رواية يتيمة المشاعر الفصل السادس والعشرين 26 بقلم الكاتبة نور ال زيادة
ريام: تركت اختي تواجه مصيرها وحدها، لأن اني مابأيدي شي لاحول ولاقوه
حاولت اسوي شي ولو بسيط تكلمت ويا حسام عن وضعها لأن اعرف اهلي مابلغوا بحالتها ولايهمهم شيصير بيها وهي تعبانه المهم زوجوها و خلصوا
رجعت امي استلمتني رزاييل لأن كسرت كلامها
عفتها تخلص كلامها من انتهت صعدت لغرفتي ، بدلت ملابسي وبعد مانزلت حتى عشا ماتعشيت
سمعت البيت صار هدوء امي وابويه راحو لغرفتهم وزيد بعده برا مارجع للأن نزلت وطلعت برا كعدت على المرجوحه بالحديقه
ضليت افكر شلون اختي راح تكمل حياتها خايفه عليها صح هي قويه بس احسها فقدت لهفتها وشغفها بالحياة وحتى قوتها راحت
ضلت فكره توديني وفكره تجيبني والوقت يمر الى ان سمعت هوسه بالشارع، وصوت اسعاف
استغربت هاي شنو صاير، ؟!!
الفضول اخذني فتحت الباب وباوعت، شفت هوسه وسيارة الأسعاف امام بيت ابو رافي، استغربت
كلت ويانفسي معقوله عمو ابو رافي صار بي شي لأن قبل فتره هم تخربط ونقلوا للمستشفى، بوقتها كالولهم لو متصليين بالأسعاف ناقلي افضل، الضاهر هل مره قرروا يتصلون بالأسعاف،
اني واحجي ويا نفسي لمحت البنات كلهن طلعن شفتهم يبجون، ووضعهم مخربط كلت حقهم ابوهم هذا ضليت اباوع من بعيد
لكن انصدمت من لمحت عمو ابو رافي طلع وراهم!!!
لعد منو ألي متخربط،؟؟؟
رحت بسرعه عليهم، من اتقربت شفت المنضر ألي ماتوقعته انصدمت وضليت صافنه
رافي بالسديه شايلي اباوع وجها بي دم ورقبته ويم اذنه وقميصه هواي بي دم كان فاقد الوعي،وشكله مثل الموتى رحت على براء سألتها ؟
حضنتني وتبجيوجاوبتني...
براء :، ولج ريام خالي،،، خالي موزين ،،خايفه
ليموت
ريام: حضنتها اواسيها، تذكرت نورزان، اااخ وينج تعالي شوفي، حبيبج شصار بي من بعدج،
تگابلنا اني وبراء نبجي، وهمه اخذوا وراحوا
صعد احمد ويا بالاسعاف وسيف، بسيارته اخذ امه ومنال وسمر، وعمتهم ام فائق، هم صعدت وياهم
وسن وامها يريدون يروحون وسيف استلمهن
غلط وفشار واخر شي طردهن،
سيف ؛ ارجع للبيت مااريد اشوفكم بي كل الصار بسببكم، ،،،اذا اخويه صار بي شي موتكم ميكفيني،
منال وصت غيث وبراء على البيت ومروه هم ضلت
سيف شخط السياره وراح
دخلت للبيت وياهم براء كل شويه تهجم على بيت عمهم وتهدد وتتوعد ونسحبها اني وغيث ومروه، خطيه براء كانت جدا منهاره حاولت اهدئها..
_اهدي براء كافي بچي، ادعيله الله يكومه بالسلامه
براء: ريام لو شايفته شلون وكع والدم صار يطلع
من انفه وأذنه گوه يتنفس، خايفه خالي ليصير
بي شي
ريام: بدت براء تسردلي كل ألي صار، شبعت بچي وقهر،
رافي ماتحمل فكرت نورزان تصير لغيره،والسبب اهلي وابو رافي هل شخص شكد كنت احبه كرهته، وكرهت اهلي ويا
ضل غيث كل شويه يتصل يطمئن عليه
********
سمر: اول مادخلنا للمستشفى اخذوا للطوارىء
وأحنا واكفين بالأنتضار نلوب،
شويه واجوي ولد عماتي، وعمتي فوزيه هم اجت، كل هل وقت وللأن احنا منعرف وضعه
وامي منهاره موتت نفسها من البچي
اما سيف اخذله زاويه وكعد يبچي، رحت حضنته
ونبچي سوه كتله...
