رواية عقارب ذوي القربي الفصل العشرين 20 بقلم انين الليل
مها
بيومها ملاك صخنت ما عندي شي انطيها سويت الها كمادات شويه خفت حرارتها ونامت انا هم حضنتها
ونمت فزيت على صرختها
الدنيا ظلمه كعدت والنعاس بعيني كعدت مفزوعه وانا اكلها = اسم الله اسم الله
لكن بقت تصرخ عبالي انگرصت بعقرب او حشرره شلتها واريد اوصل افتح الضوه الي صار
انو من شلتها رادت توكع نفسها بمرونه تريد اتذب نفسها وصراخها زاد كعدت روان
- - هاي شكو شبيها
جاوبتها بخووف = ما ادري افتحي الكلوب بسرعه
وانا احاول اهديها فتحنا الكلوب وانا شايلتها رفعت وجهها حاولت اباوع الها لكن هيه كمشت شعري ملشتني
چانت قبضت ايدها وهيه لازمه شعري ما اگدر اوصفها من القوه هيه تصرخ وانا احاول اوخر ايدها من شعري
صرت اعيط واكلها
= هديني هديني ااخ
لكن هيه زادت وكانما الي كامش شعري رجال وزنه 200 كيلو ما اگدر اوصف القوه الي عدها بحيث مغمضه
عيوني ولازمه شعري بكل قوتها
حاولت اخلص نفسي بدون فائده اجت روان حاولت اتساعدني لكن دون جدوى گعدت رهف مفزوعه وروان
تحاول تفك ايدها من شعري وانا وياها بعدها بالف يا ويلا گدرنا نفتح ايدها الي انملت من شعري شمرت نفسها بالگاع
وانا گلبي ايدك باوعت الها شفت شي ابيض طالع من حلكها وهيه بالكاع تتحرك وتصرخ ما عرفنا شنو انسويلها
رهف جابت ماي حاولت اغسل وجهها وبعدها اتقيأت وهدأت اتعجبنا من الصار روان كالت خلي ننده ابوي وناخذها للمستشفى يجوز متسممه
جاوبتها وانا فحطانه = شتتصورين يكعد هسه
- - البنيه ما نعرف شبيها مو طبيعيه يمكن من الصخونه خلي ناخذها
= هسه ابوج ما يكعد انتي ما تفتهمين
روان // خلي انروح الام غسان تروح ويانه او واحد من اولادها يجي
اتحسرت = كافي روان الصبح اخذها للمستشفى
بقيت حاضنتها والبنات گاعدات انا طمنت رهف = حبيبتي نامي ما بيها شي
رهف بخوف //لا مها ما شفتيها شلون كالبه عيونها وحتى حلگها معووج
اباوع الملاك تون طمنت رهف = حبيبتي ما بيها شي يمكن خافت من شي روحي نامي
روان اتمددت وحضنت رهف وانا بقيت فاتحه الكلوب واباوع الملاك الي غمضت عيونها لكن شفايفها اتحركهن
اتمددت يمها فزيت وانا اسمع ابوي ايكح طلعت اتوضييت ورحت =صباح الخير
صباح النور اليوم ما گعدتيني
= ليش بابا ما سمعت شنو صار بينه البارحه
باوعلي وهوه عاكف حواجبه //شصار ياستار
= ملاك بابا ما اعرف شنو صار بيها شگد صرخت واحنه بس نهدي بيها
هوه حك خده // هاا اي سمعت بس عبالي عد الجوارين يعني هاي التبجي ملاك
= اي بابا وبعد شوي لازم ناخذها للمستشفى
هوه جاوبني // اي اي اخذيها
= وانته
باوعلي وسالني وهو يفر ابايده — انا شبيه
= تروح وياي ناخذها نشوف شبيها
— وشغلي انتي اخذيها وشوفي شيكلج الطبيب
راح يمشي دار عليه رجع // انتي مو دوامج صباحي
= اليوم اغيب خلي اشوف البنيه شبيها
ابوي // شبيها يعني صخونه وهيه طفله هسه الچبير اذا ضربته الصخونه شيصير بي بعد مو اله هيه
هوه طلع وانا رحت سويت جاي وطلعت جبنه گعدت روان = صباح الخير
- - صباح النور شنو اشو ما مبدله
