رواية دية الصلح الفصل العشرين 20 بقلم مرج البحر
#ديه_الصلح
.....................
البارت 20 قبل الاخييير
+
*سيجبر الله الكسر .. سيجبره حتى لا
تكاد ترى موضعه ولا تسمع انينه ولا
نحس بحرقته سيجبره حتى تنساه
كأنه لم يكن .. لا يجبره فقط بل يتبعه
بالرضا والسلام والعوض الجميل ..
{ولسوف يعطيك ربك فترضى}
+
✍#مرج_البحر
+
سولاف : أيلاف بسبب السكر تعرضت لاكثر
من غيبوبة واخر شي الدكتور كال حتى اذا تزوجت مااراح يصير عدهه أطفال
من رجعت اخواني المدارسهم هيه ماكدرت
تدرس بسبب حالتهه يوميه متخربطه بالمدرسة ف تركت المدرسة اني ماتركتهه
رحت قدمتلهه على خارجي وامتحن الثالث
والسادس طلعت معدل زين صحيح هيه
تاخرت بالدراسه بس الحمدالله المهم درست
وطلع قبولهه كليه ادارة واقتصاد والحمدالله
هسه هيه مرحله ٣ واني جنت خايفه بعد ما دخلت الجامعه من الاختلاط وهيه تشوف عالم ثاني لان أيلاف فقيره وضعيفه يعني ماعدهه قوة شخصيه او جلاده وحتى ماتاخذ
حقهه هذا السبب خلاني خايفه من المجتمع
وهم خايفه لا تحب وتنحب وهيه بهذا وضعهه
لان الي مثل حالتهه صعبه اخاف كلبهه يعشك
من يعرف بوضعهه وحالتهه حتى اطفال مايصير عدهه يتركهه وهم تتأذه وتنكسر نفسيتهه فا اني دائما وياهه بس مثل ما نكول
الكلب مانكدر نتحكم بي والي جنت خايفه
من عنده صار وبيوم من الايام كام يبين على أيلاف هذا الشي واني اشوفه واسمعه تحجي بالتليفون واشوفه اربعه وعشرين ساعه منطلقه وتغني وفرحانه بعد ما كانت منكسره
وحزينه صح هذا الشي يفرحني واني اشوفهه
فرحانه ومرتاحه بس بنفس الوقت لا يجي اليوم الي ينكسر بي هذا الكلب
+
فد يوم رجعت من الجامعة واني اشوفه تريد تحجي بس متردده كتله ايلاف شكو شبيج
عندج شي تريدين تكولينه كالت ها لا اي عندي
كتله اي كولي
+
أيلاف : سولاف اني تعرفت على ولد بل الجامعه هو مو نفس دفعه مالتي لا هو متخرج
بس اجه ياخذ الماستر وشفته بالصدفه وشافني تعرفنه وصار اعجاب من الطرفين
وو
+
سولاف : اي كملي وشنو
+
أيلاف : وحبينه بعض وهو يريد يتقدملي الزواج
+
سولاف : كمزت من مكاني ضربت ايدي على الميز انتي تخبلتي شنو زواج انتي مو تعرفين
شنو حالتج ليش حالتج تسمع بالزواج واطفال
شنو حب شنو خراببط اني فقدت ومااعرف جاي احجي ونسيت هذا الكلام راح يجرح مشاعر اختي شفتهه دموعهه نزلت وكالت
+
أيلاف : ليش مو من حقي احب واشوف حياتي ليش شنو اختلف عن باقي البنات
ليش انحرم من كلشي نحرمت من ابويه
ومن امي ومن كلشي ليش مو مثل اخواتي مو رهف حبت واحد وياهه وتزوجت رفل مو تزوجت ليش مو من حقي مثل اي بنت احب وانحب واتزوج ليش هو المرض
بيدي كلمن يفكر بنفسه اخواتي اصغر مني تزوجن وشافن حياتهن واخويه هم راح وشاف حياته حتى انتي يا سولاف صح ضحيتي بكلشي ورفضتي الزواج علمودنه وصح زواجج مو برضاتج بس هم اتزوجتي والله رزقج بطفل
يضل وياج العمر كله ويكون اللج سند واني
هه اني محد يفكر بيه تستكثرين عليه انو احب واتزوج
+
