رواية سر خلف النقاب الفصل العاشر 10 بقلم هدوء آل محمد
`أنا أسف لنفسي`
________________________________
بعد ماصار صوت طگطگة نطبكت السماعة صرت اناشغ لطمت على رجلي وحنين تبجي
حنين:- خيه شراح يصير الكم
لزمت راسي احاول اهدي نفسي بس الرجفة هدت حيلي
_ مادري العلم عند الله
بقينا وحدة تندب بحض الثانية الى ان ندگ الباب گمت اركض عبالي همه صحت من ورى الباب
_ منو
مهيمن:- انا مهيمن خوية بس صيحيلي حنين الجهال فاحطين بجي
طلعت تركض من سمعت رجلها فتحت الباب
حنين:- ها مهيمن
مهيمن:- يمعودة الجهال فحطو من البجي يريدوج
حنين:- يا سودة عليه هسه اجي وراك بس اجيب عباتي
سدت الباب وندارت الي متفشلة
حنين:- لازم اروح خيه الجهال على عمتي وهي مابيها عليهم
طبطبت على كتفها
_ روحي خيه روحي هم ماقصرتي انتِ
لبست عبايتها وهي تحجي
حنين:- شمسويه قابل بلكي باليل امر الج ان شاء الله حتى نفهم شصار بالگعدة
هزيت راسي وصلتها للباب ورجعت گعدت بالطرمة على عتبات الدرج وباوع بكل زاوية بالبيت شلون تطشرنا شسوت بينا الدنيا واهلنا مادري مر شكثر من الوقت نفتح لباب سحبت شالي الي كان على رگلبتي لفيته ورحت اركض دخلوا وجوهم تعبانة تجاهلت الكل ووجهت كلامي لسراج
_ ها سراج خويه؟
دنگ راسه
سراج:- حضري نفسج خويه باجر طالعين من المنطقة
گال هل كلمات وراح للهول تبعو كلهم ماعدا عبد القادر
حسيت جسمي تيبس شنو نشيل وتسنيم سرعان ماستوعبت وركضت للهول لگيته گاعد ومدنگ راسه بالگاع رفعته بكل قوتي
تلاكت عيني بعينه الي مليانه دموع
_ وتنسيم سراج وتنسيم!!
صرخ بنحيب
سراج:- لج حصرنا لو دم اخوج شامل لو نشيل من المنطقة وفصل وننسى تنسيم لج خويه رفضت وصرخت بس الشيوخ وگفوا ضدي والحجة مانريد يصير بحر دمووم جلب ويفطس بس ماكو كلهم ماخذو بكلامي
رفعت عيني على عمي سلام الي واكف تقدمت اله
_ امشي اطلع برة
رفع نظرة الي مصدوم
سلام:- لج انت صدك ماتستحين
_ انا لي ماستحي لو انت لك لو عندك ذرة كرامة ماوكفت هنا وانت سبب بالي احنا بي امشي اطلع برررة
هد علي يريد يضربني بس صاروا عمي يحيى وعبد القادر وقتيبة بوجهه
يحيى:- امشي اطلع سلام امشي غضب الله عليك دنيا واخرة امششي
هز راسة وطلع لحگة عمي سالم گعدت بالگاع الطم على وجهي بكل حيلي
_صخام لصخمني ولكم تنسيم يمه خيه شحالج يمه انت الي ضحيتي علمودنا تالي نعوفج ونشرد بالعزيزة امدانا يي والله
لزم ايدي عمي يحيى والي يبلع بريگة ويداري دموعة
يحيى:- اهدي بنتي كلشي واله حل
نترت ايدي وصرخت
_ ياحل عمي ياحل كل عقلكم اعوف تنسيم لو تذبحوني ماعوفها
عبدالقادر:- راح تخسرين سراج.. يي لتباوعيلي هيج گالو اذا ضليتو بالمنطقة يموتوكم
قتيبة:- اطلعوا فترى وعسى ولعل تهدأ النفوس بلكي الله تنحل
سراج:- جد جدك مايحلها
ندگ الباب وراح قتيبة يفتحه شوي ودخل خالد عيونة دم كبل حضن سراج وثنينهم صارو يبچون