= غايبه
- - وليش
= غير اخذ ملاك للمستشفى
باوعت واتساءلت // وابوي وين
= ايكول عندي شغل اخذيها انتي
- - ليش ما سمع صريخها
= ايگلي عبالي عد الجيران
هزت ايدها وراحت غسلت واجت صبت جاي وصارت تاكل سالتني
// يعني مها صدك ابوي اذا اخذ الحبوب ما ايحس بشي
اتحسرت = اي اكيد اصلا هوه چذب ما سمع اي صوت بس لان استحى مني هيج كلي
روان باستهزاء // والله هالعايله تحفه
خزرتها هيه كالت // ابقي بمثالياتج هاي عيب وهاي لازم ما نحجي وهاي حرام ياالله خلي ابدل حتى اروح وياج
= لا وين رايحه انا اخذها للمستشفى
- - شنو ترحين ابحدج
= اي
- - يمعوده شلون ترحين خلي اروح وياج
= ورهف
- - شعليها انخليها بالبيت
= تحچيين صدك
- - اي ما عليها تفتح التلفزيون وتنتظرنه لو تراجع ادروسها
= لا كعديها خليها تجي ويانه
راحت روان كعدتها بعد ان غسلت اجت تسالني // صدك راح تاخذين ملاك للمستشفى
= اي وروان تروح وياي انتي تبقيين اهنا
رهف هزت راسها // لا اخاف ابقى ابحدي اروح وياجن
= ياالله تعالي اتريكي وبدلي خلي نروح
تريگت وبدلت لبست التنوره الي جابها معين الروان من اتزوج وقميصها مال المدرسه وقمصله جلد سوده وانا
وروان لبسنا كابات فوك ملابسنه مال البيت وطلعنه قفلنه الباب شافتنا ام غسان جانت جايه من الدكان
سلمنه عليها // ها وين من الصبح ؟
روان // خاله ياصبح دنيا الضحى
- - اي وين رايحات
= ماخذه ملاك للمستشفى مصخنه وبس تبجي ما نعرف شبيها
- - اكلج هاي هيه الي تصرخ الليل كله
روان // اي بس مو الليل كله
هزت راسها // اي سمعتها وردت اجيكم بالليل بس عبالي مو عدكم
= تسلمين خاله ما تقصرون
طلعنه نمشي ورهف تگول // شنو هالتناقض ردت اجيكم لان سمعتها تبچي بس عبالي مو عدكم
= شبيج وياها خليها تحجي
روان //رهف اسكتي لا تصيرين محلله
رهف عيبت وهزت ايدها // لا تصيرين محلله
- - انجبي لا اطيح حظج
باوعت الهن وگفت ونفخت حييل = لا الظاهر انا راح ارجع واطيح حظجن منا ناس احترمن نفسجن واسكتن
رهف رادت تحچي // ولا نفس امشن وبالبيت حسابچن
رحنه للمستشفى جان هوسه وانا وكفت بالسره وروان كعدت هيه ورهف الناس اتباعلنه يمكن مبينات مو من
هاذي المنطقه روان كاعده خاله رجل على رجل ورهف يمها من وصل سراي اخذت ملاك وروان دخلت وياي
سلمنا ع الطبيب الي جان كاعد وما طايق نفسه //صباح الخير
ما رد بس اوما براسه صرت اشرح اله = دكتور البارحه صخنت وبعدها صارت تعيط
- انطيتوها علاج ؟
روان جاوبته بدلاعه وهيه اتاشر بايدها // لا دكتور ما كان عدنا
هوه سالها // بس كان لازم اتجيبوها للمستشفى
روان // دكتر (مو دكتور ) بابا بوقتها جان كولش تعبان واحنه جدد ما نندل
سالها // جدد شنو ؟
- - يعني تونه جايين جدد بالمنطقه فما نندل نجي للمستشفى
هوه عاف ملاك وسالها // ليش انتو منين ؟
- - من البصره
- - اتو من البصره
روان هزت راسها وجاوبته بدلع //اي ليش مستغرب
- - ما اعرف البصره عدهم هيج جمال
هيه ابتسمت // عيونك الحلوات
اجه وفحص ملاك بعدها سالني وفتح عيونها وهي ما قبلت وصارت اتهمهم بكلمات ما مفهومه گلي