سولاف : اسفه حبيبتي والله مو قصدي اني علمودج مااريد تحبين وينشلع كلبج وبعدين
من يعرف يعوفج وكلبج يتعلعل ترى مو هينه
+
أيلاف : بس اني كتله على كلشي ويعرف بحالتي وهو كال اني اريدج انتي وحتى اذا مايصير عندج اطفال مو مهم اني اريدج انتي وبس اني احبج ومستعد اعيش وياج من غير اطفال
+
سولاف : افهميني امي ماكو رجل يكدر يعيش
لدوم ما يصير عنده اطفال حتى وان كان عنده
اطفال يجوز بالبداية اي يتقبل بس بمرور الايام اكيد الناس راح تسمعه حجي ليش ماصار عندك وليش تاخرت وليش وليش واكيد بعدين يطر انو يتزوج وانتي ياترى راح تتحملين يصير عنده زوجه ثانيه عوفج من هذا كله اهله راح يقبلون
+
أيلاف : هو اهله ابوه وامه ميتين وعنده اخوات اثنين متزوجات وشايفات حياتهن
وعنده بس اخ واحد عايش وياه هو عائلته
يعني محد راح يتحكم بي
+
سولاف : وان كان اني ماراح اقبل على ابن الناس يعيش بدون اطفال هو مو مجبور وثاني
شي اني اريدج قريبه عليه حتى اكدر اعتني بيج لان بس اني اعرف حالتج
+
أيلاف : انتي ماتقبلين على ابن الناس بس تقبلين اني انحرم من كلشي اريده وحرام عليه اعيش مثل البقيه
+
سولاف : أيلاف اسمعي
+
أيلاف : كافيييي سولاففففف كافيييييييي
انيييي طبنيييي مرررررض كلمن يفكر بنفسسسه واني محددد يفكررررر بيه جبتهه
طول عمرررري ساكته عبالكم ماعندي حساس
لو ماعندي كلب كافييي سولاف اني رااح ارفض حتى بسسس انننتي ترتاااااحين لان
اننني مووو من حقي احب واتزوووج الله
ما قاسملي يصير عندي اطفال بس مو معناتهه ما احب واعيششش حيااااتي
+
سولاف : أيلاف انهأرت وخلت وصعدت غرفتهه اول مره اشوفهه بهل العصبيه اول مره ترفع صوتهه بوجهي اني اعرف حقهه بس اني من خوفي عليهه أيلاف زعلت وكطعت الاكل وكامت ما تاخذ علاجه ضلت ٣ ايام عل هاي الحاله و دهورت حالته اني خفت عليهه ضليت
افكر بالموضوع اذ رفضت يجوز تضل هيج مستمره حالته ويجوز اخسر اختي خلي اوافق
بلكت يطلع ابن حلال ويصونهه بعد صرت كدام الامر الواقع صار الليل صعدت الغرفته
اشوفهه وصلت اريد ادك الباب سمعته تحجي
بالتليفون مااعرف شنو خلاني اوكف اسمع الحجي اسمعه تكول اكلك ماتوافق اني صار
كم يوم بدون اكل وحتى علاجي مااخذه هذا الشي كلشي ماغير سكتت تستمع الطرف الثاني رجعت حجت اي اعرف صح هيه ضحت بنفسهه وبكلشي وسوت المستحيل بس سولاف ما حبت ولا عرفت الحب وهذا السبب الي ما راح يخليهه تحس بيه لان مامجربته
اني هنا من سمعتهه غمضت عيني وهيجت الجرح بكلبي صارله سنين تماسكت اعصابي
وفتحت الباب هيه تفاجئت كامت وسدت التليفون اني حاوت ابين هادئه بس عكس النار الي بداخلي كالت ها سولاف محتاجه شي
كتلهه أيلاف تكولين مااحس بيج مو ليش اني بشنو قصرت وياكم من اني طفله ماعفتكم تنازلت على كلشي الاجلكم وبتالي تكولين
ما تحس بيه ليش ها ليش أيلاف ولج انتي اخر وحده توقعت منها هذا الكلام واكلج شي
