رواية امرأة في الاربعين الفصل الخامس 5 بقلم نورا الرماحي

رواية امرأة في الاربعين الفصل الخامس 5 بقلم نورا الرماحي

تؤلمنا خيبات الأمل

واحيانا اخرى تؤلمنا خيبه الظن

انها تقتلع جزءا من ارواحنا

وتذبح الأمال فينا وتلقيه بعيدا

فى ظلام الوجع وتلغى زمنا

وتنفى وطنا وحلما وتاريخا

واماكن كانت لنا دنيا جميله

فى هذا العالم كل ما نحتاجه

هو كتف لا يغيب وقلب صادق

يعرف الوفاء وروحا تسمع

صرخاتنا واهاتنا المفتعله

فأحيانا يكون صمتنا الم ووجع

لكن نبوح بكلماتنا لعلنا نجد من

يسمع شكوى قلوبنا العليله....

وحين نَمر بالأماكن التي تحمل الكثير من الذكريَات !

ونقف أمام كل زاويه مسترجعين كل الاحَداث فالواقع نحَن لا نشتاق لتلك الاوقات فقط . .

بل إننا نشتـاق لـ ( أنفسنا ) وكيف كنا حيْن ذاك نشتاق ان نعود لتلك التصَـرفات من جدَيـد . نشتاقْ لذاتنا اكثر من الأماكن...

ما بين الأمس واليوم مسـافة

خبئت بداخلها كلٌَ أحلامي

أودعتها كلٌَ أمنياتي

الأمس ذهب ..!!

واليوم انتهى..!!

والغد آت..!!

مع ذلك .. وبرغم كل انكساراتي

ما زالت الأحلام والأماني , كما هي

لم تختبئ..!

لم تتكسر..!

باقية هي..

ما بقيت على قيد الحياة...

اليوم المصادف ٢٠١٨/٧/٢٢جالسة على سريري واشاهد البوم الصور لتلك السنين التى رحلت ولم يبقي منها الا الصور..

تأملت صورة عائلية تجمعنا بذاك اليوم قبل ٢٤عاما مضت ويظهر فيه وجه ياسين البشوش صاحب النظرة القاتلة والابتسامة العذبة...

التى بداءت دموعي تتساقط ما ان لمحت وجهه بالصورة وعدت بذاكراتى لذلك اليوم....

قبل لانطلع للجزيرة خابرنا اختى ام وليد حتى تتحضر ويجون للجزيرة ويانا..

اما اختى فائزة سودة علية جانت بالارياف وزوجها واهله يمنعوها ان تزورنا الا للضرورة فجانت بعيدة عن كل متع الدنيا وحسرة عليها كلشي لوما اهلي بين فترة وفترة جانوا بابا وماما يروحون يزوروها وية اختى ام وليد وزوجها جان يمكن صار بيها جلطة خطية حيل جانوا موزينين وياها عكس زوج ام وليد رغم انو همة يصيرون بيت خال ابو وليد...

جانوا اهلى ياخذولها كلشي من ملابس الها واكل تتسوك ماما اشكال وتاخذلها طبعا متندمة جانت ماما بس نرجع ونكول كله من ايدها خلتها توصل لهل مواصيل

لذلك جانت غصة بگلبنا اني وماجدة عدم وجودها ويانا ..

وصلنا للجزيرة لكينا مكان قريب على مدرجات المي يم القوارب وفرشنا فرشةبالكاع وكمنا ننزل الكدورة مال الدولمة والبريانى ولحم التكة الي جنا محضريه من البيت ووهم عاجنين لحم القيمةللكباب والخبز الحار الي خبزته ماما والخضرةوالطرشي واختى ام وليد جانت جايبة حلويات وكرزات وفواكه فصارت احلى لمة..

وكاموا الشباب اخواني ووياهم ياسين يشوون المشاوي واحنا البنات كمنا نحضر السلطة ومن كملوا الشوي فرشنا سفرة تخبل باكل يشهي ولمة حلوة..

