رواية دية الصلح الفصل الحادي عشر 11 بقلم مرج البحر
احمد : يمه هاي امها وابوها ميتين واخوانها
اصغار هيه معتنيه بيهم وعمامها ضحكو علينه
هاي اصلا متعرفهم بس منكدر نحجي شي
لأن عار علينا لازم نسكت ونتقبل الموضوع هاي متعرف كلشي واني اكول ليش من كالو
اخذو مره من اهل المقتول حتى تم الصلحه
بينكم وتخلف ولد ورجعوها وافقو محد اعترض طلعوا ما ايتام وما عايشين يمهم حتى
يرجون البيوتهم وحياتهم ويخلصون من الدم والثار انطوهه الي ما يخافون الله
ام احمد : ابني لتروح بسوالف النسوان ولك لا تبقى فطير وعلى نياتك هاي كلها سوالف فارغه احنا دفنا ابوك يسوئ الدنيا خاف عبالك
هاي تسد دين ابوك لا ولك انت خلطان اني
قبلت ازوجهه لك حتى اكسرهم بنتهم واخلي تجيب ولد واخذه منها وارجعها ولك مو هاي تصير مره الابني اني اريد ازوجك ست البنات بنت ناس مو بنت اخوه جتال ابوك افتهم
مو انت جاي وكلبك مكسور عليها هاي ضحكت
بعقلك ياغبي
احمد : يمه هيه ماحجت شي اني اليوم رحت
اجيب ملابسهه وعرفت كلشي والله احنا راح نغلط بحق هاي المسكينه والله يا يمه لو تشوفين حال اخونهه اختها شلون تتوسل بيه
تكلي عمو اني مريضه حتى محد جابلي علاج
لو اخوهه يكلي عمو اني جوعان محد ينطيني اكل صار يومين يمه
ترى اني رجال واعجبج بس مااطلع مراجلي
على مره
ياأمي هاي تصوم وتصلي ويتيمه وحوبتها يم الله جبيره وانتي انسانه واعيه وتخافين الله
ام احمد : ي احمد اذا اسمع كلامك واقبل بي
راح اسمع كلام جبير ومعايير من العالم
احمد : يمه النبي محمد ما سلم من كلام الناس
وحتى الله ما سلم احنا بكل الاحوال مراح نسلم لان شنو تتوقعين احنه من قبلنه ناخذهه
صلحه وتصير زوجه الي العالم راح تسكت يا يمه انتي سوي شي يرضي بي ربج وبس
ام احمد : الله كريم
احمد : تدرين يمه خواتها بعدهن صغار واخوها
هم صغير نسوان عمامهم مسويهم خدم يمهم
وكل يوم كتله ومذله
ام احمد : ما علينا منهم وبلغ هاي الافندية
اجي البيت الكئ الكل جاهز والبيت نضيف
وتلبس مثل لبسنا وتاكل بوحدها وغير هيج
ماعندي
احمد : صار يمه بعيوني بس انتي خلي بكلبج
رحمه لأنها يتيمه
ام احمد: طاحضك تبقئ مضحكة للنسوان وكلبك فطير
احمد : اهوووووو ييييمه افوت اذبحها حتى ترضين روحي شوفي جسمها شلون ازرك من الكتل
ام احمد : اني ماادخل بشي وبلغ خواتك هذا الكلام بحسبة اني مااعرف
احمد : الله يخليج يا ام كلب الجبير يابعد روحي انتي
دخلت للغرفه وكلت ل سولاف من باجر عليج شغل البيت والمطبخ واريد اي تقصير بشي
سولاف : ماشي
احمد طلعت للسوك وجبت مسواك وهم جبت
حلويات ل سولاف ردت انهي التوتر والمشاكل
والمشاكل داخل البيت لأن صار اعصابنا تلفت
ماشفت الخير والراحه من راح ابويه
طلع احمد
وبعد لحضات دخلت امه للغرفة اويلي شجابها هاي الله اليستر اليوم
جمدت مكاني
ام احمد : شببج شنو شفتي ملك الموت ان شاء الله ياخذج وياخذ اهلج واحد وره الثاني
سولاف : لا خاله هلا بيج بالاخر هذا بيتج وتدخلين بكل مكان وباي وقت
ام احمد : اكعدي وسمعيني
سولاف : تفضلي خاله
ام احمد : اني اعرف بيج يتيمه ولخاطر الله واذا تسمعين الكلام وتجرين عدل مراح ااذيج
سولاف : تدللين خاله
ام احمد : البيت والمطبخ من مسؤليتج من باجر ومن نرجع من البستان نريد كلشي جاهز