- - لازم اتعرضوها على طبيب اختصاص اطفال
روان // لعد انت شنو
ابتسم // انا اختصاص عاام
- - ها يعني بتاع كلو
هوه // اي بتاع كلو
انا خزرتها هو كلي //شيليها وروحي جيبي الدوه
اخذت الورقه من الدكتور وطلعنه للصيدليه واشوف روان شلون تمشي بس حتى تجذب النظر اخذت العلاج
ودخلنه ع الطبيب الي كلي //هاي الابره هسه تاخذها وهذا شراب تلث مرات باليوم بس ارجع وااكد لازم يشوفها طبيب مختص
= بس دكتور احنه ما نعرف اي طبيب انت منو تنصحنه بي
هوه لملم حلگه // اممم دكتور ...هذا كلش زين
هو كتب كلمات بالانكليزي وكال //من ترحون للطبيب انطو هاي الورقه
== شكرا دكتور
1
طلعت وانا شايله ملاك ورحت للمضمده رهف سالتني //ها شگلج
= ماكو شي
اجت روان وراي انا انطيت الابره للمضمده الي گالت الزميها هيه ما قبلت وصارت تصرخ انا وروان ورهف لزمناها بحيث ما خليناها تتحرك
ضربتها الممرضه ابره وطلعنا بالطريق سالتها الروان = ليش من طلعت اتاخرتي ياالله طلعتي
روان وهيه تبتسم // بقيت اتشكرته للدكتور لان جان مهذب ويانه
= ها وشدعوه من تمشين هالشكل
مها شبيج انا دووم هيج امشي
رهف //حتى من نروح للمدرسه تمشين على كييف وانا اوصل قبلج
- - اي لان انتي مطيوره
= كافي اسكتن
رجعنا للبيت وشفنا منذر واگف بس شافنه اجه وهوه يبتسم ويباوع النه
- ها سلامات امي تكول رحتو للمستشفى ردت الحكم
جاوبته = شكرا ما تقصر
- اي شي تحتاجونه بس صيحولي منا اجيكم مثل الطير الطاير
هزيت راسي ودخلنه للبيت سديت الباب وراي وانا استذكر الي صار بملاك اجت روان گلتلي
- انطيني كابج خلي اغسله واشره خاف العصر ناخذها للدكتور
= انا اخذها انتي روحي للدوام
- ما اداوم اخذها وياج
=ابوي يروح وياي
- اذا ابوي يروح وياج انا ابقى بالبيت ياالله ياالله انزعي الكاب وانطيني ايا
= خو انتي تردينها من الله بس كون تغيبين
روان // اووو مها ما تكليلي شراح نحصل من المدرسه
1
اخذت الكاب وغسلته وراحت صعدت فوك السطح اتشره ورهف اجت صارت تحضر بجدولها ملاك نامت من
ضربوها الابره وانا افكر لازم اطلع من الفلوس اودي بيهن ملاك للطبيب صرت احجي ويه نفسي
= اي اطلع من الفلوس بس قبلها اشوف ابوي بلكي يكدر ايدبرلي شكم فلس
= اي اگله ما اعرف شبيها البنيه
جريت نفس = افف هسه انتي شبيج ياعمري حتى هادئه وما بيج اذيه
عكفت حواجبي وحچيت بصوت مسموع = شنو هذا كله تشر بالكاب لو ملابسنا كلهن غاسلتهن هم ما تتاخر هلگد
رهف // هيه يوميه تصعد فووك
= شنو ؟
- اي عبالج من ترحين للمدرسه تبقى تقرا لا لو تصعد فووك لو تفتح التلفزيون على اغاني وتبقى تركص
= يعني ما تدرس
- تؤ ومن احچي وياها اقري ادرسي تكلي انا عايده السنه حافظه الماده على گلبي
نزلت روان واجت للغرفه سالتني // ها بعدهي نايمه
هزيت راسي = اي روان شدعوه هلكد اتاخرتي بشر الكاب
رفعت چتفها //هيج بقيت بالسطح
= لا تنسين رونه سطحنا ناصي
- هوه منو يصعد كلها الناس داخل البيوت
= مي خالف هم ديري بالج
رهف بدلت وتريد تروح للمدرسه وانا حاجيت روان = بدلي وروحي داومي
