رواية الم احل لك بعد الفصل الثاني عشر 12 بقلم الكاتبة بتول

رواية الم احل لك بعد الفصل الثاني عشر 12 بقلم الكاتبة بتول

 

ملـيكه

.... تگربت من الشباج ووخرت البرده وگلبي يتراجف ويتراعد من الخوف دخيلك يا ابو الحسن

خيال طويل وجثل معكوس عالشباج رديت بسرعة واديه بحلكي تتراجف ورجليه وحده تكصف بالثانيه صخاام بس لا هذا طنطل

سمعت صوت حجي اي ولله حجي

رجعت تگربت من الشباج وحطيت اذني جان اسمع صووت عگاب

لطمت وجهي بيد صخااام شيسووي عگيب هناانه

فجيت الشباج عالكيف وصاار عيونه گبالي ومخنزر طاك عليهن ضووه كمزت بسرعة ورديت ليوراه وايدي على صدري يخوف وعلي

عگاب....وولج شماالج انتي كل ماا شفتيني كمززتي شماالج ششايفه ما تكليلي جني طنطل

همست وايدي على حلكي

مليكه....شوايت لله على الجني والطنطل ولله ولا يوصلون الك

عگاب...شدردمين من جبح لهلـجهره

مليكه.....شتررريد عگاب ماا تخااف شنهي انته

عگاب....منين اخاافن مرررتي واريدن اشوفنها شحاالها

لطمت وجهي بيدي وصحت

مليكـه....صخاام يااهي مرتك

مد ايدي فج الشباج كله ودفعني عنه يعاين للمكبوره المنخمده وما تدري بالدنيه طشت رشت

عگاب....وولي وولج خل اعااين مرتي وولج سدينه روحي تفااادج شماالج بويه

ملكيه.... مصخنه شمالها

ما اندار اله ويعاين لـ مرته على كولته مدري ليمتها صارت مرته واثنينهم فكور حجوا بعرسهم منا ماات جدي منا رديت اسمع لحجيه واهز ايدي واضحك لابده بوراه الشباج عني لا يشوفني

عگاب....وولج سدين بوويه حاجيني من كوون المرض صاابني ولا اندل الج طريج عليش هجي خانكه روحج بالغطه

انووب عض اصبعه ونكث زيج دشداشته وصاح بعصبيه وحركان دم

عگاب...ااخ منك غياااد متوونس بحضن صفيه وانه مخليني مثل ام البزازين كلسااع بمجان شحجيي وشكوول محسووب عليه جدي

خاايبه هييي مليكه ووين وليتي

مليكه....بوراه الشباج ما خلصت عگاب

عگاب...خلصت بوويه خلصت هااج هذا علاج الهاا وديربالج عليهاا بعد اخيج

مليكه....ان شاءلله بس روح لا تجي امي تراا اليوم ابوك يم امك واخاافن تجي غفل

شوو هذا غمني ومشه ياا صخام بوجهك هاي بدال الـ انعم لله ووالمشكورة صدك لو كالواا سوي خير وذب بالشط وبعدني بوكفتي يم الشبااج واعدل بالبرده جان تفوت امي مثل ماا كلت مساعه جفت وغفل

شافتني يم الشباج وتلفتت بالحجره نايمات سدن واختها الازغر منها

..... وولج مليكه شسووين يم الشباج

... تعلثمت وكمت ماا اعرف شحجي امتمت بالحجي واجر واعر بالحرف اجت عتنتني من جتف الدشداشه وجرت ااذني شوطتني للزركه

حطيت ايدي فوك ايدهاا وحجيت مدمعه عيوني

مليكه....ولله ماا اسوي شي يمه ااعدل البرده

....وولج تعدلين البرده وشاالج عالركبتج تضحكين علينه شنهي وولج زعطوطه كدامج

مليكه....لا يمه وعلي بس ااسمعيني اذني فدووه اذني

....وولج مليكه تحجين لوو اجرج لحبوبتج تشووفها شغلهاا ويااج شسووين يم الشبااج بهليل

وشنهي هااي العلاكه بيدج

... جرتها من ايدي ودفعتني عالحايط طك بظهري ودمعتي بساعة نزلت عالخدي مهظومة منها

شنهي ما تعرفني لو ما تعرف تربيتي حتى تحج وياي هجي بس هيه من يومها هجي تخاف زايد وتحرص زايد

