رواية ارواح هائمة الفصل الحادي عشر 11 بقلم آثر توفيق
الحلقة 11
عاد ثائر من القاهرة بعد سفر سريع الى المصنع مباشرة ليلتقى بشريكه
ثائر :: انا قدرت اتصرف فى عشر الاف جنيه والباقى كمان اسبوع
احمد :: مالوش داعى انا اتصرفت فى عشره من والدتى والفلوس كده كامله يعنى الخراط يقدر يشتغل من بكره
ثائر :: خلاص نروح الصبح عند السيد الورشه ونعدى بالمره على حسن الكهربائى علشان يبتدى يجهز السخانات
احمد :: خلاص نتقابل بكره الساعه تسعه ونطلع على الفراهده ولو عاوزنى اقف مع سيد فى الورشه وانت تشوف كليتك انا مستعد
ثائر :: ما تشغلش بالك بالكليه المهم المصنع احنا نخلص ونحاول ننجز علشان حيبقى قدامنا وقت كتير علشان نرجع المصنع زى ما كان غير ان عندنا مهمه صعبه نشوف الكلب حمدى مجرشه لازم نعرف مين اللى ورا الحكايه دى بس مش وقته
احمد :: طيب ايه رايك نبطل شغل الدرجه التانيه خالص ؟
ثائر :: اللى تشوفه بس انت عارف اللى بينافسونا عندهم مكن حديث انتاجيته عاليه وبيستوردوا الخامات لحسابهم يعنى مش حنقدر ننافس
احمد :: طيب حنعمل ايه فى الحب دى مشكله حمدى كان معانا من سنتين وخاننا
ثائر :: نشوف حل ندور على حد تانى ونخلى عينينا فى وسط راسنا المهم خلينا نمشى واحده واحده واول خطوه نصلح الماكينه علشان نرجع نشتغل . انا حاقوم اروح علشان بقالى يومين ما نمتش وجيت من السفر هلكان وبانام على روحى
وقف استعدادا للانصراف فوقف احمد امامه وقال بتردد
احمد :: ثائر انا ... انا اسف ما كانش قصدى كلمه واحده من اللى قلته
ثائر :: يا احمد احنا اخوات مش اصحاب وعمرى ما ازعل منك ابدا ولا انت كمان ممكن تزعل منى .
احمد :: طبعا مش ممكن ازعل منك انت اخويا الكبير
ثائر :: بس انا زعلان من حكاية الحشيش تانى يا احمد ؟
احمد :: معلش مره وعدت واوعدك مش حتتكرر المهم انت لازم تهتم بالكليه وانا حاركز فى المصنع وانت معايا برضه واللا انت مش واثق فيا
ثائر :: انا واثق فيك مليون فى الميه لكن القصه اننا رجعنا للبدايه ايام ما كنا بنشتغل اربعه وعشرين ساعه علشان نعمل اسم بس الاصعب بقى اللى احنا فيه دلوقت علشان نصحح الاسم علشان كده المصنع اهم ومحتاجنا احنا الاتنين
احمد :: يا ثائر انت السنه دى external من الخارج يعنى لا قدر الله ....
