رواية ارحموني ولو رحمة مرة الفصل الثالث عشر 13 بقلم فراقد جسن علي

رواية ارحموني ولو رحمة مرة الفصل الثالث عشر 13 بقلم فراقد جسن علي 

فرح / سولفت كل الحادثة المصخمة الصارت ويايه لكوثر بنت عمي احمد

-اني أبجي وهي تبجي ويايه

-كوثر أمانة أحفظي سري

-واذا باجر عمامي ذبحوني كولي لمنى تاخذ الفستان النيلي خطية حبت تفصال وصار بنفسها

-عفيه كوثر بس أريد أنام بعد مااكدر افتح عيوني

-وشعرها صاير عباره عن صوف طلي منتوف

-تصرفت من حالي وكلت شيصير خلي يصير

شنو ذنبها خطية تنذبح وهي بريئة

-اخذت تلفون ابويه من على الكومدي

ودكيت على اركان ابن عمي

-ابويه قبل فتره كعد وسولف

شلون ملتقي باركان

وماخذ رقمه ،،

-اني اتصلت وكعدت لاركان ركبه ونص

ماخليت غلطه تعتب عليه

-بس شنو من جان يجاوبني

احس نفسي لو كدامة يمكن يعلسني بسنونه

-فرح ما كدرت تغفى كعدت تلوب

ولازمه بطنها وانوب تصرخ جتفي

وانوب كلياتي

فرح/لا اله الا الله كل جسمي ياكلني من الوجع

-ردت أروح للتواليت متحاصرة ما اكدر

اعين نفسي وانهض على حيلي

-تعاي كوثر عفية ساعديني اروح للتواليت

خطيه نهضتني ومشتني كوه امشي

-دخلت لو أنفجعت أدراري ينزل دم

كمت ارجف انهبطت ليش

هيج ينزل دم

-طلعتني وتمددت بمكاني بس ارجف

هم من وجع جسمي وهم خوف من باجر

-بقيت للصبح فوك يم عمه هناء

وامي كلساع تصعد وتنزل حتى تشوفني

بس اني اسوي نفسي نايمة ما اريد احجي وياها لان الصراحة حملتها ذنب الصار بيه

صوجها لو مداريتني ومراقبتني

من اني طفلة جان مصار كل هذا بيه

-ماكدر انام بالجذب مغمضه عيوني

جسمي مكسر وبطني كطعتني وراسي يون عليه

-أجى الصبح ولا هلا بجيته

ياربي ليش ماأخذت أمانتك قبل لا يطلع الفجر

-صعدتلي عمه شمس وعود ريكتني

-وكلساع كالت/ هسه شلون عيب من مخلد

جسمج مطكع ازرك واحمر ،،

وانوب ذابحتج الصخونه

-وهي ماتدري بالضيم

الموجود داخل جسمي شنو

كل بطني تتكطع وذابحني الوجع

-واني متأكدة هسه لو أكلهم هذا البيه

يكولولي جذابة هاي حجة ويرجعون يكتلوني

-بقيت ساكتة وانتظر موعد ذبحتي شوكت

-رحنا للصالون وما اكدر اخطي واشيل رجليه من الكاع بلكوه أمشي أنوني تنوني

-المراه بقت ساكتة ما ردت على عمتي ولغمطتني تلغمط شلون ماجان

-ومرتين يمها دخلت للتواليت

وبعده الادرار ينزل دم

-والوجع للكافر تكولون خطية

سجاجين بطني وتكصب بيها

-من رجعنا للبيت وعمه شمس جودرتني

من فوك ليجوه بقماش ابيض

مخلد موصيها تلفني وتجودرني

هسه لو مجفنتني هواي أحسلي

-من دخلنا سمعت اصوات غريبة

ميزت بس صوت عمي عادل

بس كلت اني متوهمة صار سنين من شال وكطع بينا شيجيبه هسه

-دخلتني عمه لغرفة امي وكعدتني

على جربايتها وطلعت ،،

-وشويه واسمع صريخ وركض

