رواية ارحموني ولو رحمة مرة كامله وحصريه بقلم فراقد جسن علي
-يالله ،،،السلام عليكم
-أعرفكم على نفسي ،،أني محمود عادل ألجبوري
-من سكنة المحمودية أطراف محافظة بغداد
-ساكن بأحد القرى التابعة لقضاء المحمودية
يعني أحنه ناس باب عرب
-وساكن ويه أبوي وأمي وأخوي أركان
بيت الاجداد
بوسط الكيعان التابعة ملكيتها لجدي
والحلو بهاي الكيعان اكو ساجية مي جارية بيها منين تجي وين تروح مااعرف
بيت الجد والجدة بكل قرية وبكل حي
وبكل منطقة ،، وبكل محافظة
وبكل أقليم ،، وبكل بلد
هو:-عبارة عن فندق للزعلان ،
مطعم للجوعان ،
مكان ملاذ للضايج والمتلاغي
محكمة قضائية لحل المشاكل الأسرية والسرية ،
مكان للإجتماعات العاطفية والعائلية
بيت الجد والجدة جميع الغرف بي متاحة للدخول وحتى الغرف الخاصة منها .
البيت بي ٥ غرف متوسطة الحجم
وهول ،،وأستقبال
والحوالي مفتوح على كل الغرف
ومطبخ وحمام ،،
وحديقة خلف البيت كلش جبيرة
وهي أمتداد لباقي الكيعان (ملك جدي)
اللي فكر وصمم ونفذ لبناء هذا البيت بالوسط بمساحة كلش واسعة وحوطه من جميع الجهات بهذاك السياج الشامخ
أحنه ساكنين بغرفة أمي وأبوي
اني وأخوي أركان
-وغرفة لعمي باسم
وغرفة لعمي أحمد
وغرفة لعمي محمد
وغرفة هي بالاصل الجدي والجديتي
بس هسه العمة (شمس )مستحلتها تنام هي وجديتي بيها
-وجدي ينام بالهول دأئما قريولته موجودة ومفروشة ونظيفة
-والمطبخ بي الثلاجة الي تُنفتح بابها وتُنسد
أكثر من أي باب ثانية بالبيت
-وبي طاوة الطماطة والبيض على الطباخ
وحتى البيض المگلي بريوك كل صبح
يكون من ألذ وأطيب الأطعمة بهذا البيت
وتخريب كيلون الأبواب،،وقفاله الشبابيك
وتكسير ألجام
شيء مو بالغريب ...
بيت الجد والجدة صراخ ألعمة ( شمس ) حاضر ومتواجد دائما للحفاظ على نظافة البيت وحتى لا تضيع جهودها في التنظيف سدى يكون صريخها دائم (( لا تدخلون بقنادركم ونعالاتكم على فراش البيت ))
-وتصرخ على أمي (فاطمة) بعتبارها الجنة الوحيدة بالبيت
(( ممنوع تبقين المواعين لو جدورة على ألسنك خاف يجمع الفار لو الجريذية بالمطبخ وبعد شلون نتخلص منها ))
-او تصرخ (( كل واحد يستخدم منشفته الخاصة بالحمام ومن يخلص يشرها على الحبل بالشمس والهوى
حتى لا تخمخم وتصير بيها ريحة مو طيبة))
-وغيرها من الأمور المشابهة والكثيرة
بيت الجد والجدة التلفزيون هو لوحده قصة ثانية دوم العرك والصياح والعياط علموده بس يشتغل
