رواية امرأة في الاربعين الفصل الثامن عشر 18 والاخير بقلم نورا الرماحي

أهذه هي لمستنا الاخيره؟؟؟

ياللقدر المجهول ،،،

نعم هي الأخيره...

تبّاً لظلم الموت وتبّاً لقسوة الحياة

وللأسرار

تشققت عيناي منها ومن دمعها

تراكمت عصورُ الكون على صدري

من أول

آهٍ من آهاته

تبّاً لك يا موت كم عذّبتني

وعذّبته

أهذه هي نظرتنا الأخيره؟؟؟

ياللقدر المجنون،،،

نعم هي الاخيره...

تبّاً للأسفار وللبحار ،،تبّاً لرحيله

ولجنون الاقدار

أذوبُ كقطعة من ثلجٍ ألقيَ في بركانٍ

لرؤية جثمأنه

أموتُ وأُقتلُ في كلّ لحظة

من شوقي له

وفِي صدى الخيال يطاردني

صدى صوته

تبّاً لك يا حب كم عذبتني وعذبته

أهذه هي ليلتنا الأخيره؟؟؟

ياللقدر المجنون،،،

نعم هي الأخيره...

تبّاً لظلامها وللبرودةِ الصّماء فيها

فلا نجماً ولا قمراً من فوقنا

يُحيّينا

فقد مات الحب وانتحر العشق فينا

فلا نارٌ في أحشائنا باقيةُ ولا ماءٌ

من فوق شفاهنا

تروينا

تبّاً لك يا حب كم عذّبتنا

فالموت كان أرحم منك

فينا...

😢😢

هلو حبايبي منورين دومكم 😘👀📝اعذروني البارت اليوم كلش حزين😭😢😵😷 يشهد الله واني أكتبه الف مرة عفت الكتابة وكمت بيها وهم رجعت أكتب علمود هيام وعلمودكم

الدموع مانشفت واني اكتبها...

بس اكول الله يكون بعون كل فاقد عزيز سواء بالموت او السفر او الفراق 😢...

والله يكون بعون هيام وكل وحدة مثلها...

خلي نبدي القراءة..

واكرر أسفي اذا احزنكم البارت...

سمعت طرق خفيف ع الباب...

ردت اتحرك ماكدرت حبيبي نايم بنصه عليه وشال حركتي لااكدر اكلب ولا اكدر اكعد..

سودةعلية باوعتله نايم بملابسه العسكرية من كدالتعب انمرد گلبي عليه اجى تعبان وشلون استقبال استقبلته... 😢

ماهان علية اكعده... والباب بعده يندك... جاوبت من ورة الباب واني متمددة بمكانى...

اني... منو...

زمن من ورة الباب... اني هيو ماتتغدون امي ظل بالها يمج..

اني... حبيبي نمنا ماحسينا من التعب هسة اكعد يسو وننزل..

زمن... لاحبي اني راح اصعدلكم الاكل... بس كعدي ماما تكول خل تسند كلبها موزين انتي مثل النفسة هسة...

تنهدت من كالت نفسة ولزمتنى العبرة... ودموعي كامت تتلالئ بعيوني...

كتلها... اي حبي تسلمون هسة بس يكعد يسو نكولج عمري...

راحت زمن... باوعت لحبيبي الي مستغرق بالنوم مثل الطفل بملامحه الحلوة.. يشبه الملاك... ماشفت رجال مثله لابوجهه الحلو ولا بهيبته وشخصيته واخلاقه وطيبه وحنيته وكأنوا مو من اهل الدنيا...

كمت امرر اصابعي على اذنه ووجهه واسوي حركة الذبانة من تزعج واحد...

كام يحك المكان الي اتلمسه وهو مغمض 😂

واني زيدت حركات اصبعي...

تالي لزمني من ايدي وابتسملي وهو يكعد وكال وهو يبوس ايدي... خوش ذبانة هبرة تحوم عليه استري على نفسج مو مكسرة من وكعتج وانوب من جوة مفتوح بوري..

خوش استقبال طكيتي البوري بوجهي بس دخلت للبيت 😏يحجي ويعوج حلكه..

عاد اني اهنا خربت ضحك على طريقة كلامه ومن كال طكيتي... 😂😂😂😂

اني... 😂😂كوم.. كوم.. عني يلة شثكلك مردتنى... كوم جوعانة.. واريداكل وانت هم جوعان🍕🍗🍔😋 بعدين كمل نومك اليوم دربك خضر😂😂😂

يسو... قصدج احمر دم😂😂

وكمنا نضحك سوة وضحكاتنا وصلت لجوة صعدت خالتى الظاهر على صوت ضحكنا...

اندك بابنا... كام يسو فتحها واحنا نضحك بعدنا

دخلت خالتى

وكالت... صلوات اي يمة هيج اريدكم فدوة لعينكم..

بعد بيتي ياسين يمة وحظنته وتبوس بيه وكالتله... ربي يعوضكم اوليدي ماجان مقسوملكم راح صارطير بالجنة وبذيج الدنيا يشفعلكم...

واجتنى للسرير... ولزمتنى وبوستنى ...

وكالت... شمعة بيتى انصابيتى بالعين يومة عين ماصلت ع النبي من شافتج ام عصام.... وانوب الجيران تحسدني عليج ..

ام عصام وجه البومة اليوم شافتج وانتي تلفين الدولمة من اجتنا ..

عرفت راح تصيبج بالعين

من كالت... خية خوش چنة عدج جمال واخلاق وندارة شوفي اللفة مال دولمة السلك عبالك اصابع ملفوفة خية شنو هاي... وهنيالج عليها وماهنيالج... الى ان صابتنا وراحت...

يسو... ههههه خرافات يمة الله ما كاتبه النا مامقسوم اهم شي عندي هيو سالمة هي بنتي وهي مرتى وكلشي اليه..

ودخل للحمام حتى يسبح حبيبي...

خالة التفتت الية وكالت.... الله يخليكم لبعض وربي يسعدكم

اني...ويخليكم النا يوم😊

... شلونج هسة خومايوجعج شي..؟

اني... شوية عندي الم مثل لويات وايدي هم توجعني... اي ايدج التوت جواج يمة كل مااذكر وكعتج جسمي يكزبر 😖

الله ستر مااتكسرتى وانشك راسج هسةاهلج خايفة من يسمعون شيكولون 😞مستحيةمنهم والله..

اني... شلقصة يوم قابل انتو موكعيني هذا قضاء وقدر وماراح نكوللهم وكعت من الدرج نكول جان ميت الجنين برحمي من علاج..ودكتورة كالت نزليه ماريد اكول وكعت...

خالة... ليش يمة..؟

اني... احسن يوم انتي بس أيديني بكلامي احسن لان امي اظل ترزل بية ومالي خلك اترزل ..هسةتكول غير تنتبهين...

خالة... اي حقج امج الله يسلمها تحجي اعرف مثل ماتريدين يوووم... يلة كومي غسلي وتعاي اكلي...

