رواية اسيرة بين يدي قاتل ابي الفصل السادس 6 بقلم نور آل زيادة
سيلين،،، صار كل يوم يوصلني شخص مره والدي اذا موجود ومره امي ومره شاكر اتقيدوا بيه بس ماكو حل
شكري وأمتناني ألهم صار على شكل نتيجه،، والدي من شاف شهادتي حضني بقوه فرحان بدرجاتي حتى امي شكد تتذمر وتكره الدراسه من شافت درجاتي طارت من الفرح من فرحها سوت كيك ووزعت على الجيران وبالأخص لبيت اهل سراج كنت متصوره هل شي بسبب فرحتها بنجاحي بعدين عرفت أمي براسها أفكار اخرى
بيوم من الايام وبشهر الثالث بالتحديد بيومها قررت مااداوم الجو كان مغيم وممطر شهر الثالث كله مطر بلغت اهلي بهل شي والدي وشاكر طلعوا لأشغالهم وامي طبعها تفرفر متبقى بالبيت كان الدوام ضهري كعدت ماخذه راحتي تريكت على كيف كيفي لأن مامداومه
صارت، ب ١٢ اني وانضف شفت ورقة انكليزي بالأرض رفعتها قريتها وانكفخت على راسي من تذكرت اليوم امتحان انكليزي واني ناسيه،،صرت ألوم بروحي شلون نسيت هل شي،، هو قبل يومين الامتحان ودرست لكن الأمتحان اجلته المدرسه واليوم موعده
غير تخبلت صرت مثل المجنونه ماعرفت شلون لبست ملابسي شالي ذبيته على راسي بطريقه مبعثره جنطتي دحست الكتب بيها دحس ومااعرف شنو خليت اصلا
طلعت مسرعه من البيت مشيت بسرعه واني اعرف بعد ماألحك على الدوام المطر ينزل عليه ملابسي كلها تبللت وقفني صوت اعرفه انداريت شفت سراج باوع عليه بنضره غريبه واستغفر ونزل عيونه للارض
سراج،،، رايحه للمدرسه مو؟
سيلين،،، اي
سراح،، شعجب متأخره وليش وحدج طالعه اليوم؟
سيلين،، ما ألي نيه اداوم بس تذكرت عندي امتحان واذا أتاخر اكثر يغيبوني وارسب ،،،، من رخصتك
وقفني ونزع سترته وقدمه ألي من غير ميباوع
سراج،،، ألبسي هذي ملابسج مبلله
سيلين،،، عادي موبردانه
حسيته توتر كلش...
سراج،،، لا ألبسيها،، يعني علمود يعني،،علمود ألي جوا ملابسج ميبن لأن مبلله
سيلين،،، هسه تنشف ماعليه شي
سراج،، لا اله الا الله،، ياربي هل بنيه صدك فطيره
سيلين،،، شنو؟
سراج،، ماكو شي سلامتج بس اخذي الستره ولبسيها وخلصيني مو شعوطتيني،،، يبا افهمي شلابسه جوا ملابس،، هسه من تبلل قميصج صار يبين واضح
سيلين،،، مالابسه شي جوه مالحكت
سراج،،، هنا متحمل صار بضحك.... يابنت الناس افهمي مو راح تجلطيني،،،، جوا قميصج اكو لون وردي مبين واضح وعيب من الناس اخذي الستره لبسيها
سيلين،،، من الصدمه بعد مافهمت قصده عتيت الستره من ايده عت ولبستها مثل اللمخبله ومن فشلتي ماباوعت حتى بوجها اخذتهه ركضه للمدرسه
لكيت الحارس ديغلق الباب توسلت بي ودخلت بيومها الكل سألني على الستره لأن مبين رجاليه واني كل مااتذكر الموقف اغم روحي على غبائي واموت خجل على هل موقف
من نشفت ملابسي نزعت الستره وضميتها بالحقيبه
ورا يومين امي قررت تروح لبيت اهل سراج وتاخذ خواتي الكبار وياها توسلت بيها حتى اروح وياهم ماقبلت من اجه والدي للبيت وسمعني كللها.. اخذيها وياج
طرت للغرفه بدلت ولبست حجابي واخذت الستره خليتهه بكيس اسود ورحنه كان اول مره ادخل لبيتهم لكيناهم مسوين كعده بالحديقه ومسوين كيك ومعجنات وچاي من شافونه كاموا استقبلتنه امهم ووياها لمياء
الجو كان حلو جو ربيع والأشجار تفوح برائحة القداح خصوصا قبل يومين هواي نزل مطر وضلت الأشجار رطبه
كعدنا وياهم بالحديقه اجت بنيه سلمت علينا وعرفونا عليها كانت زوجة ابنهم الكبير بهاء الدين
لمياء عافت الكل وكعدت يمي عبالك مامصدكه داخله لبيتهم كل شويه تعبر عن فرحتها لأن زرتهم
سيلين،،، اكلج لمياء اريد انطيج شي بس موكدامهم
وگفت على حيلها...
لمياء،،، كومي سيلين اريد اراويج شي
ام شاكر،،، وين ماخذتها يمه عيب اخاف اكو واحد من ولدكم بالبيت؟
لمياء،،، لا خاله الكل طالع بس أحنا بالبيت
سيلين،،، هزتلي راسها امي حتى ادخل
دخلتني للصاله الداخليه قدمتلها الكيس
لمياء،،، شنو هذا؟
سيلين بخجل،،،، هاي اريدج تنطيها لأخوج
لمياء بتلاعب،،، منو منهم عندي اربع اخوان؟
سيلين،،، شبيج لمياء لتصعبيها عليه من دون شي فشلانه بسبب الموقف
لمياء بأبتسامه خبيثه،،،، ياموقف؟
سيلين،،، سولفتلها كل الصار
لمياء،،،،، ههههه خرب ببليسج ينلام من يسميج فاهيه وفطيره
سيلين،،، لمياء فدوه لتقلدون عليه
لمياء،،، ومنو كلج جاي أنقلد؟ اصلا هو ذايب بفهاوتج وبرائتج
سيلين،،، منو هو الذايب؟
لمياء،،، لاهيج قصدي فهاوتج حلوه تذوب الگلب
سيلين،،، شكرا
لمياء،،، عززززه هاي عود صدك؟؟! هههه
سيلين،،، شبيج،، شصاير؟
لمياء،،، سيلين انت كلش بريئه من ياعصر انتي؟
سيلين،،، من هذا العصر،،، اكلج اخذي الستره وضميها وفدوه لتكولين لأي شخص عيب فشله واريد تتشكرين منه
باوعت ورايه وأبتسمت....
لمياء،،، انتي شكري بنفسج
سيلين،،، اني اخجل انتي شكري نيابتا عني
سراج،،، لاشكر على واجب
سيلين،،،، فزيت من سمعت صوته وارتبكت
انداريت علي واني خجلانه ومتوتره
سراج،،، شلونج ام عيون؟
سيلين،،، رديت بلهفه
لا اني اسمي سيلين مو ام عيون
سراج،،، هههه،،، اهلا سيلين
سيلين،،، اهلا بيك،،، من رخصتكم
سراج،،،على شنو ردتي تشكريني؟
سيلين، على الستره وعلى كل مواقفك ويايا شكرا كلش شكرا
سراج،،، ههه،،، عفوا كلش عفوا
سيلين،،، طلعت مسرعه من المكان وقفني صوته
سراج،،، سيلين
ألتفتت علي....