هيه هزت راسها// شنو ملوكه بس اختج انا هم اريد اطمن عليها
= مو ابوي يجوز هوه ياخذها وياي
- عود اذا اخذها انا ابقى بالبيت
هيه حكت شعرها // هسه كليلي شسوي غدا (صارت تضحك ) ههههههه عبالك الدجاج والسمج مالي
الثلاجات والمجمده
= انا هسه اكوم اشوف شطبخ
- - لا انتي تعبانه من البارحه
= زين طبخي بس تمن وانا طابخه مركة العدس بالثلاجه
ًراحت طبخت وانا انطيت الرهف خمسميه للمدرسه اووصيتها اتدير بالها گمت اتوضيت وصليت وبعدها
اجه ابوي دخل للحمام وغسل واجه
- - ها شلونها ملاك
= بابا الطبيب كال لازم ناخذها الطبيب اختصاص اطفال
روان // اليوم كال ضروري ناخذها
هزيت راسي = حتى كتب النه اسم الطبيب
ابوي لم حلگه // مو انا ما اگدر اخذها وياچن عندي شغل
= ناخذها انا وروان
جابت روان الغدا صار ياكل ويباعلها // شو مبين عليها زينه
= ضربوها ابره ونامت
هوه اتمدد ورث جگاره وبقى صافن حاجيته = بابا عندك تنطيني فلوس
گعد ايباوعلي //لا منيلي انتي مو كلتي اتضميين عندج اليبقن من الخمسه اخذي من الضامتهن
هزيت راسي وسكتت وصرت احچي ويه نفسي = هم صحيح هوه يادوب يلحك ينطينه الخمسه ويجيبلنه
خبز وعلاگة خضره بس الي يشوفه شلون يشتغل يگول ايحصل (جريت حسره ) ليش نسيتي العرك والحبوب
منين ايجيب الله ايعينه
هوه من راد يطلع گلي // مها خاف ما تندليين اخذي وياج ام غسان
هزيت راسي هوه طلع وصرت انده بملاك = ملاك حبيبتي اگعدي
فتحت عيونها ابتسمت بوجهها اخذتها غسلت وجهها وروان جابت الها شويه تمن ومركه وكلتها هيه جانت جوعانه
اكلت وبمجرد ما خلصت اتقيات
انطيتها الروان شالتها وانا مسحت المكان وگلت الها
= خلي اسبحها وابدل الها واخذها ابوي يكول اخذي ام غسان وياج
روان // يجوز ما تقبل تروح
= والله ما ادري
- - زين بين ما تسبحيها انا اروح اسالها واشوفها حتى اذا ما تقبل نروح انا وياج
= اي
- - ياالله انا رايحه
راحت روان وخلت الباب مردود واجت كالت //ام غسان وافقت وحتى ابو غسان كال اذا تردون اروح وياكم
= نعم الله عليهم انا راح اغسل حتى نروح
رحت غسلت وبدلت دشداشه وروان جابتلي الكاب همزين ناشف لبسته واخذت فلوس وطلعت بعد ان اخذت الورقه
الي كتبها الي الطبيب صرنا نمشي انا حاچيت ام غسان = خاله ناخذ تكسي
- - لا عليمن نركب نفرات بالكيه براس الشارع
وصلنا وركبنا بالكيه انا دفعت الاجره ام غسان ما قبلت لكن انا سكتت واكتفيت ابتسم هيه كالت نازل
نزلنه ويانه اثنين مره ورجال هم امبين عليهم جايين للطبيب هيه نزلت ورفعت عبايتها نكتتها ام غسان نظيفه ومعتنيه بنفسها وحتى ابو غسان
رغم هوه جبير بس ما مبين علي چان نظيف ودووم دشداشته نظيفه ومكويه واحس ام غسان هيه كلمتها الماشيه على زوجها وعلى اولادها
چانت المنطقه الي نزلنه بيها كلها عيادات وصيدليات وانا شايله ملاك وبايدي خاولي خاف تتقيأ قريت اليافطه مالت الطبيب ورحنه اخذنا
باص جانو قبلنه يجي عشر اشخاص كلهم ابايدهم اطفالهم وجان داخل قبلنه شخص ام غسان سالت المره الي كاعده يمها //هذا خوش طبيب
- - اي زين دووم نجيب جهالنه اله