وعيطت زلمه صدعت الحياطين

يريد مي

-بعد ماعندي قوة أتشاهدت وقريت على روحي الفاتحة

-منو هذا النوب فوك ضيمي ينهي عليه

-هم هدات حركتهم

بس أوجاعي بعد ماتنحمل

-دخلت مرة ثانية عليه عمه شمس

شمس /شبيج فروحة شو ما ادري شلونج

وجهج صار ليمونة

-عمه بطني موتتني سجاجين وتكصب بيه

مو كتلج بالصالون وكتيلي من الخوف والضرب مال البارحة

شمس /شنو أجتج العادة ،،موعدها اليوم

فرح/لا عمه مو موعدها خلصت منها قبل فتره ،،بس من البارحة بليل ولهسه بطني تكطع بيه

-عمه اخذت تلفون من جنطتها

ودكت على عمي سلمان زوجها

شمس /الوو ، ،عيوني سلمان تعال الحك

على فروحة وجيب وياك ابره مسكنه

راح تموت من الوجع بطنها تلويها

فرح /اشوف أمي فاطمة دخلت عليه للغرفة

و وراها عمه هناء ،،وامي سهام

-تيهت الحجي ويه عمه شمس ما اعرف بشنو جنت اسولف ،من كثر صدمتي حتى ماسلمت عليها ظليت فاهية بوجها

فاطمه/يا بعد كلبي يمه فريحة يمه شلونج

حظنتها وابوس بيها وهي مصكوكة

-انوب جسمها يجوي من الصخونة

-يااا سهام هاي البنية مجمرة من الصخونة

-هناء/هي من البارحة مالها خلك

فاطمه/يمه شبيج وليش مصكوكة

فرح/هاي صدك انتي أمي فاطمة

فاطمه/اي اني امج فاطمة يبعد امي واهلها

فرح/وين محمود اريده

حتى لو بس تخابرين عليه

عندي موضوع وياه

-ماصدكت هي واكفة كدامي لا سلمت عليها ولا بوستها ولا شي

-صارت روحي بمحمود

مو علمود شي ،،يعني اشتاقيتله

لو أحبه

لا ،،بس اريده يخلصني

-امي فاطمه تقدمت عليه بحجة حظنتني

وشاورتني //ادري بمصيبة محمود وياج يمه

-هي كالتلي هيج واني انصكيت بالزايد أنفضحت راح يذبحوني عمامي

رجفت رجفة بس عند الله خبرها

-بعد مابيها مجال مكابر كعدت بالكاع

وشكو صوت بيج ياحنجره كمت اصرخ

من الوجع والخوف

-ليش هذا الموت البطيئ

خليهم يذبحوني ويخلصوني

احسن من هذا الوجع والالم والخوف

-ومااشوف الا منو جان متجمع بالهول كلهم فوك راسي عمامي وعماتي

-اني بعد أنجطلت بالكاع الوجع للكافر خطية بطني سجاحين وتكصب بيه

وكلياتي تنبض بسرعة

محمود/من سمعت صراخ مراه تستنجد متوجعة اريد اوكف علىً طولي ما اكدر

راسي سطرني وكلبي انهجم هجم

-كل الموجودين ركضوا قبلي

بقوة الله وصلت للغرفة واشوف العروس

الي هي فرح مجطولة بالكاع

-تقدمت عليها واشوفها هواي كبرانه

وهواي متغيرة ومحلوة

ربي رحمتك لا تخليها تروح من ايدي

-شو بس مجال أشوف شبيها

-كعدت كدامها ومااريد أسولف الموقف

شكثر توجع ذيج اللحظات

بس نظرات عتب والعيون تسولف

وعيوني وعيونها يصبن دموع

-فرح روحي شلونج ؟؟

شبيج ؟؟

شيوجعج ؟؟

فرح/اباوع أثنين شباب أطوال فوك راسي

واحد أسمر وشعره أسود يشبه عمي عادل

رجع كلبي يرجف ويدك وعرفته

هذا ((مجرم الروح ))

