رواية مقبرة الاحياء الفصل السابع والعشرين 27 بقلم سارة جعفر
اني أخاف من الأمان الماهو يمك أنه كل خنگاتي چي ما جاي أشمك شلي بعيوني، يبعد عيوني إذا مو بيها أضمك!
-وردة: فز گلبي عليه رغم المسافه گصيره بيناتنا بس حسيتها صارت دهر نفسي صعد ما نزل وأحوالي كلها تدهورت بشوفته، ركضت عليه أرجف صوتي بالگوه يطلع
-حُرّ!
گعدت بالگاع أتراجف وأقرب أيديَّ على وجهه أريد أكضه من الرجفه ماكو، هوَّ بين الفاقد والواعي مغمض عيونه وبالگوه يفتحهن شلت راسه من الگاع خليته بحضني نعصر گلبي من شفته على الگاع چن حيلي كله نهدم وطاح على التراب..
دنگت أباوعله وأمسح على وجهه بأيديَّ
دموعي يگطرن على وجهه المتروس تراب ودم وشعره مخربط
-أفتح عينك فدوه لطولك!
بلع ريگ بصعوبه يريد يفتح عيونه ما يگدر الوجع هاد حيله سوده بوجهي من شفت حاله تبهذل حالي، مخبوصه وأدور وين مصدر الدم لأن كله متروس دم رفعت قميصه من ناحية
بطنه شهگت مغمضه عيوني من بشاعة المنظر، بخاصرته مطعون أكثر من طعنه والدم مثل البوري بخوف!!
حضنت راسه لصدري وصرخت بكل علو صوتي من غمض عيونه وما فتحهن بعد، لحظات بس چنهن عمر حاضنته أرجف وأبچي وأصرخ، صوتي راح من الصريخ خايفه وأتراجف عليه..
راسه بحضني وأصرخ بهستريه متخبله عليه طلعو بيتنا كلهم فرد طلعه زلم ونسوان مخبوصين يردون بس يفتهمون شصاير محد يدري بحال حُرّ غيري وما أدري شني حالهم وتعابيرهم من شافوه متوسد الگاع طوله وهدومه متروسه تراب ودم كل بالي وتركيزي وياه
جروه جسام وضيغم من حضني مخبوصين ومصدومين وأنه ما مستوعبه خطورة الموضوع معقوله جاي أشوف حُرّ وهوَّ يفارگني ويموت گدام عيني أصيح فاقده وهمَّ مخبوصين وهوسه صايره أحس عقلي راح ينفجر..
-كلارة: نلچم گلبي ونهدم حيلي من شفت حرّ أخوي العاش عمره جبل طايح هسه وسابح بدمه أبچي منهاره وفجر حالتها مو أحسن من حالتي ميتين من الخوف عليه الدنيا طفت بعيونه
كلهم مخبوصين وصايره هوسه بچي وردة وصوتها أختفى يمكن من گد ما صرخت راح صوتها، الولد رفعو حُرّ من حضن وردة ورادو يطلعونه وقادر يحچي وياه
-هسه حرّ هسه نوصل للمستشفى..
بالگوه طلعت الحچايه من حلگ حر ميت من ألألم مانعهم ياخذونه للمستشفى، صفن عليه جسام والولد ما رضو ضلو كل واحد يحچي شكل بس خصمها جسام وهوَّ ينتر
-مسودنين صاحين أنتم جاي يگلكم لا تاخذوني للمهجوم يمكن تنفتح قضيه، يمكن تصيرله سالفه تردون تورطونه أنتم سوو مثل ما يريد ما ناخذه.
فقار: چا يموت ما تشوفه راح يخلص دمه شني نضل نباوعله؟
جسام: رجعوه لجوه، فجر أفرشي فراش بالهول وضيغم روح جيب الممرض عمار.
صمد: چا غير تاخذونه يا عمي ما يصير هيچ!
جسام: جاي أگلك يتورط وتفتحون عليه سالفه الها أول ما الها تالي
صمد: لا لا أخذوه أخذوه..
جسام: أي مو أنتَ تكيف تورطه.
ما قبل جسام ولا تناقش وياهم حتى طببوه لجوه وضيغم بسرعه راح لجيرانه عمار، وفجر راحت فرشت بالهول فراش لـ حرّ وهمَّ حطوه أول ما صار على الفراش أنتلف دم وأنه أباوعله من بعيد ودموعي ما وگفن أشهگ ميته من القهر..
أم ضيغم راحت لـ وردة تريد تگومها من الگاع بس فاقده فاتحه عيونها بدون ما ترمش ترجف رجفتها تخوف وتصفن، غسلت وجها أم ضيغم وتقرأ عليها قرآن لأن حالتها صارت تخوف تريد تلزمها المره ماكو گالت
-ولچ يمه على كيفچ ويَـ روحچ راح تطگچ جلطه!
ضربتين على الراس توجع منا حُرّ حالته خطره وتخوف وما ندري مصيره، ومحبوبته طاحت وياه أم ضيغم وزهراء بالگوه گومنها من الحوش وجابنها لجوه كلنا گاعدين هنا نسوان وبنات لأن طببو الممرض للهول و وردة بعدها على نفس حالتها..