خالد:- لك اخخ ياخويه اخ
سراج:- كسروا ضهري ياخوية بامانتي
على بجيهم صرت انحب واتوسل بيهم
_ ودوني لمشعان انا اتوسل بي ييي انا ابوس ايدة بس في سبيل يخلي تسنيم تجي ويانا
بس لاحياة لمن تنادي القىار صدر والامر حسم
مر الوقت بحسرات وبجي لميت جنطة كبيرة خليت ملابسي وصورنا وسراج كذالك عمي يحيى اصر نروح ويا للمحافظة الساكن بيها والصراحة ماجدلنا لان وين نولي؟ لامصرف ولافلس الورانا وكدامنا ذبينا على الفصل بس النسبة الاكبر وگعت على عمي سلام وهو دفعها بدون لايناقش وين يكدر يحجي وهو الغلط راكبه من راسه الى رجليه
في صباح اليوم الثاني الساعة ب٦ الصبح سيارة بيكم من هاي الصغار وگفت على باب بيتنا خالد ماراح بقى يمنا ينحب مثل الطفل على سراج خاف انا ناقصني قهر خالد حرگ روحي حرگ
عبو السيارة بس اغراض اساسية وسيارة ثانية مالت الولد الي راح نروح بيها
حانت لحضات الوداع بلايه صوت وعن ديارنا راح نبتعد
اليوم متوادعين وباجر طالعين وانا على لفراك ابد مامستعد
ركبنا السيارة وسراج حاضن خالد وثنينهم يبچون
ببكاء
خالد:- درب السلامة ياعضيدي اجيك انشاء الله
سراج:- ان شالله دير بالك على نفسك
خالد:- وانت هم
ركب ليورى يمي يمسح دموعة تحركت السيارة وصارت عيني ليورى خالد واگف يم باب بيتنا ويباوع علينا ودموعة تهل
بسرعة نداريت ماتحملت شكلة وصرت اشهگ وابجي
_ شردونا عساهم لاتهنو
طول الطريق مانشفت الي دمعة وسراج الي مابقى شي ببطنه ماذبه روحي نسحنت علي وهو دموعة وحلگة يصبون سوى الى ان قريت لافته محافظة(**) ترحب بكم مشت السيارة تقريباً ربع ساعة ودخلت بين البيوت ووكفت يم بيت زين لاكبير ولاصغير
يحيى:- يالله بويه وصلنا نزلوا
عبدالقادر: - نورتوا بيتكم والله
قتيبة:- منورة بيه لاتجذبون
عبد القادر:- شهل غرور دخيل ربك
قتيبة :- بس غمازاتي تسواك يالخايس
حجاها وندار النا لان هو كان بالصدر سراج بعالم ثاني اصلاً صافن دغيته بكتفة فز
سراج:- ها
يحيى:- بعد عمك يا ها غير وصلنا
هز راسه ونزلنا وقتيبة نزل قبلنا فتح الباب نزلت ورجلي احسها خيوط ومنمله الطريق بل ٤ساعات نمردت مرد لزمت بأيد سراج الي الدنيا تفتر بي دخلنا للبيت كان اكو حديقة على الجهة اليسرى مو كبيرة ولاصغيرة بس حلوة ومرتبة وبيها مرجوحة نتبهت الها لان لزمت بسراج الي كان بعدة نفسه تلعي دخلو السيارة ومن سدو الباب طلعت النا مرت عمي بحرامها الابيض تهلي وتمرحب
ثريا:- ياهلا ومرحبه عيوني نورتو بيتكم
تقربت الي وبوستني وسلمت على سراج من بعيد دخلنا للبيت طبعا مرت عمي اجت ورى فاتحة همام وحدها ادت واجب وراحت سمعت عدها بنات ثنين بس ماشايفيهم والكطاعة هاي مادري شسببها گعدنا بالهول ودخلو بمات ثنتين لابسات دشاديش ولافات الشال
حجت مرت عمي تقصد بناتها
ثريا:- شبيكم واگفات مثل لصنم تعالو سلموا على بنت عمكم.... يمه رنوقه هاي تقى وتقوى