هزت راسها المره سالتها //شخيرها الزغيره
- - ما ادري مريضه
- - الله يشافيها
بعد انتظار وصل سرانه دخلنه شفنا مراجع جاي ايوصفله الدوه هز راسه وابتسم انا اتقربت وكعدت ع الكرسي ابايدي ملاك
ام غسان // شلونك دكتور
- - اهلا تفضلي
- - دكتور هاي البنيه
- - شبيها
باوعتلي وكالت //سولفي
صرت احجي للدكتور على كل شي وانطيته الورقه الي كتبها الطبيب الي بالمستشفى
كلي //خليها ع السديه
خليتها لكن هيه خايفه بقت مجلبه بيه الدكتور كلي ابقي يمها فتح عيونها ولزم بلاعيمها لان ما قبلت تفتح حلگها بعدها گلي نزليها
شلتها واجيت گعدت ع الكرسي صار يسالني // لمن كمشتج بقوه لو على كيف ؟
= دكتور قويه كلش بحيث انا واختي گوه فكيت شعري منها
- - ومن فكيتي نفسج شفتي شي طلع من حلگها
= اي دكتور شي ابيض وغف عبالك
هز راسه سالني //اول مره هيج يصير وياها
= اي دكتور
- - زين ما انتبهتي عليها بشي
=مثليش دكتور
- - يعني ما تحچي
= اي هيه هادئه واكثر وكتها ع التلفزيون
كتب بورقه وگال // هاي لازمها مفراس
= وين انسوي
- - اهنا يم دكتور ...
= شگد ايكلف
قبل لا يجاوب ام غسان // دكتور تره هنه يتيمات ومو منا بيتهم اجار وحالتهم حاله
سالها // يعني انتي مو امها
هزت راسها // لا والله انا اجيت وياها لان ما تندل
سالني // انتو منين
= من البصره
بقى صافن بوجهي وكال //بالبصره هواي اطباء معروفين واختصاص (باوع الام غسان ) بس حجيه
لازم تسوي المفراس اريد اتاكد من شي
= زين بالمستشفى ما نكدر انسوي
هز راسه // تتاخرين ينطوج موعد ولو تحصلين لو ما تحصلين
ام غسان // الفقير وين يروح
الدكتور جر نفس وكلي // هاي ورقه للمستشفى وهاي للدكتور اي واحد اتحصلين عنده تسويلها وتجيبينه وتجيين
ضروري هسه راح اكتب الها خافض حراره ومانع للقئ على ما اشوف الصوره من تسوينه تجيين بدون رقم
انا كاتب الج وره مراجعه
= ان شاء الله
عدها العافيه
= مشكور دكتور
طلعت اخذت الدوه من الصيدليه ورحت للطبيب الي عنده المفراس سالته گلي 175
هزيت راسي وطلعت ام غسان //ها خاله
= باجر اروح للمستشفى وبلكي من يشوفون حالتها ايدخلوني
- - بلكي
بالطريق دك تلفون ام غسان هيه شالته // ها منذر
-اي هسه جايه ليش
-اي دخلناها وطلب تحاليل ياالله احنه جايين عبالي صاير شي
- ها دكول اتريد باكيت جگاير من طاح حظك
باوعت الها وابتسمت هي گالت // هذا منذر بحجة يسال على ملاك يريد مني باكيت جگاير
ابتسمت وسكتت بالطريق ام غسان اخذت كعك وحلقوم وانا هم اخذت كعك ابو الدهن ورجعنا ركبنا بالكيه وصلت
للبيت لكيت رهف وروان كاعدات منتظراتنا هنه بس شافني وكفن وصارن ايسالني وملاك كعدت تباوع النه
سولفت شلون لازم باجر اخذها للمستشفى بلكي ايدخلوها
اجه ابوي وراح سبح وسالني عليها من سولفتله كال // شراح تسووين
= بابا باجر اخذها للمستشفى بلكي ايدخلوني
هو هز راسه وجان جايب ويا خبز وجبن وطماطه انا گلت الروان = خدري چاي وخلي ناكل كعك الطماطه الباجر
روان // والجبن
= نتريك بي
هزت راسها وهيه ضايجه لان ادري بيها تريد تاكل جبن بس اذا اكلنه الجبن شنو نتريك
