رواية إن الاسود فرائس الغزلان الفصل الثالث 3 بقلم جوهرة

رواية إن الاسود فرائس الغزلان الفصل الثالث 3 بقلم جوهرة 

وعندما تحتاجون لنا تذكروا أننا سيئين كما اخبرتم الناس عنا

ــــــــــــــــــ

ام تغلب / ادري بليتوهم بلوة ماتخافون الله بالحريم ، البنيات شنو ذنبهن

تغلب مغمض عيونه وساند رأسه عالكرسي ومريح جسمه يسمع أمه تحجي بعدما سولفلها الصار أبيت عمهم ابو منذر ، شيجاوبها مهما كال مراح تقتنع ، صح القوات تابعة للفوج اللي هو مترئسة وكلمته سيف عليهم بس اكو عناصر منفلتة منهم ويتصرفون حسب اهوائهم

ام تغلب / اي ابقى ساكت ما تعجبك سالفتي

استعدل بكعدته وهو يفتح عيونه عليها / والله يمه شأحجي راح اطلعيني غلطان

ام تغلب / وليد عمكم شلون هيج يصير بي شلون خليتو بوجه المدفع

تغلب / منذر بالفترة الأخيرة ما ياخذ شور أحد شوره من راسه مسوي بيها المجاهد والبطل اللي محد بعينه وشوفة النفس هي اللي وكعته ، يمة رحمة لاهلج انتي ماتدرين عن شي فلا تبقين تحجين

صاح على زوجته / شيداء وين صار العشا

شيداء مدت راسها من الباب / تريده هنا لو بالمطبخ

تغلب برود / جيبي هنا

عالعشا مجتمعين وساري دخل سلم وكعد عالقنفة وسحب الريمونت يفار بالقنوات صاحته أمه يتعشى ما قبل كاللها ممشتهي

ام تغلب / شبيك كالب الخلقة

ساري ذب الريمونت و سند ذراعه عالقنفه / ماكو شي

ام تغلب ماعجبها رده لأن تعرفه من يضوج يبين عليه وحبت تستفزه / اكول ما ناوي تتزوج حتى اخطبلك

ساري بقى صافن بكلامها يشك وراه شي / شايفتلي مرة ؟!

ام تغلب / البنات ما يمكثرهن بس انت اشر عالبنت ، لو تريد اني اختارلك

تغلب مضغ اللكمة بهدوء وعينه على اخوه اللي يعرفه زين راح يستفز واكيد امهم متعمدة

ساري / تدرين اني مختارها ، ليش تحركين گلبي

ام تغلب / نجوم السما تلوحها بيدك ورفيدة ما تلوحها ، تزوج لا تبقى ناطرها

تلون وجه ساري بالغضب وتنفس بقوة / ابشرج ام تغلب كدرتي تقهريني

ام تغلب / شسويلك وانت ماتقتنع ولا تسمع كلمتي

سكت ساري وعينه عالشاشة بس فكره بعيد

ام تغلب تسال شبداء متعمدة / بنت عمج اللي تخرجت العام الفات مهندسة شخبارها

شيداء ردت بهدوء لأن تعرف ساري ممتقبل سالفة أمه / واحد من جماعتنا حاجي بيها واحتمال اكيد يخطبها

ام تغلب / اي عالخير

ساري بانفعال / يمه شبيج وياي ؟!! شو تغلب من تزوج ماحجيتي مثل حجيج هسة

ام تغلب / اخوك اول ما منذر كاله البنت تريد تكمل دراسة ماتتزوج الا تاخذ الشهادة ، سحب روحه خوما مثلك مستقتل عالبنت

تغلب كام من العشا ونتر بساري / كوم اطلع للمضيف لاتبقى بسوالف النسوان عدنا كعدة وجماعة يجون بعد شوية

