رواية عفو عام الفصل الثالث 3 بقلم جمانه السعيدي
عائله بسيطه ومسالمه ابوهم رجال فقير يشتغل على باب الله
ابد ماياذون احد والناس كلها تحبهم
بس المشكله كانت بلجوارين
الجوارين عدهم ولد مخبل
خل أوضح شغله مخبل عن مخبل يختلف
اكو مخبل على الاخير غير واعي وفاهم للشي الي جاي يصير حوالي
واكو يفهم ويعرف بس اهله يبررون افعاله ويكولون مخبل
حتى محد يحاسبه
ويبقى يااذي العالم
هاي العائله البسيطه بدت مشكلتهم من كبر هذا المخبل
وبدا يااذيهم يتقصد اذيتهم لان ناس فقره
اذا طلعو جهالهم بلشارع يضربهم
اذا عدهم فلوس طالعين يشترون ياخذهن ويضربهم
اذا اشترو حلويات ورجعو للبيت وشافهم
بلباب ياخذ حلوياتهم
اذا اجو من المدرسه يشمر عليهم وصاخه وماي حتى
يوصخ ملابسهم
لو ياخذ كتبهم يشككهن
الاب راح يشتكي على هذا الولد الي عمره مايقارب العشرين سنه
بس رد الاهل كان عجيب
مخبل انت جاي تشتكي على واحد مخبل
خال عقلك وياا هذا المخبل
هذا مسكين شيعرف كلشي مايعرف
الاب رد عليهم تكدرون تمنعو تخوفو تحبسو بغرفه
مايصير هيج يااذي جهالنا
كان ردهم عجيب انت ما تفهم هذا مخبل
والمخبل ماعلي عتب
شلون تريدنا نحبسه تقبل انت تحبس واحد من جهالك
هذا المخبل كان فاهم كلش زين لااشياء الي جاي تصير
ورد اهله على جارهم وبرودهم اتجاها تصرفاته
شجعه يتمادى اكثر عليهم
اطورة الخباثه وصارت بشكل ثاني
بدا يشمر النعالات والوصاخه من الحايط عليهم
لو يترس علاكه ماي مجاري وصخ ويشمرها عليهم من الشارع
هذا الفعل كان يضحك اهل المخبل
اي اهله يضحكون الهذا الفعل
يضحكون لان هو جاي يااذي الجيران
مااعرف هيج بشر شلون يسموهم مسلمين
المسلم هو من سلم الناس من السانه ويده
وذوله مو بس مايعرفون الإسلام حتى مايعرفون ريحة الاخلاق شنو
جمانه السعيدي
رجع الاب اشتكي عند أقارب هاي العائله
من فعل هذا المخبل
الأقارب من حجو ويااا اهل المخبل
وكاللولهم عيب هاي التصرفات ذوله جيرانكم وماماذيكم
اهل المخبل شاطو اكثر واكثر
شلون يرحون يشتكون علينا ترا هو مخبل
ماعلي عتب شلون يشتكون علي
اي مخبل وبي اذيه احبسو بغرفه او سلمو للشماعيه
ليش عايفي يااذي الناس
كانت ردت فعلهم هاي اكبر تشجيع للمخبل
حتى يتمادى اكثر واكثر على الجوارين وخاصه هاي العائله
بلذات
الاب الطيب أأمر زوجته تقفل الباب وتمنع الاطفال يطلعون
للشارع وهو راح يجيب ويا حلويات الهم من يرجع للبيت
المخبل هو اهله ماعجبهم الوضع شلون ماكو مشاكل
شلون مجاي يكدرون يغثون هاي العائله
اخير شي المخبل قرر يطفر من الحايط عليهم
لان هما جيران الحايط على الحايط
يطفر عليهم وياخذ اي شي يلكا برا طوبه بايسكل
قطعة ملابس قطعة فراش
الام من شافته يطفر على بيتهم خافت وحجت الزوجها
رجع الزوج دك الباب عليهم بس هلمره مو نبرة عتاب
كانت نبرة تهديد
لان طفح الكيل خلاص وهاي المشكله
مستمره الأكثر من ٣ سنوات
هددهم اذا ابنهم طفر على البيت راح يكتله خلاص
لان هذا يعتبر تعدي على حرمة البيت
بس هذا الكلام خلاهم يستهزئون ويضحكون على الاب
لان هما معاشري ويعرفون هو إنسان محترم
ومستحيل يقتل
اعتبرو كلامه مجرد تهديد وبس
