رواية ارواح هائمة الفصل السادس عشر 16 بقلم آثر توفيق
الحلقة 16
انصرف ثائر وبقيت مها تواسى الفتيات
مها :: اهدوا شويه يا بنات خلونا نفكر بالعقل
باسنت :: عقل ايه هو فيه عقل فى الدنيا يقول ان الشيخ عبد الحليم العطار امام الجامع الراجل التقى يبقى عضو فى تنظيم سرى ؟ ده مستحيل احنا كلنا اتربينا على ايده واتعلمنا منه الصلاه والدين
امال :: ده راجل طيب وصالح ومستحيل يكون كده ابدا
مها :: هو بابا نرمين وداليا اسمه الشيخ عبد الحليم العطار ؟ يا نهار اسود
امال :: انتى تعرفيه ؟
مها :: سمعت اسمه امبارح بس لكن انا واثقه مليون فى المية ان الموضوع ده متلفق والقضيه دى مالهاش اساس
امال :: طبعا ده بابا ما بيصليش غير وراه وانا باروح عندهم البيت وما شفتش حد فى الدنيا فى طيبته
باسنت :: انا بقى اعرفه من اولى اعدادى ومن ساعتها وانا حسيت انى مش يتيمه وان ليا اب يخاف عليا زى كل البنات ده لما بيكون عندى مشكله فى المدرسة او الجامعة هو اللى بيروح ويحلها
مها :: ما تزعلوش يا بنات الموضوع حيخلص وحيرجع ان شاء الله وكل حاجه حتتصلح
___________________
نجح اخيرا فى اعادة الحرارة الى الهاتف وعاد الى الشقة اتصل بايمن فاخبرته من اجابت الاتصال انه سيعود فى التاسعة احس بالجوع فوضع بعض الطعام لنفسه ولكنه وضع فى فمه لقمة واحدة مضغها بصعوبة واحس بطعم مر فى حلقه فازاح الطعام جانبا ورن جرس الهاتف فاجاب
مها :: ثائر انت وصلت ؟
ثائر :: بقالى ساعه بافكر فى اللى فات واحاول اتوقع اللى جاى
مها :: وناوى تعمل ايه ؟
ثائر :: العمل عمل ربنا حاسلم وارفع ايدى لو كان عليا انا مش مهم لكن كل اللى حواليا بيتدمروا كتير مش قادر اتحمل
مها :: حاقول لك على حاجه انت اكيد توقعتها انت عرفت مين الشيخ عبد الحليم العطار ؟
ثائر :: اكيد ابو نرمين طبعا
مها :: هو ابو داليا وعم نرمين
ثائر :: عرفتى ليه انا حاولت ابعدها عنى واخليها تكرهنى ؟ لكن مافيش فايده
مها :: لكن هم عرفوا منين بحكاية نرمين ؟
ثائر :: سؤال غريب يا بنتى دول جابولى حاجات من ايام ثانوى
مها :: تفتكر لو الامور اتصلحت ممكن نرمين تسامحك انت عارف لو كنت صريح معاها كانت رفضت انك تسلم انت عارف ابوها مين ؟ محمود العطار محمود عبد الرازق العطار الاسم ده بيفكرك بحاجه ؟
ثائر :: هو الاسم مش غريب عليا لكن انا مش مركز خالص
مها :: اسد الصحراء كتاب رجال حول العلم بتاع شيرين صالح بطل حرب اكتوبر الشهيد . ابو نرمين شهيد من يوم ما اتولدت وبنت الايه كانت بتهدد العيال بابوها ظابط الجيش اللى يعاكسها تقول له بابا حييجى يهد الكليه على دماغك تفتكر واحده زى دى ممكن تسلم ؟ او تقبل انك تسلم ؟
ضحك لاول مرة منذ عدة ايام وشرد بخياله اليها
ثائر :: يا بنت اللعيبه كان عندى حق احبها
__________________
كان يحترق يدخن بشراهة غير طبيعية ينظر الى الساعة ويعد لنفسه اكواب القهوة الواحد بعد الاخر