ثائر :: انا كل اللى عندى اربع مواد يعنى لو نجحت فى ماده حيرفعولى ماده بلجنة رافه واطلع رابعه باتنين يعنى باذن الله ناجح المهم بالنسبه لى وبالنسبه لك انت كمان المصنع
احمد :: طيب وبالنسبه للبنت اياها الزغلوله اللى مطلعه عينك
ثائر :: ربنا شاهد انى جاد وضميرى نضيف من ناحيتها لكن لو ما قدرناش نشغل المصنع يبقى لا اقدر اخطبها لا هى ولا غيرها يبقى برضه المصنع اهم باقول ايه سيبنى اروح
___________________
خرجت داليا اولا من لجنة امتحان نصف العام تنتظر نرمين التى خرجت بعدها بقليل
داليا :: عملتى ايه يا نرمين ؟
نرمين :: سؤال غريب طبعا حليت الامتحان كله بس فاضل اهم حاجه توفيق ربنا وانتى عملتى ايه ؟
داليا :: تلميذتك واللا مش واثقه فيا ؟ بس انا قلقانه على باسنت لسه فى اللجنه لحد دلوقت
وبعد قليل خرجت باسنت واتجهت اليهم وجلست صامتة بلا كلمة واحدة
نرمين :: عملتى ايه يا بسبوسه ؟
باسنت :: جعت واكلت المعيد
داليا :: يخرب بيتك لو ما لقيتيش حد تتريقى عليه تتريقى على نفسك احنا لو سبناكى كان زمانك لسه دبدوبه
باسنت :: اااه الله يرحم الايام الجميله دى مش الحرمان اللى عايشه فيه
نرمين :: بالذمه مش كده احسن شوفى انتى غزاله جميله ولو فضلتى تخينه كنتى حتبقى وحشه قوى
داليا :: الله مش دى امال ؟
امال :: صباح الخير يا بنات عملتوا ايه ؟
نرمين :: عيب يا بنتى احنا جايين الجامعه نذاكر وننجح بس انتى ايه اللى جابك انتى مش خلصتى من يومين ؟
امال :: اولا جايه اتطمن على اعز اصحاب طبعا كان لازم اعرف نيلتوا ايه فى امتحاناتكم وثانيا بقى عندى اخبار عن ثائر
قالت نرمين بلهفة
نرمين :: بجد ايه شفتيه ؟
داليا :: نرمين واحده واحده جرى ايه ؟
شعرت نرمين بالخجل من نفسها فقالت تبرر اندفاعها .
نرمين :: انا بس عاوزه اشكره على موقفه النبيل معانا واتطمن عليه لانه انقطع فجاه حتى ما ظهرش فى الامتحانات ودى كده حاجه تقلق
امال :: لا ما تقلقش ولا حاجه لانه انتساب وما عندوش امتحانات نص السنه
داليا :: اشمعنى انتساب علشان المصنع ؟
امال :: لا من قبل المصنع اصله جاى مفصول من هندسه
نرمين :: مفصول من هندسه ليه عمل حاجه ؟
تكرار رسوب سقط سنتين واتفصل فى اعدادى هندسه
باسنت :: فاشل يعنى
نرمين :: قطع لسانك ما تقوليش عليه كده
داليا :: وانتى بتدافعى عنه ليه يا ست نرمين علشان موقفه النبيل برضه ؟
نرمين :: ايه يا داليا انتى واقفالى على الواحده ليه ؟
امال :: يا بنات انتوا حتتخانقوا واللا تعرفوا اخباره اصلها مش كويسه
نرمين :: خير ايه اللى حصل ؟
امال :: اصل احمد اخويا رجع من تونس ولما قلتله ان ثائر مختفى راحله المصنع وقابله هناك طلع عنده مشكله كبيره قوى فى المصنع واضطر ينسى الكليه خالص ويتفرغ مع شريكه للمصنع لدرجة انه امبارح بالليل لما كان مع احمد بيقول له انه بقاله اسبوعين ما روحش البيت رغم ان بين بيته والمصنع ربع ساعه وعندهم عربيه بس مافيش وقت تخيلوا شريكه ساكن فوق المصنع وبيعدى عليه يوم واتنين ما يطلعش فوق
قالت نرمين بقلق لم تستطع اخفاؤه
نرمين :: طيب ايه المشكله اللى عنده بالظبط ؟
امال :: احمد ما قالش ومش عارفه هو يعرف واللا لا انما شكلها حكايه كبيره وخطيره ويا يكملوا يا يبطلوا خالص والمصنع ده وبالنسبه لثائر حياة او موت
باسنت :: طيب وكليته وامتحاناته ده ممكن يتفصل لو ما عداش السنه دى
امال :: ربنا يستر
____________________
انتهت اجازة نصف العام ولم يظهر ثائر بعد وكانت امال تتتبع اخباره من اخيها الذى ساوره الشك
احمد :: اموله ايه الحكايه ؟ انتى بتسالى عنه بلهفه زياده قوى
امال :: لا والله يا حماده انت عارف ان ثائر ده زى اخويا وعارف انه اكتر واحد من اصحابك بييجى البيت والكل حتى بابا بيحبه
احمد :: عارف بس شايف ان الحكايه زياده عن حدها اى نعم انا عارف ان ثائر مش لعبى بس ...
