله

--طلبت جاي بالطريق

كعدت انتضر الطلبيه لمن وصلت دخلها ابو سعدون وجابلنه جاي كال كملو علمود تدخل بت اختي اتشوفوها

اشرله مؤتمن بس انخلص اباوع لحركات مؤتمن من ياكل بهدوء وبرود مااعرف هاذي طريقته بالاكل لو وره التعرضله هيج صاير لان مامنتبهله قبل بس شكله امرتب

اشتعل جدي هذه تلعلومه من هوه وزغير امدخله دواوين واعلمه على كلشي طولت البال والحكمه يتصرف برزانه وفهم مومثله نشطح ونزكط امبينه هوه يكمش كلشي الشيخ

خلصنه الريوك طلبنه جاي دخل الجاي

يبويه اذا فارغين اتفوت اتشوفها موجوده بره هيه

--خلي تتفضل ماعدنه شي

طلع هوه جنه نشرب ودخلت سبحان الخلقها موش مره حلقوم دخيل العباس حوريه على الكاع يبوووووي اسمع مؤتمن سوه حمممم شلت راسي لكيته خازرني

--عمي ياتخزر دشوف ضيم الله

مؤتمن. هلابيج يخوي اتفضلي

--هلابيك استاذ

--من انعلج ابو الاستاذ بوييييه

مؤتمن. اي خويه شنو اتعرفين تشتغلين

--اي شي اني حاضره بس الصبح عندي دوام لان اني طالبه ثانويه

--تمام خويه اتعرفين عالحاسبه

--لابس اتعلم

--طفرت كلتلها اني اعلمج خزرني مؤتمن رجعت كعدت هوه يسال وهيه اتحاجي بصوت اتكول غندور ناعم اشتعل جدي كالت اي شي تردون اني جاهزه حتى لواول شهر متنطوني اجره لحد مااتعلم

--عمي يامننطيج انطيج راتبي وراتب مؤتمن وصبوحه هديه

دنكت خجلانه من فدوه اتروح صبوحه للخجلان خره بيك جدي واتريد اتورطني بالصخله العدك تعال شوف الضيم

مؤتمن. كوم اطلع منا وصيح ابطريقك ابو سعدون وانتي بويه باجر اداومين اهنا اشوكت مااطلعين من المدرسه تعال عدل للمصنع

--بس مااعرف انطوني صبر علمااتعلم ماراح اخذ وقت اهواي استاذ ابسرعه اتعلم

--تمام باجر ان شاء الله تجين وتبدين العمل

--شكرا استاذ العفو نسيت اتحمدلك على السلامه

--كلتلها الله يسلمج يبعدو اهلي وعشيرتي مابي شي اصحى مني اتحمديلي اني

--العفو مافهمت

مؤتمن. روحي خويه ماكو شي الله وياج

هيه طلعت اني فاك حلكي كال سده يالاغبر ولك فضحتنه اشبيك مشايف نسوان

--والك وين شايف هيه سمر وسماح وذني اي صله بالنسوان ماكو

--اها اشبيها سمر لازم ماعاجبتك

--ابربك انته مقتنع اتريد اتسرحني بيها لواتزوجني ولك صخله يابشر افهمو صخله

--كافي لغوه اني راح انام ساعه وكعدني

--وين رايح للبيت

--لاعندي داخل المكتب غرفه

كام صدك فتح باب والله لبالي حمام طلع غرفه ازغيره بيها سرير دخل شمر شترته ونتمدد اشرلي سد الباب وطفي الضوه اي جان سويتهن لومتعود على دلال سماح كمت امري لله طفيت الضوه وسديت الباب

مرت ساعه دخلت ردت اكعده لكيته غاط بالنوم عفته هسه على شنو كاعد شغل اني موجود اكمله خليته للعصر لمن كعد وحده طلع من الغرفه يفرك بوجها كال انته خبل عليش ماكعدتني

