رواية يتيمة المشاعر الفصل الخامس والعشرين 25 بقلم الكاتبة نور ال زيادة
ريام: اليوم عرس نورزان بس موعرس عبالك فاتحه
والعروس هي الميت...احس اختي صارت بلاروح
رغم طلعت تجنن بس مع الاسف هل الجمال
راح تروح لشخص ميستحقها
،
كاعده على الكوشه مثل الأميرات بس الحزن
هو ألي مزين ملامحها،عيونها ذابله وحزينه من التعب والدموع والسهر،
اجتي سمر سلمت وباركت وكلش واضح على وجها الحزن ونضرتها لنورزان كلها عتاب دقائق واجاها اتصال، حجت واجتي قدمت الموبايل لنورزان،
اني مباشر عرفت منو وحتى نورزان عرفت لأن اخذته وايدها ترجف، والتوتر والأرتباك عليها واضح
حتى الكاعدين سألوا منو ألي دتحجي وياا،؟
لأن اهل والدي ميعرفوا لرافي ولاشايفي
امي مباشر بتوتر ردت....
ام زيد :هذا رافي ابنه لأبن عمي هو رباها وعلمها
اكيد، ديباركلها لأن كلش يعزها
ضحكت بداخلي، وكلت اي وخوش جازيتوا
على تعبه طعنتوا بضهره والله واعلم شنو
هسه حاله
نفضت افكاري من انتبهت لاختي،
بس كالت الو....
بعد ثواني صارت الدموع مثل الشلال، تنزل
بحرگه وألم حتى من تسد عيونها وتفتحهم كأنما روحها تطلع وترجع،لحد ماخلصت المكالمه هي مانشفت عيونها حتى الكحل سال
واخر شي جاوبته ..... اسفه،
عرفت كلام رافي كان خناجر تنبت بصدرها وتزيدها ألم فوك ألمها
كلها ضلت تسأل ليش هيج ردت فعلها وتبجي
بهل حرگه؟
نورزان: تقدمت سمر بأتجاهي أنطتني موبايلها، وكالت... شخص يريد يباركلج على زواجج،،، عرفت منو
گلبي حسيته راح يطلع من مكانه، خايفه ومرعوبه من المواجه،،، شنو اكله ؟
شنو مبرري لغدري أله؟وهو شنو ردت فعله على زواجي،؟؟ توترت، بشكل مو طبيعي
اخذت الموبايل وأيدي ترجف، اول ماخليته على
اذني وكلت الو اجاني صوته....
رافي: شلونج ياوجع گلبي،،،، شلونج يا لوعته
همزين من سمعت صوتج بعد كل هل المده
بس ماچنت مصور راح اسمعه وانتي ملك لغيري
اليوم....(جر حسره بقوه )
اليوم ألي رباج وعلمج وحماج وسندج
راح يكلج ألف مبروك، وديربالج على نفسج
وان شاء الله تعيشين سعيده بحياتج
اما ألي حبج وعشگج لحد الموت، فميكدر
لا يباركلج ولايتمنالج السعاده ويا غيره
بس راح اگلج
شكرا،على كسرت نفسي...وشكرا على غدرج ألي...شكرا على الجمره ألي زرعتيها بگلبي ورحتي
جمرتج راح تضل تحرگ بگلبي منا ليوم الدين
نورزان: سمعت كلامه ونزلت دموعي ماكان عندي جواب غير بس ..... اسفه
رافي: خلص،،، أنتي اختاريتي ومن هل الدقيقه انسيني وأنسي اسمي طول حياتج...، أعتبريني شخص مات وأنتي بأيدج قتلتي،.. عيشي حياتج وتهني،.. يجوز يجي يوم واني هم انساج... بس اكيد ماراح انسى غدرج ألي،،،، الله وياج يلي چنتي اغلى البشر عندي
نورزان: كانت كل كلمه يكولها سهم ينبت بنص گلبي كل كلامه كان يطلع منه بحسره وألم مكتوم
وحتى صوته تعبان كان بصعوبه يحجي ،،،،كسره واضحه بصوته..لامني بكلامه لكن هو ميدري بكسرتي
ويا كل كلمه يكولها دموعي تنزل متحملت ولاهمني احدصارت دموعي تتسابق ياهو الاولى، احسها جمر مودموع،
كتله اسفه واعرف كلمت اسف متغير شي
نهى الاتصال، بس اني حسيت روحي طلعت ويا ماراح،هاي اكيد اخر مره راح اسمع صوته
تقدمت امي بأتجاهي جابت كلينس تريد تمسح وجهي
هنا صدك انهاريت خليت ايدي باتجاها، ابعدها
وكلتلها بعصبيه .....