اتعشينه وحتى ملاك وكلتها ورحت غسلت الها وانطيتها علاجها وصارت تباوع ع التلفزيون وتضحك ابوي
كالعاده طلع اعرف بي راح يشرب ويرجع سكران وياخذ حبايه وينام مرات يظل يحجي ومرات يسكت وينام
روان سالتني // باجر هم ما تداوميين
هزيت راسي // لا ما اداوم اخذ ملاك للمستشفى
- انا اروح وياج
=لا اخذها ابحدي اهنا المستشفى قريب
- مي خالف انا اروح وياج ورهف تروح ويانه
= خاف نتاخر
- - عادي نغيب ولو رهف تنتحر اذا غابت بس عادي
ابتسمت وجاوبتها = خو انتي تنطيين فلوس بس كون ما تداوميين
- - اي ما احب الدوام بس فلوس ما انطي ليش الچذب هوه اساسا منيلي فلوس
اتمددت حكيت شعري ومررت ايدي على خدي وصرت احجي ويه نفسي // يعني لو ما فلوس بيبي الله يرحمها
وتعلومها الي شلون اعرف اتصرف چان هسه تنحچي احچايتنا الله كريم ما يترك حمل
ثاني يوم گعدت الفجر صليت ورجعت نمت حتى ما ندهت ابوي لان بصراحه چنت حانقه علي رجعت
نمت كعدت الساعه ثمانيه رحت خدرت جاي وطلعت الجبنه وحميت الخبزات وندهت البنات الي گامن غسلن
واجن گعدن يتريگن سالتني روان // ابوي طلع
= اي كعدت ما لكيته
- - شنو ما ندهتي شعجب
= على شنو اندهه
- - شبيج مها اول مره اشوفج هيج تحچيين
هزيت راسي وحچييت بعصبيه = يعني اگله الطبيب گال ضروري المفراس هو يرد عليه ما بيها شي ويروح
يطلع يسكر ويرجع معقوله هذا ابوي
روان هزت ايدها // ليش هوه جديد عليج ما تعرفينه
= اي اعرفه بعد ما يفيد الحچي ياالله خلي اروح ابدل حتى اخذ ملاك
- - اوكفي اروح وياج
= ورهف
- - بكيفها تريد تبقى
= شنو اخليها ابحدها (باوعت الرهف ) رهوف ترحين مو
- اي
روان // شعجب ومدرستج
- - محضره كل دروسي يعني اجي ابدل
روان بخبث // زين واذا اتاخرنه مو تبقيين تبچيين تره اسحلج
- - انچبي شنو اتسحليني
اجت يمها كمشتها من ثوبها //المن هاي الانچبي
- - الج تره انتي ثاني متوسط وانا اول وان شاالله الحگج
- - ها واذا لحگتيني تتجاسرين عليه
جاوبتهن بتوعد = ابقن ابقن اتعاركن وانا راح اخذ ملاك واروح
روان // اوكفي جايه ( اندارت على رهف ) ياالله بدلي بسرعه وحسابج بعدين
راحت روان بدلت هيه ورهف طلعن اتعجبت من لبس روان لابسه جينز ضيك سالتها = منيلج هذا
- - شلقصه نسيتي هذا الي جابه معين
= يمته
- - من اتزوج
= معين جاب فساتين
هزت راسها // اي وهم جابلي هذا ويا
جاوبتها = بس انا ما اطلع وياج وانتي هيج لابسه
- - شنو شلابسه انا قابل لابس مصلخه
= شويه عن المصلخه اهنا منطقه شعبيه يباوعون على البنيه شلابسه يعني يصنفونها من خلال لبسها
روان // ما يهمني
= احنه ايهمنا لان بفضل امج وابوج كل شي ما بقى عدنا بس شوية هالكرامه
ردت عليه باستهزاء // زين حجيه مها راح البس كاب فوگه
انتظرتهن رهف طلعت لابسه ملابس المدرسه سالتها = شنو هاي
- - اذا ارجع راسا اخذ جنطتي واداوم
روان ضربتها ضربه خفيفه على راسها //ما تكليلي شراح تطلعين رائدة فضاء لو عالمه نوويه
- - اي اطلع ولو اريد اطلع ذني كلهن
