رواية قبل الوداع ارجوك لا تذكريني الفصل الرابع عشر 14 بقلم الكاتبه البارونه
" الفصل الرابع عشر"
:
:
+
عشقتك قبل ما اشوفك وشفتك صرت كلي حلم ابي
رمشك يغطيني وابيك اقرب من انفاسي
يهمك تعرفي انك قتلتي في سنيني الهم
قتلني ضحكك وجدك قتلني لينك القاسي
+
م .ق
:
:
اول مره يفكر ماجد وش يلبس !!!
هذا يعتبر اول موعد حقيقي تشوفه فيه غادة .. يعني تشوفه بشكل طبيعي ..
وتذكر يوم امس..
يوم الاحد :
الساعة ٩ الصباح اتصل على سلطان من الشركة ..
مرحبا
مراحب
ماجد : وينك ؟
سلطان : في البيت
ماجد : عسى ماشر وش فيه صوتك
سلطان : ولا شي انا باجيك انا وخالي عبداللطيف عشان التوقيع في مسألة شركة دبي
ماجد : سلطان فيك شي !!؟
سلطان ؛ طلال زميلي استشهد
ماجد : انا لله وانا إليه راجعون متى ؟
سلطان : في المداهمة على ارهابيين التفاصيل بتطلع في الاخبار بعد التحقيق ..!
ماجد : عظم الله اجرك متى الصلاة عليه ..
سلطان : اجرنا واجرك بيصلون عليه الظهر
ماجد : سلطان لاتجي عشان التوقيع انا ماتصلت عشانه فيه موضوع ثاني كنت ابيك فيه وخلاص والاوراق نجيبها الليلة في البيت وننادي المحامي ..
سلطان : خير ان شاء الله ..
:
+
:
+
سلطان في المقبرة والحزن يلقي ظله على الموجودين .. يخفي دمعته بالنظاره الشمسية واللطمة ( لفة الشماغ ) ولكن كيف حزن الموجودين من اخوة وابناء عم واصدقاء وزملاء للشهيد طلال .. الحزن لايختفي هو فقط يتسرب لروحنا عندما نعتقد اننا نمارس حقنا بـ السلوى والنسيان .. هل الموت مرادف للحياة ام نهاية الحياة او هو حياة اخرى حياتنا الحقيقية هي الغياب وهو الحقيقة ..!!
من ضمن الوجوه وجه صغير يلتفت يمين وشمال يدس يده الصغيرة تارة في يد الخال وتارة في يد العم وكأنه يصور مشهد مُصغر من حياته المُقبلة بدون والده .. ابن طلال ذو الـ ست اعوام يبكي ويمسح دمعه .. لايعرف حتى مادا فقد منذ قليل ..
.. من المقبرة للصلاة على الميت
من ضمن الموجودين كان ماجد اخوه وهو الامر الذي استغربه سلطان فـ ماجد الي يعرف لا يذهب مشوار بدون تخطيط او موعد مسبق ولايرتجل ابداً في مواعيده لكن ماجد تغير منذ شهور .. هل يستطيع سلطان البوح لماجد يوماً ما عن مالديه ام سيكون باب غضب آخر على سلطان مع انه لايعلم عن باب الغضب الاول كل مايعرفه ان ماجد لايعتبر اهل المنزل عائلته ابداً بما فيهم سلطان ../
لكن وجوده اليوم تعزيته لي وللموجودين !! ضغطه على يدي .. كلها تؤشر ان الواجهه الحديدية لماجد بدأت بالتصدع .. واذا لم يجد سلطان له منفذ الان لن يجد ابداً ..
:
:
ماجد في منزل غادة في مجلس عائلتها تحديداً يجلس مسترخي بالظاهر لكن من الداخل يعرف ان غادة لو رفضت الزواج سيقفل هذا الباب للأبد .. لان جلوسه وحيداً في منزلها اختصار لحياته ووحدته وهو يريد من يملاأ هذه الوحده سيتغاضى عن اخطاء غادة السابقة .. وستتغاضى مُرغمة عن ماجعلته يقترفه .. سيبدأ معها كما يريد هو ..