امال :: لالالا بس ايه انت عارف ان صاحبك مش لعبى واختك هى اللى لعبيه ؟ لا الكلام ده يزعل
احمد :: لا طبعا ما اقصدش كده خالص انا وثق فيكى جدا وكلنا واثقين فيكى مليون فى الميه انتى متربيه وبنت ناس بس كلمينى بصراحه
امال :: اصل فيه واحده صاحبتى شكلها معجبه بيه قوى انت عارف انه شاب محترم وخدوم وعمل معاهم موقف رجوله زى عوايده هى كل مره بتقول انا بس عاوزه اشكره انما باين فى عينيها
نظر اليها متفرسا ليسبر غورها ثم تنهد وقال
احمد :: طيب اسمعى اليومين دول ثائر واحمد شريكه بيمروا بازمه جامده جدا ممكن تخليهم يرجعوا تانى للصفر ثائر بيتحارب حرب قذره من تحت لتحت والمشكله انه مش عارف مين بيحاربهم وكل ما يقدم خطوه لقدام يرجع خطوتين لورا
امال :: احنا خايفين عليه بس ما يلحقش الامتحانات ويتفصل
احمد :: فيه بنت زميلته بتحضر المحاضرات وتبيضها وتروحله المصنع واحيانا بتقعد تذاكر معاه وهو بيقول لو انجح فى ماده واحده اعدى
#ارواح_هائمة
قالت نرمين بدهشة
نرمين :: فيه واحده صاحبته بتوديله المحاضرات ؟
داليا :: طيب اديكى اتطمنتى اهو بيذاكر وحيمتحن
امال :: هو كل اللى عنده اربع مواد لو نجح فى واحده حيرفعوله واحده بلجنة رافه ويطلع رابعه بمادتين والسنه الجايه يكون ربنا حلها واموره مشيت
باسنت :: انما مين دى اللى بتوديله المحاضرات ؟
نرمين :: مافيش غيرها هى اللى معاه فى نفس السنه انما ليه قالت انها ما تعرفش عنه حاجه وكان شكلها قرفانه مننا ؟
امال :: غيره بعيد عنك الغيره تعمل اكتر من كده
نرمين :: غيره ليه واحنا نعرفه ؟ احنا كل الحكايه .....
امال :: يا نرمين بلاش مكابره كلنا حاسسين بيكى
نرمين :: عيب يا بنات مش كده انا بس شايفه انه شهم
داليا :: كويس اتبسطتى ؟ بكره كله يقعد بتكلم
باسنت :: خلونا فى المهم حد شاف البنت دى النهارده ؟
امال :: انا شفتها عند مبنى الشئون
نرمين :: طيب ياللا بينا
امال :: لا يا نرمين دى ما كانتش لوحدها
داليا :: اعقلى يا نرمين ياللا بينا فين ؟
ولكن نرمين لم تتعقل ولم تنصت واتجهت صوب مبنى شئون الطلاب وهن خلفها ولكنها لم تجد احدا وبينما كل البنات يحاولن اقناعها بالعودة راتها تهبط من الطابق الاعلى وبصحبتها شاب يميل للطول والبدانة وسيم نوعا ما ولكنه لا يبعث فى النفس الراحة اطلاقا ولم يكن احد طلبة الجامعة فقد كان فى نحو الثلاثين من العمر وربما كان خريجا سابقا .
