رواية يا اجمل الوحوش الفصل الثامن والعشرين 28 بقلم رسل فهد
عُبرت روحي كومة گلوب لان بَس انتَ رايدته
و البيت الما أقصدك بي عليمن لعد كاتبتة ؟
- رُسل فَهد
.....
" روز "
روز : لا خاطفني
بسرعة الشرطي فتح باب السيارة و هو باوعلي بـ صدمة مبتسم
محمد : ترى مو مال شقة
- انزل شوووو انزل تعال سليم
فتحت باب السيارة من اجه واحد راد يفتحة الشرطي وجه المسدس عليه
محمد : ترى مرتي والله صدگ تحجي
- جيبها البنية هنا
هو مصدوم و خازرني بس ما يكدر يسوي شي
مد آيده للسياره فتح الجگمچة و هم موجهين المسدسات عليه فتح ورقة
محمد : هذا عقد الزواج عمي بس هي تسودنت
روز : لا هو بالغصب عقد علية
غمض عيونة بنفاذ صبر وعض شفته الجَوه ، صاحوا بالنداء
على واحد اكبر منهم اجه من بعيد و كالوله قدم السيارة لهناك
و واحد منهم صعد ويا لحد ما صف السيارة
تگابلوا كلهم عليه تحقيق و شيحجي ميصدگوه
محمد : بابا مرتي والله اخابرلك الشهود هسة
روز : أخذوني لأختي
- اهلها وين
مسح وجهة و راد يخابر ما خلوه اخذوا منه التليفون
صعدت بسيارة الشرطة و ثلاثة صعدوا ويا و هو أخذهم لبيتنا
نزلوا كلهم و واحد من الشرطة يدگ الباب اباوعله بس يريد يلمحني
فتحت الباب تغريد اخترعت من الشرطة بس من شافتني حضنتني بأثنين اديها و كامت تبجي و الجيران طلعت
- اختي هذا الشخص زوجها تعرفي
ضربت تغريد على صدرها و هزتني قوي
تغريد : يمة ولج شوكت تزوجتي منو هذا
بقت تباوعلة مصغرة عينها
- تفضلي ويانة للتحقيق اختي حتى نعرف هي فعلاً
عملية اختطاف لو اكو منحنيات ثانية
صعدنه احنه وي الشرطة و واحد من الشرطة يسوق بسيارته
و هو كاعد ليورة
تغريد : هذا مو غريب عليه
روز : اي محمد ابن عمار حفيد رهينة هو الخطفني
و عقد عليه جاب شيخ و حط المسدس براسي
ضربت خدها
تغريد : اريدج بالسل يرهينة انتِ و كل احفادج والله إلا اخزيهم و افضحهم والله ، هذا لچحتـه من چان امير صغير
و يجون يسولفون وياه
الطريق كله تغريد تضرب على رجلها و تعض اصابيعها و تغلط
من وصلنا للمركز بلعت ريكي أباوع بالوجوه لزمت عباية تغريد من الطرف تمشي و امشي وراها انطوا لمحمد التليفون يخابر و وهو واكف مسافة عنه كل ما يعرف عينه يباوعلي بنظرة أحسه يگول ليش ؟
يحققون ويا و تغريد تتمنى تاكلة بسنونها
جان رغم الهوسة كلها و احنه واكفين بالباب بس سمعته لمن گال
محمد : اي أنا خطفتها لان أحبها و عقدت عليها
صحيح كلامها ،
- أكو واحد يخطف وحدة يأمن يطب وياها بسيطرة
انتَ قبل داخل وياها بعلاقة
محمد : لا سيدي بس عبالي تخاف متسويها
- آخر كلام يعني ما داخل وياها
بعلاقة ترى يخفف عليك الحكم نأخذها نحقق وياها
محمد : لا سيدي احبها من طرف واحد و الأهل بيناتهم مشاكل
سألوني أكثر من سؤال أجاوب و اني بغير عالم بس حتى من سألوني عن علاقتي بي گلت ما أعرفة اخذونه وگفنه بالممر على صفحة و تغريد اول رقم صار گبالها زِناد دگت عليه ما يجاوب اخذوه من گدامنه
أيده بيها كلبچات باوعلي بـ بنظرة عَتب و ابتسم بطرف شِفتة
تغريد : والله إلا أخيسك بالسجن انتَ وشيخك
محمد : لا يابة مو نسيبج اناااا
حجاها و ضحك و اخذوه
جرت ايدي و راحت للضابط تگلة شلون ما طلگها سيدي
- العقد مصدق شرعياً و الشهود شوية و يجون
و أحقق وياهم تگدرين ترفعين عليه دعوة بالمحكمة و تجيبين الورقة نفتح بي قضية ثانية
جرت ايدي و طلعتني من المركز بعد صراع دام اكثر من ثلاث ساعات
وي طلعتنا شفت زِناد و ضابط ثاني نزلوا من سيارة بس ما كلت لتغريد هسة تصير عركة الها اول ما الها تالي
رجعنة للبيت و انصدمت بحنية تغريد كل شوية تحضني و تبوسني
تغريد : والله عرفت هم وره السالفة و من ما تدخل هذا جبير رهينة الشايخة بي عرفت كله منهم ولج خوما سوالج شي
باجر اروح اجيب جُمارة والله إلا اخزيهم بنص العمارة
و أنا رفعت دعوة عليهم كلهم
روز : لا ما سوالي شي بس عقد عليه و كال راح اخذج لتغريد تشوفيها لان اني سويت روحي قابلة على العقد و من وصلنا السيطرة كتلهم خاطفني
تغريد : زين تسوين بس هذا أنا ما شايفته صار هواي
بس لا السولفلتلي عنه عجيبة مرة كالت مهدور دمة
روز : اي و جان مسافر
عقدت حواجبها تباوعلي
- ولج خاف نفسه الچنتي تراسلي
روز : اي نفسة
- يبوووووو يبووووو صخام بوجهج
روز : شمدريني هوَ
تغريد : هسة اول حچاية يگلولي هي اختچ عاشگتة
النوب عافت سالفتة و كامت تضرب على رجليها و تغلط عليه
بقيت كاعدة بالهول صافنة و ساكتة حطيت ايدي على حلگي
و اتذكر شلون نطقت الحچاية و معاني وجهة بوكتهن
صعدت فوك اريد اخلص من الأفكار الي تدور بعقلي و انام
ما كدرت ضليت الوب من مكان لمكان نمت على الچرباية و تخيلت
هذاك الفراش الي يومية انام بي ضغط على راسي و غمضت عيوني ما ادري شلون نمت بس فزيت على صوت صياح عالي
نزلت اركض من الدرج جريت الشال من المحجر و خليته ع راسي من شفت زِناد واكف و ولاء وسلام و شريك
تغريد : إلا أسجنكم كلكم و خلي يطلگ اختي لا اكلب
الدنيا على راسكم و راسة
سلام : انتِ شنو لوتية هي اختج غير تحبة
تغريد : لا ما تريدة هي زعطوطة و جاهل وهو ضحك عليها ترضوها بخواتكم يا ما عدكم غيرة