-أما البالغين الي بالبيت هم
جدي ،، وجديتي
وعمتي شمس بعدها مامتزوجة
وعماتي نجمة ،، وكمرة
مزوجات من أولاد عمهن ماصارهن هواي من أتزوجن ،، هن الخوات أخذن الاخوان
وبعد مصاير عدهن جهال
وعمي باسم ،وعمي أحمد ،وعمي محمد بعدهم مامزوجين
-بس عمي باسم خاطب وعاقد بعيد الاضحى زواجه يعني بعد شهر
أبوي عادل وأمي فاطمة متزوجين صارلهم ٨ سنوات
أمي غريبة عن أبوي
-وأبوي عمره ١٧ سنه وتزوج
شاف أمي بالبستان جايه ويه أهلها
وخطبها وتزوجها وهي عمرها ١٤ سنه
أبوي أصله من ألبو طعمة عشيرة الجبور
وأمي من عشيرة السادة آل الشرع
يعني أمي علوية النسب
-واني صرت من بدايه زواجهم
وهسه عمري ٧ سنوات بالاول أبتدائي
-أني مواليدي ٢٧/٣/١٩٨٢
-وأخوي أركان مواليد ١٩٨٥
-يعني أبوي هسه عمره ٢٦ سنه
وأمي عمرها ٢٣ سنه
بعدهم شباب
-أمي بولادة أركان تعسرت عدها الولادة
وتفاقم عدها العسر ،،
تلاحكوها للمستشفى وجابت أركان
بس خطية فقدت بيت الرحم
وطلعت من الدنيا بس بينا أني وأخوي أركان
-فالبالغين بالعمر يردون يتفرجون أفلام ألرعب او الحركة
أو المسرحيات العراقية
أو المسرحيات المصرية لعادل أمام
-هذا بالإضافة أن التلفزيون لازم يكون اله غطه خاص //وهو عبارة عن قطعة قماش مربعة بيضة ومطرزة بالوان القوس قزح
تنتج عنها لوحة فنية بسيطة ((عبارة عن باقة ورود))
بيت ألجد والجدة الغرفة الخاصة بالعمة (شمس) اللي هي بالاصل غرفة أجدادي بس هي أستحلتها (هاي الغرفة ) مكان للترفيه والضحك وتجديد الجمالية
تجمع بيها كل الاخوات وبنات العمام
وبنات الخوال بالاعياد والمناسبات المختلفة اللي تخص العائلة
تحصلون بهاي الغرفة مختلف المكياجات والعطور والإكسسوارات والملابس
والأحذية المتنوعة بالكعوب والالوان الملفتة هاي الاشياء تجذب انتباه الصغير قبل الجبير
بالمختصر المفيد تتحول غرفة العمة (شمس)
بالمناسبات الى صالون ومحل للملابس
-أما الحوالي فهو مكان ساحة لعب النا
أني وأخوي
ساعة نلعب ختيلان ونختل بغرف عمامي
ساعة دعابل
ساعة شرطي وحرامي
والركض بفلس ونص
وصوت الضحك والصياح يوصل للشارع
-بيت الجد والجدة يبقى دائماً مفتوح للجميع ومبتسم رغم كل الظروف وفي كل الأوقات
متحدياً كل الظروف العابرة منها والصعبة
فهو مكان الألفة بالرغم من كل شيء ..
-بي العيد يصير بعيدين
وبي الفرح تصير بعشرة أضعاف...
-بي اللمة والجمعة مصدر للفرح والسرور ...
وبحالات الحزن فهو أفضل مكان لتجاوز كل حزن وضيق ....