كنت اراقب نظرات الاعجاب بين ساهر وباهر وخوات ياسين بثينة وسمر وشلون اخوانى اثنينهم يقدمون الاكل الهن ولاهلهن وجنت اغمز لماجدة وهي تضحك وانى اضحك.

من كملنا لمينا السفرة وكمنا نحضرالچاي.. وبين سوالف الاهل وسوالف الشباب وتحشيشاتهم كملنا شرب الجاي..

وكمنا نتمشي احنا البنات لعند المي وكعدنا على المدرجات اجو الشباب ورادو يصعدون للقوارب بثينة وسمر جانن مبهورات ببغداد وبالجزيرة والقوارب لان بكركوك يمهم ماكو هيج اماكن فرادن يجربن يصعدن للقوارب

اني وماجدة مانريد نصعد ضلن يلحن عاد ماجدة قبلت تصعد وياهن بثينة وسمروماجدة صعدن وية اخوية باهر وسائق القارب السريع وماهر وساهر وجهال اختى ام وليد بقارب ظليت اني كاعدة على المدرج وبنت اختى الي عمرها كان ٨ سنين وكاعدة وياي اكلمهاا وابوس بيها وياسين كاعد بمسافة مترين بعيد عني.. لكيته يباوعلي نفس نظراته مال البارحةبليل..

ياالله شنو هلعيون الي عنده وليش تلمع عيونه هيج بشكل يبهرنى ويشدنى اله من البارحة لليوم اتسأل وية نفسي شنو معنى نظراته هاي الي..

فجاءة سمعته كال حلوووة...استغربت وباوعتله بنظرة مستغربة وهو فهم منها انو اني متعجبة!!!

كام يبتسملي بابتسامة اخذت كل عقلي جان شكله وهو يبتسم زايده وسامة وسحر.

أشرلي على الطفلة الي يمي مروش بنت اختي وكال حلووة...

عاد فهمت قصده عليها..

رجع سألني على اسم بت اختى كتله اسمها مروة

كال.. اسمها حلو مثلها بس مو احلى من اسم خالتها

كتله... نعممممم

ادارك الموقف من شافنى جاوبته بحدة

وكال.. اني من محبين حرف الهاء اي اسم يبدي به احبه واعتز بحرفH.

كتله... لازم الك ذكريات بيها؟!!

كال.. يمكن....

سكتنا وراها وكمنا نباوع للبنات واخواني بالقوارب..

رجع وكال... الگلب خالي لو مليان؟

كتله بنترة.. نعم..شتقصد؟؟!

اشوكلامك الغاز ماتحجي بصريح العبارة بدل اللف والدوران.

سكت ورجع باوعلي بنظراته القاتلة..

وكال.. قصدى تحبين احد لو گلبج خالي مابي احد .؟؟

استغربت سؤاله وماجاوبته وكمت وخليته وحده ومشيت يم اهلى كعدت شفته كام يمشي بمحادات المدرجات بعيد عنا وهومدنك راسه مادري ليش ضجت عليه ولمت نفسي على تصرفي وياه الغير موزون

اجو البنات واخواني والجهال بعدمانزلوا من القوارب

سأل ماهر عن ياسين كتله شفته راح من ذيج الجهة للمي وأشرتله على طريق ياسين

راح ماهر عليه هو وليد ابن اختى... اجت ماجدة يمي كالت لج تعاى سمعي اخر تطورات باهر الي اول ماصعدنا للقارب كام يحجى وية بثينة وهي جانت راح تأكله بعيونها واخوج عيونه فاضحته ذاك هو وغرگان بالحب هذا يسموه حب من اول عرس

اتاري عرس مثنى جابلنا الحب لبيتنا اخوانى وكعوا اثنينهم تحجى وتغمزلي وتأشر على خوانى الي ذايبين بالحب

وفعلا انداريت وشفت باهر شلون يشيل ويحط گرزات كدام الحبيبة بثينة وساهر يحط بالفواكه والحلويات كدام سمر وكمنا نضحك اني وماجدة عليهم

الجو بيومها جان معتدل لابارد ولاحار رغم ذلك صارعندي صداع شوية..

