رواية حرب الارحام الفصل الرابع 4 بقلم جمانه السعيدي
زينب....اخذني عمي البيتنا جبنا الأوراق الخاصه بلبيت
وطلعنا للشهر العقاري
اتنازلت عن بيت ابوي العمي
اتنازلت عن آخر شي املكه بهاي الدنيا حتى بس اعيش
اريد اعيش بسلام وهاي هيه
ماكو اي احد من اهلي او اقاربي بكلبه ذرة رحمه عليه
كل واحد يريد يستغلني بطريقتها
اتوقعت بعدما اتنازلت عن البيت راح تتغير معاملة زوجت عمي وياي
لان اخذت الشي الي تريده
بلعكس كامت ادورلي الغلطه تريد تطردني من البيت
كنت اتحمل واصبر لان ماعندي مكان ثاني اروح اعيش بي
مجرد اتنازلت العمي عن البيت
ثاني يوم عرض الاثاث الي بلبيت للبيع على أصحاب الاثاث المستعمل
بعدين عرض البيت للاجار أجره بمبلغ محترم
واخذ اجار مال سنه ليكدام
عمي طلع هم طمعان بيه
عمي اخذني قدمت للجامعه بعدين انطاني مبلغ اروح اجهز نفسي للجامعه
احاول اعدي كل ألمواقف الصعبه حتى اوصل الحلمي
دخلت الجامعه هلمره غير عالم وغير ناس
احس نفسي صرت اكبر وانضج
حددت اهدافي وقريبا احققهن كلهن
اتعرفت على بنيه من بغداد بس من غير منطقه
كلشي ما تعرف عني
اهم فقره بلنسبه اليه ماتعرف امي وتاريخها لااضلم
ولا راح تعوفني او تبتعد عني بسبب هذا الماضي
عندي عقده من امي ماكدرت اتخلص منها كل هذا الوقت
عندي اعتقاد اي احد يعرف منو امي راح يبتعد عني
بسبب البنات الي بمدرستي القديمه كانن يبتعد عني
وما يقبلن يحجن وياي
عبالك عندي مرض معدي وراح اعديهن
هلمره اريد اصادق وحده ما تعرف اني منو او بت منو
بيني وبينكم اني محتاجه صديقه او احد يكون قريب عليه
اكدر احجي وياا ويشاركني يومي حتلو تفاصيل بسيطه
اهم شي شخص مو من اهلي ولا اقاربي ولا جيراني
ولا يعرفني قبل
جمانه السعيدي
البنيه اسمها روان قمه بلاخلاق الادب
نفسيتها حلوه أخلاقها تشبه اخلاقي
حتى اني وياها نحب نفس الاشياء ونفس الاكلات
حسيت التقيت توأم روحي يمكن الناس تكول توأم
روحي على البنيه والولد
بس اني حسيت روان هي الي تكمل شخصيتي
هي الي تكملني
طبعا حجيت الها اني عايشه بيت عمي لان اهلي ميتين
امي وابوي ماتو ثنيينهم
مااريدها تعرف شي عن امي وطبعا عرفتها زوجت عمي تعاملني معامله موحلوه لان اني متفوقه وابنها فاشل
وحجيت الها حتى بيت اهلي اخذو مني
كنت محتاجه احد افضفضله حتى ارتاح شويه متت اختنكت واني اكتم بكلبي المرار الي عايشته
اما روان عايشه وياا امها وابوها
عدها اخ وحيد مزوج وعندا اطفال ثنيين
مااجر بيت قريب بيت زوجته مستقر هو وياها
عدها خال فاتح صيدليه ويشتغل مسؤل مذخر
هو الي شجعها تدخل صيدله وبعدها راح تلزم الصيدليه
اول ما تتخرج
روان عاشت كل حياتها داخل عائلته مطمنه نفسيا
ماعليها اي ضغوطات
عكس حياتي الي عشتها بيت عمي
شكد ولد حاولو يتقربون مني بس اني ارفض
رفض قطعي اريد اكمل دراستي مااريد بيت عمي واقاربي يكولون راحت للجامعه تصيد ولد