أدام الله بيوتكم وبيوتنا وجعلها عامرة بالخير والسعادة والطمأنينة والايمان
وأطال الله في أعمار ألاجداد
ويرحم المتوفين منهم
حفظ الله بيوتكم وبيوت أجدادكم جميعاً
______________
هذا ملخص سريع عن حياتي
وراح تبدأ أحداث القصة من سنه ١٩٨٩
-شكد أضوج من أمي تكعدني الصبح أروح للمدرسة أشبع بجي وأبقى أباوع على أخوي أركان شلون نايم ومتهني بفراشه ،،
وأني نعسان ما اكدر أفتح عيوني من النعاس
-وامي تبوس وتقنع بيه بس أسكت
حتى لا يكتلني أبوي لان أبجي وصوتي عالي
وهذا الشوط كل يوميه ينعاد
-وهي تسد بدكم قميصي وأني كلساع مطعوج على جهة
لو أكعد بالكاع أريد أنام
وهي تنهضني وترجع توكفني حتى تكمل تبديل ملابسي
-وبس أبوي يصرخ بيه ،،
-سد حلكك أبن الكلب لو أكوملك بالحزام
ينكطع صوتي ،،
وأخلص تبديل الملابس بلمح البصر من الخوف
امي تركض للمطبخ وترجع شايلة صينية الريوك بسرعة توكلني بيضة طاكتها بالدهن
وخبزة حارة عمتي شمس تخبز يومية الفجر وكلاص حليب
أكل واغسل وأطلع
-أروح ويه أبن جيرانا أسمه علي صديقي
وياي بنفس الصف نروح ونرجع سويه للمدرسة
الحمد لله اني شاطر بالصف
لان أمي مخلصة ابتدائي تعرف تقرا وتكتب
بس أرجع للبيت تستلمني دك قراية وكتابة
-واذا ضجت من الدراسه لو عاندت ،،
حزام أبوي عادل يلعب على ظهري
اكوم ألكف الواجب لكف ويطبع بدماغي
-الحمد لله اليوم عدا بسلامة
باقي ٤ أيام على يوم عرفه
ويصير اول يوم عيد الاضحى المبارك
وهم عرس عمي باسم
البيت مكلوب وصاير عبارة عن مهرجان تنظيف وتعزيل وترتيب
عماتي نجمة وكمرة وشمس
وياهن امي فاطمة
كلهن يشتغلن
وجديتي هي اللي توجهن سون هذا وعوفن هذاك
-أمي أخذتنا للخياطة قبل يومين أنا وأركان
فصلت النا دشاديش جديدة لونها شكري
أبوي جاب النا القماش هو هم فصل ويه عمامي وجدي دشاديش جديدة علمود عرس عمي باسم
وأخذونا بالجمعة الفاتت للكاظمية
أشترولنا شحاطات جديدة
وامي كالت لأبوي/أشتريلهم بعد بناطير وقمصان واحذية تفيدهم للطلعة
و وراهم كشخة العيد
شكد فرحان كلشي أشترولنا جديد
وفرحتي تزيد أكثر وأكثر بأول يوم العيد من أجمع العيديات الكل يورقلنا أني و أركان
لان بس احنا الأحفاد الموجودين بيت جدي
من ناحية العمام وناحية العمات
(الحمد لله يعني أحنا ألاحفاد المدللين)
-بعد ماكملن عماتي الشغل والترتيب
بلشن يطبخن الغده ،،
لان بدت الوفود تجي عليهم
من عمات وخالات وعمام وخوال
ونصهم من قبل كم يوم موجودين
كلساع البنات يدكن على سطلة اللبن الفافون ويغنن النسوان الكبار وباقي البنات يكومن يركصن ، وأني واركان نكمز وياهن
والكل فرحان
أبوي وعمامي أفتروا على كل المنطقة
وعزموا الكل على باجر بليل على حفلة حنة عمي باسم
عماتي والبنات
اني و اركان كاعدين نتفرج عليهن
هاي النايمة بالكاع وحاطة شعرها على الجرجف والبنية الثانية تسحبه الها بالأوتي حتى تسرح شعرها
-وهذنيج الاثنين كاعدات بالزاوية يحفن وجهن
-وهذنيج مسويات طاوة شيرة
وكاعدات يسون أيديهن ورجليهن
ومرات نسمع صرخاتهن بصوت هادي وحدة تكفخ الثانية تكوللها /وجعتيني موو هيج ايدج شثكلها
-وهذنيج وحده تخللي للثانية حنة لشعرهن
-وهذنيج ينزعن ويلبسن بالملابس ويكدرنها