يامرحبا ياماجد
ماجد : هلابك يافيصل وانا اخوك انت عارف سبب زيارتي الوالد تعبان وماقدر يجي .. وانا كبير كفاية عشان اخطب لنفسي ..
فيصل بعزه : حياك الله وانت عارف ياماجد اولاً واخيراً الكلمة لغادة هي صاحبة الشأن وعلي اقولها رأيي لكن تبقى هي صاحبة الرأي الاول لو وافقت كلمتك عشان الشوفه ولو رفضت تبقى اخ عزيز واتشرف بمعرفتك .!
ماجد الي قفز قلبه لذكر الشوفة :انت قلت لي البارح انهم موافقين مبدئياًو انا عندي رحلة الثلاثاء لسويسرا وباطول فيها وكنت مفكر اذا وافقت نملك واخذها معي واذا رجعنا نسوي حفلة ..
فيصل بـ استغراب : لا وانا اخوك المسالة ماهي خذوه فغلوه غادة عندها اختبارات والملكة لازم يحضرها عمنا ولازم يكون فيه وقت لها نفسياً ..
ماجد الي حاور رجال اقتصاد ورجال مال وسياسيين مهمتهم الحديث ماوجد اصعب من محاورة اخ غادة الصغير ..!!كيف يقنعه انه ماعنده صبر ..! على الاقل عرف ان اولاده من غادة سيكونون واثقين ورجال قبل اوانهم ..!!وابتسم ..
:
+
:
+
:
+
:
يوم الاحد في المساء في منزل ماجد
المحامي : الحين هذا كل شي لو سافرت الاثنين وحليت الموضوع من هناك نكون منتهين
سلطان : لا باقي شي
ماجد برفعة حاجب : وش !؟
سلطان : انا باسوي لماجد توكيل بما اني الان املك النص وانا مشغول وموظف ولاعندي الدراية الكافية اعتقد بيعيق ماجد او وكيله في الشركة لذا باعطيه وكالة على نصيبي..!!
الخال : مجنون انت هذا بياكلك مثل ماكل ابوك واكلني
ماجد : انا ارفض التوكيل
سلطان وهو يقف : اول شي اطلع منها ياخال ثاني شي براحتك ياماجد اذا تبي تنتظر عند كل توقيع ترسل لي الاوراق وادققها وارجعها وعند كل معاينة او جرد واو صفقة مهمه اخذ اجازة خارجية من العمل واسافر دبي براحتك ..!
ماجد يقف بدوره : انت عارف اني مستحيل ارضى لو ماكان فعلاً يعيق عملي وفيه شي ثاني انا بسافر الثلاثاء واذا رجعت باملك لاني خطبت اليوم ابي يكون عندك علم عشان تحضر ..
سلطان بفرح : اتوقع ماخطبت سمر بما ان امي معصبه ويمد يده لأخوه الف مبروك وانا اخوك خلني عم بسرعه ..
:
:
+
..!!
الاثنين في الجامعة
+
:
بنات تلاحظون غادة تسرح كثير وماهمها شي
مشاعل : انا ملاحظة حتى ماعاد تدخل الواتس او تتكلم مثل اول
مها : فيها شي
ريم : غادة من عرفت ماجد ماهيب طيبة .. الله يكفيها شره
مشاعل : صدقيني هو مهتم فيها والا بزنس مان بيتفرغ يجي يحاسب عنها في مطعم
مها : تتوقعون ذاك اليوم يوم تأخرت شايفها او شي هي رجعت عادي بس ماتفاجأت انه حاسب عنها
مشاعل : الي ماعليه غبار اخلاق غادة يامها
ريم وهي تفكر : اخلاقها ماعليها غبار بس حظها مو غبار وبس طييين ولاتنسون ان غادة كتومة فالمطلوب الان مننا انا نحاول نخليها تنسى مشكلتها مهما كانت ..!!
مها: ومشكلتي انا طيب !؟
ريم تعالي اعلمك وش تقولين !!
:
+
اتصال فيصل فيه وتحديده المغرب شوفه وبعدها الرأي النهائي ترك ماجد في حيرة من امره
وش يلبس رجل في مقابلة مهمة مع من يريد ان يثير اعجابها ..ثوب شتوي اسود او ثوب ابيض وجاكيت اسود .. لا بيلبس ثوب ابيض يكفي السواد الي تعرفه غاده عنه ../ ورتب نفسه تعطر ولبس الكبك المفضل عنده من الياقوت الاسود ونزل ..