هم واحد يباوع بوجه الثاني و يمسح شواربة ولاء وسلام يضحكون
ولاء : هسة شنو ترى هو اليوم راد يجيبها الج
تغريد : وأنا بيدي أسلمة للشرطة و زين تسوي بي والله ثم والله إذا تعتبون باب بيتي بعد افضحكم فضيحة و أخزيكم
چفونا شركم
سلام : عمي نريد نناسبچ احنه
تغريد : نعلعلة والدية و والد والدية إذا أناسبكم لو عندي
چلبة ما أخليكم تأخذوها والله
هي تحچي و هم يباوعون لزناد
زِناد : اي ليش غير آفتهم ليش
تغريد : انتَ لتحجي بالذات انتَ لو تمووووت ما أنطيك مرة و جُمارة ما تحصل شعرة منها
سلام : تعاي تعاي انتِ ليش هيج تسوين بأخوي
من شفتهم كلهم واكفين خفت ختلت وره تغريد
تغريد : باجر تجيبون بنتي والله إذا ما تجيبوها اجيب الشرطة مثل ما سويتها قبل و أخزيكم
زِناد : انتِ مو تحبي ؟
رفعت عيني عليه لگيته يباوعلي و موجه الكلام الي
هزيتلة راسي بـ لا
تغريد : أنا أنطي لعماااار أنا أنطي لولده چتالين ابني والله اذبحها و ما أنطيها و أنا أعلمكم بسيطة و الله إلا أسجنكم كلكم
طلعوا و باوعت للساعة دنيا المغرب
و تغريد منهارة عليهم
روز : اني هواية نمت
تغريد : كومي سويلنا عشاء
- ما بـية حيل
تغريد : شنوووو ؟
تذكرت يومية الاكل يجيني لمكاني رحت للمطبخ اشوف شسوي
خليت الطاوة على النار و احس دموعي نزلت مسحتها
تغريد : هو هذا الساقط نفسة الي غلط عليه
روز : هاااا اي لا بس هو مرات مريض ميدري
- و تدافعيلةةةةةة ؟؟؟
روز : لا شبيج شنو ادافعله ما شفتي شسويت بي
تغريد : أنا احفاد رهينة على يوم يسون بيه جلطة والله يسوون شنو ابتليت بيهم أنا ما فكوا ياخة لا مني و لا من بزري
روز : تغريد بس هو ما يحجي ويَ أهله ترى
تغريد : اييييييي ؟ و المطلووب شتردين يعني ؟
اقبل بي مووووو اخلي ياخذج والله لو يموت و تموتين
حطيت الصينية و كعدت كبالي تغريد من ردت اكل اللگمة بقيت صافنة
تذكرت لمن يگعدني بحضنة و يوكلني بأيدة ، اكلت لگمة و صعدت
فوگ قفلت الباب ابچي و امسح دموعي كل ما تنزل
و اتخيل شراح يصير بي بالسجن
سمعت تغريد تحجي بصوت عالي فتحت الباب
و وكفت أتصنت الها تخابر
تغريد : انتَ شنو تريد ترد للعمارة خلي ابن عمك يطلك
... والله أنا باجر بوجهي طالعة للمحكمة و أعلمكم ...
ما أصدك بيك أنا ... يالله أشوف
روز : تغريد منو هذا
تغريد : زِناد يكول باجر اجي اخذها
حتى يرمي عليج يمين الطلاگ مو يبقى بالسجن و تبقين انتِ معلگة
روز : هو بعد ميطلع من السجن
تغريد : و عسى لا طلع و ما يطلع الا اخيسة والله مثل ما خيست اخو يردون يهجمون بيتي ولد عمار
بقيت ساكته و صعدت ما اكدر انام من التفكير للصبح بقيت كاعدة
نزلت تغريد نايمة جوه انتظر كل شوية الباب يندك و زِناد يجي يأخذني
تذكرت البارحة هيج وقت كعدت و غدرتة
كعدت باوعتلي و هي خازرتني
تغريد : ترى لسة ما ناسية دگتج انتِ لو ما مستهترة
ما تنطين مجال لهاي الشكول
روز : صدك راح ترحين للعمارة ؟
تغريد : لا ما اتگاون وياهم چلاب يلوفوها عليه خليني هسة أنا صاحبة الراهي عليهم يطلگج هذا و اجيب جُمارة
و انعل أبوهم لابو
تمددت على القنفة نعسانة كعدتني تغريد مسوية ريوگ اول ما اكلت
طوطت سيارة بالباب طلعت تغريد مدت راسها و اجت
تغريد : امشي بدلي و روحي خل يرمي اليمين و تعاي
أنا رايحة استلم الراتب و اجي
روز : اروح وحدي شعجب تقبلين ؟
تغريد : روحي زِناد من يحجي ما يجذب أنا اريد أسايرهم
بقيت مستغربة و صعدت البس صاية و شال طلعت عبالي
راح الگة زِناد بس شفتة سلام اخو محمد
ردت ارجع بس اكيد هي شافته ، صعدت وياه ليوره و بقيت ساكتة
اخاف ياخذ بثار آخو مني بقيت اطكطك بأصابيعي و اباوع بالمرايا
سلام : ترى ما يستاهل منج محمد هيج مو تدرين
دمة مهدور و احنه ما نريد العين تصير عليه
روز : ترى هو اخوكم حتى يمكن عصابچي لان اجوي مجموعة رموا البيت و فلشوا حتى السيارة
سلام : اي نعرف و هم نفسهم الي دمه مهدور يمهم
باوعتلة و سكتت
ضليت الوب و ريگي نشف عقلي كل دقيقة فكرة
روز : خل يطلگني و أتنازل عنه
دار وجهة عليه خازرني درت وجهي على المرايا خايفة منه
وصلنا للمركز يمشي و اني امشي ورا احس الوجوه كلها تگلي ليش
بقى واكف ويحجي وي الضابط دگ على زِناد و انطاهيا
يالله قبل يخليهم يجيبونه اخذنه الشرطي لغرفة صغيرة مال ضابط بس الضابط ما موجود بقينة واكفين و الباب مفتوح
مرت دقايق و من كد ما الوقت ما يمشي صارن ساعات عبالك
باوعت لسلام كل شوية يتحسر ويباوع للباب بلعت ريگي و باوعت بصدمة لميت شفتي لداخل حلگي من طَببة الشرطي لازمة
وهو اديه مكلبچة و أثار الضرب على كل ملامحة
رجعت ليورة و ايدي على حلگي و سَلام حضنه يمسح وجهة
- الزيارة خمس دقايق بس
سلام : ليش هيج مو زِناد حاچاهم
محمد : اي بس صار جدال بيني و بين الضابط و أنا غلطت عليه
- تغلطططط شلون تغلطططط يالله ارمي اليمين عليها
شلك بهاي الدوخة
محمد : بس شوية
طلع سلام و خفت أكثر رجعت ليوره و من انطبگ الباب
هوو صار يتقدم عليه رغم اديه مكلبچات بس خفت من عيونة
و اني اباوع لآثار الضرب بوجه و قميصة مفتوح كل الدگم مشلوعة
محمد : ليـش هيچ ليـش ...
لَيش بيدك هَدمت كل الـ بنيتة ؟
أنا طعناتي بـ سچاجين الهويتة..
......
