رواية نقطة تحول الفصل الرابع 4 بقلم جمانه السعيدي
البارت الرابع
نقطة تحول
جمانه السعيدي
عافني ابوي وهي اخذت جهالها وطلعت وتحجي ودريم عليه
موتتني كتل وابوي الشفيه لازمني الها
بدون مايسئل شنو السبب الي خلاكم تتعاركون
زوجت ابوي تحجي بصوت عالي وتسمعني وتسمع ابوي
اي مبينه عرمه ووكيحه تربية شوارع
الي متربيه بلشوارع منيين اجيب الاخلاق
شايله الوكاحه واللطلاط كله
والنوب يردونها تعيش وياي بنفس البيت
لاولله دقيقه ماتبقى بهذا البيت لو اني لو هي
والنوب اتمد ايدها على ولدي
شلون جسره وبلا اخلاق
التفتت على ابوي وكتله ترا هم ضربوني بلاول
اني ماليه شغل نايمه ويضربوني
محمد اش ما اسمع صوتج ابد شلون تمدين ايدج عليهم ترحيلهم فدوووه
هلمره هي ضربتج مرت الاخ اني اكسر راسج تكسر
صدك تربية شوارع
حتى اني ما اريدج بهذا البيت ابد
جيبي علاكة ملابسج والحكيني بسرعه
وجهي وضهري يوجعني من الضرب ولله لو عايفني عليها اله اخرب ملامح وجهاااا
مدري شعاجبه بيها جنها بومه
طلع ابوي وشلت علاكة ملابسي ولحكته
وهاي الجلبه زوجته بعدها تحجي وتغلط عبالك بالعه مسجل وتهدد وتتوعد
طلع ابوي من بيتهم ودخل بيت عمتي واني دخلت ورا
محمد بشرى بشرى وينج
بشرى هااا خير شكووو شو تصيح
محمد خليها يمج يومين علما الكالها مكان واخلص منها
ما صارلها يوم يمنا وحركة البيت حرك
اتصوري ماده الجهال واحد فوك الثاني وتضرب بيهم
بشرى عوفها وروح
طلع ابوي من البيت باوعت عمتي عليه
بشرى ليش هيج عبير اني مو وصيتج اتصيرين عاقله
عبير ولله نايمه اني ما اليه كل ذنب
جمانه السعيدي
بشرى شلون ماالج ذنب كاتله الولد اثنيينهم
عبير تدرين البارحه عافوني وحدي وحتى عشى ما جابولي نمت على الكرويته
والصبح كعدت على راشدي طير اذاني لكيته مهند
والزغير ضربني بلنعال
ليش اني شمسويه
هذا كله من حجي امهم براسهم
هي ما شافت مني شي مزين حتى تحجي عليه
وابوي الشفيه ابدال ما يطيب خاطري بكلمه لازمني الها
وتضرب بيه
واني احجي ما كدرت الزم دموعي راسا نزلن وكمت ابجي
احس بلضلم ومحد واكف وياي
اني شني ذنبي عمه صار ١٢ سنه شامرني ولايسئل عني
ولامتحمل مسوليتي
وهسه ابدال ما ياخذني بحضنه ويعوضني
البارحه يكل الزوجته اشمرها بدار الايتام
ابوي عايش وعندا خير من الله واني يريد يشمرني بدار الايتام
وين اروح بس كوليلي
امي ماتت وخالي تعب من مسوليتي وابوي يريد يشمرني
وين اروح اكتل نفسي
ما ادري رب العالمين ليش خالقني
بشرى حيل اتاثرت بكلامها وحسيت بمعاناته طفله
والكل مايريدها
بدون مايكون الها ذنب
اباوع وجها احمر من الضرب واكو شخط يم اذنها طالع منه دم
الله لايرضا عليها شلون هيج تضربها
تقبل واحد يضرب جهالها
بشرى ميخالف حبيبتي الله مراح ينساج لازم اكو حل
واني راح احاول اساعدج ومآ اعوفج
تعاي ادخلي اسبحي ولاتبجين وبدلي واني راح اسويلج ريوك واني وياج ننتضر رحمة الله
عبير دخلت سبحت اباوع جسمي ازرك من ضربها وضهري يوجعني
لبست تراك ولادي وطلعت
لكيت عمتي مسويتلي ريوك تريكت
جمانه السعيدي
بشرى تعاي نطلع للسوك اني وياج واشتريلج كم شغله
قفلت بيتها وطلعنا
السوك قريب عليهم تقريبا مشي عشر دقايق
كلما تريد تشتريلي ثوب أكلها لا ما اعرف البسه
اشترتلي تراكات بناتيه اثنيين
ومعطر وجنطه زغيره حلوه وتكرمون نعال
واشترتلي لعابه تخبل
اول مره افرح من كل كلبي رغم وجهي وضهري بعدا يوجعني من الضرب
رجعنا للبيت لبست التراك كلش حلو عليه
بدت عمتي تحضر بلغدا وكالت تعاي ساعديني
خلتني اثرم الزلاطه وتسولف عليه
بشرى انت مخلصه سادس
عبير اي نجحت للاول
بشرى راح اقدملج بلمدرسه الي اداوم بيها ونروح ونرجع سويه
عبير اذا بقيت هنا ابوي يريد يوديني للملجئ
اني مستحيل اكدر اعيش ويه زوجته بيت واحد