نزلت خالتى رحت اني طلعت هدوم الي وحظرت حتى اغسل وابدل رغم خالتى جابتلي هدوم وغيرتلي بالمستشفى بعد العملية .. بس ريحة المستشفى احسهابعدهابيةوبيةو مااطيقها...

يسو طلع من حمام دخلت اني غسلت وبدلت وتعطرت وطلعت...

لكيت الغدة جاهز... بالصينية معلاك شوي وكباب شوي مال سوك مبين عمو جايبلي والدولمة الي سويتها ليسو حبيبي وخضرة وعصير زبيب وخبز...

كعدني يسو وهو يبوسنى من راسي وقرب الصينية كدامي وكام يؤكلني هو بيده...

لان ايدي اليمنى مشدودة ام اللوية... كملت وشبعت وصبلي عصير وكام يشربني..

وهو يكولي عاشت ايدج ع الدولمة حبيبة

واني اكوله... الف عافية 😊

ورة الغدة كتله جيب التليفون حتى اخابر اهلي واحجيلهم... جابها وحجيت وية ماما وكتلها ميت الجنين ونزلته... هم ظلت تحجي علية شوية تالي كالت الله يرزقكم بغيره مامقسوملكم وحجت وية يسو هم .

وبابا حبيبي وبيبي هم حاجوني وتحمدولي بالسلامة وكال بابا باجر نجيكم من الصبح... كتله هلابيكم

وفعلا ثاني يوم الجمعة اجوني اهلي ب٧الصبح لان طالعين من الفجر.

ماما وبيبي وبابا وماجدة وبثينة وسمر هم... اخوتى مااجو

فرحنا بجيتهم خاصة اني😊 كلساع اروح واجي ابوس ببابا و بيبي 😂😂

وماما خطية جانت جايبتلي صوغة من حلويات وكرزات ودبس مسويته هي جانت دوم تسويه بالبيت من التمر ومسهية سمسم وحاطته بالدبس الطعم خرافي... جانت تسويه لخواتى بولادتهن حتى تنطي قوة وطاقة للنفسة.

وخالتى فرحت ببناتها وشوفتهن بعدهن ولا وحدة بيهن حامل...

سوينا ريوك وتريكنا كلنا سوة...

وبدينا نسوي ونحظر للغدة.. لان اهلي راح يرجعون العصر لبغداد... بسبب دوام بابا ومجو السبت...

ويسو حبيبي بيومها جاب سمج مسكوف وطرشي واحنا طبخنا تمن ويابسة (فاصوليا)

ودجاج شوي بالفرن اني سويتهن...

ومجو وبثينةوسمر ماخلوني اتحرك بعد من كملت طبخ همة صبوا الغدة وتغدينا وسوينا چاي وكعدنا نسولف...

كعدت يم بيبي الي تمددت بغرفة خالة لان من رجليها ماتتحمل تكعد هواية...

ومجو والبنات وماما وخالة ويانا

والزلم بالهول..

ظلينا نسولف وماما توصيني اديربالي بعد ع جايات كتلها حاضر...

ومجو سولفتلي عن واحد جيراننا ورانا متقدم الها وماما كالعادة رافضة😞..

انقهرت عليها وظليت اواسي بيها...

لحد ماصارت الساعة ب٤ركض سوينا عصرونية چاي وكليجةوكيك..

وب٥بابا كال يلة... جلبت ببيبي وماخليتها تروح وبثينةوسمر اجازتهن 😂😂ظلن

راحو بس بابا وماما ومجو... اخذهم يسو للكراج راد يوصلهم لبغداد بابا ماقبل كله تتعب وانت باجر تلتحق...

ودعناهم ودخلنا جوة وفرحتى جبيرة بوجود بيبي يمي.😍.

👀📝👀📝👀📝👀📝👀📝👀📝

بليل بعد اليوم الحلو الي كضيته وية اهلي وفرحت بشوفتهم...

كمت احظر جنطة يسو حبيبي الفجر يلتحق والله يخليهاا زمن خطية غاسلةهدومه وكاوية قمصانه...

عفت بيبي بالغرفة الزغيرة جوة ترتاح وتنام لان متعودة ورةآذان العشا تنام..

وصعدت اكمل غراض يسو... جنت واكفة اريداسد سحاب الجنطة..

اجي دخل للغرفة وحظني من ورة وبعدين دارني عليه.. وكام يشمشم ويبوس بية..

وكال... افيشش ياريحتج اشكد جنت مشتاقلج ومحظر سهرة خرافية ببالي كلها طارت..

بوكعتج يامدام.. يحجي ويباوعلي بعيونه الي اعشق نظراته...

كتله... غير امر الله شسوي 😔.. سحبني لحظنه

وكمل كلامه واحنا متحاظنين حاط راسه على كتفي واني حاطة راسي على كتفه...

همسلي.. يعني جان وكعتي بغير يوم الابيوم الي اجي ماوكعتي السبت الفات 😂😂

دفعته واني اضحك وتخوصرت و كتله... اي خوش خوش بين على حقيقتك يااناني 😠.

باوعلي من جوة لفوك واني متخوصرة وامثل الزعل والغضب..

وكال... لج لاتكفريني اجمالة تتوخصرلي.. وبحركاته السريعة رجع سحبني لحظنه وشبكني اقوى

وكال... لج جددددي محترك عليج وانتي تتماوعين وتتخوصرين ترى لاتخليني اجرم بيج واسوي الي محد مسويه..

ضحكت بدلع.. وكتله... اي شوفني بلة شلون.😉

خلي نشوف..

وجان يشبكني شبكة قوية وياخذ شفايفي بحلكه وانفاسه تعلى وطبك جسمه على جسمي واحنا واكفين مثل الي يريد يدخلني بروحه... بهذل احوالي

واني ذبت باحظانه ...

وهومستمر بالبوس ولازم راسي بين ايديه حسيت بيه راح يوصل حده

وفعلا دفعني وركض للحمام ورة مابهذل احوالي وذوبني.

رحت يم المراية لكيت نفسي الشعر كفشة والعيون ذبلانة وسحاب ثوبي مفتوح وصدري نصه طالع...

اوف بس احبه احبه واحب كلشي بيه... وظليت واكفة واردد احبه.. احبه...

فجأة صاح من وراية وعيونه تخازر ورفعلي حاجب وكال... لج منو هذا الي تحبيه 😡؟

اني بدلع واعدل ثوبي... واحد مجنون مايوكف كدامه اي شي حتى لو البوري مفتوح على كولته 😉...

اتقرب ووكف كدامي وكال... اي بلة اشكد تحبيه كولي؟ 😉

اني واتماوع... اووووف من حبه بهذل احوالي حياتى صارت عبارة عنه وبس..

من يغيب الفكر والبال يمه..

ومن يرجع ياخذ الروح والرية...

احبه حب ماصاير كلبي مايتحمل فركاه....

لوبيدي افتح كلبي واحطه بيه و احجزه بكلبي طول العمرومااخليه يطلع ويفاركني...

اااه ااااه احبك... وتقربت وحطيت راسي على صدره...