نظر للساعة فوجدها التاسعة الا الربع فاطفا سيجارته فى المنفضة الممتلئة عن اخرها وقام ليفرغها للمرة الرابعة ويعد لنفسه كوب القهوة العاشر منذ عاد قبل العصر ثم عاود الجلوس امام الهاتف واشعل سيجارة اخرى
دقت التاسعة تماما دقت الساعة المعلقة فتوقفت معها دقات قلبه واحس بعرق بارد ينساب على جبينه كصنبور من المياة وشعر ان روحه تنسلخ من جسده جذب من سيجارته نفسا عميقا احس به كأنه خنجر حاد يخترق رئتيه وشرب جرعة اخرى من كوب القهوة الكبير امامه ورفع سماعة الهاتف ليطلب الرقم ويرفع رايته البيضاء
ثائر : ايمن بيه رشدى موجود من فضلك ؟
اجابه صوت انثوى امه او اخته لا يهم
المجيب :: مين عاوزه ؟
ثائر :: ثائر النشار
ثوانى قليلة واتاه صوته عبر الهاتف
ايمن :: خير يا ثائر انا ايمن عاوزنى فى حاجه ؟
ثائر :: انا باسلم حاخرس مش حانطق تانى
ضحكة استهجان لا تخلو من شماتة اتته عبر الهاتف
ايمن :: بدليل المقاله الاخيره اللى لزقتها على الترام والقطر والاتوبيس وكل حته
ثائر :: اعتبروها مقالة وداع وخلاص مافيش كتابه ولا مقالات ولا حتى كلام فى تجمعات بعد كده
ايمن :: يعنى بتعترف انك انت كفيف اللى بيكتب المقالات دى ؟
ثائر :: كفيف مات ومش حيكتب تانى كفيف ساكت الاطرش مات
ايمن :: والمطلوب ؟
ثائر :: كل الفوضى اللى اتعملت دى تتلم
ايمن :: حدد طلباتك بالتحديد
ثائر :: هاله لازم تطلع من المشكله اللى هى فيها حرام عليكم يعنى مش للدرجه دى والشيخ عبد الحليم لازم يخلص من مشكلته خالص وتبعدوا عنه وطبعا انتوا عارفين انه برئ ورحاب تجددوا لها الاقامه خلوها تكمل دراستها
ايمن :: بس كده هاله بكره حترجع بيتها ونقول لها احنا اسفين يا انسه التحريات جت غلط ولعلمك طول ما هى عندنا كانت معززه مكرمه ولما راحت القسم برضه باحترام اسالها دى حتى ما دخلتش زنزانه ولا حد مد ايده عليها اما الشيخ عبد الحليم ده بلاغ كيدى والراجل كلها يومين بس يكشفوا عليه ويسيبوه انا ممكن اروحهم دلوقت حالا انما علشان تبقى رسمى شويه بالنسبه لرحاب بقى دى هربانه بجد انا ما اعرفش طريقها لو تعرف طريقها قول لها تروح تجدد الاقامه الصبح ماحدش حيقرب لها عاوز حاجه تانى ؟
ثائر :: رخصة المصنع
ايمن :: الا دى . البطن لما بتشبع اللسان بينطق ده انت يا راجل اللى بتقول وتحكى وتتكلم عن المعتقل الكبير اللى اسمه لقمة العيش عاوزنا نسيبك تاكل عيش علشان ترجع تتكلم وتقول ؟ لالالا انسى
ثائر :: انا خرجت من المصنع لكن احمد مالوش ذنب المصنع ده انا بنيته على كتفى بعرقى ودمى ولو اتقفل ما اضمنش ممكن اعمل ايه سيبوا المصنع لاحمد وانا مش حارجع بس حافرح لما المصنع ينجح وانا بعيد
ايمن :: هو احمد مش حلف انه مش حيشرب حشيش تانى؟
ثائر :: وانتوا عاوزين الناس كلها تشرب حشيش ؟ عاوزين الكل مغيب
سكت ايمن قليلا قبل ان يقول ببطء
ايمن :: طيب ماشى المصنع حيشتغل بس انت بره ولو شاركته فى السر ....
