رواية اجبرني اعشقه الفصل الثالث 3 بقلم همس حسن

الحلقة 3
.
رواية اجبرني اعشقه الحلقة الثالثة
آدم : ششششش .. مش عاوز أسمع صوتك
مليكة بتبرق وبوقها مكتوم
آدم بيشيل ايده من على بوقها .. بيحط ايده جنبها عالحيطة وبيقرب منها
آدم : قولتي تعملي نفسك رافضة في الأول إحياءاً لماء الوجه عشان ميبانش إن دي اصلا رغبتك .. وقبل أول قلم كنتي بتقولي بالفم المليان "انا موافقة" عشان دا كله كان تخطيطك من البداية
مليكة : هو ايه اللي كان تخطيطي ؟؟
آدم : تخطيطك إنك تدبسيني انا في كل الليلة دي .. عشان يوم ما تتفضحي يبقى انتي كنتي متجوزة قبل كدا
بس وحياة أمي اللي مبحلفش بيها كدب يامليكة ... يومين بالظبط ونتجوز وابكيكي بدل الدموع دم كل الليلة وانتي بتتمني الموت ومش عارفة تطوليه
مليكة بتزقه بعصبية : لييييييه انا عملتلك ايه لكل دا ، وإذا كنت عرفت حاجة وحشة عني فدا شئ ميخصكش
أما بقا بالنسبة للجوازة دي انا لو عليا مش عايزة ابص في وشك واظن فيه طرق كتيييير اوي أقدر اجيب بيها اي واحد ادبسه في الليلة على رأيك
بس انت مريض ودماغك تعبانة .. ثم إنك هتخليني اتمنى الموت ازاي بإذن الله ؟؟
آدم : مش انتي حلوة ومقطعة السمكة وديلها ؟؟
من أول يوم هيتقفل فيه باب علينا احنا الاتنين في أوضة واحدة هدفعك تمن كل ذنب عملتيه بس بطريقة مختلفة

بيحط ايده على شعرها وفي عيونه الشر
مليكة بتزقه بعيد عنها : انت حيواااان
آدم بيمسكها من رقابتها : طب اسمعي بقا ياقطة
القاعدة الأولى والأهم .. لسانك دا لو نطق كلمة غلط تاني في ضهري او وشي هقطعهولك ، صوتك لو علي عليا تاني هحرمك منه .. مفهوم

آدم بيسيب رقابتها وبيعدل هدومها : ان شاء الله مفهوم
يلا روحي جهزي نفسك بقا .. خطوبتك كمان ساعة ياعروسة

فتحت الباب وخرجت تجري على برا .. أنفاسها بتسابق خطواتها ، دقات قلبها بتسابق عقارب الساعة .. عيونها الرقيقة العسلي مدمعين من الخوف
ياترى اللي جاي شكله ايه ؟؟؟؟
لقت روان في وشها ..
بدون أي مقدمات حضنتها وقعدت تعيط ، روان بدأت عينيها تدمع هي كمان وهي وخداها في حضنها وبتطبطب عليها
مليكة : انا ليه بيحصل فيا كدا ياروان
روان : قولي الحمدلله على كل حال .. خصوصاً وإن انتي كان ليكي يد في اللي بيحصل دا
مليكة بتبعد عنها ورفعت عيونها المدمعين باستغراب : ليا يد ازاي ياروان ؟
روان : شيلتي نفسك شيلة مش شيلتك وحطيتي نفسك في موطن الشبهات للعيلة كلها .. كنتي منتظرة جدك يعمل ايه
مليكة : عشان بحاول أنقذ بنت عمي وصحبتي بقيت انا كدا بوقع نفسي في موطن الشبهات !
روان : ياحبيبتي.. ياحبيبتي فكري فيها بالعقل ، اللي انتي عملتيه من سنتين دا مكانش هين ولا صغير دا
مفيش أغلى من الشرف خصوصاً عندنا في العيلة .. وعاجلاً أم آجلاً جدو كان هيعمل كدا بس الحمدلله إنها جت في آدم مننا وعلينا مش حد غريب
مليكة : مش لو كان ليا سند في البيت دا مكنتش هوصل لكدا

.
في جنينة الڤيلا ..
رفعت واقف مع الناس بيظبطوا ديكور الخطوبة في أسرع ما يمكن
نشوى بنته داخلة عليه
نشوى : هو انا اللي سمعته دا صح يابابا ؟
رفعت : هو ايه اللي سمعتيه
نشوى : انت صحيح هتجوز آدم لمليكة وبالسرعة دي !!!
رفعت : أيوة صح
نشوى : طيب وليه الاستعجال دا ما تسيبهم ياخدوا على بعض شوية
رفعت : نشوى .. من امتى وانتي بتتدخلي في قراراتي ، انا كبير البيت وعارف مصلحة كل واحد فين
نشوى : ماشي يابابا اللي تشوفه
سابته ودخلت على جوا .. اتلفت يكمل إشراف على الناس
سهيلة خارجة من الباب عشان تكلم جدها .. وفجأة برقت ورجعت لورا تاني ودخلت بسرعة
سندت ع الحيطة غمضت عينيها وخدت نفسها ... واحدة واحدة بدأت تبص تاني على الجنينة بطرف عينيها على شاب إسمه سليم واقف يظبط في الديكورات ، اتلفت بصلها هو كمان من تحت لتحت
Flash back