رواية شمس تتحدي الغيوم الفصل السابع والاربعون 47 بقلم عبير سليم

رواية شمس تتحدي الغيوم الفصل السابع والاربعون 47 بقلم عبير سليم 

47=الفصل السابع والأربعون
من منا يدري مايخبئ له القدر
من منا يوقن بمستقبل لا يعلمه إلا الله
من منا لايريد أن يوافق القدر هواه ويسير على خطاه
كل منا يسير فى هذه الحياة وهو على علم بل يقين بأنه مهما فعل ومهما بلغ رجاؤه ذروة أمره
لن يكون إلا ماقدره الله له

كل ماعلينا فقط أن نفعل ماهو باستطاعتنا وندع الأمر كله لله (ومن يتوكل على الله فهو حسبه)

نحن الآن فى مطار شرم الشيخ حيث يقف دامع العينين ماكان يريد ابدا ان يتركهم ثانية ماكان يتوقع بعدهم عنه مرة أخرى ولكن الأمر يستلزم ذلك حفاظا على ابنته وحرصا على مشاعرها

ها هو الآن يسلم على زوجته وابنته ويقوم بتوديعهم:خللوا بالكم من نفسكم ومتتاخروش علية انا مبقتش بستحمل بعادكم عني

أشرقت :حبيبي ياعمار مانت عارف انه غصب عني والله أنا لو علية مكنتش عاوزة افارقك لحظه واحده ده انا ماصدقت إننا رجعنا لبعض ولقينا بعض تاني بس حعمل إيه بس اديك شايف الظروف اللي اتحطينا فيها
اخر حاجه كنت ممكن اتوقعها ان اللي حصل ده يحصل

عمار :قدر الله وما شاء فعل معلش ان شاء الله كل حاجه حتتعدل وتبقى تمام وماسه حترجع زى الفل واقوى

أشرقت :ان شاء الله يا قلبي ماسه صغيرة ودي تجربه وحتروح لحالها ان شاء الله حتاخد وقتها وتمشي بامر الله

عمار :ان شاء الله يا قلبي انا والله ماكنت مقتنع بسفركم وغيابكم عني لكن بعد القهرة والدموع اللي شفتها فعنيها لما جه حسن عشان يعزمنا على فرحه والحاله اللى حصلتلها بعد مامشى انا خفت عليها اوى خفت تروح مننا وده اللي خلاني اوافق على سفركم تاني

وياللا كمان ياستي عشان تتابعي الحمل هناك وتطمني عشان شايفك حتموتي من القلق والخوف

أشرقت :فعلا والله ياعمار انا فعلا حسه كأني اول مرة احمل المهم خللي بالك من نفسك ياحبيبي
واوعى عينك تروح كده واللا كده

عمار :هههههههه حبيبي ياناس انا عيني عمرها لاشافت ولاحتشوف غيرك ياقلب عمار انا عينيه فتحت على حبك وقلبي مدقش غير ليكي

أشرقت :ياروح قلبي انت بموت فيك انا خايفه ياعمار
عمار:انا مش عارف انتي ايه اللي مخوفك بالشكل ده
أشرقت :خايفه يحصللي حاجه وانا بولد انا بقولك اهوه لو جرالي حاجه وانت اتجوزت حقتلك انت فاهم تقعد تربي عيالك وبس والا حموتك بايدي ياعمار

عمار:هههههههه مجنونه وربنا وهو انا اقدر اكون لواحده غيرك ياعمري انا عمر ماكان ولاحيكون فحياتي غيرك ياست الستات توصلوا بألف سلامه أن شاء الله

امال ماسه اتاخرت كده ليه فى التويلت
أشرقت :اهيه جايه

يأخذها فى احضانه ويقبلها ويوصيها على أمها وعلى نفسها
عمار:ماسه انا عمري ماكنت حوافق على سفركم وبعادكم عني تاني بس وافقت عشان خاطرك انتي بس ياقلب بابي

ماسه :انا بحبك اوى يابابي واوعدك اني حبقى كويسه
عمار :أكيد حتبقي كويسه ماسه الكاشف لازم تبقى كويسه
ماسه:لاء اسمي ماسه عمار الكاشف أنا مبحبش اسمك يبعد عن اسمي ابدا عاوزاك تبقي معايا دايما ومحاوطنى بحبك وحنانك بحبك يااحن اب فى الدنيا

عمار:وانا بموت فيكي يااجمل بنوته فى الدنيا كلها
يأخذ زوجته وابنته فى احضانه:البيت حيبقى وحش من غيركم اوى
خللوا بالكم من نفسكم اشرقت خللي بالك من ماسه واختها
أشرقت :انت خليتها أختها خلاص
عمار:عشان ماسه متزعلش انا عارف انها عاوزة اخت
ماسه :انا عاوزة اخت فعلا يابابي بس لو جابت ولد ياللا ميضرش حيبقى اخويا حبيبي الثغنون اللى حلعب معاه

عمار:ان شاء الله ياحبيبتي والاهم ان مامي الحلوة تقوملنا بالف سلامه

ياللا عشان بينادوا على الطيارة
يقوم عمار بتوديعهم ثم العوده مرة ثانيه الى الفنادق ليباشر عمله

يقف فى محله يبيع للزبائن بمساعدة الصبي الذي يعمل عنده فيسمع من يلقي التحيه:سلام عليكم ياعمى

يلتفت للصوت فيجدها سلمى :وعليكم السلام ورحمة الله وبركاته اهلا ياسلمى ازيك ياحبيبتى

سلمى :الحمد لله والله حضرتك عامل إيه وازى نيرة أخبارها ايه ودارين والبشمهندس عصام

إبراهيم :كلهم بخير ياحبيبتى ماطلعتيش عند نيرة ليه

سلمى :أصلي بصراحه كده أنا جايه لحضرتك عاوزه اتكلم معاك شويه ده لو مش حعطلك يعني
إبراهيم :تعطليني ده إيه

ينادي ابراهيم على الولد: خللى بالك من المحل ياحبيبي عشر دقايق وراجعلك
الولد :حاضر ياحاج

بعد عشر دقائق يجلس ابراهيم والد عصام فى احد الكافيهات وتجلس أمامه سلمى

إبراهيم :مقلتليش بقى يا سلمى انتي اخدتي شهادة إيه
سلمى :انا مخلصه كلية آداب من تلت سنين
إبراهيم :ومااشتغلتيش بشهادتك
سلمى:كنت عاوزة والله بس علاء مرضيش ابدا

إبراهيم :علاء، ده راجل ربنا يحميه يارب
الا قوليلي ياسلمى هو انتم ملكمش قرايب اصلي ملاحظ انكم عمركم ماجبتم سيرة حد من قرايبكم

سلمى:من ناحية بابا الله يرحمه مكنش عندنا غير عم واحد ابو هاجر الله يرحمه وعمتو فايزة بردو الله يرحمها

وأما عمتى التانيه فاطمه دي مسافرة برة من سنين طويله وهي اللي كانت باعته لعلاء جواز السفر وهي اللى كانت مشغلاه بس هي استقرت برة هي وولادها واتجوزوا هناك ونسوا مصر خالص

اما اهل ماما الله يرحمها لية خال واحد وخاله كمان بس علاقتنا بيهم متتعداش اكتر من كل سنه وانتوا طيبين فى العيد مرة ورمضان مرة وخلاص على كده

إبراهيم :ايوة ياحبيبتي ماهي الدنيا تلاهي وكل واحد بقى مشغول فحياته ومشاكله
هو والدكم متوفي من زمان ياسلمى

