رواية إن الاسود فرائس الغزلان الفصل الثاني 2 بقلم جوهرة
ـــــــــــــــــــــ
بمجرد أن ينتهي المطر تصبح المظلة عبئا على الجميع ، هكذا تنتهي الولاءات عندما تتوقف الفوائد
ـــــــــــــــــــــ
بقت دلال اربع ايام وباليوم الخامس امي كالتلها هذه فلوس اخذيهن لمنذر وخل ابو نور يوصلج لبيت اهلج ومناك اطلعي لبغداد ماريد الناس تسال وتحجي وانتي مرتين طلعتي من اجيتي مرة مستشفى ومرة سوك استري علية لا يصير شي ، ماعجبها كلام امي بس سكتت وحضرت نفسها تروح وفعلا اخذها ابو نور بس مراحت لأهلها لأن منذر اتصل كال خل تطلع لبغداد لاتبقى ، وعبالك گلبه يعلمه ورى ماطلعت بساعتين داهمتنا قوة من الجيش يدورون على منذر على أساس اكو إخبارية موجود بالبيت ، اني الوم زوجته لوما تجي هنا وتشوف روحه للناس جان محد فطن بس شأحجي ميفيد ، اباوع على امي سودة علية ترجف من تشوف الجيش عبالك راح ياخذون روحها ، ما أضم عليكم شكد كرهتهم ذيج الفترة لأن يداهمون بيتنا بأوقات لو نايمين بالليل لو من الفجر واحنا نفز مثل المخابيل نتراكض نلبس حجابات الصلاة والله مرت علينا فترة انام بيهن لأن نتخيل يكسرون الباب ويدخلون علينا ، شكد ما احجي واوصف مجاي أبالغ بهذا الشي ، وطن عايشين بي بكرامة ليش ننذل وننهان بي والسبب منو ؟ السبب انسان حاقد بائع ضميره وعمته الغيرة من منذر اللي الناس جانت تتفداه بداية الاحتلال كثرما ساعد ناس وكثر ما قاوم الامريكان هو وجماعته ، بعدين اندار الزمن عليه والتفت عجلة الغدر وبرمته
حجى الضابط وية امي يطمنها من شافها ترجف يكللها حجية لاتخافين احنا نأدي واجبنا ونحميكم ، امي ماترد عليه بيدها سبحتها حتى ما ادري شتحجي وية نفسها ، التفت علية وسألني بعدما طلعوا الجنود برا سال إذا منذر فعلا موجود وكال اريد تحجين الحقيقة ، اني حلفتله مموجود مندري بي ، طبعا حلفي صادقه بي بشطره الاول لان فعلا مموجود هذا اللي قصدته أما ما ندري بي لا شلون احجي سكتت خفت اخربط بالكلام وياخذها لزمة علية
طلعوا و مبين عليهم ولد اوادم لا فتحو كنتور ولا مجر بس واكفين يم امي بالهول والبقية ورى البيت يفترون اسمع أصواتهم بعدها تجمعوا بالكراج ، ركضت رغد قفلت باب الحوش من طلعوا وتجمعنا ثلاثتنا محاوطين امي اللي كاعدة بالهول كامت تنعي وتبجي واحنا دموعنا تهل على خدودنا ، والله شكلنا يسكر الخاطر بس ما اكول الا حسبي الله ونعم الوكيل على كل ظالم
خابرت منذر همزين موبايلاتنا نظمهن لأن متوقعين كولشي ونخاف لا ياخذوهن بس مخلين موبايل نوكيا صغير لامي وحاذفين رقم منذر منه ومن يداهمونا يفتشونه ميلكون بي شي مهم ويفيدهم