المشكله هذا بيته ملكه مو ايجار حتى يطلع منه
ومحد جاي يكدر يوكف هذوله الناس عد حدهم
مابقا واحد ماحجا ويااا بس بدون فائده
ثاني يوم اعناد بلاب طفر المخبل عليهم
وبقا يدك على باب المطبخ بقوه حتى يخوف الاطفال والام
الام كانت متحذره وقافله الباب
وأهل المخبل مشجعينه على فعله يسمعونه يكسر باب المطبخ عليهم وساكتين
كرد على الاب الي جاي يهدد ويتوعد
من رجع الاب وعرف هاي السالفه
طلع للمركز حتى يشتكي عليهم بس الشرطه
استهزئو بي انت جاي تشتكي على المخبل
هذا واحد غير مسؤل عن افعاله
شنو قابل نحبسه
احنا راح ندز تنبيه الابو المخبل وهو يتصرف
من اجا خبر الاهل المخبل جارهم مشتكي عليهم بلمركز
عناد وخباثه سلطو هذا المخبل حتى يااذي الجيران اكثر واكثر
على اساس يادبون الجار
يعني شوف انت حتلو تشتكي علينا مراح تكدر تمنعنا
ابنا المخبل راح يااذيك اكثر واكثر
كلما تشتكي علينا اكثر اناذيك اكثر واكثر
وفعلا هذا المخبل زاد اذيه
يكسر باب الشارع بلطابوك
لو يشمر عليهم زباله من الشارع
لو يطفر على بيتهم وياخذ اي شي كدامه
المنطقه كلها كامت تحجي بلمشاكل بين العائلتين
لان كل يوم طالع صوتهم كدام العالم
الاب قرر لازم يخلي حد الهاي المهزله
راح اجر بيت بغير منطقه ونقل عائلته بسكوت
مااخذو بس ملابسهم
ماراد يشيل الغراض حتى لا يكولون جبان انهزم
من بيته بسبب المخبل
كعد بلبيت يتربص للمخبل
الصبح المخبل من سمع البيت سطنه
قرر يطفر يخوف الزوجه والجهال وهم بدربه ياخذ اي شي موجود
وهذا الشي كدام امه ام المخبل وخواته
ابد ما حاولن يمنعنا
مجرد ماعبر الحايط وصار بيت هذا الرجال
راسا الرجال كان متحضر
طلع المسدس وقتله خلاص بمكانه
وطلع سلم نفسه للشرطه وحجالهم كلشي
كال قتلته بعد ما تعبت اني وجهال منه ومن اهله
ومحد يقبل ياخذلي حقي منهم
مااكدر ابقى متحمل هيج شخص يااذيني اني وجهالي
طول العمر
اهل المخبل من سمعو الطلق اخواته صعدن على الحايط لكن اخوهن سابح بدمه
كامن يعيطن اتصلن على الاب والأخ
اجو نقلو للمستشفى كان خلاص انتهى عمره
رجعو البيت جيرانهم كسرو البيت تكسر
وراحو كامو عشيرة القاتل
العشيره اخذت فصل محترم بسبب المخبل
وكتبو على بيت جيرانهم لا يباع ولا يؤجر مطلوب عشائريا
حتى يمنعون جيرانهم يستافدون من البيت
اذا انباع او اتاجر
الرجال انسجن ٣ سنوات واجا اسمه بلعفو
لازم اهل الضحيه يوقعون هما استلمو الفصل حتى يطلع
يعني العشيرتين متراضيات بينهن
شيخهم كلب ابن كلب
واكبر استغلالي وما يخاف من الله لان من جان يعرف المشكله ماحلها خلاها لمن وصلت للقتل
واخذ فصل يكسر الضهر على هذا المخبل المؤذي
كعد وكال اريد ٦٠٠ الف حتى اروح واكول احنا استلمنا الفصل وهذا الرجال يطلع
رغم اهل هذا الجار عايشين بتدبير رب العالمين
والناس تتصدق عليهم بعد ماا ابوهم دخل السجن
يدفعون إيجار ومصاريف
اهل امهم وأهل ابوهم محتارين بعيشتهم
بس رجعو جمعو ٦٠٠ انطوهن للشيخ حتى يوقع على
ويطلعه من السجن
وأخيرا طلع هذا الاب الشجاع من السجن
الي ماقبل عائلته تعيش بلخوف والذل وضحى بنفسه
حتى يصون كرامتهم ويدافع عنهم
كدر يبيع البيت ويشتري بغير محافظه
ويعيش بسلام هو وعائلته