ضمني هو اله وكال... الله الله ست هيام صايرة شاعرة مو؟؟ 😂

تنهدت وكتله... ااه ايييي من حبك كلبي انتهي...وكلشي اصير لحبك

يسو... سلامة گلبج ياروح الروح.. وكام يغنيلي اغنية حميدمنصور.. سلامات.. وبصوته الحلو الي جان يطربني..

سلامات.. سلامات ريتك سلامات..

صبح ومسة ياهواي ريتك سلامات..

وية الرايح والجاي..

ابعث سلامات...

تجينا ردتك تجينا... راحت واجت الايام

ردتك تجينا...

وعلينا.. بس علينا تجينا....

(جان يغنيها الي باحساس ويقلدصوت حميدمنصور لحد يومنا هذا دوم اطلعها واسمعها واذكرهه... واتخيله كدامي بنفس وكفتنا واكف وبنفس غرفتنا ومكانناويغنيها الي وكأن الزمن وكف بذاك اليوم😭😭).

ظلينا نسولف بليلتها...حظني ونومني وبقيت بحظنه وساكتين ويبوسني كل ساعة... وغفيناونمنا بس ساعة⏰

وقتنا المنبه مال الساعة المنضدية ل٢بليل كعدت وكعدته حتى يكوم يسبح ويبدل ويطلع لديالى ويلتحق للكلية...

ودعته وبكلبي ناااار لان مااتهنئ باجازته هاي وراح...

عدت الايام كالعادة ثگيلةعلية بدونه بس هلمرة وجود بيبي عدنا غير من مزاجي شوية جنت اكظيها سوالف وية بيبي وضحك اني والبنات وحتى مرات جنت انام يمها...

وجان هو يخابرني كل ماتصيرله فرصة بيوم الثلاثاء جنت نايمة الظهر مخابر وخالتى حاجية وياه..

كايللها بليل اخابرها خل تنتظرني.. وخالتى كاللتلي بس حيل ضجت لان جنت نايمة وماحاجيته...

كلت هاي هية خل انتظره بليل.. وصار الليل واتعشينا وكاعدين كلنا كل مايدك الارضي اركض قبل الكل وبيومها مابقي واحد مااتصل بينا 😂😂.

جنا نشرب جاي وسمعت صوت رنين التليفون ركضت ورأسا شلته وجاوبت جان يطلع عم ياسين سلمت عليه وناديتله عمي..

رجعت بخفى حنين مثلما يكولون😂 للهول وكمت ألوب من الانتظار ورة ساعة هم سمعت التليفون يدك وهم جان اركض واشيل السماعة والكى صديقة زمن تريدتسألها عن امتحان باجر وصحتلها زمن وسمر طكتها ضحكة طويلة علية.. اشكد مكروهة 😂😂😂.

وهم رجعت كعدت تالي خالة كالت سوولنا كاوكاو دافئ خلي نشربه..

كتلها.. اني اروح اسويها..

بثينة حجت من يمها وكالت..لاااا 😅😅دخيلج تعوفيه يفور وتركضين للتليفون..

اني... غثيثة لاتخافين بعد مااتصور يدك ولااحد يدك علينا صارت ب٩ونص وحتى اطمئنج راح اخذ التليفون واسحبه للمطبخ 😜.

ورحت للمطبخ وتليفون حطيته ع ميز وطلعت الكاوكاو وخبطته ويةالحليب والسكر وحطيته ع نار واني احرك بيه وجان اسمع دكة التليفون...

وصرخت ع بنات لحكن ع كاوكاو ولزمت السماعة وجان تطلع ماما 😟تسأل علية وعلى بيبي وكالت الجمعة اخوى باهر يجي يرجع البنات وبيبي لبغداد وية مثنى..

لان مثنى ابن عمي عنده زواج صديقه بكركوك وجاي يحظر عزيمة الغدة وبدل مايروح وحده جاي وياه باهر .

كتلها... هلة بيهم وظلت تسألني عني كتلها احسن والدم انكطع وماكو شي بعد الحمدلله

وكامت تدعيلي للمرة الجاية بولد يترس حظني فديتها ماما حيل تغيرت واحسها كامت تشوفني صرت مرة بمعنى الكلمة...

ورادت تسلم على بيبي ووديت التليفون لبيبي وظلت تسولف وية بيبي وخالة...

نص ساعة طولت مكالمة ماما.. تالي صارت ب١٠كلها راحت تنام..

(قبل ماكو سهر مثل هسة تلفزيون جان قناتين وماكو نت محد يسهر كلها تنام خو الجهال من ٨جانوا ينامون والاكبار حدهم ل١١وكلش متأخر هذا الوكت بالنسبة الهم).

بيبي وديتها ونامت بفراشها وانى رحت عزلت بالمطبخ ونكعت حمص للصبح احطه بجدر الضغط ويصير جاهز للريوك لبلبي طيب ...

كملت ردت اصعد الدرج وصلت ل٤بايات وجان يرن التليفون ونزلت ركض كأنما عرفت دكته ولو ماجنت ممصدكة يخابرني بهل وقت

لان محد يقبل بيهم يسهرون لهيج وقت بالكلية انظباط مشدد عدهم..

شلت السماعة وكلت الوووو

يسو... فدوةللصوت الووو بعد روحي

اني... اهلا حبيبي وروحي وعمري ماصدكت انت.. منين تخابر وشلون قبلوا تخابر؟؟

يسو... ههههه على كيفج وحدة وحدة.. ياستي طلعت قجغ يم ضابط الانظباط العسكري بمكتبه كلش خوش ولد..

وكتله من البارحة اريداخابر زوجتى و الظهرخابرت حظرتج نايمة وماخليت امي تكعدج كلت بليل اتصل

وهذا الضابط تؤسلت بيه وكتله زوجتى مريضةومدى اكدر اخابرها كال تعال بليل من ينامون اخذك وخابرها لهذا اتاخرت..

اني واتماوع بصوتى... اووف فدوة لرجلي ولزوجى حبيبي الي يخابر زوجته المريضة.

يسو... لج خرررب لاتتماوعين هو اني روحي طافرة عليج وميت شوگ.

اني... مشتاقتلك ...وتنهدت...

سمعته هو هم تنهد... وكال بهمس.. شلونج هسة احسن ان شاءلله؟

اني... اي احسن حمدلله ههههه

يسو... هااا حمدلله ضحكتج بيها فرج يعني هلمرة من اجي نعلكها بالصابون لو لا؟ 😂

اني... هههههاى اي نعلكها تدلل منتظرتك على نار

يسو... اويلي منتظرتك ونار شنو هلجراءة النازلة عليج ههههههه

اني... اووي غيرمشتاگة لرجلي حبيبي وحياتى وعمري

يسو... لج كافي يلة روحي راح انفضح كدام الرجال موتيني هسة شسوي وين انطي وجهي و هذا صوتج ودمرني لعد من اجي شتسوين اخ احبج.

اني.. اموت عليك.