اني حاسه بيج تدرين شلون لان اني بيوم من الايام حبيت والشخص الي حبيته رفضته علمودكم راح وحتى ماكتله اني احبك دست على كلبي علمودكم هو كلي نتزوج ونعيش اني واخوانج والي تدردي يصير بس مع ذلك رفضت وكسرت كلبه وكسرت كلبي وبتالي اسمع هذا الحجي من عندج انتي أيلاف انتي
اني اعلمج حتى تكونين قوية وتواجهين الناس والمجتمع بتالي توكفين كدامي واسمع هذا الحجي من عندج
+
إيلاف : سولاف وروح بابا مو قصدي الله يخليج لا تزعلين بس افهميني اني ق
+
سولاف : كافي عوفي الموضوع اني اجيت
اكلج اني وافقت وكلشي تردي راح يصير
حتى لا تكولين اختي وكفت بطريقي
+
إيلاف : سولاف بروح بابا لا تزعلين والله حتى
مااريد اتزوج وراح ارفضه بس لا تزعلين تعرفين ماعندي غيرج بداعت سند
+
سولاف : مسحت على خدهه حتى خليهه ترتاح لان صدك هيه انهارت وحسيتهه نقهرت
من كلامهه كتلهه لا حبيبتي اني ما زعلت
وما ازعل مهما يكون انتي اختي وبنتي اني وافقت قبل لا اسمعج وهسه عوفي كلشي ولا تفكرين بالموضوع وتعالي انزلي حتى تاكلين
وتاخذين علاجج واريدج توعديني اذا صدك يهمج زعلي بعد لا تأذين نفسج وانطي خبر الولد اريد اشوفه واتفاهم وياه على كم شغله
+
إيلاف : صدك يعني انتي قبلتي مشكوره يا احلى اخت وام والله سولاف اني مو قصدي
شي بالكلام الي كلته
+
سولاف : حضنتني كتلهه لا تهتمين انتي الكلام
واريدج تفكرين بحياتج الجايه يله كومي سوي مثل ما كتلج
+
إيلاف : تمام وهاي بوسه الاختي الحلوه
بس سولاف ممكن سؤال هيج زغيرون
+
سولاف : هههه شنو هذا سؤالج الي زغيروون احجي اعرف شنو راح تسالين ادري بيج الفضول يقره 1000 عندج
+
إيلاف : هههه اي زين من عرفتي وهسه كليلي
صدك حبيتي زين منو هذا وشوكت هذا الشي صار وين هسه هو
+
سولاف : جريت حسره اي حبيت حالي حال اي بنت و منو هذا هو واحد ماتعرفينه واذا شوكت هاي من زمان قبل تصير مشكله عمج وقبل لا اتزوج واروح وهو وين هسه هاي مااعرف بي لان من ذاك اليوم الي رفضته بعد ماشفته
+
إيلاف : زين احجيلي كلشي شلون صار هذا الشي وياج وليش رفضتي اذا تحبينه اعرف علمودنه بس لازم ما تركي وتخلي يروح احجيلي
+
سولاف : إيلاف حبيبتي عوفي الموضوع هذا
وكومي انزلي اكلي عود بعدين اني اسولفلج
+
إيلاف : اكيد راح تسولفيلي
+
سولاف : اي يله كومي
+
إيلاف : تمام راح اكوم واني اعتذر مره ثانيه على كلامي
+
سولاف : عادي حبيبتي ما صار شي يله تصبحين على خير و مو ما تاكلين
+
خليت وطلعت واسمعه اتصلت وكالت حبيبي
اختي وافقت على زواجنه سكتت شوية وكاات والله حبيبي هيه اجت وكالت موافقه بس اريد اشوف الولد واحجي وياه على كم موضوع تركتهه تحجي ورحت على غرفتي اجيت على سند نايم عدلت الغطه وبسته فدوه اروحلك
يا حبيب امك رحت تمددت بفراشي ورجعت
بيه الذكريات ال سامر هسه وينه هم بعد يحبني ويتذكرني لو نساني اكيد هسه تزوج
وصاروا عنده اطفال وزوجه وبيت اووف يا سولاف مو جنتي ناسيه اليوم إيلاف فتحت الجروح القديمه ضليت افكر هم راح اشوفه
لو هاي هيه بعد ما يرجع ضليت الافكار تاخذني وتجيبني لحد نمت ..