تقربن باوسوني وهن مبتسمات الي وسلمن على سراج الي مرجع راسه على التخم وبايدة لازم عيونه
قتيبة:- تقى انت مو صيدلانية دشوفي شبي
فزت لبنيه بخجل
تقى:- ها اي شسمه يمكن هابط الضغط خل اجيب الجهاز واجي
راحت تركض جابت جهاز
تقى:- قتيبة بس تعال شكله اله
قتيبة:- صار
شده اله وبدت تقيس بي
تقى:- يااا ضغط هابط كلش ليش هيج
عبد القادر:- ماكل كلشي صارلة يومين
تقى:- لاخويه ميصير هيج راح اروح اسوي الك لبن واكثر اله ملح لازم تشربه حتى يستعدل ضغطك
هز راسه سراج وانا لازمة ايدة الثانية والظموع تنزل بهدوء
وامسحهن حجت تقوى
تقوى:- ليش تبجين ياعيني مابي شي هسه يصير زين
نتبه الي طبطب على ايدي
سراج:- انا زين لتقلقين
شهكت وضميت نفسي بحضنه
_ الله يخليك لاتعوفني مابيه حيل خسارات اكثر
سراج:- وياج لگطع لنفس سكتي يالوعت الگلبي الثانية
ضل يمسد على راسي الى ان اجت تقى جايبة كوب لبن رفعت راسي لكيت تقوى تباوع النا وتبجي وتشهك يا شبيها هاي قتيبة وقدوري كاتمين ضحكتهم عليها اخير شي قدوري ماتحمل نفجر يضحك احنا بياحال وهاذ يتمضحك
عبدالقادر:- مستحييل تفوت الها شي وماتبجي علي
مسحت دموعها
تقوى:- لتستهزء خوش بس ترا شكلهم ينكرط
قتيبة:- كرطو راسج ام دميعه
ثريا:- عوفوها بحالها لاتنصبلنا مناحة هسه
يحيى:- يالله بنياتي حضرو النا الغداء جايين من درب
ثريا:- صار عيني هسه شوي ويجهز
كامت للمطبخ وتقى حجت بلطافة وابتسامة
تقى:- تجين ويانه!! هم نساعد ماما وهم نتعرف عليج
هزيت راسي الها وكمنا للمطبخ غسلت ايدي على المغسلة وانا بگلبي حجي شلون احيج مادري بس لازم افهم
_ خالة ممكن سؤال
ابتسم الي وعتلت خدوها عبالك تفاحات
ثريا:- اسالي يوم
_ يعني هو فضول اكثر من ما هو سؤال بس ليش انتو بعيدين عننا عكس عمامي لباقين
سحبت الكرسي اشرت الي اكعد گعدت وهي گعدت على الكرسي الثاني
ثريا:- مادري شلون ابدي بس راح اختصرها الج عمج يحيى كان يجي هنا لمحافظتنا بحكم دراسته بيوم لتقيت بي صدفة وشوي شوي كبرت الصدفة الى حب بس لان انا من اصول جدادي القدماء يهود جدج رفض رفض قاطع رغم ان نحنا واهلنا كلنا دخلنا الاسلام بس بعد جدج وطبعه لكن عمج يحيى
تحدى الكل والظروف وتزوجني وكان يكول مادام كالت اشهد انا لا اله الله فليشهد الجميع اني سأكون على العهد والوعد واتزوجها وفعلا طلع گد كلمته واجى وتقدم الي هو وابوج وكان وياهم رجال اسمه ابو نوفل واخوج نوفل كانو بعمر ال ١٥ سنه هيج بكد اخوج الله يحفظه وتقدمو الي وطلبوني وابوي وافق لان شاف الحب بعيونا
جدج من درى غضب علي وطردة وزعلى على ابوج فترة لكن راضى ابوج وبقى يحيى مقاطعة بقينا احنا بعاد بس علاقتي بأم همام حيل زينة لكن بعد ماماتت وعذريني يعني من تزوج امج كطعت بالكل وانا هم ماطوخت وياها قوقعت نفسي على عائلتي وبتعدنا نهائياً عن اهل ابوج بس من سمعت بموت اخوج همام ماگدرت مااجي متت قهر علي واجيت وعزيتها واديت واجب ورجعت