... وگبل لا تفتح العلاكه اندك الشباج مره ثانيه رفعت عيونها عليه وخزرتني حيل وانه ايدي على اذني والثاني على حلكي لا تنسمع شهكتـي

صوت عگاب من بره اتميز حطت شال على راسها وراحت تفتح الشباج كالت

.....عگاب شعددك هنانه مراابط يم الشبااج شنهي

عگاب...لا عمه فهمتي الساالفه غلط مااعدي شي حاى ارابط يم شبااجهن بس اشتريت علاج لـ سدن واطيته لـ مليكه ووهم انعم لله عليها خذته وهيه ما فتحت الشباج اله من عرفتني

....وانته ما تعرف ادك الباب تطي لـ عمتك كريمه لـ امهاا.....

قاطع حجيها وكال متعذر وايده عالصدره

عگاب....العذر والسموحة منج لجن وعلي ضل بالج على سدن وجدي تدرين بي ماا يرضه اگرب يمها عبنها مووش حلالي

....عگاب بتي زغيرره لا تحطوونها منصبه لسوالفكم

عگاب....عمه شنهي الساالفه ششايفتني حااط فراشي بصف فراشها حتى تحجين هجي وبتج ماا سوت شي ولا احنه مسووين شي غلط وحتى يوو تردين هسااعه اكعد جددي واكله عالصاار ماا تستاهل تبجين البت وتحجين هذاا الحجي عبن مووش من ثوبنه ولا من شيمنه

.....روح هسه والصباح رباح ونحجِ

رااح وحتى ما سلم عليها مبين طكن عده الفيوزات كلش اندارت عليه امي وعااضه اصبعهاا

.....ااخ ااخ منج ام المصايب فوتي انخمدي بفرااشج هسه وانه الصبح اعلمج وماا اطلع العلووية بهيه اذ اخليج تناامين بحيدج بعدد

توجهت لفراشي وذبيت الشال من على اجتافي للكاع حطيت روحي بفراشي وگبرت روحي كبر بالغطه وهيه اسمعها كعدت سدن شربتها علاج وجابت الها ماي وغطتها وطلعت من الحجره

وانه نمت ودمعتي عالخدي بهظهم وياريت الي ذنب بالسالفه كلشي ما الي ولا بيها ولا عليها وانذبت السالفه براسي

كعدت الفجر صليت وسويت ريوك لـ سدن هم كعدت كووه من امس بلايه اكل وكلتها وردت نامت ماعدها حرارة بس خمول وكسل من النوم وما ترضه تهد الفراش وتفارگه

... ضليت كاعده وي عمتي كريمه اشلع وياها الخبز ونجهز ريوك المعاريس وهم كلها كعدت من الصباح ودينه الريوك للمعاريس كيمر عرب وجبن عرب جبن گصايب عسل ومربئ حلاوة شعرية يابسة والحلاوة الرملية جوز وفستق بالعسل والدبس وهذا الريوك المعتاد للعرسان وحطينه الريوك للاهل حتى ينكفض البيت اخاف يجي خطار يو شي ما كلت شي بس شربت الحليب وما عاين لواحد

غياد....مليكـه بوويه

مليكه....هااجدي

غياد....شمالج بويه مووش عالحالج

... هزيت راسي بـ لا وهوه هم سكت بس سوالي لفه جبن كصايب وحلاوة رملية وحطها بيدي

غياد....اكلي بويه عليش بس الحليبه تشربين بيها

ضليت اعتعت بالفه علما كاموا لمينه المواعين ووكفنه انه وتنسيم نغسل مواعين الريوك والباقي كل وحيده بشغلها صاحني جدي كالت تنسيم

تنسيم....روحي مليكه انه اكملهن هنه ماعونين

ابتسمت كوه عليت اديه ونشفتهن و طلعت من المطبخ للحجره مالتهم فتت جدتي تحط لعباية جدي مسج وصوت قران بالحجره

ابتسمت عالشوفتهم كال جدي

غياد...تعاي بوويه حدري حذااي عليش واجفه

تمشيت وكعدت حذاه مسح عالراسي من فوك الشال

غياد....شنهي متگدر خااطرج جيف امج حجت عليج

رفعت راسي اله فاكه عيوني ياهوو كاله ومنهو موصل اله خبر

غياد....عگاب كاالي ماا يضم عليه شي هالمسگط هذاا

شهكت وبجيت بحسره شبكني وايده تمسح عالراسي

مليكه....جددي ولله انه ماا سويت وحتى ماا فجيت الشبااج اله بس لمن سمعت صووته كلت اخافن باب البيت مقفول وما يكدر يطب