1
(في صباح باكر جميل مليئ بالنشاط والفرح)
+
أيلاف كعدت جاي تحضر نفسهه تروح الجامعه
وهيه فرحانه وتغني بعد مده ٣ ايام من الحزن
فرحانه وهيه راح تاخذ الانسان الي حبهه وحبته
+
سولاف : كعدت على صوت أيلاف وهيه تغني
والصوت جاي من غرفتهه مبينه نشيطه اليوم
وكمت رتبت الفرشه وكعدت سند اخذته الحمام
حتى اجهزه واخذه الروضه كملت سند ونزلت
سويت ريوك حضرته على الميز انتضر إيلاف تنزل واخيراً شرفت نزلت وشكلهه ما شاء الله
تكول عروس لعد مو هاي البارحه تريد تموت نفسه يمه منج طلعتي مو هينه اجتي عليه وهي تكول
+
إيلاف : صباح الورد صباح الجوري صباح الياسمين صباحي انتي ياأحلى أخت وأحن
أم بالدنيا
+
سولاف : اجت عليه شبكتني وتبوس بيه
صباح النور شنو اليوم النشاط هذا كله علمود حبيب الكلب مو صارلج ٣ ايام مسويه عليه عززه
+
إيلاف : كافي عفيه هسه انتي مو ترديني اكون
فرحانه ومرتاحه
+
سولاف : اكيد حبيبتي اني هذا اهم شي عندي
يله تعالي اكلي حتى اخذج بطريقي الجامعة
مااخليج تروحين بسيارتج لان وضعج بعده مو تمام واني اخاف عليج ولا تنسين علاجج يله أمي استعجلي واريدج تاكلي زين
+
إيلاف : دللي هسه اكل المواعين كلهه لان اليوم نفسي مفتوحه الاكل
+
سولاف : بالعافيه بس دير بالج لا تاكليني اني وسنود ههههه
+
خلصنه اكل الميت المواعين خليتهم بالغساله
الصحون واخذت سند وأيلاف وطلعت صعدنه
بالسيارة جاي اسوق واباوع على أيلاف احس عدهه حجي تريد تحجي بس متردده كتلهه
اي أيلاف اشوف عندج حجي كولي شعندج
اني اعرف شنو تريد تحجي
+
إيلاف : ءءمو ها اني انطيت خبر الولد وكتله
انتي وافقتي وتريدين تشوفينه
+
سولاف : اي زين وهسه شنو الي تردينه انتي
+
إيلاف : مو هو كال اخذيلي موعد يعني شوكت عندج مجال حتى يجي يعني اقصد
يا يوم وين يجي البيت
+
سولاف : لا جيته البيت صعبه مو حلوه بحقنه
واحنه بس بنات بوحده شوفي خليهه يوم الجمعه يجي بالحديقه العامه الي كل مره اخذ
بيهه سند يكون افضل نكعد نحجي ونتفاهم
+
إيلاف : تمام راح انطي خبر
+
سولاف : ان شاء الله حبيبتي
وصلت إيلاف الجامعه ورحت وصلت سند الروضه مريت على محل شفت شنو يحتاج
انطيت فلوس العامل حتى يتسوك ورحت
اشتريت بعض الشغلات تخص سند خلص اليوم وخلصت اليومين واجه يوم الجمعة
كعدت من الصبح سند وأيلاف ماعدهم دوام
خليتهم نايمين نظفت البيت ورحت سويت
اكله سند المفضله هي بيتزا لان كل جمعة اخذه الحديقه نكعد نغير جو واخلي يلعب
العصر يله نرجع وسويت وياهه دولمه وشويت
دجاجه لان هذا الولد راح يجي عيب ما نضيفه
شي خلصت كل شغلي والتحضيرات صارت الساعه ١١ كعدت إيلاف حتى جهز نفسهه كعدت سند دخلته الحمام وخلصته وبدلت ملابسه نزلت سويتله كلاص حليب وصعدت الاغراض السيارة واخذ بايسكل سنود يلعب
