رواية زواج في زواج الفصل الثالث 3 بقلم جمانه السعيدي
ميار...بيني وبين نفسي اكول لا مستحيل اخسر زوجي وحياتي
لازم ارتب وقتي اكيد التقصير مني مو منهم
رجعت للبيت نضفت بس المطبخ ودخلت غرفتي انام حتى بليل اكدر انتضر أكرم وما يحجي عليه
كعدت المغرب على صوت عياط عمتي
شلون نايمه وعايفه الطرمه ما غاسلتها
شنو تردين اني انضف واحضرلج العشى
انتي شحاسبه نفسج ترا راتبج ما شايفين منه شي
ولا جاي تصرفين علينا
وهذا البيت مو فندق مثل ماحنا الصبح نشتغل انتي عليج العصر التنظيف وجهزين العشى
كانت مشكله شكبرها لان نمت العصر
كعدت من النوم ورحت اجهز العشى
اني مو جبانه لو شخصيتي ضعيفه بس اني مسالمه
ومااحب المشاكل ماا ريد اخسر حياتي الجديده
اريد اتعود عليها شويه شويه
من اشتغل بلبيت ام أكرم تسكت وما تسوي اي مشاكل
واذا رفعت ايدي عن الشغل تكب العيطه
بيومها مانمت بقيت منتصره أكرم
الساعه ثنتين وربع رجع لكاني منتضرته
جمانه السعيدي
أكرم...هااا شنو هاي المشكله الي صارت اليوم
ميار...اي مشكله
أكرم...امي اتصلت وتكول حضرتج نايمه وعايفه البيت
شنو تردين امي تخدمج
ميار...لا مااريدها تخدمني بس نمت شويه لان تعبانه
أكرم...ومن شنو حضرتك تعبانه
ميار...ارجع للبيت متاخره اريد ارتاح شويه
أكرم...واني شنو بلدوام خاف تصرفين على البيت واني ماادري
شو راتبج كله الاهلج وملابسج
مثل ماامي واختي الصبح يخلص الشغل باقي اليوم الشغل عليج مااريد لغوه زايده
ميار...بقيت ساكته وهو غير ملابسه ونام هاي كانت محاضره حتى اتعلم اصول التنظيف والطبخ ومااقصر بشي
خاف امه تزعل اما مشكلة كل يوم لان ماانتضره نساها
نهائيا رغم اني جنت منتضره ومبدله ومتعطره
نمت الصبح كعدت على صوت عياط
مروه زوجت اياد جايه زعلانه وكاعده تعد وتصف علي
من الصبح الله يستر
كعدت من النوم دخلت للحمام سبحت وبدلت وطلعت
أكرم نايم طلعت لكيتها تحجي بعصبيه
وامها تحرض بيها علي
الحجي أشكال واللوان امها بمكان ما تهديها نازله على الرجال غلط
خل يولي وين يلكه مثلج طبعا مروه راسبه ثالث متوسط متقدملها اياد بعد خمس سنوات من تركت المدرسه أكرم باقي يلمح الاياد يجي يتقدملها
لان جان بوقتها متوضف اياد شخصيه وكارزما
امها ما بطلت تحجي وتغلط علي شيريد منج هذا المعيدي
تعرفون ليش تكول هيج علي
لان هو جان يسكن محافظات من طلب ايدها هو كان خريج ومتوضف
اهلها وافقو علي بعد زواجهم بكم شهر اجت كعدت بيت اهلها وشرطت علي يجي يسكن بغداد
ولا ماترجعله ابد
بلبدايه هو ماقبل بس هي دزتله خبر ان هي حامل
بقت بيت اهلها ٣ اشهر كاملات
بعدين نقل وضيفته البغداد بلكوه والواسطات
وأجر بيت كعدو بي
حسب مافهمت من كلامهن هي متعوده كل فتره تزعل وتجي بيت اهلها اجيب ابنها وتجي
وتكعد تفرض علي شروط حتى ترجع
نرجسيه وطبعها انانيه واهلها وخاصه امها تشجعها على هاي التصرفات
طبعا اني عرفت هاي التفاصيل بعدين مو بنفس هذا اليوم
جمانه السعيدي
صبحت عليهن وطلعت للدوام بدون ريوك
مالي خلك اكعد اسمع مشاكل مروه
كافي عليه اكرم ونفسيته المتقلبه
وصلت للدوام قبل استاذ اياد
شويه واجا شكله كلش ضايج وتعبان
حتى ماله خلك يحجي كعد يمشي بلمعاملات
اني لان اعرف المشكله
طلبتله ريوك ويانه من طلبنا
اخذته ورحت الغرفته
ميار...تفضل استاذ مبين مامتريك
اياد....شنو هاي الزحمه اكيد تعرفين اكو مشكله
ميار...ميخالف اكيد تنحل خليها تهدء اليوم وراح ينحل كلشي