ويتفقن شنو يلبسن بيوم الحنه وشنو يلبسن بيوم العرس
ومن خلصن كلهن حنن أيدهن
الحلو يخلن الحنة بس برحراحة جف الايد بشكل دويرة ويخلن الباقي بداية أطراف الاصابع من فوك تصير شلون شكل الشموع المشعولة
طبعا هاي الهوسة كلها بغرفة عمتي شمس
وصوت ضحكهن وسوالفهن عبالك دجاج ويگاگن كلشي ماتفتهم عليهن ،،
شلون هن يفتهمن وحده على الثانية مااعرف
الصبح صار يوم عرفه تقريباً نص الخطاطير الموجودين صايمين
يكولون //اللي يصوم بهذا اليوم يعتبر كفارة
عن ذنوب السنة سابقة والسنة لاحقة
المغرب بعد ما الجماعة الصايمين تفطروا
واللي أتعشوا
واللي شرب جاي وياه لفة صغيرة
بلشوا يركضون ويستعدون للحفلة
باليل صارت الحنة وهذيج الأجواء الخيالية
كعدت عرب بالكاع عمامي فرشوا كل البستان بسط ومنادر وصارت الكعدة على شكل جمعة مربعة الشكل
ابو الدمام يدك وابو المطبك يقسم
الشباب لعبوا جوبي يدكون الكاع برجليهم
تقريباً كل الحضور لابسين دشاديش
صديق عمي باسم جاب بنات كاوليات حسبتهن ٦ لبسهن مخازي لاطش عليهن الثوب ،، وكل ثوب بي فتحات طويلة
طالعة رجليهن لحد الركبة
وشعرهن مفتوح وطويل
ومكياجهن طوخ
ويركص بالخناجر ويكمز هنا ويرجعن هناك
الموجودين كلهم مبحلقين عيونهم عليهن
وصافنين عليهن شلون يركصن
حتى أني وأركان وباقي الجهال نباوع عليهن
والشباب هذا اليصفك ،، وهذا اليصوفر
وكم واحد من الموجودين من الواصلين بالدولة وطاكين مو مثلنا أحنا عرب وفلح
كاموا يطشرون عليهن فلوس
وعلى صوت دك الدمام وتقسيم المطبك وبهذيج الحفلة الخيالية حنوا عمي باسم
حطوا الحنة على أصبعه الصغير بيده اليسره
حناه عمه الجبير (نوري ) ولف أصبعه بقماش أبيض وكاموا يرمون ،،
صار الطلق فوك روسنه نثار الجكليت
ومستمر ابو الدمام بالدك وابو المطبك يقسم للكاوليات وهن ماقصرن ذبن لحم وشحم
بعد ما كملت الحفلة بره
دخلنا للبيت العمام والخوال وولدهم
وكملوا الحفلة بالبيت صارت حفلة عائلية
حتى أبوي جر جديتي وكاموا يركصون بنص الاستقبال
-ثاني يوم الصبح اول يوم العيد
يالله شكد فرحان،،
عيد ،،وعرس ،،وهم أجمع عيديات
-بعد ما سلمنا على الكل أني و اركان
وبعد التهاني والتبريكات بيوم العيد
أفترينا على كل الحضور
وبدأ الرزق يهل علينا
أخذنه العيديات من الكل زلم و نسوان
والكل أنطانه محد فشلنا
ركضنا وضمينه العيديات يم أمي
وهي نطتنه اللي يكفينا من مشتره اليوم للحلويات حالنا من حال باقي ربعنا
أمي عدها دخل (صندوق حديد وبي قفل)
ابوي سواه الها يم الحداد تجمع بي
-مر اليوم ركض بركض وصار وكت الزفة
بيت خالة سهام بنهاية الديرة
هي مو غريبة تصير بنت أختها لجديتي
رحنا وية الزفة وجبنه العروس ورجعنا للبيت
-وبعد ماعشوا الناس والكل تبارك الجدي
والابوي والعمامي بالعرس
زفوا عمي باسم لغرفته
بس اني كاتلني الفضول اريد أعرف شكو
اراقب كلشي وأسمع كلشي
-بعد مازفوا عمي باسم شوي وطلع من غرفته
واخذ سلاح أبوي وكام يرمي بالحوش
والنسوان حركن الدنيا بالهلاهل
طبن يم خالة سهام وطردني انا واركان من الغرفة وقفلن الباب عليهن
-بقيت أبجي واركان وياي على الواهس هم كام يبجي نريد ندخل جوه وياهن نشوف العروس ليش طردونا !!!