" جُمارة "
رحت يم جدة كعدت بالاستقبال و هي نغزتني
رهينة : مو كتلج قدمي الماي وين چنتي يمكسورة الرگبة
جُمارة : يم حفيدج
- حتى حفيدي هالايام صاير شالع
ابتسمت و اجت المُلة ، الاستقبال و الهول انترسن نسوان
و اني كلساع مقدمة ماي و چـاي و كعك اباوع للأجواء تجنن عمرها امي ما اخذتنه و لا سوينه بالبيت مالتنه حلو واحد من يروح بس من تصير بـ بيته بعد احلى
نورس و رقية احتارن بالتوزيع تمنيت روحي مُلة لان
بس هي تاخذ حصة الأسد
و النوب صاحتلي نورس انطتني سلة قراصات اوزعها للبنات الصغار
قبل لا انطيهن لزمت حصتي بيدي ،
حِچت المُلة
- حفيدتج هاي ام يوسف عيني اول سنة أعاينها
رهينة : اي يعيني هاي بِت ابني يعگوب الاسير چانت يم امها و هسة يمي
- الله يحفظها الج و تشوفينها عروس
غمضت عيوني وعضيت شفتي ادري جدة راح تجيب طاري زِناد
رهينة : هي دكتورة كملت هاي السنة و گعدت ترتاح
ان شاء أزفها و تجين بحنتها چـا بعد يريدها زِناد مآكل گلبي عليها
- هاااااااية ، سمعت گبل مرة سألت شعجب لسه ما متزوج
گالولي يريد بِت عمة ، والله تلوگلة صبر و نال وين لاگيها
رهينة : لا عيني هي وين لاگيتها شيخ الديرة و شيخ گلبي هذا يريدها إلا هيَ بالاسم
ربيعة : رهينة ما تخلي واحد فوگ زِناد حتى لو اخوها ابن امها و ابوها لازم زِناد أغلى منه
رهينة : يمة طبعاً يا اخوة يا اهل يا ويلاد أنا عندي
دام هوَ سالم كلشي بالدنيا ما يهمني
كامن يضحكن وحدة گالت
- عمي أنا رجلي ما احبة بكثر ما انتِ تحبين زِناد
جُمارة : صعد ضغطة و جدة تخربطت شهر
كلهن ضحكن بصوت عالي
گمت كل ما أفوت الأنظار عليه أزيد من قبل بدت النسوان تروح و البيت يفرغن و هن ينظفن و يسولفن على القراية و الأجواء كعدت بالهول يم فضة و جدة يسولفن على امجد
رهينة : زِناد عرفة هو ذابح البطة لان هاي سوالفة
فضة : هي مرتة من يطگها إذا ما يخليها تنزف من كل كتر ما يهدها
رهينة : ولج وين اهلها ما يآخذوها منه
فضة : شياخذوها هي منيلها اهل غير اخوة اثنين متزوجين و كل واحد عنده 8 جهال من تروح تشوفهم الصبح
يردوها العصر مرة راحت زعلانة اخوها طَگها و بيده رجعها
رهينة : وعلي أجيبنها يمي و اخلي يتحسر عليها بس هي ساكتة حتى ما تشكي أنا لو ما انتِ ما ادري
فضة : تخاف منه ما يرضى تسولف عمايلة وياها يتفنن
مدري شماله مسودن مدري شني مرة عاينت جسمها لطمت على خدي مو بس ضرب آثار مدري شني حتى عض لو چلاب ما تعض هيج
رهينة : يا مال المرض شله على البت هذا تلگي يطلع حرگة غيرته من زِناد بيها لان كلها نافرته
فضة : تخيلي اجة من الموكب عافهم غادي و اجه كتلها مدري شسوالها و راح خله البت مايعة روحها حتى ما اجت ما تكدر تمشي
رهينة : أنا اليوم اخلي زِناد يجيبها يمي و إذا
اجه يردها إلا اذبحة والله تروح تموت بِت العالم و تتشكل برگابنه
فضة : اي والله بس لا تجيبيلي طاري شيخلصني من عجيبة
رهينة : وين تليفوني خل اخابرة يجيبلي شرايح للسكر
گبل لا يجي
انطيتها تليفونها جان عندي خابرته و اني اباوع لفضة
اضحك و هي هم تضحك على غزل جدة سدت التليفون و ضمته
رهينة : يمة بعد گلبي ما يگلي غير تآمرين وصار
ولك جدك ما دللني بكثرك يبعد جد ابوي
جُمارة : جدة كلنة مدللنه شو منسوي مثلج
رهينة : لا عيني كلجن مثلي و أزيد بس أنا حبي فاضحني عبني ما اعرف اضمضم انتن مثل الحيايا ما يبين عليجن
بقيت مصدومة فاتحة حلگي منها
فضة : لا جدة انتِ هواي تبالغين بحيث هسة الغربة و القريبين تنتظر يجي يوم انتِ و زِناد تتعاركون
رهينة : يااااااع يمة برد شرج ولج هاي عود انتِ الجبيرة
والله ما نتعارگ خليها حسرة بگلوبكم أنا اصلاً من اموت ما اريدن غيرة يچفني و يغسلي
جُمارة : اسم الله عليج جدة بس ما يصير عندج احنه حفيداتج اني و ورود و عالية نسد عين الشمس
رهينة : يا عين شمس و لجن شون ثلاثة عين النمل ما تملنها أنا كلكم مخليتكم بچفة وحدة و زِناد وحدة بچفة
باست جفها الي بي زناد
- يبعد چفوفي ذيچ چفوفك الحلوة الخربوها
جُمارة : شبيهن جدة يعني شنو ما يتعالجن
رهينة : علساس ما مسولفتلج انا
كعدن بالهول يسولفون كلهن التمن و كل وحدة تسولف
شلون البيت مو حلو بدون رجلها
- خالتي هالايام كتيررر بطني عَم بتأذيني ما بتعرفي شي علاج يهدأها
رهينة : حبلة ما تحتاجين دوه
رقية شهگت و باوعت لعجيبة
جُمارة : جا جدة أني احس روحي أنسى يعني ما أفكر
بالأشياء الي تصير قبل أفكر بس الي تصير اليوم
يعني إذا شي صار البارحة بعد ما أفكر بي و لا اتأثر بي
رهينة : لا مابيج شي بس انتِ دوم مصخنة و مريضة توهوسين
باوعت لعجيبة زفرت نفس و عدلت گعدتها من
شافتني اباوعلها وخرت عينها مني
جُمارة : مثلاً البطة البارحة ماتت اليوم احس روحي مو حزينة امي مو هواي اشتاقلها روز ما أفكر بيها هيج
رهينة : شوفي منو ساحر عقلج
عوجت حلگي و درت وجهي جدة ما تفهمني هي حتى زِناد الي احبة
أعيش المشاعر ويا لان دوم يمنه يمكن إذا يروح شهر أنساه
بقيت گاعدة يمهن لحد ما أجة زِناد جاب الشرائح لجدة ، باستة
بقى واكف جدة انهارت
زِناد : يالله همن اديجن اوصلجن حتى اروح
رهينة : وليش متعب روحك ذاك البيت و هنَ يمشن
زِناد : لا
باوعلي و باوع لفضة و مسح شواربة
عجيبة : اخذ فضة و مرت ولاء أنا بعد شواي أجي
رحت جبت جهاز السكر و كعدت أقيس لجدة سكرها
رهينة : هسة تعال اكعد ليش واكف
جُمارة : هسة دعوفي الرجال جدة