-والثاني هم طويل بس ارفع من ((مجرم الروح)) وأشگر

تذكرت من جان يسمي زنبور اصفر

-محمود قبل جان يكول على اركان ومنى

زنابير صفر

-لان شكران ويشبهون جديتي خاچيه

-بطني توجعني وتلويني من الجهة اليسرى

وجتافي هم يوجعني

وعيوني مغوشة ،، ونفسي تكلب

ومن البارحة بليل ولليوم ادراري ينزل دم

محمود/صح اختصاصي طب اسنان

بس عندي معلومات عامه عن الطب

-من كالت الادرار دم يعني متعرضة لضربة مباشرة على الكليات واكيد من ضرب البارحة

اذا مسويها طوبة

-اركان شغل سيارتك ناخذها لبغداد

كلياتها ممروده

اركان/من بلغت عمي باسم يبلغ مخلد

هو منهي وميتقدم لفرح

-كب عمي محمد،،واحمد ،،

وحتى عمي باسم مارضى

-أفتهمت على ابويه كام يلحن

حتى يكسر شحن الجو

-وانت انجب ،،واسكت ،،وصوتك مااسمعه

-نط محمود وصاح

-فرح اليه وماتصير الغيري

واي واحد يتقدم عليها أكسره

-صيحت صياح وهتفت هتاف

ولقيت خطبه صدام ابو عدي بوكته ملاقيها

-أخويه ويحبها من الصغر

وليش تخلون كلبه ينكسر

وهل وكع كدامكم وتخربط وكلبه راد يوكف من شافها بالبدلة لو تنزف كدام عيونه للغريب شيصير بحاله