ثائر :: مش حيحصل
ايمن :: وانا مصدقك امتى بقى حنقرا مقالك اللى بتعلن فيه انك كنت غلطان ؟
ضحك ثائر بقوة هزت سماعة الهاتف فى يد ايمن وقال ساخرا
ثائر :: انا حاقطع ايدى واكسر صوابعى قبل ما اكتب كلمه واحده من الكلام ده واقطع لسانى وافرمه فى خلاط قبل ما ينطق كلمه من اللى انتوا عاوزينه انا كل اللى حاعمله انى ابطل كلام خالص
ايمن :: يابنى انت ما سمعتش عن قانون الطوارئ احنا ممكن نلقحك فى اى مصيبه لحد ما تعفن وما حدش يحس بيك لكن حتفضل الناس فاكره الكلام اللى انت كتبته من غير المقال ده يبقى كل اللى بنعمله مالوش لازمه كنا حبسناك واللا خلصنا عليك بطلقه بشلن
ثائر :: اه طبعا تقدروا بس ساعتها حابقى فى عيون الناس بطل واللى مش مصدقنى دلوقت حيصدق مش كده واللا ايه ؟ انسى موضوع الاعتذار ده خالص
ايمن :: كده نبقى مختلفين وانسى كل اللى وعدتك بيه
ثائر :: خلاص ماشى بس لعلمك لسه فيه حاجات كتير جدا ما قلتهاش لسه اللعب فى الخصخصه مثلا
قال ايمن بلهجة ملؤها الوعيد والتهديد
ايمن :: بيتهيالى التحريات ممكن تطلع غلط فى قضية هاله وتضم اختك للقضيه احنا لحد دلوقت ما قربناش من اهلك
ثائر :: والبلاغات الكيديه كمان ممكن تضم ابويا للتنظيم بتاع الشيخ العطار وما تنساش مها هى كمان من اصحابى اعملوا اللى انتوا عاوزينه بس انا لسه ما كملتش اصلى عندى معلومات عن قضية نواب القروض ومشروع توشكى وبيعة الحديد والصلب وعقود مناجم الفوسفات واشاعة بنزينة الابراهيميه و ....
ايمن :: بس ... كفايه اسمع المصنع حيشتغل وهاله حتخرج والشيخ العطار كمان ورحاب حتجدد الاقامه بس لو لسانك نطق بكلمه انت حر
ثائر :: ايوه كده لعلمك لو ما حصلش وما بعدتوش عن اللى حواليا المره دى انا لزقت المقال فى اسكندريه المره الجايه حيلف كل محافظات مصر وكل مدينه وكل قريه حابقى عفريت الليل اللى يمص دم الحكومه بالليل حابقى على الزيبق وصدقونى مش حتعرفوا تخلصوا منى بطلقه لانكم ساعتها مش حتعرفوا تلاقونى . يا ايمن باشا الجنى دخل القمقم بمزاجه بلاش انتوا تطلعوه
ايمن :: يظهر انك اخطر بكتير من اللى كنا متصورينه بس كل ده محتاج قوه وفلوس فيه حد بيسندك ؟
ثائر :: انا لوحدى واللى ساندنى ربنا وعلى الفلوس معايا فلوس اعيش عشر سنين
ايمن :: ماشى يا عم الجنى ليك طلبات تانى ؟
ثائر :: طالما مافيش مقال اعتذار واللا مش عارف اسميه ايه يبقى مافيش داعى تحجز عندك هاله والشيخ العطار انا فاهم انك حاجزهم علشان كده
ايمن :: ساعه وتلاقيهم فى بيوتهم فيه حاجه تانى ؟
ثائر :: لا انا حاسكت وده اخر ما عندى كفايه ان فيه خساير عندى مش حاقدر اعوضها ابدا
ايمن :: انا بقى حاديلك هديه تعوض خسايرك يومين وتعتر فى عبد الحميد وتاخد حقك منه بمعرفتك
ثائر :: حتى ده انتوا اللى وراه ؟