ضربتني على رجلي
فضة : تعاي أبوسج جُمارة
اجيت أضحك بستها و جدة صاحت لزناد شاورته
هَز راسة بـ نعم
رهينة : شني اليوم ما شفتك و لا شبعت منك
زِناد : والله جدة رايح لشيخ مسوي عملية و الدنيا مكلوبة عليه لازم اخذ واجب و أروح إذا لحگت بالليل اجيج
- هلا بيك بكل دقيقة
طلعوا و البيت فرغ عجيبة صعدت يم رقية
جُمارة : جدة ليش هيج صديقات رقية و عجيبة
رهينة : مرت أخو عجيبة ، رقية تصير اختها
- لو ضالة ما عارفة و لا هاي الهوسة
رحت للغرفة و اني اربط و احرك اصابيعي تتوضح عندي شجرة العائلة
تمددت بالغرفة انام و طبت جدة شوية و انفتح الباب طبت
حور مرت امجد زِناد وراها
- مشكور جدة
زِناد : تدللين جدة ، راد يروح و رجع دار وجهة
- جدة شني هاي الثياب انتِ تتعمدين تخليهن يسألن عنها
باوعت لحور خجلانة عدلت الها المخدة تگعد ، و جدة تضحك
رهينة : يجدة الحلو حلو لو يلبس گونية
زِناد : بعد ما أدري شحچي وياچ الظاهر تتعمدين
رهينة : هسة انتَ ضايج خافَن وحدة تخطبها
جُمارة : لا تخاف ما يلحگن جدة إذا يگولن الها هاي منو
دگلهن حفيدتي اليريدها زناد
زِناد : مَا عاجبج لازم
رفعت اله تَك حاجب و أضحك هوَ هم أبتسم و راح عزه شگد مفضوح
ما چان هيج شو من عرف بيه احبة تسودن
رهينة : شلونج حويرة جدة ليش ما اجيتي للقراية
حور : جدة خاف امجد يرد و ما يلگاني
- طبة مررررض أنا أحاچي و اطيح حظة
شني ما الي حصة بيج
جُمارة : معليج جدة تأدبة
رحت جبت الها مي و جدة كالت الها نزعي حجابج و عباتج ماكو احد هي تستحي بالگوه نزعت العباية و خلت الربطة على راسها
رهينة : شبي وجهج هيج متعور
حور : لعبت بِت ولاء و أظافرها طوال خرمشتني
صبو العشاء و عجيبة تسودنت من شافتها
عجيبة : تردين وياي مو
رهينة : لا تبقى تبات يمي
- يمة لا يرد ما يكدر بدونها يتخبل
- أنا أحاجي مالج غرض شني من دونهن هي لاتجي ولا تسير علينه
بقت ساكته بس تخوزر تالي من خلصنة اخذتها و رحت للغرفة
فرشت النه بالگاع و طلعت بطانية جدة الجديدة بيها ريحة زِناد هسة تتخبل كعدت يمي حور و نزعت الربطة حتى تلم شعرها
انصدمت برگبتها مو بيها اثر زراگ لا هي كلها زركة
واكو أماكن أثارها بنفسجية
من شافتني اباوع استحت و غطت رگبتها
اجتي ورود جابت چـاي و كعدت يمنه اني متأكدة الكل و الجميع عنده فضول بخصوص قصة حور و ليش هيج امجد يسوي بيها
هي بگدنه و حلوة تخبل معانيها بيضة بس بكل مكان بجسمها آثر
ورود : اليوم راح اجي انام يمجن
جُمارة : تعاي تعاي
كعدنا و اني احاول افتح موضوع حتى تكوم تحجي ويانة
جُمارة : شكد حلوة الحياة بدون زلم حتى البيت هدوء
ورود : هم الزلم شيجي منهم غير شلعان الگلب
حور : الله ياخدهم كلهم
جُمارة : لا خل يأخذهم بس مو كلهم اكو يفيدون
مثلا زِناد لا خلي يبقى عيني لان ما يرفضلي طلب
و بعد منو .. هاي هيَ الظاهر بس زِناد خوش رجال
ورود : ها جُمارة هاي شلون طيحة طايحة چفي على وجهج
حور : لا زِناد صدك ماكو منه و اي وحدة تصير بمسؤوليته لازم يدللها دلال و يجيبلها كلشي تريد و يفرض احترامها
مثل جدة و فضة و جُمارة هسة
جُمارة : و آمجد ؟
باوعت من كل الجهات بالغرفة تخاف مسحت وجهة
حور : زين بس هو عصبي جثير
ما سولفت شي عنه و حتى جدة حاولت وياها ما سولفت الها ورود أيست و صعدت نامت و جدة نامت اني بقيت كاعدة اباوعلها من الخوف ما تگدر تنام كاعدة و حاضنة المخدة
جُمارة : إذا ما تعرفين بالگاع تنامين هاي چربايتي فارغة
حور : لا بس أخافن لا يرد و يلگاني ماكو بالغرفة
جُمارة : عادي جدة تحاچي لا تهتمين
حور : انتِ دگولين هيج بس ما تدرين أنا شگد أعرفة هذا شيطان يتفنن من يعذب جسمي
جُمارة : اشردي والله لو گولي لزناد يخلي يطلگج
ما دام ما عندج جهال منه
حور : شردت منه مره و تالي ما لگيت لروحي مكان غير امشي بدرب مو زين و أنا خوافة هو شكل بية رعب
و لگاني أول ما لگاني يشبگني ويبوسني مثل الأم الي تلگة ابنها الضايع و يحلف بعد ما يأذيني
جُمارة : لگاج يم احد ؟ اي اكيد يكوول هيج
- لاااااااا وحده لگاني هو دوم هيج عقلة مو طبيعي يدمرني و يخاف اعوفة
بقيت ساكته اباوع الها
- بس من يجي الليل يتسودن يضربني و يعذبني ياكل بروحي آكل لحد ما يعاين بعد بيني و بين الموت شعرة يالله
يهدني
جُمارة : بس لا تحبي ؟
حور : احبة ؟؟؟ ولج أنا مرات اتمنى أذبحة و هو نايم بس اخافن اموت منه كل يوم ادعي يموت و ارتاح منه لو أنا اموت و اخلص
ولج يشگگ عليه هدومي وصلت بيه يوم من الأيام بقيت ملفلفة روحي بالفرشة لحد ما جابتلي مرت ولاء دشداشه
بس يريد مني أتحمله كلشي ما يسويلي هوَ
جُمارة : خلي زِناد يعرف
- لااا هو يموت منه مو النوب يتدخل بحياته يذبحني والله
غطت راسها ترجف و تمددت ثاني يوم للعصر زِناد ما اجة و جدة تلوب و حتى حور ترجف تريد ترجع جدة انطت لام عدنان الصبح فلوس تجيب الها أقمشة و خلت نورس تعوف كلشي و تخيط الها
اجه زِناد العصر بس ضايج صرت مثل جدة اعرفة من عيونة
اخذ حور لان جانت تلوب تروح منا و تجي منا
من طلعوا طلعت وراهم باوعلي مصغر عيونة
زِناد : خو مابيج شي
- بس شصار على روز
- رجعت
- صدددددددك ؟؟؟ ليش امي ما دگت علية
- يجوز تريد تجي تاخذج
- اريد اسولف وياك
- بدلي حتى أوصلها و اجيج
رحت للغرفة اركض بدلت و جدة تباوعلي
رهينة : وين ولج
- ضايجة جدة اريد اطلع اشتم هوى وحدي