_ليش تبجي يويل؟ اخونا قوي ماراح يصيرله شي
، وبعدين لو شافك تبجي يرزلك، ميحب الرجال يبچي
سيف: مو بيدي شفتي شلون وكع شصار بي
وكلها بكفه وكفه ثانيه من نزلت دمعته كرهت الدنيا كلها،، ضل كاتم بگلبه لحد ما انهار
سمر: كوم وقوي روحك وأدعيله، هو محتاج
دعائنا مو دموعنا
ضلينا ننتضر الى ان طلعت دكتوره شابه ودكتور متوسط بالعمر رحنا مسرعين عليهم، وسألناهم،
كان جوابهم...
الدكتور :بالبدايه اهدئوا، حاليا المريض وضعه مستقر
احمد: دكتور فهمنا شنو الصار ويا وشنو هذا الدم؟
الدكتور : احمدوا ربكم واشكروا، هذا الدم نعمه
وبصالح المريض حسب الفحوصات الاوليه..
ضغطه عابر ٢٠ يعني لو ماهل الدم كان صار شي
لايحمد عقباه ومع ذلك مع الأسف منكدر نكول كلش عدت محتاجين٤٨ ساعه يبقى تحت المراقبه
لأن وضعه مامستقر،ونخاف من مضاعفات
جديده اخرى
سمر: دكتور انته تكول مضاعفات جديده اخرى
يعني ارتفاع الضغط سوا عنده مضافات اوليه بهيج حاله ؟
الدكتور : سوينه تحاليل، وكل الفحوصات
اللازمه ومع الأسف ألي صار ويا مامر مرور الكرام
سببله جلطه
سمر: سمعنه هل الخبر لو تخبلنه، انهارينه
الدكتور : اهدئوا لتخافون هو بعده شاب وبنيته
قويه لهذا اجته جلطه خفيفه،وان شاء الله متأثر بقوه عليه بمرور الوقت والعلاج يتحسن،
بس احنا لأن وضعه وضغطه مامستقر راح يبقى بالعنايه نخاف لتجي جلطه اقوى، وان شاء الله ميصير هل شي،
الدكتوره راح تاخذ منكم معلومات عن حالة المريض وتاريخه الطبي ويا الأمراض وان شاء الله معافى
سمر: راح الدكتور وامي خطيه وضعها تخربط
وضلت تدك وتلطم
ام رافي: يمه يابعد عمري وروحي ريته بيه ولابيك
وينك وين الجلطه،،،، هو انته شنو بعدك شفت بحياتك هاي الوكعه مو ألك الله لاينطيهم ولايوفقهم حرموك من عزيزة گلبك وحرگوا گلبك، عليها دمروا حياتها ودمروك، حسبي الله ونعم الوكيل
منال: يمه اهدي مو هيج راح توكعين انتي ام ادعيله يكوم بالسلامه بعد صار ألي صار والكلام ميفيد
الدكتوره: اسفه قاطعتكم بس لازم اخذ معلومات علمود حالت المريض
سمر: اي تفضلي اني حاضره
الدكتوره: هو مريض ضغط؟، عنده امراض مزمنه؟
سمر: ابد،،، ضغطه طبيعي وماعنده اي امراض مزمنه وأصلا هو رياضي وكلش يخاف على صحته حتى اكله صحي وبحياته ماشكه من شي
حتى فلاونزه من تصير بي ثاني يوم يكوم
ابد مينام على مرض
الدكتوره: تمام، هل شي زين بهيج حاله ألي افتهمته من خلال كلام الحجيه مسأله نفسيه
سمر: اي هو صار اسبوعين نفسيته تعبانه وأكله مو زين وصار يدخن، واليوم كملت من اجته صدمةحياته
هو بالبدايه مثل الهدوء والسيطره على اعصابه وكتم قهرته بس بعدين صار ألي صار
الدكتوره: هو هذا اسوء شي، الشخص ألي يكتم
ألمه وغضبه وهل شي سبب ارتفاع ضغطه
والضاهر الخبر كان جدا قاسي عليه، كمل عليه
سمر: راحت الدكتوره، ومثل ماتوقعنا كل نتائج الفحوصات اكدت كلام الطبيب، المشكله ضغطه
معلك مدينزل، وماصحى للان
اجت الدكتوره سألتها...