ايمن :: علشان تعرف اننا نقدر نعمل حاجات كتير وتفكر مليون مره قبل ما كفيف يرجع للحياه تانى
ثائر :: كفيف خلاص مات واتدفن
ووضع السماعة وهو يقول ناظرا للهاتف
ثائر :: لكن فيه مليون كفيف ومليون ساكت ومليون اطرش والصبر طيب
#أرواح_هائمة
كان قلقا يروح ويجئ فى الشقة بلا هدف يدخل غرفه النوم ويخرج للصالة ثم الى البلكون فالحمام ولا يستقر بمكان شرب كثيرا من القهوة ودخن الكثير والكثير من السجائر طلب منزل شريف فلم يرد احد حاول كثيرا بلا فائدة نسى انهم مسافرون فكر فى طلب مها ولكن تذكر ما فعله اباها فى المرة الماضية يريد ان يطمئن وهو لا يستطيع الاتصال بامال واخيها مسافر وايضا هالة لا تملك هاتفا
نزل متجها الى حيث تسكن هالة وجلس على مقهى على اول الشارع طلب قهوة فاخرى وهو لا يدرى هل عادت وهى فى الداخل ام انها لم تعد بعد او ربما لا تعود ابدا
قرب الحادية عشرة توقفت سيارة سوداء زجاجها معتم قريبا من المقهى ونزلت هالة منها حمدا لله لقد صدقوا هذه المرة
سارت نحو المنزل ترتعد ومرت السيارة بجوارها ببطء ونزل الزجاج واشارت لها يد من الداخل فاقتربت بخوف سمع صوتا من داخل السيارة يقول
الصوت :: اسمعى مش حانبه عليكى تانى ولا كلمه مفهوم ؟
هالة :: حاضر
كانت ترتعد خوفا وانصرفت السيارة وهرولت الى بيتها ورآها بعض الجيران واوقفها احدهم كان رجلا كبيرا فى نحو الخمسين حدثها برفق فنظرت فى الارض صامتة حايلها فلم ترد بدا الغضب يبدو على وجهه واستمرت على صمتها تتساقط دموعها فى صمت ويرتجف جسدها ولا ترد وفى النهاية ضرب كفا بكف قائلا بنفاذ صبر
الجار :: لا حول ولا قوة الا بالله روحى يا بنتى الله يصلح حالك الله يرحمك يا عبد الظاهر
اسرعت بالابتعاد ودخلت الى بيتها هل يذهب اليها ؟ كلا طبعا هل ينقصها هذا لكى تفتضح اكثر ؟ لقد تاخر الوقت كثيرا جدا ولكن المهم انها عادت . جريحة نعم ولكنها عادت وستعيش وستشفى جراحها كل الجراح تندمل فى النهاية
كلا ليس كلها هناك جراح لا تندمل ولا تموت
__________________
دخلت الى بيتها وهى ترتجف فوجدت امها فى الصالة تبكى لم تنقطع دموعها منذ غياب هالة والان تجدها امامها فجاة وقفت الام ولم تقترب ايا منهما من الاخرى ولدقيقة لم تنطق ايهما نظرت لابنتها بدهشة وشوق وعتاب لا تجرؤ على احتضانها ولا تجرؤ على اتهامها واخيرا نطقت هالة
هالة :: انا ما عملتش حاجه
ام هالة :: ايه اللى عملتيه ده هانت عليكى امك هانوا عليكى اخواتك ؟ فضحتينا
هالة :: انا ما عملتش حاجه
ام هالة :: ليه احنا قصرنا معاكى فى حاجه ؟ ابوكى الله يرحمه عمره ما حرمك من حاجه انتى الكبيره العاقله اللى كان بيقول لو ما عنديش غيرها كفايه عليا معقول بنتى انا تعمل كده ؟ ليه هو انا قصرت فى تربيتك ؟
هالة :: انا ما عملتش حاجه