_ديربالج توصلين يمي،،، ديربالج،،،، كله سببكم...
هي ابتعدت متوتره وضلت تتلفت تشوف يمين ويسار تتابع نضرات الناس
اجت عيني بأتجاه عمه ام رافي، من باوعت عليه
صارت دموعها تنزل
اني ماتحملت شلت بدلتي حتى لتعيق حركتي ورحت عليها وحضنتها ادور على ريحت حبيبي بيها،
ادور على، اماني ألي فقدته يمكن بيها امومه عليه اكثر من امي محتاجه احس بحنان الام،، هي هم حضنتني قوي...هي تبجي واني ابجي، بحرگه
همست يم اذنها وكلت .....
يمه سامحوني والله موبيدي غصبن عني مجبوره على هل شي والله مجبوره،،، ديري بالج على رافي، لتعوفوا الى ان ينسى واني ألي الله
ضلت تهدء بيه وتبجي ويايا، واسمع همسات
الحاضرين تتسائل بس ماهمني احدضليت الى ان سمعنه صوت الزفه
اجوي خالاتي سحبوني كوموني من حضنها ومسحوا دموعي ومسحوا الكحل ألي نزل
رتبوني بسرعه، وكعدوني
اني هنا صرت مثل الصنم تجمد كلشي بيه
دخل حسام حتى ماباوعت بوجها باس راسي
وايدي وكعد يمي،
تقرب صار يتغزل بيه مافهمت حتى كلامه لأن اني بغير عالم، حتى مباوعت بوجها،
تمنيت بهذيج اللحضه رب العالمين ياخذ امانته واخلص
كومني وطلعنا من بيت اهلي، ألي من هل دقيقه
صاروا اعدائي مااعتبرهم بعد اهلي
طلعنا، صار نضري بأتجاه بيت ابو رافي،ونزلت
دموعي تتسابق بعد ميفيد خلص،لهنا وأنتهت قصتنا قبل لا تبدي
صعدت السياره وانطلقنا نحو حياتي الجديده!!!
******
سيف
__
الغريب رغم ألي صار ورغم الحزن والألم واضح على رافي بس كانت ردت فعله بارده،
سمعت رافي يطلب من سمر تروح للعرس وهي رافضه وأصر عليها
اتصل مره ثانيه سألها عن الوضع هناك وبعدها
طلب منها يتكلم ويا نورزان وهي مارفضت
كلت احسن خلي يبرد گلبه يعيط ويغلط
شيسوي خلي يسوي احسن متضل بگلبه
بس كلامه كان كلش هادء وياها عكس تصوري
لكن كانت الغصه والألم واضح بصوته
الكلام ألي كاله ألها، حرك گلبي كان صعب ومؤلم،
الله يعينه مو سهله
نها الاتصال وطلب مني ومن احمد نتركه وحده
ميحب احد يشوف ألمه وانكساره نفسه عزيزه....