يسو... مع السلامة حبيبي ديري بالج على نفسج

اني... مع السلامةالله وياك.. لااله الا الله

يسو... محمدرسول الله.... وسدالسماعة وراح وظليت اسمع صوت تواطة الخط طوطططط

سديتها واني فرحانة وصعدت لغرفتي..

وشلت مخدته وحظنتها وكمت اركص سلو ويةالمخدة واتخيلها حبيبي...

تالي تعبت وكعت ع فراشي وتمددت وماحسيت بشي بعد نمت.

👀📝👀📝👀📝👀📝👀📝

اجي الخميس كعدت ورحت كعدت البنات من وكت حتى نروح للصالون لان اتفقنا من الليل.

اتريكنا وكملنا وجنا مجهزين دولمةمن الليل ولافينها يعني غدانا جاهز بس خالة تحطه ع نار والبيت نظيف ومرتب...

طلعنا ب٩رحنا صالون قريب عليهم اني حفيت وسويت حمام زيتى لشعري..

وبثينة هم حف وجددت ميش شعرها... وسمر صبغت شعرها لون تمري لان ساهر يحب هلون عليها وهم حفت...

ام الصالون هي واختها جانن بشتغلن بالصالون وماجان اكون زبائن قبلنا ورانا اجو ناس لهذا كملنا بسرعة ورجعنا ب١١ونص...

صعدت بساع اخذت دوش سريع ولبست ثوب شتوي احمر يجنن وحطيت مكياج خفيف وتعطرت وشعري جان مغسول ومسشور من الصالون..

رحت جهزت هدوم حبيبي علمود من يجي يسبح ويبدل ويرتاح...

هلمرة قررت ماانزل انتظره هو يصعدلي... ب١٢ونص اجي حبيبي شفته من شباك غرفتي سمعت صوته وهويسلم عليهم وعلى بيبي..

وسألهم عني سمر سوت دكة بيه من يمها وكالتله طالعةراحت للصالون

سمعته كال بعصبية وحدددها 😡

سمر ردت اي وحدها...

كال ياصالون ...كالن مانعرف... كال.. بسيطة خلي اصعد ابدل وانزل ادورها....

سمعت خطواته وهويصعد بعصبية لفوك لغرفتنا

ركضت وكفت ورة الباب حتى من يدخل مايشوفني 😂.

دخل للغرفة بعصبية بس دخل سديت الباب وقفلته التفت وراه.. وشافني.. جان معصب وعيونه تجدح

من شافني تغيرت ملامحه ١٨٠درجة وابتسم وركضتله لحظنه وهو هم تقرب وحظنا بعض شبكني شبكة تنهدت منها جان راح يكسرظلوعي بيها...

ونزل بوس وشم بيه و

كتله... حمدلله على سلامتك حبيبي..

يسو... الله يسلمج بطتي... وخرني من حظنه ولزم وجهي بين ايديه..

وكال... ها خوش تنصبن علية مو؟؟؟ سمر تكول رايحة صالون وحدج 😠

اني... هههههه هههههه من كيفها تحجي مااتفقت وياها بس خوش عبرت عليك...

يسو... اي عبرت وكلت اذاصدك ياهيام غير اكسر رجليج تكسر لان طالعة وحدج 😡.

اني... اوي سجن خما سجن غير ردت اتحظر الك ورحنا صدك بس مو وحدى اني وبثينة وسمر للصالون الي براس شارعكم مارحنا بعيد😟.

لزمني وقربني منه وكال... ماريدج يوم اطلعين بدون اذني الا للضرورة وويةامي اوخواتى.. اخاف عليج اذكري كلامي هذا وخليه ترجيةباذنج...

اني وبدلع... تأمر ابوعلي 😉

يسو... هههههه هههههه حلوة مال ابوعلي فدوة لكلبج مايامر عليج ظالم.. ام علي فدوة ل...

الي اموت عليه... شلونج زينة هسة😉.؟

اني وضربت ع خفيف على صدري... عززززة حمدلله زينة 🙈😂.

يسو...يمةصدقةلليستحون😉😘.

وردت اغير الموضوع دفعته كتله... يلة للحمام يلة اسبح وبعدين نحجي...

لزمنى من زندى وكال... وين تعاي ي سبحي وياي كتله هسة سبحت روح ادخل وانطيني هدومك حتى اذبهن بغساله....

ونتغدى وبعدين ع راحتنا نجي...شفته برطم 😂

كمت اراضيه واكوله فدوةحبيبي يلة روح ادخل اسبح الليل طويل واعوضك

امشي وادفع بيه وفعلا دخل واخذت هدومه ونزلت حطيتهن بغسالة

ووصيت سمر اديربالها كالت روحي اني اشطفهن وانشرهن جان الجو صح شتا ونهايات شهر العاشر بس شمس...

جنت بالمطبخ احظر للغدة واطرك لبن ع السنك واكفة

حتى نتغدى وبالمطراكة ام الايد تتذكرونها من ستيل جوة بيها اثنين خباطات ومن فوك نحركها بيدة ملتفة بالخباطات ونظل نلف اليدة ونديرها وهي تخبط اللبن بالطاسة

واخبط وجسمي وياها يهتز هاي جنت هيجي اني ماعرف غيري شلون جانن يخبطن اللبن 😂😂😂...

حسيت بيه صاروراية كلش تقرب همس وكال...هسة عرفنا تخبطين لبن جسمج ليش يهتز جنه جلي وياه لو الا تتحارشين بية حتى اكلج اكل وجان يضربني على.... من ورة 😂😂.

ضربةوجعتنى من... 😂... التفتت عليه وكتله بمياعة... اوي وجعتنى ليش هيج يلة روح اكعديمهم راح نصب..

يسو وهو يحجي بهدوء... ها وجعتج لعد ... اشو مايوجعج 😉.

اني وادفع بيه برة المطبخ وانادي ع البنات... موبيدك وكح وطالعة عينك امشي لاتفضحنا لايجى احد يسمعنا ههههه...

يسو... اتحظري ورة الغدة... الا.. راد يكمل حطيت ايدي على حلكه واني اضحك واكوله... روح... روح... 😂.

اجت خالة وهو راح... واجن البنات ودرنا الدولمة بصينية جبيرة لان الجدرجبير ولبن وخضرة وطرشي والتمينا كلنا عليها...

البنات سون الچاي هو غسل ايده وصعد وكال... جيبيلي الچاي فوك..

مستعجل 😂😂.

والبنات سمروبثينة ينصبن علية ويكولن استعجلي ساعاتكم معدودة انتي ورجلج اليوم وباجر بس عدكم... (ماجنت اعرف صدك ساعاتنامعدودة😭).

صعدت لغرفتنا شفته متمدد ومتغطي بالبطانية والصوبة تشتغل...

من شافني كعد لكيته نازع بس باقي بالشورت وصدره العريض المليان شعر رجولي مكشوف ويغريني بيه..

اتقدمت انطيته الجاي اخذها من ايدي وكام يخوط بالاستكانة ويشرب..

عفته رحت طلعت ثوب النوم الاحمر الي يحبه هو ورحت للحمام حتى ابدل...

طلعت ورحت للميزتواليت وكفت واتعطرت ووكمت امشط شعري..

