رواية احرار مير قلوبنا مستحلة الفصل الخامس والعشرين 25 بقلم الكاتبة سحاب

رواية احرار مير قلوبنا مستحلة الفصل الخامس والعشرين 25 بقلم الكاتبة سحاب

الجزء الخامس والعشرون

*

*

لا هي نار ولا هي ماء لا هي غيمة ولا ظمأ

*

*

رعود بصدمة : يعني ساري الراشد ورى خطف نجد ؟

البارق بتأكيد هز رأسه بارهاق لكن انتبه لساق ابوه وقرب منه وهو يمسك ساقه : انصبت؟

رعود ابعد ساقه عن يد البارق: سطحية لكن انت بتنصاب تجهز

البارق بتراجع: يبه دخيلك ترى الإرهاق لاعب بي لي ساعات مقابل اللابتوب أحاول اطلع بشيء وبعدها رحت المركز عشان نتعرف على الصوت

رعود باهتمام: مين اللي فحص لك الصوت

البارق بعدم اهتمام: واحد من اللي يشتغلون بمكتبك ما ادري وش اسمه بس يعرفني هو

رعود استغل قرب البارق منه وهو يسحب اذنه : مليون مره قلت لك لا تستغل مكانتي بتكاليفك شغلك تسويه بنفسك او على الأقل شخص واثق فيه المعلومات اللي عندك سرية متى تفهم

البارق براحة: لا تخاف يبه اعرفه الرجال لو طلع الكلام اشد اذنه واقطعها بعد

رعود بقهر: انا اللي بقطع اذنك قبله باقي ما خلص حسابي معك يا ولد شمايل

البارق بابتسامة: دام فيها ولد شمايل الزعلة قوية يا بو البارق

رعود بعصبية : جعل البارق للعقل والركادة والله يخلف على أبو البارق بالجنة

قاطعهم اتصال شمايل

رعود بروقان سريع: ويخلف على ام البارق بالفردوس الأعلى من الجنة

فتح المكالمة بروقان : يا هلا

شمايل بقهر: ولدي وينه يا رعود

رعود ببرود: افا ورعود محد يسأل عنه

شمايل بقهر: والله قلبي قارصني على ولدي واحسه تحت يدك يا رعود

رعود بابتسامة سحب اذن البارق: تحت يد ابوه وتخافين عليه؟؟

شمايل بحسرة: خف على ولدي يا رعود ترى ما عندي غيره اطالع ربي ثم اطالعه

رعود موجه كلامه للبارق: لسى ما شاف شيء لسانه واذنه يبي لهم قطع

شمايل بقهر: صحيح يا رعود انك بتزوجه بنت سعود الكبيرة؟

رعود بقهر: خسرها وراحت عليه

شمايل بسخرية: عشتوا ولدي ينخسر ما يخسر

رعود بحسرة: الله يخلف على اللي بتأخذه

شمايل بحرص:ولدي بخير يا رعود ؟ عطني إياه

رعود مد الجوال للبارق بعدم اهتمام

البارق بابتسامة: هلا باللي له الخافق يهلي هلا بأم البارق وحفيدة رعود وزوجة رعود

شمايل بحب: هلا بروحي انت طيب؟

البارق ابتسم : طيب جعلك تسلمين بس رعود متوعد فيني توسطي لي

شمايل ببرود: رعود ما يتوعد فيك الا وانت مخطي تستاهل ما يجيك

البارق بصدمة: افا وراك قلبتي علي

شمايل بحرص: ابعد عن ابوك بكلمك

البارق ابتعد عن رعود : سمي

شمايل بعصبية: وش سويت لبنت عمك اللي يقول ابوك انك خسرتها

البارق بعصبية: ما سويت شيء رحت لمكان دوامها اخذها وسحبت علي غيره ما سويت

شمايل بعصبية : والله لو ادري انك اخطيت عليها بكلمة يالبارق يا ويلك مني صحيح اني ما تمنيتها لك لكن كل شيء الا كسر الخواطر يا ابوي وخصوصًا البنات ترى خاطرهم هش وينكسر

البارق بطفش من الطاري : والله ما قلت لها حرف وما اعرف عنها الا اسمها وانها بنت عمي سعود ومطلقة واكبر مني

شمايل قاطعته بقهر: بس وقطع لسان تحسب الطلاق عيب ما هو عيب طلع ابوك صادق ما خسرتك البنت