سلمى :اتوفى من فترة ايوة
إبراهيم :طب وانتي يابنتي قعدتي لوحدك فى الشقه

سلمى:لما بابا اتوفى وقتها كله كان متعاطف معايا جدا وعاوزين يشيلوني فعنيهم علاء طلب مني اقعد عند خالتي لحد مايرجع

لما رحت عندها فى الأول كنت مبسوطه لكن بعد كده بدأت اتضايق
جوزها مكنش مريح خالص وكنت بتضايق من بعض تصرفاته
وكمان بنت خالتي الصغيرة اللى هي ادي كانت دايما بتعاملني بجفاء حسيت ان وجودي مش مرغوب فيه

وقتها خالي قاللي تعالي عندي
مراة خالي والله كانت مرحبه بية جدا وفرحانه اوى انا قلت معقوله دي اتغيرت خالص دي حتى ماكنتش بتطيقنا ليه معرفش بس طبعا من اول يوم عرفت هي فرحانه بوجودي ليه

ابراهيم :اكيد طبعا عشان تخليكي تخدميهم

سلمى :بالظبط ياعمى من ساعة مادخلت عندهم كنت اصحى الصبح مع خالي الساعه سته الصبح افطره واروق المطبخ وانزل اشتري العيش واجيب الخضار كله من السوق واعمل الغدا واروق واغسل وانشر
وهي كانت تقوللي معلش ياسلمى انا عارفه اني تعباكي معايا بس انتي بنتي حبيبتي
والله ياعمي كانت تيجي علية الساعه عشره الاقي نفسي بنام على نفسي من كتر التعب

ابراهيم :طب وخالك كان فين
سلمى :خالي كان بيخرج الصبح يرجع المغرب ياكل ويدخل اوضته ملهوش وجود خالص

ابراهيم :يعني هي استفردت بيكي
سلمى:هي الشهاده لله عمرها مازعقتلي ولا مثلا شتمتني بس كانت طلباتها كتير اوى وانا اصلا طاقتي على ادي وكنت باجي على نفسي اوى عشان ارضيها بس لما لقيت الحمل زاد علية اوى وبنتها مبتعملش حاجه خالص والله العظيم كانت تبقى قاعدة وانا بكنس تحت رجلها نفسي وقتها صعبت علية اوى لقيت نفسي بقيت شغاله بلقمتي

ابراهيم :وعلاء، كان عارف باللي بيحصلك ده

سلمى :علاء لاوربنا ماكان يعرف حاجه هو كان ناقص غلبان مش كفايه عليه القرف اللي كان فيه كنت حزود همه انا كمان

بس لما لقيت الوضع كده وخلاص جبت اخري معاهم لميت هدومي ومشيت من سكات وقلت بيت ابويا اولى بية وانا كمان عندي معاش بابا الله يرحمه يعني مش محتاجه لحاجه لحد اصلا

انا اصلا والله ماكان مقعدني عندهم غير الخوف من اني اقعد لوحدي وان علاء هو اللى كان عاوز كده

قلت لعلاء اني مرتحتش عند حد ومش حقعد غير فى بيتنا وهو طبعا لما لقى كده خلص نفسه وصفى حسابه هناك ونزل عشان ميسيبنيش لوحدي

ابراهيم :ربنا يخليكم لبعض يابنتي علاء طيب ويستاهل كل خير وربنا يعوضه خير يارب

سلمى :يارب ياعمي وانا جايه النهارده بخصوص موضوع العوض ده
ابراهيم :مانا عارف ياسلمى بس قوليلي بصراحه هو اللي باعتك

سلمى :عارف عارف ايه ياعمي
ابراهيم :هههههههه عارف كل حاجه ياسلمى بس بردو مجاوبتنيش هو اللى باعتك

سلمى:علاء باعتني لا وربنا ده ميعرفش أصلا انى جايه ولو عرف حيزعل مني

ابراهيم :امال انتي جايه كده من نفسك
سلمى :بعد الحاله اللى شفت علاء فيها كان لازم اجي
علاء من يوم ماكان عندكم وعرف بموضوع العريس اللي جاي لنيرة وهو حالته وحشه اوى مبيتكلمش ولا بياكل ولا بيشرب مكنش ينفع اشوف اخويا فى الحاله دي واسكت ياعمى

عمى انا عارفه ان صعب انكم توافقوا ان نيرة ترتبط بظروف واحد زى علاء سبق ليه الجواز والخلفه
لكن علاء اتظلم وحضرتك عارف ووالله هو طيب اوى ومفيش فحنيته وبيحب نيرة اوى وكل حلمه فى الدنيا انها تكون من نصيبه
انا اول مرة احس باخويا بيحب بالشكل ده

وانا جايه لحضرتك وكللي عشم انك مترفضش طلبي ومتكسفنيش
انا طالبه اطلب ايد نيرة لاخويا علاء، قلت ايه بقى؟
ابراهيم :قلت لا إله إلا الله
سلمى :محمد رسول الله يعني اجيب علاء ومعانا الجاتوه ونيجي نطلبها من حضرتك

ابراهيم :ههههههه تعرفي ياسلمى انك بتفكريني بواحده كانت صاحبة شمس خطيبة عصام الله يسعدها ويفرح قلبها
على ماافتكر كان اسمها ايمان كانت بتتكلم بنفس طريقتك دي اوقات شمس كانت بتجيبها معاها لما الحاجه اتوفت عشان تضحك نيرة وتخرجها من الحزن اللى كانت فيه
انامشوفتهاش غير مرتين تلاته بس خفة دمك فكرتني بيها

سلمى :والله ياعمي انا اصلا بموت فى الضحك والهزار بس اللى حصل لعلاء خلاني نسيت الضحك لكن تصدق وتأمن بالله

إبراهيم :لا إله إلا الله
سلمى :انا قلبي مادخله الفرحه من بعد موت بابا وبعديه موت سما بنت علاء غير لما عرفتكم وعرفت نيرة و شفت دارين وبقيت بشيلها والعب معاها وجودكم فرق كتير اوى فحياتي وحياة علاء

ونفسي فرحتنا تكمل بجواز علاء ونيرة
هاه قلت ايه بقى ياعمي ابراهيم ياراجل ياطيب

ابراهيم : والله يابنتي كان على عيني انه

سلمى :انه ايه لاء، متقولش ارجوك اوعى تقول ده انا حموت فيها وربنا لو قلت

ابراهيم :ههههههه وهو انا قلت حاجه لسه انا كنت حقول انه كان نفسي تيجوا النهارده بس معلش ممكن نخليها بكرة عشان بردو اكون بلغت عصام ونيرة مش لازم بردو العروسه تجهز واللا إيه

تأخذ سلمى رشفه من العصير:الحمد لله ريحت قلبي ربنا يريح قلبك يارب ياعمي ويخليك لينا

عن اذنك بقى

ابراهيم :مالك واخده فوشك كده ورايحه فين
سلمى :رايحه فين وربنا مانا عارفه بص انا حجيلكم بالليل بس سلام بقى

ثم ترجع إليه ثانية وتقبل رأسه :ربنا يخليك لينا يااحلى عم ابراهيم فى الدنيا كلها

تمشي سريعا بينما يحدث إبراهيم نفسه :ربنا يجعلك من نصيب عصام ياسلمى يارب

يمارس عمله وهو عبوس الوجه فيجدها
أمامه :ايه اللي جابك ياسلمى عاوزة حاجه

سلمى: ابدا جايه اطمن عليك واشوفك عامل إيه
علاء:حكون عامل إيه يعني اديني بشتغل أهوه