اني بحياتي مشايف حتى دموعه طول عمري
اشوفه شامخ، وقوي
تركنا وكعدنا بالصاله، شويه وطلع مبدل ووضعه
طبيعي استغربت اكثر
احمد: هو هذا رافي ألي اعرفه ماكو شي يكسره
رافي: امشي نطلع نغير جو
سيف: اي ياريت يله
طلعنا افترينا صح نسولف بس نحسه بغير عالم
مجرد يسايرنا بالكلام،والجكاره تخلص وحده يورث الثانيه،هي تحرگه ماادري هو يحرگها
بدت تضلم الدنيا رحنا على ابو نؤاس كعدنا
اكو مقاعدعلى النهر كعد ويدخن وماحجه ولا كلمه،، كان كل شويه يجر حسره ويغمض عينه ويفتحها بألم
كاعدين واجاني اتصال من سمر، احمد اشرلي
اروح احجي وياها بالسياره
رحت بالسياره كعدت وفتحت خط وجاوبت....
_هلو سمر
سمر: بشر شلونه رافي؟
سيف: زين مابي شي ضاهريا بس داخليا الله واعلم
سمر: وين انتوا؟
سيف: كاعدين على النهر بأبو نؤاس، وهو يحرك بالچكاير، وكل شي ميحجي
سمر: يعني ماسوه اي ردت فعل بجى او اي شي؟
سيف: لا ابد الضاهر كرها بعد غدرها أله، وقرر ينساها،
سمر: تدري هدوءه مخوفني يعني لو مسوي اي رد فعل يمكن كان احسن
سيف: اي مو هو سيف حتى يلطم ويبجي
بابا يايوم شفتي رافي مكسور لودموع بعينه؟
اصلا ردت فعله اثبتتلي هو هذا رافي ألي اعرفه
سمر: الله يبرد گلبه ديرو بالكم علي، ولتعوفوا
وحتى بالليل راقبوا
سيف: تمام ماما سمر حتى نغطي هم
سمر: دولي هسه وقت شقاك،
نهيت الاتصال ويا سيف اطمئنيت بس بداخلي خايفه
مروه ومنال وبراء وامي كاعدات يمي سألت منال...
منال : ها بشري شيكولون الولد؟
سمر: زين الحمد الله مابي شي
طالعين يغيرون جو
ام رافي: يمه وليدي الله يبرد گلبه،ادري گلبه محروگ بس يكابر هو من هو و صغير هيج طبعه
ميبين مشاعره لأي احد أدري هسه يفكر بيها بس ميحجي
منال: يمه بعد لحد يجيب طاريها بالبيت
لخاطر رافي
ام رافي: ليش هي شنو ذنبها كله سبب ابوج
شال خطيتها وخطية اخوج
سمر: راحت امي تصلي، كلتلهم....
_بنات اني مامرتاحه خايفه على رافي
منال: ليش صاير شي ومندري؟
سمر: لا ،،وهو هذا ألي خلاني اخاف،
ماسوا أي ردت فعل وهادء ...احسه هدوء ماقبل العاصفه
مروه: كولي ياالله،،، اني صح مااعرفه زين
بس اشوفه مو مثل احمد وسيف، شخصيته تختلف عنهم يعني بارد وهادء ويكدر يتحكم بأعصابه وعقلاني صح من كسر الغرفه عصب كلش بس بكل الاوقات اشوفه هادء، وثكيل
منال: صح كلامج، وأني متأكده هسه هم راح
يتحكم بمشاعره، مثل كل مره و يكون عقلاني
بس سمر صايره هوايه توهس، وتتخوف
سمر: ان شاء الله ليش اني شنو اريد
كاعدين واجوي بيت عمتي ام فائق وبناتها
وبيت عمي ابو وسن وبناته،بكل صلافه ولاعبالك مسويين شي،شكلهم جايين يتشمتون
استقبلناهم وكعدوا شويه وابويه هم اجه
بلشن سنفونيتهن، وكلامهن السخيف ،،، على درينا اليوم عرس نورزان
اباوع على وسن حلگها واصل لأذنها من الفرح،
عبالها يخلالها الجو متدري لو يصبوها ذهب وفضه ميكلبها رافي خصوصا بعد الي سوا بي
*****
سيف: ضلينا كاعدين لساعه ٩بالليل فجئه قرر رافي نرجع وبالتحديد لبيت اهلنا تفاجأت وسألت ليش،؟؟؟ ماجاوب
توجهنا لبيتنا، اول مافتنا للبيت سمعنا صوت بيت عمي وعمتي وصوت امي تعارك ابويه وتحجي ويا
رافي وقفنا قبل لاندخل
رافي :اوكفوا لتفوتون اريد اسمع
ألي سمعنا مع الاسف ماكان يسر، امي قررت تطلع ألي بگلبها وحجت كلام صادم خلانه واحد يباوع على الثاني!!