البارق بتعب : يمه تكفين توسطي لي عند ابوي ناوي علي نية وانا مابي حيل

شمايل ببرود : تستاهل اشوف تسهل عندي شغل انا

كان بيتكلم لكن انفصل الخط بعد الجوال عن اذنه وتوجه لرعود يعطيه الجوال

رعود بسخرية: سكرت في وجهك؟

البارق بمزح: منكم لله معنف من الام والأب

رعود بوعيد : باقي ما شفت العنف يا ولد امك

البارق بقهر: اليوم ماهو يومي ابد

رعود بروقان : يلا على مركز التدريب نهارنا طويل معك

البارق بصدمة: لا يبه تكفى انا في وجهك ماهو اليوم والله نعسان ما نمت زين

رعود ببرود: انجز يا ولد ولا يطول هرجك

البارق بقلة حيلة : يلا اساندك؟

رعود وقف بدون مساعدة البارق: ما جاء الوقت اللي احتاجك تعاضدني يلا مشينا

توجهوا للسيارة على صوت دندنة البارق اللي كان يدندن ابيات توصف حسرته

" لي ثلاث سنين وأموري سبارة

منبلي بالحظ ووجيه المقرّد

يا مسلك لي لحق جوفي حرارة

ما تبردها من رخاة المبرد

وانت يا مصلي على وصل استخارة

يا مصدّر في خفوقي لا توّرد

رح ولاني بلاقي في بعدك خسارة

غصن خفاقي يبي يلقى مغرد "

رعود بسخرية : صح لسانك وجيه المقرد اجل

البارق : انا اشهد مقابل قنابل وفنيين تكنولوجيا ومعسكر التدريب

رعود بسخرية : ليه مستحي يبه قول وجهي بعد

البارق بابتسامة : لا ابد محشوم تبي نتدرب صح يلا يلا رايحين

رعود بضحكة مكتومة: ايه احشم نفسك

اول ما وصلوا لمقر التدريب نزل رعود وهو يتحامل على اصابته واشر على قمة جبل مرتفعة : ورني سرعتك يالعاصفة

البارق اللي وجه انظاره للجبل وقبل يكمل كلامه ركض للجبل ووصل لقمته وهو يأشر لرعود اللي جلس على الأرض

رعود باستفزاز: وش تقول ما اسمعك

البارق بقهر نزل من الجبل بنفس سرعة صعوده : وش من تدريب بعد يلا يبه عشان بي نوم

رعود بابتسامة: مستعجل يعني ؟ افا عليك ابشر يلا ضغط الله لا يهينك

البارق اللي تعود بدأ ينفذ جولات تمارين الضغط مع استفزاز رعود بالكلام

البارق بتعب : اتمينا الجولات يبه خلاص

رعود اللي جاب وزن ثقيل مصفوفين بترتيب لحمل الاثقال وهو يحطه على نهاية رقبة البارق بداية ظهره : ما سمعتك تعد الجولات عيدها

البارق زفر بتعب بدون ما يناقش لانه يدري انه بيزيد عليه مع اول نقاش

رعود ضغط على الوزن بكفه اليمين يزيد الضغط على البارق : هذا عشان لا تفكر تجرح مشاعر بحرف

البارق بقهر وقف على حيله : من اليوم وانتوا تتوعدون فيني عشان مشاعر وش سويت لها انا

رعود قرب وجهه للبارق بقهر: لما تكلمت على الجوال وقلت اذا تزوجت جسّار مانيب زعلان بفرح لهم كانت على الخط وتسمع

البارق سكت لحظات : وانا وش عرفني انها تسمع بعدين ما قلت شيء غلط لأني صدق ما احمل لها أي مشاعر يبه والنعم فيها لكن انت فرضتها علي فرض لا انا اخترتها ولا هي اختارتني والحين هي لها الاختيار ان اختارتني ما تشوف مني الا بياض الوجه وان اختارت جسّار الله يسعدها ويوفقها

رعود بقهر صد عنه : جعلها ما تختارك لأنها تستاهل الأعز منك قوم لو حطيت هالجبل بظهرك العوج ما يستقيم

البارق بعدم اهتمام : يبه بنت عمي وعلى عيني ورأسي لكن يبه هي من حقها تختار بشكل طبيعي بدون ضغوط البنت طلعت من تجربة فاشلة لا تضغطون عليها تختار اللي تبونه هي لها قلب ولها عقل يختار امتحنتوا البنت بحياتها

