رواية اسيرة بين يدي قاتل ابي الفصل السابع عشر17 بقلم نور آل زيادة
سيلين،،، صار اسبوع من طلعت وخلال هل الأسبوع محبوسه بالبيت بأقامه جبريه من سراج ضليت افكر شنو الحل وشلون اتخلص منَه مالكيت غير حل وحيد لازم اسافر ومن استقر بأي دوله اسوي طلب تفريق عن سراج وأخلص منَه للأبد
صرت اخطط بالتفصيل حتى ماانسى شي لكن صدمني سراج من اتصل بيَ وبلغني بعد يومين نعقد محكمه و ورا ثاني يوم مباشرتا العرس
حسيت راح انجلط ماتصورت راح تمشي الأمور بهل سرعه رفضت وطلبت مهله اسبوعين لكن هو اصر واصراره جبرني أسَرع تنفيذ مخططي
بلشت ارتب وضعي المالي وحجزت تذكرتين للسفر لتركيا جمعت ذهبي ومستمسكاتي وكل مقتنياتي الثمينه اتصلت بساره ومن سمعت بتفكيري رفضت انفذ هل مخطط خافت يصير شي ومو جديد هل شي على ساره هي هذا طبعها خوافه
اجوي هي وخاله حاولوا يغيرون رأيي لكن رفضت ودعوني وراحوا وبيوم السفر طلبت من ساره تجي هي وبنت عمها الصغيره بعمر سيف تقريبا طلبت منهم يلبسون خمار وعبايه ثنينهم وتجيب وياها حقيبه يد بس شويه حجمها كبير وحتى تصير بطولي طلبت تلبس حذاء كعب مرتفع لأن ساره اقصر مني
ترددت بالبدايه بس بعدين نفذت اجتي اول ما دخلت للبيت اخذت منها الملابس والعبايه والخمار لبستهن ولبست ابني عباية وخمار بنت عم ساره بالبدايه رفض بس بعدين قنعته وفهمته هاي لعبه وتمثيل فوافق جمعت غراضي المهمه بالحقيبه مال ساره طلبت تكسي الى ان وصل ودعتهم سميه وساره بقن بالبيت وطلبت منهن يطلعن بعد كم ساعه من البيت حتى لنثير انتباه الحرس
اكذب اذا اكول ماحسيت بالخوف اصلا كنت مرعوبه ورغم السوا بيَ سراج ولعبته الوسخه لكن كان خوفي الحقيقي علي أكثر من مايكون منَ خفت يصيرله شي من يسمع وهل شي سوا عندي تردد أتجاه هل خطوه وبنفس الوقت ماأكدر اتقبل اكون زوجه أله صعبه انسى كل شي سوا وأكمل ويا طبيعي وماكان عندي حل غير اخطي هل خطوه
وصل التكسي طلعت وخليت سميه تطلع ويانا علساس تودع الضيوف ألي هُمَ احنا شفت واحد من الحرس يم التكسي يسأله سبب وجوده هنا من شافنا ضل يباوع علينه بنضرات ثاقبه تضاهرت بالقوه حتى مااثير الأنتباه
سميه،،، خير شكو متشوف خطار عدنا شنو هل تصرفات لتجبرون ام سيف تطلع تسويلكم هوسه عيب هل تصرفات
سيلين،، اعتذر وراح واني بسرعه صعدت ابني وصعدت مشت السياره واني صار جسمي كله يرجف من التوتر ضليت كل شويه اندار اشوف اخاف احد لحكنا
اتنفست براحه من تأكدت كدرت اتخلص منهم طلبت من السائق يوكف السياره انطيت كروته نزلت اشتريت كم قطعه ملابس ألي ولسيف واحتياجاتنه الشخصيه الضروريه طلعت اجرت تكسي ثاني وتوجهت للمطار رغم مخططي نجح لكن كان اكو خوف بداخلي بدى الخوف يروح من شفت لافته مكتوب بيها طريق المطار اتنفست براحه لكن مع الاسف مااستمرت هل راحه غير ثواني
سمعت اصوات هورنات سياراة عالي صارت سياره كدامنا ووحده بجانبنه والثالثه ورانا ماابالغ اذا اكول حسيت نفسي بفلم اكشن اول مره بحياتي اعيش هيج تجربه ولو احد حاجيها ألي يمكن استهزء واضحك لكن مع الاسف بالحقيقه هل موقف مرعب اكثر من ماهو يضحك طلبت من السأئق يستمر ويوصلني للسيطره لكن السائق خاف مع الاسف ولهذا استسلم وتوقف بسرعه قفلت الباب ألي يمي رفعت راسي وشفت سراج جاي بأتجاهي وشكله يوحي انو راح ينفجر عيونه حمر دم جر الباب يفتحها ماانفتحت عاط بيَ
سراج،،، افتحيها ياغضب الله اليوم انعل صفحة الخلفوج بس انتضريلي،،،، افتحيييييييي