حضنتها أم ضيغم وما عافتها أبد تغسل بوجها وتقرأ على راسها بس بعدها على نفس الرجفه القويه بحيث أم ضيغم حاطه أيديها على وردة يهتزن من قوة رجفة وردة وأنه گضيتها بس بچي
بينما فجر تكابر علمودنا تحاول تطمنه
-كافيچن ما بي شي سبع حرّ يگوم منها..
كزبر جلدي من سمعت الممرض راح يخيط جروح حرّ بدون تخدير روحي نسحنت هم قهر وهم خوف، خفت هواي على نفسية وردة لأن هِيَّ الشافته وهِيَّ الفزعت گاعده وصافنه متلفه بدمه..
مسحت وجهي أبچي ومقهوره خاف ما يطلع منها سالم تخوف حالته والنوب بالبيت يعالجونه حطب أزيد على النار بتفكيري وكل شويه جاي واحد علمود ننصي صوتنا بس أنه ما هامني واحد هسه غير أخوي
أسمع صوت ضيغم يباوعلي عاگد حاجبه
-كافي بسچ، شالقضيه ماكو شي صلن على محمد هاي هِيَّ الممرض جاي يخيط بجرحه الحمدلله حرّ سبع يطلع منها.
أشرتله على جهة الهول ميته من القهر
-ما شفته شلون متروس بدمه، وخاصرته هيچ منها الدم وفوگاها تردون تعالجونه بالبيت!
-أحسله يمعوده لا ينفتح عليه باب ما ينسد.
-وشمسوي هوَّ شمسوي علمود هم يسجنونه؟
-چا ياهو طاعنه أكيد عركه وسالفه وخاف تنفتح عليه قضيه وتصيرله دوخة راس..
زفرت نفس بقهر أمسح بدموعي وهوَّ التفت على الموجودات
-صوتچن يمعودات!
7
حچاها وطلع سد الباب وراه گعدت كلش بصف الباب بحيث من يسولفون بالهول أسمع أصواتهم عاد أريد أريح روحي بلكت أسمع شي يطمن گلبي عليه بس ياريت ما سامعه
الممرض يگلهم
-أخذوه للمستشفى يمعودين دمه خلص وحالته ما تبشر بخير!
بس همَّ ما رضو خصوصًا جسام ومتأكده هوَّ يريد لحرّ الزين بس متت من القهر من ما خذوه ياريت ياخذونه يمكن ما تصير عليه خطوره تنهدت بقهر والحمدلله خيط الممرض جروح حرّ، طلعنا للهول وهوَّ بعده فاقد..
خليناه بنومته وما گعدناه رغم الفراش متروس دم وهوَّ باقي بس بالبجامه ومضمد جروحه وفاصل عن العالم الحمدلله عدت سلامات بس هدت حيلنا وبعدنا بخوفنا ياهمَّ السوو بي هيچ وشلون صارت السالفه وهاي التفاصيل المهمه والتخوف!
هدئ الوضع ومر الوكت وبيتنا شويه صار أهدئ بس بعده حالنا متدهور وحرّ بعده ما گاعد وردة صارت أحسن رجفتها بس بعدها بصدمتها ومن شافته مضمدين جروحه شويه أستقرت حالتها وكلنا زلم ونسوان گاعدين بالهول وهوَّ نايم على الفراش بس بالبجامه وبطنه مضمده..
نام على العلاجات من الفجر للعصر، هوَّ ما فاك عينه ولا گاعد وأحنى حاولنا نلهي روحنا بالشغل صحيح خفنا هواي أنه وفجر بس متعودين على وضعه دائمًا هوَّ يتعارك وحياته كلها
طلايب ومشاكل نعرف أخونه يگوم منها بس وردة حيل متأذيه بعد ما شافته بين أيديها أجه يموت وطول الوكت بالها مشتت ومقهوره
أباوع لـ جدتي خاتون تمسح بچف أيدها المتروس تجاعيد على وجه حرّ بوجه متروس حزن ما فارگته طول الوكت گاعده يم راسه تقرأ عليه قرآن وتدعيله يگوم بسلامه..
متمدد على فراشه وما يدري بالدنيا فاصل، وجهه صاير أصفر وشاحب وبطنه مضمده ومتروسه دم يابس عليها لا يگدر يسبح ولا يگدر يتحرك ومعلگين المغذي فوگ راسه والكانوله بأيده وعلاگة العلاج مالته بصف راسه
طب جسام يباوع لـ فجر
-ما تگعدين حرّ.
عگد حاجبها وعافت الشغل البيدها
-ليش؟
-أصدقائه بالديوانيه كلهم أجوله، گعديه خل يطلعلهم.
-بس هوَّ من الفجر لهسه نايم على المسكنات!
-چا شلون يرجعون بلايه ما يشوفونه؟
-هسه أشوفه..
راحت فجر على حرّ تدغ بچتفه بهدوء وتحاچيه تريده يگعد، بالگوه فك عينه طاحت وذره من لسانها وهوَّ ما گاعد أول ما گعد باوع عليها وبصعوبه نطق
-ها!
-أصدقائك كلهم جايين علمودك تگوم تشوفهم؟
-مخيط خياط من ألألم..