ام هالة :: احنا اتفضحنا نورى وشنا للناس ازاى ؟ انتى ناسيه ان عندك اختين بنات انتى تفرطى فى شرفك ؟ لو كنت قادره كنت قتلتك لكن مش قادره ولا فيه لا خال ولا عم يربيكى ويدارى فضيحتك
هالة :: انا ما عملتش حاجه
ام هالة :: راجعه ليه روحى مطرح ما كنتى خلينا نقول للناس هاله ماتت علشان ما نتفضحش اكتر من كده هم سابوكى ليه خسارة تعبى فى تربيتك
هالة :: انا ما عملتش حاجه ما عملتش حاجه ما عملتش حاجه
ثم سقطت ارضا فاقدة الوعى
___________________
كان الحزن يخيم على بيت الشيخ عبد الحليم العطار وكانوا جميعا فى غرفة ثريا التى ترقد فى فراشها تبكى بلا انقطاع وبجوارها كوثر وشيرين والبنات كلهم يبكون بقهر اما هى فكانت تنوح حتى تفقد وعيها ثم تفيق لتنوح من جديد
ثريا :: يا حليم . انت فين يا حليم ؟ سبتنى لوحدى ليه يا حليم ؟ يا حليييييم احنا مالناش غيرك احنا والبنات يا حليم
كوثر :: حيرجع يا ثريا ربنا حيظهر براءته ويرجع ان شاء الله
ثريا :: يارب خدوه مننا واحنا مالناش غيره سايبنا ولايا مالناش راجل
كوثر :: كفايه يا ثريا ما تعمليش فى نفسك كده
شيرين :: الصبر يا ثريا ده امر الله ان شاء الله حيرجع وانا باكلم ناس فى القاهره ومش حاسكت انشالله اوصلها لرياسة الجمهورية
ثريا :: كلموا اللى تكلموه المهم يرجع هم اخدوه ليه ؟ ده عمره ما اتكلم فى السياسه
دق جرس الباب فذهبت امال لتفتح وعادت بعد قليل تقول
امال :: ده بابا يا ماما كوثر
كوثر :: اتفضل يا استاذ فؤاد
طرق فؤاد باب الغرفة ووقف على بابها دون ان يدخل
فؤاد :: السلام عليكم ازيكم يا جماعه عاملين ايه انا رحت النهارده القسم والمديريه قبل المكتب لكن ماحدش ادانى عقاد نافع ماحدش راضى يتكلم ولا يقول ايه موقف الشيخ عبد الحليم فى التحقيق قولولى هم جم فتشوا هنا ؟
كوثر :: ابدا يا استاذ فؤاد ما حدش جه ولا حد فتش وحتى لو حد فتش هنا الشيخ حليم عمره ما كان له فى السياسه
فؤاد :: انا عارف كويس يا جماعه ده عشرة عمر باعتبره اخ وصديق واعرفه اكتر من نفسى
شيرين :: تاعبينك معانا يا استاذ فؤاد بس انت صديق مش محامى واحنا متعشمين فيك
فؤاد :: وعشمكم فى محله يا مدام شيرين انا باذن الله بكره مسافر القاهره وزعت القضايا اللى عندى حانزل اروح وزارة الداخليه ووزارة العدل مش حارجع الا ومعايا اخبار
كوثر :: كتر خيرك يا استاذ فؤاد
فؤاد :: انا اسف طبعا انى جيت متاخر لكن للضرورة احكام استاذن انا
اتجه للباب وتبعته امال ونرمين فقال مشجعا
فؤاد :: شدى حيلك يا نرمين يا بنتى ان شاء الله بابا حليم قريب حيكون فى وسطكم يمكن نفتح الباب نلاقيه فى وشنا
نرمين :: يارب يا عمو من بقك لباب السما
فؤاد :: امال خليكى مع اخواتك علشان تتطمنى على بابا حليم
امال :: حاضر يا بابا متشكره قوى
فتح فؤاد الباب ليجد امامه الشيخ حليم يستعد لدق الجرس وخلفه حسين السوهاجى