سيلين،،،صار يعيط،،، ماوافقت افتح الباب رجع طلب من السائق يفتح الأبواب وهذاك الجبان بكل بساطه استسلم ماقاوم نهائيا بس كال
السائق،،، عمي اني صاحب چهال لتورطيني وياكم انزلي وروحي حتى كروه مااريد بس چفوني شركم
سيلين،،، بكل بساطه مااريد كروه وكأنما حياتي واقفه على فلوس الأجره يريح ضميره بهل كلام وماكلف حتى نفسه يسأل شصاير ويايا ولاهذولَ منو ألي مبين من وجوهم ناويلي الشر
فتح الباب سراج وجر ايدي بغضب سحبتها منَه بقوه وعطت بي،،،،،
_ عوفنييييييي،،،، كتلك مااريدك ليش تجبرني افهمممم يابشر اكرهك مااريدك عوفني بحالي وروح
سراج،،، اليوم راح اخليج تعرفين منو سراج كل السويتي وسكتتلج ولهذا تماديتي اليوم اعرفج شنو معنى تلعبين عليه ولج بكد القن*** انتي وتلعبين عليه وتركضيني وراج واني زلم مشوربه تحسبلي ألف حساب
سيلين،،، ماسمع لكلامي جرني بقوه حسيت ايدي انخلعت عطت متألمه لكن هو مااهتم طلعني من السياره ضليت اعيط وادفع بي ومن اسوي هل شي هو يزيد غضبه عافني اتصورت صار عنده احساس وراح يتركني لكن صدمني من اشر لواحد من جماعته ياخذ سيف ركضت على ابني اخذه لكن كان هذاك اسرع مني سحبه قبلي واخذه للسياره رحت عليَ جرني سراج تكلم وهو ضاغط على اسنانه
سراج،،، تمشين مثل الحبابه ويايا وألا متشوفين ابنچ بعد انتي اختاري
سيلين،،، انتَ شوكت صرت عصابچي وتخطف وتهدد شغيرررررك فهمني؟
سراج،،، الحياة والناس علمتني القسوه وانتي اخر وحده تحجين لو اموتج بيدي قليل امشي واحترمي نفسج واذا تريدين تسافرين هذا طريق المطار كدامج وابنچ انسي
سيلين،،، انت واحد حقييييييير،،، شيطان،،، مجررررم،،،، نكسسسس،،
سراج،،، هسه اشوفج المجرم والنكس شراح يسوي
سيلين،،، سد حلكي وجرني اباوع من بعيد اكو سيطره قبل طريق المطار لو قريبه عليه چان ماكدر يسوي شي صعدني بسيارته وابني بغير سياره داخلي يغلي غضب نسيت حتى المشاعر كلها داخلي مابي غير الحقد والغضب اتجاه سراج صرت اشوفه شيطان كرهته اكثر من كرهي لثامر الطريق كله يغلط ويتهدد عليه واني مطنشته وهل شي يزيد غضبه تصورت راح يرجعني لبيتي لكن اخذني لبيت ثاني وقف السياره ونزل وفتح الباب ألي بجانبي. وجر ايدي بغضب عطت بي
_ويييين ابنييي؟؟ ويننن وديته،، احجي؟؟
سراج،،، انسي ابنج بعد انزلي بسرعه قبل لااسوي شي ميعجبج
سيلين،،، عت ايدي للمره الألف احسها انفصلت من مكانها دخلني لبيت صغير بس مرتب دفعني وكعت على الأرض ايدي احسها انخلعت من شمرته عاط بيَ..
سراج،،، انيييييي ولج انيييي تلعبييييين عليه زلم فوك راسج خليت،، استغفلتيهم وين احطج بعد واخلص من بلاويج
سيلين،،، مامجبور
سراج،،، اي صدك اول مره تحجين ضميرج صدك مامجبور اتحمل تصرفاتج ولهذا راح ابقيج هنا وحدج
سيلين،،، شنو وحدي هو سجن انفرادي ليش هيَ سايبه الدنيا بأي حق هذا ألي تسوي
سراج،،، بحق انتي صرتي من هل دقيقه اسيره عندي
سيلين،،، ههه،،، احلام العصر ضل احلم
سراج،،، هسه نشوف احلم لو لا
طلع وقفل الباب لاعيطت ولاضربت الباب ولاسويت اي شي من هل الدراما لأن اعرف هل شي ماراح يفيد سراج اخذ قراره وانتهى لوى ذراعي بأبني ونجح
ماندمانه على السويته لأن كان المفروض احارب لأخر لحضه وحتى هسه بداخلي اكول ماانتهت الحرب اكيد راح اكدر اسوي شي كلام اردده ويا نفسي حتى اقنع نفسي وانطي لنفسي القوه لأن بطلت انهار واستسلم من زمان
ورا ساعه رجع دخل وبأيده اكياس خلاهن على الميز كان شكله اهدء وريحة الچكاير بي قويه بعد امتار اكدر اشتمها
بكل برود كال...