:
+
:
+
جلس منصور يفكر اتصل او لا !!
يارجال اتصل كم لها ودق
مها : الو
منصور بوقار مصطنع : ماعطيتيني قرارك
مها باستغباء : اي قرار
منصور : اذا تبينا نكمل او لا
مها بشجاعة ( استقتها من صديقاتها ونصائحهن ) : منصور اذا انت تبي تكنسل الزواج هذا شي راجع لك انت جيت خطبتني من ابوي واعطيته الموافقة لكن الحين تبينا نكنسل يبيلك ترجع لابوي !!
منصور بعدم فهم : يعني انتي موافقة نكمل
مها : اكيد انا تقريباً خلصت جهازي ونبي نجي الاربعاء نحط اغراضي في البيت عشان كذا ابيك تعطيني مفتاح وتخلي البيت الاربعاء ..!
منصور : البيت والمفتاح وراعي البيت تحت امرك ..! اجل انا جايكم بكره ..!
تسكر مها وهي تفكر انها عرفت تخرج من هالمأزق بدون ماتتأثر كرامتها او تواجه غضب ابوها واتصلت على ريم تبشرها ~
:
+
؛
+
سمر بغضب: لو وافقتي يانورة بيكون آخر مابيني وبينك !!!
نورة : سمر انتي تتكلمين عن شي ماصار هدي..!!
سمر : كلنا عارفين انه بيصير وان سلطان مو زي ماجد لكن لو خطبك سلطان بعد الي عملوه فيني ووافقتي ماراح اسامحك عمري كله
نوره : مو اني قلتي اذا خطبك تمسكي فيه ..!
سمر ؛ هذا كان قبل الحين لازم ننتقم منهم
العنود تتكلم وهي خايفة : سمر ماصار شي رسمي بينك وبين ماجد ليه احساس انك كنتي خطيبته
تلتفت عليها سمر بغضب : وانتي بعد الحين تتصلين على روان وتعرفين من الي بياخذها ماجد
العنود : ماراح اتصل انتي عارفه اني ماكلم روان
سمر ؛ ليه
العنود بارتباك : كذا بدون سبب
:
+
:
+
في غرفتها تنشر ملابسها وش تلبس لماجد الموجود من ربع ساعة تحت .. وش تلبس لشخص شافها في اقصى حالات خوفها وصدمتها ..
وقررت ترتدي فستان اسود باكمام طويلة يكفي البياض الي سرقه من روحها ..
ادخل
نجد : خلصتي فيصل يناديك
غادة : ايه
نجد : بتروحين كذا بدون مكياج كأنك رايحه لعزا وباسود بعد
غادة : لا بالم شعري بعد ( ولتأكيد كلامها رفعت شعرها بونتيل )
نجد : بكل حالاتك حلوه حتى الاسود ابرز بياضك بس عشاني ( وتاخذ الفرشه ) حطي بلاشر شوي وروج
غادة : لا
نجد ؛ عشاني بليييز
غادة ؛ هاتي وتضع روج خفيف وردي وبلاشر وردي
نجد ؛ اووو كذا تمام
:
:
+
:
+
في المجلس قلبه يدق جالس يناظر الباب فيصل دخل له ١٠ دقايق والحين بيجي هو وغادة ..
غادة ..!! اه ياغادة اول ماعرفتك والحين في مجلسك مرت مياه كثيييره من تحت الجسر انتزعه من خياله فيصل الي دخل مبتسم
وجلس : بتجي الحين
كان ماجد يتنفس بصعوبه وقلبه يكاد يصم اذنه .. واول مره يتمنى يكون كما يُقال له وسيم
السلام عليكم .. دخلت رافعة راسها بعزه
ابتسم ماجد ووقف بدون ماتفوته نبرة الغضب في صوتها : وعليكم السلام
جلست غادة جنب اخوها وكان ماجد يناظرها من فوق لتحت معقولة كل مره آجمل
اما غادة الي جلست باسترخاء وحطت رجل على رجل اخذت تناظره بتقييم رافعه حاجبها .. طويل وجسم رياضي لونه البرونز متناقض مع لونها وشفته الورديه متناقضه مع سماره وعيونه الواسعه وسودا وثاقبة وتذكرت اخر مره تقابلوا وفجأة شعرت بالغضب اكثر اما اخوها الي فهم توريد بشرتها على انها حياء وحب يلطف الجو : هذي البرنسيسة غادة شيخة البيت
ماحد : تستاهل وش تدرسين ياغادة
غادة : في الجامعة ..