*****
سمر: تعشينا وكعدنا وبلشت ام وسن وعمي بالشماته مالتهم،
ام وسن : عفتوا بنت الأصل ورحتوا على وحده زعطوطه باعتكم، وعافته
ابو وسن: موصوج احد كله بسبب رافي مواحنا نعرف هيج نماذج مو مال احترام بس هو لزك بيها
ابو رافي: اني من البدايه عرفت بيها راح تغدره
ام فائق: هي الحلوه تصير مغروره رافي انغر بجمالها عاف بناتنا الشريفات المستورات وراح على هاي وانت ابو رافي لتزعل منطي عين لولدك
أحنا سكتنا لأن نعرف اذا نجاوب ابويه واكف وياهم
بس امي انفجرت بيهم وكالت...
ام رافي: لهنا وكافي سنين انتو تفوتون بيتي وتاكلون من خيرنا وجايين شمتانين هسه بأبني
يعني ترا مو كوه هيه ...مو اجباري الزواج ...
الولد ميريد بتكم شنو غصب،؟حسوا على دمكم ،،سنين تجفصون واني ساكته
بس لهنا وكافي
ابو رافي: اوزني كلامج وعرفي شدتحجين هذوله اهلي
ام رافي: انته اخر واحد تحجي ألصار كله سببك،
كله علمود اخوك وبنته، دمرت ابنك
ابو رافي: هو غبي ميعرف مصلحته ردت ازوجه بنيه شاريته ومتأكد متغدره ولاتبيعه فد يوم
بس هو اختار ألي باعته
ام رافي: اتقي الله مو انته حاج بيت الله
هي باعته؟؟ لو انته السبب؟؟مو عبالك ماسمعتك بيوم ألي جابوا الغرفه مال رافي كلتلها لأم زيد خلي نورزان تبتعد عن رافي لأن ابني خاطب
وحجيت كلام انته تعرف واني اعرف مااله وجود
انته مو بس علمود اخوك وبنته سويت هل شي
بس انته حاقد عليهم طلعت احقاد الماضي براس ابنك وهل أللبنيه المسكينه سنين واني ساكته عبالك مااعرف،
كل هذا لأن ابتهال (ام زيد) ماوافقت عليك وانته تحبهاوفضلت غيرك حقدت عليها، وانتقمت منها ببنتها...بس نسيت شي ماكو احد تأذه
هي اصلا ولامهتمه لبتها، هي انانيه مثلك،
ألي تأذى بس هل المسكينه وابنك
ابو رافي: والله تفكيري صح وماندمان من بعدتها عن رافي،لأن متفيده، هم باعته وغدرته مثل امها بالضبط، متفرق شي
ام رافي: امها ماحبتك ولارادتك حتى تغدرك
ونورزان ماغدرته نورزان ضحية لعبه ومؤامره
سخيفه انت واهلها سويتوها بيهااللبنيه اليوم من طبينا لحد ماطلعت بس تبجي عيونها وارمه وضعفانه وحال الضيم حالهاحتى ايدها مزرگه مبين مال كانونه مبينه اللبنيه مغصوبه على الزواج حتى عاطت بامها وكلتلها كله سببكم، وأجت حضنتني وتبجي كلتلي يمه سامحوني، مجبوره غصبن عني
وديربالج على رافي
بربك اكو وحده تغدر تسوي هل شي وتحجي هل الكلام؟؟ذنبهم برگبتك منا ليوم الدين انته وكلمن سعى، بكسرت گلبهم، وحسبي الله ونعم الوكيل