سراج،،، بعديومين العرس قبل ساعه قررت اخذج لبيتنا بهذا وضعج بس سيطرت على نفسي حتى مااسويها
سيلين،،، چنت انتَ اكثر شخص يحجي بالكرامه هسه وينها كرامتك من وحده رافضتك وانتَ تجبرها عليك
كلت هل كلام لوصحيت الشيطان البداخله اجى بسرعه البرق عيونه حمر ودمراته برزت خنكني بقوه حسيت روحي راح تطلع من أختنكت عافني ضليت أسعل حسيت راح اموت
سراج،،، اجيتي لمكتبي تشتغلين ماوصلت يمج ولاجبرتج على شي بس من تلعبين عليه وتريديني اعوفج فهذا حلم تعرفين شنو حلم،، حلم اعوفج كتلج ماميت عليج بس موسراج ألي ينلعب ويا الأقرب منچ والأعز حاسبتهم على اذيتهم ألي مو انتي بالتالي تجين تلعبين بمشاعري وتغدريني وتريدين اسكتلج
سيلين،،، وخررررر عنييييي افهم مااريدك عوفني اني وابني
سراج،،، فات الأوان وحسابج ثكل وهل مره اقوى من كل مره لتتوقعين اسكت واعوفج بعد السويتي تنهزمين مني وانتي على ذمتي يمكن قبل لااعقد عليج بيها مجال اعوفج بس هسه لوتموتين كدامي بعد مااعوفج موتالي عمري تجي وحده مثلج تريد تنزل راسي وتسويني مضحكه بين الناس
سيلين،،، ماسويت شي و طبيعي انهزم منك انتَ جبرتني عليك وكتلك مااريدك
سراج،،، وطبيعي بنضرج من الناس تسمع زوجة الشيخ سراج انهزمت منَه قبل عرسهم بيومين؟
سيلين،،، كتلك انتَ جبرتني عوفني بداعت بناتك خليني اخذ ابني واروح
سراج،،، هاي صار ثالث مره تغدريني ولتتوقعين اعوفج قبل مااحاسبج على كل شي
سيلين،،، كاااافي،،، كافي تعيش دور المضلوم ليش انتَ موغدرتني مو تزوجت بنت عمتك موعشت حياتك لو بس عليه كادر كل مره افكر اصفي النيه وياك واسامح ترجع تأذيني ترجع تزيد الحقد بداخلي عليك
سراج،،، ليييييش اننننننتي موتزوجتتتتتتتي مورجعتتتتتي مره ثانيه انخطبتي لواحد ثانيييييي لو بس اني تزوجت؟، كل هاي اعذار كلها اعذار كافيييي
سيلين،،، صيح وعيط وكسر طلع كل غضبه واني ساكته اباوعله خلص وكال
سراج،،، تبقين هنا واريد من الله تسوين هل مره دگه ناقصه حتى احسب الله ماخلقج،،،، يومين وراها العرس تجين لبيتي حسج مااريد اسمعه انتي موتكولين مااريدك اني هم مااريدج زواجنه شكلي كم شهر واطلكج وراها وين متولين ولي
سيلين،،، وشكو هل زواج اساسا؟
سراج،،، اكسر خشمج بي لاازيد ولا اقل واشوفج شنو معنى تلعبين ويايا
سيلين،،، ابني وينه جيبه يمي ترا سيف يخاف بدوني
سراج،،،لتخافين علي خليتهم يودوا يم سميه ووصيت الولد يضلون يمهم ورا العرس تشوفي ولغوه زايده مااسمع جيبي الموبايل وهذا اكل جبت اكلي وسكتي
سيلين،،،اخذ الموبايل مني سألته .... اهلك يدرون بكل هل شي؟
سراج،،، كل شي ميدرون وهل شي احسن ألج قبل ليكون ألي
سيلين،،، وشلون تسوي عرس وهم ميدرون؟
سراج،،، معليج هل سالفه يمي ابقي هنا واسكتي
سيلين،،، قبل ليطلع كال...
سراج،،، صدك نسيت اكلج لتعبين نفسج ولتشغلين عقلج العبقري وتخططين تنهزمين لأن خليت حرس برا وهل مره بيهم خير مومطايه مثل القبلهم
سيلين،،، شلون لحكتني وشلون وصلتلي؟ خزرني و عافني وطلع وقفل الباب
كعدت افكر شنو راح اسوي طلعت من الملابس ألي اشتريتهن غيرت ملابسي شغلت التلفزيون لأن البيت موحش ضليت ساعات افكر بحل لكن الضاهر ماكو حل مجبوره اتحمل
من البدايه قررت انتقم وكان المفروض اعرف هل قرار نهايته موزينه بس حقدي ماخلاني أفكر صح ركزت بس بهدفي ونسيت موكل شي نخططه ينجح وأذا نجح مودائما القدر والحياة توكف ويانا
وحتى أتقبل الوضع ألي أنفرض عليه ضليت اقنع نفسي واردد... شبيج سيلين كال فتره ونتطلك يعني زواج شكلي حتى يرجع كرامته بعد شكو ضايجه المهم انتقمتي منه وحرگتي گلبه لاوالله موبس حرگت كلبه مبين مطيحه حض حضه بس ميعترف مسوي نفسه مسيطر ومابي شي يمثل عليه دور البارد والقاسي وأني اعرفه شكد ضعيف امامي بس ياخوفي يطلع ميمثل ويطلع صدك ناويلي نيه كشره،