رعود اللي اقتنع بكلام البارق توجه للسيارة والحين لازم يفكر وش يسوي مع ساري وسحر والأهم جسّار لو عرف

طلع جواله وهو يتصل على القائد اللي فوقه ووصله الرد السريع

رعود بجدية : توصلنا لمعلومات جديدة بخصوص خاطف بنت المقدم جسّار الفهد

الفريق أول : عندي خبر يا رعود ساري الراشد وسحر آل هاشم لكن دورك يا رعود الحين تعرف المساند لهم لأنهم مستحيل يوصلون للمعلومات السرية هذي بدون ما يكون لهم وصول داخل الاستخبارات فريقك يا رعود فيه جاسوس

رعود رفع حاجبه : اللي وصل لك الخبر من فريقي ؟

الفريق أول : ياسر بن حازم ولدك توجه له عشان يفحصون الصوت وبلغني

رعود لف على البارق بغضب: ياسر؟

الفريق أول: اخر واحد تشك فيه هو ياسر وفريقه لأنهم تحت مراقبتي

رعود باستغراب: فريقه؟ ما عندي علم عن الفريق هذا

الفريق اول: أشياء كثيرة ما عندك علم عنها يا رعود الفترة الأخيرة مخيب أملي كثير مانت مُهاب الأولي

رعود بهدوء: ابشر ما دام وصلنا لطرف خيط تجيك الاخبار باذن الله

الفريق أول : ياسر و الجارح و سطّام لا تحاول تحقق معاهم او تشك فيهم يا رعود

رعود باستغراب: جارح وسطام ماهم من فريقي ولا يشتغلون معي

الفريق أول : استخبارات مدنية من طرفي يتعاملون مع ياسر

رعود بطاعة: ابشر

سكر المكالمة وهو يلف على البارق : قلت لي انك تعرف ياسر

البارق بتركيز في الطريق: ايه

رعود : تعرف اللي يشتغلون معاه

البارق : ايه اعرف معاه اثنين واحد منهم شباب بعمري ما اشوفه كثير يجي ويمشي بسرعة وحتى ملامحه ماهي واضحة لأحد يلبس نظارات وكمام والميزة اللي فيه طوله وواحد أكبر شوي سطام

رعود باستغراب: ليه التخفي هذا من تكون يا الجارح ومن متى الاستخبارات المدنية شباب

البارق بتركيز: تبيني اشوف لك موضوعه ؟

رعود ببرود : لا الحين خلني افكر بموضوع ساري واللي معه

البارق باستفسار متردد : يبه سحر آل هاشم هي أم شغف صحيح؟

رعود ببرود: صحيح

البارق بتردد: ليه طلقتها كنت تدري انها تتعامل معاهم

رعود ببرود: لما اتهموني بقتل الفهد هجت وتركت شغف عندي وطلقتها بلحظتها اللي تستغني عن بنتها وتصدق فيني ما تلزمني

البارق باستغراب: راحت وتركتك مع طفلة بدون ما تتكلم ؟

رعود بعدم اهتمام : ما تستاهل تربي بنتي

البارق : مانت ندمان على شيء؟

رعود : ندمان اني تركت الفهد يركب الطيارة الثانية وسمعت كلامهم أما باقي افعالي وخساراتي كلام فاضي

-بيت آل راجح

راجح اللي طلع من مكتبه وهو يلمح مشاعر بكوب قهوتها راجعه لغرفتها

راجح بابتسامة: مشاعر القلب وين رايحه بدون ما تسلم؟

مشاعر التفتت بابتسامة : كنت مشغول مع أبوي لما وصلت من الدوام

راجح بابتسامة متبادلة: يخسي سعود ويهبى يشغلني عن سلوة الروح

مشاعر بضحكة : غلطان سلوة الروح شغف ماهو انا

راجح بحب : كلكم سلوتي وكلكم روحي والله ان ما هنت عيشتي الا بالبنات وما قوى ظهري الا لما اخذت جسّار لصفي

مشاعر بزعل: افا ما كنا شادين ظهرك يعني

راجح اشر لها على المكان اللي جنبه بالكنبة : تعالي واتركي عنك الغيرة يالغيور وانتي تدرين انك اغلاهم واقربهم لقلبي تذكريني بجدتك شكل وطبايع