--ماعدنه شي كملت الشغل

--ماأجه مكرم

--لا بس خابر كال من يكعد خلي يخابرني

--تمام

--اشوكت نطلع

--عندي شغله اذا اتريد اطلع

--لاماعندي شي بس ردت اجيب النقال

--تمام روح اخذ السياره اني اجي ويه مكرم

جان يحجي ويكلب بالاوراق يشوف شغلي يخاف غالط بشي

طلعت وعفته غاط راسه بالسجلات

وصلت للمحل اخذت النقال دفعت الفلوس وطلعت خرب بلشتج غزل اشكد متصله من البارحه لسه ردت اتصل بيها بس اتصل مؤتمن رديت كال تعال للمصنع ابسىرعه

--عليش لسه بالمصنع تره صار اليل

--لاطلعود الموضفين بس اني طلعت شغله تعالي بسرعه

قلقني وماقبل يكول صعدت سيارتي ورحت ابسرعه خفت صارله شي وصلت دخلت ابسرعه لكيته كاعده هوه ومكرم خير شكو تره قلقتوني

كام اجه يمي جان يمشي ويطك بركبته وصل يمي ضربني بوكس كلبني بالكاع دنك رفعني من ياختي كمت ويا مامفتهم شنو الصاير رجع ضربني

--شكو شنو الصاير مؤتمن عليش اطگ

--لايخوي ماكو شي بس ردت اشوفك تتحمل طگ لا

--شنهو عملت

--ولك والله من البدايه جنت شاك بيك بس مااتخيلت توصل وياك لهيج دكه ناقصه

--غير اتفمهمنيييي شكو

دنك خنكني احس كطم اللوزه بيده كوه كدرت ادفعه لك اشبييييك اتخبلت كام دفرني اجت ابطني زعوني دم

--النقال

--شنهو

--النقاااااال وين

--شتسوي بي ماانطي غير افتهم شتريد بي

دنك لوه ايدي بس دفتعته ماانطيته لمن اجه مكرم كمش ايديه وهوه طلع النقال من جيبي كال الرمز

--ماانطي

دنك سحب ايدي مكرم رفست ماانطيت ايدي بس ماكدرتلهم لان اثنينهم واتولوني مكرم كامشني وهوه يضربني لمن نهوني خلوني اخر نفس سحب ايدي حتى ماكدرت امنعه فتح البصمه وكف على صفحه ومكرم بعده كامشني

انتجه عالحايط يراسل ويبتسم

--مؤتمن اتركها

--امم

--مؤتمن سافرت

شال راسه يباوعلي رافع احواجبه بيتسم بستهزاء رجع دنك يراسل

مااعرف شنو يسوي ضليت ارفس ردت مكرم يهدني كوه كدرت ادفعه وكمت وصلت يمه قبل لااسحب النقال انطاني بوكسي ومكرم جتفني من وره خله النقال ابجيبه وجه يمي دكدك على متني كال سهلا مرجوعه

اشر لمكرم شمرني وطلع بس قفلو باب المكتب

عليه وراحو دكيت على الباب صحت ضليت اصيح على الحارس اريده يفتح الباب ماكو امبين اموصي هذه حاسب احساب كلشي كاطع حتى الكهرباء وفاصل النت

كعدت عاجر شنهو راح يسويلها مؤتمن اكيد يكتلها

بيدي وديتها للموت بسلا مؤتمن يحبها ميكتلها يجوز يضربها اي اي بس يضربها عليش يكتلها قابل شسويت هيه

كعدت وعقلي يودي ويجيب واتخيل غزل بيده اعرفه ماراح يرحمها

غزل.