سيلين،،، نعم
سراج،،، نعم الله عليج،،، يبا بعد لاتطلعين وحدج ابد
سيلين،،، لاهي بس هل مره وبعدين ماكو شي هاي البنات كله تروح وتجي وحدها
سراج،،، انتي تختلفين تجيبين التايه
سيلين،،، ياتايه.،، منو؟
سراج،، والله شكلي اني ألي تهت وبعد مااندل دربي
لمياء،،، هههههه ها يالثكيل وكعت
سراج حك راسه وصعد الدرج
سيلين،، شبي اخوج؟
لمياء،، مابي شي حبيبتي تعالي نطلع يمهم
سيلين،، كعدنا برا وامي ماعدها سالفه غير كاعده وتحمد بخواتي ونضافتهن وطبخهن أبتسمت على كلامها ومبالغتها من شافتني خزرتني وكالت..
ام شاكر،،،ها يالنضيفه شبيج لازم ماعاجبج كلامي؟
سيلين،،،غابت أبتسامتي وجاوبت بتوتر....
_لاماما مابيه شي
ام شاكر،،،، أي مو أكول،،، على شنو تضحكين وأنتي لاشغله ولاعمله خلف الله على خواتج شايلين چيفتج
سيلين،،،أنهضمت من كلامها وفشلتي كدامهم جاوبت...
اني بعدني صغيره كل شي مااعرف ولا ادبر شي مگضيتها بس دراسه
لمياء،،، لتخافين القاضي راضي
سيلين،،، خزرتها ام بهاء
لمياء،،، قصدي بالمستقبل ان شاء الله ألي يتزوجج يرضى بيج مثل ماانتي
ام شاكر،، وينها ووين الزواج بعدها صغير ه كل عمرها،، ١٥ ونص خلي يتزوجن خواتها الكبار بالأول
سيلين،،، كاعدين وطلعت حفيدتهم صغيره بيدها باكيت چكاير
لمياء،،، عززززه،،، عزززه ولج مين جبتي؟
ام شاكر،،، اخاف چكاير ابوهه؟
ام بهاء،،، لا بهاء الدين ميدخن عنده ربو وسراج الدين يموت من الچكاير ميتقبلهن و لوتذبحي ميدخن بس هاي سوالف باهر ابو الفواين هاي چكايره
لمياء،،، هو وينه باهر؟
ام بهاء،،، هاي يمكن منبشه بغرفة عمها ومطلعته شوفي وين ضامه
ام شاكر،،، باهر ماشايفي
ام بهاء،،، اي يم بيت اهلي بسامراء هناك يداوم كليه منشوفه غير بس بالعطل
سيلين بهمس،،، اسماء اخوتج على نفس الوزن والقافيه
لمياء،،، ههه،، لا بس بهاء وسراج
سيلين،،، تدرين بالبدايه عبالي اخوج سراج اكبر واحد بيكم؟
لمياء،،، هو هم هيج صح هو الوسطاني بس كلنا نعتبره الكبير سراج ذكي كلش وسبع ماخله شغل يعتب علي ابويه وامي معتمدين علي بكل شي
بس بالحقيقه اكبر واحد بينا اختي ام مصطفى ورا ثلاث سنوات انولد أخويه الثاني بهاء الدين مثل ماسمعتي متزوج وعنده بنات ثنين وهم ورا ثلاث سنوات أنولد الثالث سراج الدين وورا ثلاث سنين أنولد اخونا باهر ورا باهر اني نولدت هم بعد ثلاث سنوات واخيرنا باقر
سيلين،،، وهم ورا ثلاث سنوات
لمياء،،، ههه صح. امي حالفه كل ثلاث سنوات تزركلها واحد حاسبتها حساب
سيلين،،، سبحان الله شلون صدفه
مر وقت وبعدها ترخصنه ورجعنا للبيت وامي من يومها منعتني اروح لبيتهم نهائيا بس تاخذ خواتي مافهمت بوقتها ليش بس بعدين فهمت
من يومها بعد ماشفت سراج خلصت السنه الدراسيه ونجحت وانتقلت للخامس اعدادي وصار عمري ١٦ سنه
صارت العطله وبيوم من الايام اجونه بيت ام بهاء
صرت كلش افرح من اشوف لمياء روحها حلوه وحسيتهه قريبه ألي حبيتها وهي كذلك اجت كعدت يمي وتكلمت بهمس...
لمياء،،، اكلج سيلين اذا واحد تقدملج وشخص زين توافقين؟
سيلين،،، لا طبعا بعدني صغيره وأريد اكمل دراستي
لمياء،،، واذا هل شخص وافق تكملين الدراسه؟
سيلين،،، لامااوافق،،،وبعدين أني ماأعرف حتى طبخ مااعرف اسوي شي
(بوقتها كل تصوري المرأه اهم واجباتها الزوجيه هي الطبخ والتنضيف وتربي الأطفال ألي مااعرف شلون يتكونون)
رفعت راسي من صارت ام بهاء توجهلي الكلام
ام بهاء،،، سيلين ماشاء الله سمعت ناجحه ودرجاتج زينه مبروك عليج يمه
سبلين،، شكرا خاله الله يبارك بيج
ام بهاء،،، حلوه اللبنيه تخلص دراسه وتوصل بس نهايتها زواج وبيت واسره وانتي ماشاء الله تخبلين والعين عليج وصراحه اني رايدتج لأبني
ام شاكر بنتر،،،، سيلين صغيره مومال زواج بس خواتها الكبار ننطيهن ونتشرف بيكم
ام بهاء،،، البنات حسبت بناتي وماكو فرق بس أحنا رايدين سيلين
ام شاكر،،، لا ام بهاء انتي عزيزه عليه ومااريد اردج
بس سيلين متزوج اذا موخواته الكبار يتزوجن قبلها عيب شيكولون الناس غير ازوجهن بالسرا لو انعوف الكبار ونزوج الصغار؟ وبعدين سيلين جايفه كل شي متعرف مومثل خواتها معدلات
ام بهاء،،، يعني شنو متنطونا؟ زين شوفي ابوها وهي شتكول يجوز يوافقون ترا سراج خوش سراج مولأن ابني بس ماكو منه
ام شاكر،،، الله كريم
سيلين،،، انكفخت على راسي من سمعت اسمه جايين يخطبوني لسراج باوعت على لمياء ابتسمت بوجهي
لمياء،،، وافقي سيلين متخسرين اخويه شاريج
سيلين،،، ماكدرت اجاوب عفتهم ودخلت للغرفه
شويه وسمعت صوتهم راحوا دخلت امي للغرفه جرتني من شعري
ام شاكر،،، كتلج لتروحين لبيتهم،،، كتلج لتطلعين من تجي ام بهاء،،، هسه زين من وكفتي نصيب خواتج
سيلين بألم،،،اااااخ،،، اني شعليه؟ قابل اني كلتلهم تعالو خطبوني؟
ام شاكر،، والله مااستبعدها،،، باعي لج اذا ابوج سألج ترفضين،، سراج ياخذ اكبر خواتج انتي سوگج ماشي مااهتم بس فاتن والاء محلوات اريد ازوجهن وحده صار عمرها ٢٢ والثانيه ٢٠ وللان ماكو احد خطبهن،،، سمعتيني لولا؟ واريد منج من تشوفين لمياء تسوين نفسج جايفه وعرمه وتمدحين بخواتج كدامها
سيلين،،، اي ماما،، اي،،، بس عوفيني اصلأ مااريد اتزوج
بيومهه شفت نضرات الحقد بعيون خواتي..