-نگلهم نايم على العلاجات لو شتگول؟
-لا، هسه أطلعلهم.
جسام واگف بصف باب الهول يباوعله
-أطببهم لهنا يمك خاف ما بيك حيل؟
هز راسه حرّ لا، وتقرب عليه جسام ساعده لأن يشوفه ما يگدر يگوم بصعوبه يتحرك وفجر راحت تصب الچاي التفت عليَّ جسام وهوَّ ساند حرّ
-جيبي لأخوچ هدوم.
بسرعه صعدت لغرفة حرّ جبتله هدوم ونزلت لگيت جسام رايح للمطبخ علمود ياخذ الچاي من فجر، و وردة يم حرّ بأيدها طاسه متروسه ماي وخاولي عيونها منفوخات
وجفونها صايرات حمر من البچي، تنهدت بتعب وبالخاولي المبللته ماي تمسح الدم اليابس من بطنه بهدوء وأيدها ترجف رجيف حيل يقهر..
بهت وجهه مركز عيونه عليها بلع ريگه مستصعب حالتها
-شمالچ وردة؟
دايره وجها للجهه الثانيه ودموعها ينزلن حاولت تكتم وجعها داخل گلبها بس ما گدرت، دنگ عليها باسها براسها يباوعلها ويسولف
-لا تبچي ما بيه شي هل واگف على حيلي!
ما يطلع من حلگها الحرف بسبب الغصه
تنهد مقهور وهِيَّ كملت مسح وتسمع لكلامه يگلها
-ما بيه شي كبد جروح بسيطه.
بسرعه گلتله أنه بدون تردد
-يا سهله، ترى هِيَّ شافتك طايح بالحوش سابح بدمك وهِيَّ الفزعت الوادم عليك ولمت بيتنا كله بصياحها..
فك عينه مصدوم وعبس ملامحه بضوجه
-لاا!
بسرعه باوع عليها وأنه مركزه وياهم
مسح الدموع من وجها يسولف وياها بهدوء
-متعيني..
مقهور على حالتها من وراه، هِيَّ من شافت أظفره طبت بي خشبه ماتت من القهر وكل ما تشوفه تسأله وتوصيه مو النوب تشوفه بهاي الحاله
حاولت الطف جو الهم علمود يتغير مزاجهم من الحزن
-خويه هسه أنتَ مديون الها بعمرك، هِيَّ نقذت حياتك لو ما هِيَّ چا أنتَ ميت هسه..
ضحك يمسح بدموعها
-أيباااه شيفكنا بعد من عارات وردة!
أبتسمت وهِيَّ أشگد تحاول تجبر روحها تضحك أو تشوفنا روحها الوضع طبيعي عدها بس العيون ما تچذب ظاهره حزنها كله بعيونها طلعت وعفتهم يسولف وياها، طلع جسام
من المطبخ بأيده صينية الچاي وفجر لازمه صينيه ثاني قدمها ألهم ورجع مره ثانيه أخذها منها وطب للديوانيه وأنه ضليت واگفه بصف باب الهول
أسمع ترحيبهم الحار أول ما طب حرّ وسلامهم عليه وكلامهم الحلو اله، فرحت شلون عنده أصدقاء يفدونه بروحهم أسمعهم أشگد لحو عليه علمود يعرفون يا أنذال طعنوه وغدروه وأخذتني الصفنه بدون ما أسمع أي صوت يمي هيچ صفنه طويله..
فززني من صفنتي صوت زمخه بعصبيه
-هيو المستهتره.
رفعت عيني صافنه على ضيغم
هستوه طالع من باب الديوانيه بأيده صينية الچاي، خزرني محتقن
-شعدچ واگفه هنا متانيه أبو عيون الزيتونات؟
-شلون بله الواحد النوب يحدد مكان وگفته؟
-أي چا هاي وگفه گدام الباب!
4
-وشبيها عيني؟
-بيها سم بگلبچ فوتي جوه يردون يطلعون
-وياهم أبو عيون الخضر؟
خزرني ضايج وحط بأيدي صينية الچاي ونتر
-أخذيها وطبي لجوه لا أكسرها براسچ.
13
ما رديت مشيت مسافه والتفتت عليه أضحك وهوَّ حيل ضايج ولا ناسي، سد الباب وصدگ أسمع هوسه بالحوش شويه وصار هدوء يعني راحو وطبو ولدنا كلهم يسولفون بيناتهم وحرّ راد يصعد لغرفته بعد وفجر لمت الفراش من
الهول بس خاتون ما رضت رادته يگعد يمها شويه گعد وهِيَّ وفجر دخلن وياه تحقيق..
2
فجر: سولفلنا ياهو سوى بيك هيچ؟
2
خاتون: هسه ما عرفنا عدو صديچ؟
فجر: عدوينك هواي ياهو منهم؟
3
حُرّ: ما تعرفونهم..
1
خاتون: يممممه يعني مو واحد!!
2
حُرّ: هوَّ واحد أعرفه نذل وطايح حظه غدرني الخيسس ولام عليَّ عشيرته كلها عبنه مو زلمه وما يعرف يتعارك وحده خنيث ولوني ولية غمان..