غياد...ادري بوويه ادري واعرفنج شنهي انتي بس اميمتج حگها تخااف عليج بنيه حديثه انتي وعكيب غلطاان حتى يوو ضال باله عالبت عمه لجن تصرفه غلط وامك وياها كل الحگ وانتي ما الج بسالفه كلهاا

صفيه....حبووبه چاا احنه ياا ما شبعنه صوندات ونعوول من امهاتنه ماا حجينه ولا شكينه عبن ندري بيهاا اطكنه منا وتضل تبجي علينه يو عورتنه منا گلبها حنين لجن تريد تسيطر علينه وعدالها الطگ يجيب فاايده

هساع انتي لا يتگدر خااطرج واضحكي حبيبه وعلي مووش الج الوجه المدلغم حبيبه اانتي

... هزيت راسي وهيه كامت وفجت محل خانتها جنه دكان زغيررون كلشي بيها حلويات وجباسه ومصغول شالت نستله .. جبس بابا بطل.. مصاصه وعلج ابو السهم

حطتهن بحضني ضحكت وجدي حبني براسي

غياد....اي يبوويه ضحكي عليش مدلغم هلوجهة المصبااحه خيرر

يله كومي وي البنيات وفري طولج بينهن لا تضلين مغندبه وامج منها لحالها تجي تحاجيج وتكلج عليش سووت ويااج هجي

هزيت راسي وهو عدل عبايته وطلع من الحجره

انداريت على حبوبتي وحجيت

مليكه...حبوبه وارث ما گال يجي

جرت حسره وصفطت اديها سووه بوراه ما لفت شيلتها وحطت الجنگل الذهب والهيلة بحلكها

صفيه....لا ولله يحبووبه ماا يرضه يكول عدي شغل وتعليم تعذر من فيرس البارح وتخابر ويااه

مليكه...يله براحته ما دام هوه مرتاح

صفيه....ولله ماادري يحبووبه هلوليد مدوهننتني سالفته شسووي وياه وشعمل ماا اعرفن ذابتها عالله واهل البيت همه يحلونها ويوكفون اله بدنيته عبنه يتيم

مليكه...عساه محروس باسم اهل البيت يله حبوبه اجن نسوان وفاتن للديوان ويمهن عمتي كريمه

طلعنه من الحجره انه وحبوبتي وي طلعتنه نزلوا المعاريس فارس لابس دشداشة بيضة والبت لابسة بدلة بيضة مستره ولافه شال عالراسها وحاطه مكياج شويه سلموا على جدي وحبوبتي واطواهم صباحية سلموا على عمامي ونسوان عمامي كلهن ويضحكون خجلانين شحلاتهم جنهم عصاافير حُب شووي واحس بصوت بوراي فززيت ودرت وجهي ايدي عالصدري هاي سدينه وهذا عگاب حالفين يموتني بجلطه يو يگطعون خلفتي بسبتهم

مليكه....وولج شكوومج انتي موش مابيج حيل

سدن....مابيه شي لج مليكه ليمتهاا انه وعگابي ننزل سوه ونسلم عليكم وعلي انزل الكم اهلهل وادك جوبي بنصكم ما الوذ بظهر عگابي مثل مرت فارس مستحية

مليكه...فلشج كوون ولج لا وحيد يسمع

سدن....ملتهين بالمعاريس ياهوو بحال سدينه

مليكه....سبحتي انتي يو بعدج

سدن....لا هساع فايته

مليكه....خوش فوتي گبل لا يجون خطار بساعج

دفعتها وكوه راحت تسبح وبعدهي ادردم وتتحلم بعرسها وي عگاب بس لو اعرفن ششافت بي وهجي عشگتـه بس يله كل بزون يحب خناكه

.... فتت للحجره بدلت ثوبي بثوب احمر وبي ذهبي مشطت شعري شون ما جان وطلعت نضيف الخطار نسوان يحن يتباركن والعروس كاعده بالنص حاله شعرها ما شاء لله طويل ومشيته ثلجي حيل حلو عليها والنسوان تحط المباركة بصحن الكرزات والجكليت وراه ما تاكل منه ويتقدم للعرروسة