انا ابتسمت وفتحت الباب وروان اتكلي = سمعتي مها بعد رهف ابمكاني تدرس وتنجح وتاخذ شهادتي وشهادتها
طلعنا نمشي وانا اشوف سيارة جيرانه الشرطي وهوه نزل وبقى يباوع باشمئزاز النه روان كالت
- - اگلج شنو هذا ماخذين ورث امه وهالشكل ايباوع
= ما علينه بي
- - بس يكولون مرته فد حبابه
= منو كلج
- - سمعت ايكولون هيه معلمه بس محد ايزورهم ولا احد يجيهم
رهف //بعد منا وغادي اكل الابوي يخليج مختار المنطقه لان كل شي تعرفين
روان // هههه ما تضحك
وصلنا للمستشفى چان كلش ازدحام ومجرد ما دخلنه اكثر الناس صارو ايباعولنه انا شايله ملاك وروان راحت
اتكص باص اخذته ورحت بعد ان سالت على مكان المفراس وصلت لگيت نفس الازدحام وصلت يم الموظف
شاف الورقه كلي // تجيين بعد عشر تيام
= بس عمو البنيه حالتها صعبه ولازمها مفراس
رد عليه // اي كل ذوله حالتهم صعبه روحي على حسابج اذا مستعجله
رجعت وانا مقهوره احس نار تطلع من عيوني وانا احجي ويه نفسي
= عادي هيه اجت عليك حتى ترحم حالنه الي منه وبينه ما رحمنا
شافتني روان وكفت وانا اشوف اثنين شباب واگفين ويباعولها ويبتسمون وهيه تباوع الهم صفح سالتني // ها بشري
هزيت راسي = ما قبل ايكلي اذا مستعجله اخذيها على حسابج (اشرت براسي الرهف ) ياالله خلي نرجع
روان اخذت الورقه وگالت // انتظريني اهنا
= وين رايحه ما يقبلون
هيه ردت بصوت مسموع // - - خلي اروح احچي ويا واذا ما قبل اروح المدير المستشفى شنو ما عدهم شي اسمه حاله طارئه
= انتي شتحچيين هم ايكلولج ذوله حاجزين وحالاتهم حرجه
— خلي اروح احچي وياهم اوگفي اهنا
اخذت الورقه وراحت حتى ما خلتني اجي وياها
كعدنا انا ورهف انباوع الها شلون تمشي بثقه وكابها مفتوح بقت تقريبا ثلث ساعه بعدين اجت كالت
- - ياالله جيبيها
= شنو قبل
- - اي ياالله بسرعه
1
شلت ملاك ورحنا انا ورهف وهيه گدامنا وصلنه شافني نفس الموظف گلي //تعالي
دخلنه انا وهيه الغرفه الموظف حچى وياي گلي //نيميها
مجرد ما خليتها ع الجهاز ملاك طفرت اتخبلت صارت تبجي الموظف صاح على ولد //خالد تعال شويه
اجه خالد شرحله // هاي شنسويلها
- انشدها
- ياالله
نيموها وهيه لازمه ايدي وشدوها برجليها وباديها بشي يشبه الحزام وگلي الولد هاج البسي هاي الصدريه وابقي يمها
هيه صارت تبچي وتستعطفني وتكلي //ماما ماما
وانا ما اتحملت بجيت ورديت عليها = يمج حبيبتي هاي انا لا تخافيين
طلعو وبقيت بس انا يمها
تقريبا عشر دقايق او اكثر مرن عبالك سنه من كمل الجهاز اجه الولد وخر من عدها الاحزمه وگلي
- - انزعي الصدريه
نزعتها وشلت ملاك الي چانت خايفه بوستها وانا اكلها = خلص حبيبتي ما صار شي لا تخافيين
الموظف كلي //انتظري على ما تطلع الصوره
اخذت ملاك واجت روان كلتلي
- - روحي اشتريلها عصير وانا اجيب الصوره من تكمل
اخذتها هيه ورهف ورحنا اكو كفتريا بره المستشفى اشتريت الها عصير ابو الربع وجبس ونزلتها صارت تاكل
وتشرب بالعصير وكلت الرهف اشتريلج هيه شاورتني// اشتهييت اللفات اريد وحده اخذها للمدرسه
ابتسمت على فطاريتها واشتريت الها لفه وعصير وبقينه منتظرات روان تقريبا ساعه او اكثر اجت وجايبه