حجيت وياه وعرف بالصار ومن صوته واضح عصبي وضايج وانوب دلال بعدها ماواصله بغداد ومن مخابر عليها طلعت مارة لأهلها ، منذر تحلف بيها كال بعد ما اخليها توصل ديالى
انطيته لامي حجت وياه وشوية ارتاحت بس بقت خايفة لأن عرفته ضايج بسبب المداهمة ودلال اللي تخور ، اخ لو بيدي حكمها الا انتف شعرها
ذاك اليوم مر علينا واحنا مثل الموتى بلا أرواح حتى اكل ما اشتهينا ناكل والبنات بقن ماراحن للدوام رغد أول مرحلة كلية اداوم كالت مالي واهس بعد باي شي وكذلك رفيدة ،
وهنا ما خلصنا ورى يومين صار تفجير بواحد من المقرات التابعه للصحوة ( صحوة العشائر) وراحوا شهداء اثنين وعدد من الجرحى متاذين كولش ، ونفس الموال ينعاد داهمونا أفراد من مقاتلين العشاير جنت اني ورغد بالبيت ورفيدة بالدوام وامي بفاتحة واحد من اقرباءنا راحت تعزي ،
ماكالوا هذا بيت والبيت حرمته ، ولا اهتموا دخلو يكسرون بالابواب والأثاث والغلط والسب على منذر وعلينا عبالك احنا اللي فجرنا المقر ، جنت لابسة حجاب الصلاه مالحكت البس عباتي ،عيونهم تفتر علينا اني ورغد اللي اخذتها ورى ظهري خليتها اعرفها خوافه ، مأكول اني ذيبة وشجاعة بس وقت المصيبة اكدر أدوس على روحي واختلق الشجاعة والبسها ثوبي الي ، نترت بواحد منهم موجه سلاحه علينا ويغلط وين اخوجن العار الإرهابي اليوم أخذجن إذا ما يطلع ويواجهني
رديت بغضب لأن استفزني بغلطه علينا / تروحله فدوة ياجبان اطلع مراجلك على النسوان
ماحسيت الا بضربة على كصتي بطرف رشاشته والدم ساح على وجهي ، الضربة ثولتني اسمع صريخ رغد وصوتها تبجي بخوف اريد اطمنها ما اكدر اتوازن ، حاظنتني وتصرخ طرشتني واني منا حسيت بدوخة وايدين رغد على كصتي ضغطت الجرح
صاح بيهم يكللهم يلا اخذوها حتى اخوها يسلم نفسه
سحبني واحد من ايدي دفتعه واني احاول اتماسك ورغد حاظنتني وتصبح تكللهم عوفو اختي عوفوها
اخذوني برا بعدما دفعوا رغد وبرا بالشارع اشوف السيارات والعالم كلها تتفرج ، شكد كرهتهم اي كرهت كل الناس لان محد منهم دفعته غيرته وكاللهم هذه بنت شنو ذنبها
،، واول مرة ابجي كدامهم مهضومة ياناس مهضومة ومخذولة ياعالم ، صحت بقهر وينك منذررر تعال شوف اختك شسوو بيها ، تعال منذرر شوف الناس اللي جنت تحاميهم كلها تتفرج على اختك شلون مذلولة
التفتت وبوجهي صار تغلب !!
ـــــــــــــــــــــ
جلال يماشي اخوه الشيخ بخطواته الهادئة وسأله باهتمام / شلونه جرحك
تغلب تنهد وعينه عالشارع / مرات ينغزني بس يطيب مع الوقت
جلال بغيض / لو بس افهم ليش ما بلغت عليه ؟!!!!
وكف ولف رأسه لأخوه وأيده تمسد شعر ابنه اللي حاوط بيديه رجلين أبوه / عنده حق وياية
جلال ايده على خصره وبغيض / شنو بالله الحق اللي أدين بي لمنذر ؟!!!