صاح عمي
يحيى:- يمعوديين الغدااااء
ثريا:- ياااا نسيت الغداء نكمل بعدين
ندارينا لكينا لبنات صافنين وتقوى تبجي يا هاي صدك كلشي يبجيها دكمه ودوسها يمكن حطينا الغداء ورتبنا بالمطبخ على الميز راحت تقى صاحتهم واجوي قتيبة ساند سراج كعدنا كلنا بدون قدوري
تكلم بعز وجعه وتعبه
سراج:- لعد عبد القادر وين ليش مايجي
الكل تغير شكلهم
قتيبة:- ماياكل ويانا من يوم ماتعوق بسبب الابرة الي ضربها رفض يكعد ويانا على وجبه رغم حتى ميز الطعام جبنا لخاطرة بس رافض
سراج:- ليش مارجعتوا بي طبيب نفسي
قتيبة:- اسكت يمعود لايسمعك ونبتلي
دنك وتكلم بحزن
يحيى:- كسرتي بالدنيا عبد القادر كان ضحوك ومرح يضحك للهوى الطاير بس هسه نطوى على نفسة
سراج:- ميستاهل والله
قتيبة:- اصلا استغربنا جيته ويانا هو من قبل الاعاقة ما اجى كان دوم هناك عندة صديق ويروح اله بس بطل
سراج:- عسى الله يبرد گلبه الاعاقة مو سهلة خصوصاً للرجل
نقهرت علي خطية الله يعينه كملنا الغدا وكمت ساعدت البنات بغسل المواعين هم عيب علينا من كملنا
تقوى:- روحو للغرفة انا هسه اجيب حبشكلات واجي
ماكلنا باطل رحنا للغرفة كانت غرفة بناتية بيها سريرين
كعدنا انا وتقى على واحد بيهن
تقى:- تدرين دوم كنت اتمنى اتعرف عليج وعلى تسنيم كونكم الوحيدين البنات باقي عمامي كلهم عدهم ولد
_الصراحة انا سامعة بيكم بس ماصار عندي فضول اتعرف
لزمت ايدي كنوع من المواساة
تقى:- لن يدوم مابنا للأبد هونيها اكو رب كريم رحيم هو اعلم بحالها ومراح يتركها
شهگت ونزلن دموعي
_ضحت لخاطرنا انا وسراج واحنا بالتالي كسرناها تركنا بين الغرب وجينا بيا عين راح نقابلها
تقى:- راح تعذركم ولو هي بمكانكم كان سوت هيج
هزيت راسي انفي كلامها
_لا لو هي بمكاني مسوت هيج كان لكت حل ماخلتني وحدي بس انا عفتها تواجه مصيرها بوحدها بي كوم وحوش
تقى:- مادري شكول الج بس القضية جدا معقدة وبالحالتين خسارة
دخلت تقوى شايلة صينية فواكة
تقوى:- ها فاتني شي
تقى:- لا تعاي
تربعت بالگاع ونزعت شالها وطلع شعرها الملفوف على شكل كباية
تقوى:- يالله سولفولي جلسة تعرف هسه ابدي انا اسمي تقوى طالبة ثالث متوسط صغيرة البيت والمدلله
بتسمت على طريقتها
_وانا رونق طالبة سادس اعدادي
تقوى:-يايمه الله يكفينا الشر
تقى:- وانا تقى صيدلانية خل اسولفلج تسلسلنا نبدي عبدالقادر هو الكبير مدرس لغة انكليزية بس مع الاسف بسبب اعاقتة ترك واستقال عمرة ٣٠ سنة بعدها انا عمري٢٨ سنة وراها قتيبة خريج معهد فنون جميلة وعمرة ٢٥ واخرر شي اجتنا تقوى وعمرها هسه ١٥
_ربي يحفظكم ان شاء الله
تقوى:- سؤال واريد اتاكد منه
_جواب
تقوى:- صح انت وعبد القادر عقدتم؟
هزيت راسي
_يي عقد مؤقت بسبب المشكلة الصارت ليروح بالج بعيد
نفتح الباب ودخل هو يبووو وقتك هسه
.