ماجد بابتسامه : اي قسم
غادة : لغة انجليزية وترجمة
ماجد : غريبة مـ... وقطع جملته الي كانت ( ماقد تكلمتي او قلتي معي كلام او عبارات انجليزية ) مـ خلصتوا اختبارات
غادة : الخميس اخر شي
ووقفت والتفتت على اخوها بابتسامة حنونة : استأذن
وقف كل من فيصل وماجد .. لكن نظرتها لآخوها مافاتت ماجد الي شعر فجأة بـ حزن وفكر ادفع من عمري عمر وتناظرني غادة كذا ..!!! ناظرها تمشي معطيته ظهرها شعرها يتمايل مع مشيتها واصر ماجد انها تكون له مهما كان رأيها بالزواج ..~
؛
+
؛
+
جالسة بأناقه وترسم وعندها طفل عمره سنتين ..
فهد : ادورك من اليوم وانتي هنا ..
نائلة الي قفزت واحتضنته : اهلاً اهلاً نور البيت
كنت بتجي بكره
فهد : الغوا رحلة بكره بسبب الاجواء ..مثل ماتوقعت القاك ترسمين
نائلة : احمد ربك الرسم مساعدني على فراقك ..
فهد : ماجد خطب اليوم وان شاء الله بيوافقون
نائله : اخيراً خلنا نفتك من الاستراحه
فهد يضحك : لا الاستراحه موجوده بس جد فرحان انه اختار اخت فيصل مع اني مادري كيف فكر فيهم .. فيصل كلمني يسأل عنه واثنيت عليه لان ماجد ونعم لكن محتاج احد يفهمه ويكون قريب منه وصبور عليه
نائلة : ان شاء الله تكون له العائلة الي محتاجها
فهد : البيت الي البنت منه كويس لكن لو ماارعبها ماجد بعصبيته وتوتره الدايم
نائله : والي قلت لي كان يكلمها .. وصار مره كويسه نفسيته معها
فهد ؛ سألته قال مرحلة وانتهت ..!! خاصة انه له شهرين راجع عصبي دبل لدرجة فالاستراحه لو نقول له تأخرت او وينك سبب مشكلة ..!!
:
:
:
سافر ماجد لسويسرا وتحديداً زيوريخ لمقابلة منظمين في شركة خدمة مصرفية .. يعرف ماجد ان هذه السفره من اهم الصفقات عنده لكن مايقدر يحط عقله كامل فيها لانه موجود مع صاحبة الفستان الاسود و الشعر الاسود ..!!
ارسل لها : وصلت وماردت
بمجرد مايخلص بيكلمها ..!
:
(في قروب واتس اب )
بنات نقدر نجتمع
+
مها : انا اقدر لان امي والشغاله وزوجة اخوي بيروحون يودون اغراضي وابوي بيتوقع اني معهم
ريم : انا اقدر حددوا المكان بس
مشاعل : الله اجتماع وطالبته غادة .. اكيد نقدر حتى لو نكنسل الاختبار
غادة : اختبار بكره سهل خلونا نتقابل في مول اوك
:
اجتمعوا ومازالت غادة ماتعرف كيف تفجر القنبلة ..:
بنات عندي لكم خبر صاعق شوي
مشاعل بصراخ : تزوجتي
ريم : لاتقولين ولد عمك فايز
مها : هاتي
غادة تبلع ريقها ؛ ماجد العالي خطبني وانا وافقت ..!!
الصمت كان معبر لكن مشاعل تداركت المفاجاة ووقفت وحضنت غادة وهي تقول الف الف مبروك الامر الي دعا الموجودات في المقهى النسائي يلتفتون لهم باسمات
مها : اف ماحد العالي مره وحده من يصدق
ريم تضحك : ليه طيب حزينه انتم ليه تقولون لنا اخبار زواجكم وانتم حزينات ..!
