رواية تبديل عريس الفصل الحادي عشر 11 بقلم جمانه السعيدي
سلسبيل...يومين وبابا ينتقل من دكتور الدكتور
كل الدكاتره أكدو نفس النتيجه
المرض منتشر بجسمها وماكو اي امل للشفاء
اله معجزه من رب العالمبن
اليوم الثالث قائد رجع الاهله خطيه مسكين اتبرع بطلين دم الامي
شكد محترم مايكعد ويانا بلغرفه حتى لا يضايقنا
طول الوقت كاعد برا بلممر
وكل وجبة اكل يروح بنفسه يجيب اكل وجاي ويرجع علينا
كلامه على كد الاطمئنان
فعلا تربية شيوخ شخصية مثاليه بمعنى الكلمه
محترم وابن اصول
بعد يومين رجع مثني دزلي رساله
مثني...سلسبيل ردي عليه اعرف الضروف ما تسمح
بسبب كورونا والناس خايفه من الموت بس اني مجاي اشوفج بلجامعه حتى احجي وياج
انتي ليش مداومين الايام الراحت كلهن انتي ماكوووو
بس اريدج تردين عليه سامحتيني
اني اسف اني قبلت بقرار اهلج خلاص راح تكون علاقه عاديه على كد السلام
ومراح أقرب عليج
اهلج عدهم حق
بس مرات اني احتاج احجي وياج لان انتي اكثر وحده فاهمتني
يعني احجي وياج وأخذ رائيج بشغلات ضروريه بحياتي
ممكن اذا ما تضايقين من كلامي ردي عليه
سلسبيل.... مثنى امي بلمستشفى بين الحياة والموت
مستحيل اكدر احجي وياك
ممكن تدعيلها وبعد عندي طلب لا تتواصل وياي
لان مراح اكدر ارد عليك
اذا تتفهم موقفي شكرا جزيلا
مثنى....العفو انشاء الله تكوم بلسلامه
بهذا اليوم اليوم السابع بلمستشفى
رجع بابا محتار وشبه يأس من حالة امي
سلسبيل...شلون بابا امي راح تروح منا
بابا...دزيت التحاليل الأحسن دكتور بلهند اذا شافهن وكال اكو علاج اخذها واطلع اعالجها شكد مايكلف العلاج ميخالف
سلسبيل...انشاء الله اكو الها علاج
كلنا نتمنى نعالجها وتتحسن حالتها
بس الضروف صارت ضدنا بهذا الوقت بلذات انتشرت كورونا بشكل موطبيعي
والعراق سجلو اربع حالات اصابه بداية انتشار الفايروس
بدا الرعب ينتشر بين الناس
والدوله أكدت على قطع الطرق بين المحافظات
والطيران تعطل بين الدول
الناس كانت أمام موت محتم الناس كلها خايفه
محد يعرف مصيره شنوو
حتى الزيارات انقطعت بين الأهل والاقارب
ممنوع اي واحد يعبر من محافظه المحافظه حضر تجول داخل بغداد وباقي المحافظات
بدأت حالات الوفيات ازيد المستشفيات انترست
ناس كل المستشفيات دخلت انذار ماعدهم
اوكسجين يكفي للمرضا
سلسبيل...امي بدت حالاتها تدهور اكثر اكثر
شكد نقلولها دم بس بدون فايد لازم جسمها يتحسن حتى تبدي العلاج الكيمياوي
بس ماجاي يصير عدها تحسن الدم عبالك مي
داخل جسمها
انحبسنا بلمستشفى اني وباب علمودها
وخالي يروح ويرجع علينا يجيبلنا اكل واي شغله نحتاجها
جمانه السعيدي
الحد نهاية الشهر الثاني كانت أزمة كورونا حيل مشتده
الدكتور قبل يومين حذرنا
امي ماعدها اي استجابه والمرض سيطر على جسمها بلكامل
يومين مانايمين اني وبابا
وامي فاقده للوعي بس يجيها الوجع تكون تعيط
يضربوها ابره حتى تنام وما تحس بلوجع
صارت عبالك هيكل عظمي
يوم ٤ بشهر الثالث ماتت امي سلمت روحها الرب العالمين
اصعب يوم مر عليه