36
طگ الحديد بحديد وموت يلمالك عضيـــد.
54
نمرد گلبي شلون التمو عليه الأنذال، وهوَّ حيل مهضوم لأن چان وحده ودارو عليه أشگد ولدنا سولفو وياه ورادو يرجعون ياخذون حگه بس هوَّ حلف لا ولدنا ولا حتى أصدقائه ياخذون حقه راد هوَّ ياخذ حقه بأيده..
مر هذا اليوم ومرن چم يوم وهوَّ حيل مطنگر ماله خلگ ومريض وبيتنا كئيب لأن حتى وردة ممرود گلبها وما داومت هاي الأيام گضتها تهتم بعلاجه بس من بعيد لبعيد أبد ما بقو سوى لأن هوَّ مو فارغ دوم يمه ناس
-وردة: واگفه گدام شباك غرفتنا الدنيا ليل والكل نايمين وهدوء صافنه أتنهد من أتذكر حاله حرّ وشلون أبتعدنا عن بعض وصرنا أبد ما نسولف وبنفس الوكت بالي عليه، حسيت شخص بصفي التفتت شفتها كلارة
-شبيچ وردة
-بالي يم حُرّ
-روحي شوفيه
-أستحي
7
عگدت حاجبها صافنه بوجهي
-منين؟
-ما أدري
-ترى زوجچ هوَّ عليمن مستحيه شو روحي!
5
-لا ما أروح..
-والله تستحين غير لو أنه چا ضليت الوكت كله مگابلته.
9
-ما چذبو من گالو كلارة مستهتره
-عليمن مستهتره عمي ما گايله شي غلط، لو صاحبي چا صدگ مستهتره وأكبر مستهتره بس غير زوجي!
-هههههههه حقچ.
5
قنعتني ولحت عليَّ علمود أروح وأنه صراحه حيل بالي يمه وحابه أشوفه من يوم الحادثه أحنى ما حاچين سوى وحدنا، طلعت بتردد أطگطگ بأصابعي وصلت لغرفته والبيت إذا تنشمر بي الأبره ينسمع صوتها
1
فتحت الباب على كيف ومشيت خطواتي بتردد طبيت وأول ما سديت الباب ورفعت راسي شفته واگف على حيله باقي بس بالبجامه وأيده على البلاستر كأنما يريد يفتحه، أو ما شافني أبتسم إلي وصاحني
-تعاي غزالة.
رحت عليه بلهفه ما گدرت أخفيها
-بقى بالي يمك، شلون صرت؟
1
ما گدر يخفي أبتسامته، نظراته تتجول على ملامحي
-الحمدلله كبد.
3
دمعن عيوني من تذكرت حالته وشلون شفته درت وجهي للجهه الثانيه ساكته ما أعرف شنو أحچي وياه رغم هواي حچي تارس گلبي بس من وگفت گدامه كله أختفى بلعت ريگ دموعي ينزلن أسمع صوته يگول
-له له له!
أصابعه لامسن فكي دار وجهي عليه وصارت عيني بعينه
-ليش تبچي؟
-خفت عليك هواي..
-متعيني.

يحچيها بقهر من شاف دموعي عبالك يلوم روحه لأن خلاني أشوفه مدچوچ ونقهرت، مسح دموعي يسولف وياي يريد يزرع الآمل بداخلي
-ما متت ولا صارلي شي جروح بسيطه چا أنتِ ذيبه وسباعيه شفتي الأكبر منهن تخافي من سچينه أفا.
تنهدت مدنگه عيني
-شفت الأكبر والأكبر صحيح، بس أنه ملچوم گلبي عليك بوكتها متت من الخوف ونمرد گلبي كل ظني راح أخسرك دمك لطخني وراسك بحضني وأشوفك شلون روحك چنها راح تطلع!
أنه السلف وهوَّ عيونه متروسات سعاده، سكتت شويه وهوَّ بالگوه گعد على چربايته وجرني من أيدي گعدت على الطرف
-لا تتعارك بعد..
أبتسم يمسح على شعري ومركز بحچيي
-بس أنه ما عايل
-معقوله شو أحسك أنتَ أبو طلايب؟
9
-وداعتچ وأنتِ العزيزه أنه ما أعيل.
-كسر بأيديهم أن شاء الله..
8
سكتنا شويه وأنه رجعت گتله
-دير بالك على روحك مو كل مره تطلع منها
-أن شاء الله.
1
-لا تخوفني عليك..
أبتسم أبتسامه جانبيه يمسح على خدي
-خادمچ أنه.
15
ضيگت عيوني ما مصدگه بكلامه، ونترت
-وشدعوه هلگد تطلع طلعاتك چثيره يَـ حُرّ!
ضحك لازم جرحه معكمش وجهه متألم، وأنه رافعه حاجبي وأباوعله
-غير زلمه شاغول أنه.
4
-لا تطلع هواي..
-الموت يلحگك يلحگك لو نايم بفراشك.
9
باوعتله بطرف عيني أكلب بعيوني
جر خدي وباس أصبعه طگيته على أيده، ضحك
-تدوس على الجني وتصيح أسم الله.