-اجه أبوي واخذنا لغرفتنا
وكال// بدلوا هدومكم حتى تنامون
أحنه نفذنا الاوامر بسكوت لان يجلدنا بالحزام
وامي ماكو حتى أدافع النا راحت طبت جوه يم العروس ويه باقي النسوان
و مرت الايام حلوة وبسيطة
وكلشي بيها على الفطارية والطيبة والعيشة سوية على محبة الله
ابوي يطلع هو وعمامي للزرع
وياخذون المحصول ينزلوه للعلوة
يبعون ويرجعون للبيت
-بيوم جديتي كامت تهلهل بعد ماشاورتها خالة سهام
ظليت أفر بأذاني شكو ليش تهلهل خاچية (أسم جديتي)
بس طب عمي باسم من الشغل
جديتي تلكته ((بالمبارك عليك يمه مريتك حبلى ))
-ركضت سألت أمي //شنو يعني حبلى
كالتلي/يعني خالة سهام اكو بطنها جاهل صغير وراح تجيب اخ الكم تلعبون وياه
يالله شكد كيفت وفرحت طرت من الفرح
بس كلساع وأصفن على بطن خالة سهام
شلون يصير بطنها جاهل ؟؟
خطية خاف يختنك لان هي ناعمة وكصيرة وبطنها صغيرة شلون يكفي المكان !!!
-زين الجاهل منو يشبه !؟
يطلع يشبه عمي باسم أجلح أملح
وناسيه جدي بشمس تموز واحترك !!
لو يشبه خالة سهام بيضة وناعمة
وعيونها ملونة
وشعرها أحلى من شعر أمي فاطمة!!
-رحت على أمي لكيتها تكنس بالحوش
هو مصبوص صبة ناعمة
تكنسه الكاع بمكانسة مال سعف
ونوب تغسلها وترجع تمسحها بوصلة المسح
حتى تطلع الصبة نظيفة وتلمع
واذا ما تلمع تبقى عمة شمس تردم فوك راسها
-يمه خاله سهام شلون صار هذا الجاهل بطنها؟؟
فاطمة/تعال هنا يمي خل أفهمك
-تقربت على أمي وهي وكفت تكنس
وكعدت بالكاع مكنبصة وشمرت المكناسة كدامها
فاطمة/شوف يمه
عمو باسم يحب خالة سهام
وهي زوجته انت مو تذكر عرسهم
وهو يحبها ويعاملها معاملة حلوة
شلون ما أبوك يحبني ويشتريلي كلشي أحبه
ربي العالمين انطانه هديتين أنت واخوك اركان
وهسة أنطاهم هاي الهدية لان واحد يحب الثاني ورزقهم بجاهل وصار بطن خالة سهام
محمود /يمه يعني أني من أكبر هم أزوج وأحب زوجتي ورب العالمين راح ينطي هدية جاهل صغير لمرتي
فاطمة/يا يمه يوم عيد هذاك اليوم
اي يمه ان شاء الله هم تكبر وتزوج وتحب زوجتك
ويصير عندك هواي جهال
محمود /يمه هو الجاهل أبن عمو باسم شوكت يجي؟؟
حتى أشوفه والعب وياه
فاطمة/أحسب من اليوم أن شاء الله وبعد ٧ شهور
محمود /يعني شوكت بعد ٧ شهور
فاطمة/هاا ،،أني أكلك يعني من تصير امتحانات نص السنة مال صف الثاني
محمود /هااا بعد هواي ،،
هسه بس أريد أخلص صف الاول
يمه ترى أضوج من الاملاء
المعلمة ترد سريع وماالحك أكتب وياها
فاطمة/لا يمة لا تكول اضوج
اريد تاخذ كله عشرات ب الأملاء
وتبقى شاطر
يمه اني أريد أوصلكم بالدراسة انت وأخوك
محمود /يمه بس أنتي كولي لابوي لا يجلدني بالحزام ترى أخاف من عنده
فاطمة/يمه أبوك يحبك ويريد مصلحتك
وهو يجلدك علمود تبقى شاطر
ومن تنجح يتباهي بيك
ويكولون الناس //شوفوا عادل الفلاح أبنه محمود شاطر وطلع الاول على صفه