اياد...شكرا
ميار...اجيبلك حبايه بندول
اياد...ياريت
ميار....هسه اجيبلك جاي وحبايه
انطيته حبايه ورجعت الشغلي بعد ماوصلت الغرفته منا لمن كمل الدوام شفته كاعد بغرفته واني طلعت للبيت
وصلت لكيت البيت هوسه صاير
وأكرم ماكووو الجماعه متغدين وعايفين المواعين
اسمع صوت تلفزيون يشتغل داخل غرفة عمتي
الباب مسدوده
بدلت ملابسي وحميت الاكل علما الاكل حما غسلت المواعين الوصخه بسرعه
اكلت واني واكفه على الطباخ
اخلي الاكل بحلكي وامسح الكاونتر ضميت ألموأعين الزايده شلت الجدور ونضفت المطبخ
اكل لكمه وعلما ابلعها انضف شي
بلكت يبقى وقت امدد جسمي شويه
خليت القوري على الطباخ ونضفت الكاع صبيت جاي كعدت شويه علما اشرب الجاي لان رجليه يوجعني
غسلت الكوب ونضفت ارضيه المطبخ وطلعت للطرمه
نضفتها طلعت دجاج نكعته بليمون وخل وبهارات
حتى اشويها العشى
باوعت عندي نص ساعه اكدر اتمدد بيها
خليت المنيه بعد نص ساعه وتمددت غفيت
اسمع المنيه يرن بس مااكدر افتح عيوني هلكد ما
تعبانه
بلكوه كمت امشي واني مغمضه عيوني
طلعت لكيت المطبخ هوسه
مروه وزهراء وخالتي مخليات حب وفواكه وكاعدات يأكلن والمطبخ راجع هوسه
عمتي بس شافتني طلعت من غرفتي
كالت صلوات كعدت المسعده عبالي نبقه بلا عشى اليوم
كلت بكلبي انتن اتلاثه ولا شغل ولا عمل سون عشى
ماحجيت اي شي وياهن
طلعت الدجاجه خليته بلفرن وكعدت تحضر الزلاطه
واللبن
عمتي... سوي مقبلات بيذنجان
زهراء....خلي دبس الرمان على الدجاجه تطلع طيبه
مروه....علاوي يحب حمص بطحينه علاوي ابنها
حسيت نفسي عامل بمطعم واكفه واستقبل طلباتهن
وهنا كاعدات يحشن باياد ويكرزن حب
اللهم طولج ياروح
كملت العشى خليته كد.امهن ودخلت غسلت وصليت
طلعت لكيتهم متعشين مبقيلي قطعة لحم زغيره
والمقابلات ماكو ماسحات الماعون
حتى الزلاطه مخلصاتها
مروه.. عاشت ايدج الدجاج طيب
اخذت خبزه وقطعة الدجاج الي مبقينها طلعت خياره وطماطه وكعدت اكل بلمطبخ
جابن المواعين كومهن بلمطبخ واخذن الجاي وراحن يسولفن ويضحكن
كملت ورجعت اغسل المواعين وارتب بلمطبخ
دخلت غرفتي اريد ارتاح
جان عمتي صاحت وينج تعاي سوي جاي اجانا خطار
طلعت لكيت بناتها كاعدات بغرفتها يسولفن ويضحكن
خدرت الجاي ودزيته للخطار ورجعت الغرفتي
تمددت غفيت هلكد ماتعبانه
سمعت باب الغرفه انفتح فتحت عيني لكيته اكرم
جمانه السعيدي
أكرم.. هاا نايمه
ميار...لا بس تمددت شويه علما تجي
أكرم...كومي اريد اكل جوعان
ميار...اي هسه
طول النهار يحجن على اياد ويغلط علي
وهو احسن منهم كلهم يمكن تورط مثل مااني تورطت بهاي العائله
اليوم الي بعده كان اياد بلدوام اني رحت سلمت علي واخذتله جاي بس ماحجينا اي شي لان دوام والموظفين
موجودين
اجا اياد العصر يصالح مروه
وهي تتعزز علي وانت شنو شنو قدمتلي
اياد...اريد اعرف انتي شنو ناقصج
مروه...كلشي ناقصني
آياد...مثل شنو اني اجيب الراتب واخلي بايدج بس اخذ منه مصرف ولا ادخن ولا اني صاحب علاقات
وجاي ارجع للبيت انضف حالي حالج
رغم انتي ربت بيت لا موضفه ولا شي
مروه...انت شنو تعيرني وشنو الموظفه احسن مني مثلا
اياد..مو احسن منج بس قصدي ما مشغوله
فارغه تبقين نايمه الحد ماارجع من الدوام حتى ريوك الصبح ماكووو اطلع بدون مااتريك
غدانا كله نواشف اريد دولمه برياني اكله ببها خير
كله تكلين وتخلين كدامي واني ارجع انضف المطبخ
انام ساعتين واكعد
ووين العشى حبيبتي