شيداء عينها عليه تنهدت وبقت ساكتة لأن تعرف بسالفة خطبته لميثاء اللي رفضته

ــــــــــــــــــــ

دخلت امي وراهم للاستقبال بعدما صحتها تطلع عالزلم اللي برا وعددهم تلاثة ، امي كعدت على جهة لابسة عبايتها وسبحتها بيدها اني بسرعة رحت حضرت ضيافه ورجعت دكيت الباب اجت امي اخذتها وضيفتهم ، بقيت اذني عالباب اسمع حجيهم ، جماعة منذر جايين يتطمنون علينا ، اسمع امي تحجي وياهم بطاري الفلوس ماقبلت تاخذهن كالتلهم احنا ممحتاجين انطوهم للناس المحتاجة ، كلامها قهرني امي نفسها عزيزة واحنا بهذه الفترة حيل محتاجين للفلس تقاعد ابوية ميكفي وراتب رفيدة يادوب والمصاريف هواية ، وهالشهر الفات جمعنا اللي نكدر عليه ووصلناه لمنذر اجار للبيت اللي كاعد بي لأن شغله بالسيارة يادوب وميسد وانوب زوجته طلباتها يامكثرهن جيب واريد وونسني وطلعني والحقيرة خابرت قبل ما ندزلهم الفلوس تكول شنو اني خوما ابقى هيج وضعي مخربط وعايشة بالختلات ومن تعاركت وياها تكلي زين صابرة على اخوج لو اريد ابلغ عليه ، شبعتني قهر وكنت اغلط عليها الحقيرة ابد ماتنصلح حرامات هذه زوجة منذر ، منذر المعدل اخو خيته اللي إذا سولف كلها تسمعه وتهابه ، ، شهكت وخليت ايدي على حلكي من حجى واحد منهم يكللها لأمي اكو من شايف منذر بمدينة العاب هو وزوجته وابنه خل ينتبه أكثر على روحه لأن العين عليه واني اتصلت عليه وحجيت وياه

امي ردت كالت وليده صغير وينقهر عليه لأن محبوس بالبيت يضطر يطلعه شوية ، بگلبي ادعي على دلال والله هذه سوالفها اكيد من كثر الزن والملحه يطلعها شيسويلها لعد

طلعوا الزلم اني وراهم طلعت للباب باوعت من الشباك اني ورفيدة إلى أن اجت امي وبيدها ظرف ذبته عالكاونتر / جماعة منذر من طلع حلفني بغلاة منذر اخذهن يكلي لاتفشلينا لأن منذر وكفاته هواية ويانه وشنسوي قليل بحقه

تنهدت واني ارد عليها / والله يا يمة محتاجين لكل فلس بس مانكول الا الحمدلله

ام منذر / الحمدلله بنتي الحمدلله على كل حال

ميثاء / يعني دلال مايبرد گلبها الا بالخوارة ، راح اجيب مصيبة لمنذر

رفيدة / عزا شنو صاير

ام منذر / واحد منهم يكةل حذرو منذر لأن شايفينه هو وعائلته بمدينة الالعاب

رفيدة / اخ الله لو الزم دلال الا اموتها

ام منذر / اششش الله الحافظ لا تبقن تغزلن بالسوالف وتسون مشاكل

دخلت امي لغرفتها واني اخذت الظرف ورحت وراها وبقت رفيدة بالمطبخ ، شو ورى ساعة ما نسمع الا صوت ساري يصيح امي !!!!

ـــــــــــــــــــ

رفيدة /

من طلعوا جماعة منذر بقيت بالمطبخ كلت اسوي كيكة كملتها ودخلتها الفرن ، وكفت بالباب ساندة جسمي وعيني على الحديقة بس عقلي بغير مكان ، باب الحوش انركعت شنو السالفة شبي هذا كل عقله ؟!!!!