تغلب / اذيته
جلال فتح حلكه يريد يحجي بعدها فضل يسكت لأن اخوه على حق
دخلوا للبيت بهدوء يتخلله ازعاج جميل من غياث اللي يريد أبوه يطلعه للسوك ، لف على اخوه / بالله ماتاخذه تونسه شوية وترجعه ترى صرعني
جلال رفع غياث فوك أكتافه ويسويله حركات طيارة والولد يضحك ، طلعوا اثنينهم وتغلب دخل للبيت عينه على امه اللي كاعدة بالهول كعد بجانبها وسألته / وين وليدك
تغلب وهو ينزع عكاله والشماغ وينطيهم لزوجته شيداء اللي أخذتهم وبقت واكفه عينها على تغلب يحجي وية امه / طلع وية جلال للسوك
ام تغلب / ساري مارجع من طلع الصبح
تغلب / وين يعني اكيد يم جماعته
ام تغلب / مدري شبي هالوكت بس يتصفن
رفع عينه لزوجته اللي صافنه بكلام عمتها وساكته / شبيج ليش صافنه
شيداء / لا ماكو شي
ام تغلب / عوفها هذه هم مصخنه بكيفها تهذري سوالف
شيداء بقلق / عممه
تغلب خزرها / شكو ؟!! صاير شي ما ادري بي
أمه / طلعت الصبح هي ومرة جلال تسوي تحليل وتكول لمحت ساري هو ورفيدة
تغلب ضيك عيونه بزوجته / وانتي شعليج ، احتمال راح يحلل يتطمن على صحته
شيداء / اني ماكلت هو ورفيدة هذه سهى بكيفها تالف والله وعمتي اخذت حجايتها راس مال اصلا البنت جانت كاعدة على مكتبها وساري بطرف الغرفه
ضيك عيونه وبقى ساكت يعرف باخوه وشكثر يحب رفيدة اللي ما تنطي وجه
ــــــــــــــ
بالمختبر بعدما سلم وكعد وهو يمد ايده تجاه رفيدة
ساري / اخذيلي تحليل اريد اعرف شكد نسبه الحب اللي يجري بدمي
رفيدة فتحت عيونها ورجعت خزرته وهي تكز سنونها / كوم اطلع منا ماعدنا تحليل عزلنا
ساري / على بختج بنت عمي المفروض تفزين تأدين واجبج لابن عمج اللي يحبج
رفيدة بصوت ناصي سمعه ساري / حبك البين
ساري / اسم الله علية
رفيدة بغيض / بالحلم ماخليك تحلم بية
ضيك حاجبه / قاسية وگلبج حجر
رفيدة وعينها عالباب دخل واحد من زملاء الشغل استحت وكتمت رد على طرف لسانها وهي توكف / إذا ممكن سويله تحليل لأن طلعتلي شغلة مستعجلة دقايق وراجعه
طلعت بسرعه متريد تتواجد وياه بمكان واحد ، دخلت الصيدلية اللي بجانب المختبر سندت جسمها عالحاجز الفاصل وطلبت من صديقتها / اتصلي بزوجج اخذيلي إجازة اني طالعه للبيت
فداء / ليش علي مموجود بالمختبر
رفيدة / طلع من ساعة يمكن ، يلا حبي ضروري اروح للبيت لأن امي اتصلت تريدني
فداء رفعت حاجبها سالتها / صاير شي ، احسج مرتبكة
رفيدة / الصراحة ماريد اشوف ساري ، مسنتر بالمختبر عفته وطلعت
ضحكت فداء / المفروض د.علي يأخذ ضريبة من ساري يومية مداهم المختبر هههه
كشرت رفيدة / بطرانه ، ماخذتني تسلية مو ؟!!!
كورت شفتها / شسويلج لعد إذا كلما شفتي واجيتي منهزمة لصيدليتي
رفيدة / اكلج اني طالعه للبيت والله وانتي تفاهمي وية دكتور علي ، يلا باي
ــــــــــــــــــ
ساري يحاول يغلس على كلام أمه وعينه على إخوته / ما نطلع للشمال ترى كلش مليت من الوضع هذا
ام تغلب / اني وين احجي وانت ادور تتونس
ساري بهدوء / زواج ما اتزوج الا من بنت عمي
أمه / ما تقبل بيك ليش اللي سويتو بيهم قليل
تغلب / انت شوكت تبطل من هالسالفة ترى ابد مو وكتها
ساري / لو بس اعرف شنو اللي غيرك على منذر مو جنت تعتبره اعز من روحك
تغلب / هواي تغيرت شغلات ، بعدين منو كال اني كاره منذر ، اللي بگلبي محد يعرفه. شي يخصني ممجبور اوضحلكم
رن موبايل تغلب والتهى بالاتصال لحظات وفز واكف وطلع برا بسرعة واخوته وراه
ساري بخطوات سريعه تقرب من تغلب اللي صعد سيارته وشغلها / شنو صاير