تردين عليه روح جيب جاهز مالي خلك للطبخ
صح لو اني غلطان
مروه...انت متعجب ترا اغلب العوائل اجيب عشى جاهز
لو يطلعون للمطعم
اياد ...بس مو كل يوم اني اخر الشهر اتقرض الراتب ما يكفي رغم راتبي خير من الله
مروه...عوفني اذا ماعاجبتك انت يمكن شايفلك شوفه
جاي تطلع حجج عليه
اياد...مااكدر اكعد بلبيت وانتي وعلاوي ماكووو
مروه...ماارجع شو انت محملني منيه
آياد...الله يهديج
مروه...شنو شايفني مخلبه كدامك ولله يهديني
اياد...اني تعبت تجين لو لا
مروه...لا بله شلون راح تكدر تعيش بدوني
اياد...بكيفج اني رايح بس لا ترجعين تتصلين
مروه...شنو اتصل انت الي لازم تجي تتوسل حتى ارجع
اياد...اتوسل اه تحجين صدك بيش غلطان وياج حتى اتوسل
صدكي اني متحملج لان بت عمي
لو وحده غريبه الف جلاق اضربج وازوج من الصبح
اني رجال تعبان
شنو ارجع الكه البيت مو نظيف شنو الاكل جاهز
شنو كل يوم طالعه بطلبات مالها معنى
بابا اعقلي ورتبي وقتج ونضمي حياتج
اني رايح من تراجعين نفسج وتغيرين اسلوبج عود ساعته تعاي وراي
جمانه السعيدي
طلع اياد من البيت زعلان وهي كامت تبجي وتحجي علي
انسانه نرجسيه
تريده بعد يتوسل بيها ويقدم فروض الولاء والطاعه
كون يبقى يتوسل بيها كدام اهلها
وتمسح بكرامته الكاع يله تقبل ترجعله
بس هو زين سوه اني لازم بيوم من الايام انتفض مثله
ارفض هذا الوضع
لان تعبت بين عمتي المتسلطه
وأكرم الاناني
صار شهرين ونص على زواجي وتعبت منهم ثنيبنهم
طبعا من كامت تبجي اهلها كلهم صارو وياها
حتى اكرم
كلهم شمرو الذنب على اياد ومحد حجا عليه ولا كلمه
ولانبها تهتم بحياتها
اياد انسان ما يتعوض ويستاهل وحده احسن من مروه
ميار...اني من يوم ازوجت لليوم يوم الجمعه اروح اشوف امي وخواتي
اني طبعا اتفقت راتبي الامي من البدايه
وأكرم وافق بهذا الشي
بس كلما يشوف تقصير مني يكول اني شمستفاد من دوامج
الراتب تأخذه امج
رغم اني اتفقت وياا من البدايه وهو وافق
اجيت اروح الاهلي يوم الجمعه عمتي كالت اليوم ماترحين
نزلي البردات اغسليهن واغسلي فراش المطبخ
ميار...من ارجع انضف اريد اروح اشوف امي وخواتي
ام اكرم...لا ماترحين اليوم عدنا تنضيف
خلصي التنظيف وروحي
ميار...مو يخلص الوقت
ام اكرم... شبيها امج مشلوله وخواتج وين رايحات
غير يوم وروحي
ميار...بس غير يوم عندي دوام مااكدر اروح
ام اكرم...يله ارجعي بدلي وتعاي نزلي البردات مالي خلك للحجي هواي
ميار...اني طبعا اعتبر يوم الجمعه فسحه بلنسبه اليه
اخلصها كله نوم واكل بيت اهلي
اتمدد وابقى اشرط على خواتي هلكد ما تعبانه بين الشغل والدوام
دخلت غرفتي اتصلت على اكرم
ميار....أكرم اريد اروح الاهلي
أكرم...اي روحي اليوم مو جمعه اني امر عليج بليل ارجعج
ميار...امك ما تقبل تكول نضفي
أكرم...اي خلاص لاترحين ابقي نضفي وروحي غير يوم
ميار...شلون غير يوم عندي دوام
أكرم...لا ادوخيني اسمعي الكلام ولا ترحين
ميار...هاي شبيك مااكدر اروح غير يوم
أكرم...اهوووو
ميار. قفل التليفون بوجهي
كلش ضجت ونقهرت من تصرف أكرم وامه
اتصلت على امي
امي.. هااا وينج منتضرينيج طبختلج دولمه حامضه هاي الي تحبيها
ميار...مااكدر اجي عدنا شغل
امي...ليش ماتجين
ميار....بلكت امر عليكم بليل عدنا شغل اليوم
قفلت التليفون ودموعي نزلن منا ومنا
اني ابقه انتضر يوم الجمعه حتى اغير جو واشوف امي وخواتي
وعمتي طلعت صفح بناتها ثنيبنهن كاعدات
ماينضفن اني ليش انحرم مااروح الاهلي