بالليل سألني والدي ورفضت رغم اني رافضه الزواج بس مااعرف ليش كلش ضجت من كلام امي احس سراج شخص يخصني ومستصعبه يتزوج وحده من خواتي انهضمت كلش
صرت اتخيل شلون يتزوجون وهو يحميها مثل ماحماني ويبتسمله مثل مايبتسملي عشت بتناقض ساعه احس نفسي انانيه وضميري يأنبني اتجاه خواتي وساعه احس سراج ملكي ومااريد احد ياخذه مني مو حب لأن بوقتها ماكنت اعرف او افهم معنى الحب بس اني مراهقه تعلقت بشخص اعتبرته منقذ ألها
امي ردت الرفض وفهمتهم الرفض مني وصارت تدلل بخواتي علني بس ماتقدموا واصلا من يومهه بعد مادخلو بيتنا بس امي تروحلهم
خلصت العطله ورجع الدوام داومت صف خامس صرت اروح وارجع مع مجموعه من البنات للأمان وكله نمشي على الشارع مندخل بالأفرع
مره لمحت سراج من بعيد ونضراته متركزه اتجاهي من يشوفني انتبهله يدير وجهه كذا مره تكرر هل الأمر
بعد فتره رجعوا اهل سراج زارونا وامي طارت بيهم اجت لمياء كعدت يمي مثل كل مره وهمست...
لمياء،،، سيلين ليش رفضتي اخويه؟
سيلين،،، مااعرف
لمياء،،، شنو متعرفين؟ انتي مارضيتي بي غير اكو سبب لوهيج كوليلي شنو بسراج ماعاجبج؟
سيلين،،، اكتفيت بالسكوت لأن ماعندي اجابه
هي هم سكتت من شافت مارديت
ام بهاء،،، شلونج سيلينه؟ شخبارج؟ شلونها دراستج؟
سيلين، زينه خاله الحمد الله
ام شاكر،، سيلينه سباعيه مينخاف عليهه كل درجاته ترفع الراس
سيلين،،، باوعت على امي واني مستغربه مديحها ألي
ام بهاء،،، عفيه بالسبعه والله ياام شاكر انتو صح رفضتونا بس للان احنا رايدين نسبكم
سيلين،،، قبل لتكمل كلامه امي قاطعته بكلام خلتني من الصدمه مااكدر اتنفس
ام شاكر،،، وأحنا نتشرف بنسبكم اختاروا ألي تعجبكم وانتو فصلوا وأحنا نلبس طبعا ماعدا سيلين لأن أنخطبت لأبن أخويه
سيلين،،، باوعتلي لمياء وام بهاء بصدمه واني ماافرق عنهم نفس الشعور حسيت
ام بهاء،،، شنو سيلين انخطبت؟؟!!
ام شاكر،،، اي لأبن اخويه هي محجوزه أله من همه وصغار وهسه يريدها
ام بهاء،،، بس احنا من ردنا سيلين كلتو صغيره مننطيها ومنزوجها قبل خواتها الكبار شنو تغير هسه؟
ام شاكر،،، ماتغير وسيلين انخطبت بس مو هسه تتزوج بس حجزوها و ألايتزوجن خواتها يله ياخذوها وانتو ياهي من البنات تريدون وتعجبكم احنا موافقين
ام بهاء،،، والله احجيها مثل ماهي الأمر مو بيدي الولد رايد سيلين واني مااكدر افرض علي غير وحده
ام شاكر،،، انتي تكدرين تقنعي ام بهاء هي الام بيدها كل شي وتتحكم بالبيت انتي يحتاجلج وحده بالبيت تساعدكم ومعدله وام بيت وأصلا سيلين متفيدكم هي صح بنتي بس احجي حضي وبختي سيلين خارمه ومابيها حظ مومال زواج
سيلين،،، امي جلطتني بكلامها ومااكدر ارد وحتى مااعرف شنو ارد بهل وضع كل هل شغل والتعب وتكول عليه خارمه
لمياء،،، سيلين اريد اعدل شالي وين الغرفه
ام شاكر،،، يمه لمياء هذيج مرايه مال مغسله وعدلي شالج
لمياء،،، لا خاله موبس شالي ملابسي هم ولهذا ردت بالغرفه
سيلين،،، امي خزرتني ونضرتلي نضره محذره
اخذتها ودخلنه لغرفتنا أني وضحى مشتركه،،، غلقت الباب
لمياء،،، سيلين شنو السالفه لتخبليني شلون وافقتي على ابن خالج انتي موكلتي ماناويه اتزوج ليش وافقتي؟
سيلين،،، ماادري الموضوع يم اهلي
لمياء،، وسراج سيلين وسراااج؟
سيلين،،، شبي سراج؟
لمياء،، اذا يدري صرتي لغيره شراح يصير بي يتخبل والله ميضل براسه عقل ولج سيلين اخويه هاوييج حابج ليش كسرتي بي ترا مابدر منه غير كل خير
سيلين،،، ماعرفت شنو اجاوبه ضليت صافنه بوجهه احاول استوعب اعترافها بحب سراج ألي
سمعنه صوت ام بهاء تصيح لمياء حتى يروحون طلعت لمياء حزينه
اجت للغرفه امي تهددني اخاف كذبت كلامها بس حلفتلها ماحجيت شي
كنت متصوره موضوع ابن خالي كذبه بس بالليل من أنفتح الموضوع تفاجئت من طلع حقيقه لكن والدي وشاكر رفضوا والمفاجئه الاكبر من كلتلهم أمي عن لساني....
ام شاكر،،، سيلين موافقه على ابن خالها
ابو شاكر،،، اخليها بلا زواج العمر كله وماانطيها لأبن اخوج المسربت الساقط شنو هذا الزعطوط انطي مره
ام شاكر،،، اسأل بنتك
سيلين،،، تباوع عليه وتخزرني وتهدد بنضراتها حتى أئيد كلامها لكن شاكر انقذني من جاوبها
شاكر،،، سيلين واني وانتي والكل يعرف ابن اخوج ساقط وحتى شرب يشرب لتعبين نفسج زواج ماكو
سيلين،،، ارتاحيت من سدو الموضوع
من بعد هل يوم بعد ماشفت سراج ولالمحته يم المدرسه اختفى لكن اختفائه ترك فراغ بداخلي ماكنت اعرف ليش؟ وبيت اهله هم بعد مااجونه وحتى امي قللت زياراتها ألهم لان ثكلوا وجهم عليها
وطبعا ماصار ألي بالها وماخطبوا خواتي وأنقطعت الاخبار
مرت الاشهرواني صرت حتى احلم بسراج من كثر تفكيري بي اريد بس اشوفه او اسمع عنه شي صرت اتذكر كل مواقفنه سوا تعبت ومااعرف ليش هل المشاعر؟ ولاليش هلكد افكر بي؟
نفسيتي تعبت وتمرضت اسبوعين اني فلاونزه وأمي تسويلي أعشاب وأشرب وتزيد حالتي سوء متقل
تفكير ودراسه ومرض احس انتهيت صرت اسخن الليل كله وكل يوم من اسخن اشوف سراج يجيني ومن اصحى اعرف هل شي هلوسه من الحراره
مابقى غير شهر تقريبا لأمتحانات نهاية السنه واكون خلصت من الخامس
كانت ايام صعبه عليه اتخربط بالليل وثاني يوم ادوس على نفسي واداوم لكن هاي الايام تعبت كلش حتى التنفس صار صعب عليه ضليت كم يوم بالبيت بس بعدها انجبرت اداوم عندي امتحانات شهريه
داومت بيومه واني منتهيه نص الدوام وتخربط وضعي صرت اسحب النفس بالموت راحوا الطالبات على المديره ومن شافت وضعي طلبت من زميلاتي يوصلوني للبيت رجعوني الطريق كله كل شوي احس راح يغمى عليه احس ماكو اوكسجين صرت اشخط من ضيق التنفس
وصلت لفرعنه شفت سيارة سراج واكف يم بابنا و شاكر يمه يسولف،، طبعا علاقتهم قويه واصدقاء صاروا
احنا ونمشي اندار شاكر شافني شلون يمشون بيه البنات وأني منتهيه اجاني يركض وتبعه سراج
شاكر،،، سيلين شبيج ليش هيج حالج؟
جاوبته زميلتي...