مشاعر جلست جنب راجح بابتسامة: اشتقنا للغايبه الحاضرة يا جدي؟

راجح : اشتاق ويسلي قلبي شوفتك وأقول ما ماتت المزن وهي مربيه مشاعر على ممشاها

مشاعر بابتسامة: الله يرحمها ويسكنها الجنة بس بعد ما حبيت كلمتك

راجح ابتسم : كانوا يعيبوني بخلفة البنات ويقولون ما عندك بالبيت الا البنات ما دروا انهم المؤنسات وروح البيت انا لو ما عندي انتي وروح وشغف وشلون كنت بعيش مع ابوك الجامد

مشاعر بحب: لا عاد ما ارضى على ابوي يا زين جلسته اذا راق وسج بالقصيد

راجح بثقة: ما يكسره بالقصيد غيري بس كنت أتمنى لو الله عطاه ولد يعيني ما دريت ان عوضي بجسّار اللي رديته عن بابي وهو بالمهد

مشاعر بتردد: يبه ليه رديت خالتي لما جاتك

راجح بحزن: خفت عليها والله اني خفت لا يأكلونها بالحكي وانا داري صارم بيضمها بجناحه وبيحميها ما دريت ان من نسل الأصيل يطلع ردي

مشاعر بحزن : صحيح انها تزوجت اخو زوجها وعذبها

راجح هز رأسه : صحيح عسّاف كان طالبها مني قبل الفهد ورديته لأن شغله برى وانا ما ابي بنتي الوحيدة بعيدة عني ما دريت انها بتبعد سنين وانا اللي ابعدها بنفسي

مشاعر بودّ : ورجعت يبه ومعها سند لك

راجح بحزن : صدق اللي خلف ما مات يا مشاعر كلما شفت جسّار اذكر فيه الفهد سبحان الله

مشاعر باهتمام خفي: من أي ناحية

راجح ابتسم : من ناحية الصلابة والقوة والعزم على الأمور وقت جاني وخطبك ذكرني بالفهد لما خطب نوره دخل علي بالبدلة العسكرية ويده تنزف وكتفه مكسور ووجهه مجروح وخطبها بس عشان رعود قال له السالفة كلها ومن الحمية اللي فيه اول ما وصل جاء وخطبها كان ونعم الرجل خسارة صارم فيه قوية أي والله قوية كان صديق ابوك بعد بس ابوك حقده شين

مشاعر عقدت حواجبها بعدم فهم : ليه حقد عليه ابوي

راجح ابتسم : ابوك كان عاشق لبنت صارم وكتب فيها من القصيد عدد ما يعلمه الا الله لكن بعد المشكلة اللي صارت كان ابوك رافض ان الفهد يتزوج نوره حمية بس وكأنها مفروضة عليه وعاند وعناده شين ودفن حبه بقلبه وتزوج أمك

مشاعر بصدمة: ضوى يبه ؟

راجح ابتسم : ايه ضوى لعلمك اني انا اللي مأذن بإذن ضوى وصارم اذن بأذن سعود وقت انولد وكانوا محيرين لبعض لكن أمر الله اقوى

مشاعر ابتسمت : والله طلع أبوي عاشق

راجح ابتسم : ابوك مشاعره شين ان حب وان حقد

مشاعر ابتسمت : وش يقول طلال الرشيد يبه ؟

راجح ابتسم بذكرى : حنا البدو يا بنت هذا لحنا نحبك أكثر لا غدى حبك جهاد

مشاعر ابتسمت : منك لسعود سرى هالبيت

راجح ابتسم بتلاعب: وانتي يا مشاعر

مشاعر فهمت ولكن تجاهلت : وش فيني يبه

راجح بابتسامة وهو يدري انها فاهمه : من اخترتي يا بنت سعود هو ولد رعود ولا ولد الفهد

مشاعر سكتت لحظات ثم نطقت بشكل سريع : قلبي الخايب يوجهني للدرب العسير ما دون جسّار الا سود الليالي

راجح بتأكيد:يعني اخترتي جسّار؟

مشاعر هزت رأسها بدون أي رد

راجح باستسفسار: ليه اخترتيه هو

مشاعر بعقلانية: قلت انه يشبه ابوه وخالتي تقول ما عاشت الضيم تحت ظل الفهد ودامك ارتحت تترك النور بين جناح صارم انا ارتحت اختار جسّار