صورة المفراس وياها //هاي كملو وجبته
فرحت من شفت الصوره = عفيه عليج
- - اگلج اشتريتلها
= اي عصير وجبس
- - ها وهاي شنو الي عد ام بطن
= لفه تاخذها وياها للمدرسه ياالله خلي نرجع
راحت روان اشترت عصائر تلاثه انطتني واحد وهي اخذت واحد او واحد الرهف سالتها منيلج فلوس
ضحكت وكالت //سامعه المثل الي يگول الكعكه اب ايد الفقير عجبه
= هسه انا سالتج
- - ضميتهن من الارباع الي ساعات ابوج ايحن وينطينه
= ها
هزت راسها // - - اي لان عيب اشتري بربع گدام الطالبات خلي نروح
= اي اشربي العصير ونروح
- - امشي واشربه هوه عصير
= بالشارع روان ؟
- - تره باكيت عصير ابو الربع مو بطل عرك
سكتت شربت العصير وشلت ملاك هيه كالت //نزليها خلي تمشي
= ما تقبل
- - جيبيها اشيلها عنج طاحن اديج
رجعنا ورهف داومت والظهر اجه ابوي انا گليت طماطه وسالني گتله
= اخذناها للمستشفى والعصر ارجعها ع الدكتور
هز راسه // اي وهم خلي ام غسان تروح وياج لان انا عندي شغل
روان // انا اروح وياها شنو ام غسان عيب يوميه مزاحمين المره
ابوي // اي روحي وياها
اتمدد حتى ما فكر برهف وين تبقى من ترجع من المدرسه نام شويه وبعدها اجا اتصال فز غسل وجهه وطلع
احنه لان عدنا بس مراجعه فقررت انتظر رهف واخذها وياي واجت رهف غسلت بسرعه وبدلت وطلعنه تلاثتنا
رحنا للطبيب الي اتعجب وكلي شلون سوولكم المفراس
باوعت الروان الي حاجته بثقه وهيه تباوع لعيونه // دكتور عرفو بينه ما نكدر انوديها على حسابنا وحالتها تعبانه
ودخلونه الرحمه ما انقطعت من كلوب الناس
الدكتور استعدل وحمحم // اي الله يكثر من امثالهم
روان //ومن امثالك
سالته = دكتور شبيها ملاك
اخذ صورة الاشعه وعلكها بالمكان المخصص الها بعدين رجع گعد وباوعلي // هيه كلامها عادي
= شلون يعني
الدكتور // - - يعني تحچي مثلكم
= هيه بالبدايه جانت تحجي كلمات وفكرنا السانها ثگييل لكن صار مده تصرفاتها جدا هادىه
- - تكعد ع التلفزيون
= اي دكتورراكثر شي على طيور الجنه وكراميش
- - زين خلي اسالج تتصورين هيه تسمع
ردينا انا وروان //اي دكتور تسمع
- - شلون عرفتوها تسمع
= يعني من ندور التلفزيون تصير تبجي واله نرجعه الها تسكت
- - بس هذا تاكيد هيه تشوف مو تسمع
روان // دكتور تسمع وهسه ابرهن الك
صارت روان تغني باغنية طيور الجنه وملاك صارت تباوع الها وتضحك
الدكتور كللها //صوتج حلو
هيه ردت علي // شكرا من ذوقك
انا بقيت صافنه على روان وشلون ماخذه راحتها ويه الكل يعني احس بيها ما تستحي
الدكتور سال //اذتكم اقصد خافت بالمفراس
= اي دكتور ولزمت ايدي وهيه اتگلي ماما بحيث خلوني يمها ونيموها وربطوها
- - انتي مربيتها
روان // اي دكتور هيه مربيتنا كلنه
الدكتور وهو يبتسم //حتى انتي
هيه ردت بابتسامه // حتى انا
باوعلي وكلي الصدمه الي خلتني وين ما اطلع والاي مكان ابقى افكر بملاك
الدكتور // شوفي اختج ما بيها مرض وهذا الصار قبل يومين نتيجة الصخونه لكن اختج عدها توحد
//////////////////////////////يتبع
الحادي والعشرين من هنا