سلمى بزعل :على فكرة الحاج ابراهيم والد عصام كلمني و عاوزنا نروحلهم بكرة بالليل ان شاء الله

علاء:ماشي ياسلمى حبقى اديكي فلوس لما اروح تنزلي تجيبي هديه حلوة وعلبتين جاتوه

سلمى :تمام بس عاوزاك معلش تزود الفلوس شويه عشان اشتريلها خاتم دهب

علاء :مفيش مشكله ياسلمى هاتي اللى انتي عاوزاه نيرة بنت حلال وتستاهل كل خير وربنا يوفقها فحياتها يارب

سلمى:ماشي عقبال ماتفرح بية انا كمان ياحبيبي

علاء وهو يبتسم لأخته :نفسي نفسي افرح بيكي اوى واشوفك فبيتك ياحبيبتي يارب

سلمى:ياحبيبي ياعلاء ربنا يخليك لية يااخويا يارب

يمر اليوم ويأتي اليوم التالي تستعد سلمى وترتدي فستانا جميلا وتلف حجابها على وجهها بطريقه انيقه وتضع القليل من مساحيق التجميل

تطرق الباب على وجهها فتجده يرتدي قميصا وبنطلونا عاديين:ايه اللي انت لابسه ده احنا رايحين مناسبه يابني مش عزا

علاء:سلمى الله يخليكي اطلعي من دماغي انا لولا انهم حيزعلوا مكنتش رحت اصلا

سلمى :بص انا مليش دعوة انا عاوزة اخويا يبقى اشيك واحد في الدنيا الليلادي

تفتح الدولاب وتخرج له بدله أنيقة كان قد اشتراها اثناء فترة عمله بالخارج :واو ايه الجمال ده هى دي الشياكه واللا بلاش ياللا البس، وحصلني يااسطى

علاء:حاضر اوامرك ياستى
ينظر للبدله ويحدث نفسه:كان نفسي اوي البسها وانا رايح اتقدملك يانيرة اقوم البسها وانا رايح اشوفك بتتخطبي لغيري وقاعده جمبه وبيلبسك الشبكه يارب يارب قوينى يارب متخليش عيوني تفضحني ولا دقات قلبي اللي بتنطق بحبها حد يسمعها يارب

بعد مرور حوالي ساعه
يفتح عصام الباب ويرحب بقدومهم:اهلا اهلا ياعلاء اهلا ياسلمى ايه اللى انتوا جايبينوه ده كله
سلمى:شيل عننا بس انا مردتش اخللي علاء يشيل عشان ميبوظش البدله

عصام :هههههههه تسلم الايادي عقبال مانشيلك يارب
فتنظر له سلمى باعجاب فهي ولاول مرة تراه وهو يضحك كم هو ساحر بضحكته الجميله
سلمى :تشللني
عصام :لا والله مقصدش اشلك بعد الشر عنك انا اقصد اشيل ليكي الحاجه
سلمى:لاء سموني مش سمموني
عصام :ههههههههه عسل وربنا ياسلمى
سلمى بينها وبين نفسها :الله يحرقك هو فى حد حلو كده والمصحف هاجر دي تستاهل تتعدم فميدان عام

ابراهيم :عنك ياسلمى يابنتي
سلمى :ايه اه اتفضل ياعمي
ابراهيم :عقبالك يا بنتي يارب

يجلس علاء وبجانبه اخته وامامه عصام وابراهيم والده
سلمى:طب بعد اذنكم انا داخله لنيرة
ابراهيم والدهم :وانتي محتاجه استئذان ادخلي ياحبيبتى

يقوم عصام ليحضر صغيرته بعد ان استمع لصوت بكائها فياخذها علاء من يديه:دارين ازيك ياحبيبتى وحشتينى بقالي يومين مشوفتكيش ثم يقبلها من جبينها

ينظر عصام ووالده لبعضهما ويبتسمان

تخرج سلمى وبصحبتها نيرة التى ماكاد علاء ان تقع عليه عينها حتى شعر بأن انفاسه قد اختطفت منه من جمالها الهادئ لم تكن الأميرة الساحرة ولم تكن جميلة الجميلات وانما براءة وجهها ونقاؤه طبع على وجهها

كانت ترتدي فستانا رقيقا وردي اللون ويزينها حجابها الانيق واضعه فى قدميها حذاءا عالي جعلها طويله الى حد ما

كانت أعين علاء لا تحيد عنها كان الكل ينطرون لبعضهم وهم يضحكون بهمس

حاول علاء ان يسيطر على قلبه حتى لا ينكشف امره كان يشعر بان الكل يستمع لدقات قلبه التى تكاد ان تشق صدره وتخرج منها

كان يود ان يختطفها ويقول هي لي ولن ادع احدا ياخذها مني ولكنه كيف له ان يفعل ذلك وهى ابنة الرجل واخت الشاب الذين اصبحوا يعتبرونه واحدا منهم

كتم احزانه فى داخله حاول ان يتفوه بأى كلمه ليخرج من حالته:امال العريس واهله حيوصلوا امتى هما مش اتاخروا كده

فيضحك جميعهم

علاء :فى ايه ياجماعه بتضحكوا على إيه
سلمى:اصل انت بتسأل عن العريس وهو اصلا جه ياحبيبي

علاء:جه امال قاعد فين يعني قاعد فى مكان تاني انا مش فاهم الصراحه
سلمى :حالا حتفهم كل حاجه

تجلس باعتدال وتاخذ نفسا عميقا وتتحدث بصيغه جديه:والله ياعمى احنا جايين النهارده وكلنا امل انكم مترفضوش طلبنا احنا يسعدنا ويشرفنا انى اطلب ايد نيرة القمر دي للشاب الغلبان العاشق الولهان اللي قاعد جمبي ده

بصوا خدوه وعلى ضمانتي حديهولكم ومعاه شهادة ضمان العمر كله

يضحك الجميع على هذا الكلام بينما كانت المفاجاه تكاد ان توقف قلب علاء شعر بارتعاش يديه العرق يتصبب منه

اخذت منه سلمى الصغيرة:هات ياحبيبي البنت حتقع منك

علاء :ايه الكلام اللي انا سمعته ده سلمى انتي قلتي ايه انا انا مش فاهم حاجه

ابراهيم :واحنا قبلنا ياستى بس على ضمانتك
سلمى:عيب ياعمى ده شغااااااال يونيفرسال
عصام ونيرة:ههههههههههه

عصام:علاء احنا يسعدنا ويشرفنا ان نيرة تبقى ليك ومن نصيبك انا لو لفيت الدنيا كلها مش حامن على اختى مع حد غير معاك

علاء والدموع تجري فى عينيه:بجد انا مش مصدق يعنى ايه يعني ماكنش فى خطوبه ولاحاجه يعنى انتي ياسلمى كنتي عامله فية المقلب ده

سلمى :مفاجاة ايه رايك
علاء :مفاجأة ده انا حضربك وربنا

سلمى وهى تقف خلف نيرة :الحقيني يانيرة عاوز يضربني خلاص خلاص اخر مرة والله

علاء وهو يحتضن ابراهيم:انا متشكر متشكر اوى ياعمي
ثم يقوم عصام ويحتضنه:الف مبروك ياعلاء نيرة امانه
علاء وهو ينظر لنيرة:فى عينيه

