رواية بيت خالي الفصل الحادي عشر 11 بقلم جمانه السعيدي
رحمه....نزلت بلكاع وسجدة سجدة الشكر لله
سبحان الله اجاني حقي واني كاعده وساكته
الله كشف مروه
بس اريد اشوف عيون همام من يعرف الحقيقه
طفرت على خالتي وحضنته وبسته
خالتي...عود ليش فرحانه انتي شراح تستفادين
رحمه...اولا راح اكشف مروه الي فضله عليه همام
ثانيا..اريد اشوف الانكسار بعيون همام لمن يعرف هو السبب واني جنت ساكته ومتحمله علموده
اريد اتشمت بي شوفي اني يتيمه ومالي احد غير رب العالمين ورب العالمين ماخذلني ابد
وكف وياي ورجعلي حقي وزياده
باجر شوفي شراح اسوي توصلج الاخبار المفرحه
خالتي...ليش من طلع من عنده السبب سكتي وماخليتي يعرف
رحمه...احبه اقصد جنت احبه اكثر من نفسي
ومااكدر اتحمل اشوفه يزعل لو يوضوج ولا لحظه
انتي ماتتخيلين شكد اني جنت احبه ومتعلقه بي
لدرجه جنت مستعده اضحي بحلم الامومه الخاطره
بس هو باعني بأقرب فرصه اجته
جمانه السعيدي
ثاني يوم اتصلت طلبت اجازه من الدوام
ورحت اشتريت فستان يخبل كابوي مخصر وبي تطريز حلو بلردن ورحت للصالون غيرت كصة شعري وصبغته
وحفيت ورتبت حواجبي لان من يوم انفصلنا واني ماحافة
ابد وشعري صاير مو حلووو
طلعت فد شي رجعت للبيت وخليت ماسك الوجهي
أجمل شعور بلدنيا شعور الانتصار
حسيت اني انتصرت عليهم كلهم
رغم اجتمو عليه
ودمروني كلهم همام ومروه وعمتي
لان ماليه احد يوكف بوجهم
بس رب العالمين وكفلي ورجعلي حقي
اليوم الي بعدا كعدت الصبح سبحت ولبست الفستان وحذاء احمر وجنطه حمره
ولبست كلاده ذهب طويله وتراجي طوال
وشسورت شعري ومكياج يخبل
طلعت فد شي يمكن لو رايحه العرس مااكشخ مثل هاي الكشخه
جمانه السعيدي
طلعت اجرت تكسي توصلني المكان عمل همام
نزلت وسئلت بلباب على غرفته
طول ماامشي الكل عينه عليه
واحد يكول صاروخ
وواحد يكول يمكن هاي المديره الجديده
وصلت الغرفته
جان مدنك ويكتب واكو واحد وياا بلغرفه اقصد موضف
يشاركه نفس الغرفه
دكيت الباب
رفع راسه شافني واستغرب كلش
ماحجه اي شي
الموضف الي وياا بلغرفه رفع راسه وكال تفضلي
همام صافن عليه وماحجه اي كلمه
الموضف...تفضلي شلون اخدمج
رحمه...اني جايه على استاذ همام
تقدمت وكعدت بلكرسي الي بصف مكتبه
همام...هااا خيررر شكووو شعندج جايه
الموضف بقه صافن على كلامه
رحمه...ماكو شي بس سمعت راح اتصير اب واجيت اباركلك
همام...وبعدين احجي المفيد
رحمه...هاي شبيك جايه اباركلك واخيرا راح تصير
اب اب الابن مو ابنك
راسا هذا الموضف شمر القلم وباوع علينا
همام...ارتبك اس ولا كلمه احترمي نفسج والزمي حدودج
احنا بمكان محترم لو تحجين بأدب لو اطلعين برا
رحمه...ولله اني مامجاوزه عليك وجاي احجي بكل احترام
لو مامصدك كلامي
هاك هاي تحاليلك بلمستشفى وبرا المستشفى
كلهن يثبتن انت عقيم ونسبتك حتى اقل الصفر