من هو طفل اجدادي واعدوه وكالوله هي الك وماتصير الغيرك وهي انزرعت بروحه

وهو اولى بيها من الغريب

واليوصل لباب البيت اسكطه

وأحرك البيت واللي بي

تراني خبل وكلكم تعرفوني

-ومن شفت فرح شلون تتلوه وتتوجع

والكل واكف يتفرج ،،والنسوان تبجي

-كبت براسي الخبالات بزايد

وكمت أصرخ ،،

-صارت كدامي بنية تبجي وتباوع على فرح

-عرفتها منى بس هواي متغيرة

وحليانة الا ملكانه عرض لاحلى فستان

-أنت هييي امشي من كدام خلقتي شبيج تعوين

جيبلها دشداشه وبدليلها

خو مااخذها بالبدله

-لا تعوين وتباوعين بووووجهي أمشي

شبيج صكج العباس

-شبيكم واكفين وتتفرجون عليها

مو راح تمووت ول حت بالعسكرية

مو هيج يعاقبون الجنود

شمس/ياا شنو تبدللها فد ساعة وتجي الزفة

اركان/عمه رحمة لخاجية

بلغي رجلج لا يوصلون ولا يجون

اسكط العريس واصوب رجليه

واخلي يزحف على بطنه مثل دودة القز

-بقى واحد يباوع بوجه الثاني

صكرتهم صوتي يلعلع يقره النشيد الوطني

-احتريت نزعت الستره وانطيتها لامي

-واسمع البنات الصغار خافن يكولون

يمه هذا شايل مسدس ،،موجود بحزامي

-اجتي منى تتمندل من الغرفة الثانية

بيدها دشداشه حبيت أخوفها

وهم اعرض عضلات صوتي

واخوف الباقين

-شبييييييج أمشششششي تحررركي

بدلليها رررراح تمووووت

أدفنننننج بمكانها

-هي راحت تركض وعجاجه الخوف وراها

-شويه وطلعت شمس وهناء وهي منى كالت بدنالها

-خاله هناء البسي عبايتج وامشي ويه محمود روحوا بسيارتي المستشفى

-دخلت اشيلها واشوفها بس مبدلاتلها

ووجها بعده كله مكياج وشعرها بعده تسريحة

-يووول تردين أذب حج لو شنو ؟؟

امشي جيبي وصلة مسح

ومسحي خلقتها خلصيني

-ولج هنا عقل لو تل مال تبن

يعني اخذها للمستشفى بهيج شكل

شنو من جماعه حمديه صالح

-بيت جدي أنكلب اصياح وعايط

وهذا صيح//ميصير هيج زفتها بعد ساعة

-وهذا يكول//عيب الناس شتكول وشتحجي

هسه تذكرتوا تجون وتنهون عليها

-ونسون كل أثنين سويه ويبشبشن

ويألفن بكيفهم حجي ويسولهن قصة ورواية

-محمود اخذ فرح وامي وخاله هناء

واطلع لبغداد وديها للمستشفى

واني اصفي سالفة عرسها وراك واجيك

وخلينا على تواصل لا تغلق تلفونك

-طلع محمود واخذهم وراح للمستشفى

وعمامي واحدهم أنكلب طنطل

وكاموا يهوبزون ويستعرضون عضلات أصواتهم براسي

-مايدرون بغداد ،،والكلية العسكرية

والوحوش الصاحبتهم دكولي شخصية جديدة وطلعولي كلب ولسان من الحديد

-انتوا الحجي ضايع وياكم

يابه اني طالع نص ساعه وارجع

-اباوع لابويه نافش ريشاته بين عمامي صدك متباهي بينه

-واطلع بوجهي لعم ابوي الجبير نوري

بعد ماسلمت عليه اخذته وطلعت بره بيته

-وحجيت وياه بهدوء

وسولفتله سالفة فرح ومحمود

وكتله احنا نهينه عليها ونريد نلم الموضوع

احسن من الفضيحة

-هو تخبل وعيونه كامت تجدح شرار من الاعصاب

كتله// انت افهم واعقل مني

مانريد واحد يعرف بالموضوع

-هو كال //خليها عليه اني أرهم السالفة وأسدها

رجعنا بسيارته ومر على عمي حامد

وعمي أسحاق

ورجعنا لبيت جدي

-اختصار للسالفة حتى ما ادوخكم

صارت بالقنادر

ناس تجر بطول وناس تجر بالعرض

-سالفة مو سهلة شنو بنية وبيوم زفتها

وابن عمها ينهي عليها وين جان من كبل

هسه تفطن ويجي ينهي عليها

حتى الناس ماتخليها بحالها

واكيد يكولون عليها معيوبة

-عمام ابوي نوري ،،وحامد ،،واسحاق ،،ويانه

وعمامي احمد ،،ومحمد ،،وباسم ،،يهوبزون علينا

-لهناك وأجى العريس مخلد

وابوه واخوانه وعمامه

شنو واحدهم بس أطخه

ينفجر عليه من كثر الاعصاب

مخلد/بس واحد يفهمني شنو السالفة

باأمة محمد كلها ماصايرة

بيوم الزفة تذكرون وتنهون على العروس

وين جنتوا بيوم المشية ،،بيوم الخطوبة

بيوم عقد الشيخ ،،عقد المحكمة

اركان/مو تدري جنا على خلاف عائلي

عود بسبب محمود تفرقت العائلة

وهسه بسبب محمود تجمعت العائلة

محمود اليوم قضية عائلة بيت الحجي ناصر

مخلد /هذا حجي يفيدك

فرح مرتي شرعاً ،، وقانوناً،،

مااخذها اليوم بدلة وبزفة

باجر اجي واخذها بعبايتها واطلع

اركان /اكسر رجليك ،،

تعرف شنو اكسر رجليك

بس توصل للباب لو تمد ايدك عليها

-انت منهي ،،تعرف شنو منهي

اكعدك للحك وافصلك بالعشاير

بت عمنا وأخويه اولى بيها من الغريب

-مااكلكم صارت عجن بوكسات

اني ومخلد والباقين يفازعون

-ترى الصراحة حقه يعني عريس ومجهز ومرتب كل أموره وبعد ساعه زفته

ونجي ونكله بطلنا مانطيك العروس

بهذاك اليوم جد جده كمز

-اني الخبالات صعدت براسي

وقفل عندي الضوه وطفت عندي شاشه

-سحبت سلاحي ورميت طلقتين

على باب الخشب مال هول

-ومااحس الا عمي نوري

يصلخني براشدي من هذا المعدل،،

حسيت شمر عيوني بنص الهول

وسحب المسدس من ايدي

-راحت الهيبة وعود شوفوني ضابط اركان وبالك عني

حت ماخلالي عين أشيلها واسولف بعد

-بس شنو بعد مارميت وصريخ النسوان

لم القريه ،،سكتوهن الزلم بالدفرات

-وبعدها صار الهدوء قاتل ......