....والهدايا عينك وما تمد فراشات والبطاطين صاارت كواد كلت اطلع ابيع بيهن وعلي احصلي خوش ربح منهن بس ماا يرضون

كمنه ننگل بيهن للمخزن مال الفراشات وحبوبتي تالي كالت هيه بكيف العروس تريد تاخذهن لحجرتها تريد تخليهن بالمخزن براحتها

انهد حيلنه وطاح صبغنه

ومناك ديوان الزلم هم متروس والمضيف بعده ما مكمل بنيان وفاصلينه بحاجز عن البيت ببردات مالت معارض بس اصواتهم تنسمع

.... وحي لله حجي فلان وحي لله شيخ فلان وابو فلان

گبل الغده بشوي وصاحتني امي وطبت بحجرتها

مشيت بوراهاا وخايفه لا ترزلني يو اطكني مثل البارحة

فتت ليكتها حاله شعرهاا وتمشط بي سديت باب الحجره

....تعااي يمه

رحت يمها مديت ايدها وجرتني كعدتني حذاها

...مليكه يمه زعلانه مني

هزيت راسي بـ لا

....لا اازعلي انه اريدنج ازعلين حتى يصيرلج درس وعبرة يمه غلط السويتي تفجين الشباج لزلمه ماا يحل عليجن وانتن نايمات مطفيات

كلش

ادري بيج تخافين من عگاب ومن فتحتي خوف منه ومحبة لـ بت عمج سدن بس شووفي ياهو اكل الرزالة والطكات غيرج وهمه اثنينهم ما لاحهم شي

ويو وحيد شاايفه واكف جدام شباج غرفتجن ماا يكول عدهن شي ويااه وحتى يطببنه للحجره يجووز

رفعت عيوني عليها ولطمت وجهي حجيت مندفعة

مليكه...لاله يمه وروح ابووي والعزاز كوون فد يوم فايت للحجره يمنه وهااي اول مره يجي يم الشباج وعلمود سدينه بس وعلي ماامش غير سالفه

.....اي فهمت السالفه انه وگالي هوه الصبح وتعذر مره ثانية بس انه انهبج على الغلط ماا يصير السويتي وما اردنه ينعاد للتالي لو مو سدن مريضة لو تشوفينها تعالج گبالج ممنوع اكو امها واكو ابوها وعمي وعمتي موجودين وعمتج كريمه هم لو يريد جان مشه الهم بس هو يحب التختل اعرفنه انه عگاب

مليكه....صاار ما ينعاد وعلي

....عفته ببتي يله هساع كومي تغدي حتى تكفضن شغلجن وما يضل عدجن شي للعصر اخاف خطار متباركين يجـوون

مليكه.... وخلصت ايام العرس والمباركة وطلعت العروس سابعتها واحنه ارتاحينه من ضيافة الديوان مات الزلم جيف فتحوا المضيف يخبل كله ابيض ولون الاثاث نيلي والبردات بلونه وتدرجات من لون الكعده مالته

وهذا تعب عگاب بي صدك جان ما يلفي للبيت حتى عرس اخوو ما فهم منه شي مثل الاوادم ملتهي يراكض عالبيت والمضيف

.... والجنة الجبير للاحفاد بالبيت نجله مرت فارس

جانت طيبة وحبوبه ومن اهل لله فطيرة گلب ولسان وارتاحت وي فارس وهو هم اجت عالمرامه وما تعصي اله امر للتالي

تموت عليِ ويو سمعت بي يوم ما اكل بالشغل هيه هم ما تاكل تضل تناني ليوين ما يجي للبيت يله تاكل وتفوت لكمه بزردومها وجدي وحبوبتي مكيفين بيها عبنها مريحه فيرس على گولتهم

وما معذبه يو معلعله گلبه

... وعمي عتاد وتنسيم ذول بعالم ثااني لحالهم تنسيم تعبانه كلش من الحباله وعمي مكابلها اربع وعشرين ساعة مداوم عليها ويوصي بهذا ويوصي بذاك عليها حتى نزله من الحجره بعد ما نزلت عبن موش زين عليها النزله والصعده عالدرج ويو حل من شغله يضل مكابلها ويخدم بيهاا