13
ضحكت وعفته يرتاح رغم هوَّ ما رضى أطلع وأشگد لح عليَّ علمود أبقى بس ما رضيت خاف يشوفني واحد ومالي خلگ مشاكل وهم جيتي علمود أطمئن عليه وأعوفه ينام براحته خاف ينزعج، طلعت من الغرفه وطفيت الضوه وراي وحلفته
ينام ويرتاح
2
أول ما فتحت الباب وطلعت علمود أرجع للغرفه لمحت إيناس تتأفأف من وصلت يمي صايره چنها تنين گالبه وجها ومحتقنه وجها صاير أحمر من الضوجه والعصبيه طنشتها ورحت للمطبخ ترست دولكة الماي
8
أسمع صوتها تدردم ضجت لأن أجت وراي
وأسمع بين كلامها الهواي، گالت كلمه صفنتني
-بحضون الزلم التستشرف علينا.
33
حچتها تبسمرني عود، التفتت عليها عاگده حاجبي
-عفوًا؟
1
-مسويه روحچ شريفه علينا وأنتِ بحضون الزلم تفترين..
5
-تاكلين تبن وإذا تعيدين الحچايه هاي مره ثانيه أشگ حلگچ وأطيح حظچ.
7
رفعت حاجبها متنرفزه وصرخت بوجهي
-چا بس تستشرفين بروسنا وأنتِ بحضن حرّ!!
8
أبتسمت ورديت الها ببرود
-وأنتِ شعليچ؟
6
ركنت أسلوبها على جهه وگلت يمكن هِيَّ ما تعرف بيناتنا علاقه أو هوَّ يحبني وأحنى عاقدين، بالأخير شمدريها أحنى ما عالنين عقدنا ورغم كل هذا مو مبرر ترخص روحها بس أنه حطيت الها عذر وحاولت أبين الها أنه وحُرّ بعلاقه علمود تفك ياخه
2
-أحضنه يحضني شي بيناتنا.
-عود صدگ يعني من كل عقلچ تحچينها بهيچ جرأه!
-أي حبيبتي شعليچ؟
13
حطت عينها بعيني وكلماتها عباره عن سم وحقد تبثهن
-ما دام هيچ حچينا على المكشوف، الزمن بيناتنا طويل يا
وردة حلمچ أخليچ تاخذين حرّ لو أموت ما أخليچ تصيرين اله لو فراگكم يكلفني عمري.
صفنت عليها مصدومه وبعدني ما مستوعبه
-تحبينه لو تردين تحرگين گلبي؟
-ثنينهن، أريده أنه وما أخليه لوحده غيري وبنفس الوكت أريد أحرگ گلبچ وأعلعلچ وتضلين كل عمرچ بحسرته.
21
ضحكت مستغربه وصافنه عليها
-ترى چبيره أنتِ شني هاي السوالف، أنتِ وفجر نفس العمر وفجر مسؤوله عن عائله وأنتِ شخصيتچ ما مسؤوله عنها!
3
-أتزوجه وأخليه يطردچ گدام عيني..
35
-حبيبتي ذاك هوَّ حُرّ وروحي سوي التردينه، لا راح أمنعچ ولا الي علاقه أبقي أركضي وراه ومن ينطيچ عين بالعافيه عليچ.
4
-الزمن بينا وأرجع أذكرچ
-تعبين روحچ على الخالي بلاش..
14
-مصدگه روحچ هواي ترى زعطوطه أنتِ يضحك عليچ!
-خل يضحك شعليچ القاضي راضي.
8
بضحكه متروسه سم وشماته
-بسرعه أنطيتيه عين ما مصدگه شجاچ، ترى هوَّ ما يحب البنيه الخفيفه!
7
-شافني بحجاب وعبايه مو بسيتات نوم.
180
جمدت بمكانها فاتحه عيونها مبحلگه بوجهي صافنه عقلها
أفتر تزامط وتتعيقل براسي براحتها ضامنه أنه ما أدري بيها تفكر شعرفني بصوره دازتها الحُرّ، بس زاد الموضوع عن حده صار أشگد ساكتتلها بس تطعن بيَّ وتقلل مني وهِيَّ عايشه
بوحل مستحيل أسكت..
باوعتلها بأستنقاص وبنبره متروسه ملل نطقت
-وكافي لعبتي روحي وبزعتيني إيناس عوفيني بحالي
-لا تضلين تطلعين عليَّ چذب ترى أهجچ بليله ظلمه!
1
-ما مچذبه.
-أنه مو مثلچ تردين تذبين عليَّ عيوبچ
-ههههههه كل واحد يعرف روحه..
عساچ بالمرض طايحة الحظ تطلعين عليَّ سمعه مثلچ!
-خاب دكافي مللتيني روحي عمي عسما تتزوجينه اليوم گبل باچر ولي من خلقتي عاد.
4
طلعت من المطبخ حتى الماي عفته لعبانه روحي هسه أنه كاتله واحد من أهلها وهيچ حاقده عليَّ والله غريبه، رجعت للغرفه ما لگيت فجر أستغربت لأن الدنيا ليل وين راحت بس
ما أهتميت هواي لأن عدها هواي أشغال
تقربت عليَّ كلارة بكل حماس
-وردة منو عدنا؟
-محد
-عرسچ يوم الأحد.