- والله انتِ تدكين دروب هسة اخابرنه وعلي
جُمارة : ليش لگوها روز و ما تگليلي حتى ما ارجع يم امي
رهينة : اي چـا وين اكدر على فراگج أنا
تحجي و تضرب على رجليها تلوب مدري شبيها
عفت جدة و طلعت اركض هي تصيح وراي طلعت لكيته جاي بعد شوية و يوصل للبيت طلعت و فتحلي باب السيارة صعدت اضحك
اول ما استدار دگ تليفون جاوبها جدة
رهينة : ولك جدة هاي مكسورة الركبة طلعت مدري
وين راحت خاف هم تشرد
زِناد : يمي جدة يمي
- هههههه اني ما كلت الها ردت أعذبها
وصلنه للبيت مالته باوعتله و مشت السيارة
جُمارة : دير بالك على غزالاتي وبطتي هذّني آخر شي و بعد ما اربي لان هنا اكو ناس مخيفة هواي
زِناد : مخيفة هههههه
جُمارة : اضحك ليش ضايج وهاي ما متعودة
زِناد : دوم أنا ضايج بَس وياج اضحك
- و هسة صرت حتى وياي ضايج هي هاي الدنيا
الواحد بس يحصل على شغلة تصير عادية
اباوعلة ضحك من كل گلبة صدگ النوب استغفر و مسح شواربة
زِناد : انتِ لو بعد مية سنة ما تصيرين عادية
جُمارة : راح اتخبل امي ليش ما كالتلي على روز
زِناد : جُمارة انتِ اول و تالي امچ تجي تاخذج
- اممممم عرفتك ليش ضايج لان امي راح تجي تأخذني
لا تخاف ما اعوفك اروح و أجي
زِناد : أمج شلون راح توافق بالله
جُمارة : اني راح اكللها لا تضوج هي اصلا شاكة بيه
دكول من يجي تتخربط كل أحوالج ، ههههه
دار وجهة عليه يباوعلي مبتسم وخر رمشاية من عيوني
جُمارة : لاااا مو هيج لازم دگول اتمني أمنية و اني احزر و نشوف إذا صحيحة يعني تتحقق
زِناد : ما يحتاچ أنا موجود أحققهن الج كلهن
ضحكت و خليت ايدي على حلگي اباوع للطريق
جُمارة : شلون رجعت روز ؟ يعني دفعت الها
لا تخاف امي اكيد وره هذا الموقف شوية راح تحبك
بقى ساكت ما جاوبني ، أستغفر
أكلنه بالمطعم و اشتريت علبة مال خرز حتى اسوي سوارات
و هو ما قصص وروايات عراقية كرار صلاح يحجي هواي مو مثل كل مرة رجعنة للبيت بس كال لا تطبين بقيت واكفة أخذنا لجهة البستان ما يضوي غير القمر و المنظر حلو
النخل يتحرك من الهوى و ريحة الزرع تجنن الشي الوحيد
المو حلو صوت الصراصير وهو بس يمشي و اني تعبت
كعدت يم نخلة جانت اكو يمها طابوگة صار كلشي بعيني حلو مدام روز رجعت
جُمارة : زِناد
- ها عيني
حجاها و دار وجهة عليه لگاني كاعدة اجة و كف يمي
جُمارة : وين ماخذنا الدنيا ظلام
زِناد : ما أدري أنا هم بالي مدري وين
جُمارة : اعرف انتَ ليش ضايج بس لا تفكر هواي ترى حتى اني اريد ابقى يمك انتَ وحدك تحسسني بحب الاب
فـ ما راح اعوفك لا تخاف لا تخاف
زِناد : هههههه لا ما أخاف جُمارة أنا أصيرلج دنيا كاملة مو بس أبو صدگ تحچين انتِ شي خاص بالنسبة الي
ردت أحچي دگت عليه أمي غمض عيونه بقلة صبر
جُمارة : افتح سبيكر خلي أسمع صوتها مشتاقتلها
.....
" ورود "
ورود : جدة خل يجي ياخذ حلقته ما أريدنها
رهينة : ولج ليش يمكسورة الرگبة شسوالج
ام عدنان : ليش يمة
ورود : يمة ما أريدنه بعد چزت روحي منه
عفتهم و صعدت اركض من سمعت عدنان كام يرعد عليه
و يغلط سديت باب الغرفة و انهاررريت بالبچي و النوح
أنا ما تبت منه من اول لچمة و عشت ورا العمر كله ماكو ببالي غيرة و لا كدرت اكرهنة
و فتح جروح گلبي كلها من اجه خاطر يعيش ويانة أعاين بعيونة ما يتذكر هو شسوة و شلون تدمرت حياتي ضميرة ما أنبة مرة
خاطر يعاين شجَره بية من ورة اخته ، و تاليتي استسلمت لگلبي و وافقت من خطبني لان ما يرضى بغيرة
و هم رجع ما خلالي اعتبار ولچم گلبي بس هاي المرة اللچمة منه خواته مالهن دخل حتى احطهن عذر لأفعالة ، ضرب گلبي بيدي
- كلهههه منك كلهههه منك تدري بي يحب و رضيت
و تدري بي ما يعتبرك و راضي بكلشششي صوچي أنا سمعتلك
و يحدث ان يشمُت العقل بالقلب قائلاً
- أرأيت ؟
لو ما قابلة بيك هواييي احسن و باقية وحدي أعاني من طرف واحد
محد يعرف بية و لا هذا القهر الصار ضعفين ، زمرد !!
شگد يحبها بحيث لحد الآن محتفظ بـ باقة الورد ،
بس هي هاي الزلم كلها خاينة امي خلصت عمرها متحملة أبوية
و امراضة و بس تعافى فترة راح جاب وحدة بكدي و تزوجها عليها
و هسة رجعت حالته صارت أسوء من قبل
نمت بالكاع من القهر و دموعي على خدي أريدهن يخلصن
حتى ما يفشلنيّ بعد و ينزلن
مرت الأيام القهر ياكل من روحي بيهن كل ما اتذكر حچاياته وياي
و كل ما اتخيل قصة حبة روحي تتمرد ، كلهن بچفة و حبي اله بچف
بيتنا فارغ من الزلم و هدوء دوم لان زهرة و صاحباتها راحن وياهم
بس الشيخ يمر علينا يجيب النه مسواگ و يشوف جدة
جنت واكفة بالساحة ارش الساحة اغسلها شكلت الصوندة و فتحت البوري على النص لان الماي قوي إذا افتحة كامل و تضل الصوندة كل شوية طايحة بالگاع ، شالي على راسي لان الشيخ ما ينحزر على ساعة و يچفت علينه
ارش الكاع و اشتم ريحة الطين الطيبة بس بالي مو يمي
شكلي ما يتخيل غير لمساته العيشتني عالم ثاني بغرفته ذني كلهن
جانن نصيب زمرد لان جرائته جانت مبينه هو واحد مو اول مرة
تنحط مرة بين ايدة
على لحظة ابتسمت و انا اتذكرة من جان يكعد يمي بالمطبخ يتريگ
مديت ايدي للصوندة اريد اغسل وجهي بلكي برودة المي تصحيني
و تخليني اشتغل عدل ، رفعت راسي من طَب الشيخ
زناد : تفضل ولو مهدور دمك يمنه بس احنه ناس معزبة
اجت ضحكة من برة بس الضحكة مو غريبة عليه
و لا زِناد آشرلي فوتي هديت الماسحة و الصوندة طاحت من ايدي
و طبيت للبيت بساع من عاينته طَب للساحة
شرااااع !!!