ومن يجي احد من الاقارب وتسمعين مني كلام قاشي او شتم تتحملين وما تفكين حلكج بكلمه وراسج مترفعينه
ومن احد يطلب منج شي تنفذي من غير اي كلام ومن احمد يكعد على السفرة انتي توكفين يم راسه
سولاف : ماشي خاله ادللي
ام احمد : شوفي كدامج شهر اذا شفتج ملتزمه
تكسبين الاحترام واذا قصرتي تشبعين اهانات
وذل واكومج واكعدج بكتله افتهمتي
سولاف : ماشي خاله
ام احمد : وخفي نفسج شويه وستعجلي اريد
اشوف ابن احمد وتفاركينا بريج طيب ناخذ
ابنا ونخلص من هذا الكابوس واخلص من جهرتج الزفره
سولاف: ماشي خاله
ام احمد : من احجي كولي امرج مو ماشي افتهمتي لو افهمج اني
سولاف : على امرج خاله
ام احمد : يله كومي نضفي غرفتج لا تخليهه
مخمخمه واغسلي ملابس احمد لتبقين كاعده
خده وخدر ما جبتج يمه حتى يباوع على جهرتج الزفره يله كومي بسرعه كدامي
سولاف : على امرج خاله
سولاف قبلت بالشروط كلت افضل من الاهانات خلي اكدر اكسبهم بلكت اذا نفذت
شروطهم اكدر اتواصل وي اخواني
كمت رتبت الغرفه وغيرت فرشة الجربايه
وطلعت ملابس عادل غسلتهم وطلعت اشرهم
بالحديقه الورانيه من البيت .
انتبهت على وحده بعدها ابنيه زغير كاعده على الثيل بالحديقة ولازمه
المرايه تباوع بيهه وجها عباره عن كلف وهالات سوده وبين عليه اسمرار مال الشمس
كلت لها العفو
كالت خيرج شرايده
سولاف : ليش هيج وجهج كله كلف وهالات سوده وبشرتج تعبانه ليش ما تعتنين بيهه
كالت وانتي شعليج انجبي واسكتي قابل اني مثلج بنت مدينه وتصنع وتفيك وترس وجهي زروقه روحي بابا روحي يله ولي من يمي شنو يابه تتنمرين عليه
سولاف : لا العفو كلنا خلقة الله مو قصدي والله بس اني عندي علاج عبالي افيدج بي
يله اني اترخس بس درت وجهي شو هاي
كمزت واجتي عليه لزمتني من ايدي وكالت تعاي اكعدي يمي اجيت كعدت كالت شنو العلاج
كلت الها اول شي خليني اعرف اسمج منو انتي شنو تصيرين من احمد وامه
كالت اني أمل اخت احمد
سولاف : عاشت الاسامي حلو اسمج
أمل : عوفج من هذا الحجي وكوليلي شنو العلاج
سولاف : اكو خلطة اني استخدمهه كلش زينه
جيبيلي ورقة وقلم اكتب اسمها ودزي عليها جيبيهه
أمل : شنو هاي الخلطة
سولاف : خلطة من مجموعة اعشاب بيها
فيتامينات تعالج الكلف وتقوي البشرة واكو
كريم يوخر الهالات سوده وهذا الاسمرار الي بوجهج بسبب الشمس المباشرة هذا هم اكو واقي شمس تكدرين تستخدمي من طلعين بره
أمل : وانتي منين تعرفين كل هذا
سولاف : اني عندي محل الملابس ومكياج ومواد تجميل وتجهيز عرايس واعرف شلون اجهز خلطات واعرف كل هاي الامور
امل : هاااا يعني تعرفين هاي الشغلات
سولاف : اي
أمل : زين تعرفين تحفين وتسوين شعر وهاي السوالف
سولاف : اي حبيبتي اعرف ليش
أمل : لعد كملي بسرعة وتعالي سويلي شعري
وحفيلي وجهي اريد اغير شويه
سولاف : ماشي ادللي حبيبتي
واخيراً بلشت اكسبهم لجانبي
كملت نشر الملابس ودخلت الحمام غيرت ملابسي تبللوا وطلعت صحت الها دخلنا
لغرفتي العاملة ممقصرة دازتلي كلشي
حفيت وجه أمل وسويت حاجبهه على ذوقي
طلعت تجنن بس تعبتني وجها صاير حديقة
من الشعر حطيت الها ماسك للبشرة
وبلشت بشعرها وكصيت اطراف الشعر وطلبت
من عندي اشسوره
سويته الها وكفت كدام المراية انصدمت كالت
بحياتي ما حسيت بروحي اني حلوه اتشكرت مني وطلعت
بعد شوية اندك الباب الغرفه ....
يتبع ...