راجح بتأكيد: ذاك شيء وهذا شيء لا تخلطين الأمور يا مشاعر انتي غير والنور غير اذا تبين ارفضهم اثنينهم رفضتهم ترى اهم شيء راحتك انتي

مشاعر برفض: لا ارفض البارق

راجح باستسفسار: طيب فهمت قبولك بجسّار بس البارق فيه نفس الصفات وأعزب ماهو متزوج

مشاعر بمنطق: صح البارق ولد عمي رعود وماراح انضام بس يبه البارق اصغر مني ولا سبق له الزواج اكيد أمه ماراح تتقبلني ومعها الحق ما اقدر اواجهها اما جسّار حتى وهو متزوج زوجته مالها حق تعاديني لأن الشرع محلل له

راجح برفض: ماهو منطق يا مشاعر ان شراك قلبه مالك بأمه

مشاعر بتوضيح أكثر: يبه البارق شاب اصغر مني وأعزب وأكيد رضا أمه مهم عنده ان كأنه ولد رعود وتربيته ماراح يبيع رضا أمه عشان رضاي حتى لو كنت بقلبه ولو سواها انا ما يرضيني

راجح ابتسم وهو يوقف ويترك قبلته على رأسها بفخر : الله يرحم من ربتك يا مشاعر على بركة الله اجل جسّار يا كبر حظه ويا سعده فيك

-بيت آل صارم

كانت النار مشتعلة بصدر رمّاح من الوجع المتوهج من ضرب جسّار ومن حرقة قايد وكلامه دخلت عليه أمه بخوف

أم راجح بخوف: علامك رمّاح جسّار يقول تعبان داخلك برد ما ادري وش يقول

رمّاح بسخرية: برد بعز الصيف الا حرارة يمه بجوفي

أم راجح بخوف: بسم الله عليك يا امي خلك هينا بسوي لك كمادات

رمّاح بتعب وقف على حيله: لا يمه ما فيني شيء بروح لجدي لي معه موضوع لازم نحله

أم راجح بفزع: لا ما تطلع وانت مسخن اجلس ولا دقيت على راجح

رمّاح ابتسم وتوجه لأمه وهو يحط كفها على جبينه : تطمني ما فيني شيء بروح لجدي

أم راجح بخوف: على الأقل انادي لك قايد يشوفك اذا قال ما بك شيء اطلع

رمّاح باس رأسها وطلع من المجلس متوجه لصارم اللي استغرب هدوءه اليوم على غير العادة وصل لبيت صارم بخطواته السريعة وهو يرن الجرس وفتحت له ضوى باستغراب

ضوى بخوف: شفيك

رمّاح ابتسم قاصد يريحها: مافيني شيء وين جدي

ضوى بعدم راحة اشرت للصالة اللي كان جالس فيها صارم وبحضنه نجد تسولف له دخل وهو يجهر بالسلام

صارم : وعليكم السلام والرحمة اجلس

رمّاح جلس وابتسم : وش اخبارها الأميرة

نجد بحزن: ما رحت الروضة

رمّاح ابتسم وهو يأشر لها تجيه : تعالي بقول لك سر

نجد انطلقت لحضنه بحماس لمعرفة السر

رمّاح بهمس بأذنها : بتروحين روضة ثانية احلى من الأولى بس مو الحين طيب؟

نجد تكتفت بعدم اهتمام:ابي مع دان

رمّاح اشر على خشمه: والله ان تبشرين أمري بس

نجد وبدأ الخوف يتسلل لها مرة ثانية : ما يأخذوني صح؟

رمّاح بحدة: اللي يأخذك لازم يحط بحسابه انه سلّم روحه وخط طريق منيته برجوله ما لنا الا نجد وحده ما تروح وعيال صارم وراها