تغلب بلا ميباوع عليه وهو يحاول يطلع سيارته من الكراج / جماعة ال .. ماخذين ميثة بنت عمي
،،
وصلت لبيت عمي وشفت العالم متجمعة وسيارات جماعة الصحوة اعرفهم زين ، نزلت بسرعة حتى السيارة بقيتها مشغلة والباب مفتوح ، فقدت عقلي من شفت ميثة بنصهم وجهها مدمى سحبتها من ذراعها حطيتها بظهري والتفتت على نديم اللي معتقلها وضربته بوكس على خشمها وبغضب اعمى / النسوااان شدخلهم من. انطاك أمر تعتقلها
نديم وأيده على خشمه متوجع / اخوها من يسمع يسلم روحه
تغلب بأمر / أخذ جماعتك واطلع منا ممنوع اشوفكم لو اسمع واحد منكم واصل هذا البيت
رجع التفت عالناس وأشر بيده / يلا الكل لشغلها ماريد تجمعات بالشارع
دقايق والكل انسحب واولهم سيارات جماعة الصحوة ، ساندة ظهري عالباب ورغد واكفه قريب علية بس داخل الكراج وبيدها كلينكس انطتني اكمد الجرح اللي بكصتي
تقرب تغلب وعينه عالجرح / تحتاجين اخذج طبيب
ميثاء بحقد / لا عبالك اشكرك وانت تستعرض بطولاتك مسوي بيها ابن العم الشهم صاحب النخوة
تغلب عكد حاجبه ونتر / حقودة وشرسة ، انتي شوكت تتغيرين هااا
ميثاء بوعيد / راح اتغير واصير الاسوء وراح اخليك تكرهني بس اصبر علية اخليك تكره حتى حياتك
تغلب / ما يهمني بس لاتنسين تبقين بنت عمي
ميثاء / شأنتظر من واحد خلى ابن عمه بوحه المدفع خلاه كبش فداء ، ويومية تبليغ شكل ويومية مداهمة بهذلت بيت عمك وهسة صاير صاحب نخوة ، الله لا يسامحك وابقى اتحسب عليك ليوم الدين
عفته ودخلت للبيت وقفلت الباب اسمع ضرباته عالباب يضرب بيده بقوة ، سحبت رغد من أيدها ودخلنا لأن كولشي اتوقع يسوي واستغربت شلون سكت واني احجي عليه !!!!؟
رغد برعب / متت خوف ورعب واني اشوفهم ياخذونج الحمدلله تغلب اجى
خزرتها بقوة / ما اسمع اسمه خل يولي
رغد / بس والله الحق ينكال وكفهم بحدهم
ميثاء / وينه من ابن عمه وينه واحنا كل يوم مداهمات ، لج لا تبقين مطفية
،،،
من اجت امي ورفيدة رغد حجت الصار اني ما حجيت ولا الي خلك يادوب سبحت ومددت بفراشي لان احس دايخة من الضربة على كصتي همزين الجرح عقمته رغد وحطتلي لاصق
اسمع امي تبجي وتنعي ، اوف يا امي اووف والله نعاويج يزرفن گلبي وكلما اسمعها يزيد حقدي واخطط لأشياء وأشياء تهز العقل !!!
ـــــــــــــــ
جلال بشماته / خل يسمع وينه ضام رأسه وخواته ينهانن
ساري بصرخة / الله اكبررر شبيك انت معدوم احساس
جلال / لك بابا منذر واحد متعجرف شايف روحه ديلا خل تفيده شوفة النفس
ساري / كلشي صار ضده واولهم احنا ما وكفنا وياه ، وتغلب راد يبيض صفحته سوى تجمع العشيرة وانخرط بصفوف الصحوة كالك اتلاحك روحي
سكتوا اول ما دخل تغلب ومزاجه اسود واضح من شكله حتى ما سلم عليهم دخل لغرفته وركع الباب لحظات وعلت صرخته وطلعت شيداء منزلة راسها
ساري بقلق / خير خيتي شبيه ابو غياث
شيداء ماحجت يادوب وصلت للمطبخ طلع تغلب وراها وعيونه مليانه غضب
جلال / اوووه شيخ تغلب شنو هالاعصاب
شبيك فرغت غضبك بام غياث المسكينة
تغلب يدردم / بطرانه هذه تكلي شعندك تركض ورى ميثة
جلال بضحكة / ههههه ميثة لسانها ينكط سم تكول لسان كوبرا اصلي اووه قصدي ينكط عسل
صاح بصوت على شيداء / الج الامان خيتي لا يروح فكرج للبعيد
تغلب نتر/ انلصم انت وروح لبيتك لا تبقى تتمضحك
جلال / اي خل اروح هسة المرة تنتظرني
تغلب دخل للمطبخ وشيداء منطيته ظهرها واكفه تغسل كلاص عالسنك / اخر مرة تحجين بهذه السالفه ومو حلوة بحقج ولا بحقي اخوتي يقشمرون علينا ترى عديتها بمزاجي
شيداء التفتت واخذت نفس ردت بهدوء / مثلما تحب بس انت هم لا تصرخ بوجهي