_دكتوره عفيه شنو سالفته ليش للان ماصحى؟
صرنا الصبح وهو على حاله؟
الدكتوره: منتضري يصحى حتى نچيك وضعه
وترا بكل الأحوال هم راح ننطي منوم ينام
لأن النوم ينزل ضغطه
سمر: اي احسن حتى دماغه ليضل يفكر
لأن من يفكر گلبه يتعب
الدكتوره: هااا السالفه يعني سالفة گلب بالموضوع
لعد، يله ان شاء الله خير والله يبرد گلبه وگلبكم ويا
سمر: امييين الله يسمع منج
بعد ساعه صحا لكن ماحجه ولا كلمه بس صافن عبالك بغير عالم هسه يله بينت عليه الصدمه الضاهر فعلا ماكان مستوعب الموضوع وكلام ابويه صحا بس صحا بطريقه جدا مؤلمه بدون ميراعي مشاعره وهاي النتيجه، كان الثمن صحته
ضلينه يومين بالمستشفى ناس رايحه وناس راده نتبادل المواقع، وهو للان بس يباوع بالوجوه وميحجي،
مرات اشوفه يباوع علينه ويباوع على الباب احسه يدور عليها بينا وبوجوهنا اويمكن منتضرها عسى انو يطلع كله الصار كذب وتجي تشوفه
وجها شاحب وكل مايجي احد من الاقارب
يغمض عينه ميريد يشوف احد
ابويه ماتجرأ يجي بس گلبه لايب عليه ويسأل لكن بعد ميفيد كل شي حطمه وجنى عليه وشعور الندم بعد ميفيد
الغريب الناس ألي بلا كرامه كل ألي صار
وعمي جايب مرته ووسن وجايين يشوفوا
سيف شافهم اجوي لو طك اخر فيوز براسه
هجم عليهم وطردهم وأحنا بصعوبه نجر بي
فضحنا بالمستشفى ماارتاح الأ طلعوا
ثالث يوم ألنه بالمستشفى يله ضغطه شويه نزل بس ماتحسن كلش،
بيومها اصر يطلع شكد حاول الدكتور
والدكتوره ويا كان رافض وعناد ألي براسه محد يملكه غير بس ام راس اليابس نورزان نفس الطينه
طلعنا مباشرتا لبيته بطلب منه ابويه راد يجي يشوفه بس رافي كان قاسي
رافي :اني كتله ماعندك بعد ابن اسمه رافي،
كل ألي سوا وكلت ابويه لمصلحتي ازعل شويه وارضى ويبقى ابويه، بس هو طلع كل تصرفاته ويايا
بأنانيه
نفذ احقاده براسي ومارفله جفن ولا فكر بيه
وفوكاها يكمل اذيته عليه بكلامه ألي يموت اكبر رجل وكأنما امامه عدوه مو ابنه
لهنا وكافي من نولدت للان اتعامل ويا بما يرضي الله مايوم رديتله كلمه لو غثيته لو جبتله حجايه حتى شغله اني شايله، وأكول واجبي ابر والديه
بس هو يفكر بس بنفسه، مااريد اشوفه بعد
سمر:حاولنا نقنعه بكل الطرق لكن كان رافض يشوف الوالد
مر اسبوع ورافي صحيا افضل بس رجله وأيده شويه حركتهم ثكيله وصعبه ووحده من أيده يصير بيها رجفه هو يحاول ميحسسنا بس هل شي واضح ومينضم وللأن بعده يضم بگلبه عازل نفسه عنا وأكثر الوقت نايم اوبمعنى اصح يمثل النوم