حليم :: استاذ فؤاد ابن حلال والله كنت واثق انك مش حتسيب الجماعه لوحدهم كتر خيرك
فؤاد :: حمد الله على السلامة يا مولانا
تعانق الرجلان ودخل حليم ليجد نرمين وامال التان تعلقتا فى عنقه وهما تبكيان فاحتضنهما قائلا
حليم :: جرى ايه يا بنات امسكوا نفسكم اومال انا خلاص جيت اهه ولسه سليم مالكم جرى ايه بس يا حبايبى فين ماما ثريا وداليا يا نرمين
نظر الى باب غرفة نومه ليجد ثريا تستند على اطار الباب والباقيات خلفها وهى تبكى وتهتف باعياء
ثريا :: حليم حبيبى
وقبل ان تسقط ارضا كان قد اسرع يحتضنها بين ذراعيه
_________________
كانت الساعة قد تجاوزت الواحدة حين دق ثائر باب منزله وفتح اباه فوقف امامه يغالب دموعه واخيرا نطق
ثائر :: انا خلاص يا بابا كل حاجه خلاص راحت انا انتهيت
فتح الاب ذراعيه ليحتضن ابنه الاكبر واغلق الباب قائلا
توفيق :: ادخل اوضتك استريح والصباح رباح
ثائر :: عاوز اتكلم معاك عاوز حد اتكلم معاه حاتجنن
توفيق :: طيب ادخل اوضة الصالون وانا احصلك
دخل ليوقظ زوجته وطلب منها اعداد الطعام وعاد اليه
توفيق :: قوللى بقى يا بطل ايه اللى راح انا شايف رجليك الاتنين موجودين وايديك الاتنين موجودين وجايلى ماشى على رجليك عينيك الاتنين سلام وجسمك كله سليم يبقى ايه اللى راح ؟
ثائر :: احلامى كل احلامى راحت المصنع والكليه وحاجات كانت لسه احلام بافكر فيها راحت فى بدايتها
توفيق :: طيب وماله احلم تانى وحاول تحقق الاحلام الجديده يمكن القديمه مالكش نصيب فيها ده كله بتاع ربنا انما تقول انك انتهيت لا .
ثائر :: انت ما تعرفش عملوا ايه علشان يخلونى اسلم
توفيق :: وبعد ما سلمت ايه اللى حصل هو انت خسرت جوله واللا الحرب ؟ يابنى انت غلطان كان لازم تقدر قوة خصمك قبل ما تحارب انا قلتلك الزمن ده غير زمنى يعنى الكلمه تمنها غالى انما ما قلتش انك تعيش جبان مهزوم
ثائر :: علمنى فهمنى قوللى اعمل ايه
توفيق :: حاول تنهى دراستك وارجع اقف على رجليك من اول وجديد واثبت للكل انك راجل ارادتك حديد وعزمك شديد انت تقدر تعمل حاجات كتير قوى انت ابنى وانا فخور بيك انما لو قلت انك انتهيت مش حتبقى ابنى اللى انا اعرفه يابنى مش عيب لما توطى للريح علشان ما تنكسرش انما بعد ما العاصفه تعدى تقدر تفرد طولك تانى انما لو وقفت فى وش الريح حتنكسر وبعد ما العاصفه تعدى مش حتقدر تقف تانى انت اقوى من انك تنكسر واقوى مليون مره من انك تستسلم للياس وتنسى كل احلامك . ياللا قوم ادخل الحمام وخد لك دوش دافى واتعشى وادخل اوضتك ارتاح ومن بكره عاوزك انسان جديد اقوى من اللى كسروه
__________________
اعتذر ثائر عن المبيت عند ابيه وانصرف بعد العشاء ليصل اى شقته فجرا وحين خرج من المصعد سمع صوت الهاتف يدق بلا انقطاع فاسرع الى الداخل ورفع السماعة لياتيه صوت مها تصرخ باكية
مها :: الحقنى يا ثائر ماما بتموت