.
.
يرتدي ثياب الحلم وها هو يخط السطور الاخيرة لينهي مسيرته ويعود من جديد
ابو نوفل:- شد حيلك ولك اليوم هو يومك الي حلمت بي من سنين
مسح دمعته الي خانته
نوفل- كانت ايام صعبة لكنها مرت بعون الله
طبطب ابو على كتفه بكل فخر
وركبو السيارة ونطلقوا للجامعة وبدأت رسالة مناقشة الدكتورا
وتم ختام الحلم ليتوج بنجاح منفرد رغم انه كان مشترك مع رفيق الدرب وبعد ماكملوا طلع ركب سيارة هو ابو للمطار
ابو نوفل:- ها راح تحجز
نوفل:- طاگ گلبي على شوفه گبرة
دنگ ساكت حجزوا تذارك العودة لكن ياترى ماذا سوف يحصل بعد العودة؟؟
.
.
.
مقيدة بقيود القدر بدون لاحول ولاقوة ياترى هل من مفر ام هكذا سوف اقضي بقية حياتي ، فتحت عيني لگيت نفسي مقيدة ايدي بسلاسل ومربوطة على سرير حديدي بالبيتونة مكان ترك الاغراض ريگي ناشف اريد بس احرك شفافي واتكلم مو گادرة بسبب ريقي اليابس صرت اكح بقوة عسى ان يجي بشر يعيني ويرحم حالي بقطرة ماء صار صوت خطوات على الدرج سويت نفسي نايمه خفت يي خفت فأنا بلاحول ولاقوة بين وحوش لاتعرف الرحمة متخذين من الدين غطاء ليسترو به على انفسهم يخافون من الناس اكثر من خوفهم من رب الناس!! صار صوت تنهيدات فتحت ببطئ علي!!
نزلت راسي وبدن دموعي يجرن
تكلم بغصة وخوف
علي:- شبيدي عليج اذا ساعدتج راح يكون حالي اتعس من حالج
فتح بطل لماي وعبالك فتح باب الجنة قربه من فمي وبديت اشرب بشراها الله العالم شگد صارلي بهل حال والوضع
كملت البطل كله واحس بعدني عطشانه مد ايدة بجيبه وطلع قطع من التمر منزوع النوى حجى وعينه على الدرج
علي:- فلسته الج قبل لااصعد حتى بسع اكمل واوكلج اكبر كميه ممكنة تسند گلبج
اكل وهو يرجف وعين عليه وعين الثانية على الدرج سمع صوت خطوات صارت على الدرج نخطف لونه اخذ لبطل والتمرات وراح يدور مكان يختبئ بي البيتونة كبيرة وممتلئه بالاغراض راح وگف ورى مجموعة من الدواشگ وختل مايبين منه شي رجعت عيني على الدرج الي بدأ يوضح الي الصاعد هو مشعان اغمضت عيني وخياله مرسوم بعقلي عيونه التعب واضح عليهن وضهرة منحني كسر خاطري رغم كل الي سواه بيه
حقة بنته وعزيزة گلبه مالومة على حزنه بس الومه على فعلته وذلته الي حسيته كعد يمي
صرخ بحقد
مشعان:- اكعدي ادري بيج مامطمورة
فزيت وفتحت عيني باوعت اله وهو باوعلي
مشعان:- شسويتلج انا الگلت عنج غيرر طلعتي صدگ غير وكسرتيني كسرة عمري ليشش
صرت اشهك واحجي
_والله
لسه ماكملته سطرني بكف بگفه ايدة على حلگي حسيت شخطة صارت بي وفعلا بدات قطرات الدم تنزل اثر محبسة الي خدش بشرتي
مشعان:- لاتحلفين لج ناار مشتعلة بداخلي شأسوي بيج فهميني!!شسوي وتبرد نااري لج اخوووج فص ملح وذاب گلبت علي المحافظات گلب بس ماكووو ويين راااح جاوووبيني وين كنتو متفقين تنهزمون
صار يهز بيه ويتكلم ورجع توالاني راشديات بس گلبه مابرد مستمرة بشهگاتي وحيلي المهدود ماصرحت ولاحجيت لان اذا احجي يزيييد بتعذيبي ماينقص دفعني ورتطم راسي بحدايد الجرباية
