رواية المتعة الحرام الجزء الثاني الفصل السادس عشر 16 بقلم عادل عبدالله
بعد حوالي نص ساعة صلاح وصل وبمجرد ما سامي فتح الباب صلاح دخل جري وقعد
وقاله : الحقني يا سامي .
سامي : في اي يا صلاح مالك ؟
صلاح : انا خلاص هتجنن .
سامي : في اي ؟؟ اهدا واحكيلي .
صلاح : مش عارف اعيش من غير عايدة ، هتجنن يا سامي .
سامي : يا عم انت خضتني يخربيت سنينك !! كنت بحسب فيه مصيبة والعياذ بالله !!
صلاح : وهي دي مش مصيبة يا سامي ؟؟!!
سامي : يا صلاح ما انت اللي طلقتها !! خلاص بقي انساها .
صلاح : انت بتقول اي يا سامي !! انساها ازاي !! بقولك مش عارف اعيش من غيرها !!!
سامي : طيب قولي اعملك قهوة ولا شاي ؟
صلاح : تعالي اقعد يا سامي وبعد أذنك قول لسهام تعملي قهوة .
سامي : سهام اي يا صلاح !!! انت متعرفش ان سهام منعرفش عنها حاجة من فترة ؟؟
صلاح : متعرفش عنها حاجة ازاي ؟
سامي : يعني مفيش مخلوق يعرف هي فين !!! اختفت فجأة !!!
صلاح : انت بتتكلم جد ولا بتهزر ؟
سامي : بتكلم جد طبعا ، معقول ههزر في حاجة زي كده !!
صلاح : يعني اي ؟؟؟ سهام اختفت فجأة كدة !! انا مش مصدق !! انت اكيد بتهزر يا سامي .
سامي : انا اللي مش مصدق انك متعرفش بالموضوع ده !! ده النت وكل الناس كلهم عارفين وعملنا بلاغات في الشرطة وبوستات علي النت ، انا حاسس انك مش عايش معانا !!!
صلاح : معلش انا نفسيتي تعبانة اوي علشان كده معرفش ، المهم قولي سهام اختفت من كام يوم ؟
سامي : بعد طلاقك انت وعايدة بيومين .
صلاح : انا بردو مش قادر اصدق !!! انت بتتكلم جد يا سامي ؟
سامي : ايوه ياعم زي مابقولك كده .
صلاح : وعملت اي ؟
سامي : من وقتها وانا بدور عليها في كل مكان ومش عارف اوصل لأي حاجة !!!
صلاح : يعني هي هتكون اختفت ليه وازاي وراحت فين ؟
سامي : مش عارف بس هو ده اللي حصل !!!!
صلاح : وعيالك فين دلوقتي ؟ مش سامع صوتهم !!!
سامي : عند عايدة .
صلاح : عند عايدة !!! ازاي ؟؟ واي اللي وداهم عند عايدة ؟؟
سامي : اصل حصلت مشاكل بيني وبين اهل سهام وافتكروا اني انا قتلتها وقدموا فيا بلاغ واتحجزت يومين في القسم ، وعايدة لما عرفت صممت تاخد الولاد عندها ، ما انت عارف عايدة وسهام اصحاب قد اي .
صلاح ” بغيظ ” : وانت طبعا بتروح تزور عبالك هناك عندها يا سامي؟؟ وبتشوف عايدة طبعا كل يوم !!!
سامي : انت في اي بالظبط يا صلاح ؟؟ انت خلاص طلقتها ! هتغير عليها كمان بعد ما طلقتها !!!! مفيش داعي للي انت بتعمله ده دلوقتي .
صلاح : بحبها يا سامي .
سامي : نصيحة مني انسي عايدة
خلاص لأنها مش هترجعلك .
صلاح : هي اللي قالتلك كده ؟؟
سامي : مش هي بس ، ده باباها ومامتها والعيلة بالكامل قرروا كده بعد طلاقكم مباشرة .
صلاح : ليه ؟!! هما ما صدقوا خلصوا مني ولا اي ؟!