لان عندي جيوب انفية سألت ماما وخواتى اذاعدهن حباية مسكن كالن ماعدنا اختى ام وليد كالت روحي صعدي للكوستر وكعدي بالاخير ومددي رجليج اخاف ماتحملتى الشمس ولو شمس شتاء بعد بس انتى ماتتحملين نستلاية ..

كتلها اي خلي اروح ماجدة كالت تعاى نصعدسوة..

رحنا صعدنا وتمددت بالاخير والشباك مفتوح من صفحة راسي الهوا يجينا منه بنسمات باردة تنعش الواحد وماجدة تفرگلي گصتى ارتاحيت شوية واني مغمضة كمت احجي لماجدة عن ياسين وكلامنا..

كالت ماجدة... ولج اكص ايدي اذامومعجب بيج وهسة تشوفين

كتلها... هيج ظنج؟!

ماجدة... اي صدگينى.. تدرين هو احلى من مثنى بميت قاط وهيج شخصية وسوالفه حلوة البارحة عجبني اتزانه وكلامه يااختى شخصية ولايك عليه يصير ضابط

كتلها.. اي وعليه عيون تجنن نظراتها بلونه العسلي على اصفر يأسر گلبي من اشوفهن

ماجدة.. لعدشبيج ياحظى وياه ماجاوبتيه على سؤاله وعفتيه ورحتى

كتلها... ماريد بعد اتعرف على اي شاب ولا اريد اي علاقة باحد كافي كسرت گلبي من مثنى

ماجدة.. موثولة اي والله ثولة لج ياسين مايتفوت انطيه مجال اتعرفي عليه اكثر يجوز هو قسمتج

كتله... لا اريداكمل دراستى وامي مستحيل اتزوجنى قبلج ولاتقبل اتزوج هسة ليش نضحك على روحنا.

ماجدة... اااخ من امي.. تدرين سمعت من ايمان بنت خالة امي اخوها رايدنى وامها مكلمة امي وامج معتذرة وكايلة البنت ماتقبل تتزوج واحنا مانغصبها اني وابوها وكلشي قسمة ونصيب ونصيبكم مويمنا.. شفتى امج شلون اطير العرسان الية عبالك بنتها ١٤سنة موجني بالعشرينات

انقهرت عليها عليها فعلا امي كاعد تظلم بختها لماجدة ومحد يكدر يوكف بوجهها ويعارضها

واثناء ماجنا نحجي حسينا اكو حركة يم الشباك الي فوك راسي وسمعت صوت ماهر وهو يكلم ياسين من بعيد ويمشي باتجاه السيارة اتاري طلع ياسين جان واكف يم الشباك الي جنت كاعدة يمه..

وفعلا شفنا ياسين اجى صعد للسيارة عدلت كعدتى اني وهوسلم علينا... وسألني وعيونه نظراته الي تگتل..

ياسين... شبيج خيرج سمعت عدج صداع قوي؟

كتله.. اي

ماجدة كالت... عدها جيوب انفية بسرعة راسها يصدع

ياسين وهو عين علية وعين على اختى كال... سلامتها ما تستاهل اروح اجيبلج علاج شي دوة من الصيدليات

كتله... حيييل هههه لامايحتاج هسةصرت احسن اشكرك

من شافني ابتسمتله ابتسملي هو هم.. واندار راح صعد للصدر..

همست لماجدة..لج جان واكف يم الشباك بس لاسمع كلامنا اشكد عيب من البارحة لهسة أمر بمواقف بااايخة كدامه وحطيت ايدية على وجهي من الفشلة..