_ تخربطت ومتكدر تتنفس المديره كالت اخذوها للبيت
سيلين،،، اخذني منهم اباوع سراج نضراته ماليها القلق
سراج،،، يمكن تحتاج دكتور؟
شاكر،،، هي صار اسبوعين هذا وضعهه وهل يومين زاد،،، جاوبيني سيلين شتحسين؟
سيلين،،، اجر النفس بصعوبه مااكدر اجاوب من شافوا وضعي
سراج،،، امشي شاكر ناخذها للمستشفى وضعها الضاهر موزين
سيلين،،، فتح سراج باب السياره وصعدني شاكر ودخل للبيت يركض طلع وامي ويا تلبس بعباتها اخذوني والطريق كله انتهيت حسيت هاي نهايتي اخر شي فقدت اسمع اصواتهم موفاقده كلش بس يمكن بسبب قلة الاوكسجين ماأكدر افتح عيني ولاارد
اسمعهم أنخبصوا بيه وسراج يكول لشاكر خلي نوديهه مستشفى اهلي واهلي رافضين لأن وضعنه المادي ميسمح وسراج يكلهم هويتكفل بكل شي
صرت افتح عيني واغمض والطريق عبالك صار بعد سنه وصلنا دخلوني للطوارى وبعد الفحوصات حولوني لمستشفى العزل لأن طلعت مصابه بذات الرئه دخلوني للمستشفى وسوولي طبله خلولي مغذيات وابر وعلاج واوكسجين وكل هذا وأحس حالتي تسوء اكثر
أباوع المكان معزوله اني وكم شخص بغرفه كلمن وسريره تفصلنه ستائر.. اهلي اسمع اصواتهم بالخارج
يومين شفت الموت بعيني اهلي يدخلون بكمامات،،، طول هل يومين اسمع صوت سراج بالمستشفى واعرف هذا كله هلوسه بسبب ارتفاع حرارتي ورا اربع ايام شوي تحسنت بس طلعت متوهمه
تنفسي ضعيف كلش على الاوكسجين عايشه خامس يوم الصبح مغمضه عيني أجه الدكتور فحصني بلحضتها سمعت صوت سراج كنت متوقعه مثل كل مره من الهلوسه لكن من ركزت عرفت اني مدااهلوس خصوصا من سمعت كلامهم
ابو شاكر،،، ها دكتور بشر شلونهه؟
الدكتور،،، حجي هواي متأخرين يله جايبيه كان المفروض اول متشوفون هيج وضعها متركوها
المشكله سوينه كل شي حتى نعالجها لكن الرئه كلش متضرره
سراج،،، دكتور شنو الحل؟ مو ألا هنا نطلعها لغير مستشفى نجيبلها دوا معين من برا بس كول
الدكتور،،، كل ألي مفروض يصير سوينا بقت يم الله وماراح اخفي عليكم حتى تكونون متهيئن لكل شي وضعها تعبان والرئه نسبت التلف بيها قويه وحرارتها طول الوقت مرتفعه تنزل شوي وترجع تصعد وحتى گلبها تعب
سراج،،، وهاي البقع الحمره شنو بوجهه؟
ابو شاكر،،، لاهاي بسبب الحراره هي من جانت صغيره من تسخن وجها يطكع
سراج ،،،،زين دكتور سوي شي لتعوفوها هيج لابد اكو حل بعدها بأول شبابها شنو شافت بحياتها واذا ماكو حل كولوا حتى نطلعها لغير مستشفى نشوفلها دكتور معروف بهل مجال
الدكتور،،، هسه راح يجي عدنا دكتور معروف عيادته اسابيع وشهر يله يوصل سرا المريض وهنا يداوم يومين بالأسبوع راح يفتر على المرضى واخلي يتابع حالتهه بس احسبوا حساب هذا ميعتمد على ادوية المستشفى كله من برا وادويته اسعارها خياليه
سراج،،، مومهم شيريد حاضرين بس خلي نوصل لنتيجه
سيلين،،، راح الدكتور وبعد ألي سمعته تأكدت اني منتهيه وصارت ايامي معدوده اسمعهم وماعندي قدره حتى اتحرك
ابو شاكر،،، بنتي جاي تروح من ايدي ومابيدي شي ولا وضعي يسمح شنو هل اختبار ياربي ألك بيها اراده بس لتحملنا مالا طاقة لنا به
سراج،،، عمي لتشيل هم فلوس
ابو شاكر،،، وليدي وانته هم شعندك تشتغل وتتعب طول النهار حتى تصرف على نفسك واهلك وعلى اخوتك حتى يدرسون
سراج،،، عندي عمي عندي الحمد لله
ابو شاكر،،، صارلك ايام تصرف وتساعدنا وترگض ويانا ماقصرت هواي صرفت اصلا
سراج،،، كل فلس عندي تحت امركم واذا ماكفن اعرض سيارتي وألى ان تنباع اداين من خوالي ونعالجها لتشيل هم عمي
ابو شاكر،،، عمي انت ابن اصل وماكو منك وفضلك للموت ماانسى
سراج،،، ماكو فضل بين الاب وابنه ولا بين الأهل وانتو اعتبركم اهلي
ابو شاكر،،، الأهل ماسووا سوايتك الكل سمع وماشفت منهم ولاواحد.. الله يرضا عليك ويرضيك
سيلين،، صار هدوء
ابو شاكر،،،، اني رايح للحمام شوي وأجي اخاف يجي هذا الدكتور الكالوا علي وماكو احد،،، بلاامر عليك ابقى هنا
سراج،،، روح عمي اخذ راحتك ضال هنا اني
سيلين،،، حسيت شخص صار قريب عني عرفت سراج من جر حسره وتكلم...
سراج،،، شصاير بحالج سيلينتي ياريت اگدر اشيل التعب والمرض عنج،،، ياريتها بي ولا بيج،، روحي تطلع واموت الف موته من اشوفج بهل حال،، نفسي ينگطع من اشوفج تشهكين وتجرين النفس گوه
فتحي عيونج الحلوه وكوميلنا بخير والله وداعت عيونج السبوني سبي ماريد منج شي،، بطلت،،، حتى لو تصيرين لغيري موافق بس المهم عايشه ومرتاحه وتشتمين الهوا،،، يمكن الديصير عقاب من الله لأن اعترضت على امره من سمعتج صرتي لغيري
سيلين،،، سمعت كل كلامه ومافتحت عيني واصلا ماعندي طاقه لأي شي بس مجرد كلامه ولهفت صوته ووجوده ومحاولاته حتى يساعدني بكل مايملك هذا الشي وحده كان كافي حتى احس بالأمان والقوه كان المنقذ بأصعب اوقات حياتي
بيومها الدكتور مااجه ووضعي ماتغير للعصر واني على حالي واسمع صوت بس ابويه وسراج الضاهر هم بقى ويا
فجئه ومن غير سابق انذار حسيت اختنكت خلولي اوكسجين لكن هل مره مافاد تنفسي مو ضعف لا حسيت مجرى التنفس انغلق
انهاريت صار جسمي ينفض وأضرب على صدري واتعارك ويا روحي واشهك وأسحب النفس بصعوبه جدا صرت أنازع أسمع صياح ابويه وسراج على الدكاتره فتحت عيني واشوف دموعهم ثنينهم واني هم دموعي تنزل نبضي ضعف وبديت أفقد اخر شي سمعته صوت الجهاز يصفر بعدها فقدت
.