مشعان:- متجاوبين مووو انا الج
باوعتلة وحاولت اكذب ضنوني الى ان ايقنت شنو الي ناوي اله لايربي لا علي
صرت مثل بلاع الموس لااكدر احجي ولااكدر اسكت
انتهك حرمتي وانتهك الزواج العهد مقدس الذي اصبح بشع ودنسه البشر نسى المودة والرحمة نسى رفقا بالقوارير
عاملني كجارية بكل قسوة لاراعى مرضي ولاحالتي الي تصعب على الكافر كلشي مافكرت غير بعلي الي موجود بين اكوام الاغراض اكتم صوت انيني ودموعي الي ماعندي غيرها
تكلم بنبره كلها شر
مشعان:- هذا قدرج منا ورايح جارية وحالج حال الفصلية
اهلج
صفق بيدة بعلامة النفظ
مشعان:- بححح راحو شالو من المحافظة كلها انسيهم
هزيت راسي بعدم رضا لكلامة الي قسم ظهري عافوني الي ضحيت لخاطرهم بعز ضعفي ووجعي
صرخت بي وانا انفي كلامة
_كذااااب لتحرك گلبي مسعااان راعييي الله بيه مشعااان لا لا
بتسم بشماتة
مشعان:- ذوقي من الي ذوقتيني ايا انت واخوج
طلع مفتاح من جيبه وفتح السنسلة
لزم ايدي وضغط عليها
مشعان:- منا ورايح هذا مكانج تنزلين جوة تخدمين اهل لبيت وراها تلبين طلباتي واخر شي تصعدين هنا وهااا ممنوع تصعدين قبل الساعة 12 باليل لان راح تشوفين شي مايعجبج
دفعني وانا رحت اركض سحتبت شرشف من الشراشف الموجودة استر بي نفسي باوعلي بستهزاء
مشعان:- شريفة مو بيدج يالله لج نزلي گدامي
بدون نقاش نزلت مثل الأسيرة وهو وراي مادري شلون تذكرت مولاتي زينب وصبرها يمكن رب العالمين ذكرني حتى اصبر صبر السيدة زينب هو مصدر إلهام للكثيرين. السيدة زينب بنت علي بن أبي طالب، حفيدة النبي محمد صلى الله عليه وسلم، تعتبر مثالاً للصبر والتحمل في مواجهة المصائب والتحديات.
في معركة كربلاء، شهدت السيدة زينب مصاب أهل البيت، خاصةً استشهاد أخيها الإمام الحسين. ومع ذلك، لم تفقد صبرها، بل ظلت ثابتة ومتماسكة، وتعزّي أهل البيت وتدافع عنهم.
صبر السيدة زينب يعلمنا أن الصبر ليس ضعفاً، بل قوة. أنه يعلمنا أن نتحمل المصائب بثبات وتماسك، ونستمر في الدفاع عن الحق والعدالة.
وصلت لنهاية الدرج رفعت نضري كانت باسمة تباوعلي بقرف
باسمة:- عيييع غطي گرعتج لعبتي نفسنا
سحبت النصف الثاني من الشرشف ووضعته على راسي وبداخلي اردد وصبر وماصبرك الله بالله
نزل مشعان ووجه كلامة لباسمة الي تباوعلي بقرف
مشعان:- شوفي شعندكم ملابس قديمة نطوها
تكلمت بحقارة
باسمة:- ياعمري حجي انت تدري مابقي شي قديم كله اتصدق بي
مشعان:- شوفي حجيه فطيم گليلها نريد ملابس الماتحتاجيها
يتفنن بطرق ذلي فطيم حجيه من المنطقة الكل يعرفها حالتها المادية مو تمام تاخذ من العالم وتلبس نفسها وبناتها بجرجفي واكفة انتظر اوامره رفع هاتفة واتصل
مشعان:- محمود مر لحجيه فطيم نطيها مبلغ محترم بس بشرط تكللها اريد مجموعة ملابسج القديمة حتى اشمرهن وهاي لفلوس اشتري بيهن جديدة والملابس جيبهن وتعال
طول هل مدة بقيت واگفة رجليه راحن من التعب والجوع وفوگ كل هذا المرض الي هد حيلي نصف ساعة بالضبط ودخل محمود بيدة علاگة زبل!!!