وعمامي حاطينه منصبه بس هوه ما يهم ويا جبل ما يهزك ريح ولا عواصف

... وصار ثمن اشهر عالوفاة جدي واجوا وولده وطلبوا من جدي يتعجل بزواجة عگاب وما يعطلون عرسه علما ادير السنة مالت ابوهم وعلى مبدأ الحي ابگه من الميت وياا فرحة سدن وعگاب بهذا الخبرر

... لا الصدك مو بس فرحتهم همه الاثنين لاولله فرحة العايلة والبيت والعشيرة كلها

فتت وراه سدن والكاهاا عالكه طرب وتركص والشعر حالته نازل على اجتافها اسود بسواد ليل

شاده الوصله على خصرها وتتمـايل بكل انوثة الها

سحبتني وياها ونركص ونغني سوه بضحكة مليان فرحة بدون حقد ولا هم ولا غـم

غافلين عن القضاء والقـدر شضام النه

سدن....ووولج يمه ماامصدكه ومن الفرحة احس گلبي رااحي ووكف رااح اصير لعگابي واخيراا يااربي واخيراا

راح اتووسد صدره وانام بصفه كل ليلة ووماا افارگه ثاانية وحيده وولج مليكه جيسي گلبي رااح يموت من الفرحة

جريتها من ايدها كعدت من الفره بالكاع

مليكه... وولج هوودي شجااج لا تموتين وانتي ما ماخذه عگاب

اندرات عليه وعيونها تلمع ووجها مورد وخدودها متفحه كالت

سدن....مليكه اانه ما اريد اصبغ شعري اخلي اسوود هو گالي لاتصبغيه

والبدلة ايي البدلة كالي لا تخلينها جبيرة وبيها توور جثير عبن يريد يشيلني و يفرني بيهاا

وحتى بالسيارة ما تعبني والحذااء

وولج الحذاء ما اشتري كعب اخافن اصير بطوله واتوازه وياه لا اشتري حفااية بيضة

مووش وولج ااحجي عليش سااكته

مليكه....خيه على كيفج وي روحج بهداااي شمالج بعد وكت عالعرس هسه نفكر بالعقد مالتكم

سدن....هم صددك اي العقد شلبس بي واله اكلج نسئل اامج هيه تعرف بهاي السوالف كومي كومي بساعة

... جرتني وراها حطينه شالات عالروسنه وركضنه لـ امي اجينه ندك الباب تالي تفطنت ليلة لـ امي وعمي باايت يمهاا جريت سدن بسرعة

سدن....ااخ ايدي شبيج ولج

مليكه....عمي يم امي ليلة ليلتهاا

سدن....اي ميخاالف اطلعه واذ ابووي

رفعت حاجبي ماا مقتنعه هديت ايدهاا وأشرت بيدي عالباب مات غرفة امي

مليكه.....ان جانج نچـره صددك ومره فووتي دكي الباب وعمي جووه ترا

مشت خطوتين ورجعت تعض اظافرها بـسنونها

سدن....اخافن ابوي يرزلني

ضحكت ومشينه رجعنه للغرفة الساعة بـ١١ بليل

واحنه نفتر بالبيت جنه مخبالات

مليكه....چاا مو تكولين انه وانه السبعه النچـره شوو خطوتين وخفتي

سدن...يمعووده ابوي يخوف من يطك واير عده وعلي اكوم اتراجف منه مووش انتي ماا ضايكه جف ايده من يطبع عالخدج شحااله

مليكـه....يله يمعووده هسه اليسمعنه باجر العقد هو الاربعاء واليوم سبت عدنه خير وجثير ايام نتحضر بيهاا خوش بس انتي هسه نامي حتى وجهج يتفح وما يتعب

لفت روحها بالفراش وبس عيونها طالعه وتحج وياي

سدن...اي ولله صدك انامن حتى وجهي يغدي جنه مرايه

ربع ساعة توني غفيت بنومتي وهيه فزت كعدت تربعت بفراشها و تحجِ

سدن....وولج مليكه ماا كلتي منين نطلب كيكه العقد

حجيت واصم حلكها واردها للفراش

مليكه...سددينه نخمددي باجر نسوولف

خمس دقايق وردت فتحت عيوني وكال

سدن....اكلج شررايج نلبس اانه وعگابي نفس لون البدلة

مليكه....شوون يعني تردين عگاب يلبس بدله صخاام صخم سدينه تخبلت البت

... انجطلت تضحك ووجها صاار احمر من الضحك

مليكه....يمعووده لا تفطسين من الضحك شنكوول للعالم وشنكتب عالكبرج سبب حالة الوفاة الضحك