، هو صح كال فتره واطلك بس ماكال خلال هل وقت شنو ناوي يسوي بيَ اوووووه،،، قابل شيسوي ليش هو يكدرلي خصوصا بنص اهله واضح كلش هو يهتم لصورته كدام الناس و كدام اهله فأكيد يحسب حساب لكل فعل يسوي حتى ليعرفون
مر الوقت والساعات واني اقنع بنفسي حتى اتقبل الوضع ألي انفرض عليه لأن اذا مااسوي هيج الأكيد افقد عقلي كل شي اتحمل بس مااتحمل شي او شخص ينفرض عليه وهاي اسوء صفه يملكها الشخص المتمرد
صار الليل ماانتبهت للوقت بالي يم سيف وبنفس الوقت گلبي مرتاح علي لأن يم سميه هي امه الثانيه
حسيت بالجوع فتحت الأكياس لكيت بيها اكل ومعلبات وحلويات وعصائر ومي هذا كل عقله اكل هل اكل كله سعرات الحمد الله من لكيت من ضمن الأكياس جايب تكه شَوي طلعتها وأكلت نمت بمكاني فزيت نص الليل باوعت من الشباك لمحت الأشخاص الخالهم سراج برا بالكراج كاعدين يدخنون ويسولفون صح ضايجه من وجودهم بس بنفس الوقت حسيت بالأمان على الأقل مااضل وحدي بيت غريب اصواتهم وسوالفهم تحسسني بالأمان
ضليت كاعده وأفكر الى ان سمعت آذان الفجر توضيت وصليت شغلت التلفزيون تابعت فلم اجنبي خلص تابعت الثاني مر الوقت بشكل ممل صارت ساعه ٩ صباحا سمعت صوت قفل الباب عرفت سراج إجا من عطره سويت نفسي مامهتمه دخل سلم مارديت ضل واكف يباوع عليه قطعت الصمت وكتله
_صفنتك مطوله؟
سراج،،، لسانج الزفر راح يجي يوم اگطعه بأيدي
سيلين،،، زين،،، لعد لتقصر
سراج،،، اصبحنا واصبح الملك لله وين جنتي ضامه هل صلافه قبل لو هم جنتي تمثلين عليه؟
سيلين،،، تعلمت التمثيل منك شيخ روميو (غمزتله بعد اخر كلمه) تصورت كلمتي استفزته لكن ضل صافن عليه بشكل مطول رجعت غمزتله وكلت.... ها شبيك؟
انتبه لنفسه دار وجه وهمس بصوت ناصي لكن سمعته
سراج،،، جريئه وحلوه
سيلين،،،شكلت لوماعندك جرئه ترفع صوتك ؟
سراج،،، كلت اعوذ بالله من الشيطان الرجيم والله يعدي هل يوم على خير
سيلين،،، راح للميز شاف الأكياس مال الأكل على حالهن
سراج،،، ليش ماماكله كل شي على حاله اخاف نفسج انسدت من الخوف؟
سيلين،،، ههه،، خوووف؟؟؟ وليش اخاف؟؟
سراج،،، نسيت انتي صلفه وعينج گويه
سيلين،،، ونسيت تكمل وتكول اني حلوه وجريئه هم
اندار مصدوم عرف سمعته رفعتله تك حاحب خزرني وكال
سراج،،، كومي اكلي لتموتين وأبتلي بيج قبل العرس
سيلين،،، مااكل هل الأكل كله سعرات
سراج،،، مممم،،، نسيت حضرت الكونتيسا تخاف على قوامها الممشوق
سيلين،،، ههههه،،. اهم شي قوامي وانتَ اهم شي عندك العرس
تقدم بخطوات بطيئه اتجاهي
سراج،،، طلعتي من تكعدين الصبح مزاجج حلو ووجهج يضحك زين بدايه مبشره بالخير همزين بيچ صفه زينه
سلين،،، اي الحلو حلو لويكعد من النوم
سراج،،، ياغرورج،،، بس لتخافين ماضل شي واكسر هل غرور وهاي ابتسامتج احولها الى حزن واستهزائج احوله الى هم وغم
سيلين،،، صار بداخلي خوف من كلامه لكن قويت نفسي وكتله
_ كل شي منك حلو سراجي وعلى گلبي احلى من العسل
كلت هل كلام مجرد استفزه لكن ماتصورت الأمور تطلع عن السيطره اجى بسرعه لزم فكي بقبضة ايده حسيت راح يطك وكال بعصبيه
سراج،،، لتتوقعين بعد اصدك كلامج المعسول ولانضراتج البريئه ولاراح ارجع اوكع بشباكج وكلمة سراجي مااريد اسمعها بعد لأن تذكرني بلعبتج الوسخه،، انتي شيطان بهيئة انسان كشفتج وبعد مااتأثر بكلامج
سيلين،،، دفعته بقوه ابعده عني وجاوبته بعصبيه
_ترا كلامي مجرد استهزاء لتصدك روحك وعبالك ادلعك انتَ كلتها التمثيليه وخلصت والأقنعه وكعت كلها وديربالك مره ثانيه تتمادى ويايا حتى لتشوف وجه الشيطان الحقيقي
خلصت كلامي خزرني وطلع
عوذه وجهه يلطم من الصبح اجى غثني وراح