امي وسيف طول الوقت يمه ماتركوا والباقيين يروحون ويجون علينه، وهو ماخذ طور الانعزال وعدم الكلام
******
نورزان: ثاني يوم العرس من الصبح رجعنا لبيت
اهل حسام ألي هو بيتي الجديد، حتى غرفتي للان ماشايفتها، استقبلتنه امه وضلت تتهامس ويا
وراها كلبت خلقتها عليه
اول ماصعدنا حسام استلمني على لازم نفضها
وأهلي يسألون وشيكولون للان ماكو شي من شافني تعبانه اقترح عليه
حسام: اخذج وبعدين ارتاحي شكد متريدين مااوصل يمج الى ان تصيرين زينه
اني تخبلت ماضل عقل براسي راح يصير الخايفه منه لكن ألي انقذني وخرب مخططاته جيت اهلي جايبين ريوك الصباحيه
كلت ويا نفسي همزين من طلع بيكم فايده بشي
ولو مااعرف لشوكت راح اضل اتهرب
بس فرحت من شفت ريام جاييه وياهم اخذتها وصعدنا فوك وامي وزيد ماعبرتهم حتى سلام مارديتلهم
ريام: ها حبيبتي بشريني شلونج؟
نورزان: شلوني دااموت الف موته اتهرب منه وهسه لوماتجون كان ماعافني بحالي، فهميني شسوي؟ را ح اتخبل؟
ريام: مااعرف شكلج، بس نورزان هو بعد الفاس وكع بالراس وحسام صار زوجج وحرام متنطي حقوقه
نورزان: ريام شنو تعلميني بالدين؟؟
هذا الكلام يضحكون بي على النسوان ألي متعرف بالدين ويسولفون على حقوق الرجل نسيتي شغله اساس الزواج بالدين واول بند من بنود عقد القران هو القبول
ميتم الزواج امام الله اذا مو بموافقة الطرفين،
يعني اني شوكت وافقت اني تزوجت تحت التهديد،
وحتى من رحنا نعقد هم ماوافقت زيد وامي وابويه واكفيين ويهددون بيه
ومن كلت نعم بگلبي كلت ياربي ماموافقه اللهم انت اشهد يعني اذا نجي على الدين حتى زواجنا باطل وانتي تكوليلي حرام متنطي حقوقه؟
ريام: بالشي ألي سويتوا صار زواجكم باطل واذا صار بينكم شي يعتبر زنا لو موافقه مو احسن ولا يصير بالحرام
نورزان: يمكن كلامج صح بس بوقتها ماضل عقل براسي نفسيتي تعبانه بسبب الصغط وحسام ماطايقته ولا متقبلته
ريام: بس هو ماأله ذنب كل شي صار بسبب اهلنا
نورزان: صدكيني ريام نضرتي متخيب بالبشر مجربتها حسام مو خيير وهسه تشوفين اذا ماطلع
هو وزيد ايد وحده حصلني بالمكر ولوي الذراع
وبعدين مو بيدي گلبي مو ملكي شسوي
ريام: ولو مو وقتها بس عندي فضول اعرف من خابر شنو كلج رافي وهيج خلاج تبجين
نورزان: حجيتلها كل الكلام
ريام: ياربي الله يعينه ويعينج، شلون موقف
متنحسدون علي،
نورزان: هو الضاهر نساني وحقد عليه حتى كلامه كان بهدوء وكأنما شخص مامهتم الضاهر استسلم وتقبل الأمر الواقع