يمكن تفكيري غلط بس عقلي يتحكم بي الماضي المر الي عشته بسبب امي وعملتها السوده
جمانه السعيدي
هاي الفتره كمت مااشوف رياض
الصبح نايم الضهر يتغدا ويطلع ويا جماعته
ارجع للبيت الكا طالع
مايرجع للبيت اله متاخر لو يجي يتعشى ويرجع يطلع
كام يدخن واحسه مخربط مااعرف اذا كان يتعاطى او لا
المهم اني بس اخلص شغلي بليل
اقفل باب غرفتي عليه وبعد مااطلع اله الصبح
نادرا مااشوفه
بس هو ما يضيع فرصه اذا مايدقق بتفاصيل جسمي
او يذب عليه حجايه سخيفه اذكرني باامي
قبل جان حقير بس هسه صار أحقر الف مره
يمكن يروح اماكن مشبوه علمود النسوان
بين فتره والثانيه يحاول يفتح باب غرفتي عليه بليل
بس اني اقفل الباب واعوف المفتاح من جوه
حتى مايكدر يسوي شي
مااعرف شكد راح ابقى احاول احمي نفسي منه
على العموم رب العالمين موجود وهو اعرف بحالتي
جمانه السعيدي
بهاي الفتره كنت محتاجه يكون عندي تليفون خاص بيه
احتاجه بدراستي
رغم بهذا الوقت حتى الاطفال عدها تليفونات
اي وحده تطلب رقم تليفون واكول اني ماعندي تليفون تستغرب
شلون طالبه جامعيه وماعندج تليفون
بقيت اجمع من المصرف الي ينطينيا عمي
اريد تليفون حتلو بسيط
رغم هو ينطيني مصرف يادوب يكفيني
زينب...عمو اني دراستي كلها تعتمد على التليفون
اريد واحد اني مااعرف بلتليفونات عندي فلوس
جمعتهم من مصرفي
عمي...اني اجيبلج بسيطه
زوجت عمي....اي اخذ الفلوس منها وجيبلها تليفون
عمي...اني اجيبلها
زوجت عمي...جيبي الفلوس إذا طلع فلوسه اكثر يبقى عمج يطلبج
عمي سكت ماحجه هي أخذت الفلوس الي عندي ونطتهن اله
بعد يومين جابلي عمي تليفون شكد فرحت من شفت التليفون
زينب...بعد شكد عمو على فلوس التليفون
عمي...لا على كد فلوسج
زينب....شكرا
اخذت التليفون ثاني يوم للجامعه خالته بلجنطه وكامشته حيل عبالك بيها كنز مو تليفون صيني عادي
زينب....جبت تليفون
روان...خل اشوف بلعافيه بس ترا هذا يعني مو حديث
زينب...ميخالف المهم صار عندي تليفون
وراح نتصل اني وياج وحده على الثانيه
روان...اني راح اجيبلج رصيد هديه بمناسبة التليفون الجديد
زينب....شكرا يااحلى صديقه
روان...انتي الي ماكو منج ولج ماكو وحده بلدنيا هاي كله بريئه مثلج
احس عفريت علاء الدين طلعج من المصباح
الي مثلج هيج نضيفات وطيبات انقرضن وين جنتي عايشه
زينب....بلهدنيا بيت عمي ضاميني خاف انخطف
روان...عاشت ايدهم على هالاخلاق الحلوه
كملت اول سنه على خير ونجحنا اني وروان
بداية السنه الثانيه زوجت عمي ماقبلت عمي ينطيني فلوس اشتري ملابس للدوام
زينب...عمو اريد اشتري ملابس للدوام
زوجت عمي...ماكو فلوس عندج ملابس العام داومي بيهن
شنو هلتبذير
ملابس ومصرف منيين نجيبلبج
مشي نفسج بملابس العام ترا ما كاعدين على كنز
زينب...سكتت ماحجيت لان عمي من سمعها سكت
ولا كال اني جاي ااكل باجار بيتها