ابو رافي: تجاوزتي حدودج مو تكولين ولدي وبناتي كبار، وتتجاوزين، اني كل ألي سويته واجبي اتجاه بيتي وابني
سمر: اليوم الصدمات متتاليه ام زيد ابويه كان يحبها هسه عرفت ليش هيج سوا،لا وفوكاها مقتنع بالشي السوا يكول واجبي اتجاه ابني
ااااخ يارافي لوتدري بالصاير،،، لا خلي احسن ليعرف كافي صدمات
بعدني احجي ويا نفسي مااشوف ألا الولد دخلو للصاله وأولهم رافي
بس شنو وجها ميتفسر، و مبين عليه غادي نار الضاهر سمع الكلام
رافي: ياهلا شنو هل الجمعه الحلوه،
هاي كلكم جايين تحتفلون بأنتصاركم، باللعبه ألي لعبتوها؟؟ مو صح عمي ؟؟؟
وانته ياابويه كل شي سويته علمودي مووو، ؟؟
علمودي لو حتى تنتقم،؟ كل ألي سويته واكول اكيد ابويه ديسوي لمصلحتي لأن مامعقوله
ماعنده سبب يأذيني، وخصوصا اني ابنه
وبعدين ماألومه هو من اهل قبل وميعترف بسوالف الحب وماحب
بس من انته مجرب لوعة الحب ومحروگ گلبك
وتجي تعيشني هل شي وتعرف راح اتأذى
هذا ألي مااسامحك علي
ابو رافي: ياحب لاحب ولاشي ردتها وماصار نصيب وخلص
رافي: واضح كلش ماحابها من هذا وبعد كل هل السنين حاقد عليها،لسه وتريد تنتقم منها...
بس خلي أبالك انته ماانتقمت منها، ترا نورزان صح بيها شبه منها بس بتها مو هيه
ابو رافي: شخبصتنا نورزان مانورزان، بابا خلص
نورزان تزوجت راحت باعتك، شلون افهمك
نورزان زفوها من العصر راحت ويا زوجها
وهسه دنيا ليل يعني اكيد اخذها ونايمه بحضنه
هسه
سمر: رافي رغم يحجي بحرگة گلب بس كان يحاول يكون هادء لكن كلمات ابويه الاخيره كانت الملح ألي تخلى على الجرح وخبله،
بهل دقيقه وبهل كلام ابويه كلامه كان السكين ألي ذبحت رافي الى درجة اتهستر ورفع ايده يغلق اذانه بقوه ويصيح
كاااااافي...
كااااافي...
لخاطر الله حس بيه،،،، حس،،،اني ابنك...ليش مصر تحرگ گلبي...
ليش مصر تذكرني بالشي الصار،،،، لييييييش، ؟؟؟
ابو رافي: قابل مچذب اني يعني هي هسه مانايمه
بحضن رجلها؟ ماصارت زوجته؟
سمر: كافي يابه شجاك لخاطر الله ، انته ليش هيج دتسوي؟
ابو رافي: حتى يصحى اخوج وليضل يحجي بيها
سمر: كلام ابويه، مو صحا لرافي،، لا،،،دمره دمار
اصعب شعور من يحس الانسان حبيبته صارت بحضن غيره،
وضعه كله صار مو تمام عيونه صارت حمر حسيته كوه واكف، عافنه ومشا راد يطلع لكن توقف وألتفتت علينه ،،، باوع على ابويه
رافي: من هل،، الدقيقه ،،،ماعندك،،،،بعد ابن ماعندك واحد اسمه رافي،،، اعتبرني ،،،،،ميت، ...