28
رفعت حاجبي أباوعلها وهِيَّ تضحك فريت أيدي
-الحمدلله والشكر..
2
هزت أيدي بنبرة توسل گالت
-فدوه گولي حبابه
3
سكتت صافنه عليها وهِيَّ متونسه
-حبابه
-أمچ دبابه.
14
-ترى بالنعال
-بالنعال لو بالليل؟
20
-خرب عرضچ أشگد تافهه وسخيفه
-ليش ضايجه والله يضحكن
3
تحچي وهِيَّ خربانه ضحك ضحكت أفر بأيدي
-والله ولا يضحكن
-أنتِ نفسيه والله العظيم يشبعن ضحك.
1
-ههههههه الدنيا ليل عوفي تفاهتچ
-عليچ الله گولي أنه
2
-أنه
-بحلگچ ذبانه.
32
صدگ هنا ضحكت مو على النكته، بس على سوالفها غميتها وتمددت على فراشي وهِيَّ هم وأنتبهت الها صافنه على السگف تتبوسم وتلعب بشعرها ضيگت عيوني أيدي على خدي
4
-ها ولچ عليمن تتمضحكين؟
-هههههههه عندي بعد مثلهن وجاي أضحك عليهن.
10
كلارة: گعدت ثاني يوم الصبح بنشاط وگعدنا أنه وردة نتريگ بالمطبخ طب ضيغم وأول ما لمح وردة أبتسم وتقرب وگف أنتچه على الكاونتر يسأل
-وردة اليوم شفتي حرّ؟
2
نزلت كوب الچاي بالصينيه وهزت راسها
-لا والله ما شفته خير أن شاء الله؟
ضيغم: أريد أشوفه گاعد لو نايم.
وردة: أشوفه الك؟
ضيغم: لا تعبين روحچ بس ردته على شي مهم.
+
كلارة: شبيك ضيغم صاير شي؟
ضيغم: لا لا كلشي ما صاير بس أم رشا..
17
وردة: شبيها؟؟
2
ضيغم: خطيه المره من سمعت بي نقهرت فد نوب وياهو تشوفه من ولدنا تسأله عليه أشگد تسألني وگالتلي من تشوفه گاعد أنطيني خبر علمود أجي أشوفه.
24
وردة: تجي تشوف حُرّ؟
2
ضيغم: أي خطيه من سمعت بي لهسه بالها يمه تريد تموت..
5
كلارة: خايبه شمالچ هذا أكبر كلاوچي تلگينه يچذب.
ضيغم: وروح أبوي ما مچذب.
3
حسيت وردة حيل ضاجت بس أبد ما بينت گدام ضيغم صفنت على ضيغم يتبوسم فرحان عرفت بي يدري بَـ حرّ يحب وردة أو يدري بينهم علاقه لأن واضح حيل أجه يغث وردة بَـ أم رشا بس هِيَّ حافظت على هدوئها..
13
وردة: أها خطيه
ضيغم: شو مالچ خلگ بيچ شي؟
1
وردة: لا ما بيه..
ضيغم: عليچ الله!
وردة: تريد أگعدلك حُرّ يستقبل أم رشا؟
ضيغم: لا خطيه عوفيه نايم، بس گلت بلكت الگاه گاعد المره زرفت گلبي تريد تجي تشوفه بالها يمه.
1
وردة: أها أن شاء الله..
كلارة: تجيب المغثه لو تطير عابتلك.
ضيغم: والله ما تستحين أم رشا خطيه ليش هيچ مكروه بهذا البيت عيب عليچن والله!
وردة: هسه أنه حاچيه شي؟
+
ضيغم: لا بس شو أحسچ تنغثين من طاريها!
1
وردة: شعندي أنغث منها ما مسويتلي شي.
1
هز راسه بس بالگوه حابس ضحكته بصفي علبة حليب مسدوده عدل شمرتها عليه وهوَّ يضحك، التفتت على وردة وجها صار دم راح تنفجر علينا من القهر أحس خطيه إيناس وهسه أم رشا يغثونها بيهن..
2
كلارة: شقاك الماصخ بطله.
1
ضيغم: ترى زودتيها كلارة متشاقي هسه أنه المره گالتلي من يگعد وديلي خبر وهواي لحت شسويلها يعني؟
وردة: هسه أشوفه إذا گاعد علمود تجي تشوفه.
3
هز راسه وهِيَّ راحت طولت شويه
وأنه أباوع لضيغم بطرف عيني ضايجه لحد ما رجعت
-نايم
-خوش
1
طلع من المطبخ وأنه صافنه عليها مضيگه عيوني
-شعجب ما كتلتي ضيغم!
-عليمن؟
-يحرگ گلبچ بأم رشا
-لا ما تسوى السالفه..
2
كملنا ريوگ وأنه وگفت أغسل المواعين، وشفت مواعين ريوگ جدتي وفجر، و وردة گاعده يمي أنتبهت لخشمها طگ دم بسرعه عفت الماعون من أيدي والماي مفتوح
-وردة خشمچ طگ دم!
