رواية أسفة انا لا ارفض الطلاق الفصل الثامن عشر 18 بقلم يسرا مسعد
الحلقه الثامن عشر
انهو محمد وساره شرب العصير وكلم محمد الميكانيكى وجده بالفعل انتهى من تصليح سياره ساره
ساره: ايه الميكانيكى خلصها بجد؟
محمد: ااه شوفتى ف ساعه زمن مش اسبوعين
ساره: طب الحمد لله يلا بينا
ركبو السياره وفى طريق خروجهم رأى محمد ادهم واميره راكبين سياره امامهم ببضعه امتار فتعجب اذا كان ادهم كان مستعجل جدا للمغادره فما الذى ابقاه كل هذا الوقت ام ان حرصه على ابعاده من طريق اميره قد وصل الى هذا المدى
ووصل محمد الى المكانيكى واستلمت ساره سيارتها وشكرت محمد بشده على وقوفه بجانبها
ساره وفى عينيها سرور كطفله صغيره: بجد بتبقى لذيذ وانت طيب كده ياريت تخليك كده وتبطل غلاسه شويه عليا
محمد وهو ينظر لساره بحنان بالغ: لذيذ وطيب ده ايه الرضا السامى ده
يرن موبايل ساره مقاطعا حديثهما
ساره:دى اكيد ماما
محمد: طيب طمنيها
ساره: الو ياماما انا الحمد لله ياحبيبتى كويسه ماتقلقيش عليا ربع ساعه واكون عندك ان شاء الله سلام
محمد: اايه هيا مش عند سلمى
ساره: لاء سالى عند سلمى النهارده
محمد : ااه بدلت الشيفت سالى
ساره: ااه عشان تقدر تيجى عيد الميلاد يوم الجمعه فتروح لحماتها بكره الخميس بدال الجمعه
محمد: طيب هتروحى انتى دلوقتى
ساره: ااه انا اتاخرت جدا
محمد: طب اركبى وانا هامشى وراكى عشان لو حصل اى حاجه
ساره: هيحصل ايه بلاش قلق تفاءلو ولا تشائمو
محمد: اركبى وبلاش كتر كلام الاحتياط واجب
ساره: اوك
مشى محمد وراء ساره حتى باب البيت واطمن ان عربيتها ماشيه كويس
ورجع الى الشركه وتوجه الى مكتب اخوه الكبير احمد
دخل محمد مكتب اخوه ليجده يكلم خالد ابن عمه ويعزمه على عيد ميلاد اولاده يوم الجمعه
احمد:خلاص اتفقنا وانت طبعا فاكر البيت مش كده
خالد:طبعا يابنى اطمن لسه ابن عمك ماعجزش وجاله زهايمر
احمد: يعنى ماليكش حجه يا حاج
خالد: واتحجج ليه دا انا نفسى اشوفهم جدا ماشاء الله ربنا يفرحك بيهم يا احمد
احمد: ويفرحك بولادك وانا هخلى ماما تكلم طنط سميه تعزمها
خالد: مالوش لزوم ماما دلوقت ماعدتش بتخرج زى الاول
احمد: ماليكش انت دعوه اطلع منها امهاتنا يتصرفوا مع بعضهم
يلا سلام واوعى ماتجيبش الولاد معاك
خالد: لاء اكيد هجبهم ان شاء الله مع السلامه
انهى احمد مكالمته ليلتفت ليجد محمد ينظر له بامعان شديد
احمد: ايه مالك؟
محمد: اصلى سامعك بتعزم خالد ف حين انى قابلت ادهم واميره النهارده وقالو انهم رايحين يزوروه يوم الجمعه
عشان كده مش هينفع يجوا عيد ميلاد ولادك
احمد:اميره رجعت؟
محمد: ايوه رجعت
احمد: ماحدش قال يعنى
محمد: ما انت عارف ادهم بيتعامل مع كل حاجه تخص اميره كانها سر من اسرار الدوله حتى نمره تليفونها ف فرنسا رافض يعرفهولنا
نظر احمد باشفاق لمحمد متذكرا تعنت ادهم الواضح مع اخوه عندما يتعلق الوضع باميره مما جعل العلاقات بينهم متوتره للغايه بعد ان كان محمد ينظر الى ادهم دوما كمثله الاعلى ف كل شىء
احمد محاولا تغيير الموضوع: يمكن اتفقو فعلا لكن ماقالوش لخالد انهم رايحين يزوروه
انا هعمل اللى عليا واعزم كل واحد رسمى ف التليفون اللى عايز يجى اهلا وسهلا اللى مش هيقدر براحته لكن الاصول اصول
محمد: اعمل اللى يريحك
انا جبت الحاجات اللى كنت طلبتها منى عاوز حاجه قبل ما امشى
احمد: مانحرمش منك يا اخويا خد بالك من سكتك وانا شويه ونازل
محمد: طيب سلامو عليكم
احمد: وعليكم السلام ورحمه الله وبركاته
يتصل بعدها بادهم ليجد موبايله مغلق فيقرر اعاده المحاوله ف المساء