كانت كلماته ينطقها بصعوبه وبألم احسه حتى النفس يسحبه بصعوبه كان يتكلم بتعب وضعف
فجئه قوته بدت تنسحب منه وجسمه صار يرجف ، ويا ماخلص اخر كلمه (ميت)
انفزعنه وأحنا نشوف الدم صار ينزل على قميصه انفه صار ينزف بقوه
صار يفتح بعينه ويسد، بدا يفقد كلنا عطنا بصوت
هاي شنووووو؟؟
ويا هل الكلمه انهد رافي هده وحده على الارض وكع منهار طول عمري اشوف اخويه مثل الجبل شامخ وماكو شي يهزه ولايهده
اني اليوم شفت الجبل شلون أنهز وانهار و نهد ووكع وكعه وحده على الارض
كلنا ركضنا عليه، رفعنا راسه عن الارض صار يفتح بعينه ويسد كان شبه فاقد،والدم غرگ وجها ،
وزاد خوفنا اكثر من صار دم يطلع حتى من اذنه،
انفزعنه، من المنضر والمشكله دم مو قليل
احمد: سيييييف،،، بسرعه اتصل على الأسعاف راح يروح من ادينا،،، استعجل
سيف بسرعه اتصل على اسعاف مو مال احنا نوديه، صار يسحب النفس بصعوبه،،
كتله...
سمر: رافي فدوه لعينك اتحمل لخاطرنا، لتفجعنا بيك
غلق عينه ونزلت منه دمعه كانت كفيله تفهمنه
لأي مرحله واصل من الأنهيار
اول مره بحياتي اشوف اخويه بهل حاله اول مره اشوف دموعه العزيزه، شهدت اليوم على اكبر انكساراته،كنت اعرف هذا هدوءه كان ماقبل العاصفه،ضم بگلبه وكتم ألمه لحد ماوصل درجة الأنفجار
كان كلام ابويه هو الريموند ألي يتحكم بالقنبله، وماقصر الوالد، فجره بدون رحمه
امي من شافت رافي بهل الوضع صارت تعيط وتلطم وتغلط على ابويه وعمي،،، ملخت روحها
الاسعاف ماتاخروا لأن احنا قريبين على المستشفى نقلنا لمستشفى اليرموك، وأحنا ندعي الله يشافي ويعديها على خير وميفجعنه بي
*******
نورزان: وصلنا للفندق وزفونا حتى عرسي ماصار مثل البشر عبالك ديهربون بضاعه من الحريق
يخافون لااتخبل عليهم وأغير رأيي او حتى يصير شي يخرب مخططاتهم رادوا بس يفضوها
ريام اصرت تجي ويايا رغم رفض امي بس ريام
ولأول مره تمردت عليها وعافتها واجتي ويايا
فوتونا للغرفه واني مثل اللعابه يحركون بيه
مسيره من قبلهم،دخل حسام للغرفه ريام كالتله..
ريام :حسام ديربالك عليها ترا نورزان تعبانه كلش صار ايام عايشه على المغذي صحتها مو زينه وضغطها نازل الصبح يله رفعنه الكانونه من ايدها
حسام: ليش ماكو احد كلي؟، ليش تعبانه شنو الصاير وياها؟
ريام: مرادوا يضوجوك ولهذا طلبنا عرس بدون هوسه لأن هي مو حمل هوسه وتعب فياريت تراعي هل شي
حسام: لتخافين هي بعيوني، لو ادري هذا وضعها حتى العرس أئجله كلشي ولا تتعب، اهم شي صحتها
نورزان: اسمع واكول ويا نفسي شكد خيير ومراعي ياعيني،جنتل مان الله يسلمك لا والله لا يسلمك
اجت ريام بوستني وحضنتني حتى مابادلتها ، وراحت اني صرت احس نفسي انسانه من الثليج بدون مشاعر قفل حسام وراها باب الغرفه واجه كعد يمي
حسام :مبروك حبيبتي واخيرا انجمعنا بمكان واحد