كعدت يم جدة و امي جانت يمها
رهينة : شمالج خايبة لونج مخطوف
ورود : جدة زِناد مو كدامة كلت ما اريدنه شكو يخلي شراع يجي للبيت
رهينة : هلا بي يمة ريحة أخيتي تعاي گوميني خل اشوفنة
مديت ايدي اسندها حتى تگوم و اني عصبية
ورود : يمة انتِ سوي چـاي أنا لو يموت ما اسويلة
رهينة : كون ماتت عظامج ولج هذا شراع
حجتها و ملامحها تگلي عود لا تنسين
لان جدة اكثر وحدة جانت تدري بيه أنا شكثر احبة و حتى من اجة
تحاول بكل طريقة تحاچيني يمه و من يروح دگلي تحبي وريدة ؟
أجاوبها دوم بـ لا و أنا ادري عيوني فاضحتني كلش
بقيت كاعدة بغرفة امي ابوي راح يم عمي عمار و امي راحت تسويلهم چـاي كاعدة على الچرباية و شابگة رجلية و أعاين لروحي بالمرايه مال ميز المكياج امي مخليه عليها مكياج يمكن من عرسها لسه و كله ما تحط منه لان أحنه عدنه عيد بيوم النشوف امي حاطة كحلة يعني واصلة لاعلى مراحل الفرح
طبت امي تمسح ايدها بثوبها
ام عدنان : ولج وريدة اذا صاحولج لا تنچلبين روحي احجي ويا مالج غرض بعدنان أنا أحاجي
ورود : يمة يحب وحدة غيري قبل
ام عدنان : ماله غرض الماضي احنه ولد اليوم لو يحبها جان اخذها ليش رادج انتِ بالحلال
ورود : اسكتي يمة ما تفهميني ما تفهميني
عزلت امي الهدوم و تعاينلي و رافعة حواجبها
ورود : شمالج يمة هيج تعاينين ما اريدنه يالله و ما أحبنه
زِناد : وروووود
فتحت عيني بصدمة و امي رفعت اديها بمعنى معلية
عدلت حجابي و بلعت ريكي مسحت وجهي بيدي و عضيت شفتي حتى أنا ما ادري بروحي شجاي اسوي طلعت من الغرفة لگيته بالهول
كاعد يم جدة
ورود : ها شيخ
زِناد : روحي بابا للديوان أحجي وي رجلج و حلو سالفتكم
و إذا تصافيتوا ولهَ ما تصافيتوا أنا وياچ بعد انتِ
ورود ندري بيج معدلة
احس حچاياته وترتني بالزايد بعد ما بية أكلة ما اروحن لا يگوم يطگني
هزيت راسي و أعاين لجدة طلعت و بين المطبخ للديوان رجلية بادت
و صار الدرب شطولة بعدني ما طابة و بطني موتتني وجع
ضغطت على ايدي و طبيت أتنفس سريع جان گاعد هوَ ، گام
اجه متوجه عليه بقيت واكفة بمكاني ما تحركت
شراع : مع الأسف عليج
ورود : مع الأسف عليك انتَ
لزم ايدي من جهة الزند قوي ضاغط عليها باوعتلة خِزرتة
شراع : باعي ورود مو شفتيني وياج مرتاح تهديني
ترى بعد گلبي مابي حيل
ورود : طبعا الله يساعد گلبك
شراع : انتِ تعاقبيني على سالفة قديمة ؟ اني اصلاً تأذيت منها و سالفة ندى يعني شسويلها أذبحها ؟ شفتيني
شلون طردتها من البيت
ورود : ذني ما ينبلعن عندي إذا عاديات عندك
و اخوية من تغلط عليه و ما تسويلة اعتبار ليش ماذكرتها
شراع : يعني اخوج ما يسويلي اعتبار عادي بس اني لازم اسويلة اعتبار و إذا هو اخوج اني رجلج لا تنسين
ورود : مو رجلي
- رجلج و غصباً ما على راسج
دفعتة قوي من جهة الصدر هَد ايدي
و هو يحجي بأعصاب و أنا خازرته
ورود : تحبهااااا تحبهاااا و محتفظ بـ باقة وردها يمي !!
شنو أنا ما عندي احساس برأيك يا محامي
هااااا جاوبني
لزم جتفي من الجهتين
شراع : باعي أنطيني فرصة بَس أنطيني و شوفيني
انتِ جاية للمحكمة ترفعين علية دعوة و أنا بهذاك الوكت مأخذ اجازة أكمل تفاصيل عرسج ، لج انتِ شتحجين
ورود : أنطيك فرصة بالزواج و أنا ادري بيك انتَ ما تنعدل دوم تاليها ارد لاهلي مطلگة و هذا انا الما اريدة
شراع : منو يطلگج مخبلة انتِ انا اطلگج لج والله راحتي
يمج
ورود : ليش خاف اشبه زمرد لو أحجي مثلها جاااوب !!