بقيت صافنه على الفتح الباب ودخل بلا استئذان ، جنت واكفه سانده جسمي على باب المطبخ وصافنه بالصار قبل شوية ، شو الأوضاع مخربطة ومن سيء إلى اسوء ، الله يعين

خزرته واني اطلع للكراج / ماشاء الله ولد ابو تغلب ولا واحد بي حظ ويعرف العيب شنو

ساري بغضب وكف قريب عليها / نعرفه للعيب من قبل ما ابوج يتزوج امج اللي هي عمتي ام منذر الله يحفظها ، العتب على ام لسان اللي ماتحشم وتحترم ولد عمها

رفيدة من بين سنونها يادوب تحجي ماتريد امها تسمع / انت شعندك هنا داخل جفت للبيت متستحي كول هذولي نسوان وعيب ادخل بلا استئذان

ساري ضيك عيونه وبداخله يعذرها هو فعلا غلطان بس اللي سمعه خلاه مجنون وما يحسب عواقب تصرفه / وين عمتي ؟

رفيدة / شتريد منها ترى اللي جاها منكم يكفيها وزيادة

ساري تنفس بقوة وغضب / لاحول ولا قوة الا بالله ، ولج لا اطلعيني من طوري ، صيحي عمتي

رفيدة تخوصرت / معلية

ساري وقربب منها كولش زمخ بيها / منو الزلم اللي طلعوا من بيتكم قبل شوية ، خطابة موو ؟!!!

رفعت تك حاجب وكورت شفتها وهسة يلا عرفت سبب عصبيته وحبت تأذي وتستفزة / صحيح ، سبحان الله السالفة هنا بمنطقتنا ما تبات الليل ، تصور خطبوني ووافقت

ساري دفعها بصدرها ودخل للمطبخ يصيح بعصبية وصوت عالي / عمممة

رفيدة شهكت بخجل وصدمة لأن ايده بصدرها عاطت بي / شكد صلف ومتستحي امشي اطلع براا

لف رأسه عليها وعيونه افترت عليها كلها ورجع صاح على ام منذر

اجت ميثاء بسرعة وامها وراها ، ميثاء فتحت عيونها الوسيعة بصدمة لأن شافته عصبي وبنص بيتهم / ساري !!! شكو شنو صاير ؟!!!

ساري من شاف عمته ام منذر تقرب باس راسها وسلم عليها وهي ردت عليه بصوت ناصي عيونها عليه تريد تعرف ليش هيج عصبي ويصيح

ام منذر / خير يمة شبيك ؟!

ساري وأيده تاشر على رفيدة / عمة صدك الزلم اللي جانو هنا خطبوا رفيدة

ميثاء خزرت رفيدة اللي مبتسمة بخبث ورجعت كالت / صلي عالنبي ، منين جبت هالسالفة

ساري بلا ما يباوع عليها عينه على عمتن اللي راحت كعدت عالقنفه / عمة انتي احجي صدك هالحجي ؟!!

ام منذر رحمت حاله من شافته زعلان وعصبي / لا والله يمه ذول جماعة عرف اجوا يتطمنون علية

ساري خزر رفيدة اللي بعدها مبتسمة بسخرية واضحة / ليش ولج ؟!! ليش هيج حجيتي هااا ، شلون تكولين خطبوني ووافقت

ام منذر زمخت برفيدة / كص بلسانج كون ، فوتي جوة لغرفتج وحسابي وياج بعدين

رفيدة انطته نظرة حادة ودخلت ، وساري تخوصر وهو يمسح على شعره بين الحجلام من تصرفه وهو يدخل بغضب وبين تصرفه اللي يثبت للكل هو يريد رفيدة / سمعت من واحد من الجيران كال الظاهر الجماعة جايين خطابة ، ورفيدة أكدتلي هالشي من سالتها

ميثاء / كالك الظاهر يعني ما اكدلك بعد على شنو هالتصرف والهوسة اللي سويتها

ساري ضيك عينه عليها / قنعي اختج لأن ما تصير مرة لغيري

عافهم وطلع ورجعت صاحت وراه / عفية السبع عفية ابن عمي اجيت تطمن على اخبارنا وتشوف شنو محتاجين