.
بديت استفيق فتحت عيني بنفس المكان لكن تنفسي افضل باوعت شفت ابويه وسراج تقدموا بلهفه
ابو شاكر،،، الحمد الله على سلامتج يابا متت ورجعتلي الروح برجوعج
سيلين،،،يحجي ودموعه تنزل باوعت على سراج هم يمسح عينه،،، ابتسمتلهم وجاوبت بصعوبه صوتي رايح...
_اني زينه لتخافون
هل كلمه ماكانت كلمه عاديه بالنسبه ألهم سراج حضن والدي وبالمقابل بادله الحضن ويطبطب على ضهره استغربت حالهم الى ان دخل شاكر من شافني تقدم بلهفه راد يرفع الكمامه عاطوا بي ثنينهم رجعها
شاكر،،، الحمد الله على سلامتج شلونج هسه؟ يمعوده نشفتي دمنا
ابو شاكر،،، زينه ان شاء الله بنيتنه قويه رجعتلنه من الموت،، الله حفضها
شاكر،،، وگفت گلوبنا من البارحه لليوم
سراج،،، عدت ان شاء الله
سيلين،،،، شبيكم،،، نمت شويه وكعدت هذا حالكم؟
شاكر،،، نمتي شويه؟؟؟!! اختنكتي ووگف گلبج ورجعوا النبض بجهاز الصدمات وصارلج ٢٤ ساعه ويمكن اكثر وانتي فاقده متنه ألف موته وانتي هسه عبالج نايمه شويه؟
ابو شاكر،،، لتحجي هيج وتخوفهه مابيها شي ان شاء الله امشي ولك جيبلنا عشا بهل مناسبه والصراحه متنه جوع
سراج،،، راح اروح اني اجيب
ابو شاكر،،، لاوليدي ارتاح هواي تعبت ويانا هسه شاكر يجيبلنه ويجي
سيلين،،، بابا،،، اني جوعانه
ابتسملي ورد...
ابو شاكر،،، يخسى الجوع هسه نشوف الدكتور شنو يسمحلج ونجيبلج
سيلين،،، راح شاكر واول ماطلع صدمني والدي بكلامه
ابو شاكر،،، وليدي تعشا وروح ارتاح تعبت ويانا حتى شغلك عايفه راح يصير اسبوع
سراج،،، هذا واجبي عمي ماسويت شي لأخر لحضه شتحتاجون اني حاضر
ابو شاكر،،، وكفاتك هواي وليدي ووكفتك هاي اثبتت معدنك الزين والأصيل انته صرت حسبت ابن الله شاهد واني من بنتي وصلت للموت وشفت وضعك عليها وشفت دموعك واني اعرف ألي مثلك رجال متنزل دموعه غير بس على عزاز گلبه تأكدت ماكو شخص يستاهلها غيرك طلبتها للزواج اكثر من مره ورفضنه وهسه اني اكلك موافق اذا بعدك رايدها
سيلين،،، الصدمه ماكانت بس ألي لا حتى سراج شهك وفتح عينه ودار نضره عليه
سراج،،، عمي اني اتشرف وطلبتها اكثر من مره ورفضتوا وسحبت نفسي من سمعت بيها انخطبت لأبن خالها
ابو شاكر،،، خطبها ابن خالها صح بس كلناله ماكو نصيب رفضنا
سراج،،، صددددك!!!؟ يعني هسه هي مومخطوبه يعني ماصارت لغيري؟ اقصد،،،يعني،،، والله عمي مااعرف شنو اكول بعد ،، صدمتني
ابوشاكر،،،، ههه،،، اي صح ماصارت لغيرك واذا الله راد متصير لغيرك كل شي قسمه تبقى السالفه بيد سيلين اذا هي هم وافقت بالخير والتمام اصلا مهرتنا ميلوكله خيال غيرك واعرف انت راح تصونها وتحافظ عليها تكوم بالسلامه ونرجع نفتح هل الموضوع
سراج،،، عمي اني اتشرف بنسبكم
سيلين،،، من الفشله غمضت عيني اهرب من ألي سمعته ترخص سراج وطلع
ابو شاكر،،، ههههه،،، فتحي عيونج يابا ماكو داعي للخجل باعي عليه اعرف انصدمتي وخجلتي من الصار واعرف مووقتها أنفتح هل موضوع بس يابنتي بعد ألي سوا سراج وبعد ماشفت اليوم شلون خاف وانهار عليج تأكدت هل ولد شاريج ومستعد يبيع ملابسه ألي لابسها حتى يعالجج و تعيشين مع انو جان متصور انتي انخطبتي وصرتي لغيره ومع ذلك ماعافج
غيره واحد يكول رفضوني شعليه بعد بيهم بس هو ماسواها لأن ابن اصل هذا الرجال ألي اكدر اعتمد علي وأئمنج عنده وافقي بنتي وماراح تندمين
سيلين،،، امي،، مترضى،، بي
ابو شاكر،،، موبكيف اي احد واصلا حتى امج بعد ماشافت وكفته هم ندمت على رفضها بقى الموضوع يمج توافقين او ترفضين
.
.
سيلين،،، استمريت ايام تحت اشراف هذا الدكتور ألي كان أله الفضل بعد رب العالمين في تحسن حالتي صح الادويه كله نشتريها احنا من خارج المستشفى وبمبالغ مرتفعه بس النتائج كانت جيده
بدا تنفسي ووضعي يتحسن وصارلي تقريبا ١٠ ايام بالعزل وقررنا بعد استشاره دكتوري انو اطلع من المستشفى وفعلا رجعت للبيت بس تحت ضروف خاصه واهتمام خاص لأن ماتم الشفاء نهائيا
بعد اسبوع من مغادرتي المستشفى زارونا بيت اهل سراج كان واضح من وجوهم وابتسامتهم فرحتهم بتحسني وقبل ليروحون رجعوا طلبوني ورجع والدي فتح ويايا الموضوع كنت متردده وخايفه حالي حال اي بنت لكن والدي عرف شلون يقنعني وياخذ مني الموافقه لكن بشرط تكون بس خطوبه حاليا وميصير الزواج ألابعد مااخلص السادس امي اعترضت كالعاده لكن شاكر ووالدي قنعوها وهي اقتنعت لأن وصلت لقناعه تامه انو سراج ولاممكن يتزوج وحده من خواتي لأن متعلق بيه،،، وبنفس الوقت سراج اثبت انو شخص مينرفض
وافقت لكن شرطت يتأجل موضوع العقد حتى تكون علاقتي رسميه وياسراج وماكو لاطبه ولاطلعه وردولهم الخبر ووصلولهم شروطي ووافقوا من دون نقاش
حسيت خواتي ضاجن بس ألتزمن السكوت وخلال اسبوع صارت المشيه وقراءه الفاتحه ماحضر من اقربائنا غير كم شخص لأن والدي الأبن الوحيد لأهله وعندي ثنين عمات وحده عايشه والثانيه متوفيه وامي علاقته سطحيه مع اهلها لهذا ماعزمت اي شخص لهذا كان العدد قليل واهل سراج احترموا وقدروا هل شي لهذا حضر اهل بيتهم كلهم ومن اهل امهم كم شخص فقط
بيومها لبست فستان وردي من الستان بسيط ومستور واكتفيت انو اسرح شعري ألي كان طوله متوسط وخليت مكياج سمبل يبرز معالم وجهي طلعت كلش نازكه ورغم البساطه ألي هي كانت من ابرز صفاتي لكن الكل انبهر بشكلي
بعد الاتفاق و قراءة الفاتحه دخل سراج كان شكله يخبل بس واضح التوتر علي من شافني ابتسم ابتسامه عريضه بعد السلام كعد بصفي وتقرب وهمس...