اليوم سفرتنا لدهوك اني واصدقائي الاتعرفت عليهم طبعا بعد الحاح مستمر وتوسل بعمو قتبه يالله قبل جان معارض يخاف عليه بس من شاف صديقاتي وهنه هم اتوسلن وعرف شركه التاخذه وافق وهم وصه ابو الشركه علينه يالله ارتاح

كعدت من الصبح حظرت ملابس واخذ جنطه ازغيره بيها غيار واحد لان ماراح انبات اهناك نجي بليل واخذت وفوني وطلعت ماما وعمو نايمين ماكدرت اطلع اذا مااسلم عليها دكيت الباب عليهم طلعت ماما تفرك بعيونها

--ماما اني حروح

--الله وياج يعمري ديري بالج على نفسج وخليج عالفون اول مااتصل اتردين مواتخليني قلقه

--تمام بس اريد افلوس

--ولج ماضل عدنه غزوله ماما اهواي اتصرفين

--يلاماما بس هالسفره اشو بعد يومين نرجع لمريكا وللقحط الجنه بي

--راحت جابتلي بس موهواي امبين حالتهم تعبانه صارت لان مجنه امحسبين هيج احساب انو نبقى هالكد اهنا

سلمت وطلعت لكيتهم امتانيني بالباب ركضت اضحك صعدت واني طايره من الفرح اول مره اطلع ويه مجموعه شباب وهيج ونسه صح امريكا احنه حريا وعيشه حلوه بس ملل ماكو اصدقاء عرب هاي المه الحلوه والونسه ماموجوده اهناك جمود

الطريق يخبل شغلو اغاني صورنه اسنابات وضحك ركصنا هوسنا اشكد اتونسنه احلى طلعه ابحياتي جانت اجواء متنوصف وصلنه مطعم نزلنه مكان هم حلو كله متنزهات وشلالات مكان تحفه والثلج ينزل

فرشنه سفره وكل واحد جايب اكل شكل كملنه اكل كالت رزان غزل كومي نصنع رجل ثلج بين ميخلصون الشباب

--ؤك من زمان مامسويته مستاقتله يلا تعالي

--انتي كعوري واني ارتب

--تمام بس اديه اثلجت ولج

--لبسي جفوف ويلا ابسرعه تره راح يرجعون

كمت اني اسوي بلورات وهيه اترتب كملنه صنعه كالت معتازين خشم بعد

--ماكو شنو انخلي

--لعد خلي انفلشه موحلو

--لالا انتضري خلي اصوره

فتحت الفيديو بديت اصور صاحت رزان لج غزل بلاخشم موحلو انتضري خلي ادور شي

--لاعوفي حلو خلي اكمل تصوير وادفره بس والله هسه خشم تهاني وكته

--منو تهاني

--مرت زوجي يجي تخم ويه هذه الرجل الثلجي بس عيع لاخلي هيج لااضلمه خطيه هسه يصير بي زفر هاي تاكل ومتغسل

--فلشي يلا دنروح الشباب امتانينه

--اوكفي خلي ادفره واتخيله صبوحه

هيا صبوحه موتي تبن لك ايتها الحمقاء لماذا لاتموتي كم اصبح عمرك ايتها العجوز الشمطاء

ضربتها على راسه اتفلش كلتلها انضري كم انتي ضعيفه بلا حفيدك المتعجرف تبا لكم كم انتو عائله مال حرق

--غزل تره لطمتي بالغه العربيه كافي

--اني هم هيج دااحس

قطعت التصوير وسويتله ارسال لمصطفى بس ماكو رد تركته

ورحنه نركض يم الشله مالتنه لكيناهم امسوين حفله ويركصون اشكد حلووو والبنات اتهوس وياهم فتحت التصوير اصور كل لحضه مافوتت كلشي لان اعرف هاي اخر جيه للعراق الي اريدهن ذكرى وكلشي اصوره ادزه لمصطفى اكله ابربك شوف وانته اتريد اترجعني لصبوحه

اليل وكثر الثلج كالو منكدر نرجع لازم انبات اهنا

خبرت ماما كالت ولج اشلون اتباتين وحدج هسه عمج يجي وراج

--لاماما راح يحجزولنه بس انتو ادفعون افلوس الحجز وعمو ميكدر يجي لان الطرق مسدوده دااكلج والله ماعليه ماما