ما رد عليها يعرفها لسانها سم ويعرف بروحه مقصر منهم بسبب ظروف كثيرة

من طلع صاحت ام منذر رفيدة ورزلتها / ولج ماتستحين شلون هيج حجيتي وياه ؟ شنو قصدج

رفيدة / ماعندي قصد

ام منذر / جذابة ، بنتي واعرفج ، شفتي الولد روحه بيج كلتي احرك گلبه ، شنو تردين تنتقمين ؟! ترى جاي تلعبين بالنار

ميثاء عينها عليهن ساكتة تفكر ، ذكية اختي وتعرفين تلعبينها صح عجبتيني ، أفكارها راحت لبعيد وبدت ترتب بعقلها منو اللي يكون الفريسة !!!

ــــــــــــــــ

مرت فترة ورجعت دلال من بغداد ، رايحة لبيت اهلها ما اجت علينا ، خابرنا منذر وتطمنا عليه وكال الامور تمام وملتهي بالشغل ، وامي حلفته ينتبه على نفسه ويفتح عينه زين لأن حجتله على كلام جماعته وتحذيرهم

ورى يومين على وصول دلال لاهلها مانسمع الا على صوت الباب من الصبح تندك طلعت وحجابي على راسي صحت منو ؟ كالت افتحي اني دلال ، فتحت الباب واشوف اخوها وراها وبحظنه حيدوري نايم سلمو ودخلتهم للاستقبال ورحت صحت امي كعدت يمهم واني رحت احضر چاي ، بعده الاستكان بيدي واسمع عياط امي ، ايدي رجفت وكعت الاستكان بالصينية وانكسر ، ركضت واشوف خواتي رفيدة ورغد سبقوني للاستقبال من سمعن عياط امي ، كاعدة وتصيح وتضرب على وجهها ، اني بسرعة نترت بدلال كلتلها شكو شبيها امي ؟! كالت منذر معتقلينه بنفس اليوم اللي اجت لديالى وحاليا بالسجن

اخو دلال كال خابرونا من بغداد منذر موصي واحد من الحرس عنده معرفه بي واحتمال ينقلونه لديالى

اني متحملت كعدت على اقرب كرسي وجسمي يرجف كمت اتخيل اشكال وانواع العذاب اللي راح يشوفه منذر

وفعلا اللي تخيلته صار بالتحقيق انواع التعذيب متعرضله يريدونه يعترف على الجماعه اللي وياه يسألونه انت قاومت الامريكان يكللهم اي قاتلت ، انت نصبتلهم العبوات يجاوب اي ، منو جماعتك نريد أسماءهم ، منذر يمتنع عن الجواب ويتلقى التعذيب والإهانة وهو صامد مايعترف

هالاخبار نسمعها من واحد يداوم هناك بالمقر اللي مسجون منذر بي وعنده اتصال وية ابو نور ابن خالة امي ويحجيله يكله شكد شجاع وصلف ابد ما انطى اسم ولا اعترف على أحد

،، وكلنا بدل المحامي اثنين نريد بس يخففون التعذيب ولا عبالك وكلناهم امتنع واحد منهم كال ما اكدر أما الثاني سوى العليه بس بدون فايدة بقى منذر بالسجن وتحت التعذيب

امي راحت لبيت عمي وحجت وية تغلب حتى يوكف لمنذر كاللها الاكدر عليه اسويه ، بس عرفنا مراح يسوي شي لا هو ولا إخوته لأن يتمنون وكعه منذر ويخلصون منه

،، سمعنا تغلب رايح مواجهة ومخلينة يحجي وياه على اساس خايف لا يذكر اسمه وانو جان يمولهم بالفلوس لجماعة المقاومة وتغلب ميريد اسمه بالموضوع ، هو منذر عالروس الجبير الجانت تمولهم ما اعترف يعترف على تغلب ، ورى ما قابله تغلب وجلال بكم يوم اتصل المحامي علينا وكال منذر بالطب العدلي صارله ثلاث ايام اليوم يلا عرفت ، امي اغمى عليها ورغد التهت بيها صريخنا ملى المنطقة ومانعرف منين اجو العالم والنسوان جماعتنا واقربائنا اللي يطلعون بالفواجع والمصايب جايين يشمتون لأن من يوم اللي جرت علينا المشاكل والمداهمات محد عرفنا منهم كلها تتختل من عدنا واليوم أجن يتفرجن علينا شلون ننعي اخونا وشلون امي تنعي وحيدها وسندها ، ما انكر اكو بعض اقاربنا گلبهم علينا وحزنو لحزنا بس الاغلب جان. شماتة

