رواية زواج في زواج كامله وحصريه بقلم جمانه السعيدي
اني ميار بعمر ٢٧ سنه وبعد ما تخرجت بخمس سنوات تعينت
خالي مهند سعالي بلتعيين
عنده معارف اخذ أوراقي وقدملي والحمد لله تعينت
اني عندي خوات ثنيين اني اكبر وحده
ابوي متوفي عدنا راتب تقاعد
اني وخواتي نشتغل بلبيت شغلات هدايا مال اطفال وكبار من داخل البيت أمورنا ماشيه ولله الحمد
نخيط جهاز طفل فرشة جربايه
بلاضافه خالي مهند ابد ماعايفنه دائما يدزلنا مسواك
ويخلص النا شغلاتنا مايقبل اي وحده تطلع وحدها
اذا كان عدها تقديم مدرسه او اي شغله
هو ياخذها ويرجعها
واي وحده عدها معاملة تعيين او تقديم هو يمشي وياها
اما بلنسله العمامي
عندي عمام ثنيين ما يحجون ويانا
لان بلوقت الي جان عايش بي ابوي بلدنيا اتقدمولنا
رادوني اني و اختي الازغر مني رحمه
الولدهم الي ما مخلصين دراسه ويشتغلون كلشي
يوم اكو عمل ويوم لا
كان شرطهم نعوف المدرسه ونزوج
احنا ما قبلنا صممنا نخلص دراستنا
هذا الشي زعل عمامي ثنيينهم
بوقتها حتى قاطعونا
من مات ابوي اجو وكفو بلفاتحه من بعد الفاتحه
حسو ضعفنا ومالنا احد رجعو كررو الطلب مره ثانيه
اني لابن عمي الجبير
ورحمه ياخذها ابن عمي الثاني
حتى ازغر وحده غصن هم جانو عينهم عليها عبالك محتكرينا
صممنا على الرفض اني وخواتي وامي كانت واكفه ويانا ومساندتنا
من هذا الوقت عمامي قطعو علاقتهم بينا وزوجو ولدهم
و بطلو يسئلون عنا نهائيا
بس خالي مهند لله يحفظه رغم هو مدرس والراتب يله مكفي بس ابد ماعايفنا ويساعدنا دائما بلي يكدر علي
اني طولي ١٧٠ بيضه عيوني جوزيات على عسلي
حواجبي حلوات خشمي وحلكي حلوات
شعري مكسر بس ناعم مو خشن واصل النص ضهري
المهم اني تعينت بلطابو
موضفه بلحسابات
ابد ماكنت مصدكه واخيرا توضفت وراح يصير عندي راتب
وراح اكدر اساعد اهلي جمانه السعيدي
اول يوم اداوم كنت طايره من الفرح
كعدت الساعه خمسه الفجر
سبحت وحضرت نفسي اريد الوقت يمشي حتى اروح
للدوام الوقت ليش هلكد بطئ
وصلت للدوام الساعه بسبعه وثلث
ماكو احد من الموضفين موجود بس اني وعامل النضافه
عامل النضافه استغرب من وجودي وخاصه بهيج وكت
سئلني منو اني وليش موجوده هنا هيج وقت
من عرف موضفه جديده كام يضحك
يكول كلجن بلبدابه هيج وبعدين اجازه ورا اجازه
المهم بقيت واكفه برا بلحديفه الحد مايخلص تنضيف اخاف ملابسي تتوصخ
الحد مابدو الموظفين يجون ودخلت جوا
بقيت انتضر رئيس القسم حتى استلم وضيفتي واعرف مكاني
كنت لا بسه قاط رصاصي بنطرون وستره قميص ابيض
وحجاب وردي فاتح
حذاء ابيض وجنطه وردي
معجبه بنفسي وشكلي الجديد واني استلم وضيفتي واداوم اول يوم
كعدت بغرفة الموضفات وعرفتهن على نفسي
الساعه ثمانيه ونص يله حضر رئيس القسم استاذ
اياد
بس دخل الغرفه رحت ورا