سلمى :طب اتفضل بقى اقعد جمب خطيبتك ياللا عشان تلبسها الخاتم
ابراهيم :استني ياست المستعجله لما نقرا الفاتحه الأول

علاء:طب مش لما حضرتك تقول طلباتكم الاول
إبراهيم :احنا ملناش غير طلب واحد بس تخللي بالك من نيرة ومشوفهاش حزينه ابدا

علاء :اوعدك ياعمى مش حتشوفها غير بتضحك
عمى حضرتك عارف اننا حنستلم الشقق الشهر الجاي ومحتاج كمان شهر بس نجيب الموبيليا ونفرش الشقه بعد كده حكون تحت أمركم

إبراهيم :واحنا حنفرشلك الشقه من كل شئ، احنا معندناش اغلى من نيرة
ربنا يهنيكم يارب ويفرح قلبكم

يبدا الجميع فى قراءة الفاتحه ثم تطلق سلمى الزغاريد:لووووولي لووووولي

ثم يبدأ علاء، فى وضع الخاتم فى اصبع نيرة والفرحه تخطف انفاسه :ايه ده الخاتم طلع مقاسك بالظبط

سلمى :صحيح مانا مقولتلكش اصلي اخدتها الصبح ونزلنا اشترينا الخاتم سوا وعلى فكرة هى اللى اختارته على ذوقها

علاء :اه ياجذمه كل ده من ورايا طب كنتي قوليلي ده انا كنت جاي وانا حاسس اني اول ماشفها جمب حد تاني حتشل

ابراهيم :ألف بعد الشر عنك يابني ربنا يحميك لشبابك يارب

علاء:انا بردو استغربت وقلت الخاتم الرقيق ده مش زوقك خالص ياسلمى الصراحه

سلمى :كده بردو طب انا زعلانه
نيرة :لا ياقلبي متزعليش ده انتي حبيبتى يالومه

علاء :ألف مبروك يا نيرة ربنا بقدرني واسعدك يارب
نيرة :الله يبارك فيك يا علاء، وربنا يقدرني واعوضك عن اللى فات

علاء :ممكن بعد اذنكم وبعد اذن نيرة اقولكم على حاجه
ابراهيم :اتفضل يابني

علاء:انا وسلمى ملناش غير بعض وانا مش حقدر اسيبها تعيش فى الشقه لوحدها

نيرة :من غير ماتقول ياعلاء، سلمى اختي وحبيبتى وانا مش حدخل الشقه غير وهي معانا

سلمى وهى تحتضنها:ياحبيبتى يانيرة ربنا يخليكي لية يااحلى اخت فى الدنيا
ابراهيم :ربنا يديم المحبه بينكم يارب

علاء:طب ممكن بقى بمناسبة المفاجاة الجميله دي وبما اني لابس البدله اللى كنت شايلها لليوم الجميل ده تسمحولي اعزمكم عالعشا

عصام :ماشي ياسيدي
ابراهيم :ماشي يابني عزومه مقبوله ياسيدي بس مش تاكلوا الجاتوه بتاع خطوبتكم الأول

عصام :ايوة كلوا على مااجهز دارين
سلمى:هاتلي هدومها وانا حجهزها

فتاخذها من يديه والفرحه تعم قلبها ولكن اين عصام هو لا يراها ولم يستمع لدقات قلبها التي تنبض بحبه هو فى عالم اخر لا يراها ولايعد بمقدرته ان يرى اى امرأة بعدما حدث له

بينما يجلس العاشقان يتحدثان بالهمس يعبران لبعضهما عن فرحتهم التي لا تسعها الدنيا
وياكلان الجاتوه استعدادا للخروج احتفالا بتلك المناسبه السعيده

تمر الأيام والسعاده تعم قلوب الجميع يهنأ كل حبيب بحبيبه ويعيش معه السعاده التى طالما تمناها وحلم بها

فى غرفة نومهما يختلسان بعض الوقت ليعيشا فيه الحب الذي يملاء حياتهما يشعران وكأن العالم ليس به سواهم أين كانت كل تلك السعاده لما لم التقي بكى منذ قبل

ولكن ليس مهما المهم هو انكي بين يداي الان لا اتنفس سوى عشقك الذي اصبح يملاء كل صدري
عشقك الذي أقسمت بالله الا يستطع احد أن يخدشه او يمسه بسوء

هاهى تستريح على صدره التي اصبحت لاتنعم بالامان سوى وهى فى احضانه
تسمع دقات قلبه التي تنبض بحبه لها
تهمس له بقلب امرأة عاشقه بصوت يطرب له الآذان :عمر
عمر :نعم ياقلب عمر
شمس :بحبك أوى
عمر :انا بقى بحبك وبموت فيكي وبعشقك
شمس :ربنا يخليكي ليا ومنحرمش منك ابدا عارف ياعمر
عمر:ايوة ياقلبي
شمس :نفسي اوى اجيب ولاد
عمر :ان شاء الله يا حبيبتى حنجيب ولاد
شمس :انا نفسي اجيب ولاد ويبقوا كلهم شبهك
عمر:لا شبهي ايه حرام عليكي ان شاء الله يبقوا حلوين كده زيك

شمس :وانا صغيرة كنت بزعل اوى لما اشوف كل الولاد ليهم اخوات وانا لوحدي طول عمري كان نفسي يكون عندي اخوات حتى لما بابا اتجوز وخلف والله انا عمري ماكرهتهم ولا اتضايقت منهم بالعكس انا كنت بروحلهم دايما وبحاول اتقرب منهم لكن هما دايما كانوا بيعاملوني على انى غريبه عنهم مع الوقت بقيت مبحبش اشوفهم ولا اروحلهم
واكتفيت بوجود إيمان فحياتي لقيت فيها الأخت والصديقه

عمر:بصراحه ياشمس مراة باباكى دي واخواتك البنات مش مريحين خالص متزعليش منى فاكرة لما رجعنا من شهر العسل وجم عشان يباركولنا مش عارف ليه مارتحتش ليهم انا اسف والله متزعليش منى بس بجد هما تحسيهم

شمس :منافقين ياعمر انا مش هبله ولاعبيطه انا ياما حاولت اتقرب منهم وهما اللي دايما كانوا بيصدوني ماحلوتش فعنيهم غير بعد مااتجوزتك اوعى تفتكر اني مش عارفة هما جم ليه مش محبه فية ياريت والله ده انا كنت اتمنى لكن عشان يحققوا اللي هما عاوزينه على حسابي

عمر :انا فعلا اخدت بالي انك مكنتيش مرحبه بيهم على اد كده

ده لما امل ووليد جم يباركولنا مع ماما سناء ترحيبك بيهم كان فظيع وناديتي عالكل يرحب بيهم وحسستيهم انهم من العيله والناس كانوا طايرين من الفرحه بعكس استقبالك لمراة باباكي خالص

شمس :عشان بيحبوني ياعمر امل ووليد جايين يباركوا لشمس اللي بيحبوها وبيتمنولها السعاده من قلوبهم لا طمعانين فحاجه ولا منتطرين منها حاجه

واديك شفت برغم ظروفهم اللي على ادهم الا انهم كانوا جايبين معاهم حاجات كتيرة اوى وهما جايين
فعلا مبتهونش غير عالغلبان

عمر:مش فاهم يعني ايه ياشمس
شمس :ههههههه حقولك يعني مثلا لما يكون فيه مناسبه تلاقى بعض الناس المرتاحه ماديا تجيب هدايا بسيطه جدا وممكن كمان تكون رخيصه اوى او حاجه عندهم مش عاوزينها يقولوا نهادي بيها ونخلص منها