مرت مها بجوارهم متجاهلة اياهم فنادت عليها نرمين
نرمين :: صباح الخير يا انسه
نظرت نحوها بدهشة ونفور ولم ترد فتابعت نرمين
نرمين :: هو انتى بتشوفى ثائر ؟
مها :: ثائر فيه ايه يا شاطره ؟ انتى مش سالتينى قبل كده قلتلك لا باشوف الشخص ده ولا اعرف عنه حاجه ولا عاوزه اعرف عنه حاجه ؟
داليا :: ياللا يا نرمين بتعملى ايه ؟ انا اسفه ياانسه
نرمين :: مش انتى اللى بتوديله المحاضرات علشان يذاكر ؟
مها :: محاضرات ايه عنه ما ذاكر ولا نجح ده فاشل وحيفضل فاشل انشالله يتحرق بجاز روحى يا شاطره العبى بعيد
نرمين :: عيب يا انسه الاسلوب اللى بتتكلمى بيه ده
التفتت مها غاضبة وصاحت بحدة
مها :: باقول لك ايه انتى لسه عيله صغيره مش انتى اللى حتعلمينى العيب من اللى مش عيب اجرى يا بت من قدامى بدل ما امد ايدى عليكى
انصرفت مها غير عابئة بها بينما نظر مرافقها الى نرمين نظرة عميقة متفحصة لم تلاحظها اى من البنات لانشغالهن بنرمين التى سالت دموعها وهى تقف مبهوتة تشعر بالمهانة
داليا :: ايه يا نرمين اللى عملتيه ده اعقلى شويه اتجننتى واللا ايه ؟
امال :: ممكن يكون اللى معاها ده خطيبها وانتى حطيتيها فى موقف محرج
سالت دموعها غزيرة فالتففن حولها واحتضنتها داليا قائلة
داليا :: طيب خلاص يا حبيبتى بلاش عياط بقى احنا فى وسط الكليه الطلبه يقولوا علينا ايه ؟
باسنت :: يا نرمين امسكى نفسك احنا مش اتطمننا عليه ؟
امال :: وانا حاطمنكم عليه اول باول وحاحاول اعرف عنوان المصنع من احمد ونروح نزوره وناخد له هديه ممكن نجيبله مذكرات من مكتبة المهندس اللى فى شارع بورسعيد
باسنت :: بس احنا مش عارفين معاه مواد ايه
:: صباح الخير يا بنات
كان الصوت انثويا رقيقا قادما من الخلف فاستداروا ليجدوا امانى ولم تكن وحدها بل كان معها شاب حسن المظهر وسيم يضع على عينيه نظارة طبية انيقة ولم ترد ايا منهن
امانى :: اييييه يا بشر مالكم باقول صباح الخير
امال :: صباح الخير معلش اصلنا
امانى :: عارفه طلبتوا نمره غلط انا بقى النمره الصح
داليا :: غلط ايه وصح ايه انا مش فاهمه حاجه حد فاهم حاجه يا بنات ؟
امانى :: افهمك انا اللى باودى المحاضرات لثائر
باسنت :: هو انتى معاه فى سنه تالته ؟
امانى :: لا يا حبيبتى انا اتخرجت السنه اللى فاتت وباحضر مخصوص علشان خاطر اوديله المحاضرات واقف جنبه فى محنته بكل اللى اقدر عليه
نظرت نرمين نحوها بدهشة تمتزج بالغيرة وقالت
نرمين :: هو انتى ...... خطيبته
ضحكت امانى واشارت لمرافقها الذى ابتسم بهدوء وهى تقول
امانى :: خطيبته ؟ لا يا روحى انا خطيبة ده
نرمين :: انا انا .... انا اسفه
شريف :: مافيش داعى للاسف يا انسه ثائر صاحبى وانا عارف ان امانى بتحضر وتبيض المحاضرات وتروح عنده المصنع وانا كمان باروح ازوره على طول ولعلمكم انا واثق فى امانى جدا جدا وواثق كمان فى ثائر واخلاقه
امانى :: ثائر من يوم ما عرفته وهو اخ وصديق وواقف جنبى وواجبى اقف جنبه لما يحتاجنى اظن دى الاصول
