رواية عروس منحوسه كامله وحصريه بقلم جمانه السعيدي
راغم اني شكلي حلو
طولي ١٧٠ حنطاوبه ملامحي حلوه
شعري اسود طويل
بس مااعرف ليش ماتجيني قسمه زينه
اني ابوي متوفي قبل ١٠ سنوات
من بعد وفاة ابوي امي جبرتني اترك المدرسه
حتى اخدمها بلبيت
بسبب كعدتي بلبيت محد يشوفني لذالك ضاعت عليه هواي فرص للزواج
الناس اكثر شي ادور بنيه متعلمه
بنيه عدها وضيفه
اني كلشي مااعرف بس شاطره بشغل البيت
كلشي اعرف اسوي
امي بعد وفاة ابوي ازوجت
يعني اني حاليا عايشه وياا امي وزوجها
من مات ابوي امي بعدها زغيره تقريبا ٣٦ سنه
امي مزوجه بعمر ١٨ سنه
بعد وفاة ابوي بدت ناس تتقدملها وخوالي قررت لازم تزوج حتى تنستر
خصوصا وهي عدها بنيه قصدهم اني
تقدم منعم الخطبتها جمانه السعيدي
رجال سبق اله الزواج بس مايصير عنده اطفال
زوجته عافته وطلبت الطلاك
زوج امي انسان بخيل يحسب الفلس الف مره
مايطلع اللالف من جيبه اله بلتوسل
عايش ويانا بيتنا
من احجي لو لو ما اقبل امي تكول احنا نسوان ثنيين وين نروح خلي الرجال ساتر علينا
على الاقل يجيب العلاكه
بس نبقى وحدنا الناس تاكلنا
صح احنا عايشين بس ابخس عيشه
اذا خلص المعجون الف تحقيق يله يجيب معجون
شلون خلص وليش خلص
والدهن انقط تنقط بي عايشين بلضيم
بس اني مابيدي شي
كل يوم ادعي تجيني قسمه زينه واخلص بس ماكو
كل البنات الي بعمري ازوجن بنات الجوارين
عرسن اله اني محد يتقدملي
كنت اسمع كلام أشكال من الناس
هاي الي تكول منو ياخذج بعد كبرتي
وهاي الي تكول ابوي يدور عروسه شنو رائيج اخطبج اله
وهاي الي تكول ليش ما تسجلين بلرعايه
انتي كبرتي بعد ماتزوجين
وهاي تكول بعد منو يكلبج الناس ادور عمر ١٦ و١٥ سنه
انتي راح توصلين للثلاثين
ولله لو يعوفوني بحالي جان اني بخير
اني ماعاتبه عليهم ليش يااذوني اني حتى مااطلع من البيت جمانه السعيدي
بس اذا بلصدفه اشوف احد لازم يغثني بهلكلام
تعبت ياناس تعبت عوفوني بحالي مااريد منكم شي بس عوفوني بحالي
حتى امي ما خلصت منها
تكول اني احسن منج ازوجت مرتين وانت مكابلتني
اذا امي هيج تحجي وياي ليش اعتب على الناس الغريبه
ساعه اتكول اريد اشوف شيخ سيد يقرأ عليج
بلكت تزوجين
كل البنات عرسن وانتي مكابلتني
كل ليله اشبع بجي قبل لا انام
الناس ما تقبل تعوفني بحالي
امي هي السبب لو عايفتني بمدرستي احسن
على الاقل جان هسه متخرجه
اشوف ناس احجي وياا احد بمكان ما مكابلتها وكاعده
بت خالتي انخطبت عمرها ١٨ سنه وعزمتني على حنتها
فرحت راح اطلع واشوف ناس واضحك
اغير جو بمكان ما محبوسه طول الوكت بلبيت
بس شكال التنضيف وشراح اطبخ
طبعا هاي شراح اطبخ اكبر معضله لان المسواك نفسه كل يوم شي بسيط وقليل واني لازم اكون ساحره
من اطبخ بحيث اطلع احلى طبخه وكميه جبيره
من هذا المسواك العجيب جمانه السعيدي
المهم رحت للحنه
وتمنيت لو ما طالعه من البيت هواي احسن
البنات بقن يضحكن عليه
البنات حايرات شلابسات والمكياج والشعر اخر موديل
واني لابسه ثوب قديم
لابسته الف مره
وشعري لامته طوبه وماعندي مكياج بس كحله اخذتها من امي
استحيت اتحرك بين البنات لان حسيت نفسي
لا شي كدامهن
مو بس هاي لا البنات بدن يتنمرن عليه
وحده تكول سجلي للحج بلكت يطلع اسمج
وحده تكول عوفوها كاعده اكيد مفاصلها تعبانه بعد كبرت
ايجوز عدها سوفان
وحده تكول هاي ناسيه تسولف هلكد ماكبرانه
يضحكن عليه اني كاعده ودموعي تجري
عفت المكان ورجعت للبيت وحدي
رجعت للبيت دخلت غرفتي وطكيت بجي
اني شبيدي قابل بكيفي ماازوج
هذا حظي وهاي قسمتي
شسوي مابيدي اغير شي
امي اجت وراي بمكان ماتواسيني وتخفف عني
تكول اي ولله حجيهن صدك
هاي البنات نص من عمرج وزوجن وانتي منحوسه
يله بدلي واطلعي حضري العشه
لا تسوين نفسج زعلانه
عليمن تبجين