والفطيرة ماجدة تضحك وتكول غلسي غلسي شوفي صعدلج ديلعب بالكاسيتات مال الاغاني اممم

كام فعلا يحط ويطلع كاسيت لخدمااستقر على اغاني مهند كام يمشي المسجل مال السيارة بالاغاني لحد ماطلع اغنية لمهند..

اسمها (مغرم بحبك)

وكعد ورفع الصوت شوية وكام يدندن ويه الاغنية.

ويباوعلي من المراية الامامية الي كدامه..

وماجدة منتبه وتغمزلي وتكرص بيه

همستلي وكالت بعدشتريدين الولد طلع مغرم بيج موبس معجب

دنكت وكمت ابتسم وخدودى صارن حمر اكيد من الخجل لحدماخلصت الاغنية..

دار ياسين علينا كال تريدون بعد اغنية لوكافي؟

كتله... بعفوية لا لا كافي وشفته بنظراته القاتلة وهو يبتسم وكال... كافي كافي امرج تدللين

خجلت من غمزلي وكلت بگلبي يااا هذا استخف وكام يغمزلي...

شفته كام ونزل من السيارة وراح لجماعتنا.. ظلينا شوية اني وماجدة وشفنا البنات بثينة وسمر اجونا حتى يشوفونى سألنى عن صداع كتلهن احسن...

كالن يلة ننزل نتمشي شويةونروح نصعد بسگة الموت ونتصور قبل لانرجع للبيت كتلهم يلة...

نزلن وانى جنت اخر وحدة انزل بنزلتى شفته كاعديم اهلى وعيونه علية وتكول كلام..

ماجدة كالت لاخوانى يلة كوموا نتمشي كلنا لاخرمرة قبل مانروح للبيت عاد كاموا الشباب وكمنا نتمشي ونسولف ونظرات الاعجاب بين اخوانى والبنات بفلس مفضوحين جنا على فطرتنا جيل الطيبين..

اما اني جنت امشي واعدل بثوب البرنسيسة الي لابسته لونه سمائي بورد نثر وردي الهوا لا يحركه جنت احط ايدي على سيقانى لاتبرز تفاصيلهن ...

وياسين جان منتبهلي..

ويتعمد يجى يمشي كدامي حتى يصد الهوا عني ...

وماجدة تكولي شوفيه شلون يتستر عليج لا يرفع الهوا ثوبج..

وصلنا يم اشجار ومدينة الالعاب مال الجزيرة خاصةسكة الموت عادصعدنا احنا البنات واخواني وياسين كلنا لان احنا البنات نخاف فصعدنا كل وحدةوية واحد ماجدةوماهر وراهم باهروبثينة وراهم سمروساهر واني وياسين وراهم بالاخير طبعا كان ترتيب ياسين هذا هو الي رتبنا كلنا لان هو وحده وية خواته الاثنين يصعد وية هاى تزعل ذيج لو يصعد وية الثانية تزعل الاولى ففضها هيج بالترتيب احسن...ووليدماصعد ويانا لان تلعب نفسه ومايتحمل...

اول ماتحركت بينا ع الخفيف اني كمت الف بثوبي زين حتى لايتحرك واني مشغولة بلف الثوب همسلي ياسين باذني

وكال... انتى ليش هيج؟!!دوم متعلمة هيج تحرجين نفسج بهل البسة الي اطير بالهوا وتفضح سترج.

من سمعته اقشعر جسمي كله من حدة انفاسه باذني اولا

وثانيا من وقع كلامه الي حسيته بيه يجرحنى لااراديا عيونى كامت تدمع حاولت احبس دموعي وماتطلع لكن هيهات نزلت دمعة مني وانى ساكتة وكامت تلمع على خدي وهو شافها ردت امسحها فجأة نزلت بينا السگة من علو ونسيت وتمسكت بياسين واني اصرخ من الخوف والرعب مال السگة والبنات كلهن يعيطن موبس اني وحدي ..