محمود:- هاي لملابس بس شلك بيها
اشر عليه
مشعان:- نطيهن الها
شمر العلاكة يم رجلي
محمود:- بكوم فلوس ذن بس يالله تستاهليهن
نتر
مشعان:- امشي اسبحي ولبسيها لاتضلين صافنة
اخذت قطعة من الكيس وشال كانوا تعبانات بشكل والوانهم جاردة وحتى الشال مزروف توجهت للحمام وصاحت باسمة
باسمة:- يااا ويين تريدين تنكسين حمامنا امشي اطلعي برا لحمام الظيوف
هزيت راسي ساكته وبداخلي كلام لو احجي كان خلصن دفاتر العالم توجهت بخطواتي لخارج البيت ورجعت صاحت وراي
باسمة:- عود اغسلي الشرشف بدربج لان وصختي
كملت دربي بس اجت بسرعة ودارتني الها وصفكتني راشدي
باسمة:- مو احجي وياااج ليش ماتحترمين ادب سز من احجي وياج ردي حاضر ست فهمتي لو اخلي مشعان يخلص عليج ولو هو شباقي بيج
دفعتني عثرت باطراف الشرشف وطلعت اجر اذيال الخيبة الجو بدأ يبرد لفجتني نسمة شلت عضامي بسرعة خطيت خطواتي و دخلت للحمام علكت ملابسي وهشمرت الشرشف
باوعت على نفسي بمراية الحمام وصرت اشهك وابجي كسرة وحسرة وخيبة عافوني وراحوا اباوع على نفسي هاي مو اني كدمات بوجهي اثار بكل مكان راسي الي مشخط والدم يابس من المكينة اماكن طالعة لكرعة واماكن بيها بقايا شعر
نداريت ولكيت مكينة شكلتها بالكهرباء وانا الشهگة مستمرة شغلتها ومشيتها على راسي تساقط بقايا الشعر كملت وطفيتها
فتحت الدوش ماي بارد!!! متاكدة سدو بس يالله تهون وبعون الله تمضي وباجر يم الله نحجي الصدگ وكلمن ياخذ حقه
كملت سبح ولبست ثوب اسود منقط باخضر كان عريض ومبهذل ولفيت الشال ونزلته على عيوني وطلعت سن يطگ بسن من البرد
دخلت للهول كلهم مجتمعين ماعدى مشعان الي مادري وينه الدنيا كانت مغرب
نترت بيه
باسمة:- امشي سوي النا عشى منا ورايح البيت كله عليج ميس ماتشيل گشاية لبنية حامل لو هم تريدين تكتلي!!!
همست
_صار
دخلت للمطبخ وانا كارها نفسي واهلي وكلهم بهل سرعة نسوني
ونسو تضحياتي!!! كان اكو على المغسلة دجاج وخضراوات رغم حيلي مهدود بس لازم اقوي نفسي حتى تفرج سويته تبسي اسرع شي الالم اسفل بطني موتني حسيت نفسي بدم يجري وراها مادري شصار بيه فتحت عيوني على الم ثاني بغرفة وعجوز كبيرة يمي كان يمها ادوات ملطخة بالدماء حركت نفسي الالم لايطاق بطني تتكطع
باوعت الي وهي تغسل بادواتها
_ الحمدلله على السلامة عيني اجهظتي الله يعوضج
خلت الغراض بالجنطة واخذتهن وطلعت
دخل مشعان مشطاط من الغضب
مشعان:- لش ماگلتي حامل هاااا!! من شوكت حامل
_ مادري والله مادري