محمود/اخذت فرح وامي وعمه هناء

وصعد ويانه عثمان ابن عمي أحمد

-بين ماوصلت للمستشفى العام

فرح انتهت صريخ وبجي وتتلوى

كلساع اندار عليها

فاطمه/يمه راح تكلب السيارة بينا

لا تلتفت علينا عينك على الدرب

محمود/يمه كون وجعها يندار بيه

متشوفيها شلون تلوب

هناء/خاله لو شايفها البارحة شدكول تبجي اليهودي خلوها بوسطهم ومرعدوها تمرعد

محمود/كون الله ماخذ روحي

ولا شايفها بهذا الشكل

فرح/لا اسم الله على طولك لا تكول هيج

محمود/اااخ ربي رحمتك

من كالت هيجي دقات كلبي خرط سستمهن

-وصلنا للمستشفى وكل الاطباء عرف واصدقاء ماقصروا وياها

-فحص على سونار على تشخيص

ومثل ماتوقعت تعرض لضربة مباشر على الكليات والمثانة وسببلها نزيف بالادرار

-حظي المصخم بالسونار اكتشفوا عدها تمزق بالطحال ،،هو الي مسبب عدها الالم بطنها

-ولازم عملية فورية وتدخل جراحي

لان تمزق الطحال يسوي نزيف داخل البطن وبي خطورة

-الاطباء الجراحين إللى اجرولها العملية جانوا هواي شاطرين سولها عملية جراحية أسمها رتق الطحال ومحاولة إصلاحه

يعني ما استئصلوه

فرح/بس دخلوني للمستشفى أستلموني الاطباء

ومحمود يسلم على هذا ،،ويحجي ويه ذاك وكلهم يعرفهم

-دخلنا تشخيص ومحمود يسولف وياهم أجنبي بحيث ابد ما نتاخر بالاجراءات الطبية

هوايه أهتموا بيه

بعد كل هاي الهوسة محمود حاجاني وكالي//لاتخافين بس لازم تسوين عملية صغيرة عندج تمزق بسيط بالطحال

-الخوف أكلني اول مره امر بهيجي حالة بين المستشفى وتحاليل والعملية

-مااريد اتذكر الخوف المريت

بي من دخلوني للعمليات

الله يساعد كل شخص مر بنفس الموقف

-وعيت بالقاوش النسائي

وامي فاطمة موجودة وعمه هناء يم راسي

-وشويه ودخل محمود وياه بعد دكتور ودكتورة تلاثتهم يحجون أجنبي واباوع مغذيات يمي هواي