مع انهم ممكن يجيبوا احسن من كده بكتير واغلى من كده كمان لكن هما بيبخلوا ويقولوا خسارة ندي فلوسنا لحد ونجيب بيها هدايا غاليه لحد

اما بقى فى ناس غلابه ويبقوا على ادهم بس بيبقوا هما دول اهل الكرم بجد بيقولوا ياللا ماهى كده كده بايظه واحنا يعني لو قعدنا نحوش العمر كله مش حنبقى اغنياء

وكل واحد بيجيب مقامه واحنا مينفعش منجاملش كويس وعيب والاصول وميصحش فتلاقيهم يدخلوا باحلى هدايا ويجاملوا احلى مجاملات ولما يكون فى صدقه بنطلعها لحد فقير هما اول ناس يطلعوا عشان كده بنقول مابتهونش غير عالغلبان

عمر :فعلا معاكي حق فى الكلام ده وبلاحظه فعلا بس الحمد لله ياحبيبتى ان ربنا عوضك بواحده زي إيمان

شمس :إيمان دى اختي وحبيبتى وصاحبتي عمرها ماسابتني ابدا مع بعض طول عمرنا مسبناش بعض لحظه ربنا يكمل فرحتها على خير يارب

عمر :صحيح مش كنتي بتقولي عاوزة تنزلي عشان تشتري الفستان اللى حتحضري بيه الفرح

شمس :ايوة بكرة ان شاء الله حنزل انا ومروة عشان هي كمان عاوزة تشتري وعليا كمان قالتلنا حتبعت معانا عشق نشتريلها عشان هي تعبانه طبعا ومش حتقدر تخرج معانا

عمر :ربنا يقومها بالف سلامه يا ب انا قلقان عليها اوى ياشمس شكلها تعبان اوى
شمس :يارب ياعمر يارب تقوملنا بالف سلامه يارب

بعد مرور يومين يستقبلان ضيوفهما الذين جاءوا لتهنئتهم بهذا الزواج السعيد والفرحه تغمر قلوبهم والابتسامه لم تفارق وجوههما:نورتونا والله ياجماعه
وليد :البيت منور بيكم ويارب يديم عليكم المحبه والسعاده دايما يارب
ماهر :اللهم امين

حبيبه :وحشتيني اوى ياامل
أمل :انتي اللى وحشتيني اكتر وربنا الف مبروك يا حبيبة

حبيبه :الله يبارك فيكي ياامل امال مجبتيش معاكي زياد ليه ده واحشني اوى

امل :والله كنت حجيبه بس حسيته دافى شويه وماما سناء مرضتش تديهولنا ابدا وصممت ميخرجش عشان ميتعبش

حبيبه :طيبه وحنينه اوى رزقك ياامل والله

امل :ماما سناء دي حبيبتي سبحان الله شفت منها حنيه مشوفتهاش من اللي من لحمى ومن دمي مبتبخلش علينا بحاجه بتدينا الحلو كله
ربنا يكرمها يارب ويخليها ويديها الصحه والعافيه يارب

وعندها حنيه تخليكي تحسيها أمك الحقيقيه اللى ولدتك ربنا يباركلنا فعمرها بارب

اه صحيح كنت حنسى البشمهندسه ايمان فرحها الجمعه الجايه ان شاء الله
حبيبه :بجد فرحتيني اوى دي طيبه وبنت حلال وتستاهل كل خير

امل:هي والله كانت عند ماما واكدت علية اقولك وبتقولك حتزعل منك اوى لو مجيتيش

حبيبه :ياخبر ماهر ممكن نبقى نروح فرح البشمهندسه ايمان اصلها غاليه عندي اوى

ماهر:بس كده من عينيا نروح ان شاء الله
وانت عامل ايه دلوقتى ياوليد واخبارك ايه لسه بتروح جلسات العلاج الطبيعي

وليد :الحمد لله والله ياماهر احنا كنا فين وبقينا فين الف حمد وشكر ليك يارب

حبيبه:أمل تعالي افرجك عالشقه ياحبيبتي
بعد اذنكم ياجماعه

فى غرفة نومها بجلسان على الفراش
أمل :طمنيني عليكي يابت عامله ايه ولو انك مش محتاجة تتكلمي الفرحه بتنط من على وشك

حبيبه:هههههههه انتي بتقولي فيها ياامل انا حسه ان الدنيا مش سايعاني من الفرحه حسه انى اول مرة اتجوز

أمل :ياحبيبتى ياحبيبه هو شكله كويس وابن حلال

حبيبه :اوى كويس اوى ياامل وحنين علية اوى
مش مخللي نفسي فحاجه شفت معاه حنيه مشوفتهاش مع المخفى الله يسهلله

أمل :وجنى حتعملي ايه معاها حتسيبيها مع امك واللا حتاخديها

حبيبه :لا طبعا حاخدها والله انا لو علية وعلى ماهر كنا جبناها من اول يوم لكن أمي واخواتي هما اللي مش راضيين بيقولولي مش دلوقتي عشان ماهر بردو ياخد راحته مع ان لو على ماهر عاوزها النهارده قبل بكرة ربنا يكرمه يارب

أمل :يعني انتي مشوفتيهاش من يوم مااتجوزتي ياحبيبه

حبيه:لاء ازاي انا كل يوم بروح اقعد معاها شويه وارجع وساعات كمان ماهر بيروح والله ياخدلها شوية حاجات حلوه ويروحلها

امل:عقبال ماربنا يكرمك يارب ويرزقكم بالذريه الصالحه
حبيبه :يارب ياامل يارب انا عارفه ان ماهر نفسه فحتة عيل واتحرم سنين من الخلفه بس عارفه ياامل انا مكدبش عليكي خايفه أوى

أمل :عارفه انتي بتفكري فايه بس متخافيش ماهر أصيل وطيب وبيحبك وعمره ماحييجي على بنتك ابدا ولا يظلمها

حبيبه :يارب ياامل يسمع منك يا رب

مرت الأيام سريعا واتت الليله التي طالما انتظرتها وحلمت بها واشتاقت اليها

تلك الليله التى شاركت فيها الفرحه الكثير من اصدقائها وتمنت ان تنال حظها منها هى الاخرى
نعم انها ليلة الحنا التى يتجمع فيها الأهل والأصدقاء والأحباب يقضون وقتا جميلا مع العروس يشاركونها فرحتها وسعادتها

فى بيت المهدى
عليا :ماما خللي بالك من عشق والنبي بلاش عينك تغيب عنها
هاله:انتي حتوصيني بردو ياعليا

عليا :ربنا يخليكي ياماما باركي لايمان وقوليلها عليا بتقولك الف مبروك والله كان نفسي اروح اسهر معاكم بس خايفه اتعب واعكنن عليكم

هاله:مش انتي قلتي حتروحي معانا بكرة ان شاء الله
عليا :بكرة حروح ان شاء الله عشان يزيد ميزعلش
هاله :ماشي ياحبيبتى متقلقيش على عشق
شاكر :ياللا ياهاله

عليا:هو انتوا حتعدوا على عهد ومروة
واللا هما حيروحوا لوحدهم

شاكر :لا مروة حتروح هى وعهد وانس من هناك
وسيف وعمر كمان رايحين بيقولوا عاملين مفاجأة لايمان وحسن