سراج،،، شلونج ياصاحبة عيون الزمرد؟
سيلين بخجل،،، الحمد الله
سراج،،، يستاهل الحمد،،،،، اكلج شنو سالفتج ويا الوردي؟
سيلين،،، ليش؟ شنو متحبه لو مالايكلي؟
سراج،،،، جنت مااحبه بس من يوم شفته عليج وللان صار المفضل عندي
سيلين،،، باوعت علي مافاهمه قصده كتله....
هوانت شوكت شايفني لابسه وردي؟ اصلا نادرا ألبسه
سراج،،، لتفكرين هواي حبيبتي المهم اني اتذكر شوكت
سيلين،،،، كلمة حبيبتي خلتني افقد التركيز ابتسم على وضعي واني نزلت راسي خجلانه من نضراته بوقتهه مافهمت سالفت الوردي ألا من كعدت ويا نفسي واسترجعت ذاكرتي وحمدت ربي بوقتهه مافهمت قصده على ملابسي الداخليه لأن لو فاهمه كان عفت المكان وانهزمت للغرفه من الفشله
سراج،،، شدعي عليج ياعمتي هسه شيصير لو عقدنا
سيلين،،، امي سمعته رغم كان كلامه بصوت منخفض جاوبته بس بالشقه
ام شاكر،،، تريد تعقد حتى تتختل وياها لا عيني هذا حلمك
سراج،،، عمتي العزيزه المهم صارت خطيبتي
ام شاكر،،، صارت خطيبتك بس بعدها محرمه عليك لأن ماكو عقد ولأن انت تستحرم بهيج حاله راح اضمن علاقتكم تضل رسميه منا للزواج
سيلين،،، همس بصوت بس اني سمعته
سراج،،، خرب عر**ج اليهود مافكروا مثل تفكيرج
رفع صوته وكال...
_اكلج يمه هو مو اكو رؤيه شرعيه لكل ألي يتزوجون؟
ام بهاء،،، اي بس انت شايفها لهذا ماسوينه رؤيه شرعيه
سراج، ، زين شكد عمق الرؤيه الشرعيه ممكن يكون بحيث منوصل للحرام على الأقل نبقى على الشوف منا لما الله يفرجها ولو سالفتنه طويله بس نصبر والله كريم
سيلين،،،، الكل ضحك ومافهمت ليش كالعاده
ام بهاء،،،،هههه سراج يمه اعرفك طول عمرك ثكيل ضل على ثكلك لما الله يفرجها عليك وتصير ألك
بعدها تبادلنا لبس خواتم الخطوبه وصورنا كنت كلش خجلانه اما هو احسه راح يطير من الفرح مافارقت وجهه الأبتسامه ولا بطل نضراته اتجاهي وكأنما يحفظ شكلي
انتهت الحفله البسيطه ومن قررووا يروحون حسيته ضاج ولمياء نصبت علي لأن ميريد يروح قبل ليطلع هداني جهاز موبايل وهذا كان اول موبايل املكه بحياتي لأن اهلي كلش متشددين ماكنت املك موبايل
ودعونا الكل وراحوا فرغ البيت بقينا بس أحنا باركلي والدي وشاكر وكالعاده خجلي سيد الموقف
بالليل قبل لاانام سمعت رنة الجهاز شفت المتصل سراج ترددت اجاوب لأن اصلا مااعرف شنو اجاوبه ولااعرف شنو الكلام ألي يصير بين الخاطبين
نمت من دون ماارد ثاني يوم الصبح رجع اتصل انجبرت ارد بعد كم الاتصالات منه من يومه صار دائما يتصل بيه ونضل نسولف وبديت اتعرف علي ويتعرف عليه وكل متزيد معرفتي بي اتعلق بي اكثر اماهو من اول يوم بلش يعبر عن حبه ومشاعره اتجاهي ماكنت متصوره لهل درجه متعلق بيه ومن سألته شوكت حبيتني كان جوابه..
سراج،،، صراحه ومااكذب اني ماحبيتج من اول لقاء ألنا صح عجبني شكلج البريء وجذبتني عيونج الى درجة كلت سبحان الخالق لكن بنفس الوقت ماشفتج غير مجرد طفله مراهقه حاولت اساعدهه لااكثر ولااقل
ثاني مره من شفتج تذكرتج وعيني راحت على رچلج ردت اشوف تأذت بوقته لولا
فرحت من شفتج بخير بس انتي الله يسلمج مباشرتا ردتي تجيبين لنفسج بلوه جديده ردتي تندعمين،، بوقتها كلت هل اللبنيه شكد فاهيه
سيلين،،، اني فاهيه سراج؟ ليش تزعلني منك
سراج،،، لاعيونه لسراج وعزيزة گلبه كل شي ولازعلج يبا انتي مو فاهيه انت ترفه وتخبلين وين اكو بفهاوتج اقصد بترافتج
سيلين،، ، هههه،،، ترا صرت أفهم كلامك،، بعدين نتحاسب كملي كلامك
سراج،،، صراحه بعدهه شفتج كذا مره بالشارع صح عرفتج بس مااهتميت لأن نضرتي ألج طول الوقت انو انتي مجرد طفله رغم اعجابي بيج
رغم ماخليتج أبالي بس من شفت وسمعت صرختج انتي وزميلتج من رادو يخطفوج حسيت نار صارت بگلبي صح موقفي بوقتها كان سويته ويا اي بنيه اخرى تحتاج مساعدتي لكن انتي بالتحديد حسيتج تخصيني وعرضي وكنت مستعد اموت حتى احميج
ومن طعنوني كان كل بالي يمج وعيوني مافارقتج بس حتى اطمئن انتي بخير وماصارلج شي ومن هل موقغ ضليت ايام اني اهلوس بيج واحلم بيج وافز واني مرعوب وخايف عليج وحتى من صرت زين وبعد مااتعرفت على اهلج طيفج مافارقني واهلي وخواتي بالتحديد انتبهوا لوضعي وصارن يبسمرن بيه على انت تحب اللبنيه وسوني مززق يوميه يضحكن عليه عجزت واني احاول افهمهن نضرتي اتجاهج والف مره كلتلهن هي طفله واني اكبر منه بالعمر بس مافاد وكلامهن بمرور الوقت صار ينزرع براسي واطرد الافكار لأن اني كانت نيتي اتزوج وحده قريبه من عمري افهمها وتفهمني امراه ناضجه ورافض رفض قاطع فكرت الأرتباط بمراهقه وطفله بس اكتشفت انتي موطفله بيوم المطره