صارم بحدة: ماهو بس عيال صارم يالرمح صارم بكبره وراها

رمّاح بابتسامة : شفتي حتى صارم الله يطول بعمره وراك وش تبين بعد

نجد ابتسمت وما زالت ملامح الخوف خاطفة وجهها وابتساماتها المبهجة

رمّاح اللي تعب من خطواته السريعة : ضوى ولا عليك أمر كأس مويا

ضوى : ابشر تعالي معي نجد

رمّاح ابتسم لها بامتنان لأنها عرفت انه بيتكلم مع رمّاح ونجد عائق قدامه

صارم بهدوء: طلع اللي بصدرك يا رمّاح

رمّاح عقد حاجبينه : جدي كيف عرفت عن خطف نجد

صارم ابتسم: محد يلعب بذيله يا رمّاح حفيدتي وبسأل عنها وادور عليها

رمّاح ابتسم بسخرية: بالاستخبارات يا جدي

صارم بحدة: اجل انتظر اتصالكم الميمون تطمنوني انت وابوها؟

رمّاح ابتسم: للحين عندك معارف بالاستخبارات

صارم ابتسم بفخر: وهي شوي السنين اللي قضيتها اخدم هناك

رمّاح باستفسار: ومن معارفك عرفت ان جسّار يشتغل هناك

صارم ابتسم : من سنين اعرف عن شغل جسّار وادري ان نجد بنتك بالاوراق الرسمية انتوا تخبون تحسبوني غافل عنكم انا صارم لو ناسيين من صارم

رمّاح ابتسم باجبار نفسه : صارم وندري بفعوله بس قايد كيف عرف

صارم ابتسم : بعقله يا رمّاح ما يسهاكم الا الغشيم

رمّاح بامتعاض : عرف أمور ما يجيبها العقل يا جدي

صارم بعدم اهتمام : مافيه شيء يتخبى يا رمّاح المعارف واجد يابوك

رمّاح بعدم اهتمام وبقرارة نفسه قرر انه بيلحق ورى قايد لين يعرف مصدر معلوماته : جدي بقولك شيء

صارم : اسلم

رمّاح ابتسم: من قال سالم يبه انا خطبت

قاطعه صارم بابتسامة: ادري توي مسكر من راجح لو بغض النظر عن روحتك لهم مانيب غاض النظر عن خطبتك لحالك وكن ما عندك أهل

رمّاح ابتسم: هو أجبرني يبه بعدين ما صار شيء اصلًا قال لي لو بتخطب رسمي لا تجي لحالك

صارم ابتسم ابتسامة واسعة : ولا يهون راجح يومين ان شاء الله ونروح لهم نخطب لك البنت موافقة عليك على كلام جدها والله يعينا على أبوها

رمّاح بصدمة عدم الاستيعاب : دقيقة شلون

صارم ضحك بخفة: ماهو انت خطبت البنت وافقت وبنروح لهم نخطب لك رسمي بلغ أمك

رمّاح وقف بفرح : يعني بتخطب لي روح خلاص ما عاد فيه حواجز ولا منفى

صارم ضحك : ما قدامك الا ابوها اذا اقنعته وتراه شين نفس بعد الله يعينك

رمّاح بفرح طق على صدره : ابد عندي بس بمعيتك يا بو سيّاف

ضوى اللي دخلت عليهم بكأس الماي وهي تسمع ضحكهم : وش صاير فرحونا معكم

رمّاح توجه لها وهو يأخذ كاس المويا يشربه دفعة وحدة : تجهزي واشتري لك اللي تبين بعد يومين بنروح نخطب روح

ضوى ابتسمت بفرح لرمّاح : الله يجعله ألف مبروك

صارم بجهورية : ماهو بس روح بنخطب روح لرمّاح ومشاعر لجسّار

جمد وجه رمّاح ولحقته ضوى بالجمود لكن دخول الشغالة الخايفة طلعهم من الجمود أول ما نطقت

الشغالة بخوف: بابا عزّام تعبان ماما فاتن يبكي

رمّاح اللي اول ما سمع اسم عزّام ركض لبيت عمه الملاصق لبيت جده ولحقته ضوى وهم يسمعون صراخ فاتن من داخل البيت

رمّاح بصوت مرتفع حرص انه ما يكون حاد عشان لا يخوف فاتن اللي داخل البيت : سوي طريق يا بنت العم بدخل

ما وصله أي رد من فاتن لف على الشغالة : ادخلي وخذي ماما للغرفة عشان انا يدخل

دخلت الشغالة ولف صارم على ضوى: نادي قايد ورايد يا ضوى

ضوى ركضت لبيت بتّال لكن صادفها رايد اللي كان جاي مستعجل ومسكها من كتوفها : شفيه عمي