عليا :ايمان طيبه وبنت حلال وتستاهل كل خير ربنا يسعدها يارب

شاكر :وعقبال ماتقوميلنا بألف سلامه ياحبيبتى
عليا:يارب ياعمى يارب

عليا :هي شمس حترجع معاكم واللا ايه اصلها بايته بقالها بومين عن خالتها عشان تبقى جمب ايمان

شاكر :والله على مااظن لاء لاني كنت سامع عمر
بيقول ليزيد انها حتروح معاها الكوافير من هناك وعمر حيروحلهم ويطلعوا مع بعض عالقاعه لكن اكيد حترجع معانا بعد الفرح مايخلص لأن العرسان مسافرين على شرم
عقبال مانفرح بعهد وسيف هما كمان ان شاء الله

عليا :ان شاء الله يا عمى

بعد قليل فى بيت ايمان يمتلئ البيت بالأهل والأصحاب والأحباب الذين جاءوا لمشاركاهم فرحتهم

ترحب ايمان واسرتها بكل الذين اتوا اليهم
تعلو أصوات الأغاني والموسيقى والانوار المعلقه على المنزل كله

البنات يرقصن والزغاريد تملاء البيت وايمان مرتديه ثوبا احمر جميلا ارادت ان تقلد المسلسلات التركيه التى تشاهدها

وكم يبدو رائعا عليها وشعرها المصبوغ باللون الاصفر يبدو رائعا مع بشرتها البيضاء
حقا فلقد طغى صفاء قلبها على وجهها واصبحت تبدو جميله

قامت مروة وعهد وشاركوها الرقص
بينما كانت شمس تقوم بدور ام العروسه فكانت تقدم الحلوى للضيوف والكل يدعو لها بالذريه الصالحه

وامسكت ايمان بيد عشق لترقص معها
وصعد سيف وعمر للسلام عليها فخرجت اليهم لتسلم عليهم

سيف وهو يطلق صفارة عاليه:يخرببيتك ياايمان ايه الحلاوة دي كلها يابنتي كنتى مخبيه الجمال ده كله فين ياابن المحظوظه ياحسن
إيمان :هههههههه ربنا يخليك ياسيف يارب

عمر:ألف مبروك يا موني وربنا يتتمم فرحتك على خير يارب
ايمان :الله يبارك فيك يا عمر ربنا ميحرمنيش منكم يارب ويخليكم لية

سيف :انتي حبيبتنا ياموني على فكرة ساعه بالظبط والشارع هنا حيولع نار
إيمان :نار نار ليه ياسيف

سيف :اصلي انا وعمر عاملينلكم ليلة محصلتش وحسن جاي دلوقتي هو واصحابه عشان الليله حتبقى تحت قدام بيتكم

ايمان :ربنا يخليكم لية يارب بس كده كتير والله كفايه اللي عملتوه يوم حاجتى ماكانت رايحه الشقه
عمر:مفيش حاجه تكتر عليكي ياست البنات
امال فين شموستى مش شايفها يعني

إيمان :لا ماهي قايمه بدور ام العروسه النهارده ومقعدتش لحظه والله عقبال مااتعبلها يوم ماربنا يكرمكم يارب

عمر:يارب ياايمان يارب

ينزل عمر وسيف استعدادا لبدء السهرة مع الشباب بينما يستكمل الفتيات الرقص

تدخل بطلتها المعهوده وهي تطلق الزغاريد:لووووولي لووووولي
إيمان :سماح مش معقول انتي جيتي

سماح :ماتتلمي يابت واحترميني قدام الناس قوليلي ياماما ياطنط بلاش فضايح ادام الناس

إيمان :طب ادخل ادخلى بس قوليلي ايه اللي جابك مش قلتيلي لا انا عندي حنه زيكم انا كمان وحقعد فبيتي

سماح:وهي القعده تحلو من غيرك ياللى تنشكي وبعدين حقعد مع مين ياحسرة

اذا كانت وش الهم راحت الكوافير من الصبح ولسه مرجعتش لغاية دلوقتي

إيمان :لا انا خلصت كل حاجه امبارح عشان افضالكم الليلادي
سماح :وهو فى حد زيك ياحبيبتي
ياللا يابنات ساكتين انا ام العريس سمعوني اجدع سلام وتحيه

تاخذها إيمان من يديها لتعرفها بهاله ومروة وعهد:اقدملكم صاحبتي ييه قصدي حماتي
سماح وهى تضربها:بت بلاش حماتي دي مبيحبهاش انا نفسي اجيب اللى اخترع الكلمه دى من شعره وربنا واللا ايه رايك ياحاجه

هاله :معاكي حق فعلا والله ياحاجه مراة ابني تبقى بنتي
سماح :والنبي مافى حد بيريحني غيرها مقصوفة الرقبه دي
مروة :إيمان دي سكر

تجلس سماح معهم بينما تقبل عليها ام ايمان لتسلم عليها:ألف مبروك يا ام حسن لحسن وبسمه

سماح :حسبي الله ونعم الوكيل فدي البسمه حتشلني حتجلطني قطيعه تقطعها وتريحني منها
ام ايمان :ليه بس كده دي بسمه زينة البنات

سماح:زينة مين يااختى الهى مايبلي حبيبه بيها دي قدري الاسود وبختي المنيل البت اقولها اعزمي صحابك وهيصوا زى ماايمان عامله وفرحوني كده تقوللي لاء انا رايحه اعمل وشي ماسكات قال واهتم بنفسي روحي لمراة ابنك هيصي عندها وملكيش دعوة بية

ام ايمان :واحد ياحبيبتى هنا زى عندك
بسنت:اهلا ياماما انتي جيتي

سماح :شفتى ياام ايمان حتى اللي تتوكس التانيه سابت امها فى الليله السعيده دي وجت عندكم بردو شفتى وكستي فبناتي

عهد وهي تتحدث لعليا:عليا انا مش قادرة حموت من الضحك ايه الست العسل دي دي كوميديانه درجه اولى ملهاش حل

مروة :ست عسل وربنا:إيمان
إيمان :ايوة يامروة يااختي شفتي حماتي معلش طبعا انتم مش متعودين تشوفوا النوعيه دي من البشر بس عندنا تلاقوا كل مايسركم كل القنوات الفضائية

مروة :لا وربنا دي عسل خالص بس واضح انها مضايقه من بنتها شويه
إيمان :شويه ده ايه قوليلي عشروميت شويه دول ضراير مش ام وبنتها

بصي هي حتيجي من الكوافير على هنا حتشوفي اللي حيعملوه فبعض:سبحان الله باريتني كنت افتكرت مليون جنيه اهي بسمه شرفت اهيه

سماح :لاهيا المليون جنيه احسن من بنتي ياجذمه اهلا يابسمه اهلا يحبيبتى بركه ياختي ان ربنا رجعك بالسلامه وريني كده وشك مش شايفه عنيكي بقت مكان مناخيرك يعني ولا قلبت بخضار مانتي وشك زى ماهو اهوه كان لزمته ايه بقى تنطيطك فى الكوافيرات مش كنا اتلقحنا فبيتنا وهيصنا يابت الجذمه

بسمه:ماما مينفعش كده بقى مش قدام الناس الله بقولك ايه انا مش حبات عندكم اصلا انا حبات هنا عند إيمان عشان اريحك من وشي

سماح:تباتى فين يابت انتي انتي لازم تخرجي من بيت ابوكي امال القلتين اللي اشتريتهم من السوق اعمل فيهم ايه ان شاء الله