نرمين :: طيب احنا ممكن نزوره ؟
امانى :: بلاش احسن اصل المصنع فى عماره زى بيت عيله ولو رحتوا هناك حيبقى فيها يعنى كلام مش مضمون انا اصلهم يعرفونى من زمان وبعدين هو اكيد حييجى على الامتحانات لازم ييجى
داليا :: اومال التانيه دى مالها قرفانه من نفسها كده ليه ؟
امانى :: ابدا مشكله انا شايفاها عاديه لكن هى كبرتها قوى كانوا فى محاضره وتعبت واخدها وصلها ما جتش يومين ورا بعض اتصل يتطمن عليها باباها رد عليه بس
داليا :: يعنى مش مشكله كبيره قوى
امانى :: باباها راجل متزمت اداها علقه ورمت وشها وهى جت بعد كده لابسه نضاره كبيره مداريه وشها كله ومسكته غسلته وقالتله انا اسفه انى عرفت واحد زيك انت غير اهل للثقه وما عندكش اخلاق وكلام كبير قوى وهو فضل يسمع ويسمع ويسمع وفى الاخر قال انا اسف مع السلامه وخلاص على كده
نرمين :: انا بابا راجل ازهرى وشيخ جامع وعمره ما ضربنى
امانى :: انا كنت فاكره ان باباكى ظابط فى الجيش
نرمين :: اه بابا ظابط فى الجيش انا قصدى على بابا حليم ابو داليا هو اللى شيخ جامع عموما ياريت تسلميلنا عليه وتقوليله اننا نفسنا نشكره على اللى عمله معانا وبندعيله يعدى من المحنه اللى هو فيها وينجح
_________________
وبدات امتحانات نهاية العام ولم تكن هناك ايام مشتركة بينهما حتى تتمكن من رؤيته ولكن امال استطاعت رؤيته
كان قد وصل الى اللجنة قبل الموعد بدقائق ليجد امانى فى انتظاره
امانى :: اتاخرت كده ليه باقى ربع ساعه على اللجنه
ثائر :: معلش كان عندى طلبيه باخلصها واتاخرت
امانى :: يا لهوى اشق هدومى منك طلبيه يوم الامتحان انا كنت عاوزه اراجع معاك واستنى شريف علشان خارجين
ثائر :: حتراجعى معايا قانون ؟ يا بنتى انا حافظه صم بس فيه حاجه واقفه بينى وبينه
ظهرت امال من بعيد وهى تتقافز فرحا
امال :: ثائر اخيرا شفتك عامل ايه وحشتنى
ثائر :: يا بنت الايه ازيك يا اموله عامله ايه فى الامتحانات
امال :: لسه مخلصه جنائى دلوقت وخرجت جرى علشان الحقك قبل ما تدخل
ثائر :: ادعيلى
امال :: مش لوحدى كلنا بندعيلك مذاكر قانون كويس ؟
ثائر :: مش بالمذاكره القانون ده انا حافظه صم ومع ذلك مش عارف اخلص منه من اولى تصدقى ده تامن امتحان ؟
امانى :: الغريبه يا امال ان ثائر قبل الامتحان واحنا فى اولى قعد يحفظنا النقط المهمه وكلنا نجحنا وهو سقط وكل سنه يعمل مع اصحابه كده
امال :: ازاى يعنى بتدخل تتلخم وتنسى وما تحلش واللا ايه
ثائر :: بالعكس انا باحل حلول نموذجيه كانها منقوله من الكتاب نقل مسطره تعرفى كل سنه يجيب الامتحان جزئين اختار جزء من سؤالين وكل سؤال أ و ب و ج انا باحل الجزئين الاربع اسئله وبرضه مافيش فايده
امال :: اكيد طبعا يا اهبل كده الدكتور لازم يفتكرك بتغش
ثائر :: انا اغش دى عمرها ما تحصل
امال :: الدكتور اللى حيفتكر كده جرب تحل السؤالين بس ومش كلهم برضه حل سؤال والتانى حل أ و ب وسيب ج