ضوى بخوف : ما ادري ما ادري روح ابوي يبيك بنادي قايد

رايد كمل ركض وهو يصرخ فيها: اتصلي يا ضوى اتصلي

ركض وهو يشوف رمّاح بيدخل البيت ابعده عن الباب ودخل للبيت قبله متوجه لغرفة عزام متجاهل كل الصراخ والبكاء دخل الغرفة وهو يشوف عزّام طايح بالأرض جنب كرسيه المتحرك والواضح من تبلل رأسه انه خارج من دورة المياه حط اصبعه على مكان النبض بخوف ارتاح من سمع نبضه وهو يحاول يصحيه دخل قايد بعجلة

قايد باستعجال: ابعد رايد

رايد ابتعد وهو يشوف قايد يفحص عزّام الفاقد الوعي كليًا

صارم بتعب وهو يحس بهبوط: وشفيه يا قايد

رمّاح مسك صارم يهديه وهو يجلسه على سرير عزّام

قايد بهدوء: عطر ابي عطر

رايد توجه للتسريحة وهو يأخذ تولة العود يمدها لقايد اللي طالع العلبه لثانيتين ثم فتحها مسح فيها على كفه بخفيف وقربها شوي لأنف عزّام اللي بدأ يستجيب للريحة

قايد لف على صارم : ضوى خذي جدي للصالة يرتاح لا تخاف مافيه شيء أزمة ضغط خفيفة وهذا هو يستجيب ويصحى اطلع انت ارتاح لا نصير في اثنين

رمّاح ساعد ضوى انهم يطلعون صارم برى ورايد اللي كان يهز رجله بتوتر وقايد اللي كان يحقن عزّام بأبرة وريدية فتح عيونه على اثرها

قايد اللي حمد ربه اول ما فتح عزّام عيونه ابعد براحة : الحمدلله على السلامة

عزّام اللي كان يحاول يتكلم لكن قوته خانته

رايد قرب منه : ارتاح يا عمي كل شيء تمام

عزّام مسك يده بحرص وهو يحاول ينطق لكنه ما قدر ضرب يده على الأرض بيأس

رايد بعدم فهم : ليه ما يتكلم يا قايد

قايد بارتياح : شوي بس وبيرجع يتكلم

رايد بقهر: يبي يقول شيء يا قايد

عزّام بقهر اشر على برى يبي يسأل عن فاتن بنته

قايد بمحاولة انه يفهمه : برى؟

عزّام هز رأسه بتأكيد وهو يأشر على قلبه

قايد بخوف: فيه وجع هينا عمي؟؟

رايد اللي استوعب وبخوف وبكلام غير مفهوم : فاتن خافت حالة صرع

قايد ما استوعب الا انه بنت عمه وارتاح ان عمه مافيه شيء لكن لما نطق حالة صرع رجعت حالة الخوف

عزّام نطق دفعة وحدة: رايد روح لفاتن

قايد طالع عمه بصدمة من طلبه وصدمة من رايد اللي ما عارض وطلع

عزّام بقلة حيلة : ساعدني يا قايد كرسيي بروح لفاتن

قايد استجاب له وهو يتوجه له يحمله على الكرسي لكن لحاله ما كان يقدر على ثقل عزّام نادى بصوته على رمّاح يساعده

-بالصالة

طلع رايد وهو يركض : عمتي وينها

صارم اللي كان مسند راسه على كفوفه : راحت لفاتن

رايد بخوف: صرع؟

صارم هز رأسه مرتين بتأكيد

دخل يده بجيوبه وهو يطلع حبوب الصرع المتواجدة دايم بطلب من عزّام لو حصل مثل هالظرف وركض لغرفتها بمعرفة وهو يسمع بكاء ضوى وصراخ فاتن

رايد بصوت عالي: ضوى تعالي

ولكن ما وصله رد فتح الباب بغضب وهو يتوجه للثلاجة اللي بالزاوية وطلع منها قارورتين ماء اخذ نفس وغمض عيونه ثانيتين وفتحها وتوجه بعيونه للصوت وهو يشوف ضوى اللي ضامه بنت ما لمح الا شعرها الأسود الكثيف وكتوفها اللي ترجف بحدة سحبها من حضن ضوى اللي تبكي ويسندها على صدره وهو يثبت كفه داخل فمها عشان ما تعض لسانها وتتأذى وعينه مركزة على ضوى اللي تطالعه بصدمة مستنكرة وجوده بغرفة فاتن تحمل الوجع لين تهدأ رجفتها وهو يرمي شريط الحبوب على ضوى