وماحسيت الا و لكيت نفسي لازمة ذراع ياسين من الخوفة راسا وخرت منه رجع دار وجهه علية

وكال... خليه لزمينى اجتنا نزلة ثانية وهو يضحك وصدك انداريت شفت النزلة الجبيرة وكبل رجعت لزمته للمرة الثانية من ذراعه وبهل مرة غمضت عيونى من فتحته شفت الدورة الثانية للسكة يعنى النا فرةثانيةونفس الرعب وشفت ثوبي كام يتحرك من وصلنا للقمة وراح ننزل غمضت وحطيت ايدية على ثوبي ونزلة اجت كمت اعيط ماحسيت الا بذراعه وحاوطنى بقوة لان شافني مشغولة بثوبي وايديةعليها هو حاوطنى وظل محاوطنى طول النزلات ارتبكت رغم جنت مغمضة واتنفس انفاسه القريبة

وهو هم جنت احس به وبقرب انفاسه مني جان يرتبك لحد ماوكفت اللعبة

ونريد ننزل جنت دايخة هو طبعا جان موخر ذراعه عني ونزل قبلي ومد ايده حتى انزل اشرتله ماكو داعي لزمت نفسي اجت ماجدة لزمتنى ونزلنا وهو باله علية..

بس طلعنا من اللعبة كعدت على اقرب مصطبة لان جنت دايخة حيل..

شفت البنات هم مثلي بس ماجدة صامدة

اخواني كام يضحكون كالوا ها طلعتن نساتل مو مال سگةالموت كتلتن نفسجن عليه وهسة جنجن صور من المعركة

كتلهم اني الصداع بلة تعبني بثينة وسمر انتن شبيجن هههه

بثينة كالت... مااتصورت بهل رعب وباهر جان يخوفنى اكثر يكلي هسة نوكع

باهروعيونه عليها كال.. اتصدكين اخليج توكعين واني كاعديمج ويغمزلها

وهي تبتسمله وادنك راسها وحمرة خدودها من الخجل بانت..

جنت منتبهة عليهم وبالي يمهم وشخص ثاني واكف ورة باهر منتبه عليةوبس اكيد عرفتوه؟

اي ياسين

جان بعينه نظرة خوف علية اتقرب مني وكال هسة شلونج؟ كتله... زينة وابتسمتله

كتلهم يلة نمشي نفتر..

كمنا نمشي الكل كدامي واني وراهم امشي ع كيف وكفنا يم كشك مرطبات اخذنا عصائر منه وشوية مشينا اخذلنا ياسين النا احنا البنات شعر بنات من اجي ينطيني

كال... هاج هذا عبالك يشبه شعرج كفشة مثله

رديت وكتله واني اضحك ياا عزااا غير شعري حرير ويخبل بس غير من غيرتك تحجي هيج لانك مزين صفر ...هو لان بالكلية العسكرية جانوا دوم يزينون صفر.

كال.. اني رجال ليش اغار من شعرج بس اغار من غير شي

فتحت عيني على كبرهن مافهمت قصده شيقصد.. كمنا نمشي وهو يمشي بينا اني وماجدة والباقين كدامنا رادو يصعدون ديلاب الهوا طبعا لان الي ذكريات وية مثنى بديلاب الهوا باي مكان جان فما اكدر اصعد كتلهم ماكدر راح اظل كاعدةانتظركم اهنا..

جانوا اكو عوائل غيرنا وشباب جانوا قسم لازمين سرة للديلاب وقسم واكفين يتفرجون من شاف ياسين الشباب ماراح صعد وية جماعتنا كللهم راح اكعداتفرج وية هيام عليكم وفعلا اجي كعد يمي..

وجماعتنا بالسرة واكفين وكفوا شباب اثنين مقابيلنا ..بس واحد منهم يباوع علية وعينه مني وطبعا ابو الشباب الي كاعديمي حس بنظرات الولد وخازره... ورجع اندار علية

وكال... هيام ممكن عينج لو ع الكاع لو علية باوعي وسولفي وياي خلي نشوف نهايتها وية ذولة السرسرية...