بي بالحديقة نزلت إيلاف وطلعنه بسيارتي
وصلنه نزلت الاغراض وفرشنه على الارض
كاعدين العوائل والجو حلو كان نهايه شته
كاعدين الولد اتصل على إيلاف وصفتله المكان
شويه اجه سلم علينه الولد كان شاب مرتب
بي كل المواصفات الي تحلم بيه كل بنت
عرفتنه إيلاف
1
إيلاف : سولاف اعرف عامر عامر اختي سولاف
+
سولاف : اهلا وسهلا تشرفت بيك تفضل
كعد الولد كان مبين عليه ولد خلوق ومهذب
كتله اخلي نضيفك وانكعد ناكل وبعدين نكعد
نحجي بالموضوع كال تمام حضرت الاكل وكعدنه ناكل كان ماكو كلام بينه واني كل ساعه اخذ نضره عليه وعلى إيلاف كانو واحد ينضر الثاني ويبتسمون خلصنه اكل سند جان يلعب يعني شوية بعيد عنه كتلهه إيلاف روحي على سند لا يوكع ويتعور اني جنت اكلهه هيج حتى تروح واخذ راحتي بالحجي
هيه افتهمت هزت راسهه وراحت رجعت التفتت على الولد كتله اي هسه نحجي بالموضوع
1
عامر : اي نحجي انتي بشنو ترين ابدي وياج
حتى اعرف شنو اجاوبج
+
سولاف : انت من وين واهلك وضعك وشلون تعرفت على اختي وانت شنو تعرف عنهه
+
عامر : الله بالخير عليج
اني عامر علي عمري ٣١ سنه اني اصلي من النجف بس ساكن بابل أمي وأبويه متوفين
عندي اخوات اثنين متزوجات واخ واحد هو
الاكبير واني كاعد وياهه لان من بعد وفاة والدي وبعدهه والدتي واخواتي كانو متزوجات
هو اعتنه بيه وصلني بدراستي وتعب عليه
لحد ما وصلت الي اني بي اني خلصت الجامعه واخذت الماجستير وحاليا مقرر ادرس
دكتوراه واما شلون تعرفت على أيلاف اني
ادرس بنفس الجامعه الي هيه تدرس بيهه
واجيت اخذ الماستر وشفتهه بالصدفه والصراحه عجبتني وضليت بين فتره وفتره
اتردد على الجامعه بحجه الي اصدقاء هناك
بس اني جنت حتى اجي اشوفهه ويوم بعد يوم زاد اعجابي بيهه وسالت عنهه وضليت اراقبهه من بعيد لحد ما حبيتهه واجيت فتحت موضوع وياهه هيه رفضت وكانت تتهرب وشويه شويه خليتهه تتقرب مني وهيه هم صار عدهه عجاب اتجاهي والاعجاب صار حب واني هسه جاي اريد اطلبهه بالحلال
+
سولاف : حلو اني هم كلش عجبتني صراحتك
بس انت تعرف بوضع أيلاف ومرضهه و
+
عامر : عذراً المقاطعه اني اعرف هيه من البدايه كانت صريحه وياي واني متقبل كلشي
لان اني حبيتهه وما يهمي شي
+
سولاف : بس اسمحلي انت تفكيرك مو صحيح
انت مو بس بالبدايه انت فكر البعيد قابل تضل طول عمرك بدون اطفال اعرف يجوز تتحمل
سنه سنتين خلي اكول ١٠ اسنين بس مو تضل التالي ماكو ولد يشيل اسمك
+
عامر : شوفي اخيتي اني خلي احجيلج شنو وضعي وليش مااريد اطفال او مااجل هاي السالفه وبتالي هو كلشي بيد رب العالمين
+
سولاف : اي تفضل اسمعك واني اريد اعرف كلشي
+