احجي وهيه تزيد تضحك

هزيت ايدي ودريت اجتها الحالة مات نوبة الضحك درت وجهي ونمت وهيه بعدهي تضحك وكلساع تنغني بجتفي وتحجِ على شغلة تصير ببالها

... ما ضجت منها ولا انزعجت وگلبي يدك الها طبول من الفرحة بس نعسانه لفيت راسي ونمت وهيه ضلت كاعده وتضحك وتسولف من وحيدهاا

.... ثاني وبدينه ننكرب من جديد وهلمره العرس مو حي لله عرس لا عـرس الحفيد الاكبر لـبيت شيخ غيـاد عگاب على سن ورمح

هزيت ايدي واضحك على حجي عمتي كريمه تهوس وتركص وتكول كولات ومركصتنه گبل شهر من العرس بس حيل متونسين وفرحانين وعگاب الثكيل الهيبة

كام يطك اصبع لـ عمتي من تهوس وبالنص حبوبتي وام سدن يردحن ويصفكن فرحة من گلب ورب

....جابوا مجلات بيها صور بدلات وتسريحات حتى تختار سدينه وكعدنه انه وياها ليل كله نختار ونحدد وامي خيطت اله برنص عرس وكتبت علي اسمائهم من وراه ومستبختين بي عبن من ايد علوية ونقرت عليه سورة يس يوم خميس عاليلة جمعة

وكالوا وارث متفرغ ورااح يجي لديرتنه من جديد ويافرحة حبوبتي بهذا ليلة وبهذا الخبر عبنه مفارك الحوش صاارله سنة واكثر

وفزينه بليلة على صوت صرريخ يخووف ويرعب الگلب جاي من القاط الثاني....؟

..... ميمـون

.... موجوده وما شفتها بس اجذب عيوني شنوو ماكو اي شي يدل على وجودها الخـوف واللهفة تحولت لبراكيـن غضـب ونار تلهب بصـدري وشـك دخل بدماغي شفت الساعة بـيدي بـ٣ العصر كعـدت على القنفة ومنتظـرها وبس لله يدري شضاام وشمحضر الها

راحت الاربعة

ومشت الخمسة

وصارت الستة

ودكت السبعة

واني ثابت بمكـاني حركة ما تحـركت

واخيـراً انفتح البـاب واسمع ضحكهاا وصوتها العـالي وجاي تحجـي وي شخص أذن موو بحـدها دخلت وبيدها اجياس عافتهن يم الباب ومجرد ما استدارت حتى تسد الباب التفتت شافتني فـكت عيونهاا وصـرخت

واجت طاايره يمي وطاحت اجياس من ايدهاا وكفت على طولي واشرت بيدي وكفت بخطواتها وما قربت مني

بغداد....ميمووون شووكت اجيت عمرري

ميمون....ووين جنتي

بغداد....شبيك حياتي

صحت بصووت وصدئ صوتي رجع الي

ميمون....وووين جنتيي

... رجعت خطوتين لوراه وايدها على وجها تباوعلي عمري ما جذبت عيونها واعرف التريد من نظره وحده وعيونهاا تكول لهفة ومشتاقة لشوفتي بس فعلها عكس وين مرضها..؟ ووين صوتها التعبان من تحجي وياي...؟ وليش طالعه من البيت هذا الوقت كله...؟ وبدون علمي!!ولا كلفت نفسها تتصل عليه والمحتمل هاي مو اول طلعه الها اكيدد طالعه قبل من وراي بدون ما تبلغني

بغداد....جنت بالدكتوورة

تقدمت يمها وتحولت نظراتها لخوف ورهبة من عندي رفعت ايدي عتيت شعرهاا بيدي

ميمون....والدكتورة تريد هذا الضحك كله وهذا البس والووقت المتاخررر اااحجي حيووانه

بغداد....ولله بالدكتورة ميمون ولله شووف حتى هذا الحجزز بجنطتي بس عووفني جاي تاذيني