مشاعل : ماتدرين يكسرون العين عنهم
غادة : الموضوع كله كان فجأة
ريم : وين فجأة اناي لك تقريباً سنه معه وماقعدتي معه سنه الا تحبينه وماخطبك واقدم الا يحبك الحمدلله طلعت قصتك سعيده والف الف مبروك
مها : لاتنسين تعطيني عمولة الخطبة ترى انا السبب في معرفتكم
ابتسمت غادة من الوضع كامل ..!
كانت تقرأ رسايل ماجد وماترد وتعرف انها كذا تغضبه لكن مازال محافظ على اعصابه .. اذا كانت بتتزوجه لن تكون مطيعه لدرجة الغاء شخصيتها لازم يحترم وجودها ..!
:
+
:
+
انتهى ماجد من الاجتماع الساعة الحين ١٠ في سويسرا يعني تقريباً الوقت مناسب فالرياض للاتصال
ودق ماردت !!
بدا فعلاً تجاهلها يثير اعصابه
ورجع دق :
الو
ماجد : اختفيتي من امس عسى ماشر
غادة : انت عارف عندي اختبارات
ماجد: وينك انتي مش فالبيت
غادة : لا طالعه مع صديقاتي
ماجد الي مازال ضاغط على اعصابه : ليه ماقلتي لي
غادة : انت مسافر ماحبيت اشغلك
ماجد بغضب : غادة !!! قلت لك بلا استذكاء علي
غادة الي جالسه في طاولة وصديقاتها في طاوله : اوك
ماجد : ارجعي للبيت
غادة : اوك
ماجد : بادق بعد نص ساعه لو مامنتي فالبيت لاتلومين الا نفسك !!
غاده بهدوء : اكرهك ياماجد !!
ماجد : مايهمني صدقيني ياغادة مايهمني اكرهيني الحين وقاوميني زي ماتحبين لكن كل شي ابيه منك واحتاجه منك باخذه .. انا الى هذي اللحظة اخذت كل شي من الدنيا غصب .!!
+
:
+
نورة : العنود وش بينك وبين روان .. البنت حتى ماعاد ترد علي ..!
العنود : ماقدر اقول بس خلاص روان ماعاد هي صديقتي ولا ابي اكلمها حتى مابي اروح بيت خالتي ..بس اذا خطبك سلطان وافقي ماعليك من سمر
نورة : المشكلة مانيب فعلاً متأكدة من مشاعر سلطان ..!
العنود : روان كانت تقول انه مهتم في نوره مره
نورة : وسمر وش نسوي فيها
العنود : يومين وتنسى .. وش بتسوي يعني !؟
نورة بتفكير : ماتعرفين هوس سمر بـ ماجد ..
:
+
يوم الجمعة في قاعة زواج مها ~
+
قبل لاتدخل غادة القاعة دق جوالها
ادخلوا نجد انتي وامي باجي الحين
نجد : زين
غادة : الو
ماجد : رحتي الزواج
غادة : تونا داخلين
+
:ماجد : كشختي والا نفس ذاك اليوم كن ميت لك احد !!
غادة : عادة اكشخ فالمُناسبات السعيدة ..
ماجد وهو يتسلى : قوية وانا بعيد ..!
غادة : يالله باسكر
ماجد بصوت خافت : لابسه الازرق الي ذاك اليوم
غادة : سماوي
ماجد : امم كيف مسويه شعرك باتخيلك باطلع فستانك الاسود من عليك والبسك الازرق
غادة : الناس يناظروني خلاص بادخل
ماجد ؛ عادي قولي سهام الي دايم تقولينها
غادة : سهام في الزواج كل الاسماء الي اقولها موجودة.
ماجد يضحك بقهقه عالية : خليك شجاعة وقولي ماجد
ابتسمت غادة لمرحه المعدي .. وتذكرت بداية مكالماتهم كانت متعة .. بس انقلب كل شي ..!
:
:
+
سألتك بالذي زانك تحبي فيني حتى الظلم
تحبي عيوبي وغدري تحبي المر في كاسي
م.ق
+
:
+
:
+