ثائر :: اجرب المهم ... كنت ... كنت عاوز اتطمن على اصحابك
امانى :: ثائر . الامتحان . اجرى بسرعه
امال :: طيب اتطمن هم بخير روح وانا حاستناك لما تخلص
#ارواح_هائمة
اليوم الاخير لامتحانات ثائر والمشكلة ان امتحانها الاخير فى الغد ولكنها تتوق الى رؤيته
دخلت المطبخ حيث كانت امها وخالتها تعدان طعام الغذاء
نرمين :: ماما لو سمحتى كنت عاوزه اروح الكليه وارجع على طول
كوثر :: تروحى تعملى ايه يا نرمين مش عندك مذاكره ؟
نرمين :: حاروح ابص على حاجه مهمه وارجع مش حاتاخر
كوثر :: حاجة ايه انتى مش مصورة كل الورق اللى عاوزاه ؟
نرمين :: يا ماما والله حارجع على طول بس ضرورى
ثريا :: سيبيها تروح يا كوثر يمكن حاجه مهمه
كوثر :: اهم من الامتحانات ؟ دى اخر ماده بكره
نرمين :: يا ماما انا حاروح بسرعه
كوثر :: نرمين شوفى مذاكرتك خليكى تخلصى
نرمين :: يا ماما
كوثر :: نرمين قلت خلاص روحى ذاكرى
عادت الى غرفتها حيث كان الباقين هناك داليا وباسنت ومعهم زميلتهم شيماء وحين دخلت سالتها داليا
داليا :: مالك يا نرمين فيه ايه ؟
نرمين :: ماما ما رضيتش تخلينى اروح الكليه اتطمن على ثائر
داليا :: نعم تروحى فين ؟ والمذاكره يا نرمين يا نهار اسود
نرمين :: ايه يا داليا الله ؟
داليا :: الله ياخدك هو كل حاجه ثائر ؟ خلاص واكل عقلك ؟ دى اخر ماده بكره
باسنت :: يا نرمين داليا خايفه عليكى هو انتى قلتى لمامتك انك رايحه تشوفى ثائر ؟
نرمين :: لا طبعا انا قلتلها انا عاوزه اروح وحارجع على طول من غير ما اقول اسباب
شيماء :: انتى غلطانه يا نرمين كنتى قولى انك رايحه تصورى ورق
داليا :: ايه ده ازاى يعنى عاوزاها تكذب على ماما كوثر ؟
نرمين :: لا طبعا مستحيل انا اهون عليا اقول انى رايحه اشوف ثائر من انى اكذب على ماما انا عمرى ما عملتها
داليا :: طبعا احنا عمرنا ما نكذب على اهلنا اهو ده اللى ناقص
شيماء :: دى كذبه بيضه ما فيهاش حاجه
نرمين :: لا بيضه ولا سوده الكذب كذب ما فيهوش الوان وانا اقطع لسانى بايدى ولا اقول لماما كلمه واحده كذب
شيماء :: كده بقى يبقى ما تفكريش تشوفى صاحبك ده غير السنه الجايه
داليا :: يعنى ايه صاحبها ؟ لعلمك ده مش اكتر من زميل عمل معانا حاجه كويسه وعاوزين نشكره ونتطمن عليه علشان من يومها بطل ييجى الكليه انما مش صاحبنا احنا مش مصاحبين ولا بنصاحب ولاد فى الكليه خالص
شيماء :: مالكم مكبرين الموضوع قوى كده هو عيب ؟
باسنت :: يا بنات خلونا نخلص مذاكره الامتحان بكره
وبعد الانتهاء من المذاكرة قامت باسنت وشيماء للانصراف واشارت نرمين لباسنت لتتاخر قليلا لتقول هامسة
نرمين :: يا باسنت ما تبقيش تجيبى البنت دى معاكى تانى
باسنت :: ليه هى عملت حاجه ؟
نرمين :: يا بسبوسه احنا طول عمرنا بنختار اصحابنا الكويسين ودى مش كويسه دى عاوزانا نكذب وصراحه انا مش مرتاحه لها البنات هم اللى بيبوظوا بعض