اجانى هو واقترب ولزمني من ايدي واخذ المشط وكام يمشطلي..

من كمل لفني عليه وشالنى بهدوء ونومني على السرير وصعد عليةوصار فوكاي ونزل خمط شفايفي بشفايفه...

ونزل ايده بعدين على صدري وصار يمشي اصابعه عليها ونزل يشمني ويبوسنى بيها ويعضعض...

يسو.وبهمس.. لج هيام ليش تحلوين يوم عن يوم راح تموتيني...

حسيت على خشونة ايديه ولمساته الجرئية بكل جسمي ووو💏...

وكملنا سحبني لحظنه كتله خلي نسبح

كال... لا.. تعاي نامي وحظني ونمنا...

كعدنا عصر ب٤ وظل يبوس ويشمشم واخذني مرة ثانية وكملنا...

كمنا سبحنا وجففنا ونزلنا... لكينا عمي وخالة رايحين للسوك. وحمودى وياهم.

وبيبي والبنات كاعدات على تلفزيون الشباب يتباعون مسلسل تلفزيوني.

كعدنا وياهم وراح يسو طلع لجماعته بالمنطقة واجي ورة ساعة جايبلنا جبس ونساتل النا كلنا فديته حنين على خواته واهله هم موبس الي.

وراها صار المغرب واجو عمو وخالة من السوك وبدينا نحظر للعشا...

ومن كملنا العشا حظرت شاميةوحب وسمسمية سويت وكعدنا كلنا نسولف وناكل ونضحك.

وراها البنات صعدن حظرن جنطهن لان باجريرجعن لبغداد..

واني حظرت غراض بيبي وخالة جانت ماخذة صوغة لاهلي من السوك وحطتهن وجهزتهن هم

وصعدنا بليل ورة ماناموا الكل كملنا سهرتنا اني ويسو فوك بس سوالف ماسوينا صابون لان جنت نعسانة وهوحبيبي خاف علية لان توني صرت زينة من الاسقاط...

نمنا واحنا حاظنين بعض حظنة واحد مامصدك حبيبه بحظنه ونايم...

👀📝👀📝👀📝👀📝👀📝

الجمعة اجي باهر ويةمثنى سلموا وكعدوا جان مثنى يباوعلي من جوة جوة..

واني مااهتميتله اصلا ماظليت بمكان بيه هو ورحت للمطبخ..

وبيبي جانت تأشرلي اروح هي هم حست بنظراته..

تالي طلب من يسو يوديهم لمنطقةالي بيها عزيمة عرس صديقه وفعلا راح يسو واخذهم وراه بساعة ونص رجعوا..

واحنا جنا ننتظرهم بعدنا ع الغدة واجوا همة جانوا ماكلين نص بنص بالعرس وصبينا احنا الهم والنا الاكل كعدوا الزلم وحد واحنا النسوان وحد...

بعد الغدة من كملوا شرب الچاي اتحظروا للرجعةلبغداد...

وفعلا ودعناهم وبوست بيبي هواية ووصيتها تهتم بنفسها وبصحتها.. وهي هم وصتنى اديربالي ع رجلي وبيتي...

ورةماراحوا ب٢ونص.. صعدنا لغرفتنا.. وجان ينقض علية يسو انقضاض الاسد على لبؤته 😂ووووو 💏..

ونمنا كعدت العصر سبحت وكمت اعدل واصفط هدومه واحظر جنطته لباجر...

وهو كعد على صوت حركتي بالغرفة وكام سبح وبدل وكال اروح للسوك محتاج جم حاجة تجين وياي..

اتسعت عيوني من الفرح كتله.. ااااي

يسو... يلة بدلي بساع وبدون مكياج فهمتي ماريدشي على وجهج..

اني... صار حبي ثوانى بس ابدل... وبدلت بساع ونزلنا وخبر عمو وخالة.. وكاللهم نتعشي برة

(جنا گبل نستأذن من الاكبار قبل لانطلع هسة لا الابن يحتشم اهله ويحترمهم ولا الچنة يطلعون بدون مايكولون حشى الزينين).

طلعنا بسيارتناووصلنا لشارع الجمهورية واخذله حاجات محتاجهن للكلية وراها دخلنا محل كماليات اخذلي سيت نوم حلو اسود كال خلي نشوفه شلونه عليج...

وراها رحنا تعشينا بمطعم لحم عجين كملنا ورحنا للبيت وصلنا ب٧للبيت..

جانوا متعشين اهله.. صعدنا لغرفتنا رتبت الغراض بالجنطةاني ووياه..

من كملنا كال انطيني صورة من صور ج

اريد احطها بجزدانى بجيبي..

وفعلا طلعنا من الالمبوم واخذ كال اشتاكلج بليالي هواية على الاقل احسج يمي من اشوفها

كمت ابوسه بشفايفه جان يحجي وعيونه علية ونظراته الي تكتل كزكزت عليه ههههه.

كتله... تدري شوكعني بيك وحبيتك..

يسو... شنو 😇😉

اني... نظرة عيونك هاي 👇👇

ادمرني من اشوفهن حبيبي بيهن فد معنى تمثل بيها الي كل معاني الحب الي اضمه الي..

يسو.... ههههه فدوة وتدرين انتي شوكعني بيج ضحكتج الخجولة هاي 👇👇

من ادنكين راسج وتخجلين وضحكين اخ لوتدرين شلون جنتي تاخذين روحي بيها ياااابه جنت اظل اشتعل نار واريد بس اكلج اكل ههههه وكرصني من خشمي..

حطيت راسي على صدره... وتنهدهو ضحكت كتله شبيك كال.. يهمج تعرفين بطتي

اني... طبعا يهمني حبيبي انت روحي من الدنيا احجيلي..

رجع تنهد وكال... افكر ابطل من الكلية 😔

كمت عنه وكعدت اباوع بعيونه ومستغربة كلامه وكتله... ليش؟؟؟

يسو... مدى اكدر على فراكج وباجر عكبة اتخرج والله العالم وين يشمروني وتعال يا ياسين كضي عمرك بالاجايز وشلعان الكلب

جاي رايح وحتى الله اعلم يجوز ماراح اكدر اكون وياج بولادات جهالنا ولاتربيتهم وانوب شوكي يصير شوكين الج ولجهالنا

وحتى اهلي كاعد يكبرون و اخوية محمد ساكن بغداد وين ماوين يجينا محتكريه اهل مرته ابويةوامي منو الهم اخواني زمن وحمودى يريدون واحد يتابعهم 😔..

وهاي يومية امريكا تهدد بينا وتصير حرب الله اعلم اذا نطلع منه صاغ سليم ولو احنا كلنا فداء للوطن وماخايف من الموت بس خايف عليكم من بعدي 😔.

رجعت حظنته ودموعي تتساقط على كلامه صح كلامه 😭 وكتله حبيبي فدوة اروحلك اسمالله عليك يومي قبل يومك لحظة مااعيش بدونك ياسين فديتك كل هاى شايلها بكلبك.