بسمه :اخس عليكي ياماما كده بردو وانا اللي قلت انك حتزعلى اني حتجوز واسيبك

فتاخذها سماح فى احضانها:لا ياحبيبتي ده انا بهزر الف مبروك يابسمتى ده انت حبيبتي وربنا والنبي حتوحشيني مين اللي حيعللي صوتي ويعكنن علية كل شويه

فجاة يسمعون اصوات الفرقعات والصواريخ واصوات موسيقى صاخبه فى الشارع
يجرون جميعهم على البلكونات ليشاهدوا مايفعله الشباب فيجدونهم محاوطين حسن فى الشارع ويوجد كم هائل من الشباب الذين يرقصون حوله بالاضافه الى الفرقه التى اتت لاحياء الليله

كانت كل الشبابيك والبلكونات التى تطل على الشارع مملوءة بالناس يشاهدون ذلك الاحتفال بتلك الليله الجميله

تنزل سماح الشارع وتخترق الشباب :وسعوا انا ام العريس

يوسع لها الشباب بينما يحملها حسن ويلف بها والفرحه تكاد ان توقف قلبها بان إبنها فرح لهذه الدرجه:ياحبيبي يابني الحمد لله اني شفتك وانت عريس ياحبيبي
حسن :ربنا يخليكي لينا ياست الكل
سماح :ويخليك لية ياحبيبي وربنا يفرحك ويرزقك بالذريه الصالحه يارب

حسن :ان شاء الله ياامي
تنزل ايمان اليهم بصحبة اخيها لتسلم على حسن ويزفونها معه بفستانها الجميل
سماح:كان لازم يعني شهر عسل ده انا كنت مرتبة اني حروح معاكم الشقه
حسن :تروحي معانا الشقه ليه ياأمي

سماح :عشان انام لكم تحت السرير ياحبيبي واطمن على ابني حبيبي

إيمان :سرير ايه اللي تنامي تحتيه ياسماح
سماح :الحق علية اني عاوزة اطمن ان الواد قايم بمهامه على اكمل وجه واطمن على مستقبلك ياموكوسه
حسن :اطمني ابنك أسد ياسماح
سماح:يارب ياحبيبي يارب يطمني عليك يابني

حسن :ماما انا بقول تطلعي فوق مع الستات احسن
سماح :لا وربنا لما يغنولك اغنية يانجف بنور ياسيد العرسان ياقمر ومنور عالخلان عالخلان يانجف يانجف حلو يانجف

يغني الشباب ويرقص مع والدته ثم تصعد الى الاعلى بينما هو وايمان يلتف حولهم الشباب ويرقصون حولهم
والنساء يطلقن الزغاريد من الاعلى والسعاده والفرحه تعم المكان

حقا انها ليلة جميله تحمل معها التفاؤل والأمل فى التمتع بمستقبل قد طال انتظاره

تطول السهره حتى الساعه الثانيه صباحا ثم يتجه كل شخص الى بيته ويعود حسن وامه واخته الى بيتهما بينما تظل شمس مع ايمان فقد استئذنت من عمر انها ستبيت تلك الليله مع رفيقتها
ترجع سناء بصحبة امل الى بيتها وهي تدعو لها بالسعاده والهناء

يمر الليل وشمس وايمان يتحدثان سويا حتى غلبهم النوم وفاقت على صوت امها وهي توقظهما لتناول الفطار قبل الذهاب لصالون التجميل

بعد قليل يسمعون صوت العربات التى تعلن عن وصول حسن ومعه بسمه واختها بسنت واحمد للذهاب بهم الى الكوافير

تاخذ ايمان فستانها وتزغرد لنفسها وتسلم على اهلها كالمعتاد
تبكي امها وهي تسلم عليها
إيمان :بتعيطي ليه بس دلوقتى هو انا حلحق اعيش هناك اد اللي عشته هنا بحبك ياماما
تنزل هى و شمس
حتى يصلون الى الكوافير وتبدأ كل منهما فى الاستعداد لعمل الشعر والميكب

بعد فترة من انقضاء اليوم تتعارك بسمه مع احدى العاملات
ياعروسه مينفعش كده مش عارفه اشوف شغلي
بسنت:فى ايه ياانسه
الكوافيرة:بصي انا عمري ماتعبت مع عروسه زى دي
بسمه :انتي اللى مش عارفه تشوفي شغلك كويس فيها ايه يعني لما اختار الالوان اللى انا عاوزاها فوشي
الكوافيرة :الوان ايه ياحبيبتى هو انا بلون لوحه فى الفصل

ثم توجه كلامها لبسنت:حبيبتى دي عاوزاني احطلها كل الالوان دي مش حتبقى عروسة فرح دي حتبقى عروسة المولد

بسمه :لو سمحتي احترمي نفسك بلاش غلط
الكوافيره:غلط ايه انا مغلطش فحاجه انتي اللي غريبه اوى يعني دلوقتي لما تخرجي من عندنا بالشكل ده والناس تسال العروسه كانت فين محدش حييجي عندنا تاني ودي سمعة مكان حضرتك

بسنت :اعملي اللى انتي شايفاه صح ياحبيبتى وانتي يابسمه وديني لو ماسكتتي لاتصل بامك اجيبها تعرفك شغلك

بسمه :حاضر اديني اتكتمت
الكوافيرة :انتي اسمك بسمه سبحان الله ده انتي مضحكتيش من ساعة ما دخلتي هو انتى مغصوبه عالجوازة دي ياعروسه

بسنت:لا ياحبيبتى هو ده العادي من بنك مصر متاخديش فبالك وانتي ماسمعلكيش صوت

شمس:بسنت
بسنت :ايوة ياشمس
شمس :هي بسمه مالها سمعاها بتزعق
بسنت:قطيعه تقطعها مش عاجبها المكياج وبتتخانق مع البنت

تتجه شمس إليها :بسم الله ماشاء الله تسلم ايدك يا قمر ايه الجمال ده
بسمه وهي تضحك:بجد ياشمس انا حلوة
شمس :قمر وربنا قمر
الكوافيرة :ياااه فرج الله اخيرا ضحكتي

بينما كانت ايمان مغمضة العينين تاركه الامر للفتاه تفعل ماتفعله فهي تعلم انها تجيد عملها وتعلم انها ستختار ما يصلح لها
تنهي المكياج لايمان

إيمان وهي تنظر لنفسها فى المرأة :مين دي اللي اتا شايفاها معقوله دي انا لا مش معقول شمس بصي ياشمس

شمس :بسم الله ماشاء الله ايه الجمال ده كله ده انتي تحولتي بقيتي واحده تانيه خالص مش ممكن
ثم توجه حديثها للفتاه:فنانه بجد انتي فنانه مش ممكن
الفتاه:شكرا يا حبيبتي ربنا يخليكي

بعد قليل تبدا الفتيات فى تصفيف الشعر واختيار التسريحه المناسبه لكل منهما

وطبعا بسمه عملت مشكل بردو وقت التسريحه ومش عاجبها حاجه والمرة دى بقى اللي المفروض حيعملها التسريحه شاب مش بنت ايمان سكتت وسابت الشاب يعمللها التسريحه اللى شايفها مناسبه لشعرها وكثافته وكمان تليق على وجهها

اما بقى بسمه عملت الواجب مع الشاب اللي كان بيعمللها التسريحه وانتوا طبعا عارفين ان الراجل مبيستحملش ده ممكن يشيلها ويرميها برة الكوافير