،، امي طلعت للباب فاقدة ملخت روحها ورفيدة وراها تركض ذبت العباة عليها ، اجت عيني بعين دلال اللي دموعها تنزل وتصبح منذر منذر ، فريت راسي تدور حيدوري اووف عمت عيني عليك عمة حيدر صفيت يتيم ، راح ابوك الهيبة راح سندنا ، أخذته ام نور بحظنها وفاتت جوة متريده يبجي ويخاف من الصريخ

سندت ايدية عالكاع وكنت صارت بوجهي عمتي ام تغلب وشيداء وسهى حظنتني عمتي تبجي اني جمدت بحظنها كأنما عقلي تبرمج ما اضعف ما ابجي بس دموعي تنزل على خدي واهذري بسوالف ما ادري شنو اسولف فقدت فقدت ، أنه مت من حظن ام تغلب لحكت امي تتوسل بابو نور تكله اخذني للطب العدلي اريد اشوف وليدي ، سحبها ساري مدري منين طلع وأخذها بحظنه صعدها لسيارته واني ركضت وراهم صعدت ورى اباوع عليه عيونه حمرا ، ماتحملت كلتله ها ساري راح منذر صار اللي تردونه

مارد علية ولا حرف شغل سيارته وطلع وبس صوت امي ونعيها بالسيارة واني دموعي تصب على خدي

وصلنا لبناية الطب العدلي السيارات مالية الشارع والعالم مزدحمة والجيش والشرطة وقوات الصحوة وبينهم شفت تغلب متلثم بشماغة وساند جسمه على سيارته

ورى ساعتين انتظار واني وامي كاعدين نسوان لوحدنا والكل برا ننتظر جثمان منذر اللي طلعوا بتابوت ماخلونه نشوفه ، ساري حلف لامي من شافها ضاغطة ايده تحلفه كاللها والله بالمغيسل اخليج تشوفينه والله ، طلعنا بسيارته ، نريد نشوفه وامي تريد تكحل عينها بشوفته وهي تردد اول ما دخلنا وكشفت الغطاء عنه تردد شهيد عند رب العالمين يمة منذر شهيد بالجنة يعيون امك ، يمة منذر احاللك واواهبك ، باست بكصته وهي تحظن جسمه اللي تكشف وظهر حتى صدره اني شفته وآثار التعذيب عليه صرخت من أعمق اعماق روحي حسيت روحي طلعت للسما ، شاغت روحي واني اشوف تثار التعذيب ، اويلي عليك اخوية هيج تعذبت واحنا ناكل ونشرب وانام ومندري بيك ، منذر يسند اختك شلون هيج يصير بيك ، رفعت راسي فوك واني اصرخ ربي جاي تشوف اللي صار بينا ربي انت ما ترضى بالظلم ربي اخذ حق منذر من اللي ظلمه ، ، اباوع على أصابع ايده مشلعين حتى أظافره يمممه روحي شاغت للقهارلو بيدي سلاح هسة اكتلهم كلهم وما يبرد گلبي ، ااذيهم مثلما اذوني باخوية اعذبهم مثلما عذبو اخوية

انسحبت على جهة وصوت تغلب يكلي خل يغسلونه اخذي عمتي واطلعي

عطت بي ودموعي تتطافر / حسبي الله عليك الله ينتقم منك يا تغلب انت سبب كل هذا

تغلب صرخ بساري حتى ما رد على ميثاء / ساري طلعهن براا ...

الرابع من هنا

تعديل المقال