عامر : ان عندي اخ كان ضابط بالجيش وباحداث داعش الاخيره الي صارت اخويه
راح هناك يقاتل وبالمعركه انفجرت عليهم
سيارة وهو انقطعت رجله هو متزوج وعنده
اطفال ٢ وزوجته بعد الاصابه تركته وتركت اطفالهه وطلبت الطلاك وطلكت وراحت هاي
عود هيه بنت خالي بس تخلت عنه وراحت طلكت وتزوجت واحد غير من عافت الاطفال
اني ضليت اعتني باخوية وباطفاله والاولاد
تعلقو بيه الدرجه يصيحولي بابا واني هم احبهم رفضت اتزوج حتى لا تجي مرتي وتبعدني عنهم ولحد ما شفت أيلاف بعد الكلب
ماعليه سيطرة هنا حبيتهه وتعلقت بيهه وهيه هم واكيد اذا عرفت بيهم ما راح ترفض لان هيه تحبني ومن فتحت موضوع الزواج وياهه هيه حجتلي الموضوع كله واني ماعندي اي مانع والصراحه اذا الله كتبلنه قسمه اني احس رب العالمين راح يعوض أيلاف بهذوله الاطفال
+
سولاف : عامر يحجي واني صافنه عليه دخيلك ياربي نفس نبره الصوت ونفس طريقه
الكلام ونفس لمعت العيون شنو سالفه لى علاقة بل بالي لو هيج مجرد ذكريات اجت بالي من حجه بالحب انتبهت على عامر يحجي وياي كال
+
عامر : ام سند وين صفنتي
+
سولاف : وياك بس اني اكول لو تفكر بعد وتراجع نفسك يكون افضل
+
عامر : ام سند اسمعيني اني حتى لو ما تزوجت
أيلاف وحتى لو تزوجت وحده ثانيه اني فكره
الاطفال شايلهه من بالي لان اولاد اخويه كافين عليه ف اني اكول خلينه نتزوج احنه حب بعض ومتفاهمين على هذا الشي ليش تخلونه كلمن بطريق يجوز هيه تزوج بطريقه ماتعجبهه واني هم اتزوج واني رافض هذا الشي الله يخليج سهليه علينه وخلينه نشوف حياتنه وارجع واكول يجوز الله جعل هذا الزواج سبب حتى أيلاف تربي هاي الاطفال علمود ما تشعر بنقص صح مو هيه امهم بس على الاقل تحس بشي بسيط تجاهم وهيه تعرف بكلشي ومتقبله الموضوع
+
سولاف : الصراحه كلامه كان مقنع بس نفس الوقت متردده والشي الثاني الي شغل بالي
وخربط كل موازيني هو الشبه الي بينه وبين الشخص الي بالي مااعراف شنو صارلي
+
عامر : ها ام سند شنو كلتي
+
سولاف : مااعرف شنو اكلك بس اختي وضعهه
وحالتهه يرادلهه مداره واني كل وقتي وياهه
علاجهه واكلهه يعني مااعوفهه دقيقه ولازم
اكون مسيطره على وضعهه
+
عامر : لعد اني وين رحت اني اكيد ما راح اعوفهه واني بعد مانتزوج راح اداريهه مثل
ماانتي مداريتهه واكثل وما راح اعوفهه
حتى بعد من راح اسافر اخلص دراستي راح
اخذهه وياي
+
سولاف : اوكف اوكف يا سفر هذا ةشنو تاخذهه وياك
+
عامر : اي اني عندي سفر لان اروح ادرس بالخارج واخويه واطفاله راح يسافرون وياي
لان اخوية يريد يسوي عمليه زرع اطراف
اني كلت فد مره اتزوج واخذ إيلاف وياي
+
سولاف : اني مااكدر اخلي اختي تسافر
+
عامر : ليش ام سند الله يخليج ليش تصعبين الامور اني وهيه متفقين على كلشي واني