يسو اتنهد وكال.... واكثر اكثر حبيبي وشبكني لحظنه واحنا متمددين وكمل كلامه وكال...

مدى اكدر على فراكج الاسبوع الفات حيل بالي يمج وافكربيج شلون صارت واخذت علاجها اولا ..نامت اولا ..اكلت شربت.. كل تفكيري جان يمج... حتى ماهر بيوم بليل حس بية

وكال... شبيك يول... تتنهد؟

كتله... بالي يم هيام افكر اشلون صارت هسة.

كال ماهر... اختي سباعية هسة صارت زينة لاتخلي بالك يمها وباجر خابرها واطمئن عليها.

المخابرة حسرة علينا كوة نخابر اهلنا بالبوك تدرين مرات اتمنى لو اكو لاسلكي طوووويل يمتد من الكلية لبيتنا

حتى يومية اتواصل بيه وياج واسمع صوتج واطمئن عليج وعلى اهلي او ياريت يخترعون النا فداختراع تليفون اوفدشي جهاز

بحيث وين ماتكون يكون بجيبك

تخابر منه اهلك اوووف ماكو هيج عالم يخترع هيج اختراع ويخلصنا.

كمت اضحك على كلامه وامانيه 😂😂

وهو يكول ضحكي 😅😅

اني... شمدريك يجوزبالمستقبل يخترعون هيج اختراع 😂😂

يسو... فديت الضحكة اشو دتعاي تعاي واخذني...

اخذني جوة جناحاته الي تخليني انسى اسمي.. وكام يبوس كتله لحظة اوكف خلي البس السيت الاسود...

يسو... يلة بسرعة... رحت طلعته كتله غمض عيونك خلي البسه..

يسو...لج ليش هومنو اكو ويانا وتستحين منه هو بس اني ووياج واني كل قلاقيلج بيدي ملعبهن 😉😂.

اني...حتى لو اريدك تتفأجئ بيه من البسه الك. يلة حباب غمض...

يسو...وهاي غمضت امري لله.

ولبسته وشفته يجنن علية مطلع كل تفاصيل جسمي ومكشوف من الصدر والظهر وبيه فتحتين من الجوانب رغم هو طوله للركب...

ومطلع خصري بشكل ورافع صدري كلش حيل عجبني... وحطيت حمرة حمرة وكحل وشوية خدود بشرتى حلوة جانت ماتحتاج اساس...كتله يلة افتح...

يسو فتح عيونه... واتسعت عيونه من الفرحة... وكال... اللهم صلى على محمد وال محمد انتي ناوية تجلطيني...

اني... اسمالله حبيبي ههههه ليش

يسو... شنو هلجمال هذا كله الي

اني... فديتك لعدالمن انت الروح والرية شعندي غيرك

يسو اقترب وسحبني لحظنه وشالنى وحطني على السرير وتمدد بصفي واتجى على عكسه وظل يباوعلي وصافن..

ضحكت 🙈 كتله شكو صافن ترى كاعدتخجلني.

يسو... تدرين اريد اشبع شوف منج ..

مديت اصبعي على صدره وكمت امررها عليه وكتله.... اني الك العمركله اشبع بيه..

ورجع اخذني لحظنه وصرت اعبرله عن حبي واشتياقي اله بافعال وهو هم جان مجنون بحبي وبادلنا بعض الافعال..

صرنا واحديكمل الثاني احبه واحب كلشي بيه..

كام يمشي شفايفه وشواربه على جسمي كله ماخلى مكان يعتب عليه...

وغركنا باحلى ليلة بينا وآخر ليلة طلعنا بيها كل مشاعرنا ولهفتنا واشواقنا وشغفنا لبعضنا

وبليلتها مانمنا ظلينا مرة ومرتين وثلاث... عبالك جنا نعوض سنين حرماننا القادمة 😭.

غفينا للدقايق ودك المنبه وكعدنا طبينا سبحنا مثل ماراد وبالحمام هم رومنسيته جانت ماتخليني اسبح وضحكنا واصل لسابع جار...

وطلعنا بدلنا ولبسنا..

لبس هو بدلته العسكرية.. ووكفت اعدله رباطه..

كتله... حبيبي صدك تفكر تبطل من الكلية...

يسو... اي وعيونج الاسبوع الجاي ان شاءلله اكلم اهلي واشوف.

اني... ان شاءالله حبيبي..

يسو... ان شاءالله حبيبي صدك يلة حظريلي ريوك سريع حتى اتؤكل واطلع...

اني... من عيوني ياعيوني انت 😘😘.

ونزلنا هو راح حط الجنطة بالسيارة واجي للمطبخ جنت اتحرك سريع واسويله ريوك سريع وحظرتله لفات للطريق.

يسو... امي وابوي ماكعدوا حتى اودعهم...

كتله... عوفهم نايمين خطية بعدوكت لاذان الفجر.

حطيت الريوك كدامه ع ميز وكعدياكل ويؤكلني وياه واني اؤكله من احط اللگمة بحلكه يمص اصابعي وية اللگمة 😭.

كمل وراح غسل... وعدل هدومه.. كال... خوما نسيت شي.

اني.. لا جنطتك بالسيارة وعلاليك الاكل هم..

يسو... هااا اي... ها لااا نسيت السويج فوك بالغرفة.. وصعد راح فوك..

اتعطل بالغرفة كلت اخاف مالكاها صعدت وراه...

لكيته واكف يباوع للغرفة كأنما كاعد يودع غرفتنا.. 😭😭😭😭

اني. بهدوء كتله.. يسو حبيبي

يسو التفتلي... كال... ها حبيبتي.

اني... يلة حبيبي لكيته..

يسو... ها... شنو هو..؟

اني... السويج..

يسو... هااا اي لكيته يلة... وتقرب مني وحظني واخذ شفايفي بشفايفه بقبلة دافئة وحارة بحرارة حبه وشوگه الي... وبعد هم باسنى من گصتي

وكال... يلة حبيبي ديري بالج على نفسج... ومع السلامة..

اني.. والعبرة خنكتنى ولزمت نفسي كوة.. كتله.. مودع بالله ورسوله وال البيت وجميع الاولياء والصالحين محروس نظر عيني... الله وياك وديربالك لخاطري احببببك موووت.

يسو... اتنفسج واعشكج...

ونزلنا الدرج ورحنا للمطبخ لبس حذائه (يكرم القارئ) وطلع شغل السيارة حتى تحمى ترست طاسة مي وحظرت..

يسو... يلة حبيبة مع السلامة

اني... الله وياك لا اله الا الله...

يسو... محمد رسول الله...

وطلع راح يم باب السيارة راد يصعد.. وانى طالعةوياه الكراج.

رجع سحبني للمطبخ وحصرني ورة الباب وكام يبوسنى بشغف.. وفجأة عافني وراح... صعد للسيارة

رحت فتحتله الباب طلع وفتح الشباك مال السيارة وكال بصوته الحلو الي كله رجولة... اااااحبج هيام للموت.

وانى والعبرة خانكتنى... اعشكك للموت...