__________________
انتهى من امتحانه الاخير فى مادة الادارة العامة والان حان الوقت ليتفرغ لمشاكله سبعة اشهر وهو يدور فى حلقات متداخلة من المشاكل التى لا يعرف لها سببا كلما فرغ من واحدة وجد اخرى والدوامة تكبر وتكبر ولا تنتهى وهو وشريكه لا يفهمان سببا لكل ذلك ولكنهما اصبحا يدركان جيدا ان هناك اصابع خفية تعبث فى الظلام
طلب قهوة وجلس يشربها وحيدا وقبل ان ينتهى وجد امانى وشريف مقبلان عليه
شريف :: ايه يا حاج خلصت ؟
ثائر ،:: اه خلصت الحمد لله
امانى :: وعملت ايه
ثائر :: كالعاده اصل دى اداره يعنى مافيش فايده
شريف :: ليه بس كده ؟ خليك متفائل
ثائر :: الموضوع مالوش دعوه بالتفاؤل والتشاؤم اصل دى ادارة اولى معمره معايا الدكتور اصله حالف ما ينجحنى طول ما هو فى الكليه
امانى :: هو ده اللى انت بهدلته فى المقال ؟ تستاهل
ثائر :: هو انا جيت جنبه انا باقول رايى وده من حقى مش عارف هو زعل ليه
امانى :: اشد شعرى منك بتقول رايك ؟ فيه حد فى الدنيا يكون طالب فى كليه يكتب عن دكتور فى نفس الكليه يقول انه سبب فشل الادارة فى مصر ونظريته لابد ان تسمى نظرية الطرطور ؟
شريف :: انت قلت كده فعلا ؟
ابتسم ثائر واوما براسه ايجابا فاضاف شريف ساخرا
شريف :: لا بالشفا ان شاء الله كويس انه ما خبطكش بعربيته بس هو عرف منين انك قصدك عليه ؟
امانى :: عرف منين ازاى الباشا ابو صريحه كتب اسمه
شريف :: كتبت اسمك فى المقال ؟
امانى :: اسمه مين ده كتب اسم الدكتور
شريف :: يا نهار اسود قلت اسم الدكتور صراحه فى المقال ؟
ثائر :: وحياتك وثلاثى علشان ما يحصلش لبس
صفق شريف بيديه وقال ساخرا
شريف :: انت هايل انت عبقرى وعاوز تنجح ؟
ثائر :: ولا فارق معايا وحافضل اقول رايى ومن غير ما اقول اسمه ده كان مقال نقدى لنظريه بيدرسها لنا وهو واضع النظريه ولو قريت المقال كنت تاكدت ان النظريه اصلا معيبه
امانى :: صراحه فى دى عندك حق الدكتور. عامل نظريه بمواصفات الادارى الوسيط نفس مواصفات العصفوره او الطرطور وكل الطلبه كانوا بيتتريقوا عليها لكن ماحدش كتب مقال ينقدها ويهلهل فيها النظريه وصاحبها غيرك انت اللى جايب لنفسك الكافيه
ثائر :: طيب سيبونا من الموضوع ده انتوا اخباركم ايه
شريف :: هى امانى ما قالتلكش ؟
امانى :: انا كنت مستنيه لما يخلص اصلنا خلاص حددنا وحجزنا وحندخل اخر شهر سبعه
قام فرحا ليحتضن شريف قائلا
ثائر :: مبرووووك الف مبروك اخيرا خبر يفرح
امانى :: لا مبروك كده حاف ما تنفعش انت لازم تعزمنا عند تريانون او ديليس
ثائر :: يا جماعه انا لازم ارجع المصنع انا عندى مشاكل كتير
امانى :: لا يمكن والله ما اسيبك يا بخيل يا قيحه تريانون تريانون
وظهرت امال من بعيد تتقافز فرحا كعادتها
امال :: ثائر ثائر كويس انى لحقتك قبل ما تمشى كنت جايه بدرى بس راحت عليا نومه انت عارف الاجازه وكده
ثائر :: اموله العسوله ازيك انتى مش خلصتى امتحانات ؟ اومال ايه اللى جايبك ؟
امال :: اخص عليك انا جايه مخصوص اتطمن عليك ازيك يا امانى عامله ايه ؟ ازى حضرتك يا استاذ ...