وابر وعلاجات

-بقيت تقريبا ٥ ايام بالمستشفى

كلساع طبيب رايح وطبيب جاي

-امي فاطمة ماعافتني وحدي

راحت عمه هناء واجتني امي

وابوية وعمامي

ناس تروح وناس تجي

-سالت امي شصار ما صار

سولفتلي الكوارث الصارت ورايه

اركان/بعد الهوسه وبعد ماضربني عمي نوري

الكل سكت والهدوء تشمرون الابره تسمعون صوتها

مخلد/شوف ياالبطل انت صماخ واني صماخ

شوف ياهو من عدنه يكسب ويربح

-فرح مرتي شرعا وقانونا

ومااطلكها لو تموت

أخليها هيج معلكه

لا هي للسماء ولا هي للكاع

-ويالبطل الك مهله ٢٤ ساعه وتدوس بساطي

تكعد للحك

لان بيتك ودايس عتبتك

ورميت عليه ،،يعني متقصد قتلي

-واذا ماحولت خلال هاي المده

اعتبر نفسك مدكوك ،،

ودمك مهدور وين مااشوفك أصوبك

وحده بوحده

-يلا بويه نهضوا يعمامي وخوتي

البنية ما اريدها

ومن عين باجر اخذ عليها بدال المراه أثنين

-وانتوا ياعمامها وابوها

خلوها بالكم طلاك ما اطلك

لو تجيبولي بول بريمر بنفسه

خلوها بالكم وحفظوها زين طلاك ماكو

اركان/مخلد رعد رعيد صوته

يطلع الچمه من الكاع

-اخذ عمامه واخوته وابوه وراح

وعمه شمس راحت تركض ويه رجلها

تكول خاف سلمان يطلكني

لان يصير عمه

-همه طلعوا وعمامي وابويه

تولوني رزايل

وغلط ومسبه

-جنه أحنه اهل الحك ،،

هسه صار الحك علينه

-لان من تلازمت ويه مخلد ورميت اعتبروها متقصد قتله

-عمي نوري كال// اني اتكفل الموضوع ولليل اخذ زلام خيره ونمشي عليهم. ناخذ عطوة

-خابرت محمود وحجيتله الصار

وهو فهمني فرح داخله عملية

طحالها متمزق ،،

وكلياتها متعرضة لضربة مباشرة

-بلغت عمامي بحالة فرح

وناس كامت تلوم بناس

صارت رطينه

-لليل عمامي وعمام ابويه وأولادهم

والزلام الطيبين واهل الديرة

والعرف والاصدقاء

واني وابوي حولنا على بيت مخلد

-وهو هم مبلغ عشيرته وعمامه

واخذنه منهم عطوه لان حسوبها سالفة قتل

-وعمي نوري هم نطاهم عطوه

كاللهم// بلغناكم ممنوع العريس يوصل هو منهي ،، بس بالعناد خش بعيونا

-والنهوه معروفة بكل عشاير العراق

اكبر شارب توكفه عد حده

لان ابن عمها اولى بيها من الغريب

-ومو اول مره تصير عدنه

ياما بنات من كوشة عرسهن وياخذوهن عمامهن من أيدين زلمهن

-ومخلد تهجم على اركان

وضربه بوسط بيته

وهو خو مايضل ساكتله

هم تنحسب عيبه عليه

-ورمى بسلاحه ما متقصده

رمى حتى يسكت الهوسه الصارت

ورمى على الباب والفشكات بعدهن موجودات

-صارت الهوسه والصياح والعياط

خمس حلوك تحجي سوه

-بعدها صفوا بعد ٣ ايام

يدخلون الطرفين عد شيخ عشيره طرف ثالث

وهو يحل الموضوع

-اخذت ابوي وخالة سهام وعمي باسم

ورجعت لبغداد قبل حضر التجوال

-صدك بعد ٣ ايام دخلنا على شيخ عشيرة (......) خوش زلمه وخير ومايرضه بالعوجة

-شيخ عشيرتنا مو الشيخ العام

لا هو رئيس فخذنا

سولف كل السالفة للشيخ الزين

-ورئيس فخذ عشيرة مخلد هم سولف العنده

عاد الشيخ كال/ أنهضوا تراضوا جدامي

ومو علمود مراه تروح بيها أزلام

وتصير سالفة دم

وتتحول سالفة صغيرة للعشاير والفصول

-المراه تبقى بذمة رجلها شوكت مايعجبه يطلكها بس هسه خلي كلبه يبرد لان حقه عريس وخربتوا عليه عرسه وفرحته

-وممنوع عليه منعاً باتاً يوصلها لو يشوفها

لو يلتقي بيها ،،تحرم عليه من اليوم

بس تبقى شوكت مايعجبه يطلكها

ويفصخها من المحكمه

-عاد الكل رضى بقرار الشيخ

وانت بوس عمك ،،وانت بوس خالك

فرح/طلعت من المستشفى رجعت للمحمودية

-وهل ظليت معلكه

لا من صرت لمخلد ،،

ولا من صرت المحمود

-صدك لو كال المثل لا حظت برجيلها ولا خذت سيد علي

-امي وخواتي دارني واهتمن بيه

هم بطني توجعني من العملية

وهم جسمي مكسر من كثر الضرب

-بس ابويه وعمامي ابد مايحاجوني

حجروا عليه وسجنوني باب الحوش مااشوفها

-الحمد لله على العلاج أتحسنت صحتي

وصرت أحسن اكدر اداري روحي

-امي فاطمه وابويه عادل

يرحون ويجون علينه

بس محمود واركان

بعد أبد ما وصلوا ........

اترككم في أمان الله وحفظه

وأنتظروني في الحلقة القادمة

الرابع عشر من هنا

تعديل المقال