من الصدمه بقيت ساكته عبالك الساني انبلع
حتى بجي مااكدر ابجي
كدامي صورة امي وهي تبجي على امها
احس هاي اني ابجي عليها
بس اني دخلت بحالة صدمه لا اكدر احجي ولا اكدر ابجي
كلش حزينه بس مااكدر اعبر عن شعوري
اول مره بحياتي اشوف بابا هلكد منهار يبجي عليها
عبالك مو زوجته تكول امه ويبجي عليها
من شفت بابا بهذا الموقف
حزنت اكثر شكد يحبها كل هاي شخصيته وهيبته
وكاعد يبجي على امي
يصرخ ويصيح لا سميره لا تعوفيني
مااكدر بدونج حبيبتي العمر ما يسوه شي بدونج
انتي مزروعه بروحي انت حبيبتي الي ماحبيت وحده غيرها كل هذا عنادج وبعدج عني ماخلاني انساج
ولله حاولت اشتريج بالغالي
بس ماعندي حظ حتى احافظ عليج
سلسبيل...الموقف زادني حزن اكثر بس عبالك مشاعري
اجمدت مدري مصدكه مدري ما مصدكه
شلون امي الي تحبني كل هذا الحب قررت تعوفني وتروح
معقوله ماكدرت تهزم المرض علمودي
هسه اني وين اروح
وصل خالي اركان وشافها مغطين وجها بالبطانية
صرخ صوت رج المستشفي رج
رفع الغطى وبقى يبوس بيها
اركان....صدك سميره متي وعفتيني خويه اني ماحسيت بليتم لان انتي موجوده
ليش هيج اليوم اني تيتمت
كل عمرج شايله مسؤليتي لا تمللتي ولا ضجتي
ولايوم تعبتي مني ولا كلتي صرفت عليك جبتلك
صح اني ماعندي اخوان
بس عندي عشيره اسمها سميره واكفه بضهري
وساندتني
بعمري ماحسيت نفسي وحيد لو خايف
انت الامان يابعد اخوج
الناس تكول الولد الامان لا الأخت هيه الامان
انتي اماني واهلي واصدقائي
شكد تحملتي ولا بيوم شكيتي ولا كلتي تعبت
ولج ازوجت وخلفت وبعد شايله حملي تفكرين
بجهالي اكثر ماافكر بيهم
تكول البيت ضيك على اركان سحبت سلفه
وبنت بيتها حتى البيت يصير بس اليه وأخذ راحتي بي
بس ماتت امي اتنازلت عن حصتها اليه
تكول سلسبيل عدها بيت وانت ماعندك بيت
هذا البيت الك عندك جهال وراتبك قليل كل شهر ادزلي
من راتبها
ياناس شلون بيه وين اروح الامان والسند ضاع مني
سلسبيل... حضنها حيل يشم بيها
سميره سميره فدوه اروحلج ليش ماتردين عليه
عمت عيني عليج حبيبه
سلسبيل...الكل يبجي ويصرخ اله اني مااعرف شصار بيه
ليش مااكدر اعيط وافرغ حزني عليها
راح بابا يريد يطلع شهادة وفاة
بلمستشفى صعبو ها على بابا لان اغلب الوفياة بهاي الفتره
بسبب كورونا والي يموت بكورونا يدفونا بمكان خاصه
يخافون ينتشر المرض الدوله ادفنه مو اهله
بس امي ما مات بكرورنا
بقا بابا من الصبح للساعه ثنتين يله كدر يطلع شهادة الوفاه
خالي اركان يمشي بلاوعي بس الدموع تجري
ويمسحهن صوته راح من العياط
واكف بصف جثة امي وايده جوه البطانبه لازم ايد امي
بعده متمسك بيها
حتى وهو يعرف ماتت مايريد يعوفها
بلكت تحس بحرارة ايده وتكعد
اني بس اباوع بعيوني لا حجيت ولا بجيت عبالك روحي غابت عني
جمانه السعيدي
طلعنا برا خلينا التابوت على سيارة بابا وصعدنا اني وباباوخالي ماخذيها ندفنها
كلما نفوت على سيطره يوكفونا
شلون ماخذين الجثه لازم الصحه تتولى الدفن
بابا يكولهم بس هيه ما توفت بسبب كورونا