سيلين،،،، يوووو سراج ليش مصر تحرجني وتخجلني
سراج،،،، ههههه اموت عليج من تخجلين تصيرين ورديه ياام الوردي صرت احب الوردي والفيروزي بس لأن يذكرني بيج
سيلين،،، يعني ماحبيتني بس معجب بيه؟
سراج،،، ياماحبيتج؟ من اقتنع عقلي انتي موطفله گلبي ومشاعري تحررت وصارت تهاجمني من كل مكان ضليت افهم نفسي ميصير ولتغير مبادئك بس گلبي كان رافض مبادء عقلي وسيطر علي وعليه وفاز بالأخير خصوصا من اجيتي للبيت جايبه سترتي توترت وارتبكت واحس صارت مشاعري مفضوحه ومن كلت تهت بيج أعني هل كلمه لأن صدك صرت تايه ومااندل دربي
وهنا اتخذت القرار وقررت اطلبج ومن سمعت رفضج كلش تأذيت وصار عندي احباط ضليت فتره متأذي من هل شي لكن امي من شافت وضعي قررت ترجع تخطبج وهنا كانت القاضيه من سمعت بيج مخطوبه بيومه صدك عرفت عمق حبي ألج انهاريت من الداخل شطت عليج وتمرضت وقررت ابتعد وانساج حاولت لكن ماگدرت لهذا قررت اتناسى وأتجاهل واكرس وقتي لعملي
لكن من شفتج من تخربطتي گلبي رگض قبلي أتمنيت ألمج واضمج بروحي عشت على اعصابي وكل مره اشوفج وانتي تجرين النفس بصعوبه كنت اموت ألف موته وصلتي للموت واصلا متي ووگف گلبج ماابالغ من اگول متت ورجعت وياج بس الحمد الله بعد الصار الله باوع على حالي وجمعني بيج وهسه اذا تكوليلي شكد تحبني راح اگلج مااعرف لأن فعلا ماكو وصف ولاحدود لحبي صرتي كل شي بالنسبه ألي
سيلين،،، حب سراج وكلامه ومعاملته واهتمامه خلاني احبه وكذا مره يسألني عن مشاعري كنت اخجل اعترف بحقيقة مشاعري وهو يقدر هل شي ويقدر خجلي
بلشت امتحانات نهاية السنه وهو كل يوم صار يوديني للمدرسه وينتضرني ومن اطلع اشوف اللهفه بعينه وبسؤاله اذا جاوبت او لا
ساندني بكل مره امل اواتعب من الدراسه خصلت الامتحانات ونجحت شفت الفخر بعيونه اجه للبيت وجايب كيك وباقة ورد وطلع بوكس صغير فتحه وطلع منه قلاده ناعمه عباره عن زنجيل وبي قلب صغير لونه بلون الزمرد رغم نعومتها لكن شكلها ولونها يجذب
سراج،،، هذي هدية نجاحج اول ماشفته عند الصايغ شفت لون عيونج بيها لهذا مباشرتا اختاريتها ان شاء الله تعجبج واذا ماعجبتج نروح سوا نبدلها بشي على ذوقج
سيلين،،، لا بالعكس كلش حبيتها بس مبين عليها غاليه ومااريد اكلفك
سراج،،، مايغلى عليج شي ياعزيزة گلبه وروحه لسراج
سيلين،،، صرت ألبسها دائما وأتمنيت اگدر اقدمله هديه اني هم بس كنت اخجل مرت الايام وتعودنا على بعضنا صرت مااحس بيومي اذا مااصبح على صوته وهو يصبح عليه
اهتم بأدق تفاصيل حياتي،، تعلقت بي كلش،، صار محور لحياتي،، على ايده وويا عرفت شنو المشاعر والحب والاهتمام
صرنا ببداية شهر السابع كان يوم ميلاده ضليت ابحث عن هديه مناسبه ماعرفت شنو اجيبله رحنا للسوق اني وامي ضليت ادور ماعجبني شي الى ان شفت محل يبيع فضيات وسبح لفت انتباهي محبس فضه وبي شذره زمرديه من دون تردد حسيت هي هاي الهديه ألي ابحث عنها اخذتها واخذت وياها سبحه خرزها بلون الزمرد حتى تصير طقم ويا المحبس
لفيت الهديه واخذت كيكه ورجعت حضرت نفسي ولبست فستان شيفون وردي لأن اعرف شكد يحب هل لون عليه ورغم حبه للوردي لكن يرفض ألبسه من اطلع يريدني ألبسه بس أله
رحنه لبيتهم كان بعده ماموجود شفت اهله استغربوا من شافوني جايبه كيك وهديه وألي فهمته انو همه طبعهم ميسون أعياد ميلاد صراحه حسيت فشلت نفسي وغلطت بتصرفي لكن من دخل للبيت وبعد السلام انتبه للكيك استغرب بالبدايه بس من سلمت علي كلتله
_كل عام وانت بخير
ابتسم ابتسامه عريضه وشفت الفرح واللمعه بعيونه وهل شي شجعني
طفينه الشموع وقطعوا الكيك وسراج ياكل ويبتسم قدمتله هديته فرح ألى درجه حسيت عبالك ملكته الدنيا مو قدمتله هديه
رجعنه وبالليل اتصل بيه وتشكرني على ألي سويته وعلى الهديه
ثاني يوم سوينه گليجه وامي كعدت تعلمني وخلتني اني اشتغل بيها حتى اتعلم هو اني كل شي مااعرف أطبخ واول ماأجت تعلمني جابت اصعب اكله رغم هذا بسرعه تعلمت وصارت كلش طيبه فرحت عبالك مسويه انجاز
العصر اجه يشوفني سراج كعدنا بالحديقه قدمتله گليجه وچاي ومن سمع اني مسويتها تعجب وصار كل مره يطلب مني اسويله منها
بيومها من اجه كان لابس المحبس طالع علي كلش حلو انتبهلي اباوع على ايده
سراج،،، لبسته وقررت بعد مااشيله من أيدي لأن كل مااباوع علي اشوف لون عيونج وأحسج قريبه مني
سيلين،،، اني هم گلادتك لابستها طول الوقت وقررت لومهما صار بينا راح احتفظ بيهت كذكرى بينا وانت هم احتفظ بهديتي
باوعلي بخوف..