اليوم كله بعد ماشفته متت من الجوع وهل الأكل مااكدر اكله موبس اخاف على رشاقتي وأنما صار سنين معلمه نفسي وجسمي على نضام اكل معين واعرف اذا خربطت اكلي معدتي تتخربط واضل ايام اعاني وهل شي صار بسبب أصابتي والسوا بيَ ثامر
تعبت وچعت وضليت صابره لأن اذا آكل هل الأكل أتخربط لكن اخر شي باليل ماتحملت انعل ابو الكرامه راح اموت من الجوع فتحت شباك المطبخ وصحت الولد إجا واحد منهم
___ محتاجه شي
__ اريد عشا
__ بس الشيخ جابلج اكل
__ انتو جايبيني هنا تموتوني لوشنو بالضبط خابر على شيخكم وكله ام سيف تريد عشا وخلي يجيب اكل صحي
ابتعد ورفع مبايله اتصل على سراج رجعلي والجهاز على اذنه
__ الشيخ يكول عندج اكل اكلي
سيلين،،، افتح سبيكر خلي احجي ويا
__ بس هو ميكدر يحجي عنده شغل
سيلين،،، الشغل مواهم مني
باوعلي مستغرب كلامي وأوامري تقدم صار قريب من الشباك و فتح سبيكر
سيلين،،، وين انت َ
سراج،،، احجي شتريدين بس فضيني بسرعه عندي شغل
سيلين،،، شغلك مواهم مني،، شلون تروح وتعوفني جوعانه وتعرف هل الأكل ماآكله بعدنا بسم الله وهيج تعاملني شلون شيخ انت َوعايف اهل بيتك جوعانين
سراج،،، لااله ألا الله،،، الصبرررررر ياربييييي الصبر منك
سيلين،،، شبيك شسويت حتى تصيح عليه؟ اني انسانه وطالبت بأبسط حق من حقوقي شنو تزوجتني حتى تموتني من الجوع؟ ياحضي هو هذا انتقامك اني سامعه الشيوخ يصيرون كرماء عليمن انت طالع بخيل؟
سراج،،، ياغضب راح اجي اموتج لسانج منا الولد هسه ادزلج زقنبوت اتزقنبي وسدي حلكج
سيلين،،، جيبلي شاورما بس مولفات ماآكل ڠلوتين واريد مقبلات وببسي دايت وفواكه
سراج،،، اكو بعد اوامر اخرى؟
سيلين،،، سلامتك ابو سيلين الورده،،، هاا تذكرت جيبلي كرزات اريد اسهر على فلم عرض جديد اول مره بس لتتأخر جيبهن وتعال
سراج،،، مااجي الولد يجيبوهن ألج ولو متستاهلين
سيلين،،، جىء،،، جىء،،، جىء، مامرجي منك هل كلام اذا عروس الشيخ سراج متستاهل منو لعد يستاهل غير آكل واداري صحتي ورايا عرس
سراج،،،، مممم هيج الكلام صار،،، من الآخر اطلعيلي بالنضيف شنو فلمج هل مره؟
سيلين،،،جيب الأكل وتعال اكلك شنو فلمي بالتفصيل الممل
سراج،،، مااجي
سيلين،،، ابو سيلي،، تجي وراح انتضرك
كلت هل الكلام وغلقت الشباك ورحت للصاله كعدت ههههه اكثر شي يستفز سراج شخص يتأمر علي متأكده راح يجي وصدك ساعه ونص سمعت صوت الباب دخل باوعت عليه لابس زي عربي الحقير طالع يخبل بي
درت وجهي قبل لينتبه لنضراتي سلم وخلا الاكياس على الميز باوع عليه بغضب
سراج،،، انتي شلون تتأمرين عليه وكدام واحد من رجالي؟
سيلين،،، ماتأمرت،، طلبت اكل وهذا حقي
سراج،،، لتلعبييييبن،،، بالكلااااااام وتغشمين نفسج وبطلي استفزاز انتي شنو من بشر لاتنلزمين ولا تخافين اذا العرفتيهم بحياتج عافوج على راحتج اني ناوي اعيد تربيتج من جديد
سيلين،،، اي والله ياريت لأن اني يتيمه وماكو احد ورا بابا علمني
اجاني بغضب جرني من ثوبي يعت بيَ
سراج،،، شنو صل صلافه والرعونيه شنو انتي متنردين ولاتخافين؟
سيلين،،، ليش المفروض اخاف؟
سراج،،، اي خافي اني بنفسي اگلج خافي مني لأن ناويلج نيه گشره
سيلين،،، شكرا على النصيحه بس ماكو سبب يخليني اخاف الانسان يخاف من الموت او يمكن من الضرب واني بالنسبه ألي متت قبل ١٠ سنوات والأنسان ميموت مرتين
ضل يباوع مركز ويايا ضيق عينه ابتعد
سراح،،، عوفينه من الفلسفه شتريدين كلتيلي تعال
سيلين،،، مشتاقه لحبيبي واريد اشوفه
اندار مصدوم من كلامي بلع ريقه بتوتر وكال
سراج،،، كافي تفاهه احجي العندج اريد اروح عندي خطار بالبيت
سيلين،،، شنو التفاهه بكلامي مشتاقه لأبني حبيبي واريد اشوفه
سراج،،، هااا قصدج سيف؟؟
سيلين،،، رفعت تك حاحب وجاوبته...