رايد بألم: طلعي حبتين يا ضوى

لكن ضوى كانت تحت تأثير الصدمة وما يبي يصرخ ويفزع فاتن اللي يحس بظهرها الراجف على صدره سحب الشريط وهو يطلع حبتين بعد ما فتح قارورة الماء عشان تكون جاهزة سحب يده بخفة وهو يحس فيها تشنجت من كثر ما عضتها حط الحبتين بفمها وهو يطلب من الشغالة تسقيها الماء وهو يحس فيها ترتخي حملها بشكل سريع بدون وتركها على سريرها وهو يطلب من الشغالة تغطيها طلع من الغرفة وهو يحوقل ويمسح على يده صادف عمه على كرسيه المتحرك جايبه رمّاح

عزّام بخوف: هدت؟

رايد هز رأسه بتعب: خذت علاجها بس وش صار لك يا عمي

عزّام بتأنيب ضمير: الظاهر اني زدت الدسم على الغداء والدواء ما جاب مفعول وخوفت بنتي

رايد ربت على كتفه : ما صار الا الخير الحمدلله على السلامة

رمّاح باستغراب: انت طالع من الغرفة ؟

عزّام ابتسم : لا يروح بالك يالرمح رايد زوجها

-عند جسّار

ما سمع كلام رعود وهو يتوجه للمركز بنفسه عشان يسمع التسجيلات دخل بشكل مستعجل وهو يتوجه لغرفة الفريق لكنه ما قدر يدخل

السكرتير : الفريق مُهاب ماهو موجود

جسّار هز رأسه بخفة ومشى وهو يتوجه للفنيين التقنيين

جسّار بجهورية: السلام عليكم

الكل: وعليكم السلام ورحمة الله وبركاته

جسّار باستفسار: وصلتكم اليوم تسجيلات خاصة بخطف بنتي نجد ابي اسمعها

واحد من الموظفين: التسجيلات عند ياسر داخل

جسّار توجه للغرفة اللي دلوه عليها وهو يدق الباب

ياسر بهدوء: ادخل

دخل جسّار وهو يلقي السلام وبعد السلام نطق: قالوا لي التسجيلات معك

ياسر بهدوء: تسجيلات ايش؟

جسّار وهو كاتم غيضه: تسجيلات الأشخاص اللي خطفوا نجد

ياسر ببرود: ماهي معي توجهت لشخص ثاني

جسّار باستفسار: شخص مين؟ سامي؟

ياسر برفض: ما اقدر اعطيك اسامي تشتغل معنا وتعرف القوانين لكن ارتاح التسجيلات بتوصل لفريق مُهاب وبعدها تقدر تتطلع عليها

جسّار بقهر: كيف واللي هينا يقولون التسجيلات معك وسامي قال تعال بكره ونسمعها سوا

ياسر بتعمد: ما عندنا شخص يشتغل معنا اسمه سامي

جسّار باستغراب منصدم : كيف ؟

ياسر بتمثيل لعدم المعرفة : ما عندنا شخص يشتغل معنا اسمه سامي يمكن انت غلطان بالاسم او الشخص هذا من فريق ثاني

جسّار توجه بغضب وضرب الطاولة اللي كان يشتغل عليها ياسر : اسمع انا ما تهمني قوانينكم التسجيلات عند مين عطني اسم

ياسر بعدم اهتمام: ما يطلع مني الحرف لا تحاول بتضرب اضرب

جسّار تركه بغضب: حطيتك برأسي يا ياسر وانت حطني برأسك انا جسّار الفهد لا قوانينكم ولا أي قانون يوقف بوجهي اذا الموضوع يخصني

ياسر ببرود : تفضل روح لفريق مُهاب وقول له هالكلام انا امشي على القوانين وما اقدر اعارضها مثلك

جسّار طلع من المكتب بغضب وهو يصك الباب بشكل قوي وهو يشوف الفوضى اللي انتشرت في المكاتب بشكل غريب

جسّار باستفسار : وش صاير

واحد من الموظفين : فريق مُهاب وولده وصلوا

جسّار ابتسم : حياهم نشوف وش القانون الجديد ومن هو سامي

السادس والعشرين من هنا 

تعديل المقال