نورزان: باوعت عليه صفح،ماعاجبني كلامه
حسام :شلون صرتي يابعد عمري ؟ليش هيج صار وياج حتى وجهج ذبلان؟
نورزان :عفيه حسام ترا كلش تعبانه،اريد ابدل وارتاح احس راح اوكع من طولي
حسام: اي حبيبتي هسه اساعدج
نورزان: ماكو داعي بس اطلع اني اساعد نفسي
عافني وطلع صار حيلي كله يرجف احس هسه يله بديت اوعى على نفسي وعلى المكان ألي اني بي
يعني معقوله صدك صرت اني وحسام مجموعيين بغرفه وحده؟صدك صرت زوجته؟
يعني شنو خلص رافي طلع من حياتي صار ماأله وجود،؟
صرت اكتم شهكاتي بأيد واضرب على بالأيد الثانيه على گلبي ألي ميرضى يهدا ولايقنع بالواقع
أستجمعت قوتي وغيرت ملابسي بس مالبست ملابس النوم اني شفت امي من خلت بالجنطه بس ملابس نوم اعرف شنو قصدها خليت ريام تخليلي تراكات، اثنين، لبست واحد منهن،
فات شافني تفاجأ ضل يباوع عليه ولا عبرته ولادرتله بال
رحت للفراش مددت وتغطيت، اجه، يمي
حسام : حبيبتي شبيج؟
نورزان: تعبانه اريد انام
حسام: مو بعد وقت شفتهمت منج خلي نكعد نسولف،، نتعشا
نورزان: كل شي مااريد بس عوفني انام تعبانه
سمعته ينافخ ضاج عافني وراح للحمام
ضليت ابجي الى ان غفيت من التعب حسيت علي اخر الليل خال راسه برقبتي وحاضني تخبلت، دفعته بقوه،،،فز،،، نترت بي... انت شنو دتسوي؟
حسام: شبيج حبيبتي نسيتي اني رچلج وعندي حقوق عليج
نورزان: وين كلامك كدام اختي، لتخافيين عليها واداريها يوم واحد ماتحملت تصبر عليه وانت تعرف اني تعبانه ومريضه، وين حبك؟ وين كلامك؟ وصبرت وصبرت حتى اتزوجج ،كله كلام طلع مو؟
حسام: على كيفج ويايا اخذتيني حاصل فاصل
اني شنو كلت، عبالي صرتي احسن كلت نامت كم ساعه اكيد تحسنت هسه
نورزان: صار اسبوع نايمه بالفراش ماتحسنت بكم ساعه تريدني اطيب مو ؟
حسام: اي فهميني شنو بيج حتى اوديج للدكتور
نورزان: بعدين نحجي بهل الموضوع عفيه عوفني انام، اذا صدك تحبني حس بيه وراعي وضعي
حسام: على راحتج اكيد مااجبرج على شي بس لتخلين صبري يطول، لأن مااتحمل بعدج عني بعد
نورزان: نمت وفكرت اليوم خلصت شلون باقي الايام؟ شلون راح اكمل حياتي واني مااطيق حتى لمساته حتى قربه مني؟
اصعب شعور بالحياة وبدون مبالغه لمسات شخص منحبه ولانفسيتنه تتقبله ، الموت ارحم من هل شعور
وهنا سألت نفسي كم وحده انجبرت تتزوج شخص متريده؟شكم وحده عاشت ويا شخص متحبه؟
شلون عاشن وكملن حياتهن؟ شلون صبرن؟
ضليت افكر حسيت علي نام، اما اني فالنوم جافاني
ضليت افكر بالشخص ألي سماني وجعي ولوعة گلبي ضل كلامه يتردد بأذني، شديسوي ياترى؟
شلون مرت علي هل الليله،؟ هم نايم لو يفكر مثلي؟
ضليت على هل الحال للفجر سمعت صوت الأذان كمت توضيت وصليت ودعيت الله يبرد گلبي وگلبه، خلصت وبعدها نمت ماكنت اعرف اني هنا نايمه وحبيب عمري بغير مكان ينازع الموت!!!