_ ليش منو عندي حبيب غيره؟
سراج،،، اي مو اكول
سيلين،،، اتصل على سميه اريد احجي و اشوفه لأبني
سراج،،، جايبتني مناك لهنا علمود هل شي؟
سيلين،،، لااكيد اخلص اتصال واريد اتناقش وياك بموضوع
سراج،،، راح امشي كل سوالفج حاليا بعدين اطلعهن من عيونج الصلفه وحده وحده
سيلين،،، وينطيك گلبك تأذي عيوني ألي تحبها زمرداتك
ضل يباوع بعيوني ل لحضه حسيته تاه بعدين وعى
سراج،،، مامرتاحلج
سيلين،،، ليش شمسويه؟
سراج،،، اقسم بالله صرت حتى من تضحكين اشك وراج مصيبه
سيلين،،، لتشك،، تأكد
سراج،،، هل مره طلقه براسچ واخلص منچ
سيلين،،، تسويلي فضل اموت شهيده وانتَ تكمل باقي عمرك بالسجن اكو اجمل من هل شي
سراج،،، يالكائنات كافي،،، اسكتي،، من شوكت هيج صرتي لغويه وگراره واستفزازيه؟ اكلي خلي نتصل على سميه،، فضيني
سيلين،،، لا بعدين اكل خل نتصل الأول
اتصل على سميه حجيت وياها واطمئنيت على سيف وصيتها علي اخر شي فتحت كام شفت ابني وحجيت ويا شكل الأمور يمه تمام بعد مااطمئنيت نهيت الاتصال
سراج،،، وهسه خلصتي راح اروح
سيلين،،، لا لتروح خلي نتعشا واريد احجي وياك بخصوص العرس
سراج،،، عندي خطار منتضريني على العشا وانتي تريدين سوالف ماألها لازم ترا للان مطول خلك وياج شلون متحملج مااعرف والمفروض من البارحه گاتلج خلاص وخلصان منچ
سيلين،،، اولا خطارك مو اهم مني وثانيا أذا موتتني منو تزوج
سراج،،، هواي واثقه بنفسج ديربالج ترا الثقه الزايده مو زينه
سيلين،،، طالعه على زوجي العزيز
سراج،،، لتجيبين اسمه لااطيح حضج
سيلين،،، ليش مااجيب اسمك غير اني مرتك
سراج،،، ممم،،، قصدج اني؟
سيلين،،، ليش حاليا منو غيرك اني على اسمه
ولأن اني زوجتك امام الناس يعني امثلك ولازم امثل صورتك بأفضل طريقه صح لو اني غلطانه؟
سراج،،،اي كلش مهتمه لصورتي لهذا أنهزمتي،،،أحجي من الأخير شتريدين؟
سيلين،،، فرضت عليه هل زواج وكل شي بس اكيد اني هم عندي شروط وطلبات بصفتي العروس
سراج،،، ماألج يمي لاشروط ولاطلبات يمكن قبل يومين بيها مجال بس من انهزمتي مني خلصت كل فرصج وضاعت كل حقوقح يمي
سيلين،،،كول اني بخيل ومااريد اسويلج عرس
سراح،،، يجتمعون اهلي وكرايبي واسوي عشا وانتهى الموضوع
سيلين،،، موجديده عليك من تخلف بوعودك
سراج،،، لتختبرين صبري احسن ألج
سيلين،،، قبل وعدتني تسويلي احلى عرس وماوفيت وهل عرس سويته لبنت عمتك
سراج،،، كتلج ماضل ألج يمي اي حقوق
سيلين،،، زين لعد،،، عادي وشنو يعني الباچر تعال اخذني بهاي ملابسي واخليك مضحكه كدام الناس
سراج،،، سويها واخليج تطلعين منا جنازه مو عروس وكولي سراج ماوفى بوعده،،، اجيبلج فستان ابيض لبسي وسكتي هو مجرد عشا نعلن بي زواجنا
سيلين،،، وداعت ابني اسويها لو اعرف تموتني ومااكتفي بهل شي كدام اهلك وگرايبك اكلهم مغصوبه وأكلهم خطفني واسويلك فضيحه بنص گرايبك
سراج،،، اذا عبالح بهذا كلامج تلوين ذراعي فمعناها بعدج متعرفين سراج
سيلين،،، ولأن اعرفك اعرف المفروض متخلي شخص يتشمت بيك لأن صورتي امام گرايبك تمثلك اذا صورتي زينه الناس راح تكول الشيخ سراج عرف يختار واذا لا نصير مضحكه كدام الناس وخصوصا الاشخاص ألي من زمان مارادوني ورفضوا زواجك مني بالتحديد
زواجنه شكلي وبينا مشاكل وصراعات هذا الشي بينا المفروض يبقى لكن امام الناس احنا ازواج سعداء امثلك بأفضل صوره وتمثلني بنفس الشي بالنهايه انتََ شيخ وألك محبين وعندك اعداء وشمات منتضرين عليك غلطه والمفروض اني مااصير هل غلطه اذا متسوي عرس معناها متزوجني چفيان شر زوجه والسلام لكن العرس وفرحتك بيَ كدامهم تخلي الشمات يرجفون منك
وهذا أفضل رد أعتبار ألك
طول كلامي هو مركز ويايا حسيته اقتنع بس كبريائه يمنعه يعترف كلامي صح كام وكف
كال...