مايقبلون نعبر اله بابا يتصل على دكتورها ويحجي وياهم
بلكوه نعير
لمن نوصل للسيطره الثانيه نفس الشي
شكد عنيده سميره حتى وهي ميته عنيده وما تقبل تندفن
جان عاندتي الموت وبقيتي ويانا
لو عنادج بس علينا ماكدرتي للموت
بعد المهمه الاصعب شلون نوصلها للنجف ندفنها
والطريق بين المحافظات مسدود
بابا اتواصل وياا عمي وعمي اتواصل ياا زوير الصحه
الوزير كال من توصلون للسيطرة خارج بغداد اتصلو عليه
اني اخلي الضابط هناك ينطيكم كتاب خاص
تعبرون بي
خالي كاعد بلسياره ودموعه تجري شكد بجه على امي
دموعه ما نشفت ابد
وصلنا للسيطره وبابا نزل حجا ويا الضابط اتصل على الوزير حجا ويااا
الضابط اخذ بابا للمكتب الخاص بلسيطره انطا كتاب خاص وعلي ختم
من بعدها اي سيطره نوكف بيها بس يشوفون الكتاب
يخلونا نطلع
وصلنا للمغيسل وهنا اني طلعت من صمتي من شفت
شلون امي جاي يغسلونها
جسمها نحيل كلش نحيل ووجلدها اصفر
امي الحلوه تغيرت بسبب الممرض
كمت اعيط اعيط فقدت الوعي الكل يريد يسيطر عليه
بس مااكدر اسكت
هاي مو امي هاي روحي راح يدفونها
معقوله هاي امي عافتني بكل سهوله
انشحط بلعومي هلكد ما عيط كمت اتقيى
حسيت مصاريني راح تطلع من حلكي
بابا اخذني طلعني برا غسلت وجهي كعدني بلحديقه مالت المغيسل
وخالي اخذ امي يدفنها
سلسبيل...بصوت مبحوح اريد اروح وياا امي
بابا...لا ما ترحين اكعدي هنا
شوفي شكلج شلون صار اليوم امج عافتنا وما مستعد اخسرج بس انتي بقيتي من ريحتها
سلسبيل...بقينا اني وبابا كاعدين بحديقة المغسيل
وخالي راح دفنها ورجع علينا
رجع خالي يسحل بنفسه سحل عيونه حمر هلكد ما بجه عليها وشفايفه بيض
كعد بصفنا بلحديقه
خالي....اني اليوم دفنت روحي دفنت اهلي كلهم اليوم
لو باقيه هيه واني ميت ولا هاي المصيبه
الي مرت عليه
لمن ارجع وين اروح اليوم اني يتيم من صدك
مات ابوي عمري ١٥ سنه مااهتميت
ماتت امي حزنت عليها بس من اشوف سميره احس نفسي قوي
بس اليوم اني ضعيف كلشي بهاي الدنيا اقوى مني
سلسبيل....اني وين اروح بعد ماعندي مكان اروح علي
عبالي اجيب الشهاده واشوف الفرحه بعيونها
ليش مستعجله ليش تريد تروح وتعوفنا
بابا...كافي انتم هيج تعذبوها يله نرجع نصلي ونقرأ قرآن على روحها الطيبه
سلسبيل...صعدنا بلسياره طول الطريق افكر اني شلون بيه ووين راح اروح
رجعنا البغداد وصلنا خالي البيته
ثاني يوم سوينا فاتحت امي
بس محد اجا الناس كلها خايفه من كورونا
والتجمعات ممنوعه
بليل بابا كال سلسبيل بابا جمعي ملابسج
باجر اخذج وياي
خالي...وين تاخذه مابقالي بلدنيا شي غيرها
هيه الي بقت من ريحة اهلي
جمانه السعيدي
بابا....مااكدر اعوفها لازم اخذها وياي حتى الدوام
صار الكتروني لازم اخذها مااكدر اعوفها هنا
اركان...واني شلون بيه شلون راح افاركهن كلهن
شلون اتحمل
بابا.. الله يصبرك بس تتحسن الأوضاع اجيبها
تشوفك اذا رجع الدوام وعدت الأمور على خير
اجيبها تبقى يمك تكمل جامعتها
سلسبيل....اني اريد ابقى هنا
بابا...تعالي وياي واذا ما عجبج الوضع ارجع اجيبج
تسكنين يم خالج