--ؤك تمام بس ديري بالج على روحج لاتضلين اطفرين ماما تالي يتعب كلبج

--لاهياتني كاعده ويه البنات علما يخلصون الحجز

--يلا حبيبتي روحي اتونسي

رزان. خلصتي من امج جيبي الفون يلا همزين حنبات اقلها انودعج

--هسه خليني فرحانه اله اتذكريني

--شنو شعورج وراح اترجعين لمريكا وحيده فريد بلا اصدقاء

--اووو تره والله حبجي رزان انطيني الفون

--انتضري خلي انسجل هيج لحضات تاريخيه

--ولج يالحضات تره والله ضجت انطيني الفون

همه يتشاقون ويضحكون واني ادموعي بعيوني اخذت الفون غلقه

ضلينه كاعدين لمن كملو الحجز رحنه للفندق ضلينه للصبح انسولف ولانمنه طلعن البنات جابن كم حاجه للمطبخ لان اكلهم جان غالي وحنه عدنه طباخ فقررن انسوي اكل اهنا

عفتهن مااشهتي وجنت قلقانه مصطفى كم مره اتصلت بي ميرد خفت صاير شي اخر شي ايست

ضليت اباوع فلم لوجه الصبح شفته اتصل ابسرعه رديت البنات نايمات

جان جوعان وني هم ضلينه انسولف وانسوي اكل بس انكطع الاتصال على ساعه هاي يمكن انكطع الكهرباء

غلقته. اكلت ورجعت نمت ماكعدت غير الضهر كالو اليوم هم ثلج والطرق مقطوعه منكدر نرجع رجعت لنومتي كعدت العصر جلبن البنات نطلع بس كلما اتذكر بعد يوم سفرتي ينقبظ كلبي اشكد اتصلت بمصطفى وهم ماكو مغلق طلعنه اتسوكنه وافترينا شفت مسج وصلني من مصطفى فتحته كلتله وين ولك من البارحه اتصل وين جنت

-- عندي شغل بس وين انتي

--صارلي يومين بدهوك باجر ارجع لربيل

--امج يمج

--لاماما بااربيل اني اجيت ويه اصدقائي شوف دزيتلك فيديوات شوفهن

--شوكت اتسافرين

--بعد باجر

--اريد اجي اودعج وين اشوفج

--ياي اشكد حلو واخيرا اقتنعت تجي اشوفك ؤك هسه ادزلك الموقع مال الفندق باجر تعال لان اليوم مااكدر ارجع

--تمام

كالها وسده هذه اشبي دزيتله الموقع كلتله شنو هذه المتعجرف يمك لويش دتحجي وياي بجمود

دزلي ؤك يمكن مؤتمن يمه

رجعت يم البنات

رزان. غزل دينزل الثلج بغزاره

--اي ولج متت برد خلي اشتري كلاو وجفوف

--فونج يضوي

--يمكن مصطفى بس لحضه

--غزل لاتضلين اتدكين اسوالف فشله الشله امتانيتنه

--بس لحضه

فتحت الفون لكيته منطي ؤك عالفيديوات غلقته

رجعنه للفندق كالو من الصبح نطلع لاتعطلونه نمنه من وكت

للصبح اتحضرنه للرجعه بليل السفر مالتي صعدنه بالسياره بس مومثل مارحنه رجعنه الفرحه جانت لااقل لان تعبانين واكثرها نايمه اني هم الله ذب شكو نوم عليه

وصلنه نزلنه رحنه اني ورزان وكروان كال اوصلج وهم اودعج لان بعد منشوفج

كعدنه بالحديقه امتانيه مصطفى الي كلمااتصل ينطيني رفض مااعرف اشبي جنت امدنكه اتصل وهوه يرفض اخر شي كلت اكتب مسج دااكتب ورزان اتسولف وياي غزل ذوله اثنين صاكين يباوعولج

--اممم گوم كروان اكتلهم جنت احجي وامدنكه

--ولج دباعي نعمت الله اشلونهم بس سمارهم كافي

--لاع ماطول اسمر مااريده خلي الج اني كارهه هاللون

شلت راسي گلتله انته مورجال ويانه كوم شوف منو ديتحارش بينه احجي واضحك انداريت وياريتني ماشفت الكدامي جمدت مكاني واني اشوفهم ----

الرابع عشر من هنا

تعديل المقال