امانى :: شريف ده خطيبى باقول ايه احنا كنا رايحين دلوقت تريانون ثائر عازمنا علشان خلاص حددنا ميعاد الدخله تيجى معانا ؟
امال :: وده كلام على قلبكم طبعا مبروك يا اموله الف مبروك
___________________
دارت اطباق الجاتوه وفناجين الشاى عليهم فى الكافيتيريا الشهيرة واخذوا يحتفلون بمرح وهم يحاولون فى الواقع اخراج ثائر من حالته النفسية السيئة
امال :: على فكره نرمين وداليا وباسنت صاحباتى بيسلموا عليك وبيدعولك دايما انك تخرج من محنتك
ثائر :: هم اصحابك من زمان ؟
امال :: من اول السنه يعنى ايام المشكله دى كنا لسه نعرف بعض جديد انما بنات اخلاقهم عاليه جدا واللا اهلهم ناس قمه فى الاحترام هم اخر يوم عندهم بكره تحب اعرفك عليهم ؟
ثائر :: بلاش دلوقت ياريت لما افوق من مشكلتى الاول
امال :: صحيح طمننى ايه اخبار المصنع احمد اخويا قاللى ان عندك مشكله كبيره
ثائر :: مين قال كده احمد غلطان انا ما عنديش مشكله انا عندى جملة مشاكل
امانى :: يااه جملة مشاكل وايه السبب ؟ احكيلنا يمكن نقدر نساعدك
ثائر :: احكى ايه بس وانا نفسى مش فاهم ايه اللى بيحصل
شريف :: ازاى مش فاهم اتكلم واحنا نفكر مع بعض
ثائر :: انا بقالى مده حاسس ان فيه حد بينخور ورانا بس مش عارف مين حاجات غريبه بتحصل مالهاش تفسير غير انها متعمده وبتحصل عن طريق ناس معانا وتختفى
امانى :: ايه شغل العفاريت ده فهمنا زى ايه يعنى
ثائر :: يعنى اول حاجه حصلت لقينا راس المكنه اتكسرت وبعد ما حلينا المكنه لقينا فى قلبها رايش نحاس عرفنا ان بتاع المجرشه هو اللى عملها دورنا عليه لقيناه باع المجرشه ومش عارفين طريقه وكله على كده
امال :: يكون الواد اللى اسمه محيى ؟
ثائر :: لا يا بنتى ده عيل هايف اهله مرتاحين صحيح لكن مش للدرجه دى
امانى :: مين محيى ده الواد اللى اتخانقت معاه ؟
امال :: ده الواد اللى اتهجم على نرمين وداليا صاحباتى وثائر ضربه وكان عمال يقول انتوا مش عارفين انا ابن مين
شريف :: وايه المانع يكون هو لو اهله ليهم علاقات
ثائر :: لا علاقات ولا حاجه اصلى فكرت فيها ودورت وراه لقيت الواد ابوه متوفى وامه مدلعاه وعندهم فلوس لكن ما عندهمش علاقات
امال :: طيب انا حامشى بقى علشان اتاخرت على ماما
امانى :: استنى يا بنتى هاتى تليفونك علشان اعزمك
ثائر :: سيبيها تروح وانا حابقى اجيبها معايا
انصرفت امال وقالت امانى
امانى :: ناوى على ايه حتعمل ايه ؟
ثائر :: العمل عمل ربنا ادينى باحاول اوقف المصنع
شريف :: ما تقلقش ان شاء الله خير واحنا جنبك ولو احتجت اى حاجه حتلاقينا معاك
امانى :: بس كويس ان البنات دول طلعوا اصحاب امال تحب اعزمهم على فرحى وتبقى فرصه تتعرف عليها ؟
ثائر :: امانى انتى تعرفى عنى انى لعبى انا فعلا مشدود للبنت دى لكن حاليا انا واقع ولازم اقف على رجلى الاول قبل ما افكر فى الارتباط بيها او بغيرها
امانى :: يا ثائر البنت واضح انها بتحبك يمكن وجودها جنبك يقويك يابنى المجنونه دى بتغير عليك
شريف :: انتوا بتتكلموا عن مين عن البنات اللى قابلناهم انا وانتى فى الجامعه ؟
امانى :: ايوه هم بالذمه مش باين عليها انها بتحبه ؟
شريف :: انتى قصدك على مين فيهم ؟
امانى :: على البنت الاموره ام وش مدور اللى كانت بتعيط وفاكرانى خطيبته
شريف :: اه عرفتها تصدق انا لو منك اروح اخطبها دلوقت
ثائر :: ازاى بس يا شريف انا دلوقت واقع يا جماعه واقع ولازم ارجع اقف على رجليا من تانى