سامي : معرفش بقي ، لكن اللي انت عملتوا بصراحة كتير يا صلاح ، حاول تنسي عايدة خالص وابدأ حياتك من جديد ، والحمد لله مفيش اولاد بينكم .
صلاح : تفتكر يا سامي ان عايدة ممكن تتجوز ؟؟
سامي : ابعد عايدة من تفكيرك خلاص ، وفكر هتعمل اي في حياتك واقفل صفحتها من حياتك خلاص ، وهي اكيد هتتجوز وانت كمان اكيد هتتجوز بردو .
صلاح : ده مستحيل ابدا ، ده انا كنت اخرب الدنيا لو حصل وعايدة اتجوزت حد تاني غيري .
سامي : بص يا صلاح واضح ان مفيش فايدة فيك ، انا بقولك انسي عايدة وابدأ حياتك من جديد وانت مصمم تتعب نفسك وتفكر فيها ، خلي بالك مش هينوبك من كل ده الا التفكير والتعب بس مش اكتر .
صلاح : ارجوك حاول تتدخل وترجعنا لبعض يا سامي .
سامي ” ضحك ” : صدقني خلاص الموضوع انتهي ، مفيش فايدة من الكلام .
صلاح : يعني انت شايف مفيش أي أمل ؟
سامي : الحقيقة ايوه مفيش أمل نهائي .
صلاح : طيب انا مش عارف انساها ، اعمل اي ؟؟؟
سامي : بص يا صلاح انت غلطت مع عايدة كتير ومادام كنت بتحبها كنت المفروض تحافظ عليها لكن انت للأسف محافظتش عليها ، متفكرش في اللي فات بقي و فكر في اللي جاي علشان ترتاح .
صلاح قعد عند سامي اكتر من ساعتين وفي النهاية نزل وهو متأكد ان عايدة خلاص ضاعت منه للأبد !!!
بعد نزول صلاح سامي كلم عايدة ….
سامي : لسه صاحية ولا نمتي يا عايدة ؟
عايدة : مستحيل انام اكيد ، مش قولتلك اني مش هنام الا لما تكلمني !! قولي بقي صلاح كان عايزك في اي ؟؟
” سامي حكي لعايدة بالتفصيل كلام صلاح معاه ورده عليه بالظبط ” .
عايدة : المهم هو اقتنع خلاص اني مش هرجعله تاني ؟
سامي : هو اقتنع ان الطريق من ناحيتك مقفول نهائي لكن هو لسه بيفكر فيكي و عايز يرجعلك بردو !!
عايدة : هو يفكر براحته زي ما يحب ، انما انا بالنسبالي الموضوع انتهي .
سامي : سيبك بقي من موضوع صلاح وخلينا في موضوعنا احنا .
عايدة ” بابتسامة ” : موضوع اي ؟
سامي : فكرتي ولا لسه ؟
عايدة : هو انا لحقت افكر !!! انت لسه مكلمني من يومين !!!
سامي : هو الموضوع محتاج تفكير اكتر من كده ؟!!
عايدة : عارف يا سامي .
سامي : نعم يا عيون سامي .
عايدة ” بضحكة ” : اااه ، انت كده بتحاول تأثر عليا بقي .
سامي : ابدا .
عايدة : تصدق انا نسيت كنت هقولك اي !!!
سامي ” بضحكة عالية ” : كنتي هتقوليلي انك وافقتي .
عايدة ” بضحكة ” : لا لا لا مكنتش هقول كده .
سامي : اومال كنتي هتقولي اي ؟
عايدة : كنت هقولك لولا انك جوز صاحبتي كنت وافقت من اول لحظة كلمتني فيها ومكنتش فكرت ثانية واحدة .
سامي ” بضحكة عالية ” : تبقي بتحبيني يا عايدة زي ما بحبك ؟؟
عايدة : عارف يا سامي الحاجة الوحيدة اللي بفكر فيها لو سهام ظهرت هنعمل اي ؟؟
سامي : سهام مش هتظهر يا عايدة .
عايدة : وانت ليه متأكد كده ؟؟؟
لايكات وشير يا جماعة علشان انزل اللي بعدها
يتبع….