ميموون....شكم مررره كاايل ممنوع تخطين خطوة بدوون ما تكليلي بدوون ما تبلغيني رجلج اانه لو مكرررن كددامج

بغداد....حشااك حبيبي حشااك انته بس ولله احتاجيت دكتورة

مدت ايدهاا الي بيها كارت حجز دكتورة ببغداد الجديدة

ذبيتها من ايدي وجريت الكـارت اخذت تلفووني دكيت رقم العيادة انفتح خط وصوت بنية

....تفضلوا عيادة الدكتورة لمياء

ميمون....ااريد اتااكد من حجز زوجتي بالعيادة

....اي تفضل شنو اسمهاا الثلاثي

رديت اسمها ومحدده الشهر الجااي ذبيت التلفون من ايدي عالقنفه رفعت عيوني الهاا تباوع بحقد وخازرتني هزيت ايدي ورفعتها لشااربي

ميمون....شعدددج يم الدكتورة النسائية

بغداد...ميمون اانته تشك بيه

ميمون....ماا اثـق ببشر اانه حتى اشك بيج

وكفت منتفضه رفعت اايدها بوجهي وترجف كلهاا

بغداد....تحجي صددُك ااانته

رديت راسي للتجوه مالت القنفة

ميمون....اي احجي صدُك وماا كتيلي شبيج حتى رايحة للدكتورة

بغداد....ميمووون

ميمون....صوووووتج

بغداد....شنووو هلبرروود شبيك انته مستووعب الحجي الجاي تكوله الي اااني بغداد

ميمون....وانه ميمون وبغداد ملكــي

فكت عيوونهاا بعصبية وغضب راادت تحجي بس لصمت حلكهاا ودخلت تمشي بخطوات متساارعة وترجف للغرفة طبكت الباب وراهاا قووي

جريت نفسي وكمت ذبيت بسطالي ذبيت النطاق والمسدس حطيته بجراره طيرررت الي ابو الراحة الجنت محسب الها هنا لوو باقي يم شاام ومستحاها مني ااحسن الي طلعت من الغرفة شمرت تراكسود اليه على القنفة رفعت نظري باوعتلها رافعة ايدها تهدد كالت

بغداد....ماا تدخل للغرفة تبقه بصاااله

ابتسمت بطرف شفتي

ميمون....اي عود لله كريم

مشت تريد تدخل للغرفة حجيت

ميمون...ماا كتيلي شبيج راايحة للدكتورة

بغداد....ليش اانته يهمك انته المهم عندك شكك وغيرررتك وبس الا بغداد طبهاا طوووب وبالف مرض اليكرفهاا ما تفكـر بيهاا

ميمون....امووت وراهاا

بغداد....حيااال ولله صل كل شي ميصير بيك

... دخلت للغرفة وطبكت الباب وراها

هزيت ايدي اضحك اخذت التراكسود لبسته علكت البدلة العسكرية البيت موو مثل ما متعود علي يلج لج مترب وعبالك مو هوه مختلف

ما ادري انه ادقـق بكلشي زايد

فتت غسلت وجهي ودخلت للمطبخ حطيت دلة كهوة على السخان

حطيت كوب ماي ثلث خواشيك كهوة وثلث قطع جكليت

.... خليتها على ما تفور وطلعت جريت اجياس بيهن ملابس بيت اكبر من قياسها وحفايات مالات طلعة

جيس ابيض علي اسم الصيدلية علاج حبووب ومغذيات ما عرفتهت مالات شنوو

ذبيتهن من ايدي وتوجهت للغرفة جريت يده الباب ما انفتحت عاد بده خباال بغدادي صااحت من الغرفة

بغداد....رووح ميمووون ماا افتح الباب

ميمون....شبيج انتي ليش هذاا العلاج كله

بغداد....ماا عليك بيه وكل علاقة ما الك بيه

ميمون...اهاا يعني نشك عقد الزوااج

سكـتت ما سمعت صوتها بس صوت طبكات بيبان الكنتور

ميمون....اافتحي الباب بلا خباال بغداد

بغداد....ماا

ميمون....شنوو المااا بت الاوادم شفتهمت ااانه

انفتح الباب وظهرت كدامي معصبة وشعرهاا رافعته بكتـر نخلة زغيرونه

بغداد...شترريد

ميمون....ووين جنتي طاالعه قبل شووي

بغداد....بالكـرااده

تقدم يمي خطوة وحده وصفط ايده على خدي بحرارة وقوة احس بي انشل وحتى حلكي عبالك اندار جرني من ايدي اله عااصر وجهي بجف اايده