وهاي شهادة اكبر دكاتره بغداد
انت مستحيل يصير عندك اطفال طول عمرك
هاي التحاليل وتكدر تعرضهم على اي دكتور يعجبك
جمانه السعيدي
واذا ماتصدك بيهن روح سوي تحليل جديد
وشوف شنو المعجزه الي خلت مروه تحمل منك
بهاي السرعه
الا اذا جان اكو بديل لو اكو اب غيرك الهذا الطفل الي تريد
تسمي باسمك
طبعا وجه صار اصفر وكام مايكدر يحجي ابد
جمانه السعيدي
همام...ااانتي انتي جذابه تكولين هيج لان غيرانه منه
ضايجه لان راح اجيبلي الطفل الي ماكدرتي اجيبنه
رحمه....هسه عليمن هذا الحجي هاي التحاليل وروح اتأكد بنفسك
مهما يكون تبقى ابن خالي وجانت بينه عشره
ومااحب احد يستغفلك ويضحك عليك
كمت من مكاني هاي هيه اني بلنسبه اليه خلص الموضوع الي جايه علموده
مشيت شويه والتفت علي
رحمه...هااا نسيت انبهك على شي مهم اكرم انجلط بسبب مروه يمكن اكتشف خيانته ومااتحمل وانجلط
بس حاول تسئل بهذا الموضوع وتعرف الحقيقه
حرامات اكرم يموت بسبب وحده ساقطه مثل هاي
طلعت واني اكووول يس يس يس ضهر الحق الحمد لله
طلعت من الدائره وكفت بعيد اراقب
بعد ماطلعت بخمس دقايق طلع يمشي مثل الثور الهايج
ولازم التقارير بايده
طلب تكسي ومشه
رحمه...روح روح الله يساعدك يامصيبه الي اجتك
رجعت للبيت بدلت واكلت ونمت
اول مره انام مرتاحه من يوم انفصلنا لليوم
ماكعدت اله ثاني يوم الصبح
بدلت ورحت للدوام واني مرتاحه نفسيا
اكو ولد اجانا نقل من غير مستشفى قبل اسبوع انقل
من اول يوم داووم وهو يضحك ويسولف ويااا الكل
الا اني مانطيته وجه ابد
حالتي النفسيه ماتساعد احجي واضحك ويااا اي واحد
بهذا اليوم كنت سعيده بشكل مو طبيعي
دخلت امشي واضحك واسلم على الكل
عاملة النضافه وواحد فني اداري والدكتور وحتى المرضه سلمت عليهم واحد واحد
لا كاني محمد
رحمه...صباح الخير محمد شلونك
بقه واكف ومستغرب
اسمعه يكووول هاي رحمه لو غيره جاي تسلم عليه
يمكن اليوم عرفه وتريد تكفر عن ذنوبه
جمانه السعيدي
صاح عليه...رحمه يمعوده شكووو
التفتت علي وابتسمت ماكو شي شوية جرعة سعاده زايده وحبيت الكل يكون سعيد
دخلت الغرفه وبست كل البنات
رحمه ...اليوم الريوك على حسابي راح ادز على كباب
وصمون حار وببسي
شويه واجه محمد
محمد...سمعت اكو عزيمه وعزمت نفسي
ترا ريحة الكباب تارسه المستشفى عبالك مخدرات
جاي تسحب كل الموضفين
رحمه...تدلل هذا ريوكك وفد اشويه ارجع اخذ جاي
محمد...الله يديم الفرح والسعاده
اما همام...طلع كبل سوا تحليل بأكبر مختبر بغداد وطلعت النتيجه مثل ماكالت رحمه بلبضبط
رجع للبيت قبل لا يحجي اي شي
همام...يمه وين تليفون اكرم
امي...تليفون اكرم شذكرك بي
همام...اريده محتاجه
امي...اني لكيته مكسر بغرفته بيوم وفاته وضميته ماهان عليه اشمره
همام...اي اريده حتلو مكسر محتاجه ضروري
امي...هسه اجيبه الك