اريدج تتعرفين على اهلج كافي صار عمرج عشرين
وانتي ما تعرفين اي احد من اهلج
يله اخذج للبيت تحضرين نفسج وحتى اقفل البيت زين واطمن علي
سلسبيل...رجعت للبيت اول ما دخلت شميت ريحة امي
ردت اصيح ماما وينج اني رجعت هلمره اني وبابا
رجعنا للبيت
بس انتي ماكوووو
دخلت الغرفتها كلشي مالكيت بس عطرها موجود
بلغرفه تمددت حضنت مخدتها وشميتها حيل
بدن دموعي ينزلن شويه شويه على المخده
واني اذكر ايامنا الحلوه
عشرين سنه واني وياها ابد ما متفاركين
شلون كدر الزمان يفركنا عن بعض
هلمره مو اي فراك فراك الموت يعني بعد ماكو اي رجعه
شكد بجيت المخده تبللت
بعدين غفيت واني خاله خدي على دموعي
ماحسيت اله الصبح بابا يكعدني
بابا...يله اكعدي حبيتي ورانا طريق ايجوز مايخلونا نعبر
يله استعدي
راح اخدر جاي علما تصحصين وتحضرين نفسج
طلع بابا واني نزلت من الجربايه اخذت ملابس ودخلت للحمام سبحت وطلعت
اندكت الباب
خالي اركان....همزين لحكت عليكم شفت السياره بره كلت بعدهم ما طالعين
كعدنا نتريك جاي وخبز وجبن
اركان...ما تعوف سلسبيل يمي كم يوم
بابا....اني راح اخذها كم يوم وارجعها حتى نتأكد من الدوام
اركان...عوفها على الاقل الحد يوم السابع
بابا....لازم اخذها وياي بس اوصل اريد اسوي عزا السميره واريدها تكون موجوده
اركان...اجيت اودعكم شكرا ابو سلسبيل ما قصرت
وكفتلنا وكفت اخ
ماقصرت لا بفلوس ولا وقت حتى دم اتبرعتلها
اانت نعم الأخ لو شكد مااحجي بحقك مااوفيك
وكفتك ماانسها ابد
بابا...هذا واجبي ومااستحق الشكر على واجبي
اذا مااسندكم على هذا الموقف وواكف وياكم منو يوكف وياكم
اني بلخدمه اليوم وكل يوم يمتى ما تحتاجني
اني موجود
جمانه السعيدي
سلسبيل..طلعت الاكل من المجمده والثلاجة حتى ياخذه خالي ويااا ليش يبقى اني مااعرف شكد بعد وارجع الهذا البيت
ليش يبقى الاكل و يخرب خالي ياخذه الجهاله
لميت ملابسي وشغلات الضروريه بابا اخذهن للسياره
صعد خالي ويانا حتى نوصله البيته لان مايكدر يشيل كل هذا الاكل وحده
قفلنا البيت وطلعنا
من اول ما صعدت بلسياره
رجعت ذاكرتي الاول يوم نزلنا بلبيت
امي شكد جانت فرحانه صار عدها بيت تسكن بي
شلون جانت تصعد البردات
وشلون ترتب الغراض وشلون فرشت البيت
اول يوم ماكدرت اتنام
هلكد ما فرحانه بيتها وكلما تخلي شغله بلبيت
تبقى تباوع عليها
وينج سميره ليش عفتي بيتج بقى البيت مثل ماهو
بس انتي ماكوو
كلشي مثل ما رتبتي كل قطعه بمكانها
اله صاحبت البيت ماكوو وو
اهل ابوي الي كنتي تخافين منهم طول عمرج وانتي ما شايفتهم
اليوم اني رايحه عليهم
اليوم راح اشوف اهلي الاول مره من عشرين سنه
رايحه وياا بابا الاهلي لا تخافين عليه
بابا وياي محد راح يكدر يقرب عليه
مااعرف الجاي شنو حياة سعيده لو حزينه
بس مضطره اواجها واعيشها بمرها وحلوها
اليوم اني رايحه الاهلي الشيوخ اشوف حياتهم شلونها
اشوف شنو الي جنتي خايفه منه
اليوم اني رايحه أواجه الخوف الي جنتي منهزمه منه
امي حبيتي لاتخافين انتي عايشه بروحي
ومراح انساج ابد