ريام: يااستسلم ياتقبل لو مثل متكولين ماصار بي ألي صار
نورزان: شنووو،؟!! ليش شنووألي صار؟
ريام: شنووو،، هاا،،، مافهمت على شنو صار
نورزان: لتلوفين بالكلام زلت لسانج سمعتها شنو ألي صار؟
ريام: صدكيني كل شي ماصار هيج يعني دااكول اكيد تأثر وحزن يعني قابل بهل سهوله ينسى
نورزان: اني مو غبيه واعرف كلش زين من تكذبين وتوترج واضح،، قسما بالله ياريام اذا ماحجيتي بعد لااختي ولااعرفج ومااريد حتى اشوفج معناها انتي هم مثل اهلنا
ريام: لا نورزان لتشبهيني بيهم وتعرفين اني اريد مصلحتج
نورزان: ومصلحتي متضمين عليه شي احلفج بكل عزيز وغالي احلفج ب الله واعرف مراح تكذبين بي لأي سبب كوليلي شنو الصاير ولتضمين عليه اي شي؟
ريام: راح اكلج بس تواعديني تهدئين ومتسويين شي وتذكري احنا ويين هسه واذا سمعوا شيصير
نورزان :تمام بس فضيني احجي
ريام :البارحه ورا العرس رجعت بالليل ضجت وكعدت بالحديقه سمعت هوسه واسعاف، طلعت شفت بيت ابو رافي مخبوصين كلت ابو رافي تخربط
نورزان: الله لايسامحه ويستاهل وميرفلي جفن عليه بعد
اني احجي وانتبهت ريام صار وجها ينطي الوان خفت وسالتها ...
ها ليش سكتي، خاف ضجتي عليه؟
من كلت هل كلام ماجاوبت وتوترت اكثر
هنا دق ناقوس الخطر عندي من نضرات ريام
سألتها بتردد..
_لتكولين ألي بالي صح لتكوليلي رافي بي شي؟؟
ريام: عفيه اهدي وافهمج
نورزان: نزلت دموعي بي شي والله بي شي احجي شصارر؟،،، بي شي مووو؟،،،، احجي؟
ريام: دقيقه اهدي راح اكلج هو رايح على اهله يعاتب ابو بعد الصار لكه بيت عمه هناك الضاهر شمتانين بي ومتلاغي ويا ابوه، واخر شي ابو كله شخبصتنا نورزان مانورزان،،، نورزان تزوجت وراحت وهسه اكيد زوجها اخذها ونايمه بحضنه
مامتحمل هل الكلام وضال يعيط ويصيح على ابوه وكايله بعد ماعندك ابن اسمه رافي اعتبرني ميت،، بس ،،،،بس
نورزان :بس شنو فضيني موگلبي راح يوكف
ريام :مااتحمل هل الكلام وتخربط انفه واذنه صارن ينزفن وواكع ومغمى عليه واجت الاسعاف اخذته
نورزان: عزه بعيني الله ياخذني، الله لاينطيهم
صرت ابجي بحرگه
_ريام شلونه فهميني شصار هسه، ؟
ريام: لتخافين مابي شي شويه ضغطه مرتفع مابي شي
نورزان: ولج شايفتني غبيه ومااعرف؟نسيتي ادرس صيدله شلون مابي شي اكو ارتفاع ضغط بسيط ينزف ويوكع ويجيبوله اسعاف انتي عليمن تضحكين؟احجيلي لااكلب الدنيا هسه ليش هو اني عايشه هسه هنا ليش ؟مو علموده هو حتى ليصير بي شي؟