همس بفحيف

ميمون....اااقسم بمن احل القسم ان انعاادت مره ثانية لـ اااعيد تربيتج بغداد واااعرفج منوو ااني ومنوو انتـيي وشنوو ملتج لا تخلينه نعيددد المااضي ونفتح دفااتر عتيكة

... شمرني من ايده اندفعت على القنفة وراي صاايره

لزمت بطرفها بيدي والثانية مخليتها على بطني وكأني حامية نفسي وحامية الروح البيها رفعت عيوني اله اباوع بحـقد وكـره وضغينه مشااعر مكبوتة وبكلامه المثل السم ومثل السهم الينبت بالقلب خله هاي المشاعر تظهر وتشعـب مثل الاغصان بگلبي صاااح ويفرك جفين ااديه سوه

ميموون....نززززلي عينج صلفه

نزلت راسي موو ضعف انما خوف عالروح البطني وكره حتى لشوفته كدامي رجع صااح بصوت يرعد القلب اله

ميمون....ووين جنتي

بغداد....كلت الك عند الدكتورة

صااح وينكث بيده

ميمون....وشنووو حاجتج للدكتورة شنوو هاي الحالة الما تتحمل حتى تبلغيني لوو تنتظريني ااجي واني بيدي اااخذج شنووو هل دكتورة من الساعة بـ٣ الظهر للــ٧ بليل

ااكووو رجال متزوووج بت ااصول ومتعلمه وصااينه بيته ومأمنها على حلاله وماله يدخل لبيته يلكااه زوجته طاالعه وبدوون اذنه ويااريت الطلعة سااعة ياابه ساعتين تكتل رووحها ثلاثة موو موو خمس سااعات واااتصل عليج التلفون مغلق وعاايفته بالبيت وفوووك شينهاا گوووات عيناها ترااد بكل عين صلفه ااني مرررتي تكلي جنت بالكراادة وولج موووكف شوووارب كددام مني حررف مااا يحجوون انتي خلك مررره تصاالفين بووجهي

وكفت على حيلي وكلي اارجف اكرهه اموت منه من يصتسغرني

بغداد....لاني زوووجتك موو جندي عندك ولا منتسب جوووه ايدك ماا يستووجب ااارجف منك ولا اخااف من يمك

واذ نرجع لحجايتك كلج خلك مـره فاكلك اني مررره والجاابتك للدنيه مره والربتك وخلتك كدامي واكف وتهدد وتعيـر بيه هم مـرره هم من جنـس حوواء

وكف كدامي رافع اصبعه بوجهي وجهة احمـر وبينت خطـوط بعيونه لونهن الـرمادي اندمـر بدمارات عيونه شفته تـرجف

ميمون....لا تلووفين الحجييي وانتي تعرفين مقصددي كلش ززين مووو لكفتي شكم حجاايه وجلبتي بيهن سئلتج سؤال بحتـرراام وردت منج تجااوبين مووو تصاالفين وتردين جوابات بووجهي تعـرفيني كلش زين شكدد ما انيي گلب وعااق وعااار بس ما اامد ايدي عالمره ولا اتمرجل عليها بقوتي البدنيه اااسئلج سؤااال مثل الاوادم انتظر منج رد تكليلي بالكراادة تعررفين حجم هاي الحجاايه لو لاا

ااااحجي لا تسكتين

... ابتعـدت منه خطوتين لليميـن ودرت وجهي فليت شعري بيدي وخصلات منه نزلت على ركبتي

صوته انفاسه المتسارعة ومتضاربة اسمعها

ما ردت ازيد من حدة المشكلة واعرف نفسي لو جاوبت راح يكبر الموضوع جريت نفس استعد بي كل قوتي واضبط بي انفاسي المترادفة درت وجهي علي بعده على نفسي وكفته منتظر مني جواب ونظرات عيونه لو الها قوة على القتل

جان قتلتني رخيت ملامح وجهي برمشات سريعة

ومتتالية بعيوني وايدي على بطني

فجـرت القنبلة بوجهة وكلت

بغداد....ميمووون انـي حاامل

ميـمون....؟؟؟

يتبع

الثالث عشر من هنا

تعديل المقال