سراج،،، ليش هل كلام؟ شيصير بينه يعني؟ احنا سوا وان شاء الله يجمعنا بيت واحد واضل أغرگج بالهدايه ويصير عدنا درزن اطفال وياريت عيونهم مثل لون عيونج حتى يصير كل شي زمردي بحياتي
سيلين،،، ويجوز يجون ولون عيونهم عليك؟
سراج،،، لا ماأتمنى هل شي لون عيونج احلى وافتح لونهن بارز
سيلين،،، صح لون عينك مو كلش بارز مثل عيني بس بالنهايه عيونك حلوه واني كلش احب لون العين العسلي
سراج،،، وهذا تصريح منج بأن انت معجبه بلون عيوني شوكت اسمع اعجابج او حبج ألي شخصيا
سيلين،،،، كاافي سراج لتخجلني عفيه ترا بعد كل شي مااحجي
سراج،،، لا روحه لسراج كل شي ولا تبطلين تسمعيني صوتج وجفصاتج الحلوه اقصد كلامج الحلو
سيلين،،، هااااا سراج؟
سراج،،،، هههه
سيلين،،، تضحك مو؟ تقلد عليه وتضحك روح زعلت عليك
سراج،،، كل شي ولاحبيبي يزعل
سيلين،،، عوف حبيبك وتعال فهمني سالفة درزن جهال يعني الدرزن ألي نعرفه، ورقمه١٢ لو درزن ثاني؟
سراج، هو اريد ١٢ طفل
سيلين،،، عززززززه. ؟!! تحجي صدك لو تشاقى؟ شعدنا فريق كره،، لا عيني بطلت روح شوفلك غيري شنو مفقس،،، خلص مااريد اتزوج
سراح،،، اشاقى وياج لتنفعلين يمعوده اذا اجانا طفلين نعمه كل شي مااريد يبا واذا متريدين جهال هم نسكت
سيلين. باوعتله صفح اشو احسك تاخذني على گد عقلي
سراج،،، ابوس عقلج اني ام منير
سيلين،،، منو هي ام منير؟
سراج،،، انتي
سيلين،،، شنو هل الاسم لا ماعجبني
سراج،.. اي اسم تريدين؟
سيلين،،، مااعرف بس مومنير
سراج، ، خير الاسماء ماحمد وعبد نختار واحد منهن
سيلين،،، مااريد اسم تركيب وطويل لأن انت اسمك طويل
سراج،،،لعد نختار من اسماء النبي
سيلين،،،، يعني محمد حلو اكيد بس هواي مكرر صار
سراج.،، موشرط محمد نكدر نسمي احمد وطه وياسين والصادق والأمين هواي اسماء للنبي
سيلين،،، الأميين،،، اسم حلو واحس يلوك ويا اسمك،، الأمين سراج الدين،،، حلوووو حبيت
سراج،،، اي فعلا حلو،، خلص اسمي من هل دقيقه ابو الأمين
سيلين،،، من هسه صرت ابو الأمين شبيك مستعجل وبعدين منو يكول يجينا ولد بالبدايه يجوز بنيه لومتحب البنات
سراج، ، بالعكس كلش احبهن
سيلين،،، ماكو داعي تخفي مشاعرك الحقيقيه واضح جدا انت تميل للذكور
سراج،،، شوفي ماراح اكذب عليج وأدعي المثاليات مثل اكثر الرجال هو كل شي بيد الله شيرزقنا نعمه وفضيله منه ونحمده ونشكره علي بس اذا تكوليلي شنو اتمنى راح اجاوبج اتمنى اول طفل ألنا يكون ولد وبعدها لوتجي ١٠ بنات مااهتم وبالعكس كلش افرح وأحب البنات طبعا تبقى اماني وارجع واكول هو رزق الله
سيلين،،، يعني مشكلتك اهم شي يكون اول طفل ولد،، زين ليش؟
سراج،،، موشرط اول طفل المهم يكون عندي حتى لو بس ولد واحد ،،، مو بس حتى يشيل اسمي او يلقبوني بأسمه لكن اريد اربي يكون عزوه لخواته ولأهله وسند ألي وألج يشيل كبرتنه
سيلين،،، تريد تربي يصير مثلك شلون انته عزوه وسند لأهلك وواگف ويا خواتك؟
سراج،،، بالضبط
سيلين،،، فهمت قصدك وجوابك واقعي بعيد عن المجاملات
سراج،،، حلو صاير الكتكوت مالتي يحجي حكم كبران ويسولف
سيلين،،، ترا اني موصغيره عيني ترا صار عمري ١٧سنه
سراج،،، العمر كله،،، الله يخليج ألي وميحرمني منج سيلينتي
تدرين عاجبني اذا اجت بنيه هم اسميه سيلين لوسيلينا قريب لأسمج حتى حياتي تنملي سيلينات
سيلين،،، لا عيني مااسمح بهل شي اني سيلينه الوحيده بحياتك اذا تريد سمي بيلين قريب لأسمي وحلو
سراج،،، ليش منو كلج اكو احد ياخذ مكانج انتي عزيزة گلبي انتي وبس والباقي من بعدج
وبالنسبه لأسم بيلين خوش فكره بيلين على وزن سيلين هم حلو،،، متفقين اذا الله اشاء وأجتنا بنينه نسميها بيلين واذا ولد نسمي الأمين
تدرين حمستيني نزوج ويصير عدنه اطفال
سيلين،،، لتتحمس زايد بعد هواي وقت بعد سنه كامله
سراج،،، هواي سنه شراح يمشيها والله ماعندي گلب يتحمل كل هل الفراق اريد نتزوج بأسرع وقت
سيلين،،، هذا اتفاقنه من البدايه
سراج،،، صح،، بس صدكيني من هسه احس بدى صبري يخلص اريد بأسرع وقت نتزوج وتصيرين ألي
سيلين،،، ليش موصرت ألك بعد شكو؟
سراج،، ماارتاح ألا تصيرين يمي وبيتي وعلى اسمي
سيلين،،، اعذرني مااگدر ومترهم مااكدر اوفق بين الدراسه والزواج خصوصا أني هل سنه صف سادس
سراج،،، زين خلي نعقد والعرس ورا السادس
سيلين،،، مسألة العقد موبيدي موضوعها تناقشها ويااهلي
سراج،،، اففففف،،،، استغفر الله
سيلين،،، ليش ضجت؟
سراج،، ماضجت بس هل وضع مااعرف ليش موترني اريدج تصيرين على اسمي حتى ارتاح
سيلين،،، سراج انت موكتلي مستعد انتضرج العمر كله اشو هسه كم شهر وخلص صبرك الضاهر انت شخص موصبور
سراج،،، وداعتج وداعة عيونج من اكول مستعد انتضرج العمر كله فمعناها لحد اخر يوم بعمري اصبر عليج ولاامل ولا ينقص حبج بگلبي وميبعدني عنج غير الموت،،، خلص اني عند وعدي بعد السادس نتزوج
.
.
سيلين،،، بنهاية شهر السابع ماانسى هل يوم بوقته اتصل بيه سراج مثل كل مره
سراج،،، حبيبتي اني واهلي راح نروح لبعقوبه ليضل بالج اذا اتصلتي وماگدرت ارد
سيلين،،، ليش تروحون؟
سراج،،، جدي وعمامنا هناك ساكنين
سيلين،،،اي سامعه لمياء سولفتلي وحتى كالت انتو متحجون وياهم
سراج،،، لأن اكو مشاكل بينه صار سنين وانقطعت الصله
سيلين،، يعني كلهم انقطت صلتكم وياهم؟
سراج، ، اي بأمر من جدي طردنا وماقبل اي شخص يتواصل ويانا
سيلين،، ياااا ليش هيج؟
سراج،،، هاي السالفه قبل سبع سنوات جدي فرض على ابويه يتزوج وحده ثانيه حتى يزيد النسل لأن هو جدي عنده ولد ثنين واحد استشهد حتى قبل ليتزوج والثاني والدي وعندي عمات ثنين وسبحان الله جديتي بعد ماخلفت لهذا نسل جدي قليل ولهل سبب راد من ابويه يتزوج لأن اخوان جدي عدهم هواي ولد ويخاف المشيخه تروح ألهم من بعده
سيلين،،، ليش جدك. شيخ؟
سراج،،، اي شيخ عشيرته والمفروض والدي من بعده بس ابويه بعد المشاكل صارت قطيعه وابتعد والسبب ابويه حب بنت خالته وتزوجهه ألي هي امي وصار عدهم أحنا،،، بس جدي يريد يزوجه بعد بحجة يكثر النسل لأن ابويه وحيده لكن ابويه رفض رفض قاطع لأن كلش يعز امي وميريد يكسرها وجدي من سمع برفضه طردنا وحرمنه من كل شي نملكه،،، جدي رجال كلش غني بس متسلط لكن سلطته ماكدر يطبقها على ابويه وتخاربوا
سيلين،،، وشنو الصار هسه؟
سراج،،، جدي هسه مريض وحالته تعبانه وطلب يشوفنه الضاهر گلبه حن
سيلين،،، الله يهدي النفوس ويصلح الحال
سراج،،، ديري بالج على نفسج زمردتي واشتاقيلي لحد ماارجع
سيلين،،، هههه،،، تمام زين شوكت ترجع؟
سراج،،، حسب الوضع مااعرف بس كم يوم ان شاء الله،، منطول،، اني من يصيرلي مجال اتصل بيج
سيلين،،، سلم عليه وراح وماكنت اعرف هذا الصلح راح يفتح علينه ابواب جهنم ويغير حياتنا للأبد