24
هِيَّ حست گبلي وحطت أيدها على خشمها
-أستغفر الله..
1
گبل لا أسد الماي وأتقرب الها
أجه عليها وائل ملهوف جر أيدها يباوع لخشمها عدل
-شبي خشمچ وردة؟
84
سحبت أيدها من أيده وطلعت من المطبخ لأن الدم ترس چف أيدها ما رادت ينتلف المكان بنقاط الدم التنزل من خشمها بس حيل تبهذلت راح وراها وائل فتح الها ماي الصونده
-تعاي غسلي هنا..
4
تقربت ما تشوف گدامها مخبوصه بسرعه مدت أيديها وهوَّ رافع الصونده وهِيَّ تغسل ودشداشتها أنترست دم وماي حيل تبهذلت وخشمها ما گطع، تغسل وجها ويرجع ينزف أكثر من قبل حيل أرتبك وخاف عليها
5
أخذ قسم من الماي بأيده يغسل بوجها وهِيَّ ما تشوف گدامها من الدوخه والتعب كض خشمها بأيده مثبتها گدامه علمود يگطع نزف خشمها..
5
سحبت روحها من بين أيديه وهِيَّ لزمت خشمها دايخه حيل لأن خشمها نزف دم هواي خطيه وبنفس الوكت راسها مسطور مصدع گعدت على جهه مغمضه عيونها دايخه وهوَّ واگف متخوصر
-گومي أخذچ للمستشفى يشوفون حالتچ!
ما أريد
-چا هِيَّ تريد وما تريد يمعوده خطر هيچ عليچ؟
+
-دائمًا خشمي يطگ دم عادي
-لا مو عادي خاف بيچ شي مريضه؟
-لا تلح وائل ما أريد أروح
-مو هِيَّ بكيفچ وما ترحين
2
-حُرّ گالي قبل لا يتمرض، ياخذني لدكتور يشوف حالتي خاف أكو شي مو زين هوَّ ياخذني.
1
-چا أنه ما كيفت ينزاح شويه!
24
عگدت حاجبها وخرت أيدها تشوف الدم گطع بس ما گطع رجعتها ونترت
-شنو؟
-حرّ ما يخلينا نشوف دربنا چا كلشي حر شالقضيه!!
6
-أي هوَّ ياخذني من يطيب.
-لا عليمن أنه أخذچ يمكن شي خطر؟
-مو خطر بس تصير وياي إذا نقهرت لو ضجت
-وعليمن ضايجه هسه بله سولفيلي؟
3
-ما محتاجه أفضفض شكرًا.
4
باوعلها بعتب ولوم ضايج
والدم ما يرضى يگطع تنرفز ضايج يستغفر، جاب نعالها خلاه گدامها
-گومي البسي نگعتي ماي.
6
بين ما هِيَّ گامت دايخه وأيدها لازمه بيها خشمها شافها ما تگدر حتى تشوف دربها نزل مدنگ علمود يلبسها النعال وكل هذا جاي تراقبه بلقيس من بعيد وصارت تنين من العصبيه ما تشوف گدامها تقربت عليهم تلعلع
-ها يمه شني خدام عدها تلبسها بنعالها!!!
15
وردة أجت توخر عنه وما رضت يلبسها گبل لا تجي بلقيس بس حتى ما خلتها توخر هجمت عليها تريد تطگها وگف گدامها وائل وخله وردة وراه
-شني السالفه يمه البت مريضه!
1
تخبلت تريد تكتل وردة
وائل يوخر بيها ضايج من تصرفات أمه وهِيَّ غمت بطنها
-أمده البطن الجابتك ولك تخدم بهاي العايقه؟؟؟
-شأخدم يمه شمالچ!
تلعلع وصوتها شعلاته
تطعن وتغلط على وردة، وائل ما راضي يتعارك وياها ضايج
-كااااافي يمه كافي تحچين عليها.
+
-فجر: مقهوره لأن جسام موگف حياته علمودي، وبنفس الوكت أنه أحبه وصعب زواجنا لأن بالبدايه لازم يعرف بالصار وياي وأنه الموت أهون عليَّ من أسولف بذاك اليوم المشؤوم بس أستذكر الموضوع تتأزم نفسيتي وتنمرد روحي وتخرب حياتي شلون أسولفها للشخص الأحبه كل عمري؟
بس ضغطت على روحي وقررت أواجهه وأسولفله كلشي صار وياي..
21
علمود نكون واضحين، إذا يتقبلني من أسولفله ما عندي مشكله نتزوج لأن أنه كلش أحبه وروحي بي من سنين بس إذا ما تقبلني تنتهي علاقتنا وتنسد سالفة زواجي للأبد وحاولت الگه الوكت المناسب علمود أسولف وياه
2
طلعت من باب الهول صافنه عليه گاعد يدخن مهموم صافن على السما يزفر الدخان ويتنهد، تحمحمت أباوعله
-جسام
التفت عليَّ مستغرب وجودي
-ها فجر؟
بلعت ريگ أحس النفس ضاگ بريتي وما عندي هاي الجرأه أسولفله طلعت گعدت بصفه بس بيناتنا مسافه مسحت وجهي متنهده بتعب
-عندي وياك سالفه.