وهذوله اخواني شبيهم هلكد يكرهوني اني شمسويه
بشرى لاتفكرين زايد الله كريم رب العالمين مراح ينساج ابد
.الساعه ثنتين اجا عمو محسن بس شافني ضحك
محسن هاي البنيه الحلوه عدنا هلو عمو شلونج
عبير هلووو عمو الحمد لله زينه
كعدنا نتغدا وكملنا واني ساعدت عمه لمينا المواعين
واني اخذت الزباله شمرتها
ومن رجعت كالت عمه اغسلي اديج زين وروحي نامي
غسلت اديه وأخذت لعابتي ورحت للغرفه لعبت اشويه ونمت
بشرى محسن اليوم اجتني فكره واريد اخذ رائيك بيها
اذا توافق نتوكل على الله واذا ترفض اني مراح اسوي شي غصبا عليك جمانه السعيدي
محسن بدل لبس كلبيه وتمدد على الجربايه كولي اني اسمعج
بشرى هاي البنيه المسكينه امها ماتت وخالها على كد حاله ومآ يكدر يتحمل مسوليتها
وابوها مايريدها
وزوجت ابوها اليوم هي وجهالها كاتلينها
ابوها يريد يرجعها الخالها وخالها مايريدها
لو يدزها للملجئ
محسن والمطلوب
بشرى اني اريد اخذها تعيش ويانه هاي من لحمنا ودمنا
واذا ربيناها وحافضنا عليها كلها حسنات النا
بعدين اني العطله كلها وحدي اريد ونس ويايه بلبيت
وهي مبينه ابنيه نبيها وذكيه
بس الضروف معاكسه وياها
شتكول لو تبقى عدنا واحنا ولله الحمد امورنا زينه
وهي مراح تثقل علينا
اني ما اعرف ليش دخلت الكلبي وحبيتها بسرعه
محسن اني ماعندي مانع الي تشوفي صح سوي
بس خاف تبقى عدنا وانتعلق بيها ويرجع ابوها لو خالها يريدها جمانه السعيدي
بشرى لا اطمن محد يريدها واني راح اسويها انسانه ثانيه واغيرها من ولد إلى ابنيه حلوه ومرتبه
ولو راح اتعبني
لان تصرفاته كلها تصرفات ولد بس اني حابه ادخل بهذا التحدي الصعب
ورا يومين اجا محمد وكال دزيت واحد على خال عبير ويكول اني بعد ما استقبلها وبس اجيبونها
اروح اشتكي على ابوها واكول شامر بته بلشارع
عبير اني كاعده جوه بلغرفه وسمعته
اتصدكون ضجت اكثر مو من موقف ابوي
لا من موقف خالي الي رباني
مامتوقعته يتخلى عني بهاي السرعه
بشرى خويه اني عندي حل الهاي المشكله راح يريح كل الاطراف
بتك تبقى عندي واني الله شاهد راح اخليها بعيوني واحافظ عليها
ترا مايصير نشمر لحمنا بلشارع بس عندي شرط
محمد اي شي تكولينه المهم تخلصيني منها
بشرى تكتب تعهد بعمرك مراح اطالب بيها ولا تدخل بحياته لا من قريب ولا من بعيد
اني المسوله الوحيده عنها وعن حياته
محمد ولله اكتبلج الي تريدي واجيب عشر شهود يشهدون
بس كون بعد لا اشوفها ولاتشوفني
ولا تدخل بيتي للابد
بشرى خلاص اتفقنا اني وياك بعد مالك شغل بيها ابد
محمد باجر اوقعللج كدام شهود اثنيين بس خلصيني منها
بشرى هاي هي انحلت المشكله
وفعلا ابوي جاب ورقه كاتب بيها متنازل عني العمتي وجاب اثنيين وقعو على الورقه
قربت المدرسه وعمتي خابرت مدرسه تعرفه يم بيت خالي
سحبت اوراقي من الابتدائيه ودزتهن بالبريد
وعمتي قدمتلي بمدرستها
بشرى عبير بعد انتي صرتي مسوله مني واني شكول تكولين حاضر اني اريد بنيه حلوه مؤدبه ما اريد ولد
مرعبل وكيح
لازم اتصيرين احسن وحده وتثبتين الكل الناس الي اتخلو عنج انت بنيه شاطره ومؤدبه ومتستاهلين الي صار وياج
عبير يعني شسوي
بشرى هااا اني هسه اكلج شنو تسوين
اولا شعرج لازم يطول مثل البنات
ثانيا ماكو حجي بصوت عالي نحجي بصوت ناعم مثل البنات
تلبسين مثل البنات مومثل الولد
وأهم شي تكونين شاطره بلمدرسه فهمتي
واني بلمقابل راح اوفرلج كلشي ملابس وكتب واللعاب
عبير انشاء الله راح اسوي كلشي تكولين علي
واكون عد حسن ضنج
هنا بدت نقطة التحول بحياتي
لازم اتحول من ولد إلى بنيه
او مو اي بنيه عاديه لازم اكون مميزه
ولازم اساعد عمتي تنجح بالتحدي الي دخلت بي علمودي
لازم اكون انسانه ثانيه
وانسى عباس للابد
واكون عبير وبس