مقرر اذا سافرت هم اعرضهه على دكتور بلكت
نلكه حل وانتي اذا رفضتي اكيد هيه تنتكس
حالتهه ف بداعت سند عندج لا تعقدين الامور
وتصعبيهه علينه
+
سولاف : ضليت ساكته مااعرف شنو احجي
اذا قبلت شلون راح افاركهه وتصير بعيده عني
واذا رفضت حرام عليه احرم اثنين من زواج
وهمه يحبون بعض ويصير واحد بعيد عن الثاني واكيد اختي راح تتأذه وعامر هم شنو ذنبه اكسر كلبه واني اعرف وحاسه بكسرت الكلب واني بيوم من الايام كسرت كلب شخص
مااريد هذا الشي يتكرر وشويه اجت أيلاف
خطيه تباوع بالوجوهه تريد تعرف شنو صار
واني اشوفهه شلون عين عليه وعين على عامر وهذا الثاني عامر مو اقل منهه رديت عليه وكتله خير ان شاء الله والي بي الخير يقدمه رب العالمين شفت الفرحه نرسمت على وجوهم وشفت الابتسامه نرسمت على شفاهم
الفرحه الي يوم من الايام طفيتهه بوجه شخص ما ردت اعيد نفس الشي أيلاف اجت عليه
كالت
+
إيلاف : صدك سولاف يعني وافقتي
+
سولاف : اي اني اهم شي اشوفج مرتاحه وسعيده واشوفج بيت زوجج وأمن عليج وان شاء الله عامر يكون كدهه ويصونج ويحافض على الامانه الي راح اسلمهه بيده
+
عامر : مشكوره ام سند وان شاء الله اكون كد الامانه وراح اصونهه وخليهه بعيوني الله شاهد عليه اني أيلاف حبيتهه
من كل كلبي واتمنيت هيه تكون زوجه الي
بعد ماكنت رافض الزواج ومثل ماكتلج راح اخليهه بعيوني واذا يوم من الايام قصرت عليهه لو اخطئت بحقهه من هاي لحظه اكلج
اخذيهه ولا تخليني بحياتي اشوفهه وان شاءالله ما راح يصير هذا الشي
+
سولاف : ان شاء الله الله يسعدكم ويهنيكم
+
عامر : اني بعد يومين ثلاثه ارتب اموري
واجيب الاهل حتى نخلص الموضوع
+
سولاف : تشرفون باي وقت بس انطي خبر ل أيلاف حتى اني هم ارتب وضعي
+
عامر : الله كريم يله اني اترخص واخلي اوصلكم واروح
+
سولاف : اخذ راحتك اني جايه بسيارتي
+
عامر : براحتكم مع السلامه
+
سولاف : راح عامر واني وأيلاف اخذنه الغراض صعدناهم بالسيارة وخذتهم انشتري
احتياجات اباوع على أيلاف الفرحه احتلت كلبهه كلت يارب الله يسهل عليه ان شاء الله
عامر يصونهه ويحافظ عليهه لان اختي فعلاً
تستاهل هيه فقيرة وكلبهه ابيض ماعدهه حقد على واحد عكس خواتي تماما خلصت ورجعت البيت وبهاي اليومين جهزت كلشي يخص الكعده وخابرت اخويه كتلهه بالموضوع حتى يكون
حاضر هو ما عارض ولا كال شي
+
خلصت هاي الفتره وعامر انطه خبر يوم الجمعة يجون
+
اجت يوم الجمعه كعدت الصبح
اجهز الشغلات اختي اجوي عليهه صديقاتهه
واخذنهه الصالون صديقاتهه خطيه يعرفن
ماعدنه احد كل وحده جابت امهه وياهه والي جابت اختهه واصدقاء اخويه هم ماقصروا