سراج،،، يصير خير منا للباچر اني ومزاجي
سيلين،،، على راحتك بالنهايه المعازيم اهلك وگرايبك وانت َ ألي تتفاشل وياهم اني ماعندي شي اخسره
كلت هل كلام وكمت على الميز كعدت طلعت الأكل وبديت آكل ضل واكف يباوع عليه كتله
تفضل تعال اكل ويايا،،، ماجاوب عافني وطلع وقفل الباب
ابتسمت متأكده راح يوافق هو شيخ ومحامي ناجح وصورته مهمه خصوصا هو يعرف گرايبه اكثرهم حاقدين ورافضين زواجه وبالتحديد مني مو من صالحه يعرفون الخلاف البينا
كل السويته ماميته على العرس ولاحتى رايده هل زواج من الأساس لكن زواجي منه شر لابد منه مجبوره أستسلم لهل زواج ومطﻤئنه فتره وننفصل هو مجرد رايد يرد اعتباره بعد مارفضته ورحت انخطبت لغيره اما اني فكل ألأسوي حتى اثبت وجودي واحترامي بنص اهله وگرايبه من اول يوم اذا احترمني وسوالي عرس وقدرني امامهم هل شي راح يخليهم غصب عنهم يحترموني اما اذا حسوا بينا مشاكل وعرفوا ضروف هل زواج راح يحتقروني ويصيرون يعاملوني بأبشع صوره اريد اطلع بأفضل شكل بحيث اخلي كل شخص رفضني قبل وشافني مومناسبه لسراج يحترگ اريد ادخل لبيتهم معززه مكرمه مثل مااجوي لبيتنا وحقروني قبل اريد ادخللهم واني رافعه راسي احرگ گلوب الكل من اكون الشيخه زوجة الشيخ
خلصت عشا ولميت الأكل كعدت تابعت فلم نصه ونعست غفيت بمكاني شفت بالمنام ثامر اجاني خنكني صرت ارافس جوا ايده ضاق تنفسي
ثامر،،، انتي عبالج اني متت وراح تتزوجين غيري اموتج ومتصيرين لواحد ثاني انتي ملكي ألي اني وبس
صرت اصرخ وادفعه حتى يبتعدصار يمارس ساديته عليه ضربني ضرب مبرح وبعدها تقدم يريد يعتدي عليه هنا انجنيت صرت اصرخ واضربه وفزيت
ضليت اباوع على المكان الآني بي خايفه حمدت الله هذا مجرد حلم جسمي كله يرجف صرت اخاف انام ليرجع يتكرر الحلم ضليت للصبح كاعده بمكاني هاي اول مره اشوف ثامر بالمنام كان شكله مرعب
ساعه ٨ صباحاسمعت صوت طرق على شباك المطبخ رحت فتحته طلع واحد من الولد
__ صباح الخير
سيلين،،، صباح الخير،،، خير اكو شي؟
_ الشيخ اتصل ويريد يحجي وياج
سيلين،،، اتصل علي وفتح سبيكر اجاني صوته
بدون مقدمات مباشرتا تكلم
سراج،،، راح يجن عليج بنات ووياهم مره چبيره
سيلين،،، منو هذوله؟
سراج،،، بنات طلبتهن من مركز.... يجهزنج للعرس
سيلين،،، وبدلة العرس؟
سراج،،، راح يجيبن وياهن كم بدله انتي اختاري منهن
سيلين،،، ومنو يكول يعجبني يجوز موحلوات
سراج،،، لتخافين اعرف راح تتحججين ام الماركات لهذا شفتلج البدلات من افخم محلات بغداد اختاري بدون حچچ وكلمه زايده ألغي كل شي
سيلين،،، بلغت سميه تحضر سيف وتعزم ساره وامها؟
سراج،،، ليش؟
سيلين،،، غير عرسي وهل اشخاص اهلي اروح وحدي واخلي الناس تضحك عليه وعليك موكافي اهلي ميدرون شي
سراج،،، ليش همه اهلج يدرون عنج تبروا منج وبعد ماسألوا،، ليش هذوله هم تسميهم اهل
سيلين،،، مامجبور تتزوج وحده ماعدها اهل
سراج،،، سدي هل سالفه كدام اهلي وكرايبي اهلج مهاجرين خارج العراق وام ساره خالتج هيَ وبتها راح اتصل بسميه تبلغهم
سيلين،،، عندي طلب اخير
سراج،،، اليوم طلباتج متخلص
سيلين،،، غير عروس وادلع على عريسي سكت ماسمعت غير كلمة،،،، اووووف
_امانه لتطلع الزفه من هذا البيت
سراج،،، لعد مين تريدين اطلعج من بيت زوجج السابق حتى اصير مضحكه
سيلين،،، هذاك البيت بيتي وماكو شخص من اهلك يعرف هذا كان بيت ثامر مثل ماراح تطلع فلم يخص اهلي تكدر تسوي نفس الشي على البيت
سراج،،، همج البيت لو تتباهين
سيلين،،، وشكو بيها بالنهايه اني زوجة الشيخ سراج
سراج،،، وصورتي من صورتك فهمت هل الاسطوانه،، تمام موافق بس ياسيلين وحق من انزل القرآن وروح ابويه اذا طلع ورا هذا كله فلم جديد انسي ابنج بعد طول العمر اخليج تتحسرين على شوفته
سيلين،،، لتخاف البينا اتفاق نفذت شروطي اني هم انفذ شروطك وخصوصا وأحنا اتفقنه هذا زواج شكلي صح لوتغير الكلام
سراج،،، ماتغير كتلج فتره ونطلك،،، زين لعد رايح اني واذا اكو شي بعد كولي للمره الراح تجي وهي تبلغني