خل انطيها فلوس تشتري ملابس
سكتت كلت يله مو مهم الملابس المهم اكمل دراستي واتخرج
هنا زوجت عمي نفذ صبرها مني
اذا تضغط عليه بلشغل اشتغل واني ساكته
اذا تمنع عني المصرف اداوم عادي حتلو اروح للجامعه مشي اذا ما يشترولي ملابس
البس الملابس الي عندي
ماكو طريقه ما جربتها وياي حتى تهججني بليله ضلمه
بس اني صامده
بعد اني مابيه فايده الها البيت اخذته ليش تكعدني بيتها وتصرف عليه
صامده لان ماعندي حل ثاني مااريد مشاكل
اريد اخلص كليه بسلام اريد أحقق ذاتي
ساعته اعيش وحدي بعيد عنهم
لو شايفين من ارجع من الجامعه مهدود حيلي
بس ادخل الكاها محضره الشغل
عبالك تنتضرني اله تهد حيلي يله تعوفني
مره شافت رياض يحاول يتحرش بيه اني كدرت انهزم منه
كدرت اخلص نفسي من رياض
ومره حاول يفتح الباب عليه بليل
طبعا هاي محاولت فتح الباب كل يوم تتكرر
بلكت يوم انسى الباب مفتوح ويكدر يدخل عليه
بس اني كلشي انسى ولا انسى ما اقفل الباب عليه
المهم حاول رياض يفتح الباب هي كعدت شافته
اسمعها تكوله هااا يمه
رياض.. هيج ماكو شي اريد احجي وياا زينب
طبعا هي مو غشيمه تعرف ابنها وتعرف كل تصرفاته
الخايسه
عرفت هو يحاول يتحرش بيه
بس الموضوع عدها عادي واذا يتحرش بزينب
هي بعقلها هم تملكوني من يوم دخلت بيتهم وعشت وياهم تلمكوني
مادام يصرفون عليه صرت ملكهم
عادي ابنهم يتحرش بيه
تعتبره تخليص حق من زينب
هاي الحركه من رياض دخلت فكره شيطانيه بعقل زوجت
عمي لكت الطريقه الي اطلعيني بيها من هذا البيت
وتخلص مني ومن مصرفي
ومن تواجدي بلبيت
طريقه تخلي عمي هو بنفسه يطردني من هذا البيت وبعد ما يسئل عني ابد جمانه السعيدي
بدت اطلع عليه اشاعات كدام عمي
حتى يشك بيه وبفضل فضيحة امي عمي راح يصدك هاي الاشعات عني ويطلعني من هذا البيت
بدت اول شي باشاعه زغيره
زينب تتأخر ما تجي بنفس الموعد الي تجي بي قبل حتى عمي يشك بيه
عمي.. ايجوز عدها دوام اضافي دراستها صعبه
طبعا اني ابد مااتاخر اجي بنفس الموعد كل يوم
رجعت كالت تتأخر هاي البنيه خاف عدها شي
عمي..ماصدك
طبعا كل اربع او خمس ايام اذبلها حجايه عليه
شافت عمي ما مقتنع بهذا الحجي
ولا يصدك بي قررت الاشاعه تكون أكبر هلمره
كالت اليوم ولد غريب وصل زينب للبيت
هاي البنيه مبينه مو راحه على امها هسه اجيبلنا مصيبه
الناس بعدها ما نسايه فضيحة امها
النوب تريد اتسود وجهنا
عمي اليوم الي بعده شفته منتضرني بلباب
زينب...هلو عمو
عمي...منو يوصلج للبيت
زينب...استغربت من سؤاله منو يوصلني ماكو احد
عمي...لا امس وصلج للبيت
زينب...ماكو اي احد اني اجي وحدي
عمي...شوفي لا تخليني اغير معاملتي وياج صيري حبابه
امشي عدل فهمتي لو لا
اني ماكنت فاهمه هو على شنو يحجي
سكتت
بقيت كل النهار افكر بكلام عمي شنو يقصد بهذا الحجي
ليش يشك بيه
اني حتى داخل الكليه مااحجي ويا الولد