محمود /صدك هيجي الناس تكول عليه أني شاطر
فاطمة/اي يمه يكولون الناس عليك شاطر وخوش ولد
هسه كوم فوت جوه للغرفة
واقره دروسك بين ما اخلص شغلي
وأجي أقريك
ولا توسخ ترى تصلخ جلدك عمتك شمس
-ركضت ودخلت لغرفتنا
واني أفكر الله شكد حلو الناس يكولون عليه شاطر الا يومية أقره وأخذ كله عشرات
-ومرت الايام وصارت امتحانات أخير السنة
وامي قرتني لحد ما طلعت روحي
وبعدين أستلمت شهادة الاول أبتدائي
وطلعت الأول على صفي
-أخذت شهادتي وركضت
على أبوي للزرع من بعيد شفته
واصيح بصوت عالي حتى يسمعني
((بويه ،، بويه طلعت أول على صفي))
عادل/صلاوات على محمد
تعال أركض تعااال يعيني
ركضت وكمزت بحضن أبوي
شالني وشمرني بالهوى وكام يبوس بيه
وأخذ شهادتي من أيدي
وبقى يباوع بيها كلها عشرات
-شالني على ركبته
ورجليه نزلت منا ومنا على صدره
ورجعنا للبيت وهو طول الطريق شايلني
وكل واحد يشوفنا بالشارع
ويشوف شهادتي بيدي ويشوف ضحكتي وضحكت أبوي
يعرفني ناجح
يتباركون لابوي ،، ويشجعوني
-دخلنا للبيت والفرحة تركض كدامنا
جدي بوسني ،، وجديتي تهلهل وتبوسني
وامي تحضن بيه وتبوسني
-المهم عندي هسه أحصل رزق
-مو بس تبوسون بيه ،،حركوا أيدكم ،،
من مال الله فرحوني ،،يفرحكم بالاكثر
1 myhopes
-الكل كام يضحك ،، ونطوني ما فشلوني
ركضت ضميتهن بدخل أجمع يم أمي
-للعصر أمي شوت كيك بتنور الطين
وخبطت شربت ووزعت على الجيران
تكول// هذا الثواب لوجه الله
حتى يفرحك دوم ويبعدك عنك الحسد
-ركضت العطلة بسرعة
خلصتها بين اللعب بالشارع ويه باقي الجهال
وبين الروحة والرجعة ويه أبوي للزرع
وبين اللعب ويه أخوي أركان
وهذا كتاب الرياضيات أكبر من كتاب الصف الاول
وهاي كتب الدين شو هواي بيها كتابة
-بلش مشوار الدراسة بالصف الثاني
وامي تقريني وتكتبني وتردلي أملاء
هي تعبت ،، واني تعبت أكثر منها
رجعت من المدرسة وأشوف خالة سهام
تلوب تروح منا وترجع منا
وساعة تبجي
وساعة تعض بالخاولي شايلته بيدها
وجديتي تكول لعمة شمس//أمشي فورليها مي وهيل ماتطول هسة تجيب وتكوم بسلامة
ركضت على أمي جانت تحوس بالمطبخ تعزل وتنظف //يمه شبيها خالة سهام ليش تبجي وتفتر بالهول
فاطمة/يمه خطية عدها ولادة أدعيلها
انت طفل وكلبك نظيف والله يسمع دعائك
-ركضت بدلت وغسلت ايديه ورجليه
وشمرت جواريبي بالطشت
وكعدت بالهول يم جديتي
اراقب خالة سهام تروح وترجع بالهول
أجى اركان من الشارع وشاورته عن السالفة
كيف وهم كعد وياي نراقب خالة سهام
للمغرب وخالة سهام كامت تبجي وتصرخ بصوت عالي...وامي وعمة شمس حبسنها بغرفتها يكللها /عضي الخاولي عيب يطلع صوتج الحجي وحموينج موجودين
-أجه عمي باسم من الشارع وياه مراه جبيرة بالكوة تمشي دخلت بغرفتهم
وجديتي لحكتها
-وجدي توضى وبدأ بالصلاة قبل وكت صلاة المغرب صفنت جدي ليش هسة يصلي !!