:من فضلك ممكن حضرتك تسيبيني اشوف شغلي
بسمه :ايوة بس انا عاوزة التسريحه دي
الشاب:ياعروسه افهمى التسريحه دي عاوزة شعر قصير وخفيف لكن انتي ماشاء الله شعرك طويل وتقيل
بسمه:ايوة بس انا

الشاب:انا اللي زهقت وربنا ممكن تسكتي بقى
بسمه:حاضر حتكتم اهوه
الشاب:يكون احسن بردو

يتصل عمر على شمس ليعلمها بقرب وصولهم من الكوافير لكي يستعدوا
تقف شمس فى استقبالهم وتسلم على زوجها الحبيب

عمر :قمر ياناس ايه الملاك البرئ اللى انا متجوزه ده ياناس
حسن :فين ايمان ياشمس
شمس :جوة تعالى نروحلهم

يتجه حسن واحمد بصحبة شمس الى المكان المتواجدين فيه ايمان وبسمه
حسن:هى فين عروستي ياجدعان فين ايمان
ايمان :انا اهوه ياحسن
حسن:حسن مين انتي تعرفيني ياعروسه

إيمان :حسونتي اخس عليك وربنا حزعل منك هو انا معجبتكش واللا ايه

حسن :معجبتنيش ده ايه يخرببيت حلاوتك هو فى كده يا بركة دعاكي ياما ايه الجمال ده كله
إيمان :بس بقى متكسفنيش

حسن :كسوف ايه الليلادي مفيش كسوف نهائي
بينما أحمد يتحدث الى بسمه:مبروك ياحبيبتى
بسمه:الله يبارك فيك ياحبيبي
أحمد :ايه الجمال ده كله
بسمه:بجد حلوة يعني عجبتك
أحمد :عجباني ده انتي تعجبي الباشا ياباشا

كان العاملون بالمحل ينظرون لها وهو متعجبون من انهم يرونها تضحك هكذا

أخذ كل عريس عروسته فى يديه وتوجهوا جميعهم للقاعه التى ينتظرهم فيها الاهل والاصحاب والجيران وزملاء العمل

زفه جميله امام القاعه لم تخلو من رقص العرسان والاصحاب حولهم

سماح :واد ياحسن انت سيبت ايمان وجبت اللى انت ماسكها فايدك دي منين ياواد

حسن :مالك ياامي سلامة النظر ماهي ايمان اهيه مكلبشه فية

سماح :دي ايمان لا مش ممكن مستحيل اصدق لا وربنا دي ماايمان دي واحده تانيه انت جايبها

إيمان :سموحتي ايه رايك فية
سماح :الصوت ده مش غريب علية ده صوت ايمان بس ازاي انا مش شايفه ايمان خالص ادامي

ايمان :مالك ياسماح هو انا مش عجباكي واللا ايه
سماح:مش عجباني ده انتي قمر ياجذمه ايه الجمال ده يابت هنيالك ياحسن الف مبروك يا حبيبى تتهنى يارب
لووووولي لووووولي
ثم سلمت على بسمه :مبروك يابسمه مبروك ياحبيبتي خللي بالك من عريسك
ثم تسلم على أحمد :مبروك يا حبيبي ربنا يعينك على مابلاك

وطبعا سماح ماسابتهمش لحظه وفضلت ترقص معاهم اما ام احمد كل شويه تبوس فيه وتحضنه
تفتح القاعه أبوابها لتعلن عن دخول العرسان للقاعه

كان الجميع اعينهم مسلطه على العرايس بفساتينهم الجميله ومكياجهم الذي يظهر جمالهم

كانت ايمان جميله بشكل لم يتوقعه احد ولم يعتاد احد على رؤيتها بتلك الهيئه لم تجلس لحظه واحده طوال الفرح ترقص وحولها الاصحاب والاصدقاء والزملاء

لم تتركها شمس لحظه واحده ظلت معها وبجوارها
وكانت اسرة يزيد كلها متواجده وصعدوا جميعهم ليسلموا على العروسين ويلتقطون معهم الصور
سماح وهى تجر فى يدها المصور:ايه ياحجه بس جراني كده ليه

سماح:بص بقى العريس ده ابني والعروسه دي بنتي يعني انا اكتر واحده لازم تتصور الليلادي
المصور :عينيه ليكي ياحجه
سماح:طب ياللا بينا
تقعد سماح بين حسن وايمان وبجوار ايمان وبجوار حسن وتلتقط معهم الكثير من الصور ثم تذهب لتلتقط الصور مع بسمه بينما كان زوجها يجلس بين الرجال ولم يهتم بالامر فلقد اكتفى بصورة واحده مع كل من ابنائه بينما سماح لم تكتفي بعشرات الصور

ولم تجلس فى مكانها ولم تنزل من على ساحة الرقص فقد شاركت ابنها فى الرقص

بعد كده راحت للدي جي :انا عاوزاك تشغللي اغنية محرم فؤاد والنبي لنكيد العزال ونقول اللي ماعمره اتقال
الشاب :بس دي اغنيه من العصر الحجري اجيبهالك منين دي
خلاص يبقى خلينا فى يانجف بنور
مش عارفه انا ايه حكايتها مع الاغنيه دي
بعد كده راحت لهمها الكبير:ماتقومي يابت ترقصيلك شويه بدل مانتي قاعده كده يخرببيتك

بسمه:الشوز كعبها عالي ياماما ومش قادرة
سماح:بت انتي متشيلينيش وربي لو ماقمتي لسحبك من قفاكى قوم يااحمد قوم ياحبيبي يمكن ربنا ينفخ فى صورتكم ياخوفي لتكملوا الليله وانتوا بالمنظر ده وربي مامطمنه لكم انتوا الجوز جتكوا خيبه فخيبتكم قوموا قوموا فضحتوني

تضطر بسمه للوقوف خوفا من امها وتبدا فى الرقص بصحبة اختها وايمان والجيران والاصدقاء

هاله:بسم الله ماشاء الله ايمان طالعه حلوة اوى والله انا ماعرفتها
مروة :فعلا ياماما طالعه امورة اوى
عليا :ايمان اصلا حلوة ياجماعه المكياج اظهرها اكتر لكن هى من الاصل حلوة الصراحه
هاله:بصراحه كفايه خفة دمها دي شربات
مروة:والله ياماما مافى حد فخفة دم حماتها دي ملهاش حل يالهوي ياعليا لو كنتي جيتي معانا فسهرة امبارح وشفتيها ست ملهاش كتالوج فظيعه بتتكلم بتلقائيه عارفه فكرتني بعبله كامل فى مسلسل لن اعيش فى جلباب ابي
هههههههه هههههههه

عليا :ايوة مش هيا دي اللى مقعدتش من اول الفرح
عهد :ايوة هي
بينما كان حسن يرقص مع اصحابه وجد من يقف امامه ليسلم عليه:ألف مبروك ياحسن

معلش بقى ياموني مش قادرة اكمل معاكم اكتر من كده
ايمان :ليه بس يابيرو الليله حلوة وعاوزة اكمل رقص واديكي شايفه سماح مشهيصه الدنيا

معلش يا قلبي وربنا ماقادرة حموت وانام عندي مدرسه الصبح يعني يرضيكي انتي تروحي تقضي شهر العسل وانا اترفد يااختى

حعوضهالك يا حبيبتي
إيمان :ماشي ياقلبي شفتيني وانا قمر
احلى قمر والل

الثامن والاربعون من هنا 

تعديل المقال