هز راسه ونطق بنبرة صوت متروسه قلق
-خيرچ؟
أشگد حاولت أكبت حزني بگلبي، بس ما گدرت نزلن دموعي بسرعه بس فتحت السالفه صفن على ملامحي بخوف وبقلق أكبر نطق
-شمالچ فجر سولفيلي عليمن دموعچ تصب؟
1
جريت نفس طويل ومسحت دموعي، ضغطت على روحي علمود ما أنهار وأحاول أكبت الموضوع بگلبي بس تكبر الخنگه بگلبي بنبره هدوء رديتله
-أنتَ هواي تطلب مني أسولفلك ليش ما جاي أرضى نتزوج هواي أجت ببالك أفكار كل ظنك أنه ما أريدك بس السبب بعيد كلش عن بالك..
2
صفن على وجهي، نظرات عيونه بيهن حيره وأستغراب وفضول چن يريد يسمع كلامي بس خايف ومتردد لحظات توتر بينا، ثنينا خايفين من الجاي جريت حسره طويله گلبي عوزه شويه ويوگف
2
ساكت منتظر كلامي مسحت وجهي وكملت مخنوگه
-أجيت أخصم الموضوع اليوم، أتمنى بعد ما نفتح هاي السالفه إذا رضيت بيها لو لا المهم أسولفلك ويرتاح گلبي ولو أدري رد فعلك ما راح تبشر بخير، أريد أسولفلك لأن تعبت بعد وما عندي طاقه نهد حيلي والسالفه مو هينه عليَّ..
توتر كلش من شاف وضعي وحالتي وحتى صوتي المخنوگ سكتت هواي يله گدرت أنطق كلمات سهام تنبت بگلبي، مسح على لحيته ويحاول ما يبين التوتر الواضح على عيونه
-نتفاهم على كلشي سولفيلي؟
2
رجفه محتله صوتي وگلبي سولفت وهوَّ يسمعلي بتركيز
-بيوم من الأيام طلعت من البيت أشتري لأخواتي وتحول ذاك اليوم لذكرى مشؤومه دمرت حياتي، أعتدو عليَّ زلم ثنين...
5
ما گدرت أكمل كلامي الغصه خنگتني وكتمت صوتي، تخشب بمكانه أول مره بحياتي أشوفه هيچ هادئ كل مره من يسمع شي ما يعجبه لو حچايه صغيره يتخبل ويگلب الدنيا عصبي وكلشي ماخذه بعصبيه بس هسه چن سچينه ونبتت بگلبه سكت وما نطق حرف!
دنگ راسه لازمه بثنين أيديه وصافن بنظره متروسه صدمه وقهر نزلن دموعي يگطرن وأنه أباوعله وهوَّ ساكت تمنيت ينطق حرف ويبرد گلبي بس ضل هادئ التفت عليَّ باوعلي دنگت عيني متوتره
-أنه سولفلتك علمود ما تگلي ليش رفضتيني..
-يا همَّ فجر؟
-هسه أنتَ عرفت السبب ياريت ما تفتح السالفه بعد.
-فجر جاي أسألچ يا همَّ؟
-ما يفيد جسام السالفه صارلها هواي.
-جاي أگول يا همَّ؟
1
لزم چتافي يهز بيَّ ويصيح بعصبيه
-يا همَّ فجر أحچي؟؟؟
دفعت أيديه مني خازرته وأنتر
-لا تصيح جسام!!
ذبل وجهه وحاله تعبان طفت الدنيا بعينه يرجف
-أحچي بس أحچي يا همَّ؟؟؟
جريت حسره بيأس
-ما يفيد جسام، رب العالمين خذه حگي..
عگد حاجبه صافن بعيوني
-ما فهمت؟
-مات أحترگ بالدنيا گبل الآخره..
2
غمض عيونه بقوه يمسح بوجهه بعصبيه
فاير من القهر يحاول يتمالك أعصابه بس للأسف صاير بركان
-شوكت صار هذا كله!
-من زمان قبل سنين طويله
-ليش أنه ما أدري ليششش شلون ما أدري؟؟
-أنتَ چنت ما موجود.
-والزلم البقيه القنادر وين؟؟
1
-ولدنا كلهم ما موجودين أتذكر بوكتها طلعوكم كلكم لغير محافظه تشتغلون..
1
يمسح بوجهه بقوه ويعصر عيونه بأصابعه، طلب مني أسولفله بالتفصيل بس ما گدرت أبچي وأشهگ مدنگه عيني وكاتلني القهر والخجل من شافني هيچ وضعي بسرعه تقرب گعد گدامي
-ليش البچي ليش!
1
-أنه ما سولفت لواحد غيرك علمود تقتنع برفضي..
-وكل ظنچ أعوفچ؟
17
رفعت عيني لعينه وبصوت مبحوح من البچي گلت
-أي عوفني جسام وأتزوج غيري
-ما أريد غيرچ.
8
-تتعب من وراي والله
-أنه أريد التعب بس ما أريد غيرچ.
5
سكتت أفرك بأيديَّ متوتره
ودموعي ينزلن على وجهي مهضومه فز گلبي على جملته
-رايح أخطبچ من حرّ