طوط وطلع راح وذبيت طاسة مي وراه بس گلبي نغزني عليه.

دخلت للبيت ورة ماقفلت البيبان... لكيت خالة كاعدة توها تطلع من غرفتها شافتني..

وكالت... صباح الخير... شنوطلع ياسين.

اني... صباح النور.. اي يوم راح هسة.

خالة... بالسلامة يروح ويرجع محروس بالله ورسوله وال بيته...

اني... خالة اترخص انام تعبانة... ونعسانة..

خالة... ههههه روحي يوم نامي اكيد سهرج ياسين للصبح مو هههه

اني... ههههه اي.

وصعدت لفوك ودخلت غرفتى واتمددت واني اشتم عطره بالفراش وغفيت على ريحته 😢.

👀📝👀📝👀📝👀📝👀📝👀📝

ثاني يوم كعدت واني گلبي مقبوض واحس بگأبة وبس ابجي هيج بدون سبب ومدى ابين لاحد بس من ادخل لغرفتى ومشتعلة نار انتظراتصاله على نار...

ماخابرني بيومها... وثانى يوم هم نفس حالتى مااعرف شبية وهم ماخابرني...

وثالث يوم هم ماخابر... الثلاثاء خابر عصرية جنت كاعده بالغرفة ابجي مثل الايام الي فاتت اجت زمن وصاحتنى كالت ركضي الحكي يسو ع خط...

نزلت ركض سويت الدرج بايتين... وصلت وشلت السماعة وكلت... الووووو..

يسو... الووو ضوةالعين وجمارةگلبي... شلونج ياعمري..

بس كال شلونج... خنكتنى العبرة وخارت كل قوتى وبجيت.. كتله زينة حمدلله 😭.

يسو... لج شبيج ليش تبجين...

اني... ماكو شي حبيبي بس مشتاگتلك وبالي يمك.

يسو... كولي ياالله خو ماكو شي...

اني... والنعم بالله والله ماكوشي بس مشتاگتلك ياعمري.

يسو... فدوة اروح لمريتى الحلوة

اني... اسمالله حبيبي انت اني اروحلك فدوة شلونك زين.. تاكل تشرب.. صحتك شلونها..

يسو... ههههه ههههه لج على كيفج حمدلله زين بومب حديد ههههه عوزني شوفتج ميت شوگ.

اني... اني اكثرحبيبي...

يسو... امي شلونها وابوي...

اني... حمدلله خالة راحت لبيت ام فؤاد جيرانكم مريضةالمرةوراحت تسأل عليها.

وعمو بالسوك بالمحل تدري...

يسو... يلة حبي سلميلي عليهم... احبببج

اني... الله يسلمك... الله وياك... اموت عليك.

وخلصت مكالمتنا هلكد جان مجاله...

👀📝👀📝👀📝

وثاني يوم الاربعاء هم خابر العصر... جنت بالمطبخ وعبالك كلبي يكولي راح يتصل...

سمعت دكة التليفون... ركضت وشلت السماعة سمعت صوته... وهو يكول الووو

يابة بودى بلحظتها ابوس السماعة بوس...

اني... الووو حبيبي..

يسو... يمة من فدوة لهل صوت الي بهذل احوالي صوت لوكروان ويغرد..

كمت اضحك وكتله بهدوء... احبك😘.

يسو... اتنفسج 😘.

يسو... هيام مشتاقلج وراح اموت من الاشتياق مااوصيج حظري نفسج اجي الكاج جاهزة لان يمكن اكلج اكل لو اشوفج كدامي من اجي...

اني... صارتدلل بس تعال انت حتى اني ميتة شوگ الك راح اعوف المستحى بعد واطلع شوك الايام الفاتت كلها بيك ياحلو ههههه.

يسو... نشوف منو يفوز🏆 ههههه حظري صوابين هواية نحتاج هلمرة😂

اني.... اي راح احظر😂.

يسو... اكلج باجر جاي ووياي يجي ماهر يريد يشوفج من يوم اسقاطج يكول اجي وياك واليوم قرر باجر يجي وياي هاج حاجيه...

اني... انطيني اياه...

ماهر... هلةوالله بفصعونة بيتنا شلونج هيو... شلون صرتى خيتي.

اني... فدوة اروحلك حمدلله زينة حبيبي انت شلونك وشلونها ابتهال.

ماهر... حمدلله وابتهال زينة بس لو امها تبطل زن عليها تريدنا نستعجل بالزواج واني ماريدهسة خلى بعد التخرج بنفس الشهربالصيف اكرهه الشتا وماريداعوفها يومية جاي رايح خلي اشوف وين استقربدوامي والله كريم...

اني... الله كريم يااخوي سلملي عليها.

ماهر.. يوصل... يلةهاج رجلج قبل لانروح..

يسو... ها حبيبي... يلة خلي اسد باجر نتشاوف ونجيج طبخيلنا اكلات دسمة اخوج جاي وياي... يلة مع السلامة

اني... من عيوني حبيبي فديتك. الله وياك مع السلامة.

هاي آخر مكالمة وآخر مرة سمعت بيه صوته وصوت اخوية 😭😭.

بليلتها حلمت حلم لا كابوس كولوا...

شفت نفسي بمكان طريق مثل شارع مبلط طويله ماله لابدايةولانهاية..

شفت سيارة يسو.. واكفة بوسط الشارع... اقتربت منه... واشوف بيه اثنين كاعدين... من بعيد... اقتربت شفت يسو وماهر لابسين قمصان بيض ويسولفون ويضحكون.. اقتربت منهم دكيت ع جامة السيارة اريداحاجيهم ومايحاجونى ولايلتفتون الي بس بينهم وبسوالفهم منشغلين...

كمت ادك اقوى ع الجامة.... تالي انتبهوا علية... وكالوا رووووحي... هسة مو وكتج... وهمة يضحكون... شفت من وراهم اجي خظار شجر مادري ثيل وسيل مي مثل نهر جاري وجرفهم... واني ظليت اناديهم ووكعت بالمي وبهل لحظة فزيت... كعدت واني انادي عليهم.

الصبح الخميس بتاريخ ١٩٩٦/١٠/١٧

اسوء تاريخ بحياتى... كعدت حظرت الاكل وية خالة وطبخت طبخات وياها لجية يسو وماهر..

والفرحة ماسايعتنى لكن گلبي بعده ينغزني..

صارت ب١٢ونص ماكو اثر الهم... وعدت ساعة ٢وهم ماكو اني اهنا مابقي بية قطرة دم..

وعمو جاي بالبيت وينتظرهم تالي.. دك التليفون اني كمت ارجف ومن الصبح اقرء أية الكرسي وانادي واناجى ربي يستر علينا...

حتى بطني كامت تخبط ورحت ورة عمي نشوف منو دا يخابر...

شال عمي السماعة... وكال.. الوووو...

واني وخالة وزمن نتصنت..

عمي كال.. اي.. ابني باهر شكو... منو

من كال اسم اخوية راح بالي گلت اكيدبيبي صاير بيها شي...