-وعمي باسم أستلم الهول روحه رجعة بدل خاله سهام
-أني واركان أبوي حبسنه بالغرفه
كمت أبجي أريد أشوف الجاهل
أبوي صرخ عليه سكتت بس دموعي بقت تجري على خدي
واركان يبجي وياي على الواهس
نمت من التعب من الفجر كاعد
نام اركان يمي على نفس المخدة مال ريش
وابوي غطانه بالغطوة
فزيت أبوي نايم يمنا ويشخر خطية يتعب بالزرع
كمت بهدوء أخاف من أبوي لا يفز ويكعد يكتلني ركضت بره للهول جدي نايم بمكانه
رجعت للغرفة مال عمتي شمس لكيتها
بس هي نايمة وجديتي ماكو
ركضت لغرفة عمي باسم فتحت الباب على كيفي ، شفت خالة سهام نايمة
ويمها سلة صغيرة بيها شي ملفوف بقماش أبيض
وامي نايمة يم راسها
وجديتي نايمة يم الحايط
-كعدت على ركبي وبقيت أباوع
هذا وجه بشر نفسنا بس شكله صغير
خطية بس لا هذا الجاهل قزم !!
نفس هوبي القزم اللي اهله يم الدكان
خطية هذا الجهال هم راح يصيحون عليه القزم !!!
سهام/فزيت من الوجع بطني تلوني
ما اكدر أنام جرة وحده
وأشوف محمود كاعد بصف السلة
بزون وكانصة على لحمة
-ها محمود حلوه فرح
1
اااا خاله كمزتيني عباليج نايمة
منو فرح ؟؟
فاطمة/ها يمه شوكت كعدت تعال نام بحظني
محمود /يمه شنو هذا ؟؟يعني هو هذا الجاهل بسلة؟؟خطيه قزم موو !!شو صغير حيل؟؟
-ومنو فرح؟؟
فاطمة /بس تعال نام بحظني واني اسولفلك
خالة سهام جابت الجاهل
وهذا الجاهل بنية وسماها عمو باسم فرح
وهي مو قزمة بس بعدها صغيرة
-شوكت ألعب وياها
فاطمة /ان شاء الله شويه شويه
تكبر وتلعب وياها
-يمه خليها بحظني اريد اشيلها
-كامت أمي من فراشها
واني زحفت على ايديه ورجليه ورحت يم السلة
امي شالت فرح وخلتها بحظني
شكد خفيفة وصغيرة
-يمه يصير تبقى اليه ،،
ومن تكبر اني اتزوجها واكوم احبها
نفس ماابويه يحبج
حتى رب العالمين ينطينه هديه
نفسها جاهل صغير ......
اترككم في أمان الله وحفظه
أنتظروني بالحلقة القادمة