عمرا تقريبا ٣٨ سنه شكله مرتب طوله ١٨٠
ميار...صباح الخير استاذ
اياد...صباح الخير تفضلي
ميار...اني الموظفه الجديده البارحه كملن اوارقي
واجيت اليوم علمود الدوام
اياد...اهلا وسهلا جيبي الأوراق اوقعهن عوفيهن هنا وروحي انتي شغلج بلغرفه مكتوب عليها الحاسبه
ميار...تمام رحت اباوع لمن وصلت الغرفه مكتوب عليها الحاسبه جمانه السعيدي
دخلت تعرفت على الموضفين ولد وبنيه
جابولي مكتب وكرسي من المخزن كعدت وبدو يعلموني على الشغل
الولد الي وياي بلغرفه اسمه مصطفى مزوج وعنده بنات ثنيين والموضفه الثانيه عمرها بلاربعين
ام حسن كلش حبابه
طلبو ريوك وطلبولي لفه وياهم
مصطفى...اليوم انتي ضيفه عدنا من باجر كلمن ريوكه على حسابه
ميار...شكرا جزيلا
حسيت الأجواء حلوه انطوني كم فايل وكمت اشتغل
استمتعت بشغلي حيل
رجعت للبيت تغديت ونمت
مرت ايام العمل طبيعيه بس تعرفت على كل الموظفين
والموظفات
وكمت اعرف للشغل اكثر من قبل
كنت اتردد على مكتب استاذ اياد علمود الشغل
وكان الموضوع جدا عادي
وهو هم لطيف بلتعامل ويتساهل وياا الموظفين
خلصت شهر من العمل بهاي الدائره
بيوم دز عليه استاذ اياد الغرفته
هاي اول مره يدز عليه اكثر شي اني اروح علمود يوقع اواراق لو اكو معامله بيها غلط اسئله عليها
رحت الغرفته لكيته كاعد واكو ولد شاب كاعد كباله
سلمت ودخلت بدون مااركز على هذا الولد الي كاعد بلغرفه
ميار...تفضل استاذ
اياد...اريد هذا الفايل تراجعي اني شاك اكو غلط بي
ميار...صار من عيوني
اياد.. تسلمين
ميار.. اخذته وطلعت بس سمعت استاذ اياد كال هااا شفتها
الولد رد علي اي حلوه
بعد ماسمعت اكثر يمكن هذا يدور عروس واستاذ اياد
رشحني اله هيج اتصور
على العموم كلشي راح يبين بعدين
راجعت الملف وماكان اكو بي اي غلط عرفت هاي خطه من استاذ اياد
ثاني يوم الساعه عشره اخذت الملف ورجعت
هم لكيت نفس الشخص كاعد
ميار...هذا الملف تمام مابي اي غلط
اياد...ممكن تكعدين اكو موضوع اريد احجي وياج بي
ميار...كعدت على الكرسي
اياد...هذا ابن عمي ونسيبي صار سبع سنوات يعني اعرفه عز المعرفه
يدور على عروسه واني رشحتج اله
انتي مودبه وخلوقه جمانه السعيدي
ميار...شكرا استاذ
أكرم....اذا ماعندج مانع اني اريد اتقدملج
اني أكرم خريج إدارة أعمال اشتغل أعمال حره
ابيع واشتري بلسيارات
ميار.. اتشرفنا
اكرم..اليه الشرف
ميار...تكدر تحجي وياا امي بهذا الموضوع ونحتاج وقت
حتى نتعرف عليك وبعدين
يكون الرد بهذا الموضوع
اياد...اي هو هذا الكلام المضبوط
أكرم...اي اريد عنوانكم حتى ادز امي عليكم
ميار...تمام سجل يمك عنوان ببتنا
أكرم...امي باجر تمر عليكم
ميار...اهلا وسهلا
من رخصتكم كمت وطلعت
كنت فرحانه العريس من طرف استاذ اياد ابن عمه اكيد انسان محترم مثله
الحمد لله توضفت وراح ازوج