شراع : لج بابا شچلبتي لج اسمها لا تجيبي گبالي لا تجيبي .. حجاها و دفعني قوي و ضغط على عيونة
ورود : شفت شفت روحك شكثر تحبها فـ لا تحاول وياي أنا اكثر وحدة اعرفنك و من يوم الوافقت عليك گلبي لاعب منك
شراع : لاعب مني و يحبني ؟؟؟
ورود : امدااااني والله الف مرة بساعة الحبيتك بيها ولك شحصلت منك انااا ها كلشي سلبته مني انتَ و عساها بحضك و بختك و ما راح أسامحك لان داويت الجرح بجرح
شراع : أطيبـة والله
ورود : لا ما أريدن أتوسخ بعد منك وإذا صدگ انتَ رجال
تطلگني و تفسخ العقد بس ما تسويها اعرفنك
رجع لزم زندي قوي و مد ايدة على حنچي ضغط عليه قوي
بعد أريد احجي ما اكدر ابد
شراع : باعي لچ حلمچ شنو حلمچ هو افسخ العقد و اطلگج
خليها هاي الحچاية بـ بالج للزمن
هدني و لزمن حنچي متوجعة و اعاينلة بعصبية
ورود : خايب لو تموت والله لو تموت ما أتسمى عليك مره
و إلا أنا برجلي أجيك أخزيك بالمحكمة خوش لو لا
مو شفتني دوم ساكتة تريد تأكلني
شراع : اول و تالي آكلج
ضربته على صدرة قوي بعصبية وهو ابتسم نرفزني
ورود : هسة إذا تريد روحك صدگ روح منا لا اخابر عدنان يهد الموكب و يجيك
شراع : باچر ولدچ يوگفون وياي ضد خوالهم
ورود : جثيرررر عايش اللحظة انتَ خفف من الأحلام شوية
شراع : هسة أني رايح و باجر اجي اخذج انتِ و امي
تشترين الذهب لان ما ضل وكت
ورود : شو انتَ تخوط بصف الاستكان والله ما آخذك
شراع : غصباً عليج اخذج غصباً على راسج
أني مو حقن تجارب عِد خلقجن افتهمتي لو لا
ورود : وأنا موش زايدة حتى تطلع سوالف زمرد بية
وًحقها تعوفك انتَ ياهو الترضى بيك
رد لزم ايدي و لزم حنچي قوي ينهار من اذكر اسمها و عيونه تطلع ليبره
شراع : انعل ابوج لابو زمرد افتهمتي لو لا
و هذا خشمج اليابس اكسره بيدي و اعلمج
اريد احجي ما أكدر محاوط جسمي
كله بأيدي و ضاغط على حنچي بأيد ، غمضت عيوني و تَاهت روحي
من صار يضغط على شفتي بقساوة و أنا انهاريت اريد أتحرك ما أكدر صرت ما اتخيل غير زِناد يطب و يعاين المنظر
صرت ارافس مثل السمچة المطلعينها من المي وهو يرد على حچاياتي بس بغير طريقة ، لحد ما هدني حسيت الدنيا توهه صار بيها الهوى
مسحت شفتي و ابتعدت عنه مسافة و اني الهث
هو مبتسم و يعدل بقميصة
شراع : بس تفكين حلگج بعد معناها تگولين ما شبعت
وكفت يم الباب اعدل بحجابي و خازرته
ورود : بسيطة والله إلا أندمك
شراع : ديالله هسة اني رايح و الصبح جاي
ورود : صوچي أنا فرطت بولد عمي و أخذتك
گالت جدتي الما ياخذ من ملته يموت بعلته
من عاينت عيونه كلها شر طلعت من الديوان عاينت على باب المطبخ
صوت زِناد يتقرب بلعت ريگي من عاينت زِناد گلت اختل يم شراع
و لا يدري زِناد بالحچيته رحت اركض للمطبخ لافة روحي بحجابي صار زِناد گبالي دنگت و طبيت رحت لجدة
ورود : وين الحلقة و التليفون
رهينة : بالغرفة و شتردين تسوين لا ترديهن انجبي
جُمارة : شسوالج تعاي اني اندلهن
جدة تغلط علينه أثنينه جابتهن جُمارة اخذتهن و طلعت اركض
عاينتهم واكفين هو و زِناد يسولفون بالباب عدلت حجابي و ايدي ترجف
زِناد ما شافني بس هو من اول ما طلعت عينه عليه من وصلت
يمهم سمعتهم ما يحجون بموضوع يحجون بخصوص شغل بتركيا
ورود : شيخ
دار وجهة عليه مخترع شوكت وصلت وهو ما يدري
زِناد : آبشري
ورود : هذن غَراضة
ترجع الهدايا الـ مني آجن ؟
و أنا الحچي التحچي الي ضَميته ؟
الگه الأمان بيا كتر !!
يَـ الچان حضنك حضن أهل بيهّ شمعزها البيتة
....
"عالية "
عدلت الفرشة و احس الغصة بـ بلعومي واگفة شو صارت صدگ چـا هو مو بلسانة من گالي أنا ما اريد اتزوج معقولة حچاية وحدة هيج آثرت بي و خلته يغير قرارة لو هو هذا قرارة بس راد حجة
عدلت الفرشة و رحمة محتارة تسفط بالغراض الغرفة شكلها صار شكد حلو عبرت العلاليك و طلعت اسمع ضحكهن وراي
طبيت للغرفة و قفلتها امسح بدموعي تمددت على الچرباية
و أبچي على حضي أنحرمت من كلشي بسبب غلطي
حتى من الغرفة الي هي حق كل بنية من تتزوج
شبگت المخدة و نمت ضلت الأيام نفسها تنعاد و البيت فارغ و عمتي و رحمة ما عدهن موضوع غير عرس علي بَس من اجة عمتي بقت لازمة گلبها دگول شو گلبي ناغزني كعدت بالهول تدك عليهم واحد واحد
اجة سلام كعد گال لرحمة غده
ام سلام : يمة شو اخوك محمد هم رجع انغلق خطة ما يبدلة
سلام : مابي شي يمة يجوز عطلان يصلحة و يخابرج
- غير يجي والله إلا أضمه فوك و ما اخلي يرد لهناك بعد و لا اخلي يطلع باب الحوش يااااالله
اجه عمي يسأل سلام ليش راجع هو ولاء
سلام : يابة تعبنه گلنه نرتاح يوم و نرد للموكب
قبل لا يجون بأيام رجعت نسوانهم اباوع صافنة الأجواء الجهال كلهم
مشترين هدوم جديدة منتتظرين آبائهم و النسوان هَم كل وحدة سوت حملة تنظيف لغرفتها و منتظرات يجون
بيوم الأربعينية الظهر كلهم أجو و هن كاعدات بالهول
كل وحدة تدور رجلها من بينهم و راحتله و الجهال فرحانين
اباوعلهم مبتسمة شگد حلو المنظر
ام سلام : جا مرتضى وين
سلام : راح يجيب مرتة و أبنه
- كش لا هلا
خالد : علاوي من ينزل غصباً على راسة يوميه لعبة ويومية نسحل اولاد ربيعة
ام سلام : بالله انتَ عمار نايم گلبك ما يرف على ولدك محمد و حسن ولك محمد تليفونة مغلق لسه
سلام : يمة خابرته من صديقة
الخط محترگ وجاي يسوي جديد و تليفونة هم عطلان
خالد : شطلعت هاي يابة
كالوا نريد ننام شبعانين و بالليل ناكل الظاهر هُم كل سنة هيج لان امهم ما خلتهن يطبخن هواي و لاحتى كالتلي خبزي صعدت فوك لغرفتي اكلت من حلويات آريج باقية آخر قطعة تمددت على الچرباية
رجع الروتين مثل قبل اخبز يوميه وأنظف المطبخ وي اريج و الديوان وحدي و بين يوم و يوم اسوي العشاء بس آريج تساعدني لان هم مريضة و حالتي حالة
اتذكر بهذاك الشهر شگد خلاني بحضنه حتى يخفف عليه الوجع
و ختمها بـ كتلة قوية
واكفة أساعد آريج بالمطبخ
- ولج انتِ صدك زمالة و بدون احساس ما تعاينين التجهيزات مال عرس و ملچة رجلج
عالية : لا خلي اول و تالي يتزوج