اجوي والبعض منهم جايبين امهم وابوهم الصراحه وكفتهم كانت مشرفه وترفع الراس
صارت الساعه ٢ اجوي اهل عامر هم كانو
اهلهم وناسهم ما قاصرين وكانت مشيتهم
هم ترفع الراس الصراحه تمنيت ابويه حتى امي تمنيت تكون موجوده وهيه تشوف بناتهه يخطبوهن حتى من زوجت اخواتي رهف ورفل هم نفس شي تمنيت لو كانو موجودين
+
صارت الكعده وتم الاتفاق اقرهه الفاتحه شويه اجه اخويه كال
خلي أيلاف تجهز حتى السيد يعقدلهم رحت جبت اختي كعدتهه يم الباب وخلصت كل مراسيم عقد القرآن وحده من اخواتهه كالت عيني احنه جبنه الذهب ويانه خلي نلبسهم
فد مره كتلهه بكيفكم هاي هيه شوية واجه
عامر دخل كان لابس لبس رسمي وعين الله عليه الله يسعد اختي وياه اجه كعد يمهه
ولبسهه الذهب هيه خطيه كانت مصفره من الخوف خلص وطلع والناس هم كلهه طشت
وراحت حتى صديقات أيلاف واصدقاء اخويه
هم راحو بقوا بس اهل عامر اخوه واخواته وبنات اخته اجه كافل كال بقيتهم على العشه
كتله اي عادي حبيبي ولا يهمك كال لا تسوين شي راح اني اجيب اكل من المطعم بس انتي
تعالي اكعدي يمهم لان ماكو احد بين مااروح وارجع كتله تمام هسه بس البس شي فوك ملابسي راح كافل واني صعدت اجيب صايه لبسهه فوك ملابسي نزلت ستوني دخلت الصاله اريد ادخل الغرفه الخطار الي بيهه اهل عامر اجه سند وياه بنيه تطلع ازغر منه لابسه بدله وردي فدوه العمرهه تجنن هيه سمره بس سمارهه يجنن وعيونهه ملونه ولايك وي السمار اجه عليه سند كال ماما هاي صديقتي
شويه ودخل ولد ثاني نفس عمر الابنيه بس الولد ابيض ويشبهه عامر كلش الشبهه واضح
كان يصيح يكله عوف اختي ويسحب ايد اخته من سند لان هذا الثاني كان مجلب بايدهه
وسند يكله هاي صارت صديقتي روح منا اجيت فكيتهم كتلهم انتو منو همه مستمرين
يتعاركون اجيت على الابنيه ثنيت وصرت بمستواهه كتلهه انتي شنو اسمج كالت اسمي سوسو كلت الولد وانت شنو اسمك كال اسمي فهد بوستهم كتلهه اي سوسو هذا اسم الدلع اريد اسمج الحقيقي شنو هو جاوبني اخوهه
كال اسمهه سولاف اني فزيت على صوت سند وهو متفاجه باوعت عليه لكيته حاط ايده على حلكه عود مصدوم جان يكلهه انتي اسمج مثل اسم ماما وحلوه مثل ماما واني راح احبج مثل ماما ضحكت عليه وبوسته كتله تعال انت ليش متعارك وي فهد كال هو مايقبل لعب وي سوسو كتله غير اخته ويخاف عليهه
هسه انت تقبل واحد ياخذني منك كال لا لعد خلص هو هم مايقبل على اخته اني عندي حل لكم كلكم راح اصعدكم فوك بالغرفه ولعبو سوه بل اللعاب كالو اي صعدتهم وانطيتهم العاب
ونزلت اجيت اروح يمهم بعد ما كافل طلع وأيلاف راحت كعدت وياهم يردون يتعرفون عليهه اجيت دكيت الباب ودخلت كنت منزله راسي كلت السلام عليكم رفعت راسي وصار كدامي و.......
+
يتبع.......
+