عمو.. كال... اي بيا مستشفي ببغداد... هاا... اي جايكم.. جايكم... وسد الخط..

ووكع على الكرسي وكعد..

خالتى كالت وهي ترجف... خير ابو محمد باهر شبيه... شكلك...؟؟!!!

عمو... امشو اتحظروا نروح لبغداد ياسين وماهر مسوين حادث بطريق الخالص ..

داعمهم تريلة همة وثلاث سيارة غيرهم السايق نعسان ومايدري بنفسه وطالع من الطريق وجاي عليهم. وناقليهم وماخذيهم لبغداد للمستشفى...

مناك لاكين رقم بيت ابو باهربجيب سترة ماهر ومتصلين باهله..

اني وكعت من طولي رجليةماتشيلني بعد وخالة كامت تلطم وزمن تبجي هي وحمودي

عمو عيط بينا وكال بعلو صوته يلة استعجلن نطلع لبغداد

وراح خابر عم ياسين ودبر سيارة منهم ..

وطلعنا كلنا لبغداد...

وصلنا لبيت اهلى لكيت بيبي تلوب وتلطم وتبجي ومجو وبثينةوسمر...

استقبلونا بعياط وبجي....

واني ميتة اريداروح اشوفهم... تالي... بس ذبينا جنطنا ودقايق طلعنا للمستشفى...

تلكونا محمد اخو يسو وباهروساهر ومثنى وبيت عمي هم جانوا بالمستشفى

ودخلنا ورحنا لكيناهم بحالة حرجة وبالعمليات اثنينهم صارلهم ساعات بالعمليات...

ظليت ادك والطم وماما تصبر بية وبنفسها وخالة تلوب...

تالي طلعوا ماهرمن العمليات واخذوه لغرفةخاصة

وامي تركض مثل المخبلة وراه وهمة يدفعون بيه.

متت من شفته ابو طول الحلو هو ويسو اثنينهم الله خالقهم من طينة خاصة معجونة بالطيب والمحنة 😭😭.

ماكدرت اروح وراه رجلية ماتساعدني.

ورة ماهر بساعة... طلعوا ياسين شفت حبيبي حاطيله اوكسجين ووجهه معكوج ابو الوجه الحلو ماباقي بيه ملامح كلهه مخربطة..

كله شاش ملفلف.. كوة كمت امشي وراهم وهمةيدفعون بيه لغرفة يم ماهر...

طلعت غرف الانعاش...

منعونا من الدخول وامي وخالة كعدن تكابلن يلطمن ويدكن...

وبابا واخوتى ومثنى واعمامي يشيلون بيهن ماكو مايقبلن...

اني لاتسألوني شحالي بس الي مرت بموقفي تعرف شحالي... اخوية وزوجي اثنينهم.

كمت اصيح يالله... يالله امتحانك صعب صعب

اجانى بابا حظني وكمت الطم وابجي وبابا يهدي بية...

اجوا للمغرب طلعونا كلنا كالوا بس مرافقين يبقون اثنين... باهروساهر ومحمدكالوا احنا نبقي...

وكوة رجعت سحبوني سحب اهلي... وامي وخالة هم..

دخلنا للبيت من الصبح لاماكلين ولاشاربين كاموا يلحون علينا ناكل ونشرب...

ماقبلت امي وخالة كوة شربوهن ووكلوهن

ماما عدها ضغط موزين عليها... وخالة هم نفس الشي.

ولانمنا وكل ساع نخابر...

مجو وام وليديواسون بية وبامي... بيبي اجتنى لزمتنى وحظنتنى... شلت راسي ودموعي شلال...

كتلها... وج بيبي اموت اموت من بعدهم شلون بية...

حظنتنى بيبي وهي تبجي كالت كومي كومي يمة توضئ وصلي الفجر وادعيلهم..

كمت رحت تؤضيت وكعدت اصلي وادعي خلصت صلاةكعدت اقرءقران...

صار الصبح... ماما كالت ودونا يلة... بابا وعمو ابوياسين كاموا خطيةوطلعنا ورحنا...

وصلنا للممر لكينا الدكاترة تتراكض والممرضات

عرفنا اكو شي وركض كمنا نركض وصلنا لكينا باهروساهر برة مطلعيهم...

والدكاترةجوة.. وسمعنا صوت صفارة الجهاز مال النبضات... عرفت واحدبيهم مات...

وجابوا اجهزةالي تضرب صدمةكهربائية مال الصعقة..

وظلوا لنص ساعةوكلشي مانفتهم احنا... تالي طلع

كال الدكتور منو اهل ماهر بابا واخوتى كالوا خير دكتور كال الدكتور البقية بحياتكم 😔.

وجان ماما تصرخ صرخة باسم ماهر وتوكع😭😭.

ركضوا عليها اخوتى والدكتارة وبهوستنا هاي هم طوط الجهاز وياريته ماطوط كرهت هلجهاز اخذ احبابي مني..

ركض الدكتورعاف ماما ودخل جوة وطلع ورة دقايق وكال... البقية بحياتكم بياسين...

يبوووو يبوووو هلمرة فقدت وطلعت من صدمةاخويةوكعت بصدمة زوجي وحبيبي.

وجان اهجم على الدكاترة واملخهم باظافيري ودفعتهم ودخلت لغرفة الموت وكمت مرة اتؤسل باخوية ومرة برجلي...

لزمت يسو كتله كووووم كووووم ولك كلت مااعوفج لك كوووم ولك الاسبوع الفات انت بحظني ولك كوووم مويومك كوووم 😭😭.

ورحت لماهر ولزمته من رجليه وابوس بيه لك كووووم يااخوية يالحنين ياسندي ولك امي راح تموت كوم الها تعرف انتو روحها من الدنيا لاتكسرها كووووم.

ورجعت ليسو... يسو كوم حبيبي واني ابوس بايديه المكسرة ولك كووووم خالة وعمو منو الهم كووووم...

وكمت ادك والطم واملخ بوجهي واهلس بشعري ولكم كوووموا موانتظركم موكلتوا راح نجي سوة ولكم ليش عفتوني...

وعيطتت عيطة واغمى علية وبعدمااعرف منو شايلني ومنومينى بالمستشفى.. صايرانهيار عصبي بية.

وامي ضربتها جلطة وانشلت... وخالة ماتت بسكتة قلبية مااتحملت...

وصار العزة بثلاثة يعزونا سووا الفاتحة ببغداد واني طول ايام الفاتحة نايمة بالمستشفى..

كان يوم الجمعة ١٩٩٦/١٠/١٨اسود يوم بحياتى ووراها ماشفت يوم حلو لحد اليوم... اتآلم من اذكرها..

لحد الان حيل اخاف من يوم ١٨ورقم١٨...

خلص الجزء الاول من قصة امرأة في الأربعين

ملتقانا بالجزء الثاني...

احبكم بكد القطار🚂🚂🚂🚂

وتصبحون على ماتتمنون 😘😍

#نورا

تعديل المقال

مدونة مكتبة حـــواء

رواية امرأة في الاربعين الفصل الثامن عشر 18 والاخير بقلم نورا الرماحي