آريج : خايبة أنچبي أمشي أصعدج أحفلج و اصبغ شعرج و لمعي روحج أنا باجر رايحة للسوگ اجيبلج وياي هدوم الوان شبقة هو عگب باجر ويخلص صفر و يرد رجلج
عالية : اي عادي حفيلي أكيف
- انجبي شني بس تكيفين أنا خو ما اتعب على الخالي بلاش كون بيوم تتحضريلة بحيث يكعد الصبح ينزل لامة يكللها ما اريد بت اختج
عالية : ما يسويها
- خايبة انجبي والله يسويها چـا هو غير يموت عليج
بقيت ساكته مدري شمالني ،
ثاني يوم انطيتها فلوس لان هو انطاني
و سولف الها أنا شلون احب شكل الدشاديش و أنا كاعدة يمها الصبح هي توكل جهالها دگ تليفونها عاينت و ضحكت
آريج : خايبة هذا رجلج صدك ابن حلال
جاوبته و هي فاتحة سماعة و تضحك سلم عليها
علي : أكلج خوية هاي عالية شلونها
- زينه يعني نص و نص مريضة بعدها
علي : ديري بالچ عليها امي ترى قاسية ما تتفاهم
أخذي من سلام فلوس و شوفيها شمحتاجة جيبيلها
آريج : اي محتاجة اليوم جابتلي فلوس منطيهن الها
گالت جيبلي وياج راح أجمل فوگهن
علي : لا رجعيهن الها و اخذي من سلام هن حتى ما يسون
شوفيها شتريد جيبيلها أنا هواي قسيت عليها
هاي الفترة و ما سألت عنها بس حتى تتأدب
بقيت صافنة و هي سدت المكالمة ضربتني على ايدي
آريج : ولج هو هذا يتفوووت امداااج
مسحت دموعي و صعدت مدري شبية لگيت رحمة بالهول واكفة
العصر من اجتي اريج جايبتلي أشكال و الوان
عالية : آريج خطية مو هلگد راحت فلوسة
آريج : انجبي ترى كلنه أخذنه من رجولتنه هلگد
من خلصنا العشاء اريج نيمت جهالها من وكت و صعدتلي
رجلها ما موجود بالكهوة وهي تحفلي و تسويلي
جسمي و الصبغ آخر شي
عالية : خاف يخرب شعري شلون
آريج : انجبي هو شعرج اشقر جبتلج اشقر زيتوني
و جبت لروحي احمر اريد من سلام فلوس السلفة إذا ما أدللة ما ينطيني
من خلصت جسمي تعبت و گلت الها باجر الصبغ
الصبح كعدت اباوع لأيدي و رجلي جسمي كله احمر لان سويته و منتظرة اريج تكعد حتى تصبغة
من شافتني امه حافة خزرتني و صارت عصبية كامت تطلع شغل من جوه الكاع
اريج : من تخبزين اصبغلج لان لازم عشر
دقايق و ترحين تسبحين
صعدت اعجن و هاي اول مرة اعجن و اخبز بـ حُب
مرتضى مرته ما رضت ترجع بيوم الأربعين و اليوم
هم يريد يروح امه ما ترضى نزلت لكيت آريج تصبغ بشعرها
آريج : تدرين ما الج غير اليوم لان باجر امه
متحلفة إعلة الملچة باجر
عالية : صدك نسيت انتِ شكو تگليله مريضة و بعدها
ترى هو اصلا حاسبها و يعرف كلشي مو فقير
آريج : انجبي هو يصدك بيه
حطت العصارة و الأوكسجين تريد تصبغلي شوية و انجريت من شعري و فتحت بوري السنك على طاسة الصبغ
ام سلام : ولج آريجججج الحية تتفقين وياها ضدي بت اختي چنتي و غصبا عليجن تجي
اريج : و أنا شلي غرض البنية رادت تصبغ و كلنه صبغنه
ام سلام : انتن وحد و هاي وحد
جرت شعري قوي صرخت و طحت بالكاع
صعدت اركض لان روحي مفحمة من التنور
ام سلام : والله إلا اذبحج و ابني علاوي ما يكلبج لو تموتين باجر ملچته شجاب بت البيوت للناهبة
بقت تغلط ولحد ما اجوي ولدها يسكتون بيها لميت شعري أبجي بصوت عالي و أضرب خدي قوي .. امداااااج عالية ذليتي نفسج امداج
طلعت اسبح و لبست دشداشة جديدة لان الوان و طبيت للغربة
كل شوية دموعي تجري و امسحها
نمت الظهر و فزيت على طگطگة بالغرفة كعدت عدل أعاينه هو واكف
ينزع البسطال مسحت عيوني و گمت هو عاينلي و راد يحجي بس سكت اخذ هدوم و طلع من الغرفة جريت فراشي فرشته
نزلت جوه اريج تسوي عشه دولمة جدرين اجيت شربت مي و طب رجلها
بيده مسواگ صعدتهن بنته تركض
طلعت من المطبخ لان كلت يريد يحجي وياها اول
ما طلعت ابتسمت على اثر كلامة وياها
سلام : شعر احمر مووو أنا أعلمج
انتِ بعد صدگ ينخاف منج
آريج : اي شعبالك چا شوية
سلام : تجيبين صبغ و تطفي لا أذبحج خوش لو لا
النوم أحمر طالعة تشعين
آريج : اشع الك موش لغيري
سلام : لا روحي لغيري روحي مو أنا كلت الأحمر هذا
ياهي التصبغة تصير شلولو
آريج : تعال عيني ياهي گبلي صابغته
عفتهم و صعدت فوك كل ما اتذكر موقف امه روحي تنمرد شلون جرت شعري كبالهن كلهن جا هاي إذا ما اخذ بت اختها شتسوي بية
لا خلي ياخذها و يشمرني يم امي كل ما يلتحق ما اريدنه
طبيت للغرفة هو بعده بالحمام عدلت
الجرباية و كعدت على على فراشي متغطية
طب للغرفة يمشط وفرغ جنطتة أنا احس روحي نار تفور جواي من القهر نزل و أنا تمددت بالگاع اسمعة صاح لرحمة على اكل
المغرب يالله صعد يباوعلي بس ما يحچي شي و لا أنا حچيت ويا
بقيت اباوع للكنتور
علي : جيبيلي غير تيشيرت من الكنتور گومي
فزيت من سمعت صوته گمت فتحت الكنتور و أنا ما ادري هو شيريد
اشرتله على واحد كال لا و درت وجهي اشوفلة غيرة حسيتة يتقرب
عليه درت وجهي بخوف اشرلي هم مو هذا
بين ما شلت التيشيرت الثالث و درت وجهي صار هو گبالي و طخت ايدي بصدرة
علي : مو هذا
عالية : تعال عاين ياهو منهن كلهن ما تريدهن
مد ايدة على خصري جمدت بمكاني و درت وجهي على الكنتور لان حرت وين أدير وجهي تقرب عليه اكثر و جسمة طَخ جسمي مدري شصار بية
درت وجهي اريد أوخر لزمني بأثنين اديه احس روحي بادت
عالية : عوفني
علي : چان عـفتچ من زمان
وخرت ايده من خصري و رحت لفراشي ابچي تذكرت موقف امه الصبح
بَس هو انهار من عاين عليه أبجي لزمني من رگبتي لحد ما وگفت
أختنگت و صار الحايط بظهري
علي : لج تتذكري بعدج تتذكري
صارت ضرباته قاسية على جسمي
و هو منهار يصيح عليه بصوت عالي دَگوا الباب عليه فِتحة و طلع
و أنا بقيت على حطتي بالگاع ابچي
غطيت راسي و نمت اتمنى بس امي اشوفها گبالي
و أحاچيها اريد اگللها ما اريدة لان ما اريد اهلة و لا يردوني
أنا شلون أعيش يم عالم ما يردوني
ما كعدت غير الصبح و بوكت متأخر صرت متعودة من انضرب عمتي حتى خبر ما تريد و هو ما موجود بالغرفة
نزلت البيت كله محتفل و مخبوصات رحمة حاطة قناع على وجهة
و فاطمة مبدلة هي و جهالهة تريد تروح لاهلها
رحمة : يمة علاوي يگول اكويلي الدشداشة
ما يريد القاط ..