سيلين،،، منو هيَ؟
سراج،،، وحده متعرفيها اني اعرفها ومتخص اهلي غريبه عنهم،، يله اني رايح عندي هواي شغل من وراج تورطت بعرس وجيب ألي يفضها
سيلين،،،، اعتبره عرسنه الأول
سكت تنهد بعدها كال اذا ماكو اوامر اخرى خلي اروح لشغلي
سيلين،،، مو امر وأنما طلب
سراج،،، ياسالفة الطلبات المتخلص
سيلين،،، اريدك تلبس زي عربي اليوم،،، يعجبني عليك
حسيت بأرتباكه حتى وهو بعيد جاوبني
سراج،،، احمم،،، زين،،، افكر
سيلين،،، نهينا الأتصال فتت سبحت وطلعت الحمد الله قبل فتره قصيره بخطوبتي من سردار رحت للمركز سويت ليزر فول بدي ونضاره وتنضيف للبشره وصبغت وخصلت شعري اني مااحب اغير بشكلي شي كل معالم وجهي طبيعيه مجرد ترتيبات ورتوش تحافض على بشرتي
لميت اغراضي الجبتهن ويايا وحضرتهن حتى ماانساهن ساعه واجني البنات دخلوهن بعد السلام بلشت اختيار البدله عجبتني وحده شكلها مال اميرات دزني بسيطه وقماشها فخم بنفس الوقت اختاريت وياها تسريحه بسيطه يبقى بيها نص شعري مفتوح واختاريت الميكئاب هادء لبناني ميلوكلي الأوڤر واختاريت تاج ملكي فخم
بدن يشتغلن بيَ وحده للأضافر والشعر والثانيه ميكئاب والمره العجوز كاعده صافنه علينه شنو وجودها مااعرف ولا ليش مااعرف واضح دازها جاسوس توصله شنو اسوي،،، هههه المسكين خليته يخاف من خياله
ساعتين وماخلصن جابولنا غدا تغدن واني بدون ريوگ للان اباوع هل الأكل مااكله شكد حقير متقصد هل تصرف بعدني ماكملت رن جهاز العجوز جاوبت طلعت ورجعت بيدها صحن مشكل مشاوي ومقبلات فشلت من نفسي شلت غيبته طلع ماناسيني اكلت شويه ورجعنا كملنا شغلنا
ضهري تكسر من الكعده خلصن باوعت على نفسي النتيجه حلوه وفخمه من اول عرس ألي ويا سراج كنت مخططه اطلع مثل الاميره وماتحققت هل الأمنيه حتى من تزوجت ثامر اما اليوم صح رافضه هل زواح بس على الأقل مابقى هل حلم حسره بگلبي حققته اباوع على نفسي بالمرآه فعلا طالعه مثل الأميرات ألي بالحكايات
اتصلت العجوز بسراج دقائق وطلعنا من البيت بعد مابلغهن يلفوني بالكاب زين وعينهم عليه
هههههه يخاف اهرب واني بهل بدله واصير العروس الهاربه
وصلنا لبيتي دخلو السياره للكراج ونزلوني كانت بأنتضاري سميه وساره وخاله استقبلوني ودموعهن بعينهن خطيه خايفات ومقهورات عليه ضلن يسألن اذا سوالي شي بعد السويته،، ابتسمت بوجهن شفتهن استغربن بس سكتن على ردت فعلي ابني يباوع مستغرب ألا صحت اسمه يله اجاني يركض حضني كلت هسه يبچي ويلطم ويكول لتعوفيني بعد وتصير درما لكن الأستاذ قضى على كل توقعاتي من كال
سيف،،، هاي شنو طالعه تخبلين احلى عروسه شكد حلو من اكبر اكول للكل اني جنت موجود بعرس ماما
سيلين،،، ضليت صافنه بوجهه وهو مبتسم وفرحان بعرس امه هي الدنيا تغيرت لو اني بعدني على التحديث القديم لو شنو بالضبط استوعبوني مامستوعبه،،، وزاد استغرابي من دخلنا وشغلوا اغاني وصار يركص فرحان بعرس أمه
اقل من ساعه وسمعنه صوت الزفه گلبي انخمط ليش مااعرف مااجى ابالي غير شي واحد عرسي من ثامر نسيت سراج ونسيت الدنيا كلها ورجع عقلي لقبل ١٠ سنوات گلبي ينبض بقوه ايدي ترجف خايفه لابل مرعوبه
ساره،،، شبيج سيلين ليش وجهج صار اصفر؟
ام ساره،،، جيبولها مي
سيلين،،، اسمعهن لكن عقلي بغير مكان ماحسيت ولا صحيت غير من شفت سراج بوجهي قبل جبيني وكعد يمي باوعت علي مستغربه ضليت صافنه بوجهه ومركزه بالبدايه ابتسم بعدين تقرب همس
سراج،،، شبيج ليش وجهج اصفر؟
سيلين،،، مابيَ شي باوعت ماكو احد جاي بس جديته نعيمه ام امه ولمياء ووياهم وحده ثالثه يمكن اخته الكبيره ام مصطفى مااعرفها لان ماشايفتها قبل
لمياء واكفه صافنه عليه وفاتحه عيونها اشرلها سراج تقدمت وبعدها كال يله ورانا طريق غطاني بالكاب وطلعنا من البيت ألي شهد على كل معاناتي ويا ثامر ورايحه للمجهول ومااعرف شنو راح اعيش ياترى راح اعيش الأفضل وامحي الماضي لو راح اعيش اشياء اسوء من الماضي؟؟؟