فتحت حلكي باستغراب كتله.. منو همه؟

كال.. هذولة الي يتفرجون عليج وهو يصك سنونه بغضب

كتله خلي يولون حشاك ولاشايفتهم اصلا

رجع ابتسملي

وكال... والنعم منج بس هم حكريهم حتى لايكبر راسهم لو اروح افكس عيونهم

كتله... بخوف.. لاعليمن فدوة لاتسويلنا مشاكل انوب اخواني يتخبلون علية وتصيرمشاكل

ياسين بس شاف الخوف بعيوني كال صار راح اخليج بس تحكريهم وكافي ماريداسببلج مشاكل الظاهراخوانج يخوفون

كتله... اي يخافون علينا مويخوفون والسمعة والشرف غالية مايحبون احد يجيب طارينا بشي..

ودنكت راسي حتى ماباوعت لجماعتنا ومن نزلوا رحنا رجعنا يم اهلنا واخذنا صور هواية (وهاي الصورة الي بيدي هسة من ضمنها.)

بالطريق كله ياسين يعدل بالمرايا علية حتى بس يباوعلي واني اباوعله وفاتح اغاني مهند وبين ثانية وثانية يخطف نظر علية وتقريبا شبه ابتسامات تتبادل بينا ومحد حاس بينا الكل ملتهي بالسوالف وصافنين على المباني والشوارع...

عاد من وصلنا المغرب جان..

اني جنت كاعدة بالاخير اني وماجدة الكل نزل ونزلوا الاغراض.

عاد نزلت اخروحدة كمت امشي وصاحنى ياسين وانطاني الفرشة الي ناسيها بسيارته

اخذته منه وانطيته ظهري افوت كدامه للبيت وهو وراية فجأة صاحني... هيام... لحظة.

التفتت عليه كتله بابتسامة نسينا بعد شي.

اقترب مني

وكال بهمس... ثوبج من ورة به دم

يمكن اجتج الشهرية.

وعافني ودخل للبيت.

ظليت واكفةمصدومة ودرت ثوبي الفه لكدام

وفعلا لكيت بقع دم الشهرية الي فضحتني ظليت الطم وكمت ابجي واكول ربي هاي هواية علية متت فشلات كدام الولد..

دخلت ركض وصعدت فوك وطبيت غسلت وبدلت واجت ماجدة الي جانت مبدلةقبلي ونازلة لجوة صاحتنى نسوي عشا خفيف للخطار

ماكدرت احجيلها على موقفي المحرج وية ياسين..

اول مانزلت شفته كدامي واكف وية ماهر بالممر يخابرون صديق الهم دنكت راسي وطبيت للمطبخ من فشلتى ماكدرت احط عيني بعينه

وبالعشا هم ماكدرت اكعد وياهم وكعدنا احنا البنات ورة العشا كعدة وداعاية لان باجريسافرون لكركوك...

فجاءة اخواني جابوا ياسين واجو ا دخلوا للمطبخ. طبعا تدرون اخواني يريدون بس حجة لشوفةالبنات..

وياسين ظل ساكت وكوة يحجي وعينه كلما يبعدها يرجع يديرها علية بنظرته القاتلة..

قبل لا نروح ننام باوعتله وتبادلنا ابتسامة بينا.

والصبح كعدنا من وكت نودعهم وجانت مشاعري مخربطة بين حزن وفرح مااعرف شنو سببه.. بوست البنات وخالة وسلمت على عمو وية اهلى وسلمت على ياسين

من صعدوا وراد يسوق التفتلي بنظرته القاتلة ذيج ولمحت نظرة حزن عرفت بقلبي انو حزين على روحتهم وفراكنا... وراحوا

وكفت برة ويةاخواني لحد ماراحت سيارتهم عن عيننا...

وللحكايا بقية....

.

السادس من هنا

تعديل المقال