ريام: يمعوده فضحتينه ليسمعون اهدي والله احجي بس اهدي ساعة السوده لومكصوص لساني ولا حاجيه
باعي هو رافي لكوا ضغطه عابرال٢٠ رغم النزف
بس النزف مساعده يعني الله رحمه لهذا صارت ويا جلطه بس لتخافيين مو قويه خفيفه، وهسه حالته استقرت
نورزان: جلطه صارت بي؟؟ تحجين صدك؟ جلطه بهل عمر؟ كله بسببي ؟ الله ياخذني ليش هو شنو ماصار بي بسببي، فهميني شنو ؟
ريام: نورزان هو مااتحمل فكرت انتي تزوجتي وصرتي لغيره وانتي وزوجج صار بينكم شي يعني تفهمين قصدي بعد
نورزان: ياروحي عساني ميته ولامخليته يعيش هل الشعور حسبي الله على كل واحد سعى بفراگنا وضلمنا حسبي الله عليهم حرگو گلوبنا وموتونا واحنا عايشيين الله لا ينطيهم عسا نار گلوبنا بيهم شلون بيه،،، شلون اعيش وهو متلوع عليه؟ شلون ارتاح واستقر بحياتي وهو مامرتاح ومريض
ريام: اختي صارت تلوب وتتحسب وتبجي بحرگت گلب شاطت شوط، حسيتها من الشوطه راح تموت
ضلت تفتر بالغرفه مثل المتهستره رايحه راده
مااشوفها الاوكعت،على الارض مغمى عليها
رحتلها لسرعه احاول اصحيها،،، ياربي شورطني لو لساني مقطوع قبل ليزل، احاول اصحي بيها ماكو
فاقده،، مسحت دموعها حتى ليشوفوها، وصرت اصيح،،، صعدولي بسرعه كلهم
حسام: شبيها،،، شنو صار؟
ريام: يمكن ضغطها هبط اغمى عليها، حاولت اصحيها بس فاقده
كتله لحسام صار فتره هيه هيج وضعها من الضغط امشي نوديها للمستشفى
امي تخزر بيه بس ولاعبرته كافي عاد كل ألي يصير بسببهم
ام حسام: يا منطينه وحده مريضه على گلبنا؟
حسام: يمه وكت هل الكلام، خلي نوديها للمستشفى
ريام: اخذناها للمستشفى وامي اصرت ابقى متريدني اجي وياهم بس اني قررت اتمرد
ولزكت وياهم غصبن عنهم بعد مااعوف اختي
فحصها الدكتور وكان فعلا ضغطها هابط من قلة الأكل،فتحت عيونها بتعب رحت يمها
همست باذني،،،،،
نورزان :لتخافين مابيه شي وصاحيه اصلا بس تعبانه اسمعيني زين روحي لهذا الدكتور الي كان هنا قبل شويه كوليله اريد احجي ويا وحدنا وفهمي يجي وكدامهم عود ديفحصني يطلعهم برا
ريام: تمام،،،، ردت اطلع امي صاحت... وين ...
كلتلها، اختنكت هسه اجي
رحت على الدكتور بلغته كلام نورزان
باوع عليه وكلي...
د..خالد: انتي شتصيرين منها؟
ريام : اختها
د..خالد : لعد ليش مو عيونج زرگ مثلها؟
ريام : والله مااعرف يوم القيامه اسأل رب العالمين اكله ليش فرقت بيني وبين اختي؟
جاوبني بابتسامه...
د.. خالد: هسه تأكدت، انتي اختها
ريام: ليش انته تعرف اختي ؟
د؛ خالد: اختج ام البلاوي اكيد اعرفها، بس كوليلي
شنو تزوجت؟
ريام: اي مع الاسف
د؛ خالد: يعني استسلمت للامر الواقع؟
ريام: لو اكو حل تنحت الصخر ومتستسلم بس شتسوي هذا قدرها
عفيه دكتور شوفها شتريد وساعدها ماعدنا احد يوكفلها
د؛ خالد: شكلجن راح تجيبلي سالفه انتي واختج
ريام: رجعت للغرفه شويه واجه الدكتور ويا ممرضه
كال اطلعوا، اريد افحص المريضه، واحد يبقى بس
امي كالت... اي اني موجوده
نورزان باوعت عليها بخزره وكالت...ريام يمي ماكو داعي
خلت وطلعت بس ضاجت
د؛ خالد: شلونج نورزان شلون صرتي،؟
تدرين من وراج صار ايام اتسائل ياترى شنو سويتي وشصار؟
نورزان: دكتور انته ماقصرت ويايا وهسه اكدتلي انته دكتور تملك انسانيه ورحمه وتحس بالأنسان المقابل واني من قررت اطلب منك المساعده لأن ماشفت منك غير الخير ولأن حسيتك انسان زين
د خالد: اذا اكدر مااقصر واذا مااكدر اكيد تعذريني ولو اعرف ورا كل هل مديح بلوه
ريام: ابتسمت باوع عليه هو هم ابتسم
نورزان: اكيد مامجبور، بس ياريت تحاول
اني محتاجه منك وقت
د. خالد: مافهمت؟
نورزان: دكتور اني حجيتلك بوقتها بس رؤس الاقلام وعرفت اني مجبوره على الزواج
صدكني اني ما كو احد يكدر يجبرني على شي وطبعي اضل احارب لكن هددوني بأذية انسان عزيز عليه ووافقت
الي راح اطلبه صعب عليه اكوله بس ماعندي غيرك اني محتاجه وقت الى ان ألكالي حل
اريدك تكلهم اني بيه شي معين ولازم ابقى بالمستشفى
سوولي تحاليل وتچييك عام حتى اضل وقت اكثر بالمستشفى
وعادي خلي زوجي شويه يصرف قطوا قطه زينه انتو استفادوا واني اكسب وقت، محتاجه اسبوع
د. خالد: انتي مقتنعه بهذا طلبج؟اني دكتور ولازم اتعامل ويا المرضى بمهنيه مو امثل افلام
ريام: دكتور بس انته مهنتك هي ام الانسانيه
ومساعدت الناس، واجبك
د. خالد: غيرت رأيي انتي نسخه من اختج
ريام: هههه دكتور بداعت جهالك لتردنا
د خالد: اني مامتزوج، وشكلي راح اعنس بسببجن
اخاف يطردوني من المستشفى، وماكو وحده ترضى بيه بعد
ريام: لا مينخاف عليك واذا صارت نشوفلك وحده
من ربعنا
د خالد: ههه،،، لا عيني ياربعكم شمدريني بيمن تورطوني اذا انطردت انتي ام لسان اخذج ،،،شكلتي؟
ريام: ولو انته كبير عليه بس ميخالف اكسب بيك ثواب احسن متعنس
د. خالد: يله لعد توكلنا على الله وهسه ست نورزان بما انو انتي صايره كله مخططات ومافيا فهمينه الخطه
نورزان: مثل ماكتلك شوفلي مرض كون اضل بالمستشفى بس امانه اسحبوا فلوس من حسام بذمه وضمير سحلوا لتخلون عنده ولافلس
د. خالد: هههه شكد تحبي وخايفه على فلوسه ؟
تدرين اني وافقت لأن احترم الانسان القوي ألي يقاتل لاخر نفس بي حتى يحصل اللي يريده، ولو مافهمت هل اسبوع شنو فائدته زين عاد ياترا اختج هم محاربه لو بس لسان؟
ريام: اني ام الحروب شكو حرب بالعراق اني المخطط والمنفذ بيها
د خالد: هسه عرفت ليش العراق انهجم الله اليستر خلي اطلع ابلغهم ونبلش فحوصات
نورزان: طلع الدكتور واني شويه جريت نفس
ادري مااكدر اهرب هوايه بس المهم احاول
يوميه حجه، وفعلا دكتور خالد ماقصر ...
خلاهم يضربون اخماس في اسداس
كل شي ميفهمون واني موتت نفسي فد مره من المرض
راح زيد وام حسام وامي رادت تضل ماخليتها
هم راحت ضل حسام وريام
طلع حسام وريام قفلت الباب واجت يمي
ريام: فهميني شنو دسويين؟ شنو أبالج؟
نورزان: اكسب وقت يخلص هل الاسبوع واسبوع الجاي تجيني الشهريه هم اسبوع ثاني وراها تخلص اجازة حسام ويلتحق اسبوعين، مااشوفه
ريام: ولشوكت تضلين تماطلين يجي يوم ويلكفج
هم الصبر أله حدود؟
نورزان: مااعرف لشوكت اعرف شي واحد
رافي أنجلط لأن تصور صرت لحسام ولهذا ماراح اخلي حسام يوصل يمي
ريام: لا انتي تخبلتي رسمي، بابا لشوكت صيري واقعيه انتي ورافي انتهيتوا اصحي تصرفاتج ماراح تغير من واقعج شي؟ هذا خبال وحتى حرام
نورزان: اي اني مخبله ومااعرف الحلال والحرام شتريدون مني،؟
متريدين تساعديني لتدخلين اني راح اضل احارب لو يبقى يوم واحد بعمري وألي اخذني بالمكر والحيله ، مااصير اله لو حتى انفذ مخططات العالم كلها
.
.
ضلينا اسبوع بالمستشفى كل شويه نطلع فلم شكل ومرض شكل حتى الكل ضاج ورادوا ينقلوني غير مستشفى بس اني اصريت ابقى ..
كلتلهم... انتو تريدوني اموت وتخلصون مني لو تخافون على فلوسكم،،، حرجتهم فسكتوا
صار موعد السبعه وام حسام ضاجت كالت عرس ابني من وراها صار يخزي نوب حتى سبعه ماكو
وصارت تحرك بحسام بس حسام كان مهتم لأمري
ويريد سلامتي،
ورا اسبوع طلعت بس بالأول تأكدت من خطه ب
اجتني الشهريه
رجعنا للبيت عود تحسنت وحسام كان فرحان اجا الفرج لكن صدمته من كتله مترهم تخبل عليه وطلع ضايج
بالليل نايمه او امثل النوم حسيته طلع برا الغرفه
لحكته لكيته يحجي بالموبايل سمعته يتغزل بوحده ويكلها.....
حسام : يمعوده يازواج يامره هو ليش اني مفتهم منها شي ؟اني ماارتاح غير يمج الباجر جاييج واريد سهره مرتبه،
_ ايا حقير مسوي نفسك تحبني وانته اكبر ساقط وخاين، ويلوموني ليش ماحبيته سبحان الله يمكن لأن حبه مو نضيف مادخل گلبي
ماواجهته بس الله كريم كلهن اضمهن بالوقت المناسب،
طول فترة هذا الاسبوع، اسمعه يحجي وياها، اخر شي فكرت اسجله، كلامه، صح صعبه بس كدرت
على الاقل اثبت خيانته
قبل ليلتحق بيومين اتصلت بيه ريام وكلتلي...
ريام: تدرين طلع كل كلامج صح وبعد ماألومج
تأكدت حسام وزيد ورفل مسويين مخطط حتى تتزوجين حسام،
نورزان: شنو هل معلومه الخطيره من البدايه كتلج اكو مخطط بينهم، اريد معلومه جديده
كوليلي شلون صار رافي؟
ريام: يكولون احسن بس نورزان اكو شي ثاني راح يضوجج
نورزان: خير اكو شي بعد،،رافي بي شي؟
ريام: رافي راح يرجع يسافر، من جديد بس هل مره مقرر ميرجع، وشي ثاني مروه زوجة احمد جابت بنيه
نورزان:دموعي نزلت من سمعت
_خلص يعني بعد مااشوفه،؟ انتهينا للأبد، ؟هاي تاليتنا ضلينا نتحسر حتى لو لحضات تجمعنا سوا،
الله واعلم اذا راح اشوفه بعد بحياتي؟ بس يله يمكن هل شي احسن ، اقلها ابطل خايفه عليه من هل الوحوش ألي اعرفهم، اخاف يغدرون بي
ريام اريد تتأكدين شوكت يسافر ومن يسافر ترديلي خبر
ريام: شناويه نورزان؟
نورزان: صار الوقت اتحرر من سجني، واشوفهم منو نورزان، بس بالأول أئمن على سلامة رافي
ريام :شلون ؟!!!!
يتبع....
السابع والعشرين من هنا