رواية ارواح هائمة الفصل الثالث عشر 13 بقلم آثر توفيق
الحلقة 13
اجتهد الصديقان كثيرا فى محاولة اعادة المصنع الى سابق عهده دون جدوى لا زالت المصائب تتوالى عليهم دون ان يعرفوا من اين تاتيهم الضربات او من وراء كل ما يحدث لهم وان اصبح واضحا ان هناك ايادى خفية تعبث فى الظلام
كانوا يتلقون الضربة دون ان يفيقوا من السابقة وكلها تتوفر فيه صفة التعمد .
رفضت طلبيات كثيرة بعد اتمامها وبعضها بدون اسباب وحدثت تلفيات كثيرة فى الخامات والماكينات وسرقت كارتات الكومبيوتر وعثروا عليها مهشمة فى قلب بالوعة الصرف فى المنور ومع كل مرة كان احد العمال يهرب ولا يعثرون له على اثر حتى انفجر احمد من الضغوط
احمد :: انا خلاص ما بقاش عندى ثقه فى اى حد ازاى صنايعى احنا اللى معلمينه يطرم سلاح المقص ويهرب والتانى اللى سرق الكارتات ونلاقيها متكسره فى المجارى يا ريته اخدها باعها فيه ايه مين بيحاربنا اللهو الخفى ؟
ثائر :: انا ما بقيتش عارف ايه الحل مش فاهم اصلا ايه المشكله علشان الاقى حل خلاص حاتجنن
احمد :: الحل الوحيد اللى انا شايفه دلوقت نمشى كل دول ونرجع انا وانت زى الاول بدراعنا ده الحل المضمون مؤقتا
ثائر :: نمشى الكل ؟ طيب واحد زى وليد
احمد :: ولا اى حد خلاص مش واثق فى اى حد انت لسه عندك ثقه فى الناس ؟ كتير قوى من اللى اتعلموا على ايدينا باعونا وهم فين حتى نعرف منهم مين سلطهم ؟ اختفوا
ثائر :: طيب اهدى يا احمد واللى انت شايفه صح انا موافق
وتم تسريح الجميع حتى شقيق احمد رفض اخوه نفسه بقاؤه وحتى وليد الذى تربى بين احضانهم فى المصنع القديم
وليد :: انا عملت حاجه ؟ انا دخلت المصنع الاولانى وعندى ستاشر سنه ما اعرفش حاجه واول مره اشتغل وعمرى ما حسيت انى شغال عندكم طول عمرى حاسس انه مصنعى وانتوا اخواتى الكبار
ثائر :: معلش يا وليد فتره وتعدى
وليد :: طيب انا عملت ايه ؟ وطالما معلهش شنقوه ليه ؟ انت عمرك سمعت منى غير كلمة حاضر ؟ معلش برضه يا باشمهندس مش حاقول غير حاضر
واصبحا وحدهما حتى اصبحا يتساقطان التعب والاجهاد النفسى قبل البدنى وعادا الى العمل اثنتان وعشرين ساعة يوميا وراحة ساعتين مثل ايام البداية تماما ولكن الفرق انهما كانا فى البداية يحققان نجاحا باهره يزيل اثار اى تعب اما الان فلا يوجد تقدم ملموس فقط اختفت اعطال الماكينات ولكن جعبة الحاوى المجهول لازالت تحوى الكثير
امتنع الصديقان عن اعمال الدرجة الثانية تماما واكتفوا بهامش ربح ضئيل للمحافظة على فرص المنافسة ولكن اصبح التسويق مشكلة حقيقية وكيف الحل وهم لا يجدون وقتا للتنفس حتى
احمد :: احنا لازمنا شغل طلبيات باسعار معقوله نقدر نسدد ديوننا
ثائر :: طيب والحل اللى بيتعب فينا وعاوز يريح بييجى يقعد على مكنة الفيلم حنسوق ازاى
احمد :: لازم نشوف حل اه صحيح انت حتعمل ايه فى الكليه ؟ الدراسه خلاص كمان ايام
ثائر :: كليه ؟ تصدق كنت نسيت
احمد :: لا انت السنه دى رابعه لو تخلص حنرتاح احنا الاتنين
ثائر :: طيب باقول يا احمد ..... واللا بلاش
احمد :: لا انا موافق انا عارف انت عاوز تقول ايه انا مشيت وليد وانا زعلان عليه واحنا لازمنا واحد معانا علشان انت تقدر تشوف كليتك وتلف على المصانع فى البرج والعامريه
وذهبا الى وليد عند موعد عودته من العمل فوجداه ينزل من حافلة الشركة مرتديا بذلة وربطة عنق
وليد :: اخيرا هان عليكوا تسالوا عليا افتكرتونى
احمد :: معلش يا وليد احنا ما بنسيبش المصنع خالص
وليد :: انا رحت كذا مره بس باوصل عند الباب وارجع
ثائر :: انت عامل ايه فى الشغل شكلك فى شركه محترمه
وليد :: اه دى شركة استيراد وتصدير كويسه ومرتبها حلو انا شغال فى العلاقات العامه ده اليونيفورم
تبادلا النظرات قبل ان يقول ثائر
ثائر :: قوللى هو محمود ابن عمك شغال فين ؟
وليد :: شغال فى المينا ربنا يوفقه انا باشوفه يوم الجمعه
احمد :: طيب هو مرتاح فى شغله واللا يرجع معانا المصنع
وليد :: انتوا عاوزين حد فى المصنع ؟ انا اولى
ثائر :: انت شغال شغلانه محترمه واحنا لسه ظروفنا ...
وليد :: لو من غير فلوس خالص وحتى لو كنت مدير الشركه المصنع ده بيتى اللى اتربيت فيه ولو رجعتوا حد غيرى يبقى قطيعه بينى وبينكم ليوم الدين
وعاد وليد الى العمل اخذ يتحسس الماكينات بعشق ويقبل كل جزء فيها وهو ينظر اليهما بين حين واخر بنظرات شكر وفرحة دامعة ليسا وحدهما من يعشقان هذا الكيان ليسا وحدهما من قاما بتحقيق هذا الحلم الجميل
___________________
بدا العمل يزدهر ببطء بعد ان نجح ثائر فى استغلال اناقته وثقافته وحسن حديثه فى عقد عدد من الصفقات مع بعض مصانع الملابس والبطاطين والحلويات فى برج العرب وغيرها من المناطق الصناعية وعادت الدراسة من جديد
ثائر :: احمد انا حاخد بكره اجازه انت عارف اول يوم دراسه عاوز ادفع المصاريف واشوف الجدول و...
احمد :: وحتشوف الزغلوله ؟ ماشى يا سيدى حقك انت عارف بقالك كام يوم من غير اجازه انت عاوز فلوس ؟
ثائر :: لالا انت عارف الحاج مصمم انه يصرف عليا لحد ما اخلص انا بس لما اخلص حاريح باقى اليوم وبعد بكره شغل
احمد :: وماله علشان انا حاخد الجمعه حاخد اخواتى البنات نروح رشيد نقضى اليوم واختى عازمه عيله صاحبتها يعرفونى عليها عاوزين يدخلونى القفص
___________________
كعادته عندما يذهب الى الكلية يدخل مباشرة الى مبنى المدرجات لا يلتفت يمينا او يسارا حتى يصل الى الباب ثم
ثائر :: يا حسن
حسن :: ايوه حاضر حمد الله على سلامتك يا برنس ثوانى والقهوه تكون جاهزه
جلس على المصطبة الرخامية يشرب القهوة وشرد فيها هل سيراها ؟ هل ستاتى اليوم كعادة الطلاب فى الحضور فى اليوم الاول ام تتخلف عن الحضور كالعام الماضى ؟ ان كل ما يحلم به ان يراها من بعيد آملا فى القرب عندما يتحسن وضعه ويتجاوز محنته
انتهى من القهوة وقبل ان ينهض سمع صوتا يناديه
رحاب :: ثائر حمد الله على سلامتك اخيرا شفتك
( كانت رحاب فتاة اردنية حضرت لمصر للدراسة بمنحة تفوق كانت غريبة التقاها منذ ثلاثة اعوام وهى تائهة بين الطرقات والمكاتب مع امها تكاد تبكى من عجزها عن انهاء اجراءات القيد وساعدها حتى انهى لها كل شئ وصارا صديقين )
ثائر :: رحاب يا بنت الايه ازيك عامله ايه
رحاب :: انى منيحه لكن انت شو اخبارك
ثائر :: انا تمام كنت فاكرك حتيجى متاخره كمان اسبوعين على الاقل زى كل سنه
رحاب :: لا انى جيت العام هذا مبكره مخصوص على خاطر اشوفك ما شفتك طول العام الماضى وعرفت ان عندك مشاكل كثيره
ثائر :: فعلا لكن الحمد لله لسه واقف على رجليا
هالة :: حمد الله على سلامتك يا برنس منور الجامعه
( كانت هالة فتاة لطيفة قمحية محجبة تميل للهدوء وحين تجتمع الشلة تجدها دوما ساكنة تتابعهم فى صمت وقلما شاركت فى الحديث كان ابوها قد توفى تاركا لهم بيتا ومحلا صغيرا وثلاث بنات وامهم الليبية وكانت هالة اكبر البنات )
ثائر :: هاله ازيك اخبارك ايه ؟
هالة :: اتخطبت
ثائر :: مبروك
هالة :: وفسخت
ثائر :: لا كده ادينى عنوانه اروح اباركله طيب احنا لازم نحتفل تعالوا نشرب كولا
هالة :: على حسابى انا عازماكم بمناسبة فسخ خطوبتى
اتجها الى كشك المرطبات وصمم على دعوتهم ووقف يشترى الكولا حين ربتت على ظهره يد انثوية لطيفة وسمع صوتا شقيا محببا لديه يهتف قائلا
:: ثائر فالنتينو وصل يا جدعاااااااان
#ارواح_هائمة
وقف يشترى الكولا فوجد يدا انثوية لطيفة تربت على ظهره وصوتا شقيا محببا لديه يهتف بمرح
:: ثائر فالنتينو وصل يا جدعاااااان ازيك يا برنس
ثائر :: ( لبائع الكولا ) طيب خليهم اربعه بقى
ثم استدار هاتفا بفرحة
ثائر :: اموله العسوله وحش ..... تينى
كانت معها لم يصدق عينيه ابتسم وحادث نفسه انه يحلم واتسعت ابتسامته اكثر وهو يسمع تلك الموسيقى
نرمين :: ازيك يا استاذ ثائر
فتح فمه ليقول شيئا ولكن الكلمات احتبست فى حلقة تنحنح وسعل وهز راسه كأنما يعيد محرك لسانه للعمل واخيرا همس
ثائر :: اهلا وسهلا
نرمين :: اهلا بيك الحقيقه انا من السنه اللى فاتت عاوزه اشكرك على وقوفك جنبنا
ثائر :: انا وقفت جنبكم ؟ فين امتى ازاى ؟
نرمين :: فى المشكله بتاعة الواد اللى اسمه محيى ده
ثائر :: محيى محيى مين محيى ايه محيى محيى ااه محيى هو اتعرض لكم تانى ؟
نرمين :: لالا خالص من يومها بس انت اختفيت فجاه
تذكر ما يمر به فغامت عيناه وقال بصوت مبحوح
ثائر :: معلش كان عندى ظروف
نرمين :: انا عرفت قصدى انا وداليا عرفنا وزعلنا قوى وكنا بندعيلك
( يا الله كم هى رائعة هل كانت بمثل تلك الروعة السنة الماضية ام انه كان يراها دوما عن بعد فلم يلحظ مدى جمالها انها شمس دافئة ساطعة تلهب العيون بقدر ما تجعل الدفء يسرى فى العروق انها فتنة تمت ثناء وسناء كما قال الشاعر وانها ..... )
نرمين :: استاذ ثائر انت سامعنى انا باكرر شكرى ليك
ثائر :: شكرا يا انسه انا اللى اشكرك واشكر الظروف اللى سمحتلى انى اقوم باى خدمه ليكى وحتلاقينى دايما تحت امرك
نرمين :: صراحه انت كنت شهم جدا وشجاع وقلبك جامد
ثائر :: اى واحد فى مكانى كان لازم يعمل اللى عملته واكتر وانا لو رقبتى تطير فيها مستحيل كنت اخلى الحيوان ده يمس شعره منك قصدى منكم
نرمين :: بيتهيالك الكل وقف يتفرج اصل الحيوان ده بيروح الجيم وعامل زى البغل والولاد كلهم بيخافوا منه انما انت قلبك جامد
ثائر :: انا لو جبان وباخاف من خيالى لو انتى بالذات فى خطر لازم ابقى اسد
نرمين :: اشمعنى انا بالذات ؟
( لانك يا جميلة الجميلات اجمل ما خلق الله من النساء بل انت معجزة الله فى الخلق ودليل على قدرته جل وعلا على الابداع ولانك تسكنين هنا فى القلب وتملكين الروح ولانك ... )
نرمين :: برغم ان كان فاضل تكه قد كده واجيبلك الامن
ثائر :: الامن ليا انا ليه ؟
نرمين :: يعنى يصح وحضرتك شكلك انسان ذوق ومحترم فى الرايحه والجايه تعاكسنى وكل ما تشوفنى تقعد تغنيلى يرضيكى يا امال
امال :: ما تظلميش ثائر يا نرمين ثائر عمره ما عاكس حد يعنى اكيد بيغنى عادى كده مش قاصدك انتى مخصوص مش كده يا ثائر ؟
ثائر :: لا طبعا الانسه بتتكلم صح انا مش حاكدب ولو على رقبتى بس يعنى معقول انتى تزعلى من المعاكسه ؟ يعنى تزعلى لو حد عاكسك ؟
نرمين :: انت رايك ايه ؟
ثائر :: رايى انك تزعلى من اللى ما يعاكسش لانه يبقى ما عندوش احساس ويستاهل ضرب النار فى ميدان عام
ضحكت نرمين فشعر ان الورود تتناثر فى الجو تنشر عبيرها
نرمين :: ياااه للدرجه دى ؟
ثائر :: اكيد طبعا لازم اى حد تعدى من قدامه يعاكسك
نرمين :: طيب افرض واحد اعمى
ثائر :: حتى لو اعمى لازم يحس ان الانسانه اللى عدت من قدامه دى انسانه جميله
سادت بينهما لحظة صمت قالت فيها العيون كلاما يصعب قوله او وصفه
هو ( سوف اهدم الدنيا وابنيها واشعل الارض نارا سوف ابلغ عنان السماء واقطف لك نجمة واعيد المصنع افضل مما كان ثم اتيك خاطبا سيدتى فهل تقبلين )
هى ( كلامك حلو يا ابن الايه حقيقى الحب جميل للى عايش فيه له الف دليل اسالونى عليه بيفوت على العين ويصحيها من عز النوم ويفوت على الروح ويطير بيها الدنيا فى يوم )
افاقت من شرودها فتنحنحت وقالت بخجل جعل خدها يتورد
نرمين :: ميرسى على ذوقك يا استاذ ثائر
ثائر :: العفو وانا اسف لو ضايقتك واوعدك مش حتتكرر ما دام زعلانه
نرمين :: لالا خالص انا مش زعلانه خلاص حصل خير
ثم مدت اليه يدا عاجية بيضاء وهى تقول
نرمين :: عموما دى فرصه سعيده واتمنى انها تتكرر
احس بالرهبة واعتراه الخوف هل يصافحها هل يمد يده ليمس يدها وان هو فعل هل يستطيع ان يقاوم رغبة جارفة ان يرفع يدها الى شفتيه يقبلها ؟ هنا وسط الجامعة وتحت انظار الجميع ؟
مد يده مصافحا فاحس بتيار كهربى خفيف يسرى فى جسده واحس برجفة لذيذة تعتريه وسمع صوت دقات انه الحب يطرق باب القلب كلا انت كاذب ايها الطارق فحبها يسكن القلب منذ راها اول مرة بل ان موطنه الاصلى هنا بين الضلوع اما انت يا حديث العهد بنا من تكون ؟
طال السلام بينهما دون ان يشعرا حتى تنحنحت وسحبت يدها برفق وتورد وجهها خجلا واحس هو بعرق بارد يغمره فاعتذر بهزة راس خفيفة وتراجع خطوة للخلف ثم استدار موليا الادبار وخلفه امال تهتف
امال :: ثائر ثائر يا ابن الايه ده نسينى خالص حتى ما شافنيش تفتكرى شافنى ؟ تصدقى نسى حتى الكولا ياللا اللى ييجى من الصعايده فايده
___________________
كان يتقافز كعصفور سعيد يطير مرفرفا من غصن لغصن وهو يشعر انه يجول فى حديقة غناء وان كل الطيور والشجر والزهور تناديه ثائر ثائر ثائر سيمفونية عذبة تصدح باسمه تتردد فى الجو مرارا ثائر ثائر ثائر يشعر ان اسمه صار نغما جميلا منذ تغنت به شفتاها ثائر ثائر ثائر بينما هو يجول من غصن لغصن دون ان يقف بمكان .
ولكن مهلا لم يكن اسمه يتردد فى خياله ولكن فى الواقع
هالة :: ثائر ثائر ثائر انت يابنى انت اتجننت واللا ايه
التفت الى مصدر الصوت ليجد هالة ورحاب
هالة :: يخرب بيتك هى النداهه ندهتك ؟
رحاب :: نداهه ايه النداهه دى يا هاله ؟
ثائر :: رحاب ؟ هاله ؟ ازيكم انتوا جيتوا امتى ؟
هالة :: يا نهار اسود احنا كنا معاك يابنى احنا رحنا نجيب كولا سبتنا عند الكشك ووقفت تكلم القطه اللى لاحسه عقلك
رحاب :: مين دى يا ثائر مين دى هه ؟
ثائر :: دى .. دى دى نرمين اه والله
رحاب :: لا يا شيخ بجد بس يا عينى لا حول الله يارب حلوه قوى حاجه تقطع القلب
ثائر :: احنا بجد كنا رايحين نجيب كولا ؟
هالة :: والمصحف ايوه يا ابن التايهه
ثائر :: طيب ياللا بينا
هالة :: لا والمصحف ابدا ما يحصل انا اللى حاروح المره دى المره الجايه حتنسى اسامينا
حملوا اكواب الكولا وذهبوا للبحث عن مكان للجلوس فيه فوجدوا امانى عند المكتبة تجلس وحيدة كانها بانتظار شخص ما
ثائر :: امانى ازيك عامله ايه
امانى :: احسن منك هات بس البتاعه دى ازيكوا يا بنات
انتزعت منه كوب الكولا فلم يحاول التشبث كثيرا
امانى :: انا قاعده مستنياك من بدرى عاوزاك
ثائر :: خير فيه ايه صحيح ايه اللى جابك ناويه تقدمى دراسات ؟
امانى :: دراسات ايه انا ما صدقت خلصت وبعدين انا دلوقت ست بيت وحامل
ثائر :: مبروك يا شريف يا جامد هو فين صحيح
امانى :: فى الشغل اسمع ما تزهقنيش باقول لك انا حامل انا عاوزاك فى موضوع مهم وجايه مخصوص
نظر الى البنتين وقال متسائلا
ثائر :: ايه موضوع سر عاوزانى على انفراد ؟
امانى :: لا لا سر ولا حاجه انا جايه واسطة خير اصالحك انت ومها
ثائر :: مها يا نهار ابيض هى اخبارها ايه انقطعت فجاة
امانى :: انت ايه حكايتك انت شارب حاجه ؟ انتوا بقالكوا سنه ما بتكلموش بعض ما يصحش احنا مش صغيرين على الخيبه دى احنا اصحاب من سنين وانت كنت طول عمرك زى اخوها
ثائر :: طيب والنبى يا امانى فكرينى قبل ما تيجى هو كان ايه سبب الزعل
امانى :: مش باقول شارب حاجه يابنى لما كلمتها فى النليفون ورد عليك ابوها
ثائر :: اه اه افتكرت طيب لما تيجى اصالحها عادى
امانى :: انا عارفه ان الموضوع بسيط وهى كبرته زياده بس خليك انت الكبير
ثائر :: لا عادى والله انا اصالحها واعتذر لها كمان علشان خاطرك يا امونه وعلشان خاطر انتى عارفه انها هى كمان عزيزه عندى قوى
واقبلت مها ورسمت على وجهها تقطيبة عابسة حين راته
مها :: السلام عليكم ازيك يا امونه ازيك يا هاله ازيك يا رحاب عاملين ايه يا بنات ؟
هالة :: ازيك انتى اخبارك ايه معانا فى رابعه واللا لسه ؟
رحاب :: لالا عملت معجزه ونجحت امها عتقتها اخيرا هاهاها
امانى :: بطلوا تريقه اقعدى يا مها ايه مافيش ازيك يا ثائر
نظرت اليه باشمئناط واشاحت بوجهها فقال باسما
ثائر :: الله يسلمك يا مها عامله ايه هو انتى لسه زعلانه ؟
ورغما عنه لما يشعر به من السعادة ضحك فقالت
مها :: بالذمه فيه واحد عاقل يصالح واحده يقول انتى لسه زعلانه ها ها ها
ثائر :: عاقل مين العاقل ده ؟ الله يسامحك طيب عاوزانى اعمل ايه ؟ طيب يا ستى انا غلطان ياااه ايه الغلط ده كله انا غلطان جدا غلطان قوى غلطان خالص يااااه على الغلط اللى انا غلطانه
مها :: هو انت جاى تصالحنى واللا جاى تهزر ؟
ثائر :: لا كده ولا كده انا جاى اصلا اشوف الجدول واشوف الناس اللى بتيجى اول يوم امانى هى اللى .......
حدجته امانى بنظرة قاسية جعلته يتراجع وهتفت
امانى :: هى اللى ايه يا ولا
ثائر :: قصدى امانى هى اللى انا رحت عندها البيت وبوست ايديها ورجليها علشان تصالحنا على بعض حلو كده حلو اهه
مها :: خلاص خلاص مسامحاك ياللا خلينى انا الكبيره
ثائر :: هييييه زغرتى يا بت انتى وهى
احست مها بالحرج وان ثائر يستخف بها فوقفت غاضبة
مها :: يظهر انى غلطانه انى جيت شكرا يا امانى جايبانى علشان اتهزا ؟
امانى :: ما تلم نفسك يا حيوان
ثائر :: مها مها انا اسف ما عاش اللى يهزاك معلش اصلى مبسوط شويه النهارده معلش
مها :: وايه بقى سبب الانبساط ان شاء الله ؟
هالة :: كان واقف مع البرنسيسه بتاعته النهارده
مها :: بجد طيب احكيلى
امانى :: يا جزمه وساكت من الصبح انطق حصل ايه ؟
ظهرت السعادة واضحة جلية على وجهه وهو يقول ساهما
ثائر :: كأنى كنت فى الجنه مش عارف اوصف شعورى ومش فاكر حاجه واحده من اللى حصل ولا فاكر كلمه واحده قلتها ومش ده المهم المهم انى دلوقت لازم اعمل المستحيل علشان اوقف المصنع على رجليه
امانى :: وبعدين بعد ما توقف المصنع على رجليه
ثائر :: اروح اخطبها طبعا
تصايحت الفتيات فى فرح حتى قالت مها فجاة
مها :: ايمن خطيبى جه
وجدوا شخصا مقبلا عليهم طويل القامة بدين نوعا ما وسيم نوعا ما ولكنه لا يبعث على الارتياح وعرفته مها بالجميع حتى جاء دور ثائر فقالت تستكمل التعريف
مها :: وده ثائر زميلنا شخصيه محترمه بس اهبل شويه
ثائر :: اهلا وسهلا يا استاذ ايمن
ضيق ايمن بين عينيه ونظر نحو ثائر بتركيز قائلا
ايمن :: انت اسمك ثائر توفيق النشار ؟
ثائر :: فغلا انا ثائر النشار رابعه تجاره
حدجه ايمن بنظرة فاحصة وضيق بين عينيه اكثر قائلا
ايمن :: انت عندك مصنع بلاستيك او شريك فيه ؟
نظر ثائر لايمن بدهشة وتبادل نظرات القلق مع الباقيات وقال
ثائر :: فعلا
ايمن :: اهلا وسهلا انا ايمن رشدى
بدا على مها مزيجا من الضيق والدهشة وهى تقول
مها :: ايمن خطيبى ظابط شرطه
ثائر :: حضرتك فى قسم ايه ؟
ايمن :: لا انا مش فى قسم